|
 Aan
die kruis praat Jesus sewe keer. Die sewe kruiswoorde word as volg
bymekaargevoeg uit die vertellinge van die verskillende evangelies:
1)
“Vader, vergeef hulle,
want hulle weet nie wat hulle doen nie!” (Luk. 23:34)
2)
“ Ek
verseker jou: Vandag sal jy saam met My in die paradys wees.” (Luk.
23:43)
3)
“Daar is u
seun... Daar is jou moeder.” (Joh. 19:26-27)
4)
“My God, my
God, waarom het U My verlaat?” (Matt. 27:46, Mark 15:34) (Die Boodskap:
waarom het U my alleen gelaat)
5)
“Ek is dors.”
(Joh. 19:28)
6)
“Dit is
volbring!” (Joh. 19:30)
7)
“Vader, in
U hande gee Ek my gees oor.” (Luk. 23:46) (Die Boodskap: My Vader, Ek is
besig om te sterf. Ontvang My asseblief daar by U”
“Vader, vergeef hulle, want hulle weet
nie wat hulle doen nie!” (Luk. 23:34)
Die eerste
kruiswoord gaan oor vergifnis.
Vergifnis is waaroor die kruis gaan. Dis waarvoor Jesus gekom het.
Vergifnis begin by God.
Ons het vergifnis nodig, want ons het almal gesondig en is vêr van God
af, daar is ’n kloof tussen ons en God a.g.v. ons sonde wat ons nie op
ons eie kan oorsteek nie.
Jesus het die prys kom betaal met sy lewe, met sy liggaam en sy bloed,
sodat ons vry kan wees, sodat ons verhouding met God herstel kan wees.
Kol 2:14
Hy het die skuldbewys met sy eise teen ons tot niet
gemaak. Deur dit aan die kruis te spyker, het Hy dit vir goed weggeneem.
Die kruis is die
brug van vergifnis waarmee ons die kloof tussen ons en God kan oorsteek.
As Jesus aan die kruis sê: “Vader, vergeef hulle”, bid Hy nie net vir
diegene wat Hom kruisig nie, Hy bid vir elkeen van ons, want dit is as’t
ware ons sonde wat Hom kruisig. As jy die enigste persoon op aarde was,
sou jy die een wees wat die spykers moes inkap.
“ Ek verseker jou: Vandag sal jy saam
met My in die paradys wees.” (Luk. 23:43)
Die tweede
kruiswoord gaan oor geloofsekerheid.
Die misdadiger aan die kruis langs Jesus besef dat dit net deur Jesus is
wat daar vir hom redding kan kom. Hy roep uit na Hom en Jesus gee hom
die sekerheid dat hy die ewige lewe sal hê / in die hemel sal wees /
gered is / by God sal wees.
Ons kan (en moet)
ook hierdie sekerheid hê wanneer ons Jesus aanneem as Verlosser, wanneer
ons na Hom uitroep en in Hom glo en Hom vertrou.
Die beloftes in die
Bybel is die basis vir die sekerheid wat ons kan hê:
Rom 10:11
Niemand wat in Hom glo sal teleurgestel word nie.
1 Joh. 5:13
Hierdie brief skrywe ek sodat julle kan weet dat julle
die ewige lewe het, julle wat in die Seun van God glo.
Joh. 6:47
Wie in My glo, het die ewige lewe
Joh. 3:16
Sodat dié wat in Hom glo nie verlore sal gaan nie, maar
die ewige lewe sal hê.
Hand 16:31
Glo in die Here Jesus, en jy sal gered word.
“Daar is u seun... Daar is jou moeder.”
(Joh. 19:26-27)
Die derde kruiswoord
gaan oor troos en versorging.
Self in Sy grootste
pyn, verwerping, vernedering is die nood en behoeftes van die mense om
Hom vir Jesus belangrik.
So is ons
persoonlike versorging ook vir Hom belangrik en weet ons dat Hy sorg vir
ons daaglikse brood, vir ons veiligheid, vir ons inkomste, vir ons
gesondheid, vir ons geestelike behoeftes, ens. Hy is ons Herder wat ons
lei en na ons belange omsien.
Hy gee ook Sy Gees
aan ons as trooster en helper, sê die Woord (Joh. 14:26)
“My God, my God, waarom het U My verlaat?”
(Matt. 27:46, Mark 15:34) (Boodskap: waarom het U my alleen gelaat)
Aan
die kruis beleef Jesus dat God vêr is, dat Hy Hom alleen gelaat het.
Dit is die gevolg van sonde – dit bring skeiding
tussen ons en God / dit isoleer ons van God:
Jes 59:2
Dit is julle oortredinge wat skeiding gebring
het tussen julle en julle God, dit is julle sondes wat maak dat Hy Hom
nie aan julle steur nie en nie na julle wil luister nie
Omdat AL ons sonde
op Jesus was aan die kruis (omdat Hy sonde vir ons geword het / ’n
vervloekte in ons plek), het Hy Godverlatenheid beleef. Jesus se
Godverlatenheid is ook die prys wat Hy moes betaal sodat ons in God se
teenwoordigheid kan leef, nou en in die ewigheid.
“Ek is dors.” (Joh. 19:28)
Die vyfde kruiswoord
beklemtoon Jesus se intense lyding.
Ons moet onthou dat hoewel Jesus ten volle God
was, was Hy ook ten volle mens, en was die lyding wat hy deurgemaak het
eg en werklik.
Dink aan die pyn wat
Hy moes verduur het vandat Hy oorgegee is om gemartel en gekruisig te
word.
Terdoodveroordeeldes is naak aan ’n paal vasgemaak waar hulle met
houtstompe of met kort swepe waaraan balletjies met skerp stukke been
vasgemaak is. Dit het gelei tot diep wonde, geweldige bloeding en
intense pyn. Daarna moes die veroordeelde die
kruis dra tot by die plek van teregstelling. Al hierdie marteling kon
meebring dat ribbes gebreek is, wat dalk ’n long kon stukkend steek en
lei tot asemnood. Die gebrek aan kos en water tydens die verhoor en
marteling kon by nou ook al ontwatering meegebring het.
Saam met die kwaai bloedverlies het die liggaam gewoonlik
in ’n skoktoestand ingegaan wat die bloeddruk laat daal het en die
hartklop laat afneem het. By hierdie tyd sou ’n slagoffer al dikwels in
’n koma gegaan het. Die hoofoorsaak van die dood van ’n gekruisigde was
gewoonlik asemnood, veral omdat hy sou sukkel om asem te haal omdat hy
aan sy arms opgehang was. As jy jou bene kon reguit maak, sou dit dalk
help, maar die gekruisigde is só vasgemaak dat sy bene gebuig was en hy
dit nie reguit kon maak nie; dit sou in elk geval baie pynlik gewees het
omdat daar spykers deur sy voete ook was.
Jes. 53:4
Tog het Hy ons lyding op Hom geneem (Boodskap: Hy het die
pyn ervaar wat ons eintlik moes ervaar)
“Dit is volbring!” (Joh. 19:30)
Tetelestai. Die
sesde kruiswoord is die oorwinnings
woord.
Dit is die
hoogtepunt van die kruisiging, want hiermee sê Jesus dat Hy dít waarvoor
Hy gekom het, voltooi het, sy werk is afgehandel. Hy het betaal vir die
sonde van die mensdom.
Tetelestai is ’n
rekenkundige term wat op ’n rekening aangebring word om aan te toon dat
die rekening volledig vereffen is. Dit beteken dat die rekening van
opgestapelde sonde wat ons teen God het, nou deur Jesus ten volle betaal
is. Daar is geen skuld meer teen ons nie. The slate is clean!
“Vader, in U hande gee Ek my gees oor.”
(Luk. 23:46) (Boodskap: My Vader, Ek is besig om te sterf. Ontvang My
asseblief daar by U”
Die finale woorde
voordat Jesus sterf is woorde van oorgawe.
Sy sterwe is egter nie die einde nie, want op die Sondagoggend volg die
oorwinning wat Jesus oor die dood het. Hy gee ook daardie oorwinning vir
ons.
Ons kan ook met
sekerheid onsself oorgee aan die Vader (nou en wanneer ons sterf), want
Jesus het daardie pad vir ons gereed gemaak. Hy het gegaan om vir ons ’n
plek te voor te berei in die hemel en ons weet dat God ons daar sal
ontvang wanneer ons sterf.
|
