Verslag
As daar in die tyd rondom
Jesus se kruisiging 'n koerant op straat moes verskyn, sou die inwoners
van Jerusalem dalk die volgende hoofberig gelees het:
Paasfees
in Jerusalem! Op die vooraand van die Jode se jaarlikse Paasfees hang daar
ʼn donker wolk oor Jerusalem. Berigte van oral uit die stad bevestig dat
Jesus van Nasaret in die vroeë ure van Vrydagoggend gearresteer is. Daar
heers egter verdeeldheid onder die inwoners van Jerusalem oor hierdie
gebeure. Daar is hulle wat sê dat Jesus daarvoor gesoek het, terwyl ander
sê dat Hy onskuldig is.
In ʼn
gesprek met een van Jesus se dissipels, wat graag anoniem wil bly uit
vrees vir sy lewe en dat hy moontlik geviktimiseer kan word, is dit
duidelik dat die gebeure van die afgelope 4 dae grotendeels bygedra het
tot Jesus se arrestasie. Hy het dit soos volg verduidelik:
Afgelope
Maandag was die dag van Jesus se koms na Jerusalem. Hy het vir twee van
ons gevra om vir Hom ʼn donkie in die stad te gaan haal sodat Hy daarop kon
ry as Hy die stad sou inkom. Hy het vir ons gesê:
“Sê vir die mense van
Jerusalem: word wakker, julle Koning is op pad. Hy kom in eenvoud op ’n
donkie aangery.”
Toe ons
met die donkie by Jesus aankom, het die ander dissipels vir Hom ’n saal
van klere gemaak. Mense van oraloor het rondom Hom begin saamdrom. Die
meeste van hulle het los stukke klere wat hulle by hulle gehad het, voor
die donkie oopgegooi. Ander het weer boomtakke op die pad voor Hom oopgooi
sodat Hy op 'n groen tapyt kon ry. Hulle het Hom soos ’n koning verwelkom
en hard uitgeroep: “Hoera vir die Seun van Dawid! Prys Hom wat op gesag
van die Here self kom. Laat die hemel van ons vrolike hoera’s weergalm!”
So is
Jesus met 'n hele groep mense Jerusalem in. Dit het nogal ’n opskudding in
die stad veroorsaak. “Wat gaan aan? Wie is Hy?” het die mense in
Jerusalem probeer uitvind. “Dit is Jesus, die profeet uit Nasaret in
Galilea,” het ons uitgeroep.
As ek
nou moet sê, sou ek dink dat op daardie dag het Jesus se moeilikheid
eintlik begin, nie net omdat die mense Hom geëer het as die Seun van Dawid
en dit die Fariseërs en Skrifgeleerdes kwaad gemaak het nie, maar ook
omdat Hy op daardie selfde dag die tempel ingegaan het en die
tempelhandelaars daar weggejaag het. Hy het selfs hulle tafels en stoele
omgegooi en gesê dat die tempel 'n heilige plek is en nie 'n plek om
handel te dryf nie. Dit het die Fariseërs en Skrifgeleerdes vreeslik kwaad
gemaak.
Dinsdag,
net na Jesus se aankoms in Jerusalem, het Hy die skynheiligheid van
Jerusalem se godsdienstiges kaalvuis ontmasker. Hy het hulle beskuldig dat
hulle huigelaars is en hulle uitgewys as mense vir wie daar groot ellende
wag as hulle sou aanhou met hulle skynheiligheid. Daarvan het hulle niks
gehou nie.
Woensdag, was vir ons ʼn hartseer dag, want sonder dat ons dit geweet het,
het een van die dissipels, naamlik Judas Iskariot, agteraf met die vyand
gaan konkel om Jesus aan hulle uit te lewer en dit vir 'n klomp geld. Hoe
kon hy dit doen, want dit was mos verraad! Dit was vir ons baie sleg.
Donderdag was in sekere sin vir ons ʼn hoogtepunt, want op hierdie dag kon
ons saam met Jesus die Paasmaaltyd eet. Jesus het daardie aand baie dinge
met ons gedeel. Hy het ons van die nagmaal geleer en ons gewys dat ons
mekaar se voete moet was en mekaar so moet liefhê dat ons bereid moet wees
om vir mekaar te sterf.
Ek sal
daardie Donderdagaand in die bovertrek nooit vergeet nie. ’n Rukkie voor
sy arrestasie, het Hy saam met ons die jaarlikse Paasmaaltyd geëet. Hy het
die brood, wat deel van die Paasmaaltyd was, gevat en vir sy Vader
daarvoor dankie gesê. Hy breek toe die brood in kleiner stukke en deel dit
aan elkeen van ons uit. Terwyl Hy dit doen sê Hy: “Dit is my liggaam
wat net so vir julle gebreek word. Julle sal baie daarby baat. Elke keer
wat julle dit eet, moet julle dink aan wat ek alles vir julle gedoen het.”
Toe ons amper klaar geëet het, vat Jesus die groot beker waarin die wyn
gehou is en sê: “Die wyn in hierdie beker staan vir die nuwe ooreenkoms
wat God met julle gesluit het omdat my bloed vir julle gevloei het. Drink
die wyn en elke keer as julle dit drink, onthou dan wat Ek vir julle
gedoen het.”
Ons het
in stilte nagedink oor alles wat Jesus vir ons gesê het. Na die nagmaal
het Hy vir ons gebid. Dis ʼn gebed wat ek en die ander dissipels nooit sal
vergeet nie. Maar na hierdie gebed, kon ons sien iets is verkeerd, want
Jesus het toe koers gekies na Getsemane waar Hy later daardie aand
gearresteer is."
ʼn Nag van angs
Na die nagmaal in die
bovertrek, vertrek Jesus en sy dissipels na die tuin van Getsemane. En dit
is hier waar die dissipels kon sien en beleef wat die ware inhoud van die
nagmaal sou wees. Dit is hier wat hulle kon sien wat dit van Jesus sou vra
dat sy liggaam gebreek moes word en sy bloed moes vloei as ʼn volkome
versoening vir ons sondes.
In Getsemane het Jesus se
lyding ʼn punt van ondraaglikheid begin bereik, want hier het sy nag van
angs begin. In die evangelies lees ons dat Jesus so geworstel het oor wat
met Hom moes gebeur, dat sy sweet in bloeddruppels verander het. Ons lees
van ʼn worsteling met God:
“My Vader, kan U nie asseblief
u planne verander sodat Ek nie meer die pad wat vir My voorlê, hoef te
loop nie? Is daar nie dalk ’n ander uitweg nie? Vader, Ek probeer nie nou
self allerhande planne maak nie. Maak U die planne! Doen wat U wil en nie
wat Ek wil nie!”
Jesus beleef ʼn nag van angs,
angs wat Hy met niemand kon deel nie. Selfs sy volgelinge kon nie eens
saam met Hom waak nie. Toe Hy hulle vra om saam met Hom te bid, toe raak
hulle aan die slaap. Hierdie nag van angs moes Hy alleen deurworstel. Sy
liggaam is nie net aan die kruis gebreek en deurboor nie, maar hier het Hy
al iets van 'n Godverlatenheid begin ervaar.
Dit is in Getsemane waar Jesus
ʼn beslissende moment gedurende sy kort verblyf in Jerusalem ervaar het.
Daar het Hy vir oulaas voor die keuse gestaan om enduit aan te hou met sy
lydingspad. Dit was nou kruis toe, of terug na sy eie veiligheid.
In daardie nag van angs kon
Jesus nog van die lewensgevaarlike speelveld af padgee. Die grootste keuse
ooit in die heelal moes daardie aand geneem word. Daar tussen die olyfbome
en ʼn paar slapende dissipels moes Jesus finaal kies. Hoe ontsettend beperk
was sy keuses skielik. Hy het slegs een van twee paaie oorgehad om daardie
nag te bewandel: gehoorsaamheid of ongehoorsaamheid ........ die dood of
die lewe.
Goddank, Jesus het presies die
regte ding gedoen. Hy het op sy knieë voor God in gebed neergeval, want
aan sy Vader se voete sou Hy die regte antwoord vind. Daar in sy donkerte
oomblik was God se wil sy enigste roete. Daarom dat Jesus in sy swaarste
oomblikke steeds sy Vader se raadsplan as padkaart gebruik het. “Vader,
laat hierdie bitter beker tog by My verbygaan, maar laat u wil geskied!”
My liewe Vriend, ek weet nie
wat vandag in jou hart leef nie. Ek weet nie waarmee jy worstel nie, maar
een dink besef ek en dit is dat jy en ek die regte antwoord alleen aan die
voete van ons hemelse Vader sal kry. Dis alleen as ons tyd maak en eerlik
en opreg onsself voor die Vader gaan verootmoedig, eerlik voor Hom gaan
worstel, eerlik na sy wil vir ons lewens gaan soek, wat ons die regte
antwoorde sal kry. Dis alleen aan die voete van ons liefdevolle Vader waar
jy en ek sal ontdek wat die regte pad is wat ons moet loop.
Hy word uitgewys
Dit is met hierdie keuse, wat
Jesus daar in Getsemane geneem het, wat Hy weer by sy slapende dissipels
aankom, hulle wakker maar, omdat die uur van sy lyding gekom het:
“Staan op. Laat ons loop. Kyk, die man wat my verraai is hier naby!”
En dan ken ons die geskiedenis
hoe Judas saam met die soldate aangekom het om Jesus gevange te neem. Maar
hulle het ʼn probleem gehad, want omdat daar dikwels so baie mense in die
tuin van Getsemane lê en slaap het, wou die Jode wat Jesus gevange wou
neem, nie ʼn fout maak en in die donker die verkeerde persoon arresteer
nie. Daarom het hulle iemand saamgeneem wat Jesus baie goed geken het,
naamlik vir Judas. Hy moes Jesus tussen al die mense in die donker
skaduwees van die olyfbome vir hulle gaan uitwys.
“Dit is Ek!”
Maar nou speel hier tog ʼn stuk
ironie homself af: ʼn Hele afdeling Romeinse soldate is nader geroep om
saam met Judas die taak te gaan uitvoer om Jesus te arresteer. Ironies, is
dit nie? Al hierdie geharde soldate om een man te vang wat self nie eens ʼn
wapen gedra het nie, ʼn Man wat verkondig het dat jy die ander wang moet
draai, ʼn Man wat sy volgelinge geleer het dat jy jou vyande moet liefhê.
Toe die stoet met hulle wapens
en lampe van die stadspoort se kant teen die heuwel afmarsjeer, kon Jesus
sekerlik tussen die skares verdwyn het, maar Hy doen dit nie. Inteendeel,
toe die soldate naby Jesus kon, staan Hy op en stap hulle tegemoet. Judas
kry nie eens kans om sy silwer muntstukke te verdien deur Jesus te verraai
nie, want Hy hardloop of kruip nie weg, sodat Judas Hom moes soek nie.
Nee, Hy kom vreesloos vorentoe en vra: “Wie soek julle?” En dan
antwoord hulle: “Jesus van Nasaret.”
En toe gebeur daar iets wat ʼn
mens byna nie kan glo nie. Jesus sê vir hulle: “Dit is Ek!”. Dan
lees ons dat hulle voor Hom neergeval het. Juis hierin lê die ironie van
hierdie eienaardige gebeure daar in Getsemane. Hier staan die onoorwinlike
Romeinse soldate, die sterkste mag wat die mens kon bied, en teenoor hulle
staan ʼn Man wat geen weerstand bied nie, inteendeel, Hy lyk weerloos en Hy
kom gee Homself oor.
Dan vra Hy weer: “Wie soek
julle?” En dan antwoord hulle: “Jesus van Nasaret.” En dan
antwoord Jesus weer: “Dit is Ek!”
In daardie nag van angs in
Getsemane, is Jesus se aardse koers finaal beseël. Toe Hy sê: “Dit is
Ek!”, kon Hy nie meer omdraai nie en was daar geen keuse meer nie.
Daar was al die tyd toe net een keuse, een regte beslissing toe Hy gesê
het: “Dit is Ek!”.
Daarmee het Hy God se beker
stewig in sy hande geneem, ʼn beker wat propvol lyding was.... ook propvol
met ons sondes! Maar Hy het dit enduit gedrink! Dit was die enigste
uitweg, die hoofpad na die Lewe toe. Goddank! Anders was die ganse mensdom
se geskiedenis vandag 100% anders. As Jesus daar in Getsemane teruggedeins
het van sy gehoorsaamheid aan God, was ons vir altyd in die donker
opgesluit. Dan was ons tot verby kop-diepte in die gemors. Gelukkig het
dit nie gebeur nie, want Jesus was enduit op die regte koers na Golgota
toe.
Die almag van Jesus blyk
duidelik uit die woorde wat Hy gesê het: “Dit is Ek”! want met
hierdie woorde het Hy eintlik na Homself verwys as God. God het Homself
immers by die brandende braambos aan Moses bekend gestel as: “Ek is wat
Ek is”.
Nou gebruik Jesus presies
dieselfde Naam. Net die wyse alleen waarop Jesus hierdie Naam uitgespreek
het, was ʼn teken van mag en Goddelike krag, want die soldate kon nie
anders as om neer te val nie. Jesus hoef niks eers te doen nie – Hy hoef
alleen maar te praat. Reeds daarin kan ons sien wie Jesus werklik is,
naamlik God self wat in jou en my plek die pad van lyding, die pad van
angs kom loop het.
... vir jou en my
Vriende, dit was ʼn nag van
angs ....... vir jou en my, want sonder hierdie nag van angs is 'n lewe
van oorvloed, 'n lewe van hoop, net nie vir ons moontlik nie.
Toe Jesus bloed gesweet het en
by sy Vader gepleit het dat die beker by Hom verby moet gaan, het Hy tog
in daardie oomblikke aan jou en my gedink en daarom kon Hy sê: “Nie my
wil nie, maar u wil geskied”, daarom kon Hy die pad van lyding met
volharding loop, sodat ons die lewe kan hê en dit in oorvloed, sodat daar
ook uit jou en my strome lewende water kan vloei!
Dit was ʼn nag van angs, ʼn nag
van alleenheid vir jou en my, sodat ek nie weer angs hoef te ervaar nie,
sodat ek kan weet dat as ek roep in my nood, as ek roep om vergifnis, as
ek na die lewe roep, as ek roep omdat ek nie meer hoop het nie, Jesus ook
vir my sal sê: “Dit is Ek!”
Daarom weet ons ook dat Jesus
nie aan die kruis gaan hang het uit weerloosheid nie, maar uit krag en uit
sy krag sien ons sy liefde op sy helderste. En dit is uit hierdie krag van
sterkte waarvan ek en jy kan put as ons op ons swakste voel, waarin ek en
jy die lewe kan ervaar. Daar is geen ander manier na die lewe nie, geen
ander manier na strome lewende water nie!
En nou...strome lewende
water!!
Nou kan jy miskien vir my sê
dat dit net nie vir jou voel of daar strome lewende water uit jou binneste
vloei nie. Jy kan dalk vir my sê dat as ek jou lewe geken het en gesien
het wat alles al skeef in jou lewe geloop het, ek nie so maklik sou sê dat
God ook vir jou bedoel het dat daar strome lewende water uit jou binneste
kan vloei nie. Ek sou dalk nie so maklik gesê het dat God oor jou droom en
Hy in sy nag van angs in Getsemane ook aan jou gedink het nie, want al wat
jy sien is:
·
ʼn deurmekaar lewe van
hartseer en ongeluk,
·
ʼn lewe van waaroms en
dinge wat nie uitwerk nie,
·
ʼn lewe van
onbeantwoorde gebede en stukkende drome.
Jy is reg. Ek ken nie jou lewe
nie en ek weet nie van jou seer nie. Ek weet ook nie waarmee jy stoei en
wat vir jou moeilik is nie.
Maar een ding wéét ek en ek
glo dit met my hele hart: God droom oor jou! Ek weet dat Hy daardie aand
in Getsemane en ook aan die kruis, aan jou en my gedink het. En daarom is
God se droom vir jou dat daar strome lewende water uit jou binneste sal
vloei, waar jy ʼn lewe sal leef waar jy God se vreugde en teenwoordigheid
elke dag in jou lewe sal ervaar. Weet jy hoe weet ek dit? Want daar was 'n
nag van angs in Getsemane, daar was 'n kruis waar Jesus vir jou en my
gesterf het, daar is die Woord van God wat belowe dat hulle wat hul dors
erken, hulle wat na die Bron van die lewende water kom, se dors geles sal
word en daar strome lewende water uit sy binneste sal vloei!
As Jesus in Joh 7 mense
uitnooi na die bron van lewende water, lyk dit tog of hier sprake is van
mense wat vergeet het dat God oor hulle droom. Dit is mense wat moeg was,
wat dors was. Dit was mense wat in alle waarskynlikheid afgemat was, mense
wat nie goed deur die lewe behandel is nie, mense wat onder die juk van
die Romeine moes leef. Dit was dalk mense vir wie die lewe nie sin gemaak
het nie, vir wie die lewe net een te veel geword het.
Ek weet dat daar vandag ook
mense is:
·
wat moeg is en nie meer
kans sien om voort te gaan nie;
·
wat die druk van die
lewe net nie meer kan hanteer nie;
·
wat nie meer kans sien
om met hul stukkende verhoudings voort te gaan nie;
·
wat nie meer kans sien
vir die een onbeantwoorde gebed na die ander nie;
·
wat dalk moedeloos is
omdat daar geen groei in hul geloofslewe is nie.
Kan ek vir jou sê: Die Here
sien jou nood. Hy sien jou dors. Hy sien jou hunkering na ʼn lewe van
oorvloed en betekenis, ʼn lewe wat sin maak, ʼn lewe waar daar strome
lewende water uit jou binneste sal vloei.
En daarom het was dit vir
Jesus nodig om 'n nag van angs te moes deurleef, sodat daar strome lewende
water vir jou en my moontlik is en roep Hy vanoggend uit: “Almal wat
dors het ……!”
Die mense wat na Jesus
geluister het, het baie goed geweet wat dit is om dors te wees, want hulle
het in ʼn semi-woestyn gewoon. Die dors waarna Jesus dus verwys, is ʼn dors
wat kom as jy al lank sonder water is en daarna smag.
Hy sien iets van hierdie dors
in die lewe van mense. Hy sien iets van hierdie dors in jou lewe en daarom
roep Hy na jou: “Almal wat dors het ……kom!”
Die oplossing … kom en
drink
Jy sien, baie mense vandag het
dors, maar doen niks daaraan nie. Daarom sê Jesus: “Kom en drink”.
Die enigste manier hoe my dors geles kan word, is om te drink. Ek kan voor
die kraan staan as ek dors het, maar dit sal nie my dors les nie as ek nie
die kraan oopdraai en drink nie.
My liewe Vriend, dis al
oplossing wat daar is as die dinge nie vir jou uitwerk nie, as die lewe
nie sin maak nie, as dit voel of daar nie betekenis en groei in jou lewe
is nie. Jy moet gaan drink! Jy moet ophou om self te probeer. Jy moet
ophou worstel en God blameer en vinger na Hom wys as dinge nie uitwerk
nie. Jy moet gaan drink.
God wil jou vrymaak. Hy sê in
Jes 55:1: "Kom, almal wat
dors is, kom na die water toe, selfs ook dié wat nie geld het nie, kom,
koop en eet; ja, kom, koop sonder geld en sonder om te betaal, wyn en
melk."
God het al lankal jou nood
raakgesien en daarom roep Hy vandag weer na jou omdat Hy ook in sy nag van
angs aan jou gedink het: “As jy
dors het, kom na My toe kom en kom drink uit die fontein van lewende
water!”
Die belofte … strome
lewende water
Jy sien, in hierdie
uitnodiging is daar ook 'n wonderlike belofte opgesluit. Ons lees in
Joh 7:37b-38: “As iemand dors
het, laat hy na My toe kom en drink! Met die een wat in My glo, is dit
soos die Skrif sê: Strome lewende water sal uit sy binneste vloei.”
Die strome lewende water
waarvan hier gepraat word, gaan oor ʼn stroom water wat soos ʼn fontein
aanhou loop en nie kan opdroog nie. En dit is wat Jesus jou en my aanbied.
Dis wat sy bedoeling was toe Hy 'n nag van angs deurworstel het, toe Hy
aan die kruis vir jou en my gesterf het. Mense wat moeg is, hulle wat dors
is, kan asem skep en gaan water drink by ʼn bron wat nie opdroog nie. Die
water wat Christus jou en my aanbied is water wat lewe gee, soos wat die
Samaritaanse vrou daar by die put in Joh 4:13-14 ontdek het.
Maar hierdie belofte sê ook,
dat hulle wat na Hom kom en drink se dors nie net geles sal word nie, maar
wie in Hom glo en drink, sal self
soos ʼn fontein van lewende water word. Wie in Jesus glo sal word soos ʼn
rivier wat lewe rondom homself skep en ook die lewe van God vir ander laat
toekom.
Hoe is
dit moontlik? Dit is moontlik, omdat die strome lewende water hier na die
Heilige Gees verwys. Wie na Jesus kom en in Hom glo, wie glo dat Hy die
weg, die waarheid en die lewe is, sal die volheid van die Heilige Gees
ervaar, ervaar dat die Heilige Gees in en deur mense tot vernuwing en lewe
werk. God gaan dus die lewe deur die wêreld laat vloei en wel deur die
uitstorting van die Heilige Gees in en deur die lewens van mens wat in Hom
glo.
Dit is wat God jou vandag wil
bied en waarom Hy aan die kruis gesterf het, waarom Hy Godverlate moes
wees, waarom Hy in die tuin van Getsemane 'n nag van angs beleef het: Hy
bied aan jou vandag strome lewende water. Hy bied aan jou die volheid van
lewe. Hy bied aan jou Goddelike asem wat deur jou binneste vloei (Job
33:4). Hy bied aan jou die lewe van die Heilige Gees.
Mag
hierdie Paasfees vir jou 'n vreugdefees wees, nie omdat al jou sorge en
probleme skielik iets van die verlede is nie, want die lewe gebeur steeds,
maar omdat Jesus vir jou en my 'n pad van vrede voorberei het, 'n pad waar
strome lewende water uit ons binneste sal vloei, omdat ons vandag besluit
het om ons dors te gaan les by die bron van alle lewe. Jesus se nag van
angs, sy dag van eensaamheid aan die kruis, was vir jou en my, sodat ons
kan lewe!
|