Ons
leef in ‘n wêreld waar die mens alewig soekend is. Soms is daar dinge
wat ons ontwyk, wat ons net nooit raaksien nie. Soms kyk ons dinge mis,
omdat ons net nie wíl sien nie. Soms sien ons dinge raak, maar ons misken
dit. Soms soek ons bewyse...
Joh 20:19-28 Daardie Sondagaand was die
dissipels bymekaar. Alhoewel die deure gesluit was omdat hulle bang was
vir die Jode, het Jesus gekom en tussen hulle gaan staan en vir hulle gesê:
"Vrede vir julle!" Nadat Hy dit gesê het, wys Hy sy hande en sy
sy vir hulle. Die dissipels was baie bly toe hulle die Here sien.
"Vrede vir julle!" sê Hy weer vir hulle. "Soos die Vader
My gestuur het, stuur Ek julle ook." Nadat Hy dit gesê het, blaas Hy
oor hulle en sê: "Ontvang die Heilige Gees! As julle vir mense hulle
sondes vergewe, word dit hulle deur God vergewe; as julle dit nie vergewe
nie, word dit nie deur God vergewe nie." Tomas, wat ook Didimus
genoem is, een van die twaalf, was nie by die dissipels toe Jesus gekom
het nie. Die ander dissipels sê toe vir hom: "Ons het die Here
gesien!" Maar hy sê vir hulle: "As ek nie die merke van die
spykers in sy hande sien en my vinger in die merke van die spykers steek
en my hand in sy sy steek nie, sal ek nooit glo nie."
Ag dae later was Jesus se dissipels weer bymekaar, en Tomas was by
hulle. Hoewel die deure gesluit was, het Jesus gekom en tussen hulle gaan
staan en gesê: "Vrede vir julle!" Daarna sê Hy vir Tomas:
"Bring jou vinger hier en kyk na my hande; en bring jou hand en steek
hom in my sy; en moenie langer ongelowig wees nie, maar wees
gelowig." En Tomas sê vir Hom: "My Here en my God!"
Tomas het gesien,
ervaar, Jesus gehoor, saam met Hom geloop … alles! Maar toe twyfel hy
nog steeds. In hierdie traumatiese tyd moes dit seker bitter moeilik wees
om regtig staande te bly. En toe hy Jesus voor hom sien staan, vra hy
bewyse. En Jesus gee dit vir hom: bring jou vinger, kyk na My hande. TOE
glo hy. Net so kyk ons daagliks sulke wonderlike dinge rondom ons mis,
omdat ons alles as so vanselfsprekend aanvaar. So kom die ongelowige en hy
sê dat niks wat ons as Christene doen vir hom sin maak nie. Die ateïs sê
hy kan nie glo in iets wat hy nie kan sien nie. Hy soek bewyse, en hoe meer
bewyse jy voorhou, hoe meer word dit geïgnoreer. Maar … as jy WIL sien,
dan sal jy! Kan jy my nou sien? Weet jy hoe ek lyk? Behalwe as jy my
persoonlik ken, sal jy sê “nee”. Glo jy ek bestaan? Wel, as jy soos
‘n ateïs dink, sal jy sê nee, want ek sien hom nie, daarom bestaan hy
nie. Jy sien, die Here het vir ons twee belangrike dinge gegee: sintuie en
gesonde verstand. Die feit dat jy my kan hoor praat oor die radio, bewys
vir jou dat ek bestaan, of hoe? Dit kan nie anders nie! Met jou verstand
kan jy dit uitredeneer.
Die wêreld is
vol bewyse: ‘n sagte geritsel van ‘n boom bewys dat daar ‘n windjie
waai, al sien ons nie die wind nie. In Gen 3:8 hoor ons hoe God in die
aandwind in die tuin wandel. Soms is die wind net ‘n sagte geritsel,
soms is dit stormwinde wat dakke afwaai. Die Here verskaf die bewyse dat
die wind bestaan. Aan die ander kant kan ons die son sien, sowel as die
bewyse dat dit bestaan. As ons kan sien waar ons loop, sonder kunsmatige
lig, weet ons dat die son skyn. In die skeppingsverhaal lees ons dat God
die groot hemelligte skep om lig te verskaf bedags en snags. ‘n Lekker
warm broei in die sonnetjie bewys dat die son se strale gearriveer het.
Die Here gee so baie bewyse; partykeer het ons net so bietjie kennis en
redenasievermoë nodig om dit te snap. Die Here gee vir die mens soveel
insig en verstand dat hy by wonderbaarlike ontdekkings kan uitkom, en bv
natuurwette kan verstaan en dit toepas en gebruik om sy lewe te verbeter.
So het Einstein se formule E=mc2 veroorsaak dat ons kernenergie
kan opwek wat elektrisiteit kan voorsien. Wonderlik!
Opgrawings bewys
die geskiedenis. Dit bewys dat die mense geleef het waarvan die Bybel
praat. Ongelukkig is die negatiewe ook waar. Leuens bewys ‘n vals
persoon. Die Bybel sê so. Gierigheid bewys die moontlike gevaar van geld.
Bose planne bewys ‘n onregverdige mens. Oorlog is die bewys van
magmalheid. ‘n Aanhoudende gekla bewys ondankbaarheid. Geknakte kinders
bewys gebroke huise. Geweld in die huis bewys die geweldadige effek van
egskeiding. Dwelms en selfmoord bewys soms afwesige ouers.
Kindermolestering bewys ‘n siek siel. Die positiewe kant: ‘n bloesende
vrou bewys ‘n man wat haar liefhet. Vrolike gelag bewys vrede en vreugde
in ‘n huis. Kinders wat dankie sê bewys ‘n goeie opvoeding. Vrede in
jou hart bewys vergenoegdheid. ‘n Lekker drukkie bewys iemand wat omgee.
So ook ‘n onverwagse oproep. ‘n Kind wat vooruitgaan in die lewe is
die bewys van stabiliteit in die ouerhuis. ‘n Liefdesbriefie in die
kosblik bewys dat iemand aan jou dink. Gebrek aan oordadige bekommernis
bewys dat ‘n persoon werklik kan vertrou. Iemand wat gereeld getuig van
God, bewys opregte geloof. Sing, lag, dans, bewys dat God iemand se hart
geïnfiltreer het.
Die Skepping
bewys ‘n Skepper. Kompleksiteit bewys ‘n briljante ontwerper. Die
Bybel bewys die skrywers, en die ongelooflike akkuraatheid daarvan bewys
die werking van die Heilige Gees. ‘n Graf bewys ‘n dooie liggaam, maar
‘n leë graf bewys ‘n opgestane Here. Liefde, vreugde, vrede, geduld,
vriendelikheid, goedhartigheid, getrouheid, nederigheid en selfbeheersing
bewys die vrug van die Gees. Genesing bewys nie ‘n dokter nie, maar ‘n
Geneser (wat die dokter as instrument gebruik). Om méér te hê as wat jy
verdien, bewys God se seën. Om weer op te staan nadat jy geval het, bewys
dat God dáár is vir jou. Om vandag te kan ingaan terwyl jy nie weet hoe
jy dit gaan maak nie, bewys vertroue en hoop in dié Een wat jy nie kan
sien nie. Om terug te kyk en soms net één ry spore te sien, bewys dat
God nog altyd getrou was. Om te ervaar hoe diepgewortelde pyn met tyd
genees, bewys dat daar ‘n “gentle Healer” aan die werk is in jou
lewe. Onbeskryflike genade bewys dat daar ‘n kruis was. Ongekende liefde
bewys 1 Kor 13 korrek: nou bly geloof, hoop en liefde – die grootste
hiervan is die liefde. ‘n Klop aan jou hart, bewys dat Jesus met jou
‘n feesmaal wil hê. ‘n Seun bewys 'n vader – so bewys die Seun,
Jesus Christus, die bestaan van God die Vader. Sy hemelvaart bewys ‘n
plek waar ek en jy vir ewig saam met die Koning van die konings kan heers.
Soek jy nog
bewyse? Is hierdie nie genoeg nie? Is dit nie wonderlik hoe God Hom aan
ons openbaar nie?
As
jy nou ‘n sagte stem in jou gemoed hoor, bewys dit dat God met jóú
‘n saak het.
|