Ons sien anderdag
‘n fliek met die naam “The Joneses”. Oulike fliek met baie lewenslesse.
Dit gaan oor hierdie oënskynlike volmaakte familie: pa, ma, seun en dogter
(jong volwassenes), wat in hierdie paleis van ‘n huis in ‘n spog
woonbuurt intrek en net mooi alles het wat geld kan koop. Mooi mense –
letterlik – en baie ryk. Al die bure staan verstom oor hierdie mense se
vriendelikheid en gasvryheid, en dan nog meer, oor hulle besittings. En
natuurlik wil almal vreeslik graag hê wat hulle besit, en wees soos hulle
is. Vandaar die naam Joneses ... jy weet, “the Joneses next door”. Daar is
egter ‘n kinkel in die kabel, want die Joneses was daar geplant om juis
die Joneses next door te wees. Jy weet mos, die gras is altyd groener aan
die ander kant. Ek wil hê wat jy het. Afguns? Jaloesie? Sieklike begeerte?
Lyk dit dalk vir jou of die Here se guns meer anderkant die draad werk? So
is die mens maar, of hoe? Dis egter interessant om te sien hoe ver die
mens sal gaan om by die Joneses te kom. In hierdie fliek speel ‘n tragedie
af oor iemand wat net nie kon byhou met die Joneses nie. Weet jy die Bybel
praat ongelooflik baie oor geld. En die meeste daarvan is waarskuwings. In
Spreuke is daar baie sulke tekste (geskryf deur Salomo wat skatryk was)
Miskien is dit juis hoekom hy so ernstig was oor die gevare van geld. Geld
is goed, en welvaart is seën van die Here, maar tot waar sal ons gaan om
dit te verkry?
Dis vir my nogal
snaaks dat mense dikwels die Here se seën meet aan materiële dinge.
Wanneer ons gesond is, of genoeg geld in die bank het, of as daar goeie
verhoudings is, sê ons maklik dat die Here ons seën. Maar, as van hierdie
dinge ontbreek, voel ons of die Here die seën-kraantjie bietjie toedraai.
As ons die Joneses se nuwe off-road karavaantjie sien, dan voel ons sommer
of die Here nou ‘n nuwe witbroodjie gekies het. Wanneer hierdie ding in ‘n
sieklike jaloesie ontaard, gaan mense nogal na die ekstreme om dinge in
hulle guns te swaai.
Hab 2:5-11
'n Hooghartige mens wat hom deur sy rykdom laat mislei, sal nie in sy doel
slaag nie, al is hy so gulsig soos die doderyk, so onversadigbaar soos die
dood, al versamel hy al die nasies rondom hom, al maak hy gevangenes van
al die volke.
Dieselfde volke sal spotliedjies oor hom sing en met minagting na hom
verwys. Hulle sal sê: Ellende wag vir hom wat hom verryk met goed wat nie
syne is nie, wat vir hom al meer goed inpalm wat verpand is. Hoe lank sal
dit nog voortduur? Die tyd kom vinnig nader dat jy self in die skuld sal
wees, dat skuldeisers vir wie jy sidder, skielik voor jou sal staan en jou
sal kaalstroop. Jy het baie nasies geplunder, maar nou sal dié wat
oorgebly het, jou plunder, want jy het baie bloed vergiet, geweld gepleeg
in baie lande, teen stede en teen hulle inwoners. Ellende wag vir hom wat hom ten koste van ander wou
verryk en daardeur 'n ramp oor sy familie gebring het, hy wat vir hom 'n
hoë nes wou bou juis om 'n ramp vry te spring. Met jou geknoei het jy jou
familie se ondergang bewerk; jy wou baie volke uitroei, maar daarmee het
jy 'n einde aan jou eie lewe gemaak.
Selfs die klippe in die mure skreeu oor wat jy gedoen het, en die balke
skreeu saam.
Sjoe, dis eintlik
harde woorde hierdie . Mense wat hulleself verryk ten koste van ander. ‘n
Hoë nes bou.... Iemand wat hom verryk met goed wat nie syne is nie. Die
mens soek maar altyd na meer. Weet jy hoe maklik is dit om selfs as
Christene skuldig te wees aan hierdie situasie in Habakuk 2? Jy
rasionaliseer net die hele ding. Mense sal aanspraak maak op die Here se
seën, materiële seën, selfs al het die Here besluit dat dit nie vir hulle
beskore is nie. Daar is mos mense wat glo dat kinders van die Here nie met
geld moet sukkel nie. Ek is jammer, maar ek lees dan seker ‘n ander Bybel.
Die Bybel verwys telkens daarna dat ons ons oor die armes moet ontferm.
Byvoorbeeld:
Spr 14:31
Wie ‘n arm mens verdruk, beledig sy Maker; wie hom oor ‘n arm mens
ontferm, eer God.
Spr 19:17
Wie hom oor ‘n arm mense ontferm, gee ‘n lening aan die Here, en Hy sal
hom ten volle vergoed.
Party het baie,
en ander nie. Hoe tevrede is jy om NIE Mr en Mrs Jones te wees nie?
Is jy tevrede?
Of is jy dalk
juis Mr Jones? Miskien besef jy dit nie. Kan jy nog tel? ... jou seëninge
tel?
Spr 30:7-9
Net twee dinge vra ek van U; moet my dit tog nie weier nie; daarna kan ek
sterf: moenie
toelaat dat ek vals is en lieg nie; moet my nie arm maak of ryk nie, gee
my net die kos wat ek nodig het, sodat ek nie te veel het en U verloën en
sê: “Wie is die Here?” nie, en sodat ek nie arm word en steel en my God se
Naam oneer aandoen nie.
Kom ek sê vir jou: As jy hierdie woorde kan waar maak in jou lewe, IS
jy Mr Jones, want dan het jy alles wat belangrik is. Sien jy hierdie
ongelooflike balans? Net genoeg! Maar – ek dink nie jy moet oor die muur
loer nie, want dis waar die probleme kom. As die buurman of iemand in jou
familie beter as jy doen, is dit dalk omdat hy baie hard gewerk het
daarvoor, dalk harder studeer het, meer vindingryk met sy geld gewerk het,
dalk ‘n berekende risiko of twee geneem het. Dan gun ek dit 100% vir hom.
Dan seën die Here hom. Maar miskien het hy ander uitgebuit, sy gesin
verwoes, sy huwelik verloor, gesteel, bedrog gepleeg, oneerlik sake
gedoen, ander op hulle knieë gedwing, of kniediep in die skuld beland. Dan
kan hy sy rykdom en welvaart maar hou – dit kom nie van die Here af nie.
Die woord “vrede”
kom voor in die woord “tevrede”. Het jy daardie vrede?
Miskien is jy the
Jones next door. As jou huwelik gesond is, kyk die mense van anderkant die
draad verlangend na jou, of jy dit besef of nie. As jy goeie verhoudinge
handhaaf, kan jy trots wees op wat jy het. As jy ‘n mens is wat in jouself
vreugde kan vind, en kan waardeer wat die Here in jou ingebou het, selfs
al is jy gestrem, dan kyk ander met leep ogies na jou. As jy ‘n eerbare
lewe lei, en nie toelaat dat jaloesie jou onderkry nie, kan ander maar
opkyk na jou. As jy met baie min oor die weg moet kom, maar die Here prys
vir elke happie kos en stukkie klere, is jy ryker as ‘n miljoen Joneses.
As jy in ‘n goeie verhouding met die Here leef, hang jy uit met dié Een
wat in elk geval alles besit. Dis nogal iets waarna ander mense kan opkyk,
of hoe? Party mense dink hulle het “friends in high places”, maar mens, jy
het ‘n “Friend in the highest place”.
My vriend, jy kan
ryk wees, ryker as enige mens op aarde, as jou vreugde in die Here gesetel
is.
Jes 2:22
Moenie op mense staatmaak nie, hulle blaas so maklik die asem uit.
Hulle is min werd.
Nee wat, vergeet die
Joneses, kyk na Jesus. Hy het niks gehad nie, maar Hy kan jou álles gee.
|