Kom ons begin by wat die Bybel daaroor sê:

Heb 10:19-23
19 Broers, ons het dus nou deur die bloed van Jesus vrye toegang tot die heiligdom,
20 en dit op 'n weg wat nuut is en na die lewe lei. Hierdie weg het Hy vir ons gebaan deur die voorhangsel heen, dit is deur sy liggaam.
21 En terwyl ons Hom ook as groot priester oor die huis van God het,
22 laat ons tot God nader met 'n opregte hart en met volle geloofsekerheid. Ons harte is immers gereinig van 'n skuldige gewete, en ons liggame is gewas met skoon water.
23 Laat ons styf vashou aan die hoop wat ons bely, want God is getrou: Hy doen wat Hy beloof het.

…met 'n opregte hart en met geloofSEKERHEID. In hierdie gedeelte is dit baie duidelik dat ons ons status kan ken. Ons kan wéét, en ons kan nou-al weet. En daarom kan 'n mens die vraag vra: "Is jy gered?". Ja, of nee. Die antwoord kan wees: "Ja, verseker!", "Nee, definitief nie", of "Ek weet nie". "Ek weet nie", is nie noodwendig negatief nie, dit kan beteken dat 'n mens nie alles reg verstaan nie, maar wel gered is. Om "nee" te sê impliseer waarskynlik dat mens glo dat jy redding nodig het, maar dit nie het nie. Dis eintlik ook goeie nuus, want erkenning is die eerste stap op die pad van geloofsekerheid. As die antwoord "ja" is, is dit skitterend, solank dit 'n eerlike, ware antwoord is. Ek het al baie gesien dat sommiges se "ja" ligjare van die waarheid is. Dis soos party mense mos vir jou sê: "the cheque is in the mail"! Ons sê dit net om die ander ou gelukkig te maak, omdat dit is wat hy graag wil hoor. Wat sê jy vandag op hierdie vraag?

Kom ons gaan terug na die heel begin:

Gen 3:1-6
1 Die slang was listiger as al die wilde diere wat deur die Here God gemaak is en het vir die vrou gevra: "Het God werklik gesê julle mag van geen boom in die tuin eet nie?"
2 Die vrou het die slang geantwoord: "Ons mag eet van die vrugte van die bome in die tuin.
3 God het net gesê ons mag nie eet van die vrugte van die boom in die middel van die tuin nie en ons mag dit nie aanraak nie, want dan sterf ons."
4 Toe sê die slang vir die vrou: "Julle sal beslis nie sterf nie,
5 maar God weet dat julle oë sal oopgaan die dag as julle van daardie boom eet en dan sal julle soos God wees deurdat julle alles kan ken."
6 Toe besef die vrou dat die boom se vrugte goed is om te eet en mooi om na te kyk en begeerlik omdat dit kennis kan gee. En sy het van sy vrugte gepluk en geëet. Sy het ook vir haar man by haar gegee, en hy het geëet.

Die sondeval vind plaas, en dit bring skeiding tussen God en mens. Van daardie hap van die vrug af, het die mense se pad van ellende begin, en versoening tussen God en mens het nodig geword. Die aanvanklike metode om hierdie versoening te bewerkstellig was die bring van offers. En hier begin 'n proses van stryd, waar dit dikwels voel of die bose die goeie gaan oorwin. Dag vir dag het hierdie stryd voortgeduur. Die eerste punt is dus dat die mens beslis verlossing nodig het, en dit alreeds nodig het vanaf die paradys dae. Die tweede punt is dat die mens maklik in twyfel verval, want die oplossing wat Jesus bied, klink nét te goed, en te eenvoudig om waar te wees. En dan probeer Satan natuurlik ook nog sy verlorenheid met jou deel.

Joh 10:1-10
1 "Dít verseker Ek julle: Wie nie deur die hek in die skaapkraal ingaan nie maar van 'n ander kant af inklim, is 'n dief en 'n rower.
2 Maar hy wat deur die hek ingaan, is die skape se herder;
3 vir hom maak die hekwagter oop. Die skape luister na die herder se stem. Hy roep sy skape op hulle name en lei hulle uit.
4 Wanneer hy al sy skape uitgebring het, loop hy voor hulle uit, en die skape volg hom, omdat hulle sy stem ken.
5 Hulle sal nooit 'n vreemde volg nie maar van hom af weghardloop, omdat hulle nie die stem van vreemdes ken nie."
6 Deur hierdie beeld het Jesus met hulle gepraat, maar hulle het nie verstaan wat dit was wat Hy vir hulle wou sê nie.
7 Toe het Jesus verder gesê: "Dít verseker Ek julle: Ek is die ingang vir die skape.
8 Almal wat voor My gekom het, is diewe en rowers; maar die skape het nie na hulle geluister nie.
9 Ek is die ingang; as iemand deur My ingaan, sal hy gered word. Hy sal in en uit gaan en weiding kry.
10 'n Dief kom net steel en slag en uitroei; Ek het gekom sodat hulle die lewe kan hê, en dit in oorvloed.

Satan, die dief en rower wil jou "vreugde om te weet" by jou steel. Weet jy hoe doen hy dit? Deur jou te herinner aan jou verlede. Jou verlede, so terloops, het so pas tot 'n einde gekom. En omdat ons kinders van Jesus is, hou jou verlede elke oomblik van elke dag op.

Die derde punt is: jy kan niks doen nie, want jy het nie genoeg bokke en bulle vir die offers nie, en jy sal ook nooit genoeg hê nie!

Heb 10:1-7
1 Die wet van Moses is slegs 'n skadubeeld van die weldade wat sou kom, nie 'n werklike beeld daarvan nie. Voortdurend, jaar na jaar, word dieselfde offers gebring, en tog kan die wet dié wat die offers bring, nooit volkome van sonde vry maak nie.
2 As dié wat offers bring, eens en vir altyd gereinig en nie meer van sondes bewus was nie, sou hulle immers opgehou het om offers te bring.
3 Maar nou herinner die offers juis jaar na jaar aan die sondes,
4 omdat die bloed van bulle en bokke onmoontlik die sondes kan wegneem.
5 Daarom sê Christus met sy koms in die wêreld: "Dit is nie diereoffer en graanoffer wat U wou hê nie, maar die liggaam wat U My gegee het.
6 Brandoffers en sondeoffers het U nie behaag nie!
7 Toe het Ek gesê: Kyk, Ek het gekom, o God, om u wil te doen. In die boekrol is dit van My geskrywe."

Jy sien, die koms van Jesus aarde toe het nie die sondeval opgehef, of weggevee nie. Dit het die metode van saligheid verander. Geen dier- en graanoffers, maar die liggaam van Christus. Heb 10:1 praat van die wet van Moses - daardie wet wat ons voel of dit ons vervloek. Hoekom? Want ek en jy kán op geen manier die wet onderhou nie. Dit is net onmoontlik vir ons armsalige swakkelinge. Omdat ons dit nie kán onderhou nie, en nie genoeg offerdiere het nie, het ons naarstigtelik hulp nodig. Daardie hulp kan nie van 'n dier, of 'n mens, of 'n goeie daad, of 'n miljoen goeie dade afkom nie. Jy sien, die loon van die sonde is die dood, en bly die dood. (Rom 6:23). Dis nie eers "Rocket Science" om dit uit te werk nie. Daarom het ons Iemand nodig om die veroordeling weg te vee … nie soseer die sondige dade nie, nee, die veroordeling.

Rom 8:1-3
1 Daar is dus nou geen veroordeling vir dié wat in Christus Jesus is nie.
2 Die wet van die Gees wat aan jou in Christus Jesus die lewe gee, het jou vrygemaak van die wet van sonde en dood.
3 Wat die wet nie by magte was om te doen nie, omdat dit weens ons sondige natuur te swak was, dit het God gedoen. Hy het met die sonde afgereken deur sy eie Seun in dieselfde gestalte as die sondige mens te stuur; so het Hy die sonde in die sondige bestaan van die mens veroordeel.

Wow, onbeskryflik, of hoe? Omdat die oordeel bloedneus geslaan is, kan die sondige natuur van God se kinders nie meer ons uiteinde oorheers nie. Natuurlik is sonde sleg. Dit lei tot ellende, en daarom wil ons daarmee afreken.

Dus, die laaste punt is eenvoudig: "Jy kan NOU al die vreugde van jou Saligheid beleef en lééf."

Luister wat sê die Here hieroor:

Joh 6:47
Dit verseker Ek julle: Wie in My glo, het die ewige lewe

Joh 6:35
Maar Jesus sê vir hulle: "Ek is die brood wat lewe gee. Wie na My toe kom, sal nooit weer honger kry nie, en wie in My glo, sal nooit weer dors kry nie.

1 Joh 5:12
Wie die Seun het, het die lewe; wie nie die Seun van God het nie, het ook nie die lewe nie.

1 Joh 5:13
Hierdie brief skrywe ek vir julle, sodat julle kan weet dat julle die ewige lewe het, julle wat in die Seun van God glo.

Twee woorde wat die heeltyd hier uitspring is "het" en "glo". Jy HET die ewige lewe, as jy in Jesus GLO. Tetelestai. Jesus se laaste woord voor Hy sterf. Tetelestai. Volbring. Betaal. Afgehandel.

Hoe lyk jou status vandag? Gered? Ongered? Onseker? Bid saam met my om sekerheid: