Jona
– ‘n koddige man, en ‘n vreemde boek in die Bybel. Ook ‘n storie wat
nogal moeilik is om te glo. Kan jy dit glo – ‘n vis sluk hom in en
red sy lewe? Dit was nadat hy op pad Ninevé toe koue voete kry en na
Tarsis toe uitwyk. En dan gaan waarsku hy die mense oor God se
oordeel, God besluit om die stad te spaar, en Jona vererg hom vir
die Here. Dit klink vir my nogal na ‘n sepie! Glo jy dit alles? Wel,
ek glo dit verseker! Elke stukkie, ook dié deel oor die vis. Die
boek Jona verdien meer as die 30 minute wat ek hier daaraan kan
spandeer, want hier is net ongelooflik baie lewenslesse in vasgevang.
Dit is ‘n kort boek, gepak met waarhede. Ek glo die boek is waar,
maar selfs al sien mens dit net as ‘n gelykenis, is dit nog steeds
baie kosbaar.
Jona 1:1-4, 9-12, 17 & Jona 2:1-10
Die woord van die Here het tot Jona seun van Amittai gekom: "Maak
klaar, gaan na die groot stad Nineve toe en spreek hom aan, want Ek
weet hoe sleg hy is."
Maar Jona het klaargemaak om na Tarsis toe te vlug,
weg van die Here af. Jona is af Joppe toe, en daar het hy 'n skip
gekry wat op vertrek was Tarsis toe. Hy het vir die reis betaal en
aan boord gegaan om saam met die bemanning Tarsis toe te gaan, weg
van die Here af. Maar die Here het 'n kwaai storm oor die see laat
opkom. Daar was 'n baie sterk wind op die see, en die skip wou
uitmekaar breek.
Jona het hulle geantwoord: "Ek is 'n Hebreër. Ek dien
die Here die God van die hemel wat die see en die vasteland gemaak
het." Die manne het baie bang geword en vir Jona gesê: "Wat het jy
nou aangevang?" Hulle het te wete gekom dat hy van die Here af
wegvlug: Jona het hulle dit self vertel. Toe vra hulle hom: "Wat
moet ons met jou maak dat die see weer rondom ons kan kalm word?"
Die see het ondertussen al hoe onstuimiger geword. Jona het hulle
geantwoord: "Vat my en gooi my in die see, dan sal dit kalm word
rondom julle, want ek weet dit is oor my dat hierdie groot storm
rondom julle woed."
Toe stuur die Here 'n groot vis om vir Jona in te
sluk, en hy was drie dae en nagte in die vis se maag
Toe bid Jona daar binne-in die vis tot die Here sy
God. Jona het gesê: "In my nood het ek tot die Here geroep, en Hy
het my gebed verhoor. Diep in die doderyk het ek hulp gevra, en U,
Here, het my gehoor. U het my die diepte ingegooi, diep in die see,
en die watermassa het my omring. U het golf na golf oor my laat gaan.
Ek het gedink ek het uit u gesig verdwyn, maar tog sal ek weer u
heilige tempel aanskou. Die waters het my toegevou, die groot water
het my omring, seegras was om my kop gedraai. Ek het afgesak tot by
die fondamente van die berge, die aarde het my vir altyd toegesluit.
Maar U, Here my God, het my van die dood gered. Toe ek wou vergaan,
het ek aan die Here gedink, en my gebed het by U gekom, in u heilige
tempel. Dié wat op nuttelose afgode vertrou, verlaat Hom wat liefde
aan hulle betoon. Terwyl ek 'n loflied sing, wil ek aan U 'n offer
bring; wat ek beloof het, sal ek doen. Hulp kom net van die Here af."
Toe beveel die Here die vis, en hy het vir Jona op die vasteland
uitgespoeg.
Lewensles 1: Die Here stuur
vir Jona Ninevé toe, maar hy wil Tarsis toe. Ons maak ook so. Ons
bid vir lank dat die Here vir ons moet deure oopmaak om te bedien,
om deur Hom gebruik te word – dan maak Hy die deur oop, en ons soek
eintlik ‘n ander deur wat makliker lyk, miskien meer “glamorous”,
iets wat minder van my vra, iets wat beter by my pas, ens. Ons sê
maklik: “Here, hier is ek, gebruik my” .... maar net nie in my eie
familie nie, ook nie by die werk nie, ook nie by die plakkerskamp
nie. Die punt is: Die Here wou Ninevé red, nie Tarsis nie. Die Here
weet waar Hy ons wil gebruik, ongeag van waar ons graag WIL werk.
Lewensles 2: Jona se ongehoorsaamheid laat hom en
baie saam met hom, in ‘n storm beland. Ons maak ook so. Soms laat
die Here ons toe om van Hom af weg te vlug, dan land ons in woeste
storms. En soms, Soos Jona, sleep ons ander saam die storms in .
Onskuldiges. Jona besef dat hy drooggemaak het, en kies selfmoord,
eerder as om terug te draai na God toe. Ons maak ook so, draai
eerder ons rug op die lewe, as om terug te kom na God toe.
Lewensles 3: Die Here laat
toe dat hulle vir Jona in die see gooi, en daar sink hy. Hy kies
steeds eerder die dood. Onbegryplik! Maar, dan stuur die Here ‘n
“submarine” om hom te gaan uithaal. ‘n Vis. Jy sien, maak nie saak
hoeveel ons droogmaak nie, en hoeveel ons dit oor onsself bring nie,
die Here se liefde hou nie op nie. Hy sal steeds tot die uiterste
toe gaan om ons te red. Al gebruik Hy die mees ekstreme maniere
denkbaar. Toe sluk die vis vir Jona in! Ek het afgesak tot by die
fondamente van die berge, die aarde het my vir altyd toegesluit.
Maar U, Here my God, het my van die dood gered. Toe ek wou vergaan,
het ek aan die Here gedink, en my gebed het by U gekom, in u heilige
tempel. (Jona 2:6-7) ... en hy bid. Dalk het hy gedink hy is nou
op sy einde. Maar, hy prys die Here. Kan ek en jy dit doen? Prys jy
die Here? Prys jy die Here selfs aan gaan dit sleg met jou?
Lewensles 4: Die Here gee
weer vir Jona sy opdrag: maak klaar en gaan, Ek sal vir jou die
boodskap gee. Jona gaan, en hy verkondig die boodskap, hierdie keer
soos die Here wil. Ons moet oppas dat ons nie ‘n verdraaide boodskap
verkondig nie, of ‘n afgewaterde boodskap, of bylas by die boodskap
nie. Dis moeilik om presies te weet wat ons moet verkondig.
Partykeer lyk die taak wat die Here ons gee massief, maar Hy vra dat
ons net moet verkondig wat Hy sê ons moet. Jona se woorde was
eenvoudig: “nog net 40 dae en Ninevé word verwoes”. Een sin. Hy hoef
niks verder te verduidelik nie. Jy kan miskien dink dat God sekerlik
self die mense kon waarsku, maar Hy wou Jona daarvoor gebruik.
Lewensles 5: Toe God
sien wat hulle doen, en hoe hulle hulle bekeer van hulle verkeerde
dade, het Hy afgesien van die ramp wat Hy gesê het Hy oor hulle sal
bring. Hy het nie die ramp gestuur nie. (Jona
3:10) Die Here kan sy planne verander as Hy wil. Hy is soewerein, Hy
kan doen wat Hy wil, Hy is almagtig. Hy kan alles vanself laat
gebeur, maar gebruik nogtans soms ‘n kiepie soos Jona, of soos ek en
jy. Hy maak soos Hy goed weet, en sal mense red as ek en jy ons werk
doen. Gaan vertel net, die Here red.
Lewensles 6: Hieroor was
Jona baie ontevrede en hy het baie kwaad geword.
(Jona 4:1) Toe is hy kwaad. Soos ons ook soms as die Here vir mense
‘n kans gee, en ons dink hulle verdien dit nie. Die Here is lief
vir jou, en my, en vir Sodom en Gomorra en vir Ninevé en vir
Sunnyside, Mamelodi, Hillbrow, ens. Hy wil sy kinders red, of ons
daarvan hou of nie. Verkondig net sy woord – dis al.
Lewensles 7: "Laat ek
nou maar sterf, Here, want dit is vir my beter om te sterf as om te
lewe." Toe vra die Here vir hom: "Het jy rede om kwaad te word?"
Jona is toe uit die stad uit. Hy het oos van die stad gaan sit en
vir hom 'n skerm gebou. Hy het daaronder in die skaduwee gaan sit om
te sien wat in die stad gebeur. Toe laat die Here God 'n
komkommerplant opkom, en dit het bo-oor Jona gerank om skaduwee te
gee vir sy kop en om hom van sy misnoeë te bevry. Jona was baie bly
oor die komkommerplant. Die volgende môre met dagbreek laat God toe
'n wurm kom, en dit het aan die komkommerplant gevreet, sodat dit
verdroog het.
Toe die son opkom, het God 'n skroeiende sterk wind
uit die ooste laat waai. Die son het vir Jona op sy kop gesteek, en
hy het baie swak geword en gewens om maar liewer te sterf. Hy het
gesê: "Dit is vir my beter om te sterf as om te lewe."
Toe vra God vir Jona: "Het jy rede om kwaad te word
oor die komkommerplant?" en Jona antwoord: "Ek het rede genoeg: ek
is besig om te sterf!" Die Here het vir Jona gesê: "Jy is besorg oor
die komkommerplant waarvoor jy nie gewerk het nie en wat jy nie
versorg het nie. Dit het oornag opgekom en oornag is dit dood.
Maar Ek mag nie besorg wees oor die groot stad Nineve
nie, 'n stad waarin daar meer as honderd en twintig duisend mense is
wat nie weet wat reg of verkeerd is nie, en ook nog baie diere?"
(Jona 4:3-11)
In sy misnoeë gaan sit Jona onder sy skerm. God stuur
in ‘n oogwink ‘n komkommerplant om hom te bedek. (Kom ons stop geou
hier ... net so kan die Here in ‘n oogwink vir ons uitkoms gee, om
ons van ons misnoeë te verlos) En toe vat God die komkommerplant
weer weg, in ‘n oogwink. En Jona is so kwaad oor die komkommerplant
dat hy vergeet dat God ‘n hele stad gered het. Selfsug, eie belang,
eie agenda, sien nie God se prentjie nie, worry nie oor siele nie –
is dit miskien ek of jy?
Sewe lesse uit die verhaal oor die koddige ou, Jona.
Kom ons pas bietjie daarvan toe in ons lewens vandag.
|