Elke
maatskappy het 'n visie- en missie-stelling. Kort en kragtig beteken
dit: waarheen is jy op pad, en hoe gaan jy daar kom? Nou ja, hierdie
hele ding gaan uit die aard van die saak oor keuses. Jy maak 'n
keuse van waarheen jy op pad is, en kies dan dag vir dag om op
daardie pad te bly. Ek wil nie per definisie praat oor saligheid nie,
maar eerder oor ons dag tot dag lewe. Natuurlik is my visie die
ewige lewe (dit waarheen ek op pad is), en ek moet die pad hemel toe
stap. Maar, nou, hier op aarde, is die vraag wat gaan ek doen om
goed te eindig? Ek gaan 'n besluit neem, en ek gaan daarby bly.
Ef 4:25 - 5:5
Noudat julle die valsheid afgelê het, moet julle onder mekaar die
waarheid praat, want ons is lede van dieselfde liggaam.
As julle kwaad word, moenie sondig nie, en moenie 'n dag kwaad
afsluit nie.
Moenie die duiwel vatkans gee nie.
As iemand 'n dief is, moet hy ophou steel; hy moet deur harde werk
op 'n eerbare manier self in sy lewensonderhoud voorsien; dan sal hy
iets hê om vir die armes te gee.
Vuil taal moet daar nooit uit julle mond kom nie; praat net wat goed
en opbouend is volgens die eis van omstandighede, sodat dit julle
hoorders ten goede kan kom.
En moenie die Heilige Gees van God bedroef nie, want Hy het julle as
die eiendom van God beseël met die oog op die verlossingsdag.
Moet nooit verbitter of opvlieënd wees of woedend word nie; moenie
vloek of skel nie; moet niks doen wat sleg is nie.
Wees goedgesind en hartlik teenoor mekaar, en vergewe mekaar soos
God julle ook in Christus vergewe het.
Omdat julle kinders van God is en Hy julle liefhet, moet julle sy
voorbeeld volg.
Lewe in liefde, soos Christus ons ook liefgehad en om ons ontwil sy
lewe as 'n offergawe gegee het, ja, 'n offer wat vir God aanneemlik
was.
Soos dit gelowiges betaam, moet daar van ontug, onsedelikheid in
enige vorm, of gierigheid onder julle selfs geen sprake wees nie.
Growwe, ligsinnige of vuil praatjies pas nie by julle nie; nee, dank
aan God pas by julle.
Dít moet julle goed besef: iemand wat ontug pleeg, onsedelik lewe of
'n gierigaard is - want gierigheid is afgodery - het nie deel aan
die koninkryk van Christus en van God nie.
Riglyne vir die nuwe lewe, noem Paulus hierdie
gedeelte. Dit is sekerlik 'n skitterende visie - om goed en skoon te
lewe. Dan noem hy 'n klomp punte wat ons kan sê sy missie is - hoe
om die nuwe lewe te lei. Hy sê jy : 1) moet die waarheid praat 2)
moenie sondig as jy kwaad word nie 3) moenie 'n dag kwaad afsluit
nie 4) moenie die duiwel 'n vatkans gee nie 5) moenie steel nie 6)
moet iets vir die armes oorhou 7) moenie vuil taal gebruik nie 8)
moet opbouend praat 9) moenie die Heilige Gees bedroef nie 10)
moenie verbitterd, opvlieënd, woedend word nie 11) moenie vloek,
skel of iets sleg doen nie 12) moet goedgesind wees 13) moet vergewe
14) moet lief wees vir dié om jou 15) moenie ontugtig, onsedelik
wees nie 16) moenie gierig wees nie.
Paulus het hierdie goed mooi beskryf as 'n missie
stelling. Ek wil dit bymekaartrek in die volgende woorde as my
missie stelling: Ek wil nie opfoeter nie. Ek wil nie my lewe
opfoeter nie, en dus ook nie ander mense in my lewe opfoeter nie.
Ek wil nie my huwelik opfoeter nie. Dis
maklik om jou huwelik op te foeter. Dit begin as respek vir jou
lewensmaat begin kwyn. Wanneer daardie aanvanklike vlammetjie begin
blus. Dan tree ge-irriteerdheid in, onttrekking volg, kommunikasie
begin verdwyn, en eventueel is intimiteit iets van die verlede. Dan
.. kom Poppie by die werk op die toneel, of die frisgeboude Adonis.
Eers is dit net praatjies, dan ongesonde geklets of grappies, dan
praat jy uit die huis uit, en woep-wap, is julle bagasie op mekaar
verlief. Die huwelik is nou amptelik opgefoeter, en ou sekelstert
sit lekker en giggel in sy hoekie. Nee, kom ons maak dit reg! Ontdek
mekaar opnuut, ontdek weer dit wat julle aanvanklik na mekaar toe
aangetrek het. Besluit om dinge sáám te doen, ontdek mekaar se
liefdestale - party mense hou van drukkies en aanraking, ander van
geskenkies ontvang, ander van onverdeelde aandag, ander van mooi
woorde en ander hou daarvan as jy hulle help. Doen vir mekaar wat jy
weet vir die ander een belangrik en lekker is. Ontwikkel die beste
in jou lewensmaat. Verander JY eerste, dan sal hy/sy ook verander.
Ek wil nie my huwelik opfoeter nie, want ek wil nie ongelukkig wees
en eendag alleen oud word nie.
Ek wil nie ander verhoudinge opfoeter nie. Ek
wil vir my kinders 'n Pa wees - daarom moet drank gou-gou iets van
die verlede wees. Drink liewer te min as te veel, of nog beter,
drink liewer niks. Niemand het nog ooit iets oorgekom van te min
alkohol nie. Die beste Pa wat ek vir my kinders kan wees, is een wat
hulle respekteer, en ook hulle Ma respekteer (al is julle geskei).
Ek wil nie my kinders se respek verloor deur 'n slegte voorbeeld te
stel nie. Nee, maak reg, begin nuut!
Ek wil nie my verhoudinge met my kollegas
opfoeter nie. Ek wil dáár wees as my vriend my nodig het. Dis
nogal sleg om jou vriend se ondergang te bewerkstellig - dis maklik
om dit te doen: lei hom net in die versoeking met "kom maak 'n dop
saam met my", of "gaan saam met my na die strip-klub", ens. Jy kan
ook sorg dat jy hom weghou van sy gesin af met sport of ander
aktiwiteite. Nee, ek wil 'n vriend wees waarop iemand kan staatmaak,
veral in moeilike tye. Ek wil nie verhoudinge opfoeter nie.
Ek wil nie myself opfoeter nie. Dis maklik om
jouself op te foeter… voorkom dit deur altyd selfrespek te handhaaf.
Dis nogal sleg as iemand anders jou afbreek a.g.v. jou lewenstyl of
optrede. Selfwaarde is iets wat mens in jouself opbou en ontwikkel.
Om te leer om altyd tevrede te wees is een van die belangrikste
beleggings wat jy in jouself kan maak. Wees altyd positief en
optimisties. Nee, kom ons bou onsself weer van nuuts af op.
Ek wil nie my verhouding met God opfoeter nie.
Hoe nader ek aan hom leef, hoe beter word al die res van my missie
stellings. Foeter jy ander goed op, dan taan jou verhouding met die
Here outomaties. Tyd saam met die Here maak dat ek Sy stem beter kan
hoor, dan wéét ek mos wat die regte pad is. Neem Hom as jou
Verlosser aan, dan eindig jy in elk geval op die regte plek. Maak Sy
kinders seer en die verhouding met Hom is in gedrang. Loop op die
breë pad (dis mos die een wat so lekker loop), en jy sien gou-gou
dat die nou pad nie eers meer in sig is nie. Stomp jou geestelike
lewe af, en ál die ander aspekte van jou lewe kom in die moeilikheid.
Nee wat, kom ons maak reg met God. Besef dat Hy God is, ken Sy Seun,
Jesus Christus, bid vir die Heilige Gees om jou lewe vol te maak, en
dit raak al hoe makliker om nie meer op te foeter nie.
Dis beter om goed te eindig as sleg - logies, of
hoe? Wel as dit so is, hoekom maak ons dan so baie droog? As 'n
goeie huwelik aangenaam is, hoekom foeter ons dit dan op? As ons
lief is vir ons kinders, hoekom is ons voorbeeld so sleg?
Kom ons maak vandag besluite oor ons missie, en
implementeer dit vandag, en geniet 'n goeie lewe.
|