So
met die reënseisoen kan die veld darem maar eenmaal pragtig word. En
nee, jy hoef nie noodwendig Namakwaland toe te gaan daarvoor nie (toegegee,
dis baie naby aan Paradys), jy kan sommer net hier langs ons eie
snelweë na die veld kyk en jy sien hoe die wêreld transformeer nadat
die reën so lustig geval het. Eers begin die swart afgebrande veld
plek maak vir groen sprietjies, dan groei die veldgras al hoe hoër
en naderhand is die swart weg. En dan, eers hier en daar, dan baie
meer, begin die blommetjies uitkom. Nog later volg plate en plate
blommetjies, so asof 'n onsigbare hand die veld optower soos 'n
pragtige skildery van die lieflikste landskap. Verruklik!
Onlangs het ons gesien hoe die veld tussen Centurion
en die middestad van Pretoria opgedollie word met sulke pragtige
pienk-pers blommetjies. Plate en plate van hulle wat sommer so uit
die niet verskyn het, en dit het die veld in die mooiste kunswerk
opgetower. Die kop waar die Voortrekker Monument staan het die
mooiste van mooi geword en dit het talle mense soontoe gelok. Dit
was mooi om na te kyk, maar...
En daar sit 'n groot “maar” agter hierdie blommeprag.
Dis ongelukkig net die oppervlak wat mooi lyk. Dit wat die oog kan
sien kan geen fout vind nie, maar daar is 'n groot “maar”. Die
meeste mense sal verstom staan om te weet dat daar niks mooi sit
agter hierdie beeldskone blommetjies nie.
Op die oppervlak kan dinge nogal goed en aanloklik
lyk, dit kan mense van heinde en ver trek, maar dit kan so
misleidend wees sonder dat mens dit weet. Weet jy hoekom daar meer
agter so 'n saak kan sit? Want ons het nie al die kennis nie! So is
dit ook op Geestelike gebied. Mense, groeperinge, bewegings, wat op
die oppervlak so goed lyk, maar onder die oppervlak is dinge bietjie
anders. Ons besef dit gewoonlik eers wanneer daar kennis bykom.
2 Tim 3:5 “Hulle sal nog die
uiterlike skyn van die godsdiens hê, maar die krag van die godsdiens
sal hulle nie ken nie. Bly weg van sulke mense af.”
Klink of Paulus nogal de vieste in is vir iemand. Hy
waarsku ernstig teen die uiterlike skyn van hierdie mense. Soos die
blommetjies by die Monument.
Hierdie blommetjies word Pom-Pom blommetjies genoem
en is 'n indringer plant van Suid-Amerika en hulle groei geil na
goeie reëns. Sommer so vanself. Mens kan jouself natuurlik dan afvra
wat die probleem is daarmee. 'n Porsche is immers nie 'n
Suid-Afrikaanse produk nie maar is mooi en gesog in enige land in
die wêreld. 'n Porsche is nou maar eenmaal 'n Porsche. Net so is die
Pom-Pom mos maar mooi op enige plek waar hulle groei. Tot jy meer
weet.
Jy sien, die Pom-Pom's verdring die natuurlike
veldgras en roei dit letterlik uit. Steeds nie 'n probleem nie? Dis
tog mooier as veldgras? Die probleem is, dit verdring en roei die
veldgras uit wat die diere moet eet. Die Pom-Poms kan nie geëet word
nie want dit is bitter en oneetbaar. Omdat dit die veldgras uitroei
het die diere nie meer kos nie en die hele natuur ly daaronder. Teen
die tyd dat die blommetjies verlep (wat kortstondig groei) is daar
nie tyd vir die veldgras om betyds terug te groei vir kos vir die
diere nie.
Soveel vir hierdie “mooi”...
Net so, sê Paulus, moet ons oppas vir dinge wat so
mooi kan lyk op die oppervlak, maar sleg kan wees onder die
uiterlike skyn. Ons moet versigtig wees vir dinge wat net die
uiterlike skyn van die godsdiens het. Hy skryf in hierdie brief aan
Timoteus eintlik die volgende waarskuwing: “My seun, oppas, jy het
dalk net nie al die feite wat jy nodig het nie”.
Wanneer Paulus hier vir Timoteus so ernstig waarsku,
klink dit eintlik of hierdie goed nie iets met Christenskap te doen
kan hê nie, maar of hy eerder uitvaar teen heidene en goddeloses.
2 Tim 3:1-9
Dít moet jy weet: in die laaste dae sal
daar swaar tye kom.
Die mense sal selfsugtig wees, geldgierig, grootpraterig en verwaand,
beledigend teenoor hulle medemense en ongehoorsaam aan hulle ouers,
ondankbaar en ongodsdienstig; hulle sal liefdeloos en onversoenlik
wees, kwaadpraters, bandeloos en wreed, sonder liefde vir die goeie;
hulle sal verraaiers wees, roekeloos en hooghartig. Hulle sal eerder
liefde vir genot hê as liefde vir God. Hulle sal nog die uiterlike
skyn van die godsdiens hê, maar die krag van die godsdiens sal hulle
nie ken nie. Bly weg van sulke mense af. Party van hulle dring in
die huise in en kry liggelowige vroue wat met sonde belaai is en
deur allerlei sinlike begeertes gedryf word, in hulle mag, vroue wat
altyd iets wil leer, maar tog nooit tot die kennis van die waarheid
kan kom nie. Net soos Jannes en Jambres hulle teen Moses verset
het, so verset hierdie mense hulle teen die waarheid, mense wat in
die verstand verward is en in die geloof 'n mislukking. Maar hulle
sal nie ver kom nie, omdat hulle dwaasheid vir almal duidelik sal
wees, net soos dit die geval was met Jannes en Jambres.
Kwaadpraters, liefdeloos, losbandig, bandeloos,
wreed... Klink baie ongodsdienstig. Maar tog sê hy: “Hulle sal nog
die uiterlike skyn van die godsdiens hê...”
Pragtige pienk Pom-Pom blommetjies op die oppervlak
wat duisende mense trek, maar verrot van binne. Eintlik is ek self
soms so 'n Pom-Pom blommetjie wat kleurig en geurig is om na te kyk,
maar bitter is om aan te kou.
Ons moet onsself afvra waarmee ons besig is in ons
geestelike lewe. Jy sien, toe mense gestroom het om na hierdie
blommetjies te gaan kyk, was dit regtig in opregtheid, sonder slegte
bedoelings. Net so is mense op soek na die waarheid en wil in
opregtheid gevoed word met Geestelike kos en soek na dinge met
Geestelike waarde, maar die pienk blommetjies hou niks goed in nie.
Kol 2:23
Wat julle ook al doen, doen dit van harte
soos vir die Here en nie vir mense nie.
Matt 24:23-28
“As iemand in daardie tyd vir julle sê: ‘Kyk, hier is die
Christus!’ of: ‘Kyk, daar is Hy!’ moet julle dit nie glo nie. Daar
sal vals christusse en vals profete na vore kom, en hulle sal groot
tekens en wonderwerke doen om, as dit moontlik was, selfs die
uitverkorenes te mislei. Kyk, Ek het dit vir julle vooruit gesê. En
as die mense vir julle sê: ‘Kyk, Hy is in die woestyn!’ moet julle
nie daarheen gaan nie; of as hulle sê: ‘Hy is in die slaapkamer!’
moet julle dit nie glo nie. Die koms van die Seun van die mens sal
wees soos 'n weerligstraal wat in die ooste uitslaan en die hele
lugruim tot in die weste verlig. “Waar die aas ook al lê, daar sal
die aasvoëls bymekaarkom.”
Sommige mense maak nogal mooi prentjies, maar is
bitter om aan te kou. Hoe lyk blommetjies wat goed is om aan te kou?
Watse werk moet ons vir die Here doen wat goed en reg is? Wil ons
nie dalk soms dinge aanpak wat ons nooit moes aanpak nie?
Rom 12:1-2
En nou doen ek 'n beroep op julle, broers, op grond van die groot
ontferming van God: Gee julleself aan God as lewende en heilige
offers wat vir Hom aanneemlik is. Dit is die wesenlike van die
godsdiens wat julle moet beoefen. Julle moenie aan hierdie sondige
wêreld gelyk word nie, maar laat God julle verander deur julle denke
te vernuwe. Dan sal julle ook kan onderskei wat die wil van God is,
wat vir Hom goed en aanneemlik en volmaak is.
Is dit nie ongelooflik mooi nie? Sonder fieterjasies
en sonder pretensies.
“Gee jouself aan God as lewende en heilige offers wat
vir Hom aanneemlik is, dit is die wesenlike van die godsdiens wat
julle moet beoefen”.
Nie altyd maklik nie want die Here sê uitdruklik in
Sy Woord dat dit nie altyd maklik sal wees nie.
2Tim 4:1-5
Ek beveel jou voor God en voor Christus
Jesus wat die lewendes en die dooies sal oordeel, ek beveel jou met
die oog op sy koms en sy koningskap: verkondig die woord; hou
daarmee vol, tydig en ontydig; weerlê, bestraf, bemoedig deur met
alle geduld onderrig te gee, want daar sal 'n tyd kom wanneer die
mense die gesonde leer nie meer sal verdra nie. Hulle sal hulle eie
begeertes volg en vir hulle leermeesters bymekaarmaak wat net sal sê
wat hulle graag wil hoor. Hulle sal die waarheid nie wil hoor nie en
hulle tot verdigsels wend. Maar bly jy in alle omstandighede nugter,
verdra lyding, doen jou werk as verkondiger van die evangelie, voer
al die pligte van jou bediening uit.
Hou vol, byt vas, druk deur. Verkondig die Evangelie.
Hier sê Paulus jy moet tydig en ontydig die Evangelie verkondig. Dit
is 'n God-grootte projek. Jy sien, as ons dit doen in God se
landskap mag ons dalk na niks lyk nie. Geen pragtige pienk
blommetjies nie, mense sal dalk nie na ons toe stroom nie, en jy sal
soms voel of jy niks bereik nie, maar dit is ware voedsel.
Soms lyk ons soos vaal veldgrassies, maar dis eetbaar en voedsaam,
dit gee lewe en maak 'n reuse verskil. Dit gee krag, en het waarde.
Wees liewer 'n onaansienlike veldgrassie as 'n
indringer blommetjie wat niks goeds inhou nie.
“Dit is die wesenlike van die godsdiens wat julle
moet beoefen...”
|