Dis
Paastyd. Goeie Vrydag is op pad en die gedagtes rondom Jesus se
kruisiging word weer herdenk en weer lewendig gemaak. Net so maak
ons met Geloftedag, Soweto dag en ander dae wat ons herinner aan pyn,
vernedering, swaarkry of verlies van iets wat vir ons belangrik en
kosbaar was. Ons hou daarvan om in ons gedagtes terug te gaan na
“daardie dag” toe. Dan dink ons miskien aan die onregverdigheid van
die situasie, die hartseer wat daar beleef is en dan huil ons...
Ek vra vandag vir jou, as jy aan Jesus se kruisdood
dink, huil jy? Waaroor huil jy? Miskien oor Pilatus se
papbroekigheid? Die mense se onregverdigheid? Wat voel vir jou
verkeerd in die situasie? Ek wonder die afgelope paar dae wat in
Jesus se gemoed moes gewees het toe Hy die “Via Dolorosa” gestap
het. Hier loop Hy, dalk moet ons eerder sê strompel Hy, nadat Hy
half verwoes is deur die houe wat Hy reeds moes verduur. Simon van
Sirene dra Sy kruis.... op pad na Golgota toe. ’n Lam ter slagting –
op pad om te sterf. Waaraan dink Hy? Miskien dink Hy aan...
Judas: een van die twaalf,
vir wie Hy lief was; die een wat Hom verraai het. Die een wat alles
beleef en gehoor het, maar tog téén Jesus gekies het. Hy kon dalk
dink aan die Judasse wat nog sou kom in hierdie lewe. Hulle sou
later ander name hê, dalk iets soos Willem Botha. Mense wat hulle
rug op Hom sou draai...
Petrus: Miskien het Hy
gedink aan Petrus, die een wat Hom sou verloën, selfs voor ’n
eenvoudige diensmeisie.
Die ander dissipels: Hy het
dalk gewonder wat van hulle geword het, want dit was uiteindelik net
Johannes wat by die kruis kom staan het.
As jy so dink aan Jesus wat daardie pad stap na Sy
dood toe, huil jy miskien ook? Het jy gehuil toe jy na die film “The
Passion of the Christ” gekyk het? Het dit jou ook diep getref?
Waaraan het Jesus gedink toe Hy daardie pad gestap het? Het Hy
gewroeg? Nee, ek dink Hy het daardie stryd reeds die vorige aand in
die tuin van Getsémané afgehandel.
Luk 23:22-34 Die derde keer sê Pilatus vir hulle:
"Watter kwaad het die man gedoen? Ek het in hom niks gekry wat die
doodstraf regverdig nie. Ek sal hom dus laat gesel en dan loslaat."
Hulle het egter met 'n harde geskreeu aangehou om te eis dat Jesus
gekruisig moes word, en met hulle geskreeu het hulle die oorhand
gekry. Pilatus het toe besluit dat aan hulle eis voldoen moes word.
Die man wat oor opstand en moord in die tronk was, het hy vrygelaat,
soos hulle geëis het, maar vir Jesus het hy uitgelewer, soos hulle
wou hê. Terwyl hulle Hom weglei, gryp hulle 'n sekere Simon van
Sirene, wat toe net van buite die stad af gekom het, en sit die
kruis op hom om dit agter Jesus aan te dra. 'n Groot menigte van die
volk het agter Jesus aan geloop, onder wie ook vroue wat oor Hom
getreur en gehuil het. Maar Jesus het na hulle toe omgedraai en gesê:
"Vroue van Jerusalem, moenie oor My huil nie, huil oor julleself en
julle kinders, want daar kom dae waarin hulle sal sê: 'Hoe gelukkig
is die onvrugbare vroue en dié wat nooit 'n kind in die wêreld
gebring het of gevoed het nie.' "Dan sal hulle vir die berge sê:
'Val op ons!' en vir die heuwels: 'Bedek ons!' As hulle dit met die
groen hout doen, wat sal dan met die droë hout gebeur?" Daar is ook
twee ander, albei misdadigers, weggelei om saam met Jesus
tereggestel te word. Toe hulle by die plek kom wat Kopbeen genoem
word, het hulle Hom daar saam met die misdadigers gekruisig, die een
aan sy regter- en die ander een aan sy linkerkant. Toe sê Jesus:
"Vader, vergeef hulle, want hulle weet nie wat hulle doen nie!"
Hulle het sy klere verdeel deur te loot
Die vrouens van Jerusalem loop en huil en treur.
Hoekom het hulle gehuil? Uit jammerte vir Jesus? Oor die
verskrikking van ‘n kruisdood? Dalk uit meegevoel vir Maria? Dalk
omdat hulle werk dié van roubeklaers was? Ek is redelik oortuig dat
hulle trane oor Jesus was. Dan draai Jesus om en sê vir hulle om nie
te huil nie. ...
Waaroor huil jy vandag as jy hierdie Paastyd herdenk?
Huil jy oor Jesus? Oor die onregverdigheid? Oor Sy pyn, verwerping
en swaarkry? Hy sê nee, moenie oor My huil nie, want daar kom tye....
En ja, die tye wat kom, ten spyte van Sy verlossingswerk, ten spyte
van die feit dat Sy swaarkry ons gered het. “As hulle dit met die
groen hout doen, wat sal dan met die droë hout gebeur?” Wat sê Jesus
hier? As die groen hout, die gereddes, gaan swaarkry, hoe swaar gaan
die ongereddes kry? Daarom vra ek vandag vir jou, waaroor huil jy?
Oor Jesus .... Dis onnodig, huil liewer oor....
1) ...dié mense wat nog nooit die Evangelie
gehoor het nie. Treur oor mense wat nie die voorreg van ’n
Geestelike lewe kan smaak nie. Daardie mense wat in afgeleë plekke
woon waar hulle nie my en jou voorregte het nie. Huil sommer ook oor
jouself wat nie veel doen om dit vir hulle beter te maak nie.
2) ... die mense wat in vrees-godsdienste
vasgevang is, wat tradisioneel slagoffers van hulle ouers se geloof
is.
3) ... mense wat langs die pad in ’n hopie sit en
wegkwyn, wat só smag na die waarheid van die Evangelie, maar niemand
deel dit met hulle nie. Soos iemand nou die dag gesê het: jy swem in
die rivier, maar jy vrek van die dors. Ons bly in ’n sogenaamde
Christelike land, maar die mense is dors na Jesus.
4) ... die ongelowiges, dié wat die waarheid
gehoor het, maar nie wil glo nie en ongered bly. Huil oor jou
ongelowige familielid wat nie glo nie en die hel as beloning gaan
kry, want jy vertel nie vir hom die waarheid nie.
5) ... dié wat vir Jesus en al wat gelowige is,
aanval, bespot en uitmekaar trek. Jy sien, daar is nie één
ongelowige in die hel nie – die Bybel sê “elke knie sal buig en elke
tong sal bely dat Jesus die Christus is”... vir party sal dit met
die laaste oordeel wees, wanneer dit te laat is. Huil oor hulle!
6) .... mense wat nie verstaan dat Jesus klaar
gesterf het vir alles nie. Gelowiges wat steeds elke dag allerhande
fieterjasietjies doen om die Here te beïndruk, of om hulle saligheid
te verseker . Mense wat net nie kan besef dat ek en jy niks kan of
hoef te doen vir ons verlossing nie. Huil oor gelowiges wat die
slagoffers is van vals profete wat ondraaglike laste op mense plaas.
Mense wat nooit die lekker van ’n heerlike, gemaklike verhouding met
Jesus ken nie.
Hoekom moet ons nie oor Jesus huil nie? Want Hy het
kom doen wat Hy moes en wat Hy wóú doen. Hy nie in die graf gebly
het nie. Satan het Hom nie oorwin het nie!
|