Heuning - kamp vir gestremdes

kliek hier om te kyk na foto's van die kamp >>

	Ps 18:2&3 - En hy het gesê: Ek het U hartlik lief Here, my Sterkte. Die Here is my rots, my vesting en my redder; my God, My rots by wie ek skuil. Die les van ons "constuction" het my geleer dat jy kan nie jou stene bou in die lug nie. Daar is nie toutjies wat jou gebou op die grond kan hou nie - jy het 'n fondasie nodig. Die kamp is opvoedkundig vir jou siel,en dit was pret gewees om aan die speletjies deel te neem. Ja, ons het lekker geëet en gedrink. Die slaapplek was ook puik gewees. Dankie. Prys die HERE. Nogmaals dankie vir Ian se nagmaal boodskap. Ek wil net vir Radio Rippel se borge en vir Willem en Wilna baie dankie sê vir die tyd en werk wat julle inpas vir ons gestremdes. Hoop die Here gee vir julle krag om nog 'n volgende jaar te kan voorberei vir meer kampe .
	Wat die kamp vir my beteken is: dat ek myself kan wees, en myself daar kan uitleef en net vir die Here kan prys en sing. Alles wat my pla kan ek opsy skuif en vergeet daarvan.
	Ons wil net sê: "wat 'n wonderlike naweek". Die tema van hierdie kamp was "Onder Konstruksie". Dit wil ons leer om die regte toerusting vir die regte werk te gebruik, en dat God ons toerusting op ons pad met Sy werk vir ons lewens moet wees. Ons val en struikel, maar Jesus gee ons weer 'n kans. In Sy Woord sê Hy Hy is lief vir ons en Hy wil ons hê. Dit is vir ons goeie geestelike kos wat ons elke keer op hierdie kampe kry wat elke persoon net weer kan help om meer en meer geestelik te groei. Hierdie kamp se mense was só spesiaal. Almal het aan alles deelgeneem en kon nie wag dat hulle geroep word vir hulle beurt nie. Dit was so lekker om dit te sien, dat ons nie kon help om ook met oorgawe saam te speel nie - ons was sommer selfs kruiwaens wat deur iemand rondgestoot kon word. Ons as helpers dink die Here seën ons op hierdie kampe meer as vir die gestremdes wanneer ons hulle gesindheid van vriendelikheid, opregtheid, dankbaarheid ens sien. Na so 'n naweek is ons nog meer danbaar oor ons gesonde en volmaakte liggame. Die konsert was so oulik en ons kon lekker saamlag. So ook was die lofprysing spesiaal en veral die liedjie "I love this family of God" Baie dankie aan elkeen wat 'n finansieële bydrae gemaak het om hierdie kampe moontlik te maak. Mag die Here elkeen seën.
	Baie dankie vir die verrykende kampe wat ek as helper kan bywoon. Baie dankie ook dat julle Jesus uit die kerkgebou saamneem na die mense toe daar buite. Baie mense los Jesus Sondae in die kerkgebou agter. Baie dankie vir al die helpers wat so getrou help; dankie ook vir die mense van Deo Volente vir alles wat hulle vir ons doen gedurende die kampe, veral vir die heerlike etes. Baie dankie ook aan Rippel 90.5 en die donateurs wat dit moontlik maak dat die kampe gratis kan wees. Ek weet alle eer kom onse Vader toe. Prys Hom dat Hy gebruik maak van mense om die goeie boodskap te bring.
	Weereens baie dankie vir ‘n ‘’geesgevulde naweek’’ – As julle dink dat julle organiseerders opgebou word – weet dit, dat ons gestremdes die ‘’geestelike voedsel’’ wat julle aanbied nog meer geniet, want dit bring ons almal nader tot ons Hemelse Vader – en die liefde wat tydens die kamp geheers het, was asemberowerend! .... lees Christo se oordenking >>
	Ek kan nie glo dis al ‘n jaar gelede wat ons die eerste kamp gehad het nie. En die afgelope naweek het ons al die vyfde een meegemaak. Een ding is verseker – die kampgangers het niks verander nie! Hulle is steeds net vol glimlaggies, drukkies en liefde. En ook nog niks klagtes nie! Julle mensies leer vir my persoonlik so baie! Julle wys vir my hoe om die lewe te geniet, al is jou “dop“ anders as myne! Wat regtig saakmaak is dit wat van binne af uitstraal. Dit wat julle aanhou GEE aan ons. Baie dankie daarvoor. Dan vir die helpers – julle is ‘n inspirasie aan my. Julle word nie moeg om te help nie. Selfs al is dit laat in die nag na ’n lang dag. Dankie dat julle omsien na hulle. Dit laat my net skaam word as ek oor iets kleins kla! Behalwe vir die geestelike hoogtepunte van die naweek – waar elkeen sy opinie gee en deelneem aan die gesprekke, is daar ook die speel... Ons kan tog maar lag as een sukkel om die baksteen te gooi. Paul – ek wil jou uitsonder – soos ’n verkleurmannetjie wat bekruip, moet die balans eers gevind word. Vorentoe, agtertoe, vorentoe, agtertoe... Dan is jy reg. Met die hoop om die halwe baksteen 30m ver te kan slinger. Weer probeer, weer probeer. Maar elkeen van julle is spesiaal omdat julle nog WIL speel. Ai – dit bly darem lekker! Ek sien alreeds so uit na die volgende byeenkoms. Hopelik gaan almal op 4 Desember by Martin en Essie bymekaarkom. Dit gaan WEEREENS ’n lekker kuier wees! En... ek kan nie wag vir die volgende kamp nie.
	Liewe vriende Ek wil net dankie sê vir die naweek; dit was fantasties. Ek en my vrou is van die helpers op die kampe en hierdie naweek was iets besonders. Ons as mens dink jou probleem is groot tot jy van ander mense s'n hoor. Dan was daar die onderwerpe waaroor ons gepraat het met die tema "onder konstruksie" - dit laat mens net besef dat die Here 'n plan het met jou lewe, en nie een van ons se planne is dieselfde nie. Ek dink persoonlik dat elkeen s'n uniek is. Ons as mens is geneig om so maklik te kla, maar as ek kyk na die mensies die naweek dan besef ek ons kla onnodig. As ek bv kyk na Paul - hy is 46, en daai man lag altyd, speel saam en dien saam die Here. So ook tannie Marie en Rudolf - ek kan eintlik almal by naam sê - dan besef 'n mens ons almal is onder konstruksie en die Here sal jou bou totdat hy tevrede is met jou. Mens moet ook onthou dat die Here jou nie nou gaan los nie. Die beste van alles is dat die Here hou jou in stand - soos enige gebou is daar instandhoudings werk nodig, daarom skaaf en skuur die Here nog so 'n bietjie hier en daar aan ons. Wat ek ook wil noem is die gasvryheid, die geriewe en die personeel van Deo Valente. Dit is fantasties. Ons het so lekker geëet! Dan wil ek ook net vir die Here dankie sê dat ek en my vrou en kinders kan deel hê in hierdie wonderlike bediening en dat Willem en Wilna Botha ons die geleentheid gegee het om deel te kan wees.Die Here het hulle daar met 'n doel gesit en mag die Here jul seën bo jul denke en jul grongebied vergroot - en onthou julle is kosbaar en spesiaal.