... soeter as heuning, as druppels uit 'n heuningkoek (Ps 119:11)

Die daaglikse heuningdruppels is ook op ons Facebook-groep. Klik hier:

Duplisering en verspreiding word toegelaat sonder veranderinge en met verwysing na die outeur (Wilna / Willem Botha) en webruimte (www.heuning.co.za)

“Maar toe die volheid van die tyd gekom het, het God sy Seun uitgestuur, gebore uit ’n vrou ... sodat ons die aanneming tot kinders kon ontvang.” (Gal. 4:4) Toe dit tyd was ... op presiés die regte tyd, God se tyd, het Jesus na die aarde toe gekom. Wat ’n ongelooflike oomblik in tyd was dit nie. Op daardie oomblik is al die profesieë oor die verwagting van ’n Messias vervul. Op daardie oomblik het nuwe koers en ewige lewe vir die mensdom moontlik geword. Op daardie moment het redding en verlossing vir my en jou ’n realiteit geword. Dit was die tydstip toe ons God se kinders kon word. Dit was die draaipunt van alles. As 2016 vir jou ’n uitdagende jaar was, dan hoop ek dat Kersfees vir jou die “volheid van die tyd” sal wees, wanneer nuwe deure sal oopgaan en nuwe geleenthede sal opdaag. As dit vir jou ’n hartseer jaar was, dan hoop ek dat Kersfees vir jou die “volheid van die tyd” sal wees wanneer Jesus jou trane sal afdroog. As dit vir jou ’n onseker jaar was, dan hoop ek dat Kersfees vir jou die “volheid van die tyd” sal wees wanneer die Here jou oorvloedig sal seën, jou sal genees en nuwe hoop en vrede in jou hart sal plant.  

... die tyd het nou ook vir my en Willem vol geword en die oomblik waarop ons ons jaar se werksaamhede vir 2016 kan afsluit het aangebreek! Ons gaan ook nou ’n breek neem met die skryf van ons gereelde Heuning-stukkies. Dankie vir almal wat dit gelees en daarop gereageer het. Mooi loop, tot volgende jaar. ~ Wilna Botha, 20/12/16

“It’s the most wonderful time of the year ...”, so hoor ons gereeld dié tyd van die jaar. Maar is dit regtig so? Ek kom nogal agter dat baie mense tranerig en depressief raak soos wat Kersfees nader kom. Ek dink dit het te doen met vooropgestelde idees oor tradisies, oor dit wat flieks en advertensies dié tyd van die jaar vir ons opdis. Kersfees is mos die “Season of joy”, maar niks is vir jou lekker nie en jy wil net huil en wens die tyd om. Kersfees word voorgehou as familietyd en dis ook goed so, maar wat van dié wat nie familie het nie, wat familie dié jaar aan die dood afgestaan het, wat geskei is, wie se kinders oorsee woon ... hulle wil wegkruip of onder ’n bos gaan sit soos Kersfees nader kom. Verder hoor ons die hele tyd dat Kersfees “a time of giving” is en dis ook ’n mooi gedagte en goed so, maar wat van dié wat niks het om te gee nie, wat niks ontvang nie ... hulle voel onvergenoegd en jammer vir hulleself. Kersfees word voorgehou as ’n feestelik tyd en dit is ook goed en lekker so,  maar wat van hulle wat moet werk oor daai tyd of wat siek is of wat vêr is, wat nie kan meedoen aan die groot fees nie en nie saam kan aansit by die tafel wat kreun van die kos nie ... hulle voel uitgelaat en eensaam. My gevoel is ook dat die feestyd groter en meer opwindend opgedis en voorgehou as wat dit werklik is. Onthou dis maar net jou vriende wat iets eksoties doen wat dit op Facebook sal uitblaker, dié wat stil en beskeie Kersfees vier sal nie foto’s daarvan oplaai en ’n bohaai maak nie. Dis my mening dat baie meer mense daai gematigde, stil Kersfees vier, gewone kos eet by ’n tafel gedek met gewone eetgerei, as wat ons dink. Ag moet tog nie dat Kersfees jou onderkry nie. Skaal jou verwagting af, dan sal jy nie teleurgesteld en bedruk voel nie. Hou jou eie fees. Vind jou vreugde in die Here. Spandeer jou tyd met Jesus, vier fees saam met Hom en vír Hom. ~ Wilna Botha, 11/12/2016

My aanklag 
As ek vandag in die Here se hof sou staan, sou hierdie dié aanklag teen my wees, en ek sou absoluut GEEN verweer hierteen gehad het nie. Geen prokureur sou enigiets in my guns kon sê nie, en ek sou doodeenvoudig moes skuldig pleit as die klagstaat teen my uitgelees word. Geen verskoning, geen versagting, niks.
Openbaring 2:4 "Maar Ek het dít teen julle: julle het My nie meer so lief soos in die begin nie." 
Die woord "julle" kon vervang word met "jou/jy". 
Wat het gebeur? Waar het die agteruitgang begin? Hoekom het dit gebeur? Ek leef tog steeds in geloofsekerheid en ek glo tog ek gaan hemel toe. 
Maar ek weet hoekom. So bietjie minder besig wees met die Here, minder tyd in Sy Woord spandeer, bietjie minder getuig, bietjie meer krities teenoor ander Christene en teenoor die kerk, bietjie meer Sy Woord in twyfel trek. En dan word hierdie volgende teks ook waar. 
Openbaring 3:15-16 "Ek weet alles wat julle doen. Ek weet dat julle nie koud is nie, en ook nie warm nie. As julle tog maar koud of warm was! Maar nou, omdat julle lou is, nie warm nie en ook nie koud nie, gaan Ek julle uit my mond uitspoeg."
Dis net deur genade wat ek hierdie oordeel kan vryspring. 
"Here, dit is vandag my belydenis, help my om terug te kom." ~ Willem Botha, 06/12/2016

Dán sal jy gelukkig wees. 
Die aarde word bewoon deur mense waarvan die meeste ongelukkig is. Wel, dis nou seker nie deur slim mense bewys nie, maar dis verseker my opinie. Ek dink jy hoef maar net om jou rond te kyk en jy sal dit sien. 
Toe begin ek nou wonder hoekom dit so is. Ek dink toe dis omdat mense nie geld het nie en sukkel om kop bo water te hou. Maar ek dink toe ook aan VELE mense wat in oorvloed leef, maar bitter ongelukkig is. 
Ek dink toe dis seker omdat mense nie gelukkig is met hulle liggame nie. Of te vet of te maar of te wat ookal. Maar toe kom 'n klompie mense in my gedagtes wat hoegenaamd nie 'n probleem het met hulle gestaltes nie en ook bitterlik ongelukkig is. 
Man, toe glo ek dat ek die antwoord het. Dit moet wees omdat mense nie die "volmaakte" werk het nie. Jy weet mos, iets soos 'n lewensredder op 'n plesierboot. Maar o wee, daar is mense met die mees ideale werksomstandighede wat bitter ongelukkig is. 
Toe dink ek nee, dis omdat hulle kinders nie die toppresteerders is en vreeslike fancy werk het nie. Maar o tog, selfs dit het nie gewerk nie. Jy vind daar ook 'n paar ongelukkiges. 
Okay, toe besef ek, dis ons land en sy misdaad en ekonomiese probleme wat die skuld moet dra. Ons moet landuit. Maar na bietjie oplees oor die statistieke, besef ek dat vele mense elders geluk gaan soek het, en toe besluit om terug te kom en eerder hier op eie bodem ongelukkig te wees. Want die ongelukkigheid het saam gereis.
Jong, ek wou net opgee, toe dink ek aan hierdie teks:
Ps 37 : 3 - 4 "Vertrou liewer op die Here en doen wat goed is, woon en werk rustig voort. Vind jou vreugde in die Here, en Hy sal jou gee wat jou hart begeer." Toe weet ek...
Kyk maar bietjie minder oor die draad na Mnr en Mev Jones se duur huis en motors met die baie skuld, hulle stout kinders, hulle huweliksprobleme wat hulle so goed wegsteek en die vakansiehuis waar hulle elke vakansie moet gaan werk, en gaan doen om Vadersnaam iets lekker. Gaan fliek toe en eet 'n chocolate. ~ Willem Botha, 04/12/2016

Dis so jammer... 
... dat die lewe, die lewe uit ons geneem het. Dis so jammer dat ons, ten spyte van soveel kennis, so min wysheid het. Dis so jammer dat ons agter soveel verkeerde strominge aandraf, dat ons net nie meer onderskeidingsvermoë het nie. Dis to so jammer dat ons ALLES glo wat ons sien op sosiale media, maar nie die Woord meer kan neem as God se Woord vir vandag nie. Dis so jammer dat ons mentors bymekaar maak wat vir ons vertel net wat ons wil hoor, maar die waarheid van die Woord het ondraaglik geword. 
Dis so jammer dat ons kan sien, maar nie God se visie het nie. Dis so jammer dat ons ore het wat hoor, maar ons hoor nie meer God se stem nie. Dis so jammer dat ons kan voel, maar gevoelloos geword het teenoor ander kinders van die Here. Dis so jammer dat ons kinders het (selfs van God afgebid) , maar ons het nie tyd om hulle ten volle te geniet nie. Dis so jammer dat ons werk het, waar God selfs vir ons deure oopgemaak het, maar daardie selfde werk vernietig soms ons gesinne. Dis so jammer dat materiële voorspoed maak dat ons die klein dingetjies wat regtig saak maak, miskyk. 
Dis so jammer dat ons ons huweliksbeloftes so maklik tot niet maak, en dink oorbegin raak soos 'n nasionale sport. Dis so jammer dat ons ons bekering gewoond geraak het, en vergeet hoe duur daardie bloed was. Dis so jammer dat ons God probeer vorm soos 'n pottebakker sy klei, in plaas daarvan dat God ONS vorm, soos 'n Pottebakker SY klei. 
Dis so jammer dat al die kennis van die lewe, gemaak het dat ons nie meer lewe nie. Dis SO jammer... ~ Willem Botha, 30/11/2016

Skepping 
Gen 1:1-2 "In die begin het God die hemel en die aarde geskep. Die aarde was heeltemal onbewoonbaar, dit was donker op die diep waters, maar die Gees van God het oor die waters gesweef." 
Na 'n naweek in die pragtige Golden Gate Nasionale Park kan ek net eenvoudig nie anders as om absoluut verstom te staan oor God se handewerk nie. Soos wat 'n beeldhouer 'n stuk klei neem en elke stukkie klei wegkerf om iets te vorm presies soos wat hy dit wil hê, het God hierdie aarde gevorm met Sy eie hande, soos in Genesis beskryf. 
Hoe langer mens net kyk en kyk na hierdie onbeskryflike skoonheid, en jy ruik die veld, voel die grassies teen jou bene en sien hoe die natuur in volmaaktheid deur God onderhou word, hoe meer besef jy hoe klein die mens is. 'n Nietige wese, maar tog die kroon van die skepping.
Hoe wonderlik om te kan sien, hoor, ruik, proe en voel. Hoe wonderlik om te ervaar hoe God jou as't ware in Sy heilige eiendom toelaat en jou met elke treë ietsie wys wat jou asem wegslaan. 
Hoe kan 'n mens wie se sintuie reg funksioneer nie glo in hierdie oppermagtige God nie? Hoe kan 'n mens hierdie dinge sien en dink dit het toevallig gebeur? Hoekom het die mens so afgestomp geraak dat hierdie onbeskryflike skoonheid by hom verbygaan? Of het ons net te gewoond geraak hieraan? Dalk het die mens by 'n punt gekom dat hy glo hy is groter as God. 
Hierdie naweek het my eenvoudig van voor af omgeboul. 
Daarom kan ek uitroep:
"Ek glo in God die Vader, die almagtige, die Skepper van hemel en van aarde, en in Jesus Christus, Sy eniggebore Seun, gebore uit die maagd Maria... En in die Heilige Gees."
Ek kan nie anders nie. ~ Willem Botha, 27/11/2016

Valse Woordverkondiging 
Het jy ook al na 'n prediker / spreker geluister en gewonder hoekom jou gees so in opstanding kom teen sy leringe? Ek het al so geluister na mense wat die Woord verkondig, en dan gedink óf ek óf hy moet die pad heeltemal byster wees, en as dit wat hy/sy verkondig waar is, is ek heeltemal verlore. Dit het my al so laat twyfel in myself dat ek hard moes soek na antwoorde. 
Nou sien ek dat Paulus hier in Titus daaroor skryf en nogal uitgesproke is hieroor. 
Titus 1:10-11 "Daar is baie, veral onder die bekeerlinge uit die Jodedom, wat in opstand kom teen gesag, wat onsin praat en mense verlei. Hulle mond moet gesnoer word. Hulle bring hele huisgesinne in beroering deur dinge te leer wat nie toelaatbaar is nie, en dít net om skaamteloos geld te maak."
Mens wonder nogal wat om te doen as jy jouself in so 'n spreker se teenwoordigheid bevind. Moet jy uitstap, of maar net die dinge aanhoor? Ek was al meer as een keer in so 'n gesprek wat my regtig in 'n moeilike situasie geplaas het, maar Paulus voel egter dat jy moet optree. 
Fil 1:13b "... Daarom moet jy hulle streng teregwys, sodat hulle gesond kan word in die geloof." Dis baie moeilik, maar dit lyk my mens moet maar jou vrees opsysit as jy agterkom dat God se Woord totaal verdraai word. 
Dis natuurlik net belangrik dat jy self goed genoeg in die Skrif onderlê is om dit te kan beoordeel. Hierdie tipe "lering" is uiters gevaarlik en laat goedgelowige mense maklik struikel. Bid maar net gedurig vir goeie onderskeidingsvermoë. ~ Willem Botha, 16/11/2016

Genoeg
Die "slim" mense reken dat ons almal ongeveer 10% te min inkomste het en dat net daardie klein bietjie meer al my probleme sal oplos. Net 'n ou klein bietjie, en wanneer ons daarby uitgekom het sal ons doodgelukkig wees, niks meer stres of dinge najaag nie en totaal in harmonie leef. Dolgelukkig. Maar nou ja, dis wat "hulle" sê en dis totaal onwaar. Ek hoor eendag 'n praatjie van 'n baie bekende sakeman wat daardie tyd onder die mees welaf mense in Suid-Afrika getel het. Hy is 'n wedergebore Christen en het met 'n klomp manne kom gesels by 'n ontbyt. Hy het vir ons gevra dat mense wat finansieel swaarkry moet opstaan en natuurlik het ons gedink hy gaan daardie "magic" gebed bid wat maak dat ons almal die volgende dag finansieel sterk sal staan. Hy het dit egter glad nie gedoen nie, Hy het bloot die volgende vir ons gesê : "Ek weet nie hoe min of hoeveel jy besit of verdien nie of hoe swaar jy kry nie, maar ek wil vandag vir julle goeie raad gee. Leer om tevrede te wees met wat jy het, al is dit hoe min, want ek beweeg tussen die rykstes van die rykes in die wêreld, en ek ken nie een enkele een wat genoeg het nie."
Daardie woorde het my geskud, want daardie een sin het realiteite vir my opgebreek wat ek nooit regtig besef het nie, want ons glo nie net ons het meer nodig nie, ons glo sommer dat dit ons toekom. Ons glo mos dat ons alles wat ons in Sy naam vra sal kry, of hoe?
In Spreuke is daar 'n teks wat hierdie hele gedagte wonderlik opsom, en dis nie Salomo se woorde nie, dis 'n spreuk van Agur.
Spr 30:7-9 Net twee dinge vra ek van U; moet my dit tog nie weier nie; daarna kan ek sterf: moenie toelaat dat ek vals is en lieg nie; moet my nie arm maak of ryk nie, gee my net die kos wat ek nodig het, sodat ek nie te veel het en U verloën en sê: “Wie is die Here?” nie, en sodat ek nie arm word en steel en my God se Naam oneer aandoen nie.
Sjoe, kan jy dit doen? Of weet jy dalk (soos ek), nie waar om die streep te trek nie? Ek sukkel daarmee en my 10% te min is eintlik 20% te min, maar ek weet ook dat statistiek bewys dat jy wat hier lees, waarskynlik onder die top 10% van "rykstes" in die wêreld is, bloot as jy vanaand onder 'n dak slaap, 'n goeie bord kos het om te geniet en iets so eenvoudig soos 'n spoeltoilet het. 
Sterkte, ek hoop jy kan ook glo dat jy genoeg het. ~ Willem Botha, 06/11/2016

“Moet niks van slegte mense wil hê nie. Moet onder geen omstandighede met hulle bevriend raak nie. Hulle dink net aan verkeerde dinge. Hulle sê verskriklike goed.” (Spr. 24:1) Hierdie teks laat my dink aan Ps. 1 wat sê dat dit goed gaan met dié een wat nie met sondaars omgaan en nie goddeloses se raad volg nie. Elders sê die Bybel ook nog dat ons nie saam met ongelowiges in dieselfde juk moet trek nie. Dit lyk vir my of ons ons moet distansieer van Godslasteraars, dronkaards, skindertonge, boewe, boelies en korrupte skelms. Al daai slegte dinge wat hulle doen en sê kan dalk op ons afvryf, hulle sonde kan dalk “aansteek” en ons besmet.  Maar, as ons nie met hulle meng nie, hoe gaan ons 'n invloed op hulle uitoefen? Hoe gaan ons hulle wys en sê van Jesus se liefde en genade? Hoe gaan ons hulle kan help as ons nie in hulle kring inbeweeg nie? Jesus sê ons is die sout vir die aarde. Maar hoe kan ons smaak gee aan die wêreld as ons sout in die soutpot bly? Jesus sê ons is die lig vir wêreld. Maar hoe gaan ons skyn as die lig onder 'n emmer neergesit word?  Nee, dit lyk vir my ons moet ons maar begeef tussen die “slegtes”, maar sonder om soos hulle te word, sonder om ons eie waardes en gewoontes prys te gee.  Hier is wat ons moet doen: “Sorg dat julle bo alle verdenking staan en opreg bly, onberispelike kinders van God te midde van ontaarde en korrupte mense. Tree onder hulle op as ligdraers in die wêreld.” (Fil. 2:15) ~ Wilna Botha, 20/10/2016

Ou Skollie 
Ons sien nou die dag die fliek : "Noem my Skollie." 'n Skitterende plaaslike fliek wat ongelooflik goed gemaak is, en wat op 'n eerlike en harde manier die bendegeweld op die Kaapse vlakte uitbeeld. Die fliek het vir my 'n nuwe blik gegee op die lewenswyse daar en die probleme wat met bende bedrywighede gepaard gaan en ek het ook verstaan hoekom kinders daarin betrokke raak. Hulle word groot in haglike omstandighede waar die pa in hierdie wêreld van dwelms betrokke is om kos op die tafel te hou, en dan sit die kinders hierdie lewe maar net voort, met tragiese gevolge. 'n Lewenswyses wat letterlik lei tot die dood.

Kyk wat staan in Spr. 16:25 "Daar is 'n lewenswyse wat vir 'n mens reg kan lyk, maar die uiteinde daarvan is die dood."

Hierdie voorbeeld van Skollie spreek eintlik vanself, maar daar is so baie mense wat in een of ander lewenswyse vasgevang is wat dalk nie lei tot fisiese dood nie, maar dalk emosionele dood, of Geestelike dood. Dis wanneer die mens stadig maar seker ingetrek word in verkeerde dinge, of dalk 'n huwelik wat stadig maar seker sterf, of selfs verhoudinge met geliefdes wat lei tot die "dood" van verhoudinge.

Ek het ook al gesien hoe mense besigheid op die verkeerde manier doen, maar in die proses vernietig hulle nie net hulleself nie, maar ook mense om hulle. Die ergste is dat dit soms diep gelowige mense is wat so perspektief verloor, en steeds glo dat die Here hierdie lewenswyse moet seën. 
Ek wil vandag weer kyk na my eie lewe en dit meet aan die Woord van God, waar al die antwoorde opgeskryf is. Ek wil kyk na eerlikheid in my besigheid, na my verhoudinge in my gesin en ook met my medemens. Mag die Here my hiermee help. 
Skollie het op 'n stadium weggedraai van hierdie lewe af en sy lewe is letterlik gered, terwyl sy maats op die galg gesterf het. Die fliek is gebaseer op 'n ware verhaal. ~ Willem Botha, 26/09/2016

“Kalmte en vrede is baie goed vir jou gesondheid.” (Spr. 14:30, Die Boodskap) Ek geniet dit só om te sien hoe akkuraat en prakties al die gesegdes in Spreuke is. Kyk nou maar dié ene. Ons weet almal dat stres, negatiwiteit, bekommernis en onvrede allerlei skete soos maagsere, hoofpyne, stywe nek en selfs tandpyn (ja, tandpyn want jy kners!) kan veroorsaak, dat argumente en wedywering jou bloeddruk kan laat styg en jou hart ongesond vinniger kan laat klop. Om nie eens te praat van grys hare, frons-plooie en voortydige veroudering nie.  Kalmte en vrede is wat ons moet najaag, ons moet soek na rustigheid – nie net uiterlik nie, nee, veral aan ons binnekant. 1 Pet. 3:4 noem dit “kalmte van gees.” As ons hierdie kalmte en vrede aan ons binnekant dra, sal dit ons ook sag en vriendelik laat optree, met deernis en empatie, met groter geduld en verdraagsaamheid. Ek weet die lewe is vinnig en vol druk en spanning, so hoe gaan ons daai kalmte en vrede kry? Ek dink ons moet doelbewus stop, stilhou en die Here laat werk. Hy sê: “Bedaar en erken dat Ek God is....” (Ps. 46:11), “Kom na My toe, almal wat uitgeput en oorlaai is, en Ek sal julle rus gee.” (Matt. 11:28) . Dan kan jy mos  jou bekommernisse op Hom afskuif, dan kan jy jou sorge vir Hom gee – in ruil sal jy Sy vrede ontvang wat alle verstand te bowe gaan. Hy wíl hê dat ons gesond moet wees, dat ons nie moet knak onder al die druk en eise van die lewe nie, daarom sal Hy uiteindelik alles tot ons beswil laat uitwerk. Vertrou Hom daarvoor. ~ Wilna Botha, 19/09/2016

A quick buck
Spr. 13:11 "Rykdom wat sommerso gekom het, verminder maklik; wie bietjie vir bietjie bymekaarmaak, word ryk."
Ek is seker dat jy (nes ek en elke mens op aarde) begeer om vinnig 'n miljoen of twee te maak, sonder om daarvoor te werk. Maar o wee, hierdie teks in Spreuke is so skrikwekkend waar en niemand wil daarop ag slaan nie, al sien ons elke dag rondom ons die verskrikking van hierdie stukkie waarheid. Ek is ook doodseker dat jy, nes ek, mense persoonlik ken wat hulle swaarverdiende pensioen of spaargeld vir iemand gaan gee het om dit teen 'n enorme "opbrengs" te gaan belê, net om alles te verloor. Wel, die geld is belê, in die skurk se sak! Maar wie moet blameer word?
Wel, solank as wat mense met handsakke en skootrekenaars op hulle sitplekke rondry, sal daar mense wees wat dit "smash and grab". En solank mense vir bedelaars by die robot geld gee, sal daar bedelaars by die robot wees. En solank mense so gulsig is na vinnige geld, sal daar "finansiële kenners" wees wat daardie geld vat. Jy sien, dis ons self wat hierdie goor praktyke aan die lewe hou, en dis gewoonlik omdat ons soveel waarskuwings in die Bybel verontagsaam.
"Eendag is eendag..." Ja jy ken die Lotto advertensie wat vir jou vertel dat jy maar net moet aanhou om jou randjies vir die verkeerde mense te skenk, dan gaan jy iets terugkry. Volgens die Lotto webblad is jou kans een uit 14 miljoen om te wen, want dis hoeveel kombinasies daar is. Nou is die som maklik. Indien jy dus dieselfde kombinasie elke enkele dag van die week speel, behoort jy die lotto iewers binne die volgende 39 325 jaar te wen. En dit sal jou R49 miljoen kos, om dalk R1 miljoen te wen. 
Ai, hoekom slaan ons nie maar ag op die Here se voorskrifte nie? Hoeveel verhoudinge is nie tot niet oor gevegte oor erfporsies nie? Hoeveel mense het nie naderhand in misdaad verval oor daai drang na vinnige geld nie? Hoeveel huwelike is nie tot niet oor die spandabelrigheid van een (of albei) van die partye nie?
Nee wat, hierdie teks sê jy moet maar bietjie vir bietjie bymekaarmaak, deur harde werk. Daarteen het die Bybel niks. ~ Willem Botha, 14/09/2016

Geweeg en te lig gevind 
Ek lees vandag hierdie volgende teks in die Bybel raak. 
Spr 11:1 "Die Here het 'n afsku van 'n skaal wat nie reg weg nie, net die regte gewig dra sy goedkeuring weg" 
Wel, die Here haat sekerlik nie die skaal nie, Hy haat wel dit wat die mens doen om ander te benadeel deur verkeerd te "weeg". Ek onthou in die ou dae die skaal wat in die winkel gebruik was - daar was 'n groot aluminium skottel aan die een kant om meel of suiker of ander goedere in te plaas om geweeg te word. Aan die ander kant van die skaal is die korrekte gewig geplaas waarteen geweeg is. My een oom het destyds in die Kaap 'n winkel gehad waar alles van die spreekwoordelike muistand tot 'n dooie poliesman verkoop is. Agter in die winkel was groot streepsakke met allerhande goed wat per gewig verkoop was, en daardie skaal het my vreeslik gefassineer. 
Nou ja, die skelm handelaar het met daardie teengewigte gepeuter om jou te verneuk.
Daar is natuurlik baie in hierdie vergelyking in Spreuke vasgevang en van toepassing in vandag se lewe. Ek dink dit kan nogal goed toegepas word in die ure wat ons daagliks aan ons werkgewers "verkoop". Jy weet mos, pas by o die werk gekom dan gaan maak ons eers 'n draai op die stoep, daar waar almal vars lug gaan insuie deur so 'n koddige wit strooitjie. En dan vertel ons vir mekaar hoe pragtig Sannie in haar vreemde rokkie lyk, en hoeveel ons die baas waardeer vir sy goeie behandeling en ruim salaris wat hy ons betaal. Ons herhaal daai oefening sommer 'n paar keer 'n dag. 
In besigheid weeg ons gereeld verkeerd deur nie die waarde te lewer waarvoor ons betaal word nie. 
Dis ook nogal waar in ons Geestelike lewens, waar ons ook die skaal bietjie aanpas as ons God se opdragte uitvoer. Lewer so bietjie minder as dit wat Hy verwag. Ek self is verskriklik skuldig hieraan en dis nie lekker om dit te erken nie. Hierdie teks handel eintlik maar net oor totale eerlikheid, deur presies te lewer wat ons sê ons gaan. Moeilik né? ~ Willem Botha, 08/09/2016

Gehoorsaam 
Kyk, in die weermag is daar een ding waaraan jy voldoen, sonder teëpraat, en dis om bevele te gehoorsaam, hetsy of jy daarmee saamstem of nie. En as jy dit nie doen nie brul jy. Om bevele te gehoorsaam en opdragte uit te voer is die kern van dissipline en selfdissipline. Soms is dit nie lekker nie, maar as die mens versuim om dit te doen, moet hy sy pak vat soos 'n man. 
Spr 10:8 "Die mens met verstand aanvaar bevele. Wie aanhou onsin praat, kom tot 'n val." 
Kort en kragtig, die mens met verstand aanvaar bevele. Punt. Ongelukkig woon ons in 'n samelewing waar menseregte een van die grootste euwels denkbaar geword het, en tot op die hoogste vlak van die leierskap van ons land word dit totaal geminag. Mense het net eenvoudig nie meer respek vir reëls, bevele en 'n waardestelsel nie. 
Hoe ongelooflik is die Bybel nie, want dit gee elke enkele riglyn wat die mens nodig het om 'n sinvolle en mooi lewe te ly. Hoekom sien die mense die Here as die "kwaai Omie daar bo" (dis godslasterlik) terwyl Hy net die beste bedoelinge denkbaar vir ons het?
Is die nie waar dat basiese waardes tot niet gaan, net omdat jy bykans geen reëls meer op die mens kan afdruk nie. Die riglyne van die Bybel is nie 'n klomp kwaai strafmaatreëls nie, dis riglyne vir 'n goeie lewe. 'n Lewe wat nie net vir God behaag nie, maar ook die beste vir ons in gedagte het. Die Wet is nie 'n stel wrede reëls nie, dis wonderlike riglyne vir 'n goeie lewe. 
Dus, as ons verwag dat ons kinders gehoorsaam moet wees aan ons reëls, moet ons dieselfde doen deur die Bybelse reëls en riglyne na te volg, en ook die land se reëls. 
Ons beste voorbeeld van gehoorsaamheid sien ons in Fil 2:8b "Hy was gehoorsaam tot in die dood, ja, die dood aan die kruis." ~ Willem Botha, 06/09/2016

Reg en verkeerd 
Is dit nie verskriklik hoe afgestomp die mens al vir reg en verkeerd geword het nie? Om musiek te steel deur kopieë by ander te maak, om onwettige flieks by die robot by straatverkopers te koop, of om gesteelde goedere by iemand te koop, welwetende dat iemand dalk in die proses sy lewe verloor het. Ja ek dink jy dink ook nou by jouself: Ons almal doen dit mos. Maar dis 'n gruwel in die oë van die Here. 
Spr 10:2-3 "Goed wat deur onreg bekom is, bring geen voordeel nie; om te lewe volgens die wil van God, red 'n mens van die dood. Die Here laat die mens wat reg doen, nie honger ly nie, die Here laat die begeerte van dié wat verkeerd doen, nie bevredig word nie." 
Hierdie voorbeelde spreek dinge aan wat maklik identifiseerbaar is en openlik verkeerd is, maar dit gaan veel verder as dit. Ek dink anderdag aan beroepe wat as totaal aanvaarbaar beoefen word. Ons is dalk self daarin betrokke, of slagoffers daarvan, en sonder om enige beroep te noem, kan jy dink aan die volgende. Beroepe waar jou geld geneem word deur wanvoorstellings van kwaliteit of waarde voor te hou. Daar is beroepe wat geensins beoefen kan word sonder dat daar daagliks blatant gelieg word nie, en gewoonlik ten koste van ander wat verkeerdelik benadeel word. Daar is beroepe waar vals beloftes gemaak word of inligting weerhou word en mense benadeel word sonder om dit te weet. Daar is maniere om mense se swaarverdiende geld in te palm deur mense se vrees, skuldgevoelens of "greed" uit te buit. Fynskrif in kontrakte, omkopery om kontrakte te bekom en dan boonop persoonlik voordeel daaruit te kry, is al meer die reël as die uitsondering. 
Ons kla oor die korrupte regering, maar dit strek veel verder as dit. Die wêreld het 'n lelike plek geword. En wat die ergste is, is dat die eerlike persoon dikwels verwoes word, en die skuldige party deur die wet, of sisteme beskerm word. Dit maak mens siek! 
Dis nie wat die Here wil hê nie. Die Here wil hê ons moet ALLES wat ons doen, met eerlikheid en opregtheid doen. Ek het al baie gewonder hoe slaap mense in die nag. Die ergste is dat mense opgelei word om hierdie dinge uiters effektief oneerlik te doen. Ai, waar gaan ons heen? En ek, waar staan ek in my besigheid? Goeie vraag... ~ Willem Botha, 04/09/2016

Oppas!
Die wyse Salomo het nou maar eenmaal 'n manier om met woorde te toor, en daar is plekke in Spreuke wat hy dinge ongelooflik raakvat. In Spr 6 en 7 waarsku hy ernstig teen owerspel. Hier praat hy van die owerspelige vrou wat met uitlokkende klere en mooi woordjies 'n man in haar strik in verlei en dan sy lewe verwoes. Nou wil ek dit tog duidelik maak dat nie Salomo, of ek, besig is om die vrouegeslag sleg te maak nie, want "It takes two to tango", maar hy waarsku ons as mans om baie versigtig te wees. 
Spr 6 : 24-26 "My onderrig sal jou beskerm teen die slegte vrou van 'n ander wat jou met haar gladde tong wil verlei. Moenie dat haar skoonheid jou begeerte wek nie, moenie dat sy jou vang met haar oë nie. Jy kan 'n prostituut kry vir 'n stuk brood, maar owerspel kan jou lewe kos."
Ek glo ons het al almal die vernietiging hiervan gesien en my vraag is, hoe sterk is ons? Of ek? Sal ek regtig "daardie dag" kan weerstaan? Kan ek so selfversekerd wees dat ek kan sê "NOOIT NIE"? Ek bid dat dit nooit op my pad sal kom nie! 
Maar dis juis hoekom Salomo hier ernstig waarsku teen omstandighede wat daartoe kan lei. Daardie leë oppervlakkige praatjies met poppie by die werk, daai een dop te veel waar vroulief nie by is nie, maar waar ander vrouliefies teenwoordig is, daardie praatjies met 'n ander vrou wat jou probleme so goed verstaan, want sy gaan ook mos deur dit, jy weet? 
En dan, as poppie se man uitvind! O wee... 
Spr 6: 34 - 35 "Die woede van die vrou se man is 'n gloeiende vuur, sy wraak ken nie perke nie; hy laat hom nie afkoop nie, geen betaling is vir hom genoeg nie."

En dan, daai blatante verleiding... 
Spr 7 : 18 - 20 "Kom ons drink van die liefde tot die môre toe, ons gee ons oor aan die liefdeslus. My man is nie tuis nie, hy is op 'n lang reis; hy is weg met 'n vol beurs en kom eers met volmaan terug.”
Ek het by 'n maatskappy gewerk waar ons dit eerstehands gesien het, en waar die lyke van hierdie ding gesaai gelê het. En weet jy wat? Niemand het hierdie mense gewaarsku nie! Ek ook nie. 
Mens loop nie sommer net tussen 'n trop leeus in nie, want jy sal sleg tweede kom! En dis waarteen Salomo hier waarsku. Bly liewer weg, los liewer die praatjies, drink uit jou eie fontein soos wat Salomo in Spr 5 : 15 noem. "Jy het tog self 'n vrou, jy het tog self 'n put met water: drink die strome uit jou eie fontein." ~ Willem Botha, 31/08/2016

Luiaard
Die Bybel praat vreeslik baie van vrygewigheid, hulp aan ander, dra mekaar se laste en hulpvaardigheid. Maar waarsku ook teen ander wat bedel, uitbuit en jou goedhartigheid misbruik. Ek is seker jy is ook al moeg gevra om jou swaarverdiende geld af te staan aan sommiges wat net eenvoudig te lui is om vir hulleself te sorg. Salomo het ook 'n kleintjie dood aan mense wat in ander se oë kyk terwyl hulle baie lief is vir rondlê. 
Spr 6 :6-11 "Gaan kyk na die mier, luiaard, kyk hoe hy werk, en leer by hom. Hy het nie 'n leier nie, nie 'n opsigter of 'n regeerder nie, tog maak hy sy kosvoorraad reg in die somer, versamel hy sy voedsel in die oestyd. Hoe lank gaan jy nog lê, luiaard, wanneer gaan jy opstaan? Nog 'n bietjie slaap, nog 'n bietjie sluimer, nog 'n bietjie handevou en bly lê, en daar oorval die armoede jou soos 'n rower, daar oorrompel die gebrek jou soos 'n inbreker."

Ek word so ruk gelede in een week 'n paar keer gekonfronteer deur mense wat geld wil hê (nie eers leen nie), bloot omdat hulle dink ek het en hulle kort. In een geval 'n persoon wat homself bankrot geleef het deur oordadig weelderig te lewe, en dan een wat net eenvoudig nog nooit geld verdien het deur te werk nie en van bakboord na stuurboord swerf. 
Dit is verseker nie die Here se wil dat ons hierdie tipe lewenswyse moet "borg" en ondersteun nie. Eers as 'n persoon alles in sy vermoë gedoen het om homself te help, kundig met sy middele omgaan en nie in die moeilikheid beland deur onverantwoordelik te leef nie, of as dit tydelik van aard is deur bv werkverlies, kan ons dit oorweeg om te help. 
Partykeer is daar meer van die Here se geld in jou sak as in 'n ander s'n, en dan moet ons mededeelsaam wees, maar omdat alles eintlik maar aan die Here behoort, moet ons tog ook goeie rentmeesters wees. Gee liewer 'n visstok as 'n vis. ~ Willem Botha, 29/08/2016

Ontevrede 
Ons het die afgelope ruk deur die boek Jona gewerk en goeie lewenslesse hieruit geleer. Jona, hierdie koddige man wat eers wegvlug van die Here, toe amper verdrink, toe terugkeer nadat hy deur 'n vis ingesluk was, toe tog sy werk gaan doen en 'n hele stad word gered. En toe is hy kwaad vir die Here. G'n mens weet hoekom nie. Hy het net eenvoudig nie die mense gegun om gered te word nie. 
En hier op die einde, in Jona 4 lees ons hoe hy dikbek buite die stad in die son sit en skroei. Die Here laat toe 'n komkommerplant opkom. 
Jona 4:6 "Toe laat die Here God 'n komkommerplant opkom, en dit het bo-oor Jona gerank om skaduwee te gee vir sy kop en om hom van sy misnoeë te bevry. Jona was baie bly oor die komkommerplant."
En toe laat die Here 'n wurm kom wat die plant opvreet en laat vrek, en Jona is briesend!
Jona 4:9-11 Toe vra God vir Jona: “Het jy rede om kwaad te word oor die komkommerplant?” en Jona antwoord: “Ek het rede genoeg: ek is besig om te sterf!” Die Here het vir Jona gesê: “Jy is besorg oor die komkommerplant waarvoor jy nie gewerk het nie en wat jy nie versorg het nie. Dit het oornag opgekom en oornag is dit dood. Maar Ek mag nie besorg wees oor die groot stad Nineve nie, 'n stad waarin daar meer as honderd en twintig duisend mense is wat nie weet wat reg of verkeerd is nie, en ook nog baie diere?”
Dis maar presies hoe ons as mense leef, ons werk nie vir die genade wat God oor ons uitstort nie, maar ons is kwaad as die Here handel volgens Sy eie wil. Ons sien so baie die skadu van die lewe se "komkommerplante" mis, maar is kwaad as dit wegraak. Ons verval so maklik in "U skuld my", ons verval in 'n lewe van: As die kerk nie maak soos ek wil hê nie loop ek sommer. Hoekom gun die Here 'n ander persoon ook genade want hy leef nie so mooi soos ek nie, maar intussen werk ek nie saam om daardie genade moontlik te maak nie?
Vriend, die Here se "komkommerplante" is Sy eie, Hy maak daarmee wat Hy wil, Hy is soewerein en skuld ons nie 'n verduideliking nie. Dus, solank daai komkommerplant vir jou skadu gee, verlustig jou in daardie stuk genade. Dis dalk more weg, maar wees dankbaar elke dag as dit daar is. ~ Willem Botha, 14/08/2016

'n Een sin preek 
Wie kan preek? Wie kan die Woord van God verkondig? Wie is goed genoeg toegerus? Of heilig genoeg? Wie kwalifiseer regtig, en wie is waardig genoeg in God se oë? Dalk het jy ook al gewonder of jy dit kan doen. Jona word eventueel op land uitgespoeg, maar ons weet nie waar nie, want hy moes toe weer "klaarmaak" en Nineve toe gaan, wat hy toe wel doen.
Jona 3:2-4 “Maak klaar, gaan na die groot stad Nineve toe en spreek hom aan met die boodskap wat Ek jou sal gee. ”Toe maak Jona klaar en gaan na Nineve toe soos die Here hom beveel het. Nineve was 'n baie groot stad: 'n mens het drie dae gevat om dit deur te stap. Jona het die stad ingegaan en 'n dag lank daar rondgestap en toe roep hy: “Nog net veertig dae en Nineve word verwoes!"

Ons lees hier dat die Here vir Jona sê Hy sal vir hom die boodskap gee en Jona roep net uit: "Nog net veertig dae en Nineve word verwoes!" 'n Enkel sin preek. Dalk het hy meer goed gesê, hoewel ons dit nie lees nie, maar die hele stad word gered. 
Weet jy hoeveel enkel sin preke jy kan preek, sonder opleiding of toerusting? Deur net bedag te wees op mense se omstandighede kan ons 'n groot impak maak met sulke gedagtes, bv
Die Here is lief vir jou 
Moenie bekommerd wees nie, die Here gee uitkoms 
Roep uit tot Hom, Hy sal jou red
Moenie hierdie ding doen nie, dit gaan jou vernietig 
Byt vas, slegte dinge hou nie vir altyd aan nie
Hou aan bid, ons moet soms wag vir 'n antwoord 
Die Here is nie weg nie, al voel dit so

Nou ja, Jona se kort boodskap het gemaak dat die Here nie meer die stad vernietig het nie. Ek en jy kan dalk ook so 'n reuse verskil maak. ~ Willem Botha, 09/08/2016

Jona - feit of fiksie
O jitte, met die lees van hierdie opskrif staan party mense se hare seker klaar regop! Ons gaan vir die volgende klompie dagstukkies stilstaan by die boek Jona, en ek wil graag by die gedagte kom van hoe ek die boek sien. Ek geniet die boek Jona vreeslik baie omdat ek 'n prentjie kry van 'n koddige mannetjie wat sommer vol draadwerk is en 'n ding teen sy sin gaan doen, deur snaakse situasies worstel, dan tog die regte resultate kry, maar op die einde vies is vir God. Gaan lees groot asb. die boek van voor tot agter deur, dit gaan baie min tyd neem en jy gaan dit regtig geniet. 
Wel, feit of fiksie? Ek dink daar is hoofsaaklik drie groeperinge. Groep een sou sê "God said it, I believe it, that settles it." Dit het so gebeur en basta! Groep twee sê dis nie moontlik nie want hy sou nie kon oorleef in die vis se maag nie, maar God gee vir ons wonderlike lewenslesse deur hierdie boek en ons kan onsself daarmee vereenselwig. Groep drie sê dis alles nonsens, en omdat dit in die Bybel opgeteken is gooi ons sommer die hele Bybel in die asblik. 
Wel, jy wat hier lees is waarskynlik een van hierdie drie, en my pleidooi is dat ons nie ander veroordeel wat anders as ons dink nie. Natuurlik steur ek my nie aan die opinies van groep drie nie, maar binne die eerste twee groepe sal jy wonderlike, opregte, wedergebore Christene vind, wat hopelik nie mekaar sal veroordeel nie. 
Die boek Jona is vol van gebeure wat ons daagliks in ons eie lewens ervaar. Daardie opstand teen God, wegvlug van hom af, weer terugkeer, wonderwerke ervaar maar Hom steeds miskyk, teësinnig ons opdragte uitvoer en dan ongemaklik is met Sy besluite. Jona was maar eenvoudig 'n tipiese wêreldling en het ook maar voete van klei gehad. Soos party van ons. 
Maar tog het hy gedoen wat hy moes, al moes die Here hom so bietjie terug help op die regte pad. En voorts is een van die wonderlikste boodskappe van die boek die feit dat die Here vir jou en my gebruik net soos ons is, al voel ons hoegenaamd nie opgewasse vir die taak nie. Ons moet maar net beskikbaar wees. 
Dus, ek weet nie of dit feit of fiksie is nie, want ek verstaan ook nie hoe hy kon oorleef in die vis se maag nie. Ek verstaan egter ook nie hoe 'n baba in sy ma se baarmoeder in vloeistof leef, dan gebore word en "oorskakel" suurstof toe nie, en onmiddellik 'n bonatuurlike suigaksie uitvoer sodra hy by sy ma se bors kom nie. 
Jona is 'n goeie boek, gaan lees dit en besluit watse betekenis dit vir jou het. ~ Willem Botha, 27/07/2016

'n Ewige woonplek
Ek het al so baie keer die vraag gehoor: Wie sê die Christene is alleen reg en dat net hulle hemel toe sal gaan? Wel, daar kan lank daaroor geredeneer word want baie van die ander gelowe praat ook van 'n plek wat hulle dan hemel of hiernamaals noem. Voorts moet ons natuurlik vra wat 'n Christen is en of alle mense wat hulleself Christene noem hemel toe sal gaan. Hieroor kan ons nogal lank redeneer want mense se definisie verskil, maar kom ons begin by die gedagte dat 'n werklik wedergebore Christen, wie sy hart vir Jesus gegee het en glo dat die bloed van Jesus vir hom verlossing bring, wel na sy aardse afsterwe hemel toe gaan.

Maar wat is hemel? Is daar net een? Is daar dan 'n hiernamaals vir verskillende gelowe, of is daar maar net een "hemel" met verskillende paaie daarheen, soos wat jy 'n koppie kan klim, bo kan uitkom, maar een van verskeie paadjies daarheen kan neem? Hierdie is egter 'n baie gevaarlike ding om te glo en hoegenaamd nie in lyn met die Bybel nie. Voorts maak die Bybel net voorsiening vir een so 'n plek en dit is waar Christus heers en vir ons plek berei. Ongelukkig probeer baie ander gelowe, of selfs "christene" hierdie konsep te kaap. Die Bybel is baie duidelik daaroor dat geen pad soontoe moontlik is behalwe deur Jesus Christus nie.

1Joh5:10-13 "Wie in die Seun van God glo, besit die getuienis in sy hart; wie God nie glo nie, maak Hom tot leuenaar, omdat hy nie die getuienis glo wat God oor sy Seun gelewer het nie. En die getuienis behels dít: God het ons die ewige lewe gegee, en dié lewe is deur sy Seun. Wie die Seun het, het die lewe; wie nie die Seun van God het nie, het ook nie die lewe nie. Hierdie brief skrywe ek vir julle, sodat julle kan weet dat julle die ewige lewe het, julle wat in die Seun van God glo."
Wie sê die Christene is dan alleen reg? God sê so, die hemel is Sý woning, dis Hý wat die pad soontoe moontlik maak sodat ons vir altyd by Hom kan woon, die deur na die Lewe is Sy Seun Jesus Christus en Hy maak dit vir ons moontlik deur geloof in Sy Seun. En God self is die getuie daarvan. Daar is geen agterdeur om in te glip nie, geen plek vir mense wat dit wederegtelik "claim" nie en geen toegang deur 'n ander "model" nie. Dis 'n Heilige plek wat jy nie deur verdienste kry nie, maar daar is onbeperkte plek en toegang vir mense wat Jesus aangeneem het. ~ Willem Botha, 20/07/2016

The mind of Christ
Jare gelede vertel 'n vriend dat hy op 'n teks in 'n Engelse vertaling afgekom het wat met hom gespreek het. 1 Kor 2:16 "Who knows the mind of the Lord? Who is able to give Him advice? We, however, have the mind of Christ" 
In 1 Joh 3:24 staan "Wie Sy gebooie gehoorsaam bly in God en God in hom. Hiéraan weet ons dat Hy in ons bly: Hy het ons sy Gees gegee." 1Joh 3:18 sê dat ons liefde nie net lippetaal moet wees nie, maar dat dit met dade bewys moet word. 
Maar hoe kry ons dit reg? Die teks in 1 Kor 2:16 sê: "We have the mind of God", en 1 Joh 3:24 sê "Hiéraan weet ons dat Hy in ons bly: Hy het ons sy Gees gegee."

Wanneer ons vervul is met die Heilige Gees, dink ons soos wat Hy wil hê ons moet dink, en doen ons soos wat Hy wil hê ons moet doen. Sy hele wese is liefde en dit lees ons in 1 Joh 4:8 "... God is liefde." 
As ons Jesus dan aangeneem het, en ons het die Heilige Gees ontvang, kan ons mos glo dat Hy ons sy Gees gegee het, en kan ons leef vanuit die gedagte van: "We have the mind of God."
Die grootste gebod is die liefde, liefde vir God, liefde vir ons naaste en ja ook liefde vir onsself. As God aan ons dink, dink Hy nie aan ons sondes nie, maar aan Sy liefde vir ons. Hierdie deel herinner my dat ek nie aan ander op enige ander manier moet dink as met liefde nie. As ek dan die Gees van God het, moet ek so optree en met ander handel soos wat Hy dit doen. Ek moet my menslike brein programmeer om altyd eers te dink hoe "God's mind" sou dink voor ek handel. Mag die Here op hierdie manier ons denkwyses totaal oorheers, en mag ons in enige insident hiervolgens handel. ~ Willem Botha, 17/07/2016

Pay it forward
Daar was 'n klompie jare gelede 'n film met die titel "Pay it forward". Dit het daaroor gegaan dat mense aan wie 'n goeie daad bewys is, ook 'n goeie daad aan 'n volgende persoon moes bewys. Die gedagte is so pragtig en ons samelewing het dit so nodig. Kan jy dink hoe wonderlik dit sal wees as almal op aarde dit sou doen? Daar sou geen armoede wees of slegte verhoudinge wees nie. Deel net die bietjie seëninge wat jy ontvang met ander. Nou kyk nou hoe mooi word dit in die Bybel uitgespel met twee tekste wat op 'n verrassende manier met mekaar verbind kan word. Let op die plekke waar dit geskyf is, nl Joh 3:16 en 1Joh 3:16. Toevallig?

Joh 3:16 “God het die wêreld so liefgehad dat Hy sy enigste Seun gegee het, sodat dié wat in Hom glo, nie verlore sal gaan nie maar die ewige lewe sal hê". Hier staan dit duidelik dat Jesus Sy lewe vir ons afgelê het, sodat ons nie verlore sal gaan nie. 
Kyk nou wat staan in 1Joh 3:16 "Hiéraan weet ons wat liefde is: Jesus het sy lewe vir ons afgelê. Ons behoort ook ons lewens vir ons broers af te lê". Wow! Sien jy die "Pay It forward" gedagte? Jesus het dit vir ons gedoen, kom ons doen dit nou aan ander.
Gelukkig hoef ons nie vir ander aan 'n kruis te sterf nie want dis nou klaar gedoen, maar hierdie teks vra opoffering, en om iets van jouself te gee. Dalk tyd, geld, ondersteuning, dalk om vir ander te bid, maar om te doen en gee tot 'n mate dat ons dit sal voel.
En hier kom die uitvloeisel waarvan Johannes hier praat. 
1Joh 3:17 "Wie aardse besittings het en sy broer sien gebrek ly, maar geen gevoel vir hom het nie – hoe kan die liefde van God in hom wees?"
Sien jy dat die wêreld sommer 'n baie beter plek sou wees as ons almal die "Pay It forward" beginsel sou toepas? Al wat dit vra is liefde, wat immers 'n keuse is. ~ Willem Botha, 14/07/2016

“Julle is egter deur die Heilige Gees gesalf en julle ken almal die waarheid.” (1 Joh. 2:20) Wie is só bevoorreg om met die Heilige Gees gesalf te wees? Dis ek en jy, liewe vriend, ons wat Jesus in ons lewe ingenooi het, ons wat Hóm as Here en Verlosser aanvaar het, ons wat Sy kinders geword het omdat ons in Hom glo. Baie mense wag en verlang en bid vir 'n besondere salwing met die Gees, maar ons kan vir seker weet dat ons dit alreeds ontvang het. Vers 27 sê ook dat die Gees waarmee ons gesalf is, IN ons bly – God self het sy intrek in ons gemaak. Dís groot en heilig. Om gesalf te word beteken om heeltemal ingesmeer en ingevryf te word met salf of olie; só is die salwing van die Heilige Gees ook – dit deurtrek ons hele lewe, dit versprei 'n heerlike geur en dit vul ons met vreugde, vrede, kennis en insig.  Die Boodskap se vertaling van vers 27 is: Die Heilige Gees is julle onderwyser en gids in alles wat waar is. Omdat die Heilige Gees ons vol maak met God se teenwoordigheid ontvang ons die onderskeidingsvermoë, die natuurlike aanvoeling om die verskil te ken tussen reg en verkeerd, tussen goed en sleg, om te weet wat God se wil is en om die wysheid te hê om daarvolgens te lewe. Die Bybel sê ons moenie die Gees se werking in ons lewe weerstaan nie. Kom ons leef as gesalfdes, as gelowiges wat 'n lieflike geur versprei, as gereddes wat weet dat die Heilige Gees sy hand spesiaal op ons gelê het. ~ Wilna Botha, 10/07/2016

Die wêreld en sy dinge. 
Ek wonder soms of ons besef hoe verkeerd dinge geloop het met die sondeval. Die Here het die heelal geskep met die bedoeling dat dit 'n plek moet wees waar die mens in liefde en harmonie moet bly, 'n plek van volmaaktheid. Toe kom die mens en verwoes alles met sonde. En laat ons nou maar nie vir Adam en Eva die skuld gee nie, as dit nie hulle was nie, was dit ek en jy. 
Die lewe op aarde het verander van 'n volmaakte speelpark, na 'n plek van verderf. Soveel so dat God sê ons moet nie lief word vir die dinge van hierdie wêreld nie. 
1 Joh 1:15-17 "Moenie die sondige wêreld en die dinge van die wêreld liefhê nie. As iemand die wêreld liefhet, is die Vader se liefde nie in hom nie. Die wêreldse dinge – alles wat die sondige mens begeer, alles wat sy oë sien en begeer, al sy gesteldheid op besit – kom nie van die Vader nie, maar uit die wêreld. En die wêreld met sy verleidelike dinge gaan verby, maar wie die wil van God doen, bly ewig lewe."
Sjoe, dis bitter moeilik, en elke dag sal 'n stryd wees om deur te worstel, want ons kan nie net doen wat ons wil nie. Dis ironies dat so baie dinge wat lekker is om te doen, soveel moeilikheid veroorsaak. Dit is nou maar so, die lewe van 'n Christen is nie altyd maklik nie, want ons moet leef volgens ander standaarde, maar die beloning is so groot. 
Vers 17 b sê dit duidelik:... maar wie die wil van God doen, bly ewig lewe. ~ Willem Botha, 07/07/2016

Ek is tot alles in staat... 
Hierdie is vir ons as Christene baie bekende woorde en ons haal dit graag aan. Dit kom uit die gedeelte in Fil. 4:10-14 waar Paulus dankbaar is teenoor die gemeente wat hom bystaan. Maar Paulus het regtig swaargekry vir sy bedieningswerk.
Kyk wat skryf hy in Fil. 4:12-13 "Ek weet wat armoede is en ek weet wat oorvloed is; van alles het ek ondervinding: om genoeg te hê om te eet sowel as om honger te ly, om oorvloed te hê sowel as om gebrek te ly. Ek is tot alles in staat deur Hom wat my krag gee."
Net soos ons vandag, het Paulus moeilike uitdagings in die gesig gestaar en hy noem dat hy weet van swaarkry en armoede. Soms was dit swaar en ander tye weer beter, want by tye het hy kos gehad en dinge selfs in oorvloed gehad, maar dit het verseker nie altyd goed gegaan nie. Dan sê hy hierdie woorde: "Ek is tot alles in staat deur Hom wat my krag gee". Wat is hierdie krag wat hy van God ontvang? Dis om vas te byt, voort te beur, uit te hou en aan te hou, totdat die deurbrake weer kom. 
Onthou hierdie stelling: As dit nou goed gaan, moenie dink dit gaan altyd goed gaan nie. Maar aan die ander kant, moenie dink as dit nou sleg gaan, dat dit vir altyd gaan sleg gaan nie. Daar kom weer tye van oorvloed soos vir Paulus, byt net vas. 
Hou ook in jou swaar tye aan hierdie woorde van Paulus vas: Ek is tot alles in staat deur Hom wat my krag gee. Willem Botha, 27/06/2016

Burgers van die hemel 
Ek het al so baie keer die vraag gehoor: Nou van watter Botha's is jy? Mmm.. wel, sommer net van die Botha's, ons is so baie, dit help nie ek sê van die Vrystaat of van die Transvaal nie, ons wemel orals. Toe ek in die weermag was noem ek dat ek familie het van die een korporaal se tuisdorp en vra toe of hy my klomp neefs ken. Sy antwoord was : O jitte ja die vervlakste klomp messtekers! Sjoe, ek het skaam gekry want dit was so effe waar.
In Fil 3:18 - 4:1 praat Paulus van die vyande van die kruis van Christus, en hy noem dat hulle tuiste eendag die verderf sal wees. In vers 20 sê hy egter: "Maar ons is burgers van die hemel, vanwaar ons ook die Here Jesus Christus as Verlosser verwag".
Jou herkoms sê iets van jou en baie mense leef tog volgens 'n lewenstyl wat daarmee geassosieer kan word, soos my neefs met hulle vreemde reputasie. Maar ons hoef nie gevangenisse te wees van ons herkoms nie, ons moet eerder 'n lewenstyl handhaaf wat pas by ons toekoms. Ons is burgers van die hemel, en mense moet dit in ons manier van lewe sien. Wat 'n wonderlike getuienis is dit nie as iemand van jou sê: "Daardie ou gaan reguit hemel toe". Dan sal dit ander mense ook kan saamsleep. 
Natuurlik is dit nie ons dade wat ons red nie, maar ons dade is immers ons getuienis, en daarom moet ons lewe soos burgers van die hemel. Ons kan, want as ons Christus as Saligmaker aangeneem het, het ons reeds die paspoort ontvang. ~ Willem Botha, 23/06/2016

Aan die einde van hierdie dag van opstande en brande en onrus is die teks wat in my hart opkom Rom 8:31: “Wat is nou ons gevolgtrekking oor al hierdie dinge? Dít: God is vír ons, wie kan dan teen ons wees?” God is vír ons! Ons kan nét  na Hom kyk vir hulp en raad en beskerming. Ons kan nét  na Hom uitroep vir vrede en rus en veiligheid. “Waarvandaan sal daar vir my hulp kom?” vra Ps. 121. “My hulp kom van die Here wat hemel en aarde gemaak het.” Fokus  vir ’n oomblik op elke woord van die teks: “God is vir ons.”
“GOD” – Hy is dié een wat alles gemaak het, dié een met alle mag, dié een wat alles weet en oral teenwoordig is, dié een wat genees, vergewe, optel en trane afvee. Dit is Hý wat vir ons is.
“IS” - Hy was en sal wees, maar vandag IS Hy vir ons. Hy lewe, Hy bestaan, Hy is werklik God en Hy leef in ons.
“VIR” - Hy is aan ons kant, Hy kom op vir ons, Hy help ons, Hy red ons, Hy tree in vir ons soos ’n advokaat, Hy skryf ons naam in sy handpalm. Hy is VIR ons.
“ONS” – Ja, ek en jy! Ons is spesiaal vir Hom, die appel van sy oog, gekroon met eer en heerlikheid, sy kind! Niks kan ons uit Sy hand ruk nie.
Mag Sy genade met ons almal wees. ~ Wilna Botha, 21/06/2016

In Fil. 2:19-30 lees ons van twee geestelike werkers wat vir Paulus en die gemeentes ondersteun het, nl. Timoteus en Epafroditis. Timoteus was ’n jong man,  ’n getroue werker, hy was nie bang vir vervolging en moeilikhede nie, hy het die belange van die gemeente bo sy eie belange gestel. As jy ’n geestelike werker is, of êrens ’n groep mense bedien met die evangelie of met liefdesdade wéét jy maar al te goed dat dit nie altyd maklik is nie, dat dit baie keer voel of jy nie waardeer word of nie erkenning kry vir wat jy doen nie. Die beste troos is om te onthou dat jy dit vir die Here doen, dat jou eie belange nie tel nie, dat die Here sien wat jy doen en jou daarvoor sal beloon. Gaan voort om te doen wat jou hand vind om te doen, doen dit met liefde en oorgawe en toewyding. “God is nie onregverdig nie: Hy sal julle werk nie vergeet nie en ook nie die liefde wat julle vir sy Naam betoon het deurdat julle julle medegelowiges gedien het en nog dien nie.” (Heb. 6:10) Die ander van ons wat aan die ontvangkant staan van ’n geestelike werker se bediening, luister wat Paulus sê: “Ontvang hom met oop arms as ’n broer in die Here en bejeën manne soos hy met agting.” (Fil. 2:29) Sê vir slag dankie vir jou dominee, bid vir hom, bederf hom met ’n ete, verseker hom van jou ondersteuning en aanvaar hom soos wat hy is – nes jy, is hy ook nie volmaak nie, word hy ook moeg, het hy dalk ook probleme met sy kinders en het hy dalk ook bietjie aanmoediging nodig. ~ Wilna Botha, 16/06/2016

Soekend
Die mens bly maar 'n soekende wese en ons almal wil graag alles van God weet en dis reg so. Ons as Christene moet inderdaad onsself met kennis toerus, maar ons moet verseker ook onderskeidingsvermoë hê om te weet wat regtig waar is en wat nie. Ons probleem is dat al die vorms van media ons aan net te veel opinies blootstel.
Die Here het die mens egter met verskeie gawes toegerus en ons moet dit gebruik, maar o wee, ons moet oppas vir mense, en wat hulle in die Naamvan die Here doen, want dit kan ook vir eie gewin wees. 
Kyk bietjie na hierdie waarskuwing en neem dit ter harte. 
Ef 4:11-14 "En dít is die “gawes” wat Hy “gegee het”: apostels, profete, evangeliste, en herders en leraars. Sy doel daarmee was om die gelowiges toe te rus vir hulle diens en vir die opbou van die liggaam van Christus. So sal ons uiteindelik almal kom tot die werklike eenheid in ons geloof en in ons kennis van die Seun van God. Dan sal ons, sy kerk, soos 'n volgroeide mens wees, so volmaak en volwasse soos Christus. Dan sal ons nie meer kinders wees nie; ons sal nie meer soos golwe op en af en heen en weer geslinger word deur elke wind van dwaalleer as vals leraars ons met hulle slinksheid en listigheid op dwaalweë wil wegvoer nie."

Die Here waarsku vir ons hier dat ons ons nie heen en weer moet laat slinger deur die duisende opinies wat op ons pad kom nie. Hy maan ons om by die waarheid te bly, wat Hy reeds is die Bybel opgeteken het. Hoor ander se menings, gaan toets en beproef dit, maar moenie toelaat dat mense jou geloof in twyfel trek as jy nie alles vir soetkoek opeet nie. Die beste is, gaan vra self vir die Here, en al wat jy moet doen is om Sy Woord te lees, alles is reeds daar, dan sal jy geanker wees in Hom, en sal die winde jou nie kan rondslinger nie. ~ Willem Botha, 07/06/2016

Treinrit 
Ek deel graag met jou 'n pragtige beeld van die lewe, wat ek by iemand gehoor het.
My pa was 'n treindrywer en ek het heerlike herinneringe van treinritte wat ek gehad het saam met my familie. Ons was dikwels al ses saam op 'n trein en dit was so lekker. 
So is die lewe ook soos 'n treinrit. As jy nou hierdie kan lees is jy besig met jou treinrit en jy is dalk ook al geruime tyd op hierdie trein. Dalk het jy kinders wat ook tans met die rit besig is. Daar is in sommige gevalle selfs vier generasies tegelykertyd op die trein, en jy het geen keuse gehad wanneer julle opgeklim het, of hoe hierdie rit vir jou begin het nie, maar dit hang in 'n mate van jouself af hoe die rit vir jou verloop. Jou ouers het voor jou opgeklim, maar myne se afklimstasie stasie is reeds agter my. So ook dié van my skoonouers, maar Goddank my kinders is nog op die trein. Wanneer kom my stasie? Ek weet nie, maar ek bid uit selfsug dat my stasie kom voor my kinders s'n kom. 
Daar klim baie ander mense op en sommige raak vriende en maak die rit aangenaam. Sommige klim soms vinnig weer af en dis dan bitter hartseer. So ook met ander familie, en dan het ons dikwels nie veel van die rit saam met hulle geniet nie.

Hierdie trein is God se trein. Hy besluit waar, wat en hoe dinge sal gebeur, maar laat vir ons toe om die beste van die rit te maak. Hy bestuur hom en Hy besluit op die rigting, en ook wanneer wie opklim en wie afklim. 
Ek geniet my rit ten volle, en ek geniet ook diegene wat saam met my op die trein is. Die spasie op die trein is te min om slegte verhoudinge te hê want jy moet kort kort by iemand verbyskuur. 
Moenie jou bekommer oor jou afklimstasie nie, geniet net die rit. En laat die Drywer toe om die trein te ry. Hy weet wat Hy doen en ry die trein al van die begin van tyd af. 
Geniet die rit. ~ Willem Botha, 05/06/2016

Die hoof van die huis 
Hierdie is 'n onderwerp wat baie kontroversie veroorsaak. Die Bybel sê die man is die hoof van die vrou, maar vele mense hou niks daarvan nie. Baie vrouens sien dit as 'n bedreiging want dit gee die man die reg om haar te onderdruk, en baie mans hou nie daarvan nie want dan hoef hulle nie die verantwoordelikheid te neem nie. Altwee hierdie groeperinge verstaan hierdie ding heeltemal verkeerd. 
Daar is geen enkele plek in die Bybel wat die man die reg gee om 'n tiran te wees nie en dis laakbaar. Die Bybel se bedoeling is hoegenaamd nie dat daar 'n ongelykheid moet wees nie, maar die man het 'n geweldige verantwoordelik in die huis en mans skram óf weg daarvan óf die vrou gee die man nie die voorreg om sy rol te vervul nie. 
Ef 5:21- 25 "Wees uit eerbied vir Christus aan mekaar onderdanig. Vrouens, wees aan julle mans onderdanig, net soos julle aan die Here onderdanig is. Die man is die hoof van die vrou, soos Christus die hoof van die kerk is. Christus is ook die Verlosser van die liggaam, sy kerk. Soos die kerk aan Christus onderdanig is, moet die vrouens in alles aan hulle mans onderdanig wees. Mans, julle moet julle vrouens liefhê soos Christus die kerk liefgehad en sy lewe daarvoor afgelê het."
Kan jy sien dat dit begin met: "Wees uit eerbied vir Christus aan MEKAAR onderdanig...?" Hoe moeilik is dit om DIT te verstaan? Maar hier kom die kruks:" Die man is die hoof van die vrou, soos Christus die hoof van die kerk is". 
Wil jy as vrou 'n beter hoof hê as Christus? Onthou jy dat Hy gesê het "Ek het nie gekom om gedien te word nie maar om te dien?" Meneer, sien jy dat die rol eintlik 'n onderdanige rol is? 'n Dienende rol beteken om uit jou gesagsposisie voor te stap, te beskerm, te koester en lief te hê, sonder om dit 'n magspel te maak. Jesus het Sy lewe vir die kerk afgelê, so moet 'n man sy gesin bo homself stel. Dit kan jy net vermag as dit uit onvoorwaardelike liefde gedoen word. 
Die man moet sy sokkies optrek en hierdie rol ten volle uitleef, en die vrou moet die man weer toelaat om haar held te wees, dan het jy 'n funksionele gesin. Ongelukkig is daar huise waar die kinders ook nie meer die pa as hoof ag nie, want hulle swaai die septer. Nee meneer, neem jou rol in en verdien die gesag deur te dien, te lei en te koester. Dis jou Godgegewe taak. ~ Willem Botha, 01/06/2016

Daar is geen god nie
Wel, dis kortweg die definisie van ateïsme. Ateïsme kom van die vroegste tye af en ek het al gewonder wat die verskil is tussen 'n ateïs en 'n ongelowige, maar ek dink dis maar dieselfde ding. Dit is egter baie duidelik dat dit vandag openlik in Suid-Afrika toeneem en dat mense baie uitgesproke is daaroor. 
Die bekende Prof Richard Dawkins in Engeland kan waarskynlik vandag dié aartsateïs genoem word en het in 2009 'n veldtog geloods waar die volgende woorde op 200 busse, en baie ander plekke, aangebring is: "There's probably no God. Now stop worrying and enjoy your life".

Ek was uiters gefassineerd deur die feit dat die professor die woord "probably" gebruik het. Is dit dan hoe sterk sy ongeloof is? 'n Vriend van my het egter 'n ander siening oor ateïsme, hy voel jy kan nie sê jy glo nie in God nie, want jy glo verseker. Sy woorde is: "You believe in the non-existence of God". 
Wel, vir my is dit maklik, want ek het heeltemal te min geloof om 'n ateïs te wees. Hulle sê hulle glo net in dinge wat hulle kan sien, en ek voel ek sien te veel om nie te glo nie. Dis net onmoontlik, sien jy nie die wonders van die natuur nie? Wat van die wonderwerk van die geboorte van 'n baba? Sommer net jou vinger wat gesond word as jy hom sny, of wat van mense wat ongelooflik baie versterking put uit hierdie onsigbare God in tye van nood?
Ons sien onlangs 'n baie goeie film met die naam: "The man who knew infinity". Die briljante wiskunde student vertel vir die professor dat hy God in elke faset van wiskunde raaksien, waarop die professor sê dat hy 'n ateïs is en nie glo in God nie. Die student sê toe die volgende: "No professor, I think you believe in God, you just don't think He likes you".
So is daar dalk baie ateïste wat skuil agter "ongeloof", omdat hulle nie kan glo dat God vir HULLE lief kan wees nie. Die punt is, Hy is lief vir almal, al dink jy nie so nie. En almal het in hierdie lewe 'n kans om tot bekering te kom, al glo jy dit nie. God is lief vir jou, en jy kan absoluut niks doen om dit te verander nie. ~ Willem Botha, 30/05/2016

Kla kla kla
Goeiste maar ons is 'n klaerige nasie, net niks is goed genoeg nie en daar is soms so min sprake van dankbaarheid. Ek het nou die dag 'n pragtige, inspirerende boodskap van die aktrise Angelina Jolie gehoor waar sy 'n toekenning gekry het. Sy het gesê dat sy glo daar is nog baie potensiële aktrises, wat baie meer talent as sy het en wat 'n baie groter verskil in hierdie lewe kan maak, en wat baie groter hoogtes in hierdie lewe kan bereik, maar, sonder dat sy dit hoegenaamd verdien, is sy die een wat die geleenthede gekry het en sy is innig dankbaar daarvoor. 
Ek glo daar is hordes beter "Willem Botha's" as ek, mense wat werklik sou kon uitstyg, maar ek is die een wat die geleenthede gekry het. Maar hoekom kla ek meer as die "ander een" wat dalk krepeer van armoede, maar in vreugde en vrede leef? Dis omdat ek ophou tel het aan seëninge, en ophou om die swaarkry van ander om my raak te sien. 
My buurman sê nou die dag die volgende waar woorde: As ek en jy meer tyd spandeer aan die tel van ons seëninge, sal ons minder tyd hê om te kla. Dis eenvoudig, jy kan net een op 'n slag doen, dis onmoontlik om jou seëninge te tel terwyl jy kla. Hoekom sien ons nie meer die goeie raak nie? Weet jy hoekom nie, want ons het te bederf geraak. Niks is meer genoeg nie, nog nog, meer meer! Dis hoekom ons vir die Here dinge vra, maar dan nie kan wag nie. Alles moet NOU gebeur! Maak opnuut 'n nuwe keuse, en sien die Here se genade in jou lewe raak. 
Fil 4:4-7 "Wees altyd bly in die Here! Ek herhaal: Wees bly! Wees inskiklik teenoor alle mense. Die Here is naby. Moet oor niks besorg wees nie, maar maak in alles julle begeertes deur gebed en smeking en met danksegging aan God bekend. En die vrede van God wat alle verstand te bowe gaan, sal oor julle harte en gedagtes die wag hou in Christus Jesus." ~ Willem Botha, 22/05/2016

Rotresies 
Prediker 2 : 1 - 11 "Ek het by myself gedink: laat ek my oorgee aan plesier, laat ek die lewe geniet! Maar ook dit het niks opgelewer nie. 2 Van lag moes ek sê: dis sinloos, en van plesier: wat bring dit? 3 Ek het gewonder wat sal gebeur as ek my aan wyn oorgee maar tog nog op soek bly na wysheid, as ek soos 'n dwaas leef totdat ek vasgestel het wat die beste is waarmee 'n mens hom sy lewe lank in hierdie wêreld besig kan hou. 4 Ek het groot ondernemings aangepak: ek het vir my huise gebou en wingerde geplant. 5 Ek het vir my tuine en parke aangelê en allerhande soorte vrugtebome daarin geplant. 6 Ek het vir my damme gemaak om die lappe jong bome nat te lei. 7 Ek het slawe en slavinne aangeskaf, en hulle het kinders gekry wat ook my slawe was. Ek het baie beeste en kleinvee gehad, meer as almal voor my in Jerusalem. 8 Ek het vir my silwer en goud opgegaar wat ek gekry het van konings en provinsies. Ek het vir my sangers en sangeresse gewerf, talle mooi meisies met wie ek die lewe kon geniet. 9 Ek was magtiger en ryker as almal voor my in Jerusalem. My wysheid het my goed te pas gekom. 10 Alles wat ek begeer het, het ek my veroorloof; ek het my geen plesier ontsê nie. Alles waarmee ek my besig gehou het, het my plesier verskaf. Dit was my beloning vir al my inspanning. 11 Maar toe ek goed nadink oor alles wat ek gedoen het en oor alles waarmee ek my met soveel sorg besig gehou het, het ek gesien dat alles niks was, 'n gejaag na wind. In hierdie wêreld bevredig niks nie."

Respek vir God
Iets wat wat op 'n skokkende manier besig is om te verdwyn. Ons sien hoe mense van oor die wêreld, maar net soveel in ons eie land, nie net wegdryf van die Here af nie, maar op 'n absolute arrogante en uitdagende manier met die Here omgaan, so asof Hy 'n hierjy is wat jy met een skoot van die tafel kan afvee.
Een van die mees skryende en Godslasterlike frases wat jy daagliks hoor en sien, en lees op Facebook is "OMG" . Ek het al besluit ek wil elkeen van my vriende op Facebook wat stukke deel waar dit voorkom, summier afgooi. Voorts is daar sêgoed wat heel onskuldig lyk, wat net so sleg is, bv as mense praat van "Die ouman daarbo". Hoekom op aarde Hom nie op Sy naam noem nie?
Maar die Bybel praat baie hard en duidelik oor hierdie goed, en as mens hierdie tekste lees sien jy hoe God ook uitgesproke kan wees, want hierdie God van liefde sê dat Hy jou in die hel sal werp! So eenvoudig soos dit. 
Heb 10:29 - 31"Hoeveel swaarder straf, dink julle, sal hy kry wat die Seun van God verag het, die bloed van die verbond waardeur hy geheilig is, geminag het en die Gees van genade beledig het? Ons weet tog wie Hy is wat gesê het: “Dit is mý reg om te straf; Ek sal vergeld;” en verder: “Die Here sal oor sy volk oordeel.” Dit is verskriklik om in die hande van die lewende God te val."
Mense speel hierdie speletjie met God en dis 'n duur speletjie. Jy sien vriend, daar is 'n verskil tussen mense wat bietjie koud raak, (of dalk nog nooit regtig sy hart vir die Here gegee het nie), en hierdie mense wat hulle geloof verloor en op hierdie uitdagende pad gaan. Die Bybel sê dan ook dat hierdie mense nie weer sal terugdraai nie.
Heb 6:4-6a "Wanneer mense een keer deur God verlig is, die hemelse gawe ontvang en deel gekry het aan die Heilige Gees, die goeie woord van God leer ken het en die kragte van die toekomstige wêreld ondervind het en dan nogtans afvallig geword het, is dit onmoontlik om hulle weer tot bekering te bring."
Ek het al baie gedink dat mense wat minagtend met ander omgaan, geen selfrespek kan hê nie, want ek hoef nie van iemand anders te hou om hom te respekteer nie, maar as iemand sy Maker minag en openlik uitdaag, is daar geen salf aan hom te smeer nie. 
Lees weer Heb 10:31 "Dit is verskriklik om in die hande van die lewende God te val."
'n Predikant het tereg gesê: As jy soek na 'n definisie van die onvergeefbare sonde teen die Heilige Gees, is dit hierdie openlike minagting van God. ~ Willem Botha, 12/05/2016

Skaakmat
Ek is self nie 'n goeie skaakspeler nie, maar dis nogal 'n interessante spel wat met uiterse vernuf gespeel word. Elke speler moet die hele tyd probeer uitmaak wat in die opponent se kop aangaan en hy moet hom vernuftig uitoorlê. Deur die loop van die spel word die een speler naderhand soos 'n jagter wat net wag om die doodskoot te gee. Dis nogal 'n oorwinning as die een triomfantelik kan uitroep "SKAAK".
So sien ek in my geestesoog hoe hierdie "skaakspel" tussen Jesus en die duiwel afgespeel het. Toe Satan Jesus versoek het, het hy allerhande skuiwe gemaak om Jesus te uitoorlê en het Hom selfs die wêreld aangebied as Jesus sou neerkniel en hom aanbid. Maar Jesus se skuiwe was nie op nie en Hy het die aanslag teengestaan. Deur die tyd wat Jesus met Sy openbare lewe met mense omgegaan het, was die skaakspel soms fel. Johannes die Doper se kop is afgekap, Lasarus het doodgegaan, die Fariseërs het die lewe vir Hom moeilik gemaak en Sy eie mense het Hom verwerp, maar daar was nog altyd 'n skuif oor.
Totdat Pontius Pilatus Hom die doodstraf oplê en laat kruisig. Toe Jesus Sy laaste asem uitblaas, het Satan waarskynlik triomfantelik uitgeroep "SKAAK"! Die Een wie hy so gehaat het, was uit die weg geruim en hy het waarskynlik soos 'n oorwinnaar sy hande in die lug gegooi en gejuig. Nou was al Jesus se volgelinge net so verlore soos Hy. 
Maar toe staan Hy op. Ek dink dis die één skuif wat Satan nie verwag het nie! Wie op aarde staan per slot van rekening uit die dood uit op? Wel, die laaste woord in hierdie spel was nog nie gespreek nie, want Jesus het geantwoord met :- SKAAKMAT!!!
Daardie term beteken net een ding, die spel is verby. 
Kol 2:13-15 "Julle was dood deurdat julle gesondig het en deurdat julle sondige natuur nog nie weggeneem was nie. God het julle egter saam met Christus lewend gemaak deurdat Hy ons al ons sondes vergewe het. Hy het die skuldbewys met sy eise teen ons tot niet gemaak. Deur dit aan die kruis te spyker, het Hy dit vir goed weggeneem. Hy het elke mag en gesag ontwapen en hulle in die openbaar vertoon deur hulle as gevangenes in die triomftog van Christus mee te voer."
Vandag kan ek en jy ook uitroep: SKAAKMAT, as dit vir jou voel of die Satan die oorhand oor jou kry. ~ Willem Botha, 10/05/2016

Wie GLO nog? 
Ek het al baie met hierdie vraag geworstel. Ons sien baie verskillende uitgangspunte oor geloof deesdae. Party sê jy moet glo soos 'n kind (soos die Bybel ook sê), ander sê hulle glo net wat hulle sien, nog ander sê hulle het geglo maar kan nie meer nie. Sommige gaan ondersoek alles en kan dan net nie meer glo nie, en ander ondersoek alles en hulle geloof word geweldig daardeur versterk. Ek vind myself nogal tuis in laasgenoemde. 
Dan kry jy 'n ander groepering wat nie meer die inhoud van die Bybel kan aanvaar nie, maar baie tyd spandeer om met diegene wat kinderlik glo, te redeneer en stry, asof hulle hard probeer om gelowiges oor te haal om ook nie meer te glo nie. My mening is eenvoudig, as iemand nie meer die gesonde leer kan verdra nie, los dit en gaan aan met jou lewe. Maar ongelukkig kry jy dan ook mense wat glo dat geloof is vir oningeligtes, of mense wat intellektueel agtergeraak het en te dom is om te verstaan dat die Bybel nie meer vandag relevant is nie. So iets van: Geloof in Jesus is vir dom mense.

Ek het probeer agterkom of mense in spesifieke beroepe makliker glo as ander en gesien dat dit hoegenaamd nie waar is nie, hoewel ek dit nie verstaan nie. Ek het geglo dat wetenskaplikes, wat met die mees ongelooflike wonders van die skepping en die wetenskap werk makliker sal glo, maar helaas nee, ook nie sterrekundiges nie, of ruimtevaarders of mediese spesialiste nie. Opregte, diepe geloofsoortuigings kom ook nie onder alle teoloë voor nie. Ek verstaan dit nie. 
Ek het egter wel gesien dat daar BAIE BAIE van hierdie hoogs intelligente, geleerdes is wat kinderlik alles glo, soos wat die Bybel dit beskryf. Net soos motorwerktuigkundiges, tiksters en straatsmouse. 
Die slotsom waartoe ek gekom het, is dat slegs mense wat toegelaat het dat die Gees hulle vervul, en Jesus as Saligmaker aanneem, werklik kan glo. Die volgende is al meer as 2000 jaar opgeskryf en vandag perfek van toepassing. 
Jes 44 : 25b "... Ek weerlê die geleerde mense, Ek ontmasker hulle kennis as dwaasheid".
1 Tim 6:20 "Timoteus, bewaar wat aan jou toevertrou is. Vermy die onheilige en sinlose praatjies en die redenasies van die “kennis”, soos dit verkeerdelik genoem word." 
2 Tim 4:3 "... want daar sal 'n tyd kom wanneer die mense die gesonde leer nie meer sal verdra nie. Hulle sal hulle eie begeertes volg en vir hulle leermeesters bymekaarmaak wat net sal sê wat hulle graag wil hoor."

Hoe baie van hierdie leermeesters kry jy nie! Daar is selfs vele wat steeds hulle brood en botter met die Bybel (se buiteblaaie?) verdien, maar nie die inhoud aanvaar nie. 
Die waarheid wat in hierdie tekste opgeteken is verstom my. Laastens lees ek die kruks van die hele ding in hierdie teks:
1 Kor. 2:14 "Die mens wat nie die Gees van God het nie, aanvaar nie die dinge van die Gees van God nie. Vir hom is dit onsin. Hy kan dit ook nie verstaan nie, omdat dit geestelik beoordeel moet word." ~ Willem Botha, 02/05/2016

Die ryk ou blikskottel!
Kyk, as daar nou woorde is wat my warm onder die kraag kry is dit hierdie bogenoemde woorde. Dit verstom my dat mense so nydig kan wees teenoor mense wat iets bereik het in die lewe. 
Ek dink dit het so effe van 'n siekte geword om te dink mense met meer besittings, skuld dit aan ander met minder besittings. Natuurlik praat die Bybel van mededeelsaamheid, versorging van die weduwees, om 'n oop hand te hê en om dit wat jy uit genade ontvang het te deel. Dis alles waar en verseker 'n Bybelse opdrag. 
My probleem is dat mense nie ander se vrug op hulle arbeid, vir hulle gun nie. Hierdie teks vat dit baie mooi vas as hy sê dat luiheid sal lei tot armoede. En weereens ja, ek sê nie dat arm mense almal lui is nie, maar dat luiheid tot armoede ly. 
Spr 20:4 " 'n Luiaard ploeg nie in die saaityd nie en soek in die oestyd na iets wat nie daar is" 
Nou kyk, suinigheid is 'n lelike ding, maar dis die suinige persoon se eie probleem. Die punt is, hy skuld my niks, en my welvaart is nie veronderstel om van syne afhanklik te wees nie. Daar is baie tekste in die Bybel wat daarna verwys dat ons hard moet werk, en dan tevrede wees met wat jy kan bekostig. Maar moet nie 'n ander ou wat hard gewerk het, baie risiko's geneem het en wat al sy talente gebruik, verkwalik as hy meer besit nie. 
Moenie 'n ander ou se weelde beny nie, want dit bring dalk probleme waarsonder jy kan klaarkom. Leer eerder om tevrede te wees met wat jy het, en gun ander die vrug op hulle arbeid. Hier lê 'n werkweek voor ons wat óf 'n vreeslike straf is, óf wat vir jou plesier gaan gee. 
Gaan werk om te leef, moenie net leef vir werk nie. Geniet die week. ~ Willem Botha, 24/04/2016

Sing
Ek is seker jy het ook al gesien hoe 'n klein kindjie kan sing en neurie as hulle speel. Dis so pragtig as hulle rondhardloop en huppel, sommer so op hulle eie, en sing. Dit lyk so of sing 'n teken is by mense (en kinders), dat daar net geen sorge in die lewe is nie. So is dit ook vir baie volwassenes, as hulle nog 'n lied in die hart het, maar dis nie vir almal nie.
Ek dink elke kind sing as hulle klein is, maar nie elke volwassene sing meer nie, want die lewe het hulle liedjies gesteel. Wat het dan intussen gebeur? Op watter ouderdom, of watter insident, of watter terugslag het mense se liedere gesteel? Ek ken mense wat dit nie meer regkry nie, die note het weggesterf. Maar my ma, wat in 2011 oorlede is, het altyd gesing. Selfs toe sy op haar sterfbed was en so deurtrek was van kanker, toe sy nie eers meer kon eet nie, het sy nog met haar hortende asempie gesing. In haar laaste dae, wanneer ons vir haar gaan kuier het, het my seun op die bed langs haar gaan lê en begin om 'n liedjie te sing, dan het sy moedig saamgesing. Dit sal my vir die res van my lewe bybly, dat my ma gesterf het met 'n lied in die hart, want die lewe, of selfs die dood, kon haar nie onderkry nie.
Ek dink ek het so ietsie daarvan van my ma gekry en loop graag en sing, hoewel ek besef dat dit nie altyd lekker is vir die aanhoordes nie. Inteendeel, die Bybel het selfs iets daaroor te sê .
SPREUKE 25:20 "Iemand wat jou klere van jou afvat op 'n koue dag, of asyn op bytsoda, so is iemand wat vir jou liedjies sing as jy treurig voel." Dus beur dit nie nie vir almal altyd op nie!
Dan lees ons van Paulus en Silas wat in die tronk sit, nadat hulle uitmekaar geslaan is ter wille van hulle Geestelike werk. Ek sien in my geestesoog hoe Paulus stukkend geslaan is en dalk selfs bloed wat uit sy mond kom.
Hand 16: 23 - 25 "Nadat hulle baie geslaan is, is hulle in die tronk gegooi, en die bewaarder het opdrag gekry om hulle streng te bewaak. Op hierdie bevel het hy hulle in die binneste sel opgesluit en hulle voete in die houtblok vasgeklem. Teen middernag was Paulus en Silas besig om te bid en tot lof van God te sing. Die ander gevangenes het na hulle geluister.

Goeiste, ek sou nou regtig nie baie lus gewees het vir sing as ek ter wille van die Evangelie so gestraf is nie, maar Paulus en Silas het dit anders beleef. Die wêreld se swaarkry het nie hulle liedjies gesteel nie.
Wat van my en jou? Wat het gebeur tussen jou sorgelose kleintyd en nou, wat die musiek uit jou binneste uitgesteel het? Is daar nog genoeg "lewe" oor om dit te vier met 'n lied in die hart? Ja, ons kry maar almal ons af dae so nou en dan, maar moenie dat die note wegsterf nie. Ek glo my ma lofprys uit volle bors in haar Hemelse tuiste, en daarom kan ek ook sing.
Ek het sekerlik 'n goeie kans om hierdie nag te oorleef, en sover ek weet is ek honderd persent gesond, hier is genoeg kos in my huis vir baie dae, my kinders is wonderlik en ek het 'n wonderlike vrou. Dit verdien 'n lekker gejubel en gejuig. Maar die politiek en die ekonomie laat my nie juis te lekker voel nie, maar vriend, weet verseker, hierdie mense met hulle dinge gaan nie my note uit my sisteem uitkry nie, dis verseker. Dan moet die lied in my hart maar liewer vir hulle soos asyn of bytsoda wees.
Sing sal ek sing. Ek hoop regtig dat jy nog 'n lied in die hart het, en dit soms kliphard uitbasuin. ~ Willem Botha, 18/04/2016

Dit was BAIE goed 
 Gen 1:31 "Toe het God gekyk na alles wat Hy gemaak het, en dit was BAIE GOED. Dit het aand geword en dit het môre geword. Dit was die sesde dag".
 Nadat God alles geskep het, was dit Sy waarneming: DIT IS BAIE GOED! 
 Inderdaad, en die kroon van Sy skepping was natuurlik die mens, JY! Ek wonder of ek en jy weet hoe spesiaal ons geskep is, hoe wonderbaarlik ons gevorm is, en hoe ongelooflik kompleks ons ontwerp en gebou is. Maar ek kan hierdie dinge in my liggaam waarneem, en dit laat my in verwondering, maar hoe was Adam as die eerste mens geskep? Evolusie? Nee wat, daar is nie 'n manier nie! Geen enkel ding rondom makro evolusie kon nog ooit verder as 'n hipotese vorder nie. Dis 'n gesprek vir 'n ander dag. Maar hoe dan? 
 Gen 2:7 "Die Here God het toe die mens gevorm uit stof van die aarde en lewensasem in sy neus geblaas, sodat die mens 'n lewende wese geword het." 
 Weet jy, van al die modelle wat ons kan indink, lyk hierdie een die mees waarskynlik. Ons weet tog stof tot stof is waar, net soos die Bybel sê, voorts moet ons ongelooflik dom wees om te dink ons is nie perfek ontwerp nie, en daarom moet daar 'n ontwerper en Skepper wees, net soos die Bybel sê, waar Hy God genoem word. 
 "Die Here God het toe die mens gevorm uit stof van die aarde en lewensasem in sy neus geblaas, sodat die mens 'n lewende wese geword het."
 Ek sien in my geestesoog 'n beeld waar God wandel in die tuin en dink aan Sy finale skepping (skepsel), Hy buk grond toe en skraap stof bymekaar en vorm dit in die vorm van 'n mens (soos 'n pop?) en kyk met genot na Sy handewerk. Dan lê Hy vorentoe, sit Sy lippe op hierdie beeldwerk en blaas asem in die mond in. Die beeld begin asemhaal, die hart begin klop, bloed pomp deur die liggaam en Adam maak sy oë oop. Hy kyk met absolute verwondering na sy Maker wie hom ophelp en hom styf teen Sy bors vasdruk, en sê:- "Ek het jou by die naam geroep, jy is Myne"
 Inderdaad was dit BAIE goed. ~Willem Botha, 31/03/2016

Doodstraf 
Ek was vir baie lank sterk ten gunste van die doodstraf en sommige dae voel ek steeds dat dit baie probleme sal oplos. Totdat ek eendag met 'n persoon praat wat vir lank by die galg gewerk het, en ek was absoluut geskok oor die realiteit daarvan as dit jou werk is om iemand se lewe te neem wat niks aan jou gedoen het nie. Dit het hierdie persoon tot sy dood gery en dit het by hom gespook om iemand lewendig reg te maak vir die galg, en minute later dood af te haal. Hy het ook vir my skokkende dinge vertel van wat met 'n mens gebeur in daardie paar minute. 'n Galg is egter nog amper menslik, maar Jesus se kruisdood was 'n wrede, genadelose dood waar 'n persoon homself leeg gebloei het, versmoor het, sommiges se bene was gebreek terwyl hulle nog lewe, en daar is 'n spies in Jesus se sy gesteek. Ons het 'n paar dae gelede die nuwe film "Risen" gesien , en die kruistoneel het my diep geraak. 
Iemand wat onskuldig gesterf het? Nee, Hy was absoluut skuldig! Hy was skuldig aan moord, verkragting, diefstal, owerspel, en alles waaraan ek en jy kan dink. 
Maar Hy het nie daardie goed gedoen nie, want hy het ons skuld (aan al hierdie aaklige dinge) op Homself geneem. En 'n galg sou nie deug nie want daar is nie bloed nie. Sy bloed moes vloei in die plek van die offerlam sodat die finale offer betaal kon word. En voorts, wie was die laksman? Die soldaat wat gesê het: Hierdie man was waarlik onskuldig? Of was Pontius Pilatus die een wat die blaam moes dra? Op wie kan ons die skuld pak? Dalk Judas wat Hom verraai het? 
Nee my vriend, nie een van hulle nie. Niemand hoef die blaam te dra nie, eintlik ook nie ek en jy nie, dit was die Vader se wil, en niemand kan of hoef die blaam te dra nie, dit was GENADE! Hierdie goed MOES net eenvoudig gebeur, anders sou ons almal sterf aan die ewige dood. 
Maar toe speel hierdie aangrypende laaste toneel af:
Joh 19:30 Nadat Jesus die suur wyn gekry het, het Hy gesê: “Dit is volbring!” Toe het Hy sy kop vooroor laat sak en die laaste asem uitgeblaas

En daarom kan ons lewe. Ek is innig dankbaar daarvoor. ~ Willem Botha, 23/03/2016

Wat nou? 
Ek is seker dat jy, net soos ek, eindeloos gefrustreerd is met die politieke situasie in die land, en dalk is jy, net soos ek, maar uitgelewer om hier te bly. Maar goeiste, wat nog? Hoeveel kan ons nog verduur, en hoeveel verassings wag daar nog op ons, en ons wil sekerlik almal hard uitroep: Waar sal ons hulp vandaan kom? Weet jy, ek is eerlik as ek sê dat ek uiters mismoedig raak met die situasie. En ja, dalk wil jy gou vir my 'n prekie afsteek en sê ons moet net hoop, bid en vertrou , want die Here is in beheer. Natuurlik doen ek dit, weet ek dit en glo ek dit, maar intussen soek ek wysheid oor alles. 
Hierdie tekste is nogal akkuraat in die tye wat ons nou leef:-
Spr 19:6 "Almal soek die goedgesindheid van 'n man met mag, elkeen is die vriend van iemand wat geskenke uitdeel." 
Spr 29:4 " 'n Koning wat reg laat geskied, maak 'n land veilig; een wat net belastings oplê, ruïneer 'n land." 
Spr 29:14 "As 'n koning reg aan arm mense laat geskied, sal hy lank regeer."

Ek en jy moet egter 'n paar besluite neem en vra wat ons te doen staan in hierdie onseker tye. Wel, hier is 'n paar van myne en ek hoop jy kan ook 'n paar positiewe dinge byvoeg:-
* Two wrongs doesn't make a right. Moenie dieselfde dinge doen as diegene wat die verkeerde pad kies nie. As ons onsself skuldig maak aan verkeerde dinge soos omkopery, verkeersreëls oortree, en belasting weerhou, verloor ons die "reg" om hierdie dinge te kritiseer. 
* Moenie ophou om goed te doen aan ander nie. 
* Te veel negatiewe praatjies maak geen verskil nie, konsentreer liewer op die positiewe dinge wat nog oorgebly het. 
* Wees lief vir almal, al is dit soms baie moeilik. 
* Moenie dink dat die Here geïmmigreer het nie, Hy is steeds hier en in beheer. 
* Bid steeds vir ons land. 
* Moet verseker nie jou liefde vir Suid-Afrika verloor nie, dit bly steeds 'n wonderlike plek. 
* Sien raak dat mense van alle kulture steeds baie goed met mekaar oor die weg kom op straatvlak. 
* Moenie jou getuienis verloor deur ander te benadeel nie, ons is steeds Christene en moet so optree. 
* Ons voorvaders sou nie die berge kaalvoet oorgesteek het as hulle wanhopig was nie. Werk liewer hard aan 'n beter Suid-Afrika vir almal. 
* In hemelsnaam, gaan stem tog net, anders het jy niks te sê nie. 
* Laastens, doen wat reg is, dis wat die Here van ons verwag. ~ Willem Botha, 21/03/2016

Vandag is dit Palmsondag – die laaste Sondag voordat ons die kruisiging van Jesus herdenk. Dit is dié Sondag toe Hy Jerusalem binnegery het op ’n donkie, dié Sondag toe sy volgelinge met palmtakke gewaai het en Hom as Koning geëer en Sy lof besing het. Ons het vandag sommer van palmblare kruisies gevou om ons te herinner aan die kruispad wat Jesus vir ons gestap het, vir die prys wat Hy aan die kruis betaal het sodat ons verlos en vergewe en vry kan wees. Ons het saam gebuig en saam gesing: “Loof die Koning, Hy wat in die Naam van die Here kom! Vrede in die hemel en eer aan God in die hoogste hemel!” (Luk. 19: 38) Toe Jesus gebore is, het die engele koor gesing: “Eer aan God in die hoogste hemel en vrede op aarde vir die mense in wie Hy ’n welbehae het!” (Luk. 2:14). Toe Hy Jerusalem inry het die skare Hom toegejuig: “Vrede in die hemel en eer aan God in die hoogste hemel!” (Luk. 19:38) Vrede op aarde het nou vrede in die hemel geword want deur Jesus het daar vrede tussen ons en God gekom; “Deur die bloed van sy Seun aan die kruis het Hy die vrede herstel, deur Hom het Hy alles op die aarde en in die hemel met Homself versoen.” (Kol 1:20) Pluk ’n palmtak en verwelkom vandag dié Vredeskoning in jou lewe. ~ Wilna Botha, 20/03/2016

Ek stem nie saam nie! 
Sjoe ons as Christene kan darem maar mekaar se hare trek ook onbelangrike goed, en ek glo dat jy jou wil wil gaan vervies vir my voor jy veel verder gelees het. Jy sien, ons lees dieselfde Bybel, kom dalk uit dieselfde kerklike denominasie en is selfs in dieselfde gemeente, maar laat ons nou oor 'n paar dinge wat ons glo begin praat, dan waai die hare! 
1) Grootdoop vs kleindoop 2) Ses dag skepping vs ‘n ou heelal 3) Die eind tye – sal daar ‘n wegraping wees of nie? 4) Is rockmusiek boos of nie? 5) Wat mag geëet word en wat nie? 6) Sabbats onderhouding op ‘n Saterdag vs geloofs viering op ‘n Sondag? 7) Gebruik van sekere rituele al dan nie 8) Mag ek Kersfees vier of nie?
Dalk het jy ook nou gou 'n paar tekste in jou kop laat rondrol, want jy glo mos wat jy glo, volgens die Skrif. En die oomblik wat mense van ons verskil trek ons hulle Saligheid in twyfel. 
Ai, sit twee boere bymekaar en chop-chop het jy twee politieke partye en twee kerke. Wel, is dit normaal? Ek dink so, dit hang net af hoe ons daarmee omgaan.

Rom 14:1-6 "Aanvaar die een wat in die geloof swak is, sonder om met hom te stry as sy opvatting van joune verskil. Een glo 'n mens mag alles eet; 'n ander is swak in die geloof, en hy eet net groente. Die een wat alles eet, moet die ander wat net groente eet, nie verag nie; en die een wat net groente eet, moet die ander wat alles eet, nie veroordeel nie, want God het hom aangeneem. Wie is jy om oor iemand anders se bediende te oordeel? Sy eie werkgewer sal oordeel of hy goed doen of nie. Maar hy sal goed doen; daarvoor sal die Here sorg. Vir die een is een dag belangriker as ander dae; vir 'n ander is alle dae ewe belangrik. Elkeen moet net in sy eie gemoed oortuig wees van sy opvatting. Die een wat 'n bepaalde dag op 'n besondere wyse hou, doen dit tot eer van die Here. Die een wat alles eet, doen dit tot eer van die Here, want hy dank God. En die een wat nie alles eet nie, doen dit tot eer van die Here, en ook hy dank God."

Hierdie goed maak nie saak nie, al wat tel is of ons gered is deur die bloed van Jesus. Solank ons saamstem oor die weg na saligheid, kan ons maar met mekaar saamleef oor die res. ~ Willem Botha, 15/03/2016

Stof
Ps 90 : 2-6 "Voordat die berge gebore is, voordat U die wêreld voortgebring het, ja, van ewigheid tot ewigheid is U God! U laat die mens sterwe: U sê net: “Word weer stof!” Duisend jaar is vir U soos gister as dit verby is, soos een enkele wagbeurt in die nag. U maak 'n einde aan 'n mens, hy gaan die doodslaap in. Hy is soos gras wat in die môre afgesny word: in die môre is dit nog groen, maar dit word afgesny en teen die aand is dit verlep en dit verdroog."
Ps 90:10 "Ons lewe maar sewentig jaar, of, as ons baie sterk is, tagtig, en dié is vol swaarkry en leed. Dit is gou verby, ons vlieg na ons einde toe."
29 200 dae, dis al. Dis wat jy het as jy sterk is, as jy jouself oppas en as jy die genade van God ontvang om dit reg te kry. Dit laat my dink: wanneer begin jy lewe? Sekerlik in die moederskoot, maar aards gesproke seker maar met jou geboorte. Maar... wanneer begin jy sterwe? Word jy al hoe sterker na geboorte (lewe jy al meer?) en gaan jy deur 'n draaipunt, en verswak jy dan tot by die einde? Waar is die draaipunt? 
Sjoe nee ek kan nie hierdie goed verklaar nie. Of begin jy sterwe die oomblik wat jy begin lewe? Of dalk lewe jy "meer en meer" tot een dag wat die kersie skielik uitgeblaas word? Ek hoop die laaste geval is eerder waar, dit voel of dit eerder vir my sal werk. 
Punt is, oudword is nie lekker nie, maar wees baie baie dankbaar daarvoor, dis nie vir almal beskore nie. Maar, solank jy dit het:
* Laat elke dag tel *Maak 'n verskil * Geniet jou mense * Moenie twv werk jou familielewe afskeep nie * Dien die Here en sorg dat jou saak met die Here reg is *Lag baie *Stel jou wysheid wat saam met die ouderdom kom, beskikbaar vir ander * Moenie "regrets" hê oor dinge wat nooit gebeur het nie * Vergewe waar jy moet * LEWE elke dag wat aan jou geskenk word. ~ Willem Botha, 03/03/2016

Spierpaleise
Jy sal my nou nie glo nie, maar ek het ook baie in my lewe in gimnasiums rondgehang, al sou g'n mens dit nou dink nie. Gewigte gepomp, gehol op daai masjiene wat op pad is nêrens heen nie en dan so onderlangs na die spieël geloer. Ag shame, dis eintlik lagwekkend, maar nou ja, ek was darem daar. Kyk, jy kry bulle in daai plek, en bullinne, en party is nogal sterk. 'n Goed toegeruste gimnasium kan 'n mens nogal vinnig transformeer, maar ek wonder net wat die nut is as jy daai krag nêrens nuttig aanwend nie. 
Wat my laat dink aan die kerk, 'n "gimnasium" met die wonderlikste toerusting, waar mense hulle Geestelike spiere woes oefen en waar mense Geestelik baie sterk word. Mense gaan graag soontoe en die "gimnasium" se toerusting sing soos dit gebruik word en mense loer onderlangs vir mekaar om te kyk of hulle "spiere" groter is as ander s'n. 
Maar wat maak ons daarmee? Wat is die nut as ons so geoefen word en sulke massiewe "Geestelike spiere" ontwikkel, maar ons kyk net vir mekaar en doen niks daarmee nie. Dan kom ons maar net om in die spieëls te kyk. 
1 Kor. 9:23-27 "Dit alles doen ek ter wille van die evangelie, sodat ek aan die vrug daarvan deel kan hê. Weet julle nie dat atlete wat aan 'n wedloop deelneem, wel almal hardloop, maar dat net een die prys ontvang nie? Hardloop dan só dat julle die prys kan wen. Almal wat aan 'n wedstryd deelneem, ontsê hulleself allerlei dinge. Hulle doen dit om 'n verganklike oorwinnaarskroon te verkry, maar ons 'n onverganklike. Ek hardloop dan ook soos een wat nie van sy doel onseker is nie; ek slaan soos 'n bokser wat nie in die lug slaan nie. Maar ek oefen my liggaam en bring dit onder beheer, sodat ek nie ander tot die stryd oproep en self nie kwalifiseer nie."
Lyk my ons moet maar bietjie uitkom en aan die werk kom, anders sit daai spiere net in vet om. En dan is dit soos wat Paulus hier noem:
2 Tim 3:5 "Hulle sal nog die uiterlike skyn van die godsdiens hê, maar die krag van die godsdiens sal hulle nie ken nie" ~ Willem Botha, 09/02/2016

“’n Verwagting wat nie uitkom nie, maak ’n mens mismoedig; ’n begeerte wat vervul word, bring nuwe lewe.” (Spr. 13:12) As mens hoop op iets wat net nie wil gebeur nie, kan jy nogal baie gou depressief en neerslagtig voel. Soos bv. daai groot bestelling of werksaanbod wat net nie realiseer nie, daai siekte wat nie genees nie, ten spyte van al die beloftes van die mediese wêreld en almal se gebede, daai huwelik of verhouding met ’n kind wat maar net nie wil regkom nie, daai swangerskap wat net nie gebeur nie, daai lang wag op “die regte een” om sy verskyning te maak, daai skip wat net nooit kom nie! Ons word gebore met ’n hart vol hoop, maar daai hoop sypel so stadigaan uit soos wat dinge wat ons verwag nie realiseer nie. Nou het ek gewonder: hoekom gee die Here nie maar net vir ons wat ons hart begeer nie, dan sal ons mos altyd tevrede en vol nuwe lewe wees?   Ek dink die kuns lê daarin om steeds tevrede te bly, om steeds geloof te behou, om steeds positief te wees, al kom jou verwagting nie uit soos wat jy gehoop het nie. Wanneer ons verwagtinge en drome nie waar word nie, kan ons onsself altyd aan die Here se voorsiening en Sy planne vir ons onderwerp en rus in die feit dat Hy in beheer is en dat Hy ons ook optel en troos in ons teleurstellings.
Waarop moet ons dan hoop? Op dit wat realisties en binne ons bereik is, op dit wat van toepassing is op ons leefwêreld, op dit wat die Here vir ons in gedagte het. Moenie ydele, selfsugtige drome en begeertes nastreef nie, jy gaan dalk net teleurgestel word.
’n Verwagting waarvan ons wel doodseker kan wees, is dié een op die ewige lewe ... die onverganklike, onbesmette en onverwelklike erfenis wat in die hemel vir ons in bewaring gehou word (1 Pet. 1:4) ~Wilna Botha, 04/02/2016

Boeretroue! 
Onthou jy toe jy klein was hoe lekker ‘n troue was? Sjoe, die opgewondenheid en afwagting weke voor die tyd. Eers in die kerk, waar die bruid en bruidegom trou aanmekaar beloof het, en dan... die bruilofsonthaal. Daar in die saal wag almal dat die bruid en bruidegom moet opdaag, en dit vat heeltemal te lank na ons sin. Ons was teen nou al té lus vir die koeldrank en lekker eetgoed. Ná die ellelange toesprake en heildronke, het die lekkerste aangebreek: rondhardloop op die dansvloer, of al om die stadsaal hardloop en speel saam met die nefies en niggies. Later as jy doodmoeg was het jy sommer daar voor die luidsprekers neergeval en net daar geslaap met die doef-doef in jou ore. Die kar was natuurlik reeds met shoeshine gesmeer en die blikke was vasgemaak aan die bumper. Lekker né? Die volgende oggend drink almal Eno’s in plaas van koffie! 
En so, met ‘n lekker bruilof vergelyk die Here die Koninkryk van die hemel. ‘n Lekker, aangename gebeurtenis. 
Matt 22:1-14 "Jesus het weer in gelykenisse met die mense gepraat. Hy het gesê: “Met die koninkryk van die hemel gaan dit soos met 'n koning wat vir sy seun 'n bruilofsfees voorberei het. Hy het sy slawe uitgestuur om die genooides na die bruilof te roep, maar hulle wou nie kom nie. Toe stuur hy weer ander slawe met die opdrag: ‘Sê vir die genooides: Die maaltyd is reg; my beeste en vetgemaakte vee is geslag, en alles is gereed. Kom na die bruilof toe.’ “Maar die genooides het hulle nie daaraan gesteur nie, en die een het na sy stuk grond en 'n ander een na sy werkplek toe gegaan."

Hou jou bek!
Dit klink seker vreeslik,  maar gelukkig praat ek net met Willempie!
Kyk,  daardie tekste  oor die tong wat so kan kwaadstook,  skinder en skade doen,  dis myne daai en nee,  ek is nie trots daarop nie! Weet jy, dis net WOEPS,  dan is daai woorde uit en wil ek daardie selfde tong afbyt en uitspoeg! En stry! Goeiste,  ek maak mos nie sommer 'n fout nie,  behalwe anderdag toe ek foutiewelik gedink het ek maak 'n fout.
Ongelukkig ly ek aan daai siekte van baie praat en  jy ken seker daardie toestand se naam,  en dit het al baie skade gedoen. Ek ken heelwat mense wat net stilbly en weet jy,  ek ken meesal hierdie mense as wyse mense.  Nou wonder ek hoekom ek dit nie regkry nie.

Wel,  hier is twee interessante tekste wat reg na mekaar opgeteken is.
SPREUKE 26:4
Moenie 'n dwaas se vraag op net so 'n dwase manier beantwoord nie; hy sal dink jy is soos hy.

SPREUKE 26:5
Beantwoord 'n dwaas se vraag op net so 'n dwase manier, anders dink hy hy het wysheid.

Dit klink of hierdie twee tekste mekaar weerspreek,  maar dit is nie so nie. Dit vra wysheid om met woorde om te gaan,  en om te weet hoe om op te tree in verskillende situasies.
Dus,  dis dalk maar beter om minder te praat en meer te luister,  jy het immers een mond en twee ore. ~Willem Botha, 28/01/2016

My niggie vertel gister vir my dat sy gesien het dat ons een tante se grafskrif sê: “Dink aan my met mededoë.”  Dit het my sommer hartseer laat voel, want die tante het nie aldag ’n maklike lewe gelei nie en mens kry so die gevoel dat sy gehunker het na ander se aanvaarding, simpatie en medelye. Hoe bemoedigend is dit dan nie om te weet dat ons hierdie versugting enige tyd na die Here kan uitroep: “dink aan my met  medelye, simpatie, barmhartigheid en vergifnis Here,” en te wéét Hy gee dit vir ons. Hy is genadig en barmhartig, Hy is sagmoedig, Hy is lankmoedig en vol liefde, Hy vergewe altyd weer, Hy kroon ons met aansien en eer . Ons lees so baie kere hoedat Jesus na mense gekyk het en hulle innig jammer gekry het ... ook vir my en vir jou en ook vir my tante. Kom ons behandel dié vir wie ons teëkom ook met mededoë sodat hulle waardig en geliefd kan voel en veilig en geborge kan wees. “Dink aan my in mededoë, as ek biddend voor u pleit; milde hande, vriend'like-oë is by U van ewigheid” ~Wilna Botha, 27/01/2016

Dra mekaar se laste 
Maar nie alles nie. Sjoe, dit klink seker vreemd, negatief en selfs onbybels. Ja, die Bybel is ernstig daaroor dat ons nie net vir onsself leef nie, dat ons omgee vir ander, ons oorvloed moet deel en sal doen soos Jesus dit sou doen. Natuurlik is dit waar, maar gun my asb net met hierdie boodskappie 'n kykie na die ander kant.

GALÁSIËRS 6:2 "Dra mekaar se laste en vervul so die wet van Christus". 
Dra mekaar se laste... Wat sal die definisie hiervan wees? Ek dink ons het dit reeds hierbo genoem, maar ons moet ander se laste nie totaal van hulle eie skouers afhaal en alles op onsself pak nie. Om iemand se laste te dra beteken soms om net saam met daardie persoon hulle moeilike pad te stap, vir hulle te bid en sommer net 'n oor te wees. 
Wat moet dit nie insluit nie? Wel, moenie iemand se laste op jou neem, wat glad nie dra aan hulle eie laste nie. Dit gebeur so baie dat mense hulle laste op ander afpak, maar geen vinger verroer om hulle probleme uit te sorteer nie. Moet nooit iemand se finansiële laste dra, wat roekeloos met hulle finansies omgaan nie, en moet verseker nie hulle laste dra as hulle dit oor hulleself bring met spandabelrigheid en slegte gewoontes nie. Moet onder geen omstandighede ander se troetel gewoontes, wat hulle self nie kan bekostig nie, finansier nie, vernaam as hulle hulleself en hulle gesondheid daardeur benadeel. Dit help mense net van die wal af in die sloot. Sometimes you have to be cruel to be kind.

Daar is egter nog iets om aan te dink. Soms gaan ons deur moeilike tye omdat die Here ons daardeur vorm en temper. Soms moet mense deur swaarkry gaan omdat dit deel is van God se plan met hulle lewens, al is dit bitter moeilik om dit te aanskou. Ons moet dit toelaat. 
Rom 5:3 "Dit is egter nie al nie. Ons verheug ons ook in die swaarkry, want ons weet: swaarkry kweek volharding". 
Nou ja, kom ons misbruik nie hierdie gedagtes om weg te stap van ons verantwoordelikheid teenoor ander nie, maar kom ons dra mekaar se laste met groot verantwoordelikheid ~Willem Botha, 26/01/2016

Daai bril
Ek gaan nou die dag vir 'n oogtoets vir 'n nuwe leesbril omdat ek nou 'n meterleser is, enigiets nader as 'n meter is totaal onleesbaar! Ek verwonder my toe aan hierdie slim masjien wat my help om my sig te verbeter. 'n Eenvoudige lens voor my oog maak alles in 'n oogwink reg, maar ek kan natuurlik nie sommer enige ou se bril gebruik nie , hy moet reg wees vir my oë. Ek kan amper vra: deur watter bril kyk jy? Die regte bril gee die regte beeld. Wat my laat wonder: Hoe sien jy die Here, deur watter bril? En hoe dink jy sien die Here jou? Deur watter bril kyk hy na jou?

Selfliefde 
Hoe stoei ons nie met hierdie gedagte nie! Om lief te wees vir jouself, is in vandag se dae moeiliker as ooit, want ons word deur die TV en die media blootgestel aan die mooistes, die rykstes, die slimstes, die mees suksesvolles en net dié wat in die lewe die toon aangee. En is dit nie hartseer nie dat ouers (vernaam pa's) hulle kinders onder geweldige druk sit om top presteerders te wees. Vir wat? Sukses? 
Hoe skrikwekkend is dit nie dat mense (tieners sowel as volwassenes) nie meer kans sien om die lewe in die oë te kyk nie, en dan 'n einde aan alles maak. Selfliefde is vir soveel mense net nie meer moontlik nie. Lees hierdie twee tekste so paar keer deur:
EFESIËRS 5:29 "... want niemand het nog ooit sy eie liggaam gehaat nie. Inteendeel, hy voed en versorg dit, soos Christus met sy kerk doen". Is dit so vir jou? 
Luk 10:27 Hy antwoord: “Jy moet die Here jou God liefhê met jou hele hart en met jou hele siel en met al jou krag en met jou hele verstand, en jou naaste soos jouself.”
Skrikwekkend dat mense hulle eie liggaam kan haat! Te vet, te maar, te dit en te dat! Onvrede met jouself, hoe sal jy vrede hê met ander? Jou naaste liefhê soos jouself? Regtig? Gaan jy dan ooit liefhê? Absoluut hartseer dat ons 'n mensdom is wat nie onsself in hierdie lewe kan vind nie!

Ek het pas die voorwoord van Randall Wicomb se boek genaamd "Kleur" gelees en vind hierdie woorde waar hy aangehaal word:
"Ek kan uiteindelik voor my geestesspieël staan en myself groet met: 'Ek het jou gevind...' "
Hy is nie lank hierna nie oorlede. Ek hoop jy en ek vind onsself ook betyds. ~ Willem Botha, 18/01/2016

Daar was 'n vraag van iemand wat wou weet hoekom ons as Christene 'n begrafnis diens hou na die afsterwe van 'n geliefde, en nie net die as strooi en aangaan sonder 'n seremonie van 'n aard nie. Hier is my mening.

Hoekom hou ons 'n begrafnis in die kerk? 
Of liewer, hoekom maak ons 'n Geestelike geleentheid van 'n begrafnis? Wel, eerstens is dit 'n gebruik wat al vir eeue lank kom en vir baie mense is dit niks anders as 'n gewoonte nie. Ek het egter al 'n byeenkoms bygewoon na die afsterwe van 'n ateïs, waar die gestorwene uitdruklik opdrag gegee het dat daar geen element van Geestelikheid betrokke mag wees. Sy woorde deur sy seun: "He was vehemently opposed to one person preaching over the soul of another". Ek het die hele ding as baie hartseer ervaar omdat dit vir my gevoel het of die saak nie afgehandel was nie, maar dit was sy keuse. Net so is my een oom, wat ook 'n ateïs was, oorlede en sy roudiens was by die ondernemers se kapel gehou. Omdat hy nie 'n dominee gehad het nie, het 'n dominee wat hom nie geken het nie, die diens gehou. Hierdie was een van die heel treffendste begrafnis dienste wat ek ooit aangehoor het. Hy het begin deur te sê dat hy nie die gestorwene geken het nie , maar hy het die begrafnisgangers gekonfronteer met: Waar gaan jy wees as jy sterf? Daardie diens was ongelooflg kragtig, en nie een persoon kon daar wegry sonder om daaroor te wonder nie. Nou, hier is 'n paar redes hoekom begrafnisse in die kerk gehou word. 
* Wat is die stand van sake van die wat agterbly? Ek glo menige mense het al op 'n begrafnis hulle saak met die Here reggemaak. 
* Met so geleentheid vereer ons ook die afgestorwe vir sy/haar lewe en wat die persoon in mense se lewens beteken het. 
* Vir die wat agterbly (wat gelowig is) is die dood deel van die lewe. Baie mense het in die kerk "grootgeword", hulle is daar Geestelik gevorm , daar gedoop en daar getroud. Dus, van geboorte tot sterwe is Christus sentraal in al die fasette van mense se lewens. 
* Uit die aard van die saak is dit vir mense baie vertroostend dat God se genade op hulle geliefdes was, en dat die lewe na die dood geen verskrikking inhou vir die wat gered is nie. 
1 Kor 15:55 “Dood, waar is jou oorwinning? Dood, waar is jou angel?
* Dit is vir baie mense ook 'n geleentheid om te reflekteer oor die feit dat hierdie lewe op aarde gaan eindig en dat daar geen onafgehandelde sake behoort te wees nie. Daar is dikwels wrywing tussen familielede, en dit word by die graf van 'n geliefde uitgesorteer. Dit is natuurlik nie net op Christene van toepassing nie.

Nou ja, hierdie dinge gebeur outomaties op elke begrafnisdiens, al is dit nie Geestelik van aard nie, maar daarvoor het mens nodig om so 'n geleentheid te skep. 
Vir my persoonlik is dit belangrik omdat ons met die dood van 'n geliefde saam voor die Here kom en daar 'n tyd is om as 'n eenheid die gestorwene voor die Here te bring. Ons kan weliswaar niks aan die gestorwene se Saligheid doen nie, maar ons kan saam reflekteer oor wat ons glo. 
Hierdie is maar my mening, ek hoop dit help. ~ Willem Botha, 16/01/2016

Kamer 4
Ek lees 'n aangrypende getuienis van 'n predikant wat aktief betrokke is by sterwensbegeleiding. Hy skryf dat hy bedien by 'n hospice, en die pasiënte wat in hulle laaste dae is beland in kamer 4, aan die einde van 'n gang. 
Daar bid hy vir mense se verhouding met God en daar maak hulle finaal reg met God, maar ook met hulleself en ander mense. So vertrek vele mense van kamer 4 af na die hiernamaals toe. 
Die dominee vertel dat dit nie altyd net hartseer is nie, maar dat mense ook met groot vrede vertrek omdat hulle alle sake afhandel wat afgehandel moet word. 
Hierdie mense het so effe van 'n voordeel omdat hulle eintlik gedwing word om gereed te maak, teenoor ons wat glo daar is onbeperkte tyd. Maar weet jy vriend, 'n hartaanval, ongeluk of ander trauma kan maak dat ons kamer 4 heeltemal mis. En dis so tragies, want mense wie se geliefdes die pad deur kamer 4 geneem het, het gewoonlik baie vrede oor alles, maar vele ander nie.

Moet ek en jy nie maar kamer4 se aksies gereeld uitvoer nie? 
* Maak seker dat jou saak met die Here reg is. 
* Sorg dat ALLE verhoudinge met ander so is dat jy met vrede sonder hulle deur die lewe kan gaan, of hulle sonder jou. 
* Vra vergifnis waar dit nodig is, en vergewe waar jy moet. 
* Sorg dat daar geen onafgehandelde sake in jou lewe is nie. 
* Vergewe jouself as dit nodig is, en wees tog maar lief vir jouself. 
* Laastens, leef elke dag voluit! Daar is nie meer kans daarvoor na kamer 4 nie. ~ Willem Botha, 14/01/2016

Die naam Josef beteken “mag die Here vermeerder of byvoeg.” Dis heel gepas as ek dink aan die twee Josefs van die Bybel. Josef, die dromer met die spesiale oorjassie wat sy pa vir hom gemaak het, het in ’n donker put beland, word ’n slaaf, was onskuldig aangekla en in die tronk gegooi en tog het die Here vir Hom vermeerder en bygevoeg. Hy word aangestel as regeerder oor die hele Egipte, hy red sy familie en sy volk van hongersnood en daar word van hom gesê: “Die Here was by hom. Wat Josef ook al aangepak het, die Here het dit laat slaag.” (Gen. 39:23)

Josef, eenvoudige skrynwerker, beland in ’n skandalige posisie toe sy verloofde swanger word en tog het die Here vir Hom vermeerder en bygevoeg. Hy word die aardse pa en versorger van die Verlosser, die Koning van die heelal, die Lig vir die wêreld!

Ek en jy mag dalk nie Josef genoem word nie, maar Josef se God is ook ons God en daarom weet ons dat daar vir ons ook ’n dag sal kom wat ons skande opgehef sal word, wat ons uit die put gelig sal word, uit die gevangenis-kettings losgemaak sal word en God vir ons sal vermeerder en byvoeg, wanneer sy genade oorvloedig op ons uitgestort sal word, wanneer Hy ons juk op Hom sal neem en aan ons vrede sal gee wat alle verstand te bowe gaan. Hou jou oë op Hom – daardie deurbrake sal beslis kom. ~ Wilna Botha, 07/01/2016

Doen wat jy sê 
Ek dink jy het waarskynlik dieselfde gedagtes oor mense as ek. Ek hou nie daarvan as mense vir my jok nie, maar ek hou ook nie daarvan as mense beloftes maak en dit nie nakom nie (maar as ek eerlik met myself is doen ek dit ook). Ek wil hê mense moet doen wat hulle sê hulle gaan 'n doen, anders moet dit liewer nie gesê word nie. DIT is integriteit!
Jesus was werklik 'n man met integriteit, en nie net deur die dinge wat Hy self gesê het nie, maar ook dit wat reeds in die Ou Testament genoem is in die vorm van profesieë. Sy koms aarde toe, die maagdelike geboorte, Sy geboorteplek en vele meer dinge was reeds baie jare tevore genoem en het presies so waar geword. Ek kan dus met die grootste vrymoedigheid sê dat ek alles glo wat Hy gesê het. Hier is enkele gedagtes.
Moenie bang wees nie
Jes 41:10 Moenie bang wees nie, Ek is by jou, moenie bekommerd wees nie, Ek is jou God. Ek versterk jou, Ek help jou, Ek hou jou vas, met my eie hand red Ek jou.
Glo net...
Joh 6:47 “Dit verseker Ek julle: Wie in My glo, het die ewige lewe.
Hy sal jou versorg en beskerm.
Ps. 121:5-8 Die Here beskerm jou, die Here bewaar jou van alle gevare. Bedags sal die son jou nie steek nie en snags sal die maan jou nie kwaad doen nie. Die Here sal jou beskerm teen alle gevaar, jou lewe sal Hy beskerm. Hy sal jou beskerm waar jy ook gaan, nou en vir altyd.
Jy sal voorspoedig wees.
Deut. 7:13 Hy sal jou liefhê, Hy sal jou voorspoedig maak ...
Dus, glo Hom maar gerus, Hy doen wat Hy sê. Miskien moet ons ook net meer gereeld doen wat ons sê . ~ Willem Botha, 06/01/2016

Klik hier vir nog meer heuningdruppels >