10 Desember 2025

Afrikaans is 'n wonderlike taal.
Soms kan 'n paar woorde iets meer kragtig omskryf as 'n hele opstel, en soms struikel jy oor 'n paar woorde en die diepte en betekenis daarvan tref jou diep.

Ons lees in Genesis van Isak se afsterwe, en hierdie teks is bekend.
Gen. 35:28-29 AFR83
"Isak het honderd en tagtig jaar oud geword en toe is hy dood. Hy het gesterf nadat hy oud geword en 'n vol lewe gehad het. Sy twee seuns Esau en Jakob het hom begrawe."

Ek is tans besig om die 2020 vertaling van die Bybel te lees en toe ek by hierdie teks kom staan daar die volgende:

Genesis 35:29 AFR20
"Isak het sy asem uitgeblaas en gesterf, en hy is met sy mense verenig – oud en versadig van lewensdae. Sy seuns Esau en Jakob het hom begrawe."
Kyk hoe pragtig beskryf hierdie vertaling die afhandeling van jou lewe op aarde. "... oud en versadig van lewensdae."

Sjoe, dit is so treffend beskryf.
Die Bybel sê jy sal 70 jaar oud word, en as jy sterk is 80. Sommige mense leef baie langer en ander baie korter, maar ons weet dat jou lewensdae 'n versadigingspunt bereik, dit hou nie vir altyd aan nie. Die uurglas loop leeg en die dae raak op. Indien jy 80 jaar oud word, het jy 29200 dae geleef, plus of min 'n paar, maar jou lewe raak versadig aan dae.

Ongelukkig begin vele mense hopeloos te gou voel hulle dae is versadig omdat hulle opgee met die lewe. Ek sien hoe mense gedwing word om te gou op te hou om ekonomies aktief te wees, en voel die dae raak versadig omdat daar niks meer is om die dae mee te vul nie.
Hoe wonderlik as mens op jou oudag kan voel dat jou lewe sinvol en nuttig was. Dis erg om te sien dat mense se lewe leeg geword het omdat daar nie meer 'n doel is om voor te leef nie. Ek wil so graag eendag op my laaste dae my lewe soos 'n rolprent sien afspeel, en die film te geniet. As jou lewensdae versadig kan wees sonder enige spyt van wat kón gewees het, maar nooit wás nie, is dit so hartseer. Wonderlik as mens kan sê daar is geen "regrets" nie en dat die lewe versadig is van goeie kwaliteit en mooi verhoudings, in besonder met jou lewensmaat en jou kinders.

Pred. 12:1 AFR20
"Dink aan jou Skepper in jou jong dae, voordat die dae van teenspoed kom, en jare aanbreek waarvan jy sal sê, vir my is daar geen vreugde in nie”

Dink aan jou Skepper, dink betyds aan Hom, dink elke dag aan Hom en onthou elke dag wat Hy jou seën met lewensdae wat versadig is met Sy guns. Ons kan so maklik ons lewensdae versadig met slegte dinge, of met ongelukkigheid en stress, en nooit iets mooi en lekker kan skink in jou lewenspotjie nie. Dis 'n vermorsde lewe. Ek sien uit na dít wat oor is en ek wil so graag hê my dae sal enduit versadig wees met genade, liefde en vreugde. Leef sinvol! ~ Willem Botha

Klik hier vir nog Heuningdruppels >>

23 November 2025

Sê nou maar net … Woorde wat mens so graag gebruik as mens fantaseer. Ek onthou dat ons as kinders hierdie verbeeldingsvlugte gehad het. "Sê nou maar net" het altyd iets ingehou van "dit sou darem lekker gewees het as …" . "Sê nou maar net" was nooit aan iets negatief gekoppel nie. Vandag wil ek so bietjie uit 'n skuinshoek kyk na hierdie frase en vra: "Sê nou maar net Jesus het elke gebed beantwoord?" Sê nou maar net alles het uitgewerk soos wat ek wou? Sê nou maar net die Here het toegegee aan al my grille? Sê nou maar net mý wil het elke keer geskied?

Nou ja, ons sou seker nooit kon weet wat die implikasies sou wees as al ons gebede verhoor is nie, want ons het nie daardie pad gestap nie.

Het jy dalk ook al soos ek vreeslike lawwe goed gebid. Ek onthou toe ek klein was, het ek in die Bybel gelees as jy geloof het kan jy vir die berg sê om homself in die see te werp. Toe kyk ek so na die berg en bid en bid dat die Here die berg moet skuif! 'n Ander keer wou ek so graag meer pakkies van daardie toeflap-vuurhoutjieboksies hê, toe gaan sit ek dié paar wat ek het in my ma se spieëlkaslaai en gaan staan op my knieë en bid dat die Here die laai propvol van die boksies moet maak (die Bybel sê mos ons sal alles kry wat ons vra!) Wat sou gebeur as God daardie gebede verhoor het? Die eerste geval het ek gedink dit was 'n toets vir my geloof - maar … wat sou die konsekwensies wees? 'n Klomp mense sou sterf, hulle huise sou inmekaar val, ens. as die berg moes skuif. Die tweede geval het 'n materialistiese motivering gehad - ek wou BAIE hê. Wat sou gebeur het as die Here daardie een verhoor het? Ek sou dalk meer en meer van alles wat ek begeer het gevra het.

Moet ons dan nou nie meer bid en vra nie? Nee, natuurlik moet ons bid en ons begeertes aan God bekend maak, ons moet aanhou bid sonder om moedeloos te word (so sê Luk 18:1). Die probleem is net, ons bid soos wat óns dink dinge moet uitwerk, soos wat óns dink God moet ingryp. Dink gou saam met my of die volgende vir jou ook waar is: "Here, ek het nou die volgende probleem - ek sukkel met dié of daai. So, Here, hier is die oplossing: as U die volgende doen of bewerkstellig, of toelaat, is my probleem opgelos. Om Jesus wil, Amen." Klink dit bekend? Mens noem dit 'n "package deal", of a "turnkey project" - ek dink die Here glimlag maar net partykeer vir ons. Jy sien, die Here sien die hele prentjie. Hy ken die verlede, hede en toekoms. Ons ken net bietjie van gister en vandag. Nou vra ek weer: "Sê nou maar net God het elke ding laat uitwerk presies soos wat ek dit gevra en voorgeskryf het?" Ek weet nou van baie dinge wat nie uitgewerk het soos wat ek dit wou hê nie, en ek is maar te dankbaar daarvoor!

Die vraag is: "hoe bid ek dan van vandag af?"

Luk 11:9-13

"Ek sê vir julle: Vra, en vir julle sal gegee word. Soek, en julle sal kry. Klop, en vir julle sal oopgemaak word.

Elkeen wat vra, ontvang, en elkeen wat soek, kry; en vir elkeen wat klop, sal oopgemaak word.

Is daar 'n pa onder julle wat as sy seun vir hom 'n vis vra, vir hom 'n slang sal gee in plaas van die vis?

Of as hy 'n eier vra, vir hom 'n skerpioen sal gee?

As julle wat sleg is, dan weet om vir julle kinders goeie dinge te gee - die Vader in die hemel nog baie meer! Hy sal die Heilige Gees gee vir dié wat vra."

Gewoonlik stop ons by die vers wat sê: "elkeen wat vra kry, klop, en daar sal vir jou oopgemaak word". Die res van die stuk se strekking is eerder dat jy sal kry wat jy nodig het. Maar ons bid mos "shopping lists". Ons bid: "Here, gee my 'n nuwe huis", dan sê Hy: "Nee, hier is vir jou brood, genoeg vir vandag", of, "Here, so mooi groen 4X4 asseblief?", dan sê Hy: "Nee, Ek gee jou die Heilige Gees?" Nou ja, wat sou jy kies? 'n Nuwe huis, nuwe kar, of kos vir vandag en die Heilige Gees. Wel, dis die goed wat in hierdie Skrifgedeelte staan - niks van weelde of welvaart nie, niks oor gesondheid nie, niks oor huise, karre, bote, vliegtuie, ens. nie. WAT vra ons van die Here? Hoe vra ons? Tot wie se voordeel is dit wat ons vra?

As die Here vir elke gier of gril of plan sou spring, sou ons lewe sekerlik 'n ramp gewees het:

1) Ons sou nie kon leer om te wag nie, want ons probeer die Here gou-gou in beweging bid - so asof ons Sy program beheer.

2) Ons sou ophou vertrou op Hom, want sien, as ons die oplossing ook gee het ons nie meer die Here nodig nie.

3) Ons selfsugtigheid sou net meer en meer toegeneem het.

4) Ons sou self in beheer kon wees, die Here word soos ons "butler"

5) God sou aan ons onderdanig gewees het. Ons klap die vingers en Hy beweeg.

Wat moet ons nou doen?

1) Leef in afhanklikheid van die Here

2) Wag

3) Vertrou

4) Glo ("Faith like Potatoes - styl)

5) Aanvaar die Here se antwoord

Hoe moeilik is die volgende gebed nie...

Spreuke 30:7-9

Net twee dinge vra ek van U; moet my dit tog nie weier nie; daarna kan ek sterf:

moenie toelaat dat ek vals is en lieg nie; moet my nie arm maak of ryk nie, gee my net die kos wat ek nodig het,

sodat ek nie te veel het en U verloën en sê: "Wie is die Here?" nie, en sodat ek nie arm word en steel en my God se Naam oneer aandoen nie. ~ Willem Botha

Klik hier vir nog Heuningdruppels >>

20 November 2025

Oud president Ronald Regan het graag die volgende storie vertel. Hy het gesê hy wil 'n groot klomp ateïste nooi vir 'n reuse onthaal en vir hulle die beste kos denkbaar voorsit en die mense aanmoedig om soveel as moontlik te eet. En dan, as niemand meer 'n krummeltjie kan eet nie, wil hy vra of die mense lekker gesmul het. En as hulle hulle waardering uitspreek vir hierdie uithaler gereg, wil hy vir hulle vra of hulle glo daar is 'n kok.
 

Dis nogal 'n treffende vergelyking vir mense wat al die daaglikse wonderwerke van die lewe geniet, maar nie wil glo daar is 'n Skepper nie. Dit slaan my regtig dronk.
 

Nou kyk, ek kan nog verstaan as iemand nou 'n "gesoute" ateïs is wat net eenvoudig nie glo daar is 'n God nie, maar hierdie nuwerwetse bewegings van mense wat hulle geloof verloor het, is iets heeltemal anders. Hulle kommunikeer of kom bymekaar en spandeer meer tyd daaraan om Christene af te breek en te verkleineer en te bespot as om op hulle punt te staan.
 

Ek glo nie dat die aarde plat is nie, maar ek spandeer nie tyd daaraan om vir mense wat dit glo te bespot nie.
 

Maar laat ek nou nie op dieselfde trant as hierdie mense aangaan nie. Ek glo in God omdat ek die Bybel lees en telkens verstom staan oor die manier wat die Bybel my aanraak, meer as enige ander boek wat nog ooit op my pad gekom het. Ek glo omdat ek sien hoe die Bybel oor en oor akkuraat bewys word. Ek glo omdat ek die werk van die Heilige Gees ervaar, ek glo omdat daar al ontelbaar van my gebede verhoor is. Sommige presies soos wat ek gevra het, en ander juis omdat dit nie verhoor was soos wat ek gevra het nie. Jy sien, as die Here se antwoord nee was, en ek besef dalk jare later dat dit die beste antwoord was, sien ek daarin dat die Here my gebed op presies die regte manier verhoor het. Dit slaan my dronk dat die wonder van die natuur nie mense se harte aanraak en hulle geloofs-oë oopmaak nie.
 

Maar weet jy, ek het besef stry help niks, dis net getuig wat 'n verskil maak. As 'n dwaas net kan hamer op "is, is nie" kan jy liewer los. Geseënd is jy as jy soos 'n kind kan glo, hou daaraan vas en leef jou geloof uit. Die Here, bestaan of jy dit glo of nie, Hy is lief vir jou, of jy dit glo of nie. Daar is verlossing as jy in Hom glo, of jy dit glo of nie. Daar is 'n hemel, en 'n hel, of jy dit glo of nie.
 

Die Here se bestaan is nie afhanklik van enige iemand se geloof in Hom nie, Hy is daar, of iemand dit glo of nie. ~ Willem Botha

Klik hier vir nog Heuningdruppels >>

Hande - myne en God s'n

Ek het die afgelope tydjie die tema van hande oordink 'n paar kort stukkies daaroor geskryf:

- my eie hand: pynlik a.g.v artritis en gevolglike operasies aan my vinger
- doen met toewyding alles wat jou hand vind om te doen
- Jesus se hand wat genesing bewerk
- wat het jy in jou hand?
- opstandige, ongehoorsame, sondige hande
- Pilatus se hande van onskuld
- die skild van geloof in jou hand
- all of these lines across my hand
- put your hand in the hand of the Man who stilled the water
- skryf op jou hand: die Here s'n
- my God het sy goeie hand oor my gehou
- in die skaduwee van God se hand
- Ek help jou, Ek hou jou vas, met my eie hand red Ek jou
- dis Kersfees - kyk na Jesus se hande en glo

Klik hier as jy dit wil lees >>

So sê die Here, Here

Toe ons dogter Februarie in die tagtig jaar oue kerk in Clarens getroud is, het die woorde op die kanselkleed 'n groot indruk op my gemaak: "So sê die Here, Here". Hoe kragtig en mooi is dit nie! Die Here praat met sy mense. Hy praat in sy “tempel”. Hy praat deur sy “profeet”. Die Here sê trooswoorde, beloftes van genade en redding, versekering van sy liefde en verlossing. Die Here sê woorde wat ons uitnooi om na Hom te kom, by Hom te skuil, by Hom te rus. Hy sê egter ook woorde met opdragte vir ons, woorde met waarskuwings, woorde wat ons maan om terug te draai na Hom en gehoorsaam te wees ... Klik hier om 'n klompie kort stukkies oor hierdie tema te lees >>

Breek brood

Daar is so ’n mooi uitdrukking wat mense gebruik wat sê: ons breek saam brood. Dit beteken baie meer as om net ’n maaltyd saam met iemand te nuttig. Dit beteken dat jy jou kos en jouself met iemand deel. Dit beteken daar is ’n kameraadskap tussen julle, ’n spesiale band, ’n emosionele en geestelike band. Ek dink dié term het ontstaan toe Jesus saam met sy dissipels aan tafel was en Hy die brood gebreek het en gesê het: “Dit is my liggaam wat vir julle gegee word. Gebruik dit tot my gedagtenis.” (Luk. 22:19). Of dalk toe Jesus die twee vissies en vyf brode gebreek het en uitgedeel het aan ’n honger menigte in Joh. 6:11. Die breek van die brood sê vir my dat Jesus Homself gegee het.  Die Brood wat lewe gee is gebreek en verniet uitgedeel en is onbeperk vermenigvuldig sodat ek en jy ook vandag daarvan kan eet .... Klik hier om 'n klompie kort stukkies oor hierdie tema te lees >>

Leer by Nehemia

Ek het bietjie deur Nehemia gelees en 'n paar lewenslesse oor gebed, afhanklikheid, vertroue, lofprysing ens. geleer. Ek het 'n klompie daarvan neergeskryf. Klik hier as jy dit wil lees >>
 

Vrae wat die Here vra

Ek het  êrens in Februarie 2021 begin om vrae wat die Here in die Bybel vra op te soek en te oordink. Ek het telkemale myself verbeel dat die Here vir my persoonlik ook die vraag vra en dan bietjie gedink wat my antwoord sou wees. Ek het eers begin met vrae wat Jesus gevra het in die Evangelies, maar dit het vinnig uitgebrei tot vrae dwarsdeur die Bybel. Aanvanklik wou ek so tien vrae uitkies om dieper oor te dink, maar tien het op die ou einde meer as vyftig geword! Oor die volgende paar weke wil ek nou bietjie verder gaan en na 'n paar vrae in die Bybel kyk wat verskillende mense in verskillende omstandighede gevra het. Ek glo dit is ook vrae wat baie van ons dikwels mee te doen kry. Ek het dit wat ek reeds oor die vrae geskryf het, hier bymekaar gesit, as jy dit dalk wil lees (en beantwoord!) Klik hier >> Daarna het ek so 30 vrae uitgesoek en oordink  wat mense in die Bybel vra. Klik hier as jy verder daaroor wil lees >>
 

Musiek en lofprysing

Ek het in die laaste paar maande bietjie stilgestaan by ’n klompie gedagtes uit die Bybel oor musiek, sang en lofprysing en 30 kort stukkies daaroor geskryf – sommer soos dit in die alledaagse gang van die lewe by my opgekom het en iets vir my persoonlik beteken het. Die teks wat dit alles vir my die beste saamvat is Ps. 115:17-18 soos dit in Die Boodskap staan: “As jy dood is, kan nie jy of enige ander dooie mens die Here prys nie. Dan is jy nie meer daar om dit te doen nie. Maar ons wat lewe, sal die Here loof. Ons sal nou begin en vir altyd aanhou. Kom prys die Here!” Ek het al die stukkies hier bymekaargesit as jy dit dalk weer wil deurlees. Ek hoop dit sal jou inspireer om sommer in te val met ’n lofsang en ’n pryslied tot eer van die Here.
 

Klik hier vir alles >>

Wie is God  vir jou?

Oor die afgelope 7 maande het ek ’n stuk of 45 kort stukkies geskryf oor wie God is, oor verskillende name wat Hy genoem word in die Bybel. As ek terugkyk weet ek dis maar ’n druppel in die oseaan en as mens iets moet skryf oor elke karaktereienskap van die Here, sal jy langer as vir ewig daarmee besig wees en sal die wêreld nie genoeg plek hê vir die boeke nie (soos wat Joh. 21:25 sê) In hedendaagse terme sal mens seker kan sê dat die wêreldwye web nie alles sal kan huisves nie en dat Google nie alles sal kan deursoek nie! Kortom: ons God is groter as wat woorde en name Hom kan omskryf, wie Hy ís is veel meer as wat ons gedagtes kan akkommodeer. Dit was egter vir my ’n  leersame en verrykende pad wat begin het by Eks 3:13

...   lees verder >>

Julle moet mekaar ...
 

Ek het die afgelope tyd ’n paar gedagtes gedeel oor ’n klompie van die “julle moet mekaar”-tekste in die Bybel. Julle moet mekaar aanvaar, mekaar vergewe en mekaar liefhê; julle moet gasvry wees teenoor mekaar en mekaar dien; julle moet geduldig wees met mekaar, mekaar verdra en in vrede lewe met mekaar; julle moet mekaar help, mekaar se laste dra, mekaar troos en moed inpraat; julle moet mekaar leer en onderrig en lofliedere saam sing ...
 

As jy wil, kan jy hier klik om hulle weer te lees >>

Jesus het hulle innig jammer gekry

Ek het vir die afgelope agt keer wat dit my beurt was om ietsie te skryf bietjie stilgestaan by dié uitdrukking: "Jesus het hulle innig jammer gekry", wat mens 'n hele paar keer in die evangelies raaklees. Dis 'n uitdrukking wat my so aangegryp het en net vir my onderstreep het dat die Here ’n barmhartige God is. Net soos Jesus dit nie kon help om mense wat honger, siek en hartseer, verlore en blind, vuil en verwerp is, jammer te kry en diep meegevoel met hulle te hê nie, net so weet ek dat Hy dit vandag vir my persoonlik ook sal doen. Sy arm is nooit te kort om te help nie, Sy genade is elke dag vars, Sy oor is nooit te doof om te luister nie, Sy hulp en uitkoms  is nooit vêr nie, Sy liefde is onbegrens, oneindig en onverstaanbaar groot. “Genadig en barmhartig is die Here, lankmoedig en vol liefde” – kyk maar bietjie hoeveel keer hierdie frase in die Bybel voorkom, dan besef mens Sy hart word gou sag! “Die Here gee graag goeie dinge aan ons. Sy hart word gou sag. Hy is geduldig en het sy kinders baie lief. Vir almal is die Here goed. Hy gee om vir alles wat Hy gemaak het ... Die Here sorg vir almal wat seerkry, Hy tel elkeen op wat swaarkry. Almal vestig hulle hoop op U. U versorg elkeen op die regte tyd. Omdat U goed is, gee U maklik goeie dinge aan ons. U gee meer as genoeg van u goedheid aan almal op aarde. (Ps. 145:9-16, Die Boodskap) ~ Wilna Botha
 

Ek het al die stukkies hier bymekaargesit – klik hier indien jy dit dalk weer wil lees >>

Bring die hoop weer terug

Ek het die afgelope tydjie bietjie gelees en gedink en geskryf oor hoop. Ek het tekste opgesoek wat oor hoop gaan. Ek het gewilde aanhalings oor hoop opgesoek. Hier is so 10 gedagtes wat ek neergeskryf het. Lees hier meer >>
 

Wonderwerke van Jesus uit Johannes
 

Ek het oor die afgelope paar weke bietjie gelees en gedink oor die wonderwerke van Jesus en veral dié wat in Johannes opgeskryf is. Aan die einde van die boek sê Johannes dat daar nog baie dinge is wat Jesus gedoen het wat nie opgeskryf is nie. “Maar as dit een vir een beskrywe moet word, dink ek, sou die hele wêreld nie genoeg plek vir die boeke hê nie.” (Joh. 21:25) Johannes-hulle het definitief báie wonderwerke gesien.  Ek dink nie dit geld net vir Johannes se tyd nie, ek glo dit is nóú ook so, ons moet net met oop geestesoë deur ons alledaagse lewe gaan om raak te sien waar die Here beweeg en wonder na wonder laat gebeur. Die rede dat die wonderwerke vir ons in die Bybel opgeskryf is, is sodat ons in Jesus moet glo:  “Maar hierdie wondertekens is beskrywe sodat julle kan glo dat Jesus die Christus is, die Seun van God en sodat julle deur te glo, in sy Naam die lewe kan hê.” (Joh. 20:30-31) Kyk hoe dit gebeur het met mense wat Jesus se wonderwerke beleef het: Joh. 2:11 – toe die dissipels sien hoe Jesus water in wyn verander, het hulle tot geloof in Hom gekom. Joh. 4:53 – toe die regeringsamptenaar se seun genees is, het hy en sy hele huisgesin tot geloof in Jesus gekom. Joh. 6:14 – toe die mense sien hoe Jesus die vis en brood vermeerder het, het hulle bely: “Hy is werklik die Profeet, die Een wat na die wêreld toe moes kom. Joh. 11:45 – toe Lasarus uit die dood opgewek is, het baie Jode wat dit gesien het, tot geloof in Jesus gekom. Joh. 21:7 – toe die dissipels die ongelooflike klomp vis vang, kon Johannes nie anders as om uit te roep: “Dit is die Here!” nie. Laat ons ook nie nalaat om die Here se wonderwerkende hand in ons lewens te sien en sodoende te groei in ons geloof nie. Laat ons ook nie nalaat om erkenning aan die Here te gee en te getuig oor Sy werke in ons lewe nie.

Terwyl ek deur die wonderwerke gelees het, het ek ’n stuk of 20 gedagtes daaroor neergeskryf.

Lees gerus hier meer daaroor >>

Jesaja se Goud - klik hier >>
 

Die afgelope jaar het ek so stukkie vir stukkie deur Jesaja gelees.  Ek het maar heelwat goed in Jesaja gevind wat ek nie verstaan nie, en wat ek nie altyd weet wat pas waar in nie, en soms sukkel ek maar om sin te maak uit al die profesieë en die oordeeluitsprake maar êrens tussen dit alles, in elke hoofstuk, op elke  bladsy  van die boek, het ek die wonderlikste goud uitgedelf - beloftes, bemoediging, versekering, aanmoediging, tekste om te onderstreep en in my hart te bêre. Dwarsdeur die boek het ek die goue draad van God se genade, vergifnis en versorging gesien, die goeie nuus gesien dat God mense optel en vernuwe en hoop gee. Ek het in dié tyd ’n stuk of 85 kort boodskappies uit Jesaja geskryf wat ek hier gedeel het. Ek het hulle nou almal bymekaargesit as jy dalk weer daardeur wou lees. Ek noem dit “Jesaja se goud” en hoop jy sal ook iets in dié goudpot vind wat jou geloof kan versterk en jou verhouding met die Here kan laat groei.

Lees gerus meer hier >>

My 18 G's vir 2018 - klik hier >>

Op die eerste Maandag van hierdie jaar het ons almal vir mekaar allerhande mooi seëninge toegewens vir die nuwe jaar. Ek het ook ’n klomp wonderlike woorde ontvang van oraloor. Op die tweede Maandag het ek verjaar en toe is dit wéér ’n stroom seëninge en gebede wat oor my uitgespreek word. Dit het my opgeval dat ’n klomp van dié woorde met ’n “G” begin, soos bv. geseënd, gesond, gelukkig, genade, groots, goedheid, guns, genot, Geesvervuld, ens.! Toe besluit ek net daar en dan dat 2018 ’n “G” jaar gaan wees en skryf toe so 18 G’s neer vir my jaar! As mens “G” sê, dan sê jy “gee”.  Om te gee, moet dan seker my eerste G vir die jaar wees ... lees verder >>
 

Kort dagstukkies uit Psalms - klik hier >>

Kort dagstukkies oor die 10 Bybelverse wat die meeste opgesoek word - klik hier >>

Kort dagstukkies uit Spreuke - klik hier >>

Kort dagstukkies uit Fillipense - klik hier >>

Kort dagstukkies uit 1 Johannes - klik hier >>

Kort dagstukkies uit Jona - klik hier >>

Facebook Groep
Sluit gerus aan by ons groep waar ons elke dag heuningdruppels oplaai, en waar jy welkom is om saam te gesels. Klik hier >>

Duplisering en verspreiding word toegelaat sonder veranderinge en met verwysing na die outeur (Willem Botha) en webruimte (www.heuning.co.za)