Mag elke woord wat uit my mond kom wees soos heuning,en mag gedagtes uit my hart wees soos die môredou
Elk’ onuitgesproke woord en elke saak wat ek bedink, mag dit aangenaam en sinvol wees voor u aangesig o Heer
Want U's my God, U’s my Redder, U’s my vrede. U’s die rots waarop ek bou en waar ek skuiling vind
U is my kompas, u Woord gee rigting wanneer ek verlore raak.
Daarom is dit my gebed dat wat ek dink of wat ek praat welbehaaglik voor U aangesig sal wees. 

(uit Flam Gemeentesang, Ioannis Dekas) 

Van hierdie Bybelstudie - stukkies het ek aanvanklik geskryf vir die vroue in die gevangenis (gedurende die tydperk van 2002 tot 2011 wat ek die voorreg gehad het om daar betrokke te wees met bediening). Die doel van die studies is om basiese lering te probeer gee oor 'n bepaalde onderwerp en daarom word die tema hoofsaaklik deur Skrif verduidelik. 'n Verdere doel is om die basiese evangelie te verduidelik, en om vroue aan te moedig in hulle geestelike groeipad, om hulle te bemoedig om in tye van swaarkry net op Jesus te bly fokus. 

Ander stukkies is sommer uitvloeisels van my eie studie van die Bybel, of is nota's vir praatjies wat ek gegee het.

Om hierdie stukkies op te stel het elke keer vir my baie beteken en ek het baie geleer en gedink oor die tema... ek kon elke keer maar net sê: hoe aangenaam is U Woord, Here, dit is soeter as heuning! (Ps 119:103).

Dié wat in Engels is, is in eenvoudige taal geskryf, en is nie noodwendig taalkundig versorg is nie (... en my Engels laat veel te wense oor!) Die Skrifverwysings kom uit verskillende Engelse vertalings en word nie altyd aangedui nie.

Mag jy ook êrens tussen die lyne van hierdie stukkies gevoed word met soet heuningdruppels ....

~ Wilna

DAGSTUKKIES