... soeter as heuning, as druppels uit 'n heuningkoek (Ps 119:11)

Die daaglikse heuningdruppels is ook op ons Facebook-groep. Klik hier:

Duplisering en verspreiding word toegelaat sonder veranderinge en met verwysing na die outeur (Wilna / Willem Botha) en webruimte (www.heuning.co.za)

Het jy ook al gesien dat die Here dikwels in teenstellings werk? Hy draai dit wat vir die wêreld belangrik is en wat vir die wêreld sin maak, sommer heeltemal om. Ek sien  bv. die volgende in die Bybel: as jy swak is, is jy sterk; wat vir mense onmoontlik is, is vir God moontlik; wie eerste is, sal laaste wees; wie dink dat hy staan kan val; die wysheid van hierdie wêreld is dwaasheid by God; hoogmoediges sal verneder word, die nederiges sal verhoog word ; antwoord ’n vloek met ’n seën en so kan die lysie aangaan. Hierdie jaar tref dit my dat daar in die Kersverhaal ook ’n klomp sulke teenstellings is. ’n Maagd word swanger en skenk geboorte. ’n Koning word in ’n stal gebore, lê in ’n eenvoudige krip, toegedraai in doeke  – daar is geen paleis, geen trompette, geen kroon, geen partytjie. ’n Eenvoudige jong man en nederige vrou word die ouers vir die Verlosser en Redder van die wêreld. God word mens. Die Lig kom verdryf die duisternis. Dís Kersfees! Kom ons vier God se teenstellings, want dit beteken dat ek, sondige mens vergewe en vrygespreek en silwerskoon word.  “Al was julle skarlakenrooi van sonde, julle sal wit word soos sneeu. Al was julle purperrooi, julle sal wit word soos wol.” (Jes. 1:18) ~ Wilna Botha, 14/12/2017

Hierdie Bybel.. 
... vertel van voor tot agter van Jesus Christus. Ons vier een van die dae Kersfees en dit is vir ons 'n viering van die grootste gebeurtenis in die mens se geskiedenis. Hierdie Boek het dit lank reeds voorspel en alles het presies uitgespeel soos wat die Bybel sê. Daar is baie profesieë wat almal reeds waar geword het, en daarom kan ons ook glo dat dit wat voor ons lê ook waar sal word, presies soos wat Jesus gesê het. Die belangrikste is: "Ek kom weer." 

Maar kom ons kyk net na enkele tekste. 
Gen 1:26 "Toe het God gesê: “Kom Ons maak die mens as ons verteenwoordiger, ons beeld, sodat hy kan heers oor die vis in die see, die voëls in die lug, die mak diere, die wilde diere en al die diere wat op die aarde kruip.” Sien jy die woord "Ons" raak? Dit dui op meervoud wat natuurlik verwys na die Drie-eenheid. JESUS WAS DAAR. 
Joh 1:1-3 "In die begin was die Woord daar, en die Woord was by God, en die Woord was self God. Hy was reeds in die begin by God. Alles het deur Hom tot stand gekom: ja, nie 'n enkele ding wat bestaan, het sonder Hom tot stand gekom nie." 
Joh 1:14 "Die Woord het mens geword en onder ons kom woon. Ons het sy heerlikheid gesien, die heerlikheid wat Hy as die enigste Seun van die Vader het, vol genade en waarheid." JESUS DIE SKEPPER

En dan is daar die profesieë oor Sy geboorte. 
Jes 7:14 "Die Here sal daarom self vir julle 'n teken gee: 'n Jong vrou sal swanger word en 'n seun in die wêreld bring en sy sal hom Immanuel noem."
Jes 9:5" Vir ons is 'n Seun gebore, aan ons is 'n Seun gegee; Hy sal heers, en Hy sal genoem word: Wonderbare Raadsman, Magtige God, Ewige Vader, Vredevors." JESUS DIE VERLOSSER 

Het dit nie presies so gebeur nie? Is dit nie 'n wonderlike Boek oor Jesus Christus nie? 
Dan kry ons hierdie belofte in die laaste boek van die Bybel. 
Open 22:7 "Jesus sê toe: “Kyk, Ek kom gou! Geseënd is elkeen wat die woorde van hierdie profetiese boek ter harte neem.” JESUS GAAN ONS NA HOM TOE NEEM. 
Ek vier graag met groot vrymoedigheid Kersfees, want die geboorte van ons Verlosser is vir my die grootste gebeurtenis ooit! ~ Willem Botha, 13/12/2017

“Vat asseblief al die verkeerde dinge wat ek gedoen het ver van my af weg, Here. Kyk op ’n splinternuwe manier na my. Sien my weer as iemand wat niks verkeerds gedoen het nie. Vat alles wat sleg is uit my lewe uit ... My lewe moet skoon wees soos die witste wol.” (Ps. 51:9, Die Boodskap) Ek is, net soos Dawid, maar al te bewus van my swakhede en die berg verkeerde dinge wat ek al gedink, gesê en gedoen het. Ek voel skaam en jammer dat ek die Here keer op keer teleurstel met die foute wat ek maak. Hoe wonderlik is dit egter om vir seker te weet dat God my wél sien as iemand wat niks verkeerds gedoen het nie! Ek ís silwerskoon gewas. My gewete ís gereinig. Al die verkeerde dinge van lank gelede en van nou-nou net ís uitgevee en vergete. Dit alles deur God se genade en deur die bloed van Jesus wat my reinig en heilig. Ai, dis groot! En ja, dis gratis! En nee, ek verdien dit nie!  In 1 Kor. 6:9-10 word heelparty baie slegte goeters genoem waaraan mens skuldig kan wees en dan sê vers 11 dié wonderwerk: “Maar julle het julle sonde laat afwas, julle is geheilig, julle is vrygespreek in die Naam van die Here Jesus Christus en deur die Gees van ons God.” God sien my weer as iemand wat niks verkeerd gedoen het nie, want Hy kyk deur die bloed van Sy Seun. Ek is skoon soos die witste wol. ~ Wilna Botha, 05/12/2017

Gooi die net aan die anderkant uit
Ek is seker dat jy ook al in jou lewe moedeloos was van probeer en nog en nog probeer, en die deurbraak wil net nie kom nie. Hetsy dit gaan oor finansies, of om werk te kry of om verhoudings te herstel. Dis darem maar 'n moedelose stryd as jy alles gedoen het wat jy kan, en niks wil werk nie. Lees bietjie hierdie stukkie. 
Joh 21:1-6 "Daarna het Jesus weer aan sy dissipels verskyn, by die See van Tiberias. Dit het só gebeur: Simon Petrus en Tomas, wat ook Didimus genoem is, Natanael van Kana in Galilea, die seuns van Sebedeus en nog twee ander dissipels was daar saam. Simon Petrus sê toe vir hulle: "Ek gaan visvang." "Ons gaan ook saam met jou," sê hulle vir hom. Hulle het gegaan en in die skuit geklim, maar daardie nag het hulle niks gevang nie. Toe dit al lig was, het Jesus daar op die strand gestaan, maar die dissipels het nie geweet dat dit Hy is nie. Jesus vra toe vir hulle: "Mense, het julle nie iets gevang om te eet nie?" "Nee," antwoord hulle Hom. Hy sê toe vir hulle: "Gooi die net aan die regterkant van die skuit uit, dan sal julle iets kry." Hulle het die net toe daar uitgegooi, en vanweë die groot klomp vis kon hulle hom nie weer intrek nie".

Vir Petrus-hulle was dit 'n moedelose poging om vis gevang te kry, maar Jesus het verder gekyk. Hoe ver is dit dan nou van die een kant van die skuit tot die ander kant? Maar net 'n klompie meters, maar tog het dit 'n reuse verskil gemaak. 
Net so moet ek en jy maar net nog 'n keer probeer, en soms is die deurbrake nie ver weg van waar ons reeds probeer het nie. En ja, gooi daai net NOG 'n keer uit, probeer weer 'n keer, en vertrou op die Here. Dalk kan jy, net soos ek, ook getuig dat aanhouer wen. Soms gee ons net te gou op. ~ Willem Botha, 27/11/2017

Ons het ons kinders grootgemaak volgens die beginsel van "spaar die roede nie". Mmm... blykbaar is dit vandag onwettig. Maar so is ek grootgemaak en ek is nie een dag spyt daaroor nie. Ek is nie spyt oor een pak slae wat ek gegee het nie, ek is nie spyt oor een enkele keer wat die kinders om een of ander rede gestraf is, op watter manier ook al nie. Ek is nie spyt dat ons hulle nie vol geld gestop het nie, en ook nie dat hulle baie dinge weerhou is wat hulle maats dalk gehad het nie. Ek is nie spyt dat ons nie skuld aangegaan het om vir hulle nuwe motors te koop nie, hulle moes maar gaan met wat ons kon bekostig.
Met al hierdie dinge sal die gemiddelde persoon saamstem en selfs dink ons het goed gedoen as ouers. Maar daar is een ding waarmee ek sukkel om met myself vrede te maak, en dis die tong. 
Jak 3:6 "Die tong is ook 'n vuur, 'n wêreld vol ongeregtigheid, die deel van die liggaam wat die hele mens besmet. Dit steek die hele lewe, van die geboorte af tot die dood toe, aan die brand, en self word dit uit die hel aan die brand gesteek."
Ek is so ongelooflik spyt oor dinge wat ek my kinders toegesnou het, oor afbrekende woorde wat soms so maklik gevloei het. Ek is so spyt dat ek letsels gelos het met dolksteke wat so onnodig was omdat ek vies was. 
Om vergifnis te vra is SO belangrik, maar vandag voel dit maar net of 'n pleister geplak is op 'n wond wat diep seergemaak het.
Jak 3:8b "... geen mens kan die tong tem nie. Dit is 'n rustelose kwaad, vol dodelike gif." 
Wat meer kan mens sê? ~ Willem Botha, 16/11/2017

Gebed 
"Here, ek voel regtig soms so magteloos, en moedeloos. Party dae flikker daar hoop op, ander dae val daar 'n swart kombers oor my gemoed. Gister het ek gevoel dat ons tog vorentoe gaan, vandag oorweldig die negatiwiteit in die nuus my weer. Soms voel ek dat die rassespanning net te erg raak, hoewel ek tog in die winkel sien hoe die mense mekaar met respek behandel. Here ek sien hoe vriende ongelooflik swaarkry as gevolg van siektes en hoor dat beloftes waaraan hulle vasgehou het, nie bewaarheid word nie. Hoe werk dit Here? Ek is SO bekommerd oor my kinders (en moontlike toekomstige kleinkinders) en weet nie hoe om hulle moed in te praat nie. Ons land is in SO 'n slegte toestand en dit raak net erger. Hoe gaan my en my vrou se oudag lyk, gaan ons sinvol kan lewe tot die einde? Here, ek weet ek moet op U vertrou en aan U beloftes vashou, maar hoekom is dit so moeilik? Maar wat anders Here, aan wie anders? "

Hierdie gebed kom vandag werklik uit my hart uit en dis hoe ek op hierdie oomblik voel. Maar toe herinner die Here my daaraan dat ek nie 'n kind is wat iewers in Afrika sterf van die honger nie, en dat ons nie in 'n oorlogs geteisterde land woon nie. En daar is kos (in oorvloed) in die huis. Ons huis. En toe, as 'n bonus (in my soeke na antwoorde), kom ek op hierdie gedeelte af. 
Klaagliedere 3 : 21 - 26 "Maar dít sal ek ter harte neem en om dié rede bly ek hoop: deur die liefde van die Here het ons nie vergaan nie; daar is geen einde aan sy ontferming nie, dit is elke môre nuut. U trou is groot. Ek sê vir myself: Die Here is my lewe, daarom hoop ek op Hom. Die Here is goed vir wie op Hom bly hoop, vir die mens wat na sy wil vra; dit is goed om geduldig te wag op die hulp van die Here... " ~ Willem Botha, 31/10/2017

“Stel jou lewe elke dag in die Here se hand. Glo in Hom.” (Ps. 37:5, Die Boodskap) Dis die beste manier om jou dag te begin en om dit uur vir uur voort te sit. Plaas jouself bewustelik in die Here se hand. En blý daar! Herinner jouself kort-kort daaraan dat Hy by jou is. Kies om te glo dat Hy in beheer is van elke detail van jou doen en late. Vertrou dat Hy jou sal help, soos Hy belowe. Verwag dat Hy vir jou deure sal oopmaak en geleenthede sal verseker, dat Hy jou voorspoedig sal maak in alles wat jy aanpak en dat Hy alles ten goede sal laat meewerk. Weet vir seker dat Hy vir jou sal sorg en jou sal beskerm en jou sal seën.  Wees gerus dat jy in veilige hande is. ~ Wilna Botha, 26/10/2017

Fobies 
Ons ou mensdom het darem maar 'n klomp sinnelose dinge wat ons bang maak. Dit word fobies genoem. En dan luister jy nog na oumagrootjie se stories van afkop-vrouens wat die plaas bewandel het, dan staan tot die hare op jou tande regop.
Hier is so paar:
Abluto-phobia: Die vrees om jouself te was
Arachibutyro-phobia: Die vrees dat grondboontjiebotter aan jou verhemelte vasklou
Noverca-phobia: Die vrees vir ‘n stiefma
Paraskavedekatria-phobia: Die vrees vir Vrydag die 13de
Penthera-phobia: Die vrees vir jou Skoonma
Terato-phobia: Die vrees vir monsters – en om aan een geboorte te skenk
Socera-phobia: Die vrees vir jou skoonouers
Phobo-phobia: Die vrees vir vrees
Telephono-phobia: Die vrees vir telefone
Papa-phobia: Die vrees vir die Pous
Venusta-phobia: Die vrees vir mooi vroue

Daar is nog vele meer vrese wat name het. Hier volg ‘n klompie met ‘n teenvoeter daarvoor uit die Woord van God. Maak die vrees toe met God se beloftes. Daar is natuurlik seker dinge waarvoor ons bang móét wees soos bv. sonde, om kwaad te word, materialisme, wyn en drank ens. Hierdie fobies en wat die Bybel daaroor sê is ook in die lys hieronder.

Wat sê die Bybel?
Lygo-phobia: Donkerte - Jes 60:20 "Jou son en jou maan is die Here, Hy gaan nie onder nie en word nie dof nie. Die Here sal vir jou 'n ewige lig wees, jou dae van smart is verby." 
Aero acro-phobia: Hoë plekke - Ps 18:34 "Hy maak my voete soos dié van 'n ribbok; op hoë plekke laat Hy my stewig staan." 
Acro-phobia: Pyn - Jes 53:5 "Deur sý wonde het daar vir ons genesing gekom" 
Allodoxa-phobia: Opinies van ander - Spr 15:22 "Waar daar nie beraadslaging is nie, slaag planne nie; dit slaag wanneer daar baie raadgewers is" 
Anable-phobia: Om op te kyk na hoë plekke - Ps 18 : 30 "Met u hulp loop ek 'n oormag storm, met my God by my is geen stadsmuur vir my te hoog nie." 
Angiono-phobia: Hartaanval - Ps 147:3 "Hy genees die gebrokenes van hart en verbind hulle wonde" 
Angro-phobia: Om kwaad te word - Jak 1:20 "' n Mens wat kwaad word, doen nie wat voor God reg is nie." 
Atelo-phobia : Onvolmaaktheid - Matt 5:48 "Wees julle dan volmaak soos julle hemelse Vader volmaak is" 
Athaza gora-phobia: Om vergeet te word - Jes 49:15-16 "Kan 'n vrou haar eie baba vergeet, haar nie ontferm oor die kind wat sy in die wêreld gebring het nie? Selfs al sou so iets kon gebeur, Ek sal jou nie vergeet nie.Ek het jou naam in my handpalms gegraveer, Ek sien jou mure altyd voor my." 
Auto-phobia: Eensaamheid - Heb 13:5 "God self het gesê: Ek sal jou nooit verlaat nie, jou nooit in die steek laat nie." 
Choro-phobia: Om te dans - Ps 30:12 "Ek was in die rou, maar U het my van vreugde laat dans." 
Clepto-phobia: Diefstal - Spr 6:30 "'n Dief word verag as hy steel, ook al steel hy om sy honger te stil." 
Dystychi-phobia: Ongelukke - Ps 91:11 – 12 "Hy sal sy engele opdrag gee om jou te beskerm waar jy ook al gaan. Op hulle hande sal hulle jou dra, sodat jy nie jou voet teen 'n klip sal stamp nie." 
Epistemo-phobia: Kennis - Ps 119:66 "Gee my goeie insig en kennis, want ek stel my vertroue in u gebooie." 
Gelophobia: Lag - Ps 30:6 "Gisteraand was daar nog trane en vanmôre lag ek al weer." 
Gerasco-phobiaGerasco-phobiab: Ouderdom - Spr 10:27 "Wie die Here dien, lewe lank; wie sonder Hom lewe, se lewensjare is min." 
Jes 46:4 Ook tot in julle ouderdom is Ek die Here, tot in julle grysheid sal Ek julle dra.
Hamarto-phobia: Sonde - Jes 59:2 "Dit is julle oortredinge wat skeiding gebring het tussen julle en julle God, dit is julle sondes wat maak dat Hy Hom nie aan julle steur nie en nie na julle wil luister nie." 
Hema-phobia: Bloed - Rom 3:25 "Hom het God gegee as offer wat deur sy bloed versoening bewerk het vir dié wat glo." 
Hypno-phobia: Slaap - Spr 3:24 "....jy sal nie bang hoef te wees as jy gaan slaap nie; as jy gaan lê, sal jy rustig slaap." 
Klepto-phobia: Diewe en skelms - Ps 37:1-3 "Moet jou nie ontstel oor skelms en jou kwel oor skurke nie, want soos gras vergaan hulle gou en soos groenigheid verdwyn hulle sommer. Vertrou liewer op die Here en doen wat goed is, woon en werk rustig voort." 
Necro-phobia: Dood - 1 Kor 15: 55 "Dood, waar is jou oorwinning? Dood, waar is jou angel?" 
Ophidio-phobia: Slange - Ps 91:13 "Jy sal oor leeus en adders loop, leeus en slange sal jy dood trap." 
Penia-phobia: Armoede - Ps 146:7 "Hy laat reg geskied aan verdruktes en gee brood aan dié wat honger ly." 
Philo-phobia: Liefde - Jes 54:8 "Ek ontferm My oor jou met 'n liefde wat nooit vergaan nie, sê die Here, jou Verlosser." 
Pluto-phobia: Rykdom - Matt 6 : 20 "Maak vir julle skatte in die hemel bymekaar" 
Pyro-phobia: Vuur - Jes 43:2 "As jy deur vuur moet gaan, sal dit jou nie skroei nie" 
Satan om phobia: Satan - 
Wees bang:- 1Pet 5:8 "Wees nugter, wees wakker! Julle vyand, die duiwel, loop rond soos 'n brullende leeu, op soek na iemand om te verslind." 
Moenie bang wees nie:- 1 Joh 4:4 Julle behoort aan God, liewe kinders, en het die vals profete klaar oorwin omdat Hy wat in julle is, groter is as die duiwel, wat in die wêreld is.
Scelero-phobia: Slegte mense - 2 Tes 3:2 "Bid ook dat ons van verkeerde en slegte mense verlos word, want nie almal is gelowiges nie." 
Stauro-phobia: Kruisigings en kruise - Gal 6:14 "Mag God verhoed dat ek ooit oor iets anders roem as oor die kruis van ons Here Jesus Christus, want deur die kruis is die wêreld vir my dood en ek vir die wêreld."

Daar is vele fobies wat ons vreugde steel, maar die Here speel met enigiets klaar. Plaas net jou vertroue op Hom. ~ Willem Botha, 19/10/2017

Kom! 
Dalk stoei jy op die oomblik met goed en daar is net nie deurbrake nie, dan het ou Petrus net die regte raad vir jou. 
Matt 14: 25 - 29 Met dagbreek die volgende môre het Hy op die see na hulle toe aangeloop gekom. Toe sy dissipels Hom op die see sien loop, het hulle groot geskrik en gesê: “Dis 'n spook!” Van angs het hulle hard begin skreeu. Maar Jesus het dadelik met hulle gepraat en gesê: “Wees gerus, dit is Ek. Moenie bang wees nie.” Toe sê Petrus vir Hom: “Here, as dit regtig U is, beveel my om op die water na U toe te kom.” “Kom!” sê Hy. Petrus het uit die skuit geklim, op die water begin loop en naby Jesus gekom.

Hierdie verhaal van Petrus wat op die water loop sal my seker vir altyd aangryp. Petrus die waaghalsige, Petrus die dapper een wat 'n soldaat se oor afkap, maar dieselfde Petrus wat vir 'n diensmeisie wegvlug toe hy vir Jesus verloën. Kleurryke karakter. 
Daardie water-lopery wys darem baie van Petrus se karakter. Die ander dissipels skreeu (soos meisies?) vir hierdie "spook", maar Petrus loop Hom tegemoet, nogal bo-op die water! 
Hier is nogal 'n goeie les hierin te leer. Hierdie klink dalk vir jou ook bekend:
* Here ek kan nie 
* Nee, ek wag nog op die Here 
* Nee ek bid nog eers oor die saak (ja jy moet bid oor die saak) 
* Ek wag nog eers vir 'n teken 
* Ek het nog nie die Here se stem gehoor nie 
* Ek het nie daardie gawes of talente nie 
Nee, soms moet mens maar net ophou met verskonings en doen wat jy kan, en dan werk die Here bonatuurlik in en deur jou. Verlaat die gemak en veiligheid van die skuit en loop in geloof. Neem daardie stap wat al so lank uitgestel word. Stuur die CV uit as jy ongelukkig is, sien 'n berader as die huwelikskuit in die riete vassit, gaan maak daardie verhouding reg wat soveel onenigheid veroorsaak, breek die verkeerde verhouding wat jou in die sop gaan laat beland, vergewe waar nodig en vra vergifnis waar nodig. 
As Petrus vir die storm bly kyk het het hy nooit daardie ongelooflike ervaring gehad nie. Toe Jesus sê "Kom", toe stap hy. Dalk sê die Here vandag vir jou ook "KOM". ~ Willem Botha, 03/10/2017

Ps. 19:13 sê so ’n waar ding: “Ongelukkig sien ’n mens nie altyd die dinge raak wat jy verkeerd doen nie.” Partykeer raak mens so gewoond aan die verkeerde dinge wat jy doen, soos bv. jok, skinder, verneuk, vloek, neerkyk op ander, liefdeloosheid ens. dat jy nie meer agterkom jy doen dit nie. Daai vuil kolle is so deel van jou, jy sien dit nie eers meer raak nie. Dalk sê jy: ag, almal doen dit, ek kan netsowel ook. Dalk sê jy: ag, dis nie so erg in vergelyking met wat sus en so aanvang nie. In die hedendaagse tye raak ons maklik afgestomp vir die sonde wat in ons lewens heers. Ek vra maar net weer vandag die Here om deur die Heilige Gees my gewete sensitief te maak, ’n wag voor my mond te sit, my te weerhou van slegte dinge waaraan ek so maklik kan meedoen. Ek maak Ps. 19:13-14 vandag my opregte gebed: “Here, vergewe al my foute waarvan ek nie weet nie. Keer my as ek van plan is om verkeerde dinge te doen. Moenie dat slegte dinge oor my lewe baasspeel nie. As U my help, sal ek sonder foute wees.” (Ps. 19:13-14) ~ Wilna Botha, 14/09/2017

Woede is 'n vreeslike ding, dit laat mense verskriklike dinge doen waaroor hulle gewoonlik later spyt is. Ek is oortuig daarvan dat jy jouself ook dalk vandag in 'n ander bloedgroep in vererg het. En dalk ook woorde gebruik het soos: "Ek kan moord pleeg...!"
En dis presies wat met Kain gebeur het toe hy vir Abel vermoor het, uit jaloesie omdat die Here Abel se offer aangeneem het en nie syne nie. 
Gen 4:8 "Kain het met sy broer Abel gepraat, en toe hulle in die veld was, het Kain vir Abel oorweldig en hom doodgemaak." 
Woede is natuurlik 'n menslike emosie en selfs Jesus was so kwaad vir die mense dat Hy die tafels in die tempel omgegooi het. Die probleem is nie die woede nie, maar die reaksie daarop. In ons samelewing is padwoede so algemeen soos ontbyt eet, en boeta, as daai manne mekaar langs die pad beetkry klap die skote sommer vinnig. 
Die woord "kwaad" kom 270 keer in die Bybel voor (in verskillende kontekste), wat maar net sê dis normaal, maar Paulus het nogal iets besonders hieroor te sê. 
Ef 4:26 "As julle kwaad word, moenie sondig nie, en moenie 'n dag kwaad afsluit nie." En dan ook... 
Rom12:17 "Moenie kwaad met kwaad vergeld nie. Wees goedgesind teenoor alle mense." 
Dus, neem betyds die besluit om maar net op jou tande te byt. 'n Vriend sê eendag dat hy 'n besluit geneem het. As 'n taxi voor hom in ry, gaan hy net uitroep : "kyk sulke vernuf..." ~ Willem Botha, 13/09/2017

“As jy opkyk na die hemel, sien jy hoe die ruimtes daar bo God se grootheid uitstraal. Sy eer is oral in die lug opgeteken. In die blou hemelruim sien jy hoe mooi God se handewerk alles rondom ons versier. Alles wat Hy gemaak het, vertel hoe belangrik Hy is. Dis of die een dag met die volgende dag praat en die een nag vir die volgende nag fluister.” (Ps. 19:2-3, Die Boodskap) Alles wat Hy gemaak het, vertel hoe belangrik Hy is! ’n Blom eer die Here met sy blom-wees. Die sterre met hulle ster-wees. Die berge met hulle berg-wees. So eer alles die Here deur te wees wat Hy hulle gemaak het om te wees. Dit geld natuurlik vir ons ook. Dis vir my so ’n mooi gedagte dat alles, maar alles onophoudelik buig en ruis en skitter en sing tot eer van die Here. En soos die een dag vir die volgende dag herinner dat God in beheer is en alle eer verdien, soos die een nag dit fluister vir die volgende nag, so moet ons ook vertel en mekaar herinner aan God se grootheid, Sy almag en Sy belangrikheid in ons lewens. ~ Wilna Botha, 12/09/2017

Little boxes 
In 1963 het 'n sangeres met die naam Malvina Reynolds 'n eenvoudige liedjie geskryf met die naam "Little boxes", wat jy waarskynlik ken. Die liedjie het gegaan oor mense wat maar net almal konformeer om presies dieselfde te wees (ek plaas die lirieke aan die einde van die stukkie). Mense leef graag soos almal anders leef, hulle maak hulle kinders volgens dieselfde resep groot, werk maar net soos almal anders werk en boet soms hulle eie identiteit in. Ons noem dit "boksie-mense". 
Daar is natuurlik niks daarmee fout nie, maar dis sleg as mense mekaar in boksies probeer prop wat identies as hulle eie boksies is. En dan, wat baie erg is, is dat ons ander in Geestelike boksies prop wat soos ons eie lyk. Jy moet bid soos ek, glo soos ek, "kerk" soos ek, rituele gebruik soos ek dit doen en dieselfde verhouding as ek met die Here hê, anders is jy dalk verlore. In daai boksie is dan natuurlik 'n resep wat jy moet navolg, dan is jou lewe volmaak (soos myne natuurlik). 
Nee, dit werk nie so nie. Almal is anders, almal se omstandighede is verskillend en ek gaan nie in jou boksie pas nie. Natuurlik is die Here altyd dieselfde, maar elkeen se verhouding met Hom is uniek. Ek en jy kan maar net wees wie ons is, en soos die Here ons gemaak het.

Little boxes

Little boxes on the hillside
Little boxes made of ticky tacky
Little boxes, Little boxes
Little boxes all the same
There's a green one and a pink one
And a blue one and a yellow one
And they're all made out of ticky tacky
And they all look just the same

And the people in the houses all go to the university
Where they all get put in boxes, little boxes all the same
And there's doctors and there's lawyers
And business executives
And they're all made out of ticky tacky and they all look just the same

And they all play on the golf course and drink their martini dry
And they all have pretty children and the children go to school
And the children go to summer camp
And then to the university
Where they all get put in boxes, and they all come out the same

And the boys go into business and marry and raise a family
And they all get put in boxes, little boxes all the same
There's a green one, and a pink one
And a blue one and a yellow one 
And they're all made out of ticky tacky 
And they all look just the same ~ Willem Botha, 04/09/2017

SO vinnig... 
... is die mens se lewe op aarde verby. 
Ps144:4 "n Mens, hoe verganklik is hy tog: sy dae gaan soos 'n skaduwee verby." 
Sjoe, soos wat die jare aanstap besef mens net hoe waar hierdie woorde is. Dit voel of dit elke tweede dag Vrydag is, jy is verstom as jy besef dat jare in jou verlede net wegraak. Jy dink jy was verlede jaar iewers, net om te besef dis al 'n paar jaar gelede. En voorts is ek geskok oor die aantal mense in my ouderdomsgroep wat wegval. 
As dit so is, hoekom bekommer ek my so oor die toekoms? Hoekom is soveel onbenullighede dan vir my so belangrik? Hoekom kan ek nie net oorgee en "God's water oor God's akker laat loop nie"? Waarom laat ek toe dat die gebeure in die land my so ontstel? 
Nee, ek is nie so nie, ek sien steeds 'n ander kant. Maar hoekom verval ek nie net summier in" doom and gloom" nie? 
Wel, dis seker omdat ek 'n mens is, 'n mens wat steeds hoop het, iemand wat steeds lief is vir mense en wat steeds my lewe geniet. Dalk omdat ek besef dat daar in hierdie moeras waarin ons leef steeds vreugde en voorspoed is. Miskien omdat ek steeds meer mense sien wat liefde en vrede najaag, as die wat dit nie doen nie. Dis verseker ook omdat ek besef dat God nie opgegee het nie, dat Hy steeds daagliks wonderwerke doen en dat Hy vir elkeen van ons 'n taak het om ons mee besig te hou. 
Laastens omdat ons tog nie net leef vir hier en nou nie. 
1Kor 15:19 "As ons net vir hierdie lewe ons hoop op Christus vestig, is ons die bejammerenswaardigste van alle mense." ~ Willem Botha, 30/08/2017

Die klippe sal dit uitroep 
Ken jy iemand wat 'n klip kan maak? Sommer so 'n klein klippie wat jy met 'n kettie skiet, 'n spoelklippie, 'n rots, 'n boulder. Weet jy waar Klipfabriek and Company is? Ken jy 'n gekwalifiseerde klipmaker? Miskien ken jy iemand wat iets met klippe maak, maar wie maak die klippe? Weet jy van navorsing wat gedoen word op klipvervaardiging? Of dalk 'n BSc Klip-ingenieurswese?
Ja wel, jy sal seker iemand kry wat beskikbare grondstowwe gebruik en onder die regte druk en temperatuur iets kan optower, maar niemand kan uit niks iets maak nie. 
Behalwe? God natuurlik! Kan iemand regtig glo dat alles waaraan jy kan vat sommer net uit niks ontspring het, sonder 'n ontwerper? Nee wat, jy het baie "geloof" nodig om dit te glo!
In Luk. 19 lees ons waar Jesus op die donkie in Jerusalem inry en die skare vir Jesus uit volle bors prys. 
Luk. 19:38-40 Hulle het gesing: “Loof die Koning, Hy wat in die Naam van die Here kom! Vrede in die hemel en eer aan God in die hoogste hemel!” 'n Paar Fariseërs uit die skare sê toe vir Jesus: “Meneer, maak stil u volgelinge!” Maar Hy antwoord: “Ek sê vir julle: As hulle stilbly, sal die klippe uitroep.”
Sit 'n klip op jou lessenaar by die werk. Ek waarborg jou dat mense jou daarna gaan uitvra, dan vra jy vir die persoon: Dink jy dat jy iemand in die wêreld sal kry wat iets so kompleks soos 'n horlosie kan maak? Die antwoord sal natuurlik dan JA wees. Dan vra jy: Dink jy dat jy iemand op aarde sal kry wat iets so eenvoudig soos 'n klip kan maak? 
Dan hoor jy hoe die klip Sy grootheid uitroep... ~ Willem Botha, 23/08/2017

Sing vrolik 
SPR 17:22 "'n Vrolike mens is 'n gesonde mens, 'n neerslagtige mens raak uitgeput." 
Ai, die wysheid van ou Salomo! Sien ons nie dit elke dag nie? Hoeveel keer sien jy nie dat neerslagtigheid en stres selfs jou gesondheid aantas nie. Nou wonder ek wat is dit wat die vrolikheid so van ons wegrokkel? Is dit omstandighede, of is dit jou reaksie op omstandighede? Dit kan tog nie net jou omstandighede wees nie, want jy kry darem maar baie vrolike mense wat onder aaklige omstandighede leef. 
Ons het (weens bedieninge waarin ons betrokke is), met vele gestremde mense te doen en goeiste, jy kry vrolike mense in hierdie vriendekring van ons! Dit lyk my ons moet maar vrolikheid kies, ten spyte van omstandighede. Dit voel darem mos baie lekkerder as om neerslagtig te wees. 
En so kom die pragtige Ps 33 vanoggend in my kop toe ek so dink aan vrolikheid, en ek loop dit sommer net en sing. Lees tog maar gou die woorde deur en neurie sommer saam. ( ~ Willem Botha, 21/08/2017))

Sing vrolik, hef die stem na bowe, 
Regverdiges, verhef die Heer! 
Dit pas opregtes God te lowe 
En uit te jubel tot sy eer. 
Laat die psalm-gesange 
Stem van sterk verlange 
Om die Heer te dank 
By die smeltend skone 
harp- en sitertone
Liefde en lof verklank!

In swaar tye
Dalk gaan jy tans deur moeilike tye, ontberings, swaarkry, siekte of hartseer. In hierdie volgende stukkie sien ek iets anders as wat ons gewoonlik in die Bybel raaklees wanneer ons mekaar bemoedig. Ons lees op so baie plekke dat die Here sê dat Hy jou versugtinge hoor en jou gaan red uit jou probleme. Maar kyk wat met Paulus gebeur. 
2 Kor 12:7(b)-9(a): "Daarom, sodat ek nie hoogmoedig sou wees nie, is daar vir my 'n doring in die vlees gegee, 'n boodskapper van Satan om my met vuiste te slaan. Drie maal het ek die Here gebid dat dit van my af weggeneem moet word. Sy antwoord was: “My genade is vir jou genoeg. My krag kom juis tot volle werking wanneer jy swak is.”
Daar word baie bespiegel wat Paulus se doring in die vlees sou wees, maar in vers 10 van hierdie gedeelte praat hy pertinent van swaarkry. 
Dan lees ons hierdie woorde van die Here: "My genade is vir jou genoeg." Dis so asof die Here vir Paulus aanmoedig om sy "lot" te aanvaar, en net te leef uit Sy genade. 
Ons probleme gaan nie altyd weg nie, ons word nie altyd gesond nie, die lewe is nie altyd maanskyn en rose nie, maar God se genade is ALTYD daar, altyd in oorvloed beskikbaar, jy is ALTYD in die Here se gedagtes en Hy verlaat ons nooit nie. Sy genade is vir jou genoeg. ~ Willem Botha, 15/08/2017

“U sal my toelaat om naby U te kom, want ek wil U aanbid. Omdat U u kinders baie lief het, mag ek na U toe kom. Uit eerbied mag ek voor U kniel.” (Ps. 5:8) Hoe wonderlik is dit nie dat ons na God toe kan gaan, hom kan aanbid en in ’n persoonlike verhouding met Hom kan wees nie, dat ons soos Dawid met Hom praat soos met ’n vriend en raadgewer en vertroueling. Die Bybel sê ons sondes maak ’n skeidsmuur tussen ons en God, maar Jesus het daardie muur kom afbreek deur ons sondes op Hom te neem. “My liewe vriende, ons hoef nou nie meer onseker of bang te wees om na God toe te gaan waar Hy in die Heiligste deel is nie. Ons kan dit doen omdat Jesus vir ons gesterf het.” (Heb. 10:19) Ons het nou vrye toegang tot God. Ons kan naby aan Hom kom. Sy hand is altyd uitgestrek na ons. Dit alles is moontlik omdat Hy ons lief het en omdat Sy genade groot en verniet is. Prys Hom daarvoor! ~ Wilna Botha, 26/07/2017

Geloof soos Paulus 
Hand 9:1-5 Intussen het Saulus soos 'n besetene voortgegaan om die volgelinge van die Here met die dood te dreig. Hy het na die hoëpriester toe gegaan en van hom bekendstellingsbriewe aan die sinagoges in Damaskus gevra. Sy doel was om al die aanhangers van die leer van die Here wat hy daar kry, mans sowel as vrouens, gevange te neem en na Jerusalem toe te bring. Toe hy op reis naby Damaskus kom, het daar skielik 'n lig uit die hemel op hom gestraal. Hy het op die grond neergeval en 'n stem vir hom hoor sê: “Saul, Saul, waarom vervolg jy My?” “Wie is U, Here?” vra hy toe. “Ek is Jesus,” antwoord Hy. “Dit is vir My wat jy vervolg."
As iemand ooit moet wonder of die evangelie van Jesus Christus waar is, kan hy maar net na Paulus se verhaal gaan kyk. Paulus die Fariseër, die vervolger van die Christene, die man wat alles in sy vermoë gedoen het om hierdie "nuwe" beweging tot 'n val te bring. 
En hier lees ons hoe hy self letterlik "tot 'n val kom", toe Jesus aan hom verskyn. Let wel, Jesus Homself, kyk gerus na vers 5. 
Paulus se lewe verander so dramaties dat hy ongelooflike lyding deurgaan, amper sterf vir sy geloof tydens sy bediening, later wel sterf daarvoor en op die koop toe 13 van die 27 boeke van die Nuwe Testament skryf. Bykans die helfte! 
En weet jy wat meer is? Hy het nie (sover ons weet) ooit vir Jesus een tot een gesien nie, hy was nie 'n dissipel nie en hy was nie by die kruis, die opstanding of die hemelvaart nie. Ek het nog nooit van 'n ateïs gehoor wat die bestaan van die briewe van Paulus in twyfel trek nie, maar wel dat hulle die Jesus vir wie Paulus aanbid het in twyfel trek. Maar Paulus het vasgestaan in sy geloof. Laat mens dink né? ~ Willem Botha, 03/07/2017

Hoekom ek Here? 
Ek dink vele mense het al hierdie vraag gevra. 'n Vriend het 'n klomp jare gelede kanker gekry en ook gevra: "Hoekom ek Here?" Sy antwoord het onmiddellik gekom: "Hoekom nie jy nie? Wie sou jy dan anders kies om hierdie pad te stap?" Genadiglik het die Here hom genees. 
Vandag is dit my beurt om hierdie vraag te vra: "Hoekom EK Here?" 
Maar my vraag werk bietjie na die ander kant toe as ek vra: "Why me Lord?"
 

Why ME - Kris Kristofferson
Why me Lord what have I ever done. 
To deserve even one of the pleasures I've known
Tell me, Lord, what did I ever do
That was worth lovin' you or the kindness you've shown

Lord help me, Jesus, I've wasted it so
Help me Jesus I know what I am
But now that I know that I've needed you so
Help me, Jesus, my soul's in your hand

Try me, Lord, if you think there's a way
I can try to repay all I've taken from you
Maybe Lord I can show someone else
What I've been through myself, on my way back to you

Lord help me, Jesus, I've wasted it so
Help me Jesus I know what I am
But now that I know that I've needed you so
Help me, Jesus, my soul's in your hand ~ Willem Botha (28/06/2017)

Gif
Dodelike gif:- neem vyf groot eetlepels drie keer per dag voor ete. Sluk so vinnig as moontlik af en drink dan 'n glas water. Stook bitterheid soveel as moontlik in jou gemoed. Hou jouself besig met selfgesprekke, waar jy elke keer aan die korste ent trek. Doen dit in die nag terwyl jy rondrol, asook enige tyd van die dag wanneer jy die minste daarvoor lus is. Die haat sal jou verteer, die seerkry hier diep binne nooit ophou nie, die woede uitbarstings wanneer jy dit die minste verwag. Daai gedagtes wat maal en maal en soos 'n plakkerskamp se plakker wat in jou kop plak en geen sent huur betaal nie. Jy drink die gif en hoop iemand anders kom daarvan om.

So is dit as jy nie kan vergewe nie!

Hoekom? Waarom dit aan jouself doen? Dit terwyl die ander persoon dalk salig onbewus is van jou selfvernietiging. Hoekom 'n slaaf word van iets (of iemand), wat die boeie vir jou gee en jy sluit jouself daarmee aan daardie persoon vas? Hoekom toelaat dat iemand vir wie jy kwaad is jou lewensvreugde steel? 
Nee vriend, vergewe en gaan aan met jou lewe. Begin vandag met die proses, al is dit stadig en pynlik, dis net jou keuse. Sluit daai tronkdeur oop, met daai sleutel wat reeds in jou hand is. En word vry. Dalk is daai skuldige persoon reeds in die graf, maar dan word jy ten minste vry. 
Mat 18:21-22 Daarna het Petrus na Jesus toe gekom en gevra: “Here, hoeveel keer moet ek my broer vergewe as hy iets verkeerds teen my doen? Selfs sewe keer?” Jesus antwoord hom: “Ek sê vir jou, nie sewe keer nie maar selfs sewentig maal sewe keer. ~ Willem Botha, 20/06/2017

Waar was God...
... toe daardie bom gister afgaan by 'n konsert in Engeland? Waar was Hy in 1983 toe die bom in Kerkstraat hordes mense se lewens verwoes? Waar was Hy op 11 September 2001 toe duisende onskuldige mense in New York sterf? Waar was Hy toe duisende mense in sinnelose oorloë reg deur die geskiedenis sterf?
Moeilike vraag of hoe? Wel, Hy was op dieselfde plek as waar Hy was toe jy vandag gesmul het aan 'n lekker bord kos, of toe jy knus in jou warm bed gelê het. Hy was op dieselfde plek as waar Hy was toe jy jou pasgebore baba in jou arms hou. En toe jy onverklaarbaar genesing gekry het toe jy siek was. En waar Hy was toe jy die groot deurbraak gekry het na 'n tyd van werkloosheid. 
Deur al hierdie tyd was Hy steeds in Sy troonkamer, daar waar jy ongenooid vir Hom kan gaan kuier. Daar waar Hy sekerlik ook hartseer is oor die gebrokenheid van hierdie wêreld, en saam met jou bly is oor jou voorspoed. Daar waar Hy die sonde van die wêreld haat, maar innig lief is vir die sondaars soos ek en jy. 
Die Bybel sê nie die lewe is maanskyn en rose nie. ~ Willem Botha, 23/05/2017

Vrees
Ek wonder so, wat is die verskil tussen vrees, bekommernis, besorgdheid en stres (spanning)? Daar is tekste wat oor elkeen van hierdie dinge praat, soos hierdie een oor bekommernis. 
MAT 6:34 “Moet julle dus nie oor môre bekommer nie, want môre bring sy eie bekommernis. Elke dag bring genoeg moeilikheid van sy eie.” Weliswaar 'n ongelooflike moeilike teks om na te volg. 
Paulus praat ook oor besorgdheid:
2 KOR 11:28 "Behalwe dit alles was daar nog die daaglikse bekommernisse, die besorgdheid oor al die gemeentes." 
Ek het gister besef dat ek bekommernis, spanning en besorgdheid kan hanteer, maar vrees is iets anders. Ons kry gister die tyding dat iemand wat ons baie goed ken, skielik oorlede is aan 'n hartaanval, en 'n buitengewone vrees oorval my!
DAARDIE tyding, daai een wat so finaal is, daardie een wat jou hele wese uitmekaar ruk, daardie woorde wat jou hele lewe in 'n oogwink verander, daardie tyding wat sê dat geen dag OOIT weer dieselfde as gister sal wees nie. Die dokter wat 'n verdoemende uitspraak maak oor jou gesondheid, daai dag wat jou laat voel dat alles in 'n oogwink buite beheer geraak het. Of daardie woorde: "Daar is iemand anders, ek wil jou nie meer hê nie." 
Dan sterf jy in jou binneste. Dan maak teksverse nie meer sin nie, gebed klink leeg en al die geld in die wêreld is waardeloos. 
Daardie dag bly net die Here oor, daardie dag is dit jou enigste toevlug, want waar die mens nie meer kan nie, werk die Here. 
Ps 62:8 "God is my redding en my krag. Hy is my rots, my sterkte, God is my toevlug." ~ Willem Botha, 20/04/2017

Toe ek vanoggend die gordyne ooptrek het ek gesê: wat se mooi dag is dit nie! Dis GOEIE Vrydag. Wat is so goed aan hierdie dag? Is dit nie dié dag waarop ons terugdink aan die doringkroon op Jesus se kop, aan die vernedering aan ’n kruis nie? Dié dag waarop Hy geslaan, gespoeg, gespot en weer geslaan is. Dié dag wat Hy van God verlaat is. Dié dag toe daar drie ure se duisternis was. Dié dag wat die bloed gevloei het. Dié dag waarop Hy gesterf het. Dit ís ’n Goeie Vrydag, want dis dié dag waarop genade vir my en jou ’n werklikheid geword het, waarop vryheid en vergifnis vir ons deurgebreek het. Dis dié dag waarop al ons sonde op Jesus gepak is. Dis dié dag toe die Lam van God vir die sonde van die wêreld geslag is.  Dis dié dag toe die skuld eis vir ons sonde teen die kruis vasgespyker is. Dis dié dag toe geregtigheid en vrede mekaar omhels het. Dis dié dag toe Jesus gesê het: Dit is volbring. Mag jy ’n Goeie Vrydag hê!  ~ Wilna Botha, 14/04/2017

Geloof, getoets tot in die dood 
In Handelinge 6 lees ons van Stefanus wat voor die Joodse raad gebring word oor die wonders wat hy gedoen het en die mense het nie daarvan gehou nie. Terwyl hy met die Joodse raad praat sien hulle die volgende:
Hand 6: 15 "Toe al die lede van die Raad stip na Stefanus sit en kyk, sien hulle dat sy gesig soos dié van 'n engel lyk." 
Daarna het Stefanus vir hulle die hele geskiedenis vertel van Abraham tot by Jesus, en toe kon hulle nie meer nie en stenig hom summier. 
Hand 7:59-60 "Terwyl hulle vir Stefanus stenig, het hy geroep: “Here Jesus, ontvang my gees!” Toe het hy op sy knieë neergesak en hard uitgeroep: “Here, moet hulle tog nie hierdie sonde toereken nie!” Met hierdie woorde het hy gesterwe." 
'n Ongelooflike verhaal van iemand wat tot sterwe kom en weet waarheen hy op pad is. “Here Jesus, ontvang my gees!” 
Ek gesels die naweek met 'n persoon wat vir my vertel van 'n gesprek wat hy gehad het met 'n mediese suster wat in 'n saal by 'n hospitaal gewerk het waar terminaal siek pasiënte gelê het vir hulle laaste dae. Sy het vir die persoon vertel dat daar 'n massiewe verskil is tussen (soos sy dit gestel het) gelowiges en ongelowiges wat tot sterwe kom. Sy het vertel hoe ongelowige mense met angs en vrees tot sterwe kom (ja nie altyd in alle gevalle nie) terwyl gelowiges oor die algemeen met 'n absolute vrede en rustigheid heengaan. 
Net so is daar baie mense wat sterf en dan deur resussitasie weer gered word, wat vertel dat hulle die hemel of die hel gesien het. Diegene wat die hemel gesien het, wou deur die bank weer teruggaan, terwyl diegene wat die hel gesien het in angs en vrees gelewe het. In beide gevalle het mense se lewens daardeur handomkeer verander. Daar is getuienis van mense wat dramaties tot bekering gekom het daarna. Die keuse lê by jou en my om dit te glo of nie. Ek glo dit met my hele hart! 
Ek het geen begeerte om daardie pad te stap sonder die Here nie!

Die Bybel is baie baie duidelik daaroor dat ek en jy vir ewig sal lewe. Elke mens op aarde sal vir ewig lewe, maar nie op dieselfde plek nie. As jy die verhaal van Lasarus en die ryk man lees in Lukas 16 kry jy 'n vreesaanjaende prentjie. 
Luk. 16:24 ‘Vader Abraham, ontferm u oor my. Stuur tog vir Lasarus dat hy net die punt van sy vinger in water steek en my tong afkoel, want ek ly verskriklik in hierdie vuur.’
Vriend, die realiteit is, hy ly nou nog, en hy sal vir ewig so ly. Moenie sonder God sterf nie, jy wil REGTIG nie! ~ Willem Botha, 27/03/2017

Dè vat my bril 
'n Vriend gebruik hierdie naweek 'n kostelike beeld van 'n bril, wat my toe aan die dink gesit het. 
Nou kyk, in die Botha-huis is baie brille. Clicks-brille, nuwe voorskrifbrille, ou voorskrifbrille en dan sommer café-brille waardeur jy net kan sien as jy 'n goeie bril op het! En so kom ek eendag in die bank en moet 'n dokument teken maar my bril is nie saam bank toe nie. Ewe ongeërg gee die dame van die bank my haar bril en siedaar, ek kan teken. Ek is mos hoeka 'n meter-leser en kan net sien as die arm soos 'n lugdraad uitgestoot word. So meter vêr. Maar party ouens se brille werk net nie vir my nie. Ek dink juis hulle oë moet goed wees om daardeur te sien!

Maar weet jy, ons sukkel maar om te verstaan dat ons as Christene net nie deur mekaar se Geestelike brille kan sien nie, en ons is ook nie veronderstel om dit te kan doen nie. Alhoewel ons dieselfde Bybel lees, is ons verhouding met God totaal anders, want selfs my verhouding met my twee kinders is totaal anders. Ek en vroulief is in 'n volmaakte huweliksverhouding. Net so kan Piet en Sannie ook in 'n volmaakte huweliksverhouding wees, maar dit beteken mos nou nie dat ek en Sannie (van Piet) ook in 'n volmaakte verhouding gaan wees nie. 
Net so glo ek dat die Here elkeen van ons op 'n baie unieke en besondere manier hanteer. Die manier wat ek met God praat, en Hy met my, is nommerpas vir ons. En ek en jy kyk met totaal verskillende brille na alles in die lewe, ons godsdiensbeoefening, ons verstaan van die wêreld en alles om ons. Daarom kan ek nie my Geestelike bril op jou oë wil plak en verwag dat dit vir jou werk nie. Maar dis juis omdat ons dit doen, dat ons so kan stoei met mekaar, en dis hoekom ons mekaar eintlik selfs veroordeel. 
Ja ek het vir seker die Here deur die Bybel leer ken, maar my verstaan van Hom kom meer deur verhouding as deur kennis. Ek kan dalk 'n hele boek van duisende bladsye oor my vrou skryf, maar dit gaan absoluut niks help vir 'n volgende persoon wat haar pad kruis nie. 
Daarom, polish maar jou eie bril mooi blink en kyk deur hom na die Here, en jy sal 'n volmaakte Wese sien, net soos wat Hy na jou kyk en 'n volmaakte wese (in Sy oë) sien. Moet nie dink 'n ander ou se bril sal vir jou 'n beter prentjie gee nie, dit sal wees soos 'n raamlose bril sonder glase. ~ Willem Botha, 21/03/2017

Nee vriend, dis sommer jy self... 
'n Klomp jare gelede is ons op 'n mannnekamp wat aangebied word deur 'n klompie ouens van ons mannebediening. Ons sit toe en gesels oor hoe moeilik die reguit pad is en die een ou sê toe: "Ek struikel gereeld met 'n paar dinge want die Satan wys vir my goed wat ek nie moet sien nie en dan doen ek sonde." Sjoe, ek het daai een nie mooi verstaan nie, toe sê ek vir hom: "Vriend, dis nie die duiwel nie, dis sommer jy self". 
Die arme ou was nogal ongemaklik. Wel, waar gaan jy 'n beter "scapegoat" kry om te blameer as die duiwel? Jy ken mos seker die volgende storie: Adam blameer vir Eva, Eva blameer die slang, en die arme ding het nie 'n voet om op te staan nie...
Ja nee kyk, as ons vir ou sekelstert in die prentjie kan inbring, kan ons met moord wegkom. Die ou het mos BAIE magte hier op aarde, en hy infiltreer jou brein en siedaar, jy is onskuldig! Shame..
Jak 1:14 "Maar 'n mens word verlei deur sy eie begeertes wat hom aanlok en saamsleep." 
Lyk my die duiwel is soms onskuldig... Gelukkig, anders moes hy mos voor God vergifnis vra vir ONS sondes (want hy het ons mos laat struikel). Nee wat, ons moet maar self pa-staan vir ons oortredinge. 
Nee vriend, dis sommer jy self... ~ Willem Botha, 02/03/2017

Skoert Satan 
Die boek Judas is die tweede laaste boek in die Bybel en dis baie kort, net een hoofstuk. Die skrywer is natuurlik nie Judas Iskariot wat Jesus verraai het nie. Dis ook nie duidelik aan wie hy die brief gerig het nie, maar hy waarsku ernstig teen dwaalleraars wat die gelowiges se kringe binnedring, en dan noem hy dat hulle eintlik afstootlik is. Hy praat op die man af oor hierdie mense, en hy lê hulle afskuwelike lewens prontuit bloot. 
Dan noem hy 'n interessante ding:
Judas 1: 8-9 "En nou is dit met hierdie mense net so. Vanweë die droomgesigte wat hulle sien, bevlek hulle hulle eie liggame, verwerp hulle die gesag van die Here en beledig hulle die hemelwesens. Nie eens die aartsengel Migael het so iets gedoen nie. Toe hy met die duiwel gestry het oor die liggaam van Moses, het hy hom dit nie veroorloof om die duiwel te beledig en te veroordeel nie, maar hy het vir hom gesê: “Die Here sal jou straf.”"
Ek wonder nou net so bietjie oor vers 9 waar hy sê dat nie eers die aartsengel Migael die duiwel beledig en veroordeel het nie. Hy sê net vir Satan "die Here sal jou straf." 
Ek het al so baie gehoor hoe mense die duiwel in hulle gebede bestraf, en ja, sommer terwyl hulle met God praat spreek hulle die duiwel aan. Nou wonder ek net - aan die hand van hierdie teks - of ons dit hoef te doen. Ja, die Bybel sê inderdaad hy loop rond soos 'n brullende leeu, maar ons weet tog dat die Here hom aan die kruis vernietig het. 
Ek mors nie te veel tyd met die duiwel nie, want dis nie my werk of vir my nodig nie. Hy is inderdaad besig hier op aarde, maar ons kan eerder ons tyd spandeer om die Here te prys, te bid vir Sy hulp en om dankbaar te wees vir ons verlossing. Sy bloed is meer kragtig as enigiets op aarde. ~ Willem Botha, 28/02/2017

Totsiens vriende 
Aan al my vriende:- Ek het ongelukkig die nuus gekry vandag dat ek binne 'n dag of 2 gaan sterf. My aorta het aan die binnekant geskeur oor 'n baie groot oppervlakte. Baie dankie vir al julle liefde belangstel omgee en grappe maak. Dit was vir my altyd lekker om saam julle te kuier. Liefde

Dankie Vader dis nie vir my waar nie, maar hierdie is 'n boodskap wat ek Saterdag gekry het (woord vir woord), en die persoon is toe inderdaad Sondag oorlede. Ek het hom nie baie goed geken nie. 'n Absolute tragiese gebeurtenis wat die naweek afgespeel het, van 'n wonderlike mens, pa en eggenoot. Dit het my diep getref en laat besef hoe sterflik die mens is. 
Wat my toe net laat wonder oor 'n paar dinge :-
* Dit het nie met my gebeur nie. Hoekom nie ek nie? Kom dit dalk nog? Dit kan, weet jy? Met jou ook. 
* Is ek gereed daarvoor? Is jy? 
* Waar moet ek gaan regmaak? Al daaraan gedink? 
* Is my saak so reg met die Here, soos wat hierdie man se saak was? Hoe lyk dit daar by jou? 
* Het ek regtig voluit gelewe? Of net bestaan? 
Sê nou net jy het nie darem nog die paar ure gehad soos wat hierdie persoon gehad het nie?

Ons groet jou Fantie, jy was 'n reus! Die getuienis van mense oor jou lewe is wonderbaarlik. ~ Willem Botha, 20/02/2017

Handjies klap, koekies bak... 
Soos wat ek nou hier sit en skryf, het ek 'n heerlike baksel beskuit in die oond (ja, ek Willem) en die reuk hang reeds in die huis. Daarna laat afkoel, opsny en oornag droog in die oond. Dis maklik om beskuit, of koek, of skons te bak. Enige iemand kan dit doen (ja jy ook meneer), solank jy 'n resep en bestanddele het. En o ja, read the instructions... 
Nou ja, dis dan seker net so eenvoudig om deur die lewe te gaan, of hoe? Ons het die resepteboek (die Bybel), ons het die bestanddele (lewe, lewensmiddele, verhoudings, mense om ons ens) en al wat ons moet doen is meng en bak. Die Bybel is tog baie duidelik; alles wat jy wil weet is daar, doen dit net. 
Maar o koek (excuse the pun), dit werk nie so nie. My beskuit resep gaan vir my NET beskuit oplewer, nie sjokoladekoek of frikkadelle nie, want die bestanddele is verkeerd (verskoon my gou, net gaan kyk hoe die baksel vorder). Ek weet egter dat meel meel is, sout proe altyd dieselfde, so ook die karringmelk, All-Bran en Wheatbix. Dis maklik. 
Maar die lewe se bestanddele is soms bederf (soos verhoudings) en die oond van die lewe bak nie so egalig soos ons "thermo-fan" oond nie. Soms is ons lewens-oond heeltemal te warm, en soms dink ons ons bak 'n heerlike vogtige sjokolade-koek (jitte ek het 'n lekker resep wat ek bak), maar intussen is ons besig met 'n skaapnek potjie. 
Maar ja, die Bybel gee goeie riglyne, vernaam in Spreuke. 
Spr 1:1-3 "Spreuke van Salomo seun van Dawid, koning van Israel. Dié spreuke is bedoel om mense wysheid te leer en hulle te onderrig sodat hulle sal weet wanneer iemand verstandig praat. So sal hulle 'n behoorlike opvoeding ontvang en 'n sin vir regverdigheid, reg en billikheid."

Die Resepteboek van die lewe:-
Sê nie alles gaan heerlik proe nie
Sê nie dat die koek nie soms flop nie 
Sê nie ons kan sommer net niks doen en 'n koek kry nie (jy moet bak) 
Maar sê dat God die beste vir ons wil hê, selfs in slegte tye as die oond handuit ruk. 
En ja, soms moet daai oond warm wees vir die regte resultaat. ~ Willem Botha, 16/02/2017

NOG 4!!!
...onskuldige mense is vandag op 'n plaas vermoor. NOG 4! Waar gaan dit eindig? Hoekom? Onskuldige mense wat werk verskaf het, voedsel produseer en bes moontlik baie goed vir hulle werkers was, en 'n verskil in hulle lewens gemaak het.
Ek voel verslae, kwaad, tot op die been moeg hiervoor, ek erken dat ek moet stoei om nie te haat nie en regtig regtig magteloos en moedeloos voel! As dit net kon sin maak op een of ander manier, ja selfs op Geestelike vlak, dan sal dit help, maar ek kom maar net tot die slotsom dat die mens 'n uiters verdorwe wese geword het. 
Maar dis niks nuuts nie, dit kom van die begin begin af, met die sondeval. Die mens kies teen God, met verskriklike gevolge, en word uit die paradys verdryf. En toe word dit eers erg... 
Gen 6 : 5 - 7 "Toe die Here sien hoe groot die verdorwenheid van die mens op aarde is en dat hy sy lewe lank net slegte dinge bedink, was die Here bedroef daaroor dat Hy die mens op die aarde gemaak het. Dit het Hom diep gegrief. Die Here het gesê: Ek sal die mens wat Ek geskep het, wegvee van die aarde af; mens en dier, ook dié wat kruip, en die voëls, want Ek is bedroef daaroor dat Ek hulle gemaak het."
Daarna het die groot waters gekom. 
Vriend, Jesus se koms het nie die effek van die sondeval tot niet gemaak nie, net die weg na Saligheid het "verander". Die wêreld is steeds net so aaklig, wreed en korrup. 
Die vraag waarmee ek oorbly is dit: Hoe gaan ons vorentoe? Dan kan ek maar net uitroep :
2 Sam 22:30-32 "Want met U loop ek ’n bende storm, met my God spring ek oor ’n muur. Die weg van God is volmaak; die woord van die HERE is gelouter; Hy is ’n skild vir almal wat by Hom skuil. Want wie is God buiten die HERE, en wie ’n rots buiten onse God?" ~ Willem Botha, 14/02/2017

Volstruis in die windpomp 
Wat is die grootste en goorste krisis wat jou al getref het? Waar in jou lewe het die onaangenaamste ding denkbaar jou getref? Of is jy vrygestel van alle vorms van swaarkry, teenspoed of moeilikheid? Ek twyfel. Ek dink ons elkeen het iewers al in iets sleg beland. Hetsy jy dit oor jouself gebring het, of dat dit deur iemand anders teweeggebring is. Nou ja, daar is ‘n goeie spreekwoord daarvoor: wanneer die pawpaw die fan strike, in Afrikaans vertaal: wanneer die volstruis in die windpomp invlieg. Kan jy daardie dag onthou? Of dae? Of tydperk? … toe die volstruis in jóú windpomp ingevlieg het. 
Dit is so dat daar vir party mense net 'n muggie in die windpomp vlieg, en dis die grootste krisis denkbaar, en vir ander vlieg 'n koei deur daai windpomp en hulle hanteer daardie krisis met 'n innerlike krag wat bokant mens se verstand is. Ons is nou maar verskillend, en daarom hoef ons nie op dieselfde manier ons krisisse te hanteer nie. Die punt is, hanteer dit net. 
Die een ding wat ons egter weet is dat die Here daar is, in ons klein en groot uitdagings. Ek dink nie die Here voel dat ons soms te kleinserig of liggeraak is nie, ons kan met alles na Hom toe gaan. 
Jes 41:10 "Moenie bang wees nie, Ek is by jou, moenie bekommerd wees nie, Ek is jou God. Ek versterk jou, Ek help jou, Ek hou jou vas, met my eie hand red Ek jou." 
So 'n bekende teks, wat so moeilik is om te glo en aan vas te hou, maar dis wat ons het. Sê nou maar dit het eerder gesê: "Jy wil mos, jy het daarvoor gesoek, jou sondes maak dat Ek my gesig wegdraai, en moenie by My kom huil nie..." 
Nee, God is daar, en Hy staan by ons deur dik en dun. ~ Willem Botha, 09/02/2017

Gebed 
... 'n baie spesiale gesprek met die Here. Soms alleen, soms saam met ander, soms die Here aan die enkels vasgryp en jou hart uitstort tot Hy jou antwoord, soms 'n stille versugting. Soms 'n smeking uit desperaatheid en soms net 'n sagte "dankie Here". Party gebede is dalk vir sommiges net uit gewoonte (soos voor jy eet), maar ten minste is dit 'n goeie gewoonte. Ons almal kan nog ons kindergebedjies opsê, en ek dink dit is vir die Here baie spesiaal.

Dan is daar die Facebook gebede, wat dikwels gepaard gaan met 'n haarrysende foto van 'n kind wat op sterwe lê, wat jou aanpor om saam te bid met 'n "share" of 'n amen (gewoonlik stokou foto's). Lewe die arme kind nog? My mening is dat dit absoluut geen Geestelike waarde het nie! Bid mense vir die saak nadat amen geklik is?

"Bid asb vir my... ". Ja natuurlik, ons mag dit doen. Maar die eerste lyn van gebed is altyd jy self. Hoe lank moet ons dan vir die saak bid? Totdat die Here antwoord. Wat soms" wag" of "nee" kan wees. Ons sukkel met daardie een. 
En dan, 'n moeilike een: Iemand het eendag gesê " Doen eers ALLES wat jy self moet doen voor jy bid oor 'n saak", wat beteken dat ons soms eers ons huis in orde moet kry (spreekwoordelik) voordat ons van die Here verwag om die saak op te los. 
Laastens, sê meer dankie as wat jy vra. Sien elke dag God se wonderwerke raak, maak 'n gewoonte om seëninge te tel, en prys die Here ook vir/in slegte tye, want soms vat dit lank om God se besluite te verstaan. 
Amen ~ Willem Botha , 07/02/2017

Die Voorspraak
Jesus se openbare lewe het oor 'n tydperk van ongeveer drie jaar gestrek. Ek kan my indink dat die dissipels in hierdie tyd onafskeidbaar van Hom geraak het. Maar toe gebeur daar dinge wat net eenvoudig ondenkbaar was, dinge wat Hy vir hulle gesê het, maar wat hulle nie verstaan het nie, en Hy word gekruisig. Maar toe Hy opstaan uit die graf en aan hulle verskyn, het hulle vreugde geen perke geken nie, maar ai, toe vind die hemelvaart plaas, waarvan hy hulle ook vertel het, en hulle was seker weer platgeslaan.
Ek kan my hulle eensaamheid en gevoel van verlorenheid net nie indink nie. Maar voor Hy weg is, het Hy hierdie vir hulle gesê:
Joh 16:7 "Tog sê Ek vir julle die waarheid: Dit is tot julle voordeel dat Ek weggaan, want as Ek nie weggaan nie, sal die Voorspraak, die Heilige Gees, nie na julle toe kom nie; maar as Ek gaan, sal Ek Hom na julle toe stuur".

Toe word die Heilig Gees uitgestort, net soos Hy belowe het. Daarna was niks weer dieselfde nie, want toe gebeur daar bonatuurlike dinge deur hulle. Mense kom by die duisende tot bekering, en soos hulle vervolg word en die Woord versprei, hoor die hele wye wêreld van die Here. Alles deur die krag van die Gees.
Ek en jy word vandag deur dieselfde Gees toegerus, met presies dieselfde krag. Ons is tot presies dieselfde in staat as die dissipels en het ook presies dieselfde opdrag. Ons KAN die wêreld verander en ons KAN 'n reuse verskil maak. 
As ons maar net dieselfde passie gehad het... Ja, vernaam ek. ~ Willem Botha, 31/01/2017

Yster slyp yster
Spr 27:17 "Yster slyp yster, vriende vorm mekaar."
Ek het ’n vriend saam met wie ek die afgelope 16 jaar elke Vrydagoggend vir ’n uur kuier. Ons deel nie net geestelike gedagtes nie, maar ook algemene dinge in ons leef wêrelde wat ons werk, gesinne, stokperdjies, bekommernisse, ons vrese en natuurlik selfs politiek insluit. So het ek verskeie vriende wie se insette in my lewe vir my baie belangrik is.
Dis egter nie net buitestaanders wat deel is van hierdie vriendekring nie, maar my vrou en my kinders is verseker my heel beste vriende en hulle insette in my lewe is van onskatbare waarde.
Al hierdie dinge vorm my en slyp my, presies soos dit in hierdie teks in Spreuke beskryf word. Daardie slypwerk aan my is nie altyd lekker nie, want hoe eerliker hierdie vriende van my is, hoe beter word ek gevorm. Ek is oortuig dat elke enkele een van hierdie mense my verander het na wie en wat ek vandag is.
Maar net soos wat hierdie vriende naby aan ons is en ons lewens aanraak, is die Here ook ons Vriend en het Hy dieselfde rol in ons lewens.
Jer 18:6 "Kan Ek nie met julle doen wat hierdie pottebakker met die klei gedoen het nie, Israel? vra die Here. Soos klei in die pottebakker se hand, so is julle in my hand, Israel."
Selfs die slypwerk wat die Here doen in my lewe is nie noodwendig altyd lekker nie, maar dit vorm my na iets beter. Die groot geheim is net om oor te gee en Hom toe te laat. ~ Willem Botha, 26/01/2017

Onstuimigheid
Ons is nog maar 'n paar dae in die nuwe jaar, en ek is oortuig dat jou vrede al 'n paar keer gesteel is. Die oomblik toe die werk begin en die nuus weer oor die radio kom, is die meeste van ons daardeur geraak. En daarby saam kom bekommernis en onsekerheid by die werk, finansies wat druk en verhoudinge wat woel. 
Kyk wat sê hierdie teks.
Jes 26:1-4 "Daar kom 'n dag wanneer hierdie lied in Juda gesing sal word: Ons het 'n sterk stad, God beskerm ons met mure, met 'n vesting. Maak oop die poorte dat die nasie wat gered is, kan ingaan, die nasie wat aan God gehoorsaam is en wat op Hom vertrou. Gee aan hulle vrede en voorspoed, Here, want hulle het hulle vertroue op U gestel. Vertrou altyd op die Here, want die Here God is 'n veilige toevlug."
"Gee aan hulle vrede en voorspoed Here, want hulle het hulle vertroue op U gestel." Is dit nie 'n wonderlike gedagte om na te jaag nie? As jy bang is, vertrou op die Here. As jy verlore voel, vertrou op die Here. As jy ontstuimig voel, vertrou op die Here. As jy lewensmoeg is, vertrou op die Here. As jy voel of jy in 'n donker gat is, vertrou op die Here. As jy magteloos en moedeloos is, vertrou op die Here. As jy arm voel, vertrou op die Here.
Kom ons sê jy het 'n groot bottel yskoue water in jou yskas en jy is verskriklik dors en uitgeput van die hitte, dan gaan jy mos onmiddelik daarvan drink, of hoe? Hoekom sal jy nie daardie bron en uitkoms gebruik nie? Wel, hierdie Bron van krag, hierdie Een wat die uitkoms gee, hierdie Redder wat vir jou lief is, is altyd daar. Dis werklik net 'n uitroep, of 'n versugting vêr, en dis boonop 'n uitnodiging, spesifiek aan jou gerig.
Verrtrou op Hom vir daardie vrede waarna jy dalk nou smag.
Fil 4 : 7 "En die vrede van God wat alle verstand te bowe gaan, sal oor julle harte en gedagtes die wag hou in Christus Jesus." ~ Willem Botha, 24/01/2017

Nee
... is nie altyd 'n gewilde antwoord nie. Vernaam nie as ek so seker is dat ek iets binne God se wil vra nie. Ek bid dan nadat ek dinge goed oordink het, al die konsekwensies goed oorweeg het en oortuig is dat hierdie die beste uitweg is. Voorts sê die Bybel dan dat ek moet vra.
Matt 7:8-9 "Want elkeen wat vra, ontvang, en elkeen wat soek, kry, en vir elkeen wat klop, sal oopgemaak word. Watter mens onder julle sal vir sy seun ‘n klip gee as hy brood vra, of ‘n slang as hy vis vra?” 
Maar hier is die probleem. Ons besef nie dat ons 'n slang vra nie want soms lyk hy nes 'n vis.
Goddank, die Here weet wanneer Hy ons teen onsself moet beskerm. Soms gaan ons bietjie moet wag om te verstaan hoekom die Here nee gesê het en soms gaan ons nooit verstaan nie, en soms kan dit dalk voel of die Here selfs wreed is. 
Maar... dikwels gaan jy by die punt kom dat jy ongelooflik dankbaar teenoor die Here gaan wees vir daardie nee. Soos ek al menigmaal was. Dus, leer maar om geduldig te wees, God is altyd in beheer. Dankie tog! ~ Willem Botha, 19/01/2017

In die begin het God die hemel en die aarde geskep. Die aarde was heeltemal onbewoonbaar, dit was donker op die diep waters, maar die Gees van God het oor die waters gesweef. Toe het God gesê: “Laat daar lig wees!” En daar was lig. God het die twee groot ligte gemaak, die grootste om bedags te heers en die kleiner lig om snags te heers, en ook die sterre. ~ Willem Botha, 15/01/2017

Ek sien hierdie plaatjie op die strand met die woorde van Ps. 93:4 daarop: "Mightier than the thunders of many waves, mightier than the waves of the sea, the Lord on high is mighty" Om by die see te wees of enige plek in die natuur maak mens altyd meer bewus van die Here se almag en grootheid, van die wonder van die skepping, van sy betrokkenheid, van sy beheer en voorsiening. Om vir die see te kyk, hoe die golwe aanhou rol en breek en skuim, die getye kom en gaan, en hoe die water binne sy perke bly, laat mens in verwondering en bevestig dat ons God gróót is. Só groot dat Hy die waters in die holte van sy hand afgemeet het, die grond van die aarde met 'n maatbeker afgemeet het en die berge en heuwels met 'n skaal geweeg het (Jes 40:12). Só groot dat Hy jou uit die die golwe en maalkolke en gevare van die lewe kan oplig en jou in die holte van sy hand vashou. "God is always greater than all of our troubles" - so is dit gegraveer op die rots. Mag die Here vandag daai waarheid vir altyd in jou hart graveer. ~ Wilna Botha, 12/01/2017

Ons is tans by die Suidkus op die strand en ek kyk na die sand, en ek wonder, hoeveel sandkorrels is in my hand? Miskien sal ek dit getel kan kry as ek laaaaank daarmee besig bly. En hoeveel korrels is in ‘n kind se strand emmertjie? Daar is ‘n getal en dit kan dalk akkuraat getel word. Maar, hoeveel sandkorrels is in ‘n kruiwa, of op ‘n 1 ton bakkie? Nou begin hierdie syfer enorm groot word. Maar daar ís ‘n akkurate syfer. Daar moet net nie ‘n paar afwaai nie... Soos ek oor die strand kyk besef ek, hier is ‘n syfer wat “mind boggling” groot raak. Toe dink ek: die sand op al die strande op aarde, al die duine, onder die see, tussen jou paveiselstene, alles, alles bymekaargetel, HET ‘n getal. ‘n Baie akkurate getal. En God ken daardie getal. Hy weet presies hoeveel Hy gemaak het, tot op die laaste syfer. Daar is ‘n “eindige” getal. Wiskundiges van die Universiteit van Hawai reken die sand op die strande van die wêreld kan omtrent 75 X 1017 (dit is 75 met 17 nulle agter!) wees. Dit is ‘n verskriklike getal! Sewe quintillion vyf quadrillion sandkorrels – en dit net op die strande. Ons weet nie hoeveel nie.... maar God wéét!

Jy kan bereken hoeveel keer jy al gaan slaap het in die aand, omtrent hoe ver jy al met ‘n motor gery het, hoeveel koekies seep jy al opgebruik het, hoeveel happe kos jy al geneem het, hoeveel keer jou hart al geklop het, ens. ens. Ons kan dit min of meer, op ‘n gemiddeld probeer uitwerk, maar God weet die presiese getal!

Hy weet alles. Hoeveel hare is op jou kop? Dis nou as jy nog so gelukkig is om hare te hê! ‘n Gemiddelde mens het ongeveer 100 000 hare, maar dit kan soveel as 200 000 wees. Rooikoppe het die minste hare – so 90 000, en blondines soveel as 140 000. Die hoeveelheid hare wat egter op hierdie oomblik op jou kop is, is ‘n vaste getal, en God ken daardie getal! “Van julle is selfs die hare op julle kop almal getel” (Matt 10:36) Hoe hou jy daarvan? Daar is nou op hierdie oomblik ‘n syfer, en God ken daardie syfer, en die oomblik as een uitval, en die syfer verander, dan weet God dit.

Miskien moet jy net vir 'n oomblik dink hoe spesiaal jy is. Jesus weet presies vir hoeveel mense Hy aan die kruis gesterf het. Hy weet presies hoeveel gered sal wees en hoeveel nie. 
En... jou naam staan in Sy handpalms gegraveer. Dit sê seker iets, of hoe? ~ Willem Botha, 10/01/2017

2017
Op hierdie dag, 3 Januarie, is 1% van 2017 agter ons. Jy sal saamstem dat ons werklik niks van hierdie jaar kan sê nie, want sy groot donker onbekende lê nog voor ons. 
So sit ek Oujaarsaand in die kerk en tob oor die jaar wat verby is, en die jaar wat voorlê. Ek kry toe 'n beeld van 2016 in my kop wat so lyk:
(2016 - besigheid wat goed verloop het, goeie gesondheid vir ons gesin, aangename vakansie gehad en veranderinge in ons huishouding. Maar ook dood in die familie, asook die buurvrou, 'n vriend, nog 'n kennis en nog 'n paar ander mense). Dus, na 365 dae is alles agter ons en daar was 'n mengsel van goed en sleg.
Maar 2017 lyk net so (2017 - ???). Ja daar is hoop, aspirasies, planne, verwagtinge, maar ook dalk bekommernis, onsekerheid en vrees.
Nou, sou jy graag die detail van "???" wou weet? Sou jy graag wil hê God moet dit aan jou openbaar? Wil jy enige van daardie detail ken en SO die jaar ingaan? Nee my vriend, jy wil nie weet nie, liewer nie.
Daarom, as jy wil weet hoe die jaar lyk, dit lyk as volg:
(2017 - God). Dis al, heeltemal al. Al wat ons hoegenaamd verseker weet is dat Hy reeds daar is. Hy is in jou moontlike swaarkry, jou onsekerheid, jou vrese, jou blydskap, jou probleme, jou huwelik en jou werk. Hy is in ALLES, en deel van ALLES! 
Vir my is dit genoeg. Ek is bereid om hierdie onsekerheid binne te gaan en elke vreugde of probleem saam met Hom aan te pak. Ek is so jammer vir mense wie se lewe net uit (2017 - ) bestaan. Ek en jy het regtig 'n voorsprong a.g.v. die feit dat God reeds elke dag van 2017 vir ons wag.
Ek en Wilna wens vir jou en jou mense 'n geseënde en voorspoedige 2017 toe. Dankie dat ons hierdie pad saam met jou kan stap. ~ Willem Botha, 03/01/2017

Klik hier vir nog meer heuningdruppels >