Daaglikse Heuningdruppels 2023
 


... soeter as heuning, as druppels uit 'n heuningkoek (Ps 119:11)

Die daaglikse heuningdruppels is ook op ons Facebook-groep. Klik hier:

Duplisering en verspreiding word toegelaat sonder veranderinge en met verwysing na die outeur (Wilna / Willem Botha) en webruimte (www.heuning.co.za)
Lees gerus enige van ons onlangse skryfsels in die tabel hieronder .....
Nog 'n jaar is op sy rug.
Dit was goed, in alle opsigte goed, en die Here het weereens ons lewens besaai met Sy guns, ons is só dankbaar daarvoor.
En weereens is dit Kersfees. 'n Christus-fees, 'n herinnerings-fees, 'n familie-fees en hopelik vir jou ook 'n rustyd. Daar is soveel "goodwill" tussen mense in hierdie tyd, en ek sien 'n gees van vrede wat oorheersend tussen mense posvat rondom Kersfees. Ons het dit so nodig. Vir 'n rukkie is die rotresies op ys gesit en ons almal se batterye kan herlaai.
Ons wens vir ons Heuning-vriende 'n geseënde Christusfees toe. Mag die werklikheid van ons Redder se geboorte opnuut betekenis kry en ek hoop dat jy ook die voorreg het om hierdie tyd saam met jou geliefdes deur te bring.
"En die vrede van God, wat alle verstand te bowe gaan, sal julle harte en julle sinne bewaar in Christus Jesus." (FIL. 4:7)
Ons is die tweede week van Januarie terug. Mooi loop. ~ Willem & Wilna, 24/12/23
“...Jesus het tussen hulle gaan staan en vir hulle gesê: “Vrede vir julle!” Nadat Hy dit gesê het, wys Hy sy hande en sy sy vir hulle.” (Joh. 20:19-20) Ek kan nie my tema oor hande afsluit sonder om oor dié belangrikste hande te dink nie – Jesus se hande. Dié hande met die merke wat die kruis se spykers agtergelaat het. Dié hande met die bewys dat Hy die Verlosser, die Messias is, dié hande wat bewys dat Hy met sy bloed betaal het vir ons sonde – vir alles, vir altyd, vir elkeen van ons. Tomas kon nie glo sonder dat hy die merke gesien het nie. Jesus nooi hom uit: “Bring jou vinger hier en kyk na my hande en bring jou hand en steek hom in my sy; en moenie langer ongelowig wees nie, maar wees gelowig ... Gelukkig is dié wat nie gesien het nie en tog glo.” (Joh. 20:27, 29) Dit tref my net weer dat Jesus uit die dood opgestaan het en sy gebreekte bene was heel, die sweepmerke op sy lyf was weg, die snye van die doringkroon was genees, maar die merke op sy hande en in sy sy het gebly sodat dit die bewys kon wees dat die prys betaal is. Dis amper Kersfees en ons hoor weer dié boodskap van die engele:  “Vrede op aarde”. Vrede, want die Lig het na die wêreld gekom, vrede want God het Mens geword, vrede want Immanuel het tussen ons kom staan, vrede want Jesus wys vir ons sy hande. Glo jy? Gelukkig is dié wat dit nie gesien het nie en tog glo. ~ Wilna Botha, 18/12/2023
Die wêreld hou vir jou net die beste voor, en ons is dwaas genoeg om te val vir daardie dinge.
Net die mooiste dames neem aan skoonheidskompetisies deel, net die sterkste manne haal die tydskrifte met hulle bultende spiere. Net die rykstes se huise word op die leefstyl programme op die televisie ten toon gestel. Net die vinnigste en duurste motors haal die programme oor rygoed. Net die beste presteerders haal die televisie wanneer die matriekuitslae bekend gemaak word. Net die beste sportsterre haal die sport bulletins op die nuus.
Ek so word ons gebombardeer met dít wat die wêreld as suksesvol beskou. En ons is dwaas genoeg om daarna te streef, want dis die kunsmatige mooi groen grasperk anderkant die draad, daar in Mnr. en Mev. Jones se erf.
Ek lees die afgelope paar dae van twee verskillende dames wat enorme hoeveelhede geld gesteel het by hulle werkgewers, en ek is verstom oor mense se "greed". En daar wink die tronk, vir die een 50 jaar agter tralies.
Ai, ek hoop daai kortstondige rykdom was dit werd. Maar is dit nie omdat ons so gebombardeer word met die wêreldse gedagte van sukses nie?
Mense wat streef daarna om eerlik en getrou in hulle geestelike lewe te leef, word nie vereer nie. Mense wat agter die skerms werk om andere se lewens te verbeter word nie vereer nie. Ouers wat alles in hulle vermoë doen om 'n stabiele huis vir hulle gesinne te skep word nie vereer nie en mense wat getrou volgens die Here se voorskrifte leef kry geen erkenning nie. Mense wat hulleself tekort doen om ander onbaatsugtig te dien word nêrens genoem nie.
En dis alles reg so, want dít wat vir die Here gedoen word, word anders beloon.
“Ek sê vir julle: julle moet julle vyande liefhê. Doen goed aan hulle. Deel julle besittings met ander sonder om iets terug te verwag. Dan wag daar ’n groot prys op julle in die hemel. As julle vir ander mense omgee sonder om enigiets terug te verwag, is julle regtig kinders van die Allerhoogste." (Luk. 6:35 DB)
Gaan kyk gerus wat die ontsettende duur prys van "fame and fortune" is.
Hoe dwaas om te streef na dinge wat jou vernietig!
"Vertrou liewer op die Here en doen wat goed is, woon en werk rustig voort." (Ps. 37:3) ~ Willem Botha, 14/12/2023
As jy die YouVersion Bybel-app gebruik, sou jy dalk ook vandag die kennisgewing gekry het: “Vers van die jaar”. Dis die vers wat blykbaar gedurende 2023 wêreldwyd die meeste gedeel, gemerk en ge-“bookmark” is op die app. Die afgelope ruk is my tema “Hande – myne en God s’n” en die vers van die jaar pas só mooi daarby: “Moenie bang wees nie, Ek is by jou, moenie bekommerd wees nie, Ek is jou God. Ek versterk jou, Ek help jou, Ek hou jou vas, met my eie hand red Ek jou.” (Jes. 41:10) Met my eie hand red Ek jou! God se hand versterk, God se hand help, God se hand hou vas, God se hand red, God se hand dra, God se hand tel op. Daarom hoef ons nie bang, bekommerd en angstig te wees nie. Dit laat my sommer ook dink aan die skaapwagters wat groot geskrik het toe daar ’n engel in die oop veld aan hulle verskyn het. “Toe sê die engel vir hulle: Moenie bang wees nie, want kyk, ek bring vir julle ’n goeie tyding van groot blydskap wat vir die hele volk bestem is. Vandag is daar vir julle in die stad van Dawid die Verlosser gebore, Christus die Here!” (Luk. 2:10-11) Jesus het gekom. God het ons kom red. Wanneer jy bang en bekommerd is, sien in jou geestesoog dat God sy hand na jou uitsteek, dat Hy aan jou raak, jou vashou, jou help, jou lei, jou red, jou vry maak, jou nuut maak. Kersfees kom. Moenie bang wees nie, want jou Verlosser, Immanuel, Wonderbare Raadsman, Magtige God, Ewige Vader, Vredevors het gekom. Alles gaan nou anders wees! ~ Wilna Botha, 07/12/2023
Ek het 'n klompie jare gelede hierdie stukkie op Heuning geplaas, en toe ek netnou oor dit struikel het dit my opnuut weer diep getref. Hoe stukkend is hierdie wêreld nie! Hoe verskriklik dat kinders ongewens in die wêreld kom en onskuldig die slagoffers word van ouers vir wie 'n hondjie dalk 'n beter stukkie lewe sou wees as 'n kind. Kan hierdie verdorwe wêreld reggeruk word? Ek twyfel. Kan ons 'n verskil maak? Ja, sekerlik, al kan ons nie die hele wêreld regruk nie.
Hier volg die boodskap:

Oom, kan ek asseblief net 'n drukkie kry...
Hierdie woorde sal waarskynlik vir die res van my lewe by my bly. 'n Klompie jaar gelede, tydens 'n diens wat ons by die vroue gevangenes gehou het, kom 'n jong meisie (ongeveer 16 jaar oud) voor my staan en sê hierdie woorde: Oom, kan ek asseblief net 'n drukkie kry? Sy was so klein dat sy in 'n laerskool rokkie sou pas. Ek het haar so inning jammer gekry en, hoewel ons nie veronderstel was om fisies die mense aan te raak nie, het ek gebuk en haar 'n stywe druk gegee. Dis al wat sy wou hê, net een oomblik van koestering en liefdevolle aanraking. Sy was verhoorafwagtend, waarskynlik oor dwelms.
Waar het sy vandaan gekom? Het sy 'n pa geken? Of dalk baie? Wat het ander ooms met haar gedoen toe sy dalk net liefdevolle aanraking wou hê? Het sy op daardie stadium op straat gebly en het sy dalk daardie brose liggaampie beskikbaar gestel aan gewetenlose mense vir nog 'n dag se oorlewing? Ek ken ongelukkig nie daardie antwoorde nie. Ek wens so ek kon weet wat van haar geword het, en of sy ooit uit hierdie ding kon breek. Ek twyfel.
Hierdie ding het lank in my lewe by my gespook, want ek het net besef hoe verdorwe ons samelewing geword het. Wie het haar versaak? Haar ouers? Die samelewing? Wie is die samelewing? Ek en jy? In die nege jaar wat ons daar bedien het, het geen ander situasie my so diep getref nie.
Nog 'n groot vraag wat by my opgekom het, is of Jesus Sy rug op haar sou draai oor haar lewe, of is Sy genade so groot dat Hy vergewe sonder dat daar dalk vergifnis gevra word, of dat sy daaruit kon loskom? Ek glo so. Moet ons as samelewing nie dalk ook vergifnis vra nie?
Ek glo dat die Here saam met ons bedroef is oor die toestand van hierdie wêreld, maar dat Hy dalk meer van ons verwag, hoe en wat weet ek nie.
Ek vra jou vandag net twee dinge. Wees saam met my uiters dankbaar as jy, of jou kind nie in daardie toestand verval het nie. En tweedens, wees daar vir mense wat net 'n drukkie, of bietjie koestering nodig het. ~ Willem Botha, 04/12/2023
“Ek het ... jou beskerm in die skaduwee van my hand.” (Jes. 51:16) Sjoe, hier in Gauteng het ons darem maar vrek warm gekry die afgelope tyd. Mens soek die hele tyd na ’n skaduwee om in te skuil en smag na die verfrissing van ’n reënbui. Is dit nie waar dat mense se lewe ook soms so “warm” en ongemaklik, selfs onuithoubaar word nie? Jy weet nie waarheen om te hardloop vir bietjie skuiling en verligting nie, jy smag na koelte en uitkoms. Dis dan wanneer dit só verkwikkend is om te weet dat die Here se hand skaduwee gee, beskerming, veiligheid, versorging, redding. Kom skuil daar totdat daar uitkoms is, totdat sy hand jou lei tot by die groen weivelde, tot by waters waar daar vrede is, daar waar Hy jou met nuwe krag vul. “Hy laat my neerlê in groen weivelde; na waters waar rus is, lei Hy my heen.” (Ps. 23:2) en nog báie meer as dit sê vers 3: “Hy verkwik my siel”. Hy verfris my binnekant, Hy laaf my siel, Hy verkwik my gedagtes, Hy maak my nuut en die swaar laste van die lewe word gelig. “... times of refreshing will stream from the Lord’s presence.” (Hand 3:19, The Passion Translation) Kom, doop jou hart in die Here se verfrissende stroom. ~ Wilna Botha, 29/11/2023
Doen goed
Soms sê iemand iets wat groot trefkrag het, en jou denke beïnvloed, positief of negatief.
'n Rukkie gelede kuier 'n paar oud skoolvriende saam, en een persoon sê vir my die volgende toe ons ná die kuier mekaar groet. Hy sê: "Gaan doen dit wat jy moet doen, goed."
Dit het regtig 'n goeie indruk op my gemaak en ek dink nou dikwels daaraan, en dit het my nogal geïnspireer. Ek het besef hoe wyd hierdie paar woorde strek, en dat dít (of liewer ek) 'n verskil kan maak aan ander. Die volgende gedagtes het by my opgekom.
* Gaan doen jou werk goed.
* Gaan doen goed aan jou familie en vriende.
* Gaan doen goed aan mense wat jou pad kruis.
* Gaan doen goed aan die Here.
* Gaan doen goed aan jouself.
Maar toe besef ek dat die twee woorde "doen goed", op nog 'n manier gebruik kan word.
Eerstens, gaan doen dít wat jy doen, die beste wat jy kan, so goed as wat jy kan.
Tweedens, dóén goed, dóén dinge, moenie passief wees nie, wees nuttig.
Jy kan tog nie 'n verskil maak as jy niks doen nie.
"Kom ons hou aan om goed te doen. Dit is presies wat die Here wil hê. Dan sal ons op die regte tyd ons oes van Hom ontvang." (Gal. 6:9) ~ Willem Botha, 27/11/2023
“My God het sy goeie hand oor my gehou ...” (Neh. 2:8) Ai, dit raak my hart en roer aan my binneste as ek hierdie teks lees en ek wéét ek kan (en mag) dit ook sê en glo! Ek lees dit oor en oor en breek die sinnetjie vir myself só op: “Mý  God” – Hy is nie ’n God wat vêr is nie; Hy is nie onbetrokke nie; ek is belangrik vir Hom: Hy sien my, Hy weet van my, Hy ken my. “Sy goeie hand” – Hy gee vir my die beste, Hy beplan goeie dinge vir my, Hy laat alles ten goede meewerk vir my; die Bybel sê ook in Ps. 16:11 “uit U hand kom net wat mooi is.” “Oor my gehou” – sy hand vou my toe; sy teenwoordigheid is rondom en binne-in my; sy hand oor my beskerm, voorsien, help, red. “Die Here het my in die skaduwee van sy hand verberg ...” (Jes. 49:2) Is jy bang vir iets? Dink daaraan dat jou God se beskermende hand oor jou is en dat Hy jou veilig hou. Is jy siek? Sien in jou geestesoog dat jou God se hand oor jou is en dat sy hand genesing bring. Is jy alleen, eensaam, verwerp, uitgestoot, oor die hoof gesien, onregverdig behandel? Raak rustig en onthou jou God hou sy goeie hand oor jou, Hy is naby die gebrokenes (Ps. 147:3). Is jy hartseer en dit voel of jy nooit gaan ophou huil nie? Bedaar en onthou jou God se vertroostende hand is oor jou, Hy droog jou trane af en sien jou swaarkry. Voel jy moeg en kragteloos? Skep moed en onthou jou God se goeie hand is oor jou, sy genade is genoeg, Hy sê: “Ek gee nuwe krag aan dié wat moeg is, Ek maak die moedelose weer vol moed.” (Jer. 31:25) ~ Wilna Botha, 23/11/2023
Hoe verskil ons van mekaar? Dis nou ons as Christene. As ek een of ander uitlating sou maak oor sekere goed wat ek glo, hoe sou jy reageer? Indien ek nou ‘n stelling sou maak, met watter gesindheid sou jy van my verskil? Aggressief? Militaristies? Aanvallend? Oor-reageer? Of dalk met liefde, iets soos: ek respekteer jou mening, maar ek behou my eie mening. Weet jy hoe min wedergebore Christene kry dit reg? Wanneer dit by ware, egte, vaste geloofsoortuiging kom, kry min van ons dit reg om die ander se standpunt te aanvaar.
Ek gaan ‘n paar kwel-situasies noem waaroor ons Christene nogal skerp kan verskil:
1) Grootdoop vs kleindoop
2) Ses dag skepping vs ‘n ou heelal
3) Die eind tye – sal daar ‘n wegraping wees of nie?
4) Is rockmusiek boos of nie?
5) Wat mag geëet word en wat nie?
6) Sabbats onderhouding op ‘n Saterdag vs geloof viering op ‘n Sondag?
7) Gebruik van sekere rituele al dan nie
8) Mag ek Kersfees vier of nie?
9) Beeldjies, of dalk ‘n kruis in jou huis – mag dit?
10) Werk en inkopies op ‘n Sondag
11) Onderhouding van Geloftedag of nie?
12) Watter vertaling van die Bybel moet / mag ek lees?
13) Mag vrouens op die kansel kom?
Paulus het alreeds lank gelede hieroor geskryf, omdat hy gesien het hoe mense kan stry.
"Aanvaar die een wat in die geloof swak is, sonder om met hom te stry as sy opvatting van joune verskil. Een glo 'n mens mag alles eet; 'n ander is swak in die geloof, en hy eet net groente. Die een wat alles eet, moet die ander wat net groente eet, nie verag nie; en die een wat net groente eet, moet die ander wat alles eet, nie veroordeel nie, want God het hom aangeneem. Wie is jy om oor iemand anders se bediende te oordeel? Sy eie werkgewer sal oordeel of hy goed doen of nie. Maar hy sal goed doen; daarvoor sal die Here sorg. Vir die een is een dag belangriker as ander dae; vir 'n ander is alle dae ewe belangrik. Elkeen moet net in sy eie gemoed oortuig wees van sy opvatting. Die een wat 'n bepaalde dag op 'n besondere wyse hou, doen dit tot eer van die Here. Die een wat alles eet, doen dit tot eer van die Here, want hy dank God. En die een wat nie alles eet nie, doen dit tot eer van die Here, en ook hy dank God. Niemand van ons leef tog vir homself nie, en niemand sterf vir homself nie." (Rom. 14:1-7)
Jip, oor hierdie goed en nog horde meer kan ons mekaar se hare lekker trek. Nou praat ek nie van verskille tussen gelowiges en ongelowiges nie, of van Christene en ander gelowe nie, ek praat van wedergebore Christene wat verskillende sieninge handhaaf...
Kersfees is op pad en ons vier Kersfees met vreugde. Nee, ons aanbid nie 'n boom nie, en ons soek ook nie 'n god in 'n boom nie, en ons maak nie 'n heidense fees daarvan nie, maar ons koop vir mekaar geskenke en ons kuier lekker saam. En ons jubel oor Jesus se koms aarde toe.
Natuurlik respekteer ek ander wat anders voel en dis reg, want dis wat Paulus sê in hierdie skrifgedeelte.
Kom ons verskil van mekaar in liefde. Onthou: Al wat van belang is, is dat ons geloof in liefde oorgaan in dade. ~ Willem Botha, 20/11/2023
Ek het vanoggend na 'n goeie boodskap van Stefan Joubert geluister oor die eindtyd, en dit het my net weereens laat besef hoe roekeloos ons as Christene uitsprake maak sonder om twee keer te dink.
Daar gebeur mos maar gereeld dinge in die wêreld, en dan haal ons blitsig tekste aan en sê dinge wat hoegenaamd nie strook met dít waaroor daardie tekste gaan nie. Ek gaan nou op dun ys loop met hierdie volgende gedagte, maar dis maar net goed wat my laat dink.
Waar is die Covid profete van twee jaar gelede nou? Die hele idee dat die inenting die sogenaamde merk van die dier is, het soos mis voor die son verdwyn. En so ook dat dit die eindtyd sou inlui. Wag sulke mense nou vir 'n volgende insident om weer van voor af te begin met sulke uitsprake? Dit klink my die drama in Israel is nou weer 'n volgende gewilde een, net soos wat vloede en aardbewings almal opnuut laat voorspel dat die eindtyd nou een of ander dag gaan aanbreek.
En ja, natuurlik kan dit!  
Jy vra vir iemand: Hoe gaan dit met jou? Dan kom die woorde: Sjoe, die Here seën my ongelooflik, ek is vol dankbaarheid! En Hy hou my besigheid se deure oop want ek het die besigheid vir Hom gegee.
Ja ek praat ook presies so. Maar dan gebeur daar iets groot in die wêreld, dan sê van daardie selfde mense dat hulle nie kan wag dat Jesus weer moet terugkom om ons te verlos uit ons ellende nie. Maar net vanoggend was ons nog só vreeslik dankbaar!
Hoe dan nou? Moet Jesus eers weer kom voordat ons die Jesus-vreugde kan ondervind? Is ons nie 'n bietjie ondankbaar met sulke uitsprake nie? Is die lewe só sleg?
Soms grens die dinge wat ons in die naam van die Here sê dalk so effens aan geestelike hoogmoed, want ons haal tekste aan en koppel dit aan gebeure, wat al vir jare oor en oor gebeur.
Die eindtyd is naby! Ja, maar wie wil dit voorspel?
“Maar niemand weet wanneer daardie dag en uur kom nie, nie die engele in die hemel nie en ook nie die Seun nie. Net die Vader weet dit." (Mat. 24:36)
Wag maar geduldig, Hy kom weer.
En as jy haastig is, help so bietjie. Die Bybel sê almal moet hoor, so, gaan vertel! Wees gereed en hou daai lampie vol olie, maar moet dit asseblief nie doen uit vrees nie. Verlustig jou in die gedagte dat Hy ons nie vergeet het nie, want Hy kom weer. ~ Willem Botha, 13/11/2023
Waar sterf die voëltjies?
Het jy ook al gewonder waar die voëls sterf? Mens sien die hele dag voëls vlieg, in bome sit en jy hoor die vrolike klanke. Hulle sterf tog iewers, maar waar? Hoekom sien ons nie net soveel dooie voëls rondlê as wat om ons rondvlieg nie? Of is daar 'n ingebore waardigheid wat maak dat hulle eenkant gaan as hulle die lewe verlaat? Dalk is dit deel van die Here se versorging van hierdie wonderlike gevleuelde vriende van ons. Ek kry net die idee dat die Here 'n besondere liefde vir hierdie vreedsame spesie het wat Hy geskep het. Hulle is geklee in soveel prag en hulle gee vir die mens oneindige plesier.
“Is twee mossies nie vir 'n sent te koop nie? En tog sal nie een van hulle op die grond val sonder die wil van julle Vader nie. Van julle is selfs die hare op julle kop almal getel. Moet dan nie bang wees nie. Julle is meer werd as baie mossies." (Mat. 10:29-31)
Is hierdie teks nie pragtig nie? Jesus sê hier pertinent dat hulle kosbaar vir Hom is, maar jy is meer kosbaar vir Hom. Hou vir jou 'n ou eensentstuk byderhand as jy nog een kan kry, en herinner jouself dikwels aan Sy versorging as dit swaar gaan. Kyk gereeld daarna, speel met dit tussen jou vingers en weet dat God 'n belofte oor jou gemaak het. ~ Willem Botha, 06/11/2023
Saag daai saagsels.
Iemand het eendag gesê dat as jy jouself aanhoudend bekommer oor dieselfde ding, maar niks daaraan doen nie, is dit soos om hout te saag, dan die saagsels weer op te tel, weer op 'n hoop op die werkbank gooi, en dit dan verder te saag. Net so is dit om 'n wrok teen iemand te hou, en net eenvoudig nooit uit daardie drama van die verlede te breek nie, en elke liewe dag daaroor te wroeg. So loop ons met ou koeie rond wat keer op keer weer opgegrawe word, en dan stap jy met die ding om jou nek rond en jy straf net jouself. Ek sien hoe mense van my ouderdom nog steeds 'n onderwyser van ouds, of 'n korporaal in die weermag, steeds met 'n passie haat. Ai, wat 'n straf!
Ek het 'n paar jaar gelede hierdie volgende boodskap op Heuning geplaas, en plaas dit graag weer.
Baie jare gelede het my oorlede ouma haar toon baie seer gestamp en dit het geweldig gepyn. Sy het bedags haar agterkleinkind opgepas, en dan as die toon so vreeslik seer is, masseer sy die toon deur hom op en af te buig. Dan huil sy van die pyn, en die dogtertjie huil kliphard saam. My ma het eendag haar voet neergesit en aangedring dat sy my ouma dokter toe neem. Nadat die dokter die toon bevoel en bekyk het, was sy bevinding eenvoudig. "Tannie, jou toon is gebreek, en sodra die toon wil aangroei, breek jy hom weer met die gebuigery". Nodeloos om te sê was die toon vinnig daarna weer reg en pynloos, toe sy hom net uitlos.
Ek sien hoe mense hierdie selfde goed aan hulleself doen met bitterheid wat gekoester en vertroetel word. Mense gaan deur die pyn en vernedering van egskeiding of ander hartseer situasies, en beweeg net nie weer vorentoe nie. As mens vir ewig die hartseer stories deel met ander, kan genesing net eenvoudig nie plaasvind nie. Elke keer wat die stories gedeel word, word daai toon weer gebreek. Dit alles net deur die persoon self wat alreeds soveel seer beleef. Die aanhoorders wil gewoonlik in elk geval nie die verhale hoor nie, want dan moet hulle kant kies, en daar word dan verwag dat hulle die “skuldige” party moet veroordeel.
Bitterheid is dodelik vir elke enkele party. Dis nie die moeite werd nie.
“Sorg dat niemand van die genade van God afvallig word nie. Sorg dat daar nie verbittering soos 'n wortel uitspruit, moeilikheid veroorsaak en baie besmet nie." (Heb. 12:15)
Wat 'n mors van tyd om saagsels te saag! ~ Willem Botha, 06/11/2023
“Die een sê: “Ek behoort aan die Here,” ... die ander sal op sy hand skryf: Die Here S’n ...” (Jes. 44:5) Het jy ook al goed op jou hand geskryf sodat jy dit nie vergeet nie? ’n Adres, ’n naam, ’n datum, ’n bedrag, of dalk selfs jou inkopielysie? Toe ek op skool was, het ons sommer ons huiswerk op ons hand geskryf. En dan was jy in die moeilikheid as jy jou hande was! As ek hierdie teks in Jes. 44:5 lees, wil ek sommer my “permanent marker” gryp en op my hande skryf: die Here S’n. Net sodat ek die hele tyd daaraan herinner kan word dat ek aan Hom behoort. Net sodat ek die hele tyd daaraan herinner kan word dat Hy belangriker is as enige iets. Dat ek nie sonder Hom ’n dag kan ingaan nie. Dat ek nie sonder Hom ’n besluit kan neem nie. Dat ek sonder Hom nie kans sien vir uitdagings en probleme nie. Ek wil enige tyd na my hande kan kyk en onthou: Ek behoort aan die Here. Soms kyk ek egter na my hande en dan staan daar: sondig. skuldig. alleen. hartseer. raadop. bang. rigtingloos. moeg. teleurgesteld. Maar dan sien ek die Here se hand bo-oor myne en Hy sê: “Ek sal jou nie vergeet nie. Ek het jou naam in my handpalms gegraveer.” (Jes. 49:15-16). Dan sien ek Jesus se hande met spykermerke en ek wéét: “Deur sý wonde het daar vir ons genesing gekom.” (Jes. 53:5) Ek is die Here S’n! ~ Wilna Botha  , 30/10/2023
"Daarom, sodat ek nie hoogmoedig sou wees nie, is daar vir my 'n doring in die vlees gegee, 'n boodskapper van Satan om my met vuiste te slaan." (2 Kor. 12:7)
"Of besef julle nie dat julle liggaam 'n tempel van die Heilige Gees is nie? Julle het die Heilige Gees, wat in julle woon, van God ontvang, en julle behoort nie aan julleself nie." (1 Kor. 6:19)
Boks is 'n verskriklike sport, en hoewel ek nogal daarvan hou om daarna te kyk, besef ek soms dis eintlik barbaars, soos baie ander kontak sportsoorte. Ouens slaan mekaar in breinskade in, hulle verwoes mekaar se niere en hulle laat hulle vuiste met soveel geweld op mekaar neer reën, dat hulle liggame werklik bykans tot stilstand kom. Hoekom op aarde sal mens dit wil doen, en jouself daaraan blootstel? As jy na sommige van hierdie destydse kampioene luister, kan jy hoor dat daar onherstelbare skade is.
En so vertel Paulus dat dit voel of 'n boodskapper van Satan hom met vuiste slaan. Ons weet nie wat die doring in sy vlees was nie, maar daar word bespiegel dat dit iets met sy gesondheid te doen het. Hy verduidelik dat dit voel of hy pap geslaan word.
Ek dink baie mense het 'n soortgelyke doring in die vlees, wat onder andere verband hou met hulle gesondheid. Toe dink ek so by myself dat vele van ons (JA EK OOK) vir die Here wil kom vra of Hy nie hierdie vuishoue kan keer nie. Net om te besef dat die Here dalk vir ons wil sê dat daar niemand anders saam met ons in hierdie bokskryt is nie, dis net onsself. Ons het self hierdie handskoene aan en vernietig onsself met ons eie hande. Ons is ons eie grootste teenstanders. Ons slaan ons eie liggame pimpel en pers deur dinge te doen wat ons liggame vernietig. Ons sluk goed in en suig goed in wat ons eie organe vernietig en doen min dinge om hierdie tempel van die Heilige Gees te onderhou en in 'n goeie toestand te hou. Hierdie is ook nie net fisiese goed wat ons inneem nie, dis ook 'n probleem as onsself (en ja, ons kinders ook), onder geweldige onnodige druk sit. En dan begin hierdie bose kringloop, want dan sluk ons dinge in wat die een probleem moet oplos, maar 'n hordes ander word geskep deur "self inflicted" wonde. 'n Pilletjie vir elke probleem wat nooit daar moes wees nie.
Toe 'n vriend onlangs aan keelkanker oorlede is, en 'n ander een 'n baie groot operasie moes ondergaan oor dieselfde onderliggende probleem, het ek net besef hoe dit een of ander tyd net skielik te laat is. Dit kom soos 'n dief in die nag. Ons as Christene veroordeel mekaar so maklik oor allerlei goed, maar in dieselfde asem is ons skuldig aan baie groter dinge. JA EK OOK!!!
My liggaam is 'n tempel van God, dis die meganisme wat my siel huisves terwyl ek op aarde is, en dit moet opgepas word. Ons almal weet wat die regte dinge is om te doen, maar ons doen dit nie.
" As iemand weet wat die regte ding is om te doen en hy doen dit nie, is dit sonde." (Jak. 4:17) ~ Willem Botha, 25/10/2023

“Put your hand in the hand of the Man who stilled the water; Put your hand in the hand of the Man who calmed the sea;  Take a look at yourself, and you can look at others differently; Put your hand in the hand of the Man from Galilee ...” Só klink die refrein van ’n ou bekende liedjie. Eenvoudige woorde met ’n ongelooflike uitnodiging: kom, sit jou hand in die Here se hand. Dié Een wat mag het oor die see, dié Een wat ’n storm kan laat bedaar met net ’n paar woorde: “Hou op! Bedaar!” (Mark 4:39), dis die Een wat sy hand vandag na ons toe uitsteek en sê: “Niemand sal julle uit my hand ruk nie.” (Joh. 10:28) Is jy bang? Is jou geloof te klein? Is jy oorweldig? Is die golwe rondom jou angswekkend? Lyk dit asof die storm al hoe erger word? Sit jou hand in Sy hand! Net soos Petrus gedoen het toe hy begin sink het en bang geword het. “Maar toe Petrus sien hoe sterk is die wind, het hy bang geword en begin sink en uitgeroep: Here, red my! Dadelik het Jesus sy hand uitgesteek, hom gegryp en vir hom gesê: Kleingelowige, waarom het jy begin twyfel?” (Matt. 14:30-31) Ek hoop jy het ook die woord “dadelik” raakgesien? “Van bo af het Hy sy hand uitgestrek en my gegryp, my uit geweldige waters uitgelig.” (Ps. 18:17) Dis die getuienis van baie mense, dit kan jóú getuienis ook wees. Put you hand in the hand ... ~ Wilna Botha, 18/10/2023
My daaglikse brood
Ons werk vir onsself en soos jy weet maak ons besigheidsmanne baie meer geld as wat ons kan droom om op te gebruik!
Nou ja, dis natuurlik nie waar nie en hierdie tipe lewe hou jou maar soms op jou knieë. Daar kom tye van brood alleen, maar soms is daar selfs 'n bietjie jêm op die brood. Ek het al by tye ernstig gebid vir ons daaglikse brood, soos in die Onse Vader gebed.
Luk 11:3 "Gee ons elke dag ons daaglikse brood..."
Dan het daar skaamte oor my gekom as ek besef ek het BAIE meer het as net dit. Daar was nog nooit in my lewe nét brood, of nét pampoen, of nét rys of nét koue water in die huis nie.
Jy sien, hierdie belofte sê dat ons elke dag op brood kan staatmaak (soos die manna van ouds), maar die jêm is 'n groot bederf. Brood is die wêreld se stapelvoedsel, maar meer as dít is vir min mense in die wêreld beskore. Ongelukkig meet ons die Here se seën aan die hoogte van die lekkernye wat bo-op geplak word. Is die basiese nog goed genoeg? Net die basiese? Kry ons dit reg om die surplus weg te gee vir die wie nie eers die basiese het nie? En indien wel, hou ons die brood of hou ons die jêm?
Hoe dikwels hoor jy nie van hierdie onbesonne predikers (soos vele van hierdie TV predikers) wat vertel dat ware Christene nie in armoede leef nie, want dan is jou geloof maar klein. Nogal vreemd dat hierdie predikers miljoene uit hoopvolle mense wat swaarkry tap, maar wie se lewe nie dan verander nie, maar dan gee hulle tog maar gedwee hulle laaste sente. Nee, nie vir die Here nie, vir hierdie geestelike swendelaars. Ai, wat mense nie sal doen om meer en meer te kry nie.
Maar dalk sit jy ook vandag met so 'n bietjie te min, en begeer jy bietjie meer.
As jy weer hierdie woorde bid: "Gee ons elke dag ons daaglikse brood..", dink net hoeveel het jy regtig. ~ Willem Botha, 16/10/2023
"Net so min as wat jy kan verstaan hoe gees en liggaam by mekaar uitkom in die skoot van 'n swanger vrou, net so min kan jy die werk van God verstaan. Hy doen dit alles." (Pred 11:5)
Ai, is ons nie maar almal deurentyd op soek na die betekenis van God se aksies nie? Ons was die naweek weer by 'n tehuis vir gestremdes waar ons dienste hou en in die betrokke tehuis is daar mense met verskillende vorme van gestremdhede. Eendag het ek en my seun daaroor gepraat en hy vra die volgende vraag: "Wat het ek gedoen om nie in daardie situasie te wees nie?"
Daar is geen antwoord op daardie vraag nie. Hoekom word goeie mense siek en soveel "slegtes" leef so goed? Hoekom begin die Kerk van die Here so sukkel? Hoekom word onskuldige kinders die slagoffers van gebroke huwelike? Hoekom beleef ek genade wat totaal onverdiend is?
Hierdie teks sê baie duidelik dat ons nie die werk van God verstaan nie. Ongelukkig is daar soveel mense wat graag vir jou goedkoop en nuttelose antwoorde gee in tye dat jy verward is. Daar is mense wat praat asof hulle elke ding wat God doen, verstaan en kan uitpluis. Daar is selfs mense wat graag in sulke omstandighede wil "profeteer" daaroor, maar so dikwels kom dit nie van God af nie.
Ek wil eerder maar net aanvaar dat God in beheer is, al lyk dit nie vir my so nie. As ek terugkyk in my lewe, het die Here nog nie een enkele fout gemaak nie, alhoewel ek soms so gedink het in daardie onaangename omstandighede.
Hierdie teks eindig met "Hy doen dit alles.." Dit beteken: Hy is in beheer. ~ Willem Botha, 09/10/2023
"Wat maak jy hier?", vra die hoof engel by die poorte na die hemel vir 'n man.
"Ek weet nie, ek kan nie glo ek is hier nie."
“Het jy ooit getrou Bybelstudie gedoen?”, vra die engel.
"Nee, ek het nie geweet hoe nie en ek het in elk geval nie geweet waarin om te glo nie."
“Het jy ten minste 'n skoon lewe gelei, en was jy barmhartig teenoor jou medemens?”, vra die engel.
"Nee, ek was van jonk af rebels en 'n krimineel. Ek het selfs ook moord gepleeg."
“Het jy jou geloof bely en vir Jesus as jou Saligmaker aangeneem?”, wil die engel weet.
"Nee, daar was nie tyd nie, ek was sterwend, ek was immers besig om langs Jesus aan die kruis te sterf."
“Het jy vergifnis vir al jou slagoffers gevra?”, vra die engel.
"Nee, ek het net in my laaste oomblikke besef hoe verlore, leeg en eensaam ek was. Ek het net gevra dat Hy aan my moet dink as Hy in die paradys kom".
“Hoekom is jy dan hier, en hoekom dink jy hoort jy hier?”, wil die engel weet.
"Ek glo nie ek hoort hier nie. Jesus het my hiernatoe gestuur, en ek het dit hoegenaamd nie verwag nie. Miskien is dít die definisie van genade". ~ Willem Botha, 05/10/2023
Teleurgesteld... In God.
As ek vir jou sou vra of jy al ooit teleurgesteld was in God, sou jy waarskynlik nie die moed hê om dit te erken nie, want dit klink darem nie reg nie. Maar diep binne jou is dit dalk 'n ander storie. Daardie sake waaroor jy so lank en ernstig gebid het, of daardie iets wat jy so begeer het, of daardie tyd toe jy oor 'n siekte toestand vir jouself, of iemand anders, gebid het, en die Here se antwoord was nee.
Ons as mense word dikwels deur ons medemens, of lewensmaat of vriende teleurgestel.
Ons word egter eintlik net teleurgestel omdat iets of iemand (of Iemand) nie aan ons verwagtinge voldoen nie. As jy vir my sê dat die regering jou teleurstel, is dit maar eintlik jou eie skuld, want jy verwag tog nie regtig goeie prestasie van hulle af nie. Jy moet maar jou verwagtinge so bietjie (afwaarts) aanpas.
Maar die Here is mos maar 'n ander saak, of hoe? Hy is immers God, en die Bybel wemel van beloftes, en Hy sê tog op vele plekke in die Bybel dat jy heeltemal veilig is by Hom en dat Hy net die beste vir jou beplan. Natuurlik is dit waar, maar dis nie al wat waar is nie. Daardie een persoon wat langs Jesus aan die kruis gehang het, het vir Jesus herinner dat Hy almagtig is, en hy wou ook so bietjie deel aan die voorregte wat met die Here se almag saamgaan, maar die Here se antwoord was nee.
Nou ja, die Bybel skep vir ons goeie verwagtinge oor God se liefde en sy almag, maar dis wanneer ons dink dat Hy ons iets skuld, dat teleurstelling ons oorrompel. Voorspoedteologie is 'n groot sondebok as dit kom by ons verwagtinge van die Here. Dis dodelik! 'n Vriend vertel lank gelede dat Hy nie verstaan hoekom sulke slegte goed hom tref nie, want Hy leef voluit vir die Here en doen so baie vir ander. Hy het selfs 'n motor vir iemand geskenk toe hy 'n ander motor koop. Hy was werklik teleurgesteld.
Onthou jy wat met Johannes die doper gebeur het? Hulle het sy kop afgekap en op 'n skinkbord vir Herodes se vrou gebring. Johannes, dié Johannes wat vir Jesus gedoop het, en wat Jesus se vriend was, is wreed vermoor en Jesus het dit nie gekeer nie. Moses het nooit die beloofde land gesien nie, al die dissipels is vir hulle geloof vermoor, en Jesus self is gekruisig. Dit klink nogal of ons weer moet dink oor wat ons van die Here verwag. Ons sál soms teleurgesteld wees in Hom, maar Hy weet beter en is steeds in beheer.
Maar dalk sal jy met my saamstem dat jy al HORDES meer kere in absoluut verwondering en verbasing gekyk het na waarmee Hy besig is. Ek was baie, baie meer kere verbaas as teleurgesteld, ek het baie meer kere gesien dat Hy vir my guns gee wat baie meer was as wat ek kon bid of dink.
Wat verwag ek van Hom? Om net die almagtige God te wees en handel soos wat Hy die beste weet.
Dis genoeg. ~ Willem Botha, 02/10/2023
“All of these lines across my face, tell me the story of who I am...” – só klink die woorde uit die liedjie: “The Story”.  Vandag wil ek die woorde bietjie verdraai na: all of these lines across my hands, tell me the story of who I am. As jy vandag na jou hande kyk, sien jy dalk dat jou hand 27 beentjies, 29 gewrigte, ten minste 123 ligamente, 34 spiertjies, 48 senuwees en 30 are het? Hande wat vertel hoe ongelooflik kompleks ’n mens se liggaam geskape is. Hande wat vertel dat God hulle aanmekaar geweef het. Sien jy dalk hande wat mooi versorg is, sonder merkies, sonder snye, sonder sonskade? Hande wat vertel die lewe was maklik en sonder terugslae. Of dalk sien jy hande met eelte van harde werk, hande vol olie, of verf, of meel, of grond? Hande wat vol plooitjies en are is omdat hulle nie meer jonk is nie, hande wat krom is van artritis, hande wat letsels het? Hande wat vertel die lewe het sy draaie gemaak. Dalk lyk die lyne op jou hande nie baie mooi nie en is jy skaam vir jou hande. Dalk vertel jou hande dat hulle iemand seergemaak of iets afgebreek het. Watter storie jou hande ook al vertel, beleef vandag dat die Here sê: “Ek is die Here jou God, Ek vat jou hand, Ek sê vir jou: Moenie bang wees nie, Ék help jou.” (Jes. 41:13) Watter storie jou hande ook al vertel, hoor vandag dat die Here sê: “Ek sal hulle versorg en beskerm. Niemand sal hulle uit my versorgende hand ruk nie. Daarvoor sal Ek self sorg.” (Joh. 10:28, Die Boodskap) Mag dít deel wees van jou hande se storie. ~ Wilna Botha, 28/09/2023
Mors 'n bietjie tyd.
"Elke ding het sy vaste tyd, elke ding in hierdie wêreld het sy tyd..." (Pred 3:1)
So sê die Prediker. Maar vir jou en my is dit gewoonlik nie waar nie, want ons spandeer te veel tyd aan OORLEEF, en te min aan LEEF. Weet jy vriend, elke dag wat jy verloor het om iets lekkers saam met jou geliefdes te doen, is verlore, vermorste tyd. Jy kan daardie dag se geleenthede nooit ooit weer terugkry nie.
Gaan "mors" 'n bietjie tyd. Gaan fliek, gaan 'n naweek weg (al is jy brandarm), gaan drink 'n koffie in 'n koffiewinkel, gaan loop in 'n parkie, gaan op 'n foto uitstappie, al is dit met 'n selfoon, gaan asem bietjie vroegoggend lug in. Gaan mors daai tyd, voordat dit heeltemal vermors is.
Nogal vreemd hoe 'n horlosie werk. As jy sit en kyk na daardie sekondewyser, wys hy vir jou met eentonige reëlmaat dat elke oomblik wat verby is, vir EWIG verby is. Jy kan hom nie vashou nie, of terugdraai nie, of stop nie. Dis eintlik 'n wrede stukkie tegnologie daai, en jy is hoegenaamd nie opgewasse teen hom nie. Al wat jy kan doen is om sy funksie optimaal te gebruik. Dus, mors jou "tyd" op nuttige goed, terwyl jy nog kan. ~ Willem Botha, 25/09/2023
“Daarby moet julle altyd geloof as skild in die hand hê, want daarmee sal julle al die brandpyle van die Bose kan afweer.” (Ef. 6:16). Dis nou iets wat ek graag in my hand wil hê en waaraan ek verbete wil vasklou. Daai skild van geloof. Die skild wat na alle kante toe kan keer dat ek versoek, verlei en verneder word. Die skild wat enige twyfel in God se beloftes en in Jesus se vergifnis en verlossing sal keer. Die skild wat my sal herinner dat ek sterker is as wat ek dink, dat ek meer kan verduur en vermag en verdra as wat ek in my menslike swakheid kan dink. Die skild wat my sal herinner dat God my eintlike skild is: “Die Here is my rots, my skuilplek en my redder, my God, my rots, by wie ek skuil, my skild en sterk verlosser, my veilige vesting.” (Ps. 18:3). En ás my geloof-skild my dalk in die steek laat, sal ek, soos Petrus, uitroep: “Here, red my!” En Jesus sal vir seker sy hand uitsteek en in liefde en genade my persoonlike geloof-skild word:  “Dadelik het Jesus sy hand uitgesteek, hom gegryp en vir hom gesê: “Kleingelowige, waarom het jy begin twyfel?” (Matt. 14:31) Dan sal ek Sy hand vasgryp en saam met Hom op die water loop. ~ Wilna Botha, 21/09/2023
Nou wonder ek, waar op aarde moet die aartappel nou in die kooi gesit word? By die voete? Onder die kussing? Dit lol as hy by die voete lê, want as jy omdraai rol hy saam. Maar wat, as dit werk werk dit. Natuurlik vir seer bene, rustelose bene, en stywe "joints". En glo my dit werk regtig, maar net solank as jy dit glo.
Ek praat natuurlik van die sogenaamde Afrika-aartappel wat so klomp jare gelede vir 'n klomp bejaardes reuse verligting gegee het, maar toe raak die geloof daarin op. Of dalk het die aartappel net vrot geword. Jiggg...!
Jy het seker al gehoor van die woord "Placebo", oftewel 'n pil of een of ander medikasie wat hoofsaaklik in die toets van medisyne gebruik word. Die regte pil word vir een groep gegee en die Placebo vir 'n kontrole groep, maar niemand weet wat hulle gekry het nie, dan vergelyk hulle die werking van die medikasie. Baie mense reken jou vitamiene aanvulling beteken niks, maar dit "werk" vir jou solank jy dit glo, soos tonne self-help medikasie wat jy deesdae sommer aanlyn koop. Toe my ouers ouer geword het, het hulle en hulle vriende flink mekaar se medisyne gedrink want dit werk (blykbaar) soos 'n bom. Vir 'n rukkie...
Maar ai, my pa was baie ondeund. Hulle huishulp wou kort-kort 'n hoofpyn pil hê, toe gee my pa vir haar van sy prostaat medikasie, en dit maak jou urine grasgroen. Sy het sekerlik eensklaps gesond geword, want sy het nooit weer 'n pil gevra nie.
Nou wonder ek so by myself, kry ons nie ook maar vertroosting, of hoop, of vrede net omdat ons glo dat dit werk nie? Werk dit regtig? Sê nou daar is nie 'n God nie, maak dit regtig saak? Want as ons godsdiens maar net "werk" soos 'n Placebo, dan kan ons dit maar net gebruik, of selfs misbruik om goed te voel, maar daar is niks konkreet nie, en ons hoef ook nie bekommerd te wees oor die konsekwensies van sonde nie. Soos 'n Placebo wat geen werkende bestanddeel bevat nie.
Dink gou bietjie hieroor, want wat sal jy sê as iemand jou met hierdie vraag konfronteer? Ons kan mos in elk geval nie bewys dat die Here bestaan of leef nie. Nou ja, as ek nou hierdie boodskap hiermee afgesluit het, sal jy seker bitter teleurgesteld wees in dít wat ek en Wilna doen.
Waar los dit my?
Dis maklik, 'n Placebo werk nie lank nie, en die aartappel beland seker nie vir altyd in die kooi nie, en 'n Placebo het nie blywende genesingskrag nie, maar die boodskap van die Bybel het elke enkele toets en aanslag weerstaan, en geen mens kan die boodskap van die verlossing deur Jesus verkeerd bewys nie. Dít wat die Heilige Gees in jou lewe doen, is lewendig en kragtig en daardie werking word oor en oor wêreldwyd dieselfde ervaar deur mense. Ja, mense verloor hulle geloof, maar die teendeel is duisend maal meer sigbaar in mense. As daar nie 'n God is nie, moet ek en jy reuse dwase wees, maar ons weet, omdat ons weet, dat ons met die Waarheid besig is. Wil jy bewyse sien dat daar 'n God en 'n Skepper is? Google gerus beelde van die nuwe James Webb ruimte teleskoop, en as iemand glo dat daardie prag en volmaaktheid en "splendor" sommer toevallig ontstaan het, dan sal jy gou agterkom wie regtig die dwaas is.
Ek sluit af met 'n teks waarvan ek sommer baie hou.
" 'n Vrolike mens is 'n gesonde mens, 'n neerslagtige mens raak uitgeput." (Spr. 17:22)
Placebo? Nee, ek het hierdie al oor en oor raakgesien en self beleef. Positiewe mense se liggame reageer fisies op 'n vrolike gesindheid. Jy kan dit maar gaan toets. ~ Willem Botha, 13/09/2023
En dan was daar Pilatus se hande. Dié hande wat hy in onskuld kom was het voor almal, om homself te probeer verontskuldig, om hom te probeer distansieer van die besluit wat hy gemaak het om Jesus uit te lewer om gekruisig te word. “Toe Pilatus sien dit help niks nie en dat daar eerder 'n oproer kom, het hy water gevat en voor die skare sy hande gewas en gesê: ‘Ek is onskuldig aan die bloed van hierdie man. Dit is julle verantwoordelikheid.’” (Matt. 27:24) Was jy ook al kwaad vir Pilatus oor dié handewas? Hoe kón hy dit toelaat dat die skare hom ompraat om Jesus te laat kruisig! Ek lees hierdie êrens: “Vir ons skulde, het God lemand gestuur Wie se hande bou, koester, help, uitdeel, uitnooi, omgee, beskerm en seën. Al die ander hande het Hom gevat en met ruwe spykers deur sy hande, Hom aan ’n kruis laat hang: Pilatus se hande, soldate se hande, ruwe hande, Skrifgeleerdes en priesters se hande, verraaiers se hande, ons hande, my hande ...”  Pilatus was sy hande en Jesus word gekruisig. En dis goed so. Pilatus se handewas het as’t ware God se plan van verlossing tot sy hoogtepunt gebring: Jesus word in óns plek gestraf, geslaan, gespoeg, gespot en gekruisig. Jesus vat óns straf. Sy bloed bring versoening en verlossing vir ons. Pilatus se handewas bring mee dat óns nou met skoon hande voor God kan staan. “... laat ons tot God nader met 'n opregte hart en met volle geloofsekerheid. Ons harte is immers gereinig van 'n skuldige gewete, en ons liggame is gewas met skoon water.” (Heb. 10:22) ~ Wilna Botha, 12/09/2023
If you can't beat them, join them....
Nogal iets wat mens sommer net wil oorweeg, of hoe?
Hoekom die "reguit" pad probeer stap, terwyl dit eintlik maar net altyd 'n moeilike, opdraande pad is? As jy kyk hoe mense wat mag het net eenvoudig doen wat hulle wil, lyk die reguit pad sommer net onsinnig.
As ons vorige "Number One" net mooi niks oorkom na staatskaping en tonne bedrogsake nie, hoekom moet ek probeer om binne die wet te bly? Die howe is in so 'n toestand, en soveel mense kom (soms letterlik) met moord weg, dat ek nie meer vertroue het in die regstelsel nie. Die inwoners van bykans al die "townships" betaal geen elektrisiteit nie, maar ek en jy staan daarvoor pa. En waag jy net om 'n week laat te betaal en jou krag is af! Wat het gebeur met die grootbaas van Steinhoff, nadat biljoene rande weg is uit mense se pensioenfondse en ander beleggings? Net mooi niks!
Die reg beskerm die krimineel meer as die eerlike ou, en dit maak nie sin nie. Hoekom nie ook maar saam deelneem aan alles wat verkeerd is nie? Wat gebeur met soveel mense wat net eenvoudig nie hulle werk doen nie, terwyl hulle nie eers daarvoor verantwoordbaar gehou word nie?
Hoekom sal ek en jy nie ook maar hierdie volgende teks misbruik en totaal buite sy konteks uitleef nie?
"Ek het tot die insig gekom dat daar vir 'n mens niks beter is nie as om vrolik te wees en die goeie van die lewe te geniet." (Pred. 3:12)
Lekker, kom ons gaan jol en baklei en verneuk en maak marakkas en gooi sommer alles oorboord. Hoekom dan nou nie?
Wel, die antwoord is eenvoudig. Hierdie lewenstyl gaan vir jou geen greintjie geluk bring nie, want jy is net eenvoudig nie so nie. Jy is nie so "ge-wire" nie, want diep binne-in jou, is daar waardes vasgevang en in jou ingebou wat teen hierdie oneerlike, losbandige lewe veg. En al word jy kwaad omdat ander hiermee wegkom en oënskynlik die lewe geniet, wil jy nie regtig so leef nie, want jy kan geen ander ordentlike mens in die oë kyk as jy so laag gedaal het nie.
En waar pas die Here hierby in? Jy wil, as kind van God, eerder die Here se seën op jou lewe hê, want daar is groot beloning daarin. Ja, definitief as jy met 'n ewigheidsperspektief daarna kyk, maar ook as jy besef dat dit tog beter is as jy probeer om 'n goeie lewe te lei. Jy wil nie 'n rampokker wees nie, en jy wil mos nie hê mense moet jou verag nie, en jy wil mos nie skaam voor die Here staan nie. Natuurlik sukkel ons om sondeloos te leef, maar die Here ken mos ons harte en wil ons elke dag weer help om ons pad suiwer te hou.
Ons bly in moeilike omstandighede in ons land en die uitdagings raak al hoe groter, maar dis steeds nie groter as ons Koning nie. Gaan toets gerus aan watter een van die volgende waardes jy wil vashou, en jy sal sien die antwoord spreek vanself.
"Die praktyke van die sondige natuur is algemeen bekend: onsedelikheid, onreinheid, losbandigheid, afgodsdiens, towery, vyandskap, haat, naywer, woede, rusies, verdeeldheid, skeuring, afguns, dronkenskap, uitspattigheid en al dergelike dinge. Ek waarsku julle soos ek julle al vroeër gewaarsku het: Wie hom aan sulke dinge skuldig maak, sal nie die koninkryk van God as erfenis verkry nie.
Die vrug van die Gees, daarteenoor, is liefde, vreugde, vrede, geduld, vriendelikheid, goedhartigheid, getrouheid, nederigheid en selfbeheersing. Teen sulke dinge het die wet niks nie." (Gal. 5:19-23) ~ Willem Botha, 11/09/2023

Daar is ’n paar hande in die Bybel in wie se posisie ek glad nie sou wou wees nie. Kyk bv. na Adam en Eva se hande van ongehoorsaamheid. ’n Hand wat uitgesteek is om die verbode vrug te neem. ’n Hand wat hulle uitgesteek het omdat hulle verlei is, terwyl hulle die waarheid gewéét het. ’n Hand wat hulle uitgesteek het omdat hulle opstandig was teen God se opdrag om hulle daarvan te weerhou. Daar was immers baie ander vrugte wat die hand kon pluk, maar nee, die hand doen sy eie ding en word uit die paradys uitgedryf! “Toe het die Here God gesê: “Die mens het nou soos een van Ons geword deurdat hy alles kan ken. As hy nou maar net nie sy hand uitsteek en die vrug van die boom van die lewe vat en daarvan eet en altyd bly lewe nie!”” (Gen. 3:22)
Dan is daar Kain se hand. Die hand van afguns wat sy broer om die lewe gebring het. Die hand wat in woede besluit het die Here is onregverdig. Die hand wat gewaarsku is: “As jy nie goeddoen nie – die sonde wag jou in daarbuite en hy wil jou in sy mag kry. Maar jy moet oor hom heers.” (Gen. 4:7) Die hand moes selfbeheersing aan die dag lê, maar nee, die hand doen sy eie ding en word vervloek!  “Vervloek is jy dan nou, verban van die grond af wat gretig die bloed van jou broer uit jou hand opgeslurp het.” (Gen. 4:11)
En dan is daar Judas se hand. Die hand van verraad wat saam met Jesus se hand brood in die skottel ingesteek het. Die hand wat wonderwerke gesien het en teenwoordig was by al Jesus se lering, daai hand was eintlik vir goeie dade bestem. Maar nee, die hand doen sy eie ding en wys die Messias uit as die een wat gekruisig moet word.  “Maar kyk, die hand van die man wat My verraai, is saam met Myne hier op die tafel.” (Matt. 22:21)
Ai, dis geen wonder dat Jesus gesê het: ““As jou hand jou van My afvallig laat word, kap hom af! Dit is beter dat jy vermink in die lewe ingaan as dat jy altwee jou hande het en na die hel toe gaan, in die onblusbare vuur.” (Mark 9:43)
Kom ons pas ons hande op! ~ Wilna Botha, 07/09/2023
"Moenie op mense staatmaak nie: hulle blaas so maklik die laaste asem uit. Hulle is min werd." (Jes. 2:22)
Ons word soms baie omgekrap oor dinge wat skeef loop, want ons kyk mos na mense. Ons is teleurgesteld as iemand vir wie ons vertrou en lief is, van ons skinder. Want ons kyk mos na mense. Ons staan soms verstom oor die uiterste swak diens wat ons van mense kry, mense wat betaal word, maar dikwels totaal onbevoeg is vir hulle werk. Want ons kyk mos na mense. Ons word teleurgestel deur medegelowiges in die kerk, en selfs deur leraars. Want ons kyk mos na mense. Ons word kwaad op die pad vir ander pad gebruikers omdat hulle ons tyd mors en soos idiote bestuur. Want ons kyk mos na mense. Ons raak moedeloos vir alles wat in die politiek aan die gang is, en ons sien hoe alles wegsink in hierdie put van dryfsand. Want ons kyk mos na mense.
Maar dis nie almal nie, want daar is ook wonderlike mense, maar ons hou meer daarvan om smartvrate te wees, en dan kyk ons net na die verkeerde mense.
Daar is polisiemanne wat regtig alles in hulle vermoë doen om jou en my veilig te hou. Maar ons kyk hulle mis.
Wilna was onlangs in die hospitaal vir 'n prosedure en 'n wonderlike suster het haar met soveel deernis versorg. Terwyl sy elke aand bitter laat by die huis kom, met 'n taxi, en daar is vele van hulle. Maar ons kyk hulle mis.
Daar is soveel mense wat uit hulle pad gaan om vir jou goeie diens te gee, maar ons konsentreer nie op hulle nie. Ons kyk hulle mis.
Wat my laat wonder wat mense van my dink, en wat sien hulle by my raak? Hoe lekker sou dit wees as ons vir Jesus in mekaar sou raaksien.
Ons het maar almal voete van klei, maar ons moet maar probeer.
Dalk, net dalk, as ons elke dag 'n bietjie beter word as die vorige dag, sal ons 'n verskil maak. ~ Willem Botha, 06/09/2023

Wat het jy in jou hand? Dalk klou jy vas aan ’n handvol  bitterheid en onvergewensgesindheid? Ek lees vandag dié aanhaling: “All the art of living lies in a fine mingling of letting go and holding on.” Daar kom ’n tyd wat ’n mens jou hand moet oopmaak en daai bitterheid laat gaan. Ons het die naweek in Magoebaskloof in so ’n inheemse woud gestap. Daar het ek ’n reuse boom gesien wat omgeval het. Mens kon duidelik die rede sien waarom hy omgeval het – die binnekant van die stam was uitgehol en opgevreet deur een of ander swam of gogga. Dit was vir my ’n les van wat met ons kan gebeur as iets soos bitterheid en onvergewensgesindheid aan ons binnekant bly vreet totdat dit weggevreet is. “As daar iets onder julle gebeur wat mense ongelukkig en kwaad maak vir mekaar, moet dit met wortel en tak uitgeroei word. As dit nie gedoen word nie, word dit soos ’n giftige plant wat uiteindelik baie mense seermaak.” (Heb. 12:15, Die Boodskap) Ja, ek weet jy kan vir my sê dat ek nie weet wat aan jou gedoen is nie, hoeveel leuens, bedrieëry, vernedering, pyn jou aangedoen is nie. Ek verstaan dit. Ek verstaan dat dit ’n lang en moeilike pad kan wees. Ek verstaan dat jy nie lus is om te vergewe nie. Ek verstaan dat jy sê: ek sal jou nooit kan vergewe nie. Ek verstaan dat jy liewer wil vasklou aan daai wraakgevoelens en die ander een die slegste toewens. Maar ek verstaan ook dat daar ’n dag moet kom dat jy jou hand oopmaak en laat gaan ter wille van jouself.  Kyk hoe verduidelik Jesus dit: “Kom Ek verduidelik met ’n voorbeeld wat Ek bedoel: as jy na die tempel toe gaan om ’n offer aan God te bring en jy onthou skielik dat ’n vriend of familielid van jou om die een of ander rede vir jou kwaad is, moet jy jou offer net daar laat staan . Gaan dadelik terug en maak reg wat verkeerd is tussen julle. Daarna kan jy terugkom en jou offer aan God bring.” (Matt. 5:23-24, Die Boodskap) Miskien kan hierdie ’n toets wees: “You will know that forgiveness has begun when you recall those who hurt you and feel the power to wish them well.” ( Lewis B Smedes) Mag die Here ons help om met oop, skoon hande voor Hom te staan. ~ Wilna Botha, 05/09/2023
Ons is werklik geseënd met 'n klompie goeie vriende, mense met wie ons 'n baie nou pad stap en wat vir ons baie kosbaar is. Elkeen van hierdie mense sal letterlik enigiets vir ons doen as ons in nood is, en ons sal ook enigiets vir hulle doen. So het ons ook 'n baie goeie verhouding met al ons bure, en in die 40 jaar wat ons hier bly was daar daar nog nooit erge konflik wat die verhoudinge belemmer het nie.
Ek het net weereens besef hoe belangrik goeie verhoudinge in jou leefwêreld is, want een of ander tyd gaan jy op ander se hulp moet staatmaak, en andersom.
In 1 Samuel word vertel van 'n besondere vriendskapsband tussen twee vriende.
"Nadat Dawid klaar met Saul gepraat het, het Jonatan baie geheg geraak aan Dawid en hom liefgekry soos homself. Dieselfde dag nog het Saul vir Dawid saamgevat huis toe en hom nie toegelaat om na sy pa se huis toe terug te gaan nie. Jonatan en Dawid het 'n verbond gesluit omdat Jonatan hom liefgekry het soos homself." (1 Sam. 18:1-3).
Ons het 'n baie goeie fliek gesien oor 'n paar vriende wat 'n miljoenêr ontvoer vir 'n losprys, maar vinnig-vinnig versuur dinge toe die geld in die prentjie kom. Die ryk man wat ontvoer is sê toe 'n baie waar ding vir die leier van die groep:
"There are a few ways to be rich; you can either have a lot of money, or you can have good friends, but you can't have both ". Baie waar woorde.
Die Bybel gee vir ons 'n paar tekste wat dinge mooi opsom.
Spr 17 : 17 "Op 'n vriend se liefde kan jy altyd reken, jou broer is daar met die oog op jou nood"
Spr 27 : 10 "Moenie by 'n vriend wat al jou pa se vriend was, verbygaan na jou broer se huis toe as jy moeilikheid het nie. 'n Buurman wat naby is, is meer werd as 'n broer wat vêr is."
Spr 24 : 26 "Iemand wat eerlik antwoord, is 'n ware vriend."
Spr 18 : 24 "Maats kan jou breek, maar daar kan 'n vriend wees wat nader is as 'n broer."
Spr 22 : 11 "Wie daarop prys stel om opreg te wees en vriendelik te praat, het selfs die koning tot vriend."
Ek dank die Here vir vriende wat aan al hierdie dinge voldoen. En nog meer, dat my vrou en kinders my beste vriende is.
Ek glo nogal aan die gedagte van: Sien leef en laat leef. Ek het lank gelede 'n vriend gehad wat konstant konflik gehad het met die bure oor verskillende dinge, en dan het die hare gewaai. Volgens my was dit regtig nietige dinge en ek het altyd gewonder of dit regtig die gevegte werd was.
Hoe eensaam moet 'n mens nie wees wat niemand het om na uit te reik nie.
Pas daai verhoudinge goed op, want hoe ouer jy word, hoe belangriker word dit. Dis maar die verloop van die lewe. ~ Willem Botha, 04/09/2023
"O Heer wil dan U liefde ook deur ons openbaar, dat ons mekaar mag liefhê, en so U wet bewaar... " (Gesang 262)
Ek onthou vaagweg grepies uit die eerste paar jaar in die laerskool. Elke oggend voor die klas begin, het die juffrou ons iets laat sing en dan het sy gebid. So het ons soms hierdie paar woorde van hierdie Gesang gesing, en ons het dit spesifiek vir Yvette gesing, 'n dogtertjie in die klas. Ek het nooit gewonder hoekom ons net vir Yvette gesing het en vir niemand anders nie, maar ek het seker maar gedink dis hoe dit moet wees.
"... dat ons mekaar mag liefhê, en so Yvette bewaar." Natuurlik in plaas van "... en so U wet bewaar". Ek is nou nog goed met "misheard lyrics".
Ek verlang so terug na daardie kinderlike geloof waarmee ons grootgeword het, sonder om alles te bevraagteken en agter elke nuwe stroming onder die son aan te hardloop.
Kinderlike geloof, daardie geloof wat voorgehou is in my ouerhuis, in die kerk en in die skool. Natuurlik het my volwasse jare baie elemente van soek en ondersoek ingehou en dit gebeur steeds want dis waar Geestelike groei plaasvind, maar ek is so bly dat ek grootgemaak is, soos wat ons grootgemaak is in die "goeie ou dae". Ons het respek vir God gehad, maar ek is nie met vrees-godsdiens grootgemaak nie. Ek kan glad nie onthou dat my ouers ons ooit gedreig het met daardie kwaai en onverbiddelike God wat jou gaan straf as jy nie jou kool eet nie (ek het terloops eers kool begin eet toe ek vir Wilna ontmoet het). Wys jou net...
Ons is nie eers grootgemaak met die gedagte dat die duiwel jou gaan kom haal as jy stout is nie. Indien daar so iets was, het dit definitief nie 'n blywende indruk gelaat nie. Wel, die dominee was egter baie kwaai, en ek was BAIE banger vir hom as vir die Here en die duiwel saam.
“Dit verseker Ek julle: As julle nie verander en soos kindertjies word nie, sal julle beslis nie in die koninkryk van die hemel kom nie."(Mat. 18:3)
Natuurlik moet ons soek en ontdek, ons moet leer en God se aangesig elke dag soek, maar wees maar versigtig wáár jy dit soek.
Jy sien, mense hou van nuwe mensgemaakte stories en denkrigtings, en hierdie sogenaamde leermeesters wat hierdie goed uitdink en verkondig, hou vreeslik daarvan om 'n gevolg op te bou wat hulle aanhang. En daar is dikwels selfs finansiële gewin daarin. Jy sien dit dikwels as hulle so hamer op een ding wat hulle uitgedink het. En dis dikwels soos 'n vlak rivier, 'n myl wyd maar net 'n duim diep.
Hierdie volgende tekste som dit mooi op:
"Die Ateners in die algemeen en die uitlanders wat daar gewoon het, het hulle tyd aan niks anders bestee as om iets nuuts te sê of te hoor nie." (Hand. 17:21)
"Die één ding wat ek wel gevind het, is dit: God het die mense goed en opreg gemaak, tog het hulle hulle besig gehou met allerlei slimmighede." (Pred. 7:29)
Daardie teks in Matteus sê nie GLO soos 'n kind nie (ons haal dit graag so aan), dit sê WORD soos 'n kind.
Ek is uiters dankbaar dat ons van kleins af gevoed is met geloof in God, en respek vir die Here, want daardie fondament is "rock solid".
Wel, ek hoop die Here bewaar steeds vir Yvette. En al die ander wat saam in die klas was. ~ Willem Botha, 29/08/2023
Ek het ongelukkig nog nie goeie nuus oor my vinger gekry nie en wat ek hier skryf is nie om nóg ’n keer oor my vinger en my eie hand te praat nie (dié het nou al genoeg “airtime” opgebruik), maar oor die Here en Sý hand! “Toe sê Hy vir die man (met die gebreklike hand): ‘Steek jou hand uit.’ Hy het dit gedoen en sy hand was reg soos die ander een.” (Matt. 12:13). Elke keer as Willem vir my vinger bid, dan kom hierdie gedeelte by my op en dan steek ek ook my hand in geloof na die Here uit vir sy aanraking. Ek lees dat Jesus se hand baie kere betrokke is by die wondergenesings wat hy doen, dat Hy met sy hand raak aan die persoon. Byvoorbeeld die melaatse man: “Toe steek Jesus sy hand uit, raak hom aan en sê: Ek wil. Word gesond.” (Matt. 8:3); Petrus se skoonma: “Hy het haar hand gevat en die koors het haar verlaat. Sy het opgestaan en Hom bedien.” (Matt. 8:15); die dogtertjie van die Joodse raadslid: “Hy het in die huis ingegaan, die dogtertjie se hand gevat en sy is uit die dood opgewek.” (Matt. 9:25); die doofstom man: “Toe het Hy sy vingers in die man se ore gesteek en spoeg aan sy tong gesmeer.” (Mark 7:33) die blinde man: “Hy het die blinde man aan die hand gevat en hom uit die dorp uit gelei. Toe het Hy op sy oë gespoeg, sy hande daarop gesit en vir hom gevra: sien jy al iets?” (Mark 8:23) Jesus se hand wat genesing bewerk! Ek weet daar is mense wat hier lees wat baie groter probleme het as ek met my vinger. Kanker. Amputasies. Kroniese pyn. Hartomledings.  Verlamming. Gestremdheid. Noem maar op. Ek lees in Ps. 34:21 die Here sorg vir die héle liggaam en in Ps. 129:15 dat geen been van my vir Hom verborge is nie. So, selfs al ervaar ons nie die genesing van die liggaam soos wat ons hoop nie, is dit vir my ’n groot troos om te weet Hy wéét en Hy sién en Hy ráák met sy hand daar waar die pyn en die bekommernis is. En dan het ek moed om te wag en deur te druk en aan te hou en weer te bid. “... maar Hy maak weer met sy eie hand gesond.” (Job 5:18) ~ Wilna Botha, 24/08/2023
Ons (en jy ook), is al vele kere blootgestel aan mense se weelderige huise, motors en oorvloed waarvan mens maar net kan droom. As ek baie eerlik moet wees, moet ek erken dat daar tog diep binne in my 'n stukkie begeer en selfs afguns is, en dat ek tog by myself dink dat dit lekker moet wees om regtig enigiets te kan koop wat my hart begeer. Ek lees netnou 'n berig van iemand wat R22 miljoen gewen het op die Lotto, wat my vir 'n oomblik laat dink dat ek dalk net één keer moet probeer, want net dalk... Soos jy kan aflei het ek dit nog nooit gespeel nie, en nee, ek sal ook nie. Ek veroordeel niemand wat dit probeer nie, ek dink net jou kans van een uit veertien miljoen maak dat om 'n sjokolade te koop, 'n beter opsie is. So bietjie konteks: as jy dit elke dag van jou lewe speel, behoort jy dit een keer elke 38000 jaar te wen, volgens die wet van gemiddeldes, indien jy dieselfde kombinasie speel.
Hoekom sukkel ons soms so met hierdie probleem om net sommiges se rykdom raak te sien, en andere se armoede mis te kyk?
Dan wonder ek by myself of die Here nie moedeloos raak met my nie en dan te vra: hoeveel is regtig genoeg? Hoeveel wil jy nóg hê? Dit maak my skaam.
Hierdie teks gee vir my so bietjie nugterheid: "Ek het alles gehaat waarmee ek my in hierdie wêreld met soveel sorg besig gehou het, want ek moet dit nalaat aan dié een wat ná my kom, en wie weet of hy 'n wyse of 'n dwase mens sal wees? Tog sal hy beskik oor alles wat ek met sorg en oorleg in hierdie wêreld bymekaargemaak het. Dit kom dus ook tot niks." (Pred 2 : 18-19)
Ek sien eendag 'n oulike ding waar iemand 'n tydlyn trek wat 80 jaar aandui. Hy sê die eerste 20 jaar gaan jy skool en studeer jy, en die laaste 15 jaar, van 65 tot 80, is jy op pensioen. Ons neem aan dis ons gemiddelde lewensverwagting. Daardie tye is eintlik lekker tye. Maar tussen 20 en 65 werk en swoeg jy, en vir die meeste mense is dit nie altyd lekker nie. In daardie tyd maak ons bymekaar om te leef, maar ook net om goeters te besit. Jy maak naarstiglik bymekaar, werk jou dood daarvoor en dan vrees jy dat jy dit gaan verloor."
Ek het ook al gesien wat buitensporige oorvloed en materiële dinge aan mense doen, maar ons kyk dit mis.
Hoekom so veg vir meer? Hierdie volgende woorde behoort jou ook bietjie aan te raak.
Iemand vra eendag vir 'n familielid van 'n baie welaf afgestorwe persoon: Wat het hy nagelaat?
Waarop die persoon toe antwoord: ALLES! ~ Willem Botha, 23/08/2023
Pred. 9:10 : “Doen met toewyding alles wat jou hand vind om te doen ...” So sê die Bybel op meer as een plek. Ledigheid is die duiwel se oorkussing het my ma altyd gesê. Kry iets om te doen, hou jou hande besig. Is dit nie so dat hoe minder mense doen hoe minder wíl hulle doen nie – hulle word lui, selfsugtig, afgestomp, verbeeldingloos. Aan die ander kant sê hulle mos as jy iets gedoen wil hê, vra 'n besige persoon om dit vir jou te doen – hy is kreatief, hy kan beplan, hy skrik nie vir uitdagings nie, hy is nie lui nie, hy maak die beste gebruik van sy tyd. Pred. 4:5 sê dis dwaas om met jou hande gevou te sit en niks te werk nie, want jy sal van die honger doodgaan. “Nog 'n bietjie verder slaap, nog 'n bietjie lê en sluimer, nog 'n bietjie hande gevou lê om uit te rus. Skielik oorval die armoede jou soos ’n struikrower. ’n Tekort aan kos oorrompel jou soos ’n dief.” (Spr. 6:10, NLV) Ons hande moet natuurlik nie net besig bly met dít wat vir ons inkomste bring nie, nee, jou hande kan ook mooi dinge maak, jou hande kan ander help, jou hande kan jou gesin en jou vriende dien, jou hande kan troos en trane afdroog en wonde streel, jou hande kan ander hande vashou, jou hande kan seën. Ai, ek bewonder altyd daai vrou in Spr. 31 wie se hande vir niks verkeerd staan nie! Ek kyk vandag weer na my hande en sê vir myself: “ ... doen wat jou hand vind om te doen, want God is by jou.” (1 Sam 10:7) ~ Wilna Botha, 22/08/2023
Jesus antwoord hom: ‘Jy moet die Here jou God liefhê met jou hele hart en met jou hele siel, en met jou hele verstand. Dit is die grootste en die eerste gebod. En die tweede, wat hiermee gelyk staan, is: ‘Jy moet jou naaste liefhê soos jouself.’”(Mat. 22:37-39)
Ons ken hierdie tweede deel van hierdie teks so goed! Die skuldgevoel teks, die teks wat sê jy leef nie net vir jouself nie. Die teks wat soms net te veel vir jou raak. Jy moet jou naaste liefhê! Ja, dis presies wat die Here van jou en my verwag.
Maar die laaste paar woorde word net nooit beklemtoon nie. Jy moet jouself liefhê! Kry jy dit reg? Sit jy dalk soms soveel klem op ander dat jy jouself agterweë laat, en jouself afskeep? Dít is vir seker nie wat hierdie teks beteken nie. Waar pas jy nog in jou eie lewe in? Gaan alles in jou lewe net eenvoudig na ander toe omdat jy dink dit behaag die Here nét as jy ander eerste stel? Daar is mos plek vir jou ook, of hoe? Ek is seker dat jy ook dikwels deurloop onder geestelike manipulasie en geestelike afpersing. Die bedelaar op die hoek se bordjie wat sê: God bless you! Mense (ja selfs familie) wat aanspraak maak op jou geld en besittings omdat jy nie die Here se seën op jou lewe mag terughou vir jouself nie. Natuurlik verwag die Here van jou om te deel, maar oppas vir mense wat jou oorrompel met skuldgevoelens omdat hulle dalk nie hulle beste doen om vir hulleself te sorg nie. Het jy gesien hoe maklik mense iets uit ander kry deur "geestelik te bedel"? Ek het al vele kere gesien dat mense op hierdie manier iets uit ander kry terwyl hulle dit kan bekostig om dit self aan te skaf. Jy hoef net die regte woorde te gebruik.
Jy ken sekerlik hierdie spreekwoord: "If you are a giver, know your limits, because the askers don't know theirs".
Ek was ook al teleurgesteld as ek gegee het, net om te besef dat daar nooit eers 'n nood was nie.
Nog 'n belangrike teks in hierdie verband, is: "Behandel ander mense soos julle self behandel wil word." (Luk 6:31)
Wel, hoe wil jy behandel word? Soos jyself behandel wil word? Dan is dit dalk tyd dat jy jouself ook goed sal behandel. Dalk moet jy jouself ook so bietjie bederf soos wat jy ander bederf. Dalk moet jy jouself eerste stel en goed wees vir jouself. Jy mag maar gerus sonder skuldgevoelens dít geniet wat jy met harde arbeid bymekaarmaak.
Hoeveel bid jy vir jouself? Hef jy darem jouself ook soms 'n bietjie op? Gaan daar darem 'n bietjie van jou harde arbeid in jouself in?
Ons almal voel soms dat ons misbruik word omdat ons goeie Christene probeer wees. Ja, self met gemeente aktiwiteite, want ook daar word daar soms meer aanspraak op jou tyd, geld en gawes gemaak as wat nodig is.
Ons móét bedienaars wees , dis ons Christelike plig, maar ons moet onsself ook bedien, en nog meer, ander toelaat om ons ook te bedien, veral op geestelike vlak. Miskien voel ons soms miserabel en ongelukkig omdat ons die vermoë verloor het om lief te wees vir onsself.
"En die tweede, wat hiermee gelyk staan, is: Jy moet jou naaste liefhê soos jouself." ~ Willem Botha, 21/08/2023

Ek is baie lief om goeters te bak. Brood, vetkoek, beskuit, sjokoladekoek ('n wenner), piesang muffins, mielie muffins en vele ander lekker goed. Ek glo my resepte is al so beproef dat dit net eenvoudig nooit flop nie. Behalwe die dag toe ek my vlak bakpan in die oond sit met my ciabatta brood daarop, net om later met 'n skok te besef dit was toe nie 'n bakpan nie, maar 'n plastiek skinkbord. Wat 'n gemors! Daardie plastiek het oor alles gesmelt en die oond amper verwoes! Maar glo dit of nie, die brood was perfek!
Ongelukkig is daar nie resepte vir 'n volmaakte lewe nie, en die Bybel gee ook nie vir elke omstandigheid 'n volmaakte resep nie. Al sê die Woord pertinent dat jy jou nie hoef te bekommer nie, is ons menslike wese maar net baie aards bedraad en ons menslike natuur kom meng in en gooi die appelkar om. Die Bybel sê pertinent jy moenie vrees nie, maar wie sal dit regkry om nie mal van vrees te word as jy hoor jou kind is ontvoer nie. Daar is vele sulke dinge wat mens kan opnoem. Maar daar is nog erger dinge waarteen ons moet waak. 'n Man vertel dat hulle vir 'n vriend in hulle manne groep gebid het vir sy stryd met diabetes en toe vol van geloof hom oortuig om sy medikasie te los. Hy het amper by die dood omgedraai! Iemand het vir twee jongmense oortuig dat die Here vir hom gesê het dat die twee moet trou, hoewel hulle mekaar skaars geken het en nie eers in 'n verhouding was nie. Die huwelik was 'n ramp.
So is daar baie situasies waar mens só graag 'n oplossing wil hê (gewoonlik 'n kits oplossing), en dan is ons teleurgesteld in die Here wanneer dinge nie uitwerk nie. Ek het ook al hier genoem dat iemand beweer het dat 'n kankerlyer nie genees word nie want almal bid die verkeerde woorde.
Ons moet baie versigtig wees om nie ons geestelike lewe so te vervlak nie.
Nou ja, dalk dink jy nou ek sê dat jou Bybel en gebed geen krag het nie. Nee, dis hoegenaamd nie waar nie, want die Here se wonderwerke het (so glo ek) al elkeen van ons verstom. Voorts glo ek dat jy ook al nee vir 'n antwoord by die Here gekry het, net om later te besef dat daardie nee 'n groot stuk seën was. Die Bybel gee die wonderlikste riglyne wat ons kan volg, maar die krag daarvan lê in wag en op die Here vertrou. Ek sien ongelukkig te veel dat daar nie meer in nederigheid by die Here gepleit word vir uitkoms nie, maar eerder vereis word dat die Here sy "beloftes" onmiddellik moet laat realiseer. Hoe maklik is dit om die Here in die beskuldigingsbank te plaas en dan antwoorde verwag wat by ons pas.
Ek hou so van hierdie volgende teks, wat op so 'n eenvoudige manier vir ons sê om op te hou spartel en net alles oor te gee aan Hom.
“Kom na My toe, almal wat uitgeput en oorlaai is, en Ek sal julle rus gee." (Matt 11:28)
Beproef dit gerus as jy op hierdie oomblik moedeloos voel oor die situasie waarin jy is en daar geen lig in die tonnel is nie. Sak terug is sy arms, en geniet sy koestering. ~ Willem Botha, 17/08/2023
Ek is (ongelukkig) die afgelope paar maande baie bewus van en behep met my hande. Ek het ’n operasie aan my vinger gehad en na 6 weke en nóg 6 weke het die vinger nie aangegroei nie. Toe weer ’n operasie en nou is die volgende 6 weke amper verby. Vier maande met ’n spalkie aan my vinger. Vier maande met pyn en ongemak en bekommernis dat my vinger nooit weer dieselfde gaan wees nie. Vier maande wat sekere aktiwiteite ingeperk is. Die ander hand is nie gevrywaar nie en is lelik en pynlik a.g.v. artritis. So paar weke gelede het ons gemeente se WhatsApp-dagstukkies gevra: kyk na jou hande. Ek dink toe by myself: wat nou, ek kyk in elk geval die hele tyd na mý hande. Ek kan nie anders nie, want hulle pyn en ek kry myself jammer, ek wil die hele tyd kyk of daar nie al verbetering is nie, ek bid die hele tyd vir hulle. En net daar besef ek dat “my probleem” en “my pyn” en “my bekommernis” besig is om my selfsugtig te maak. Ek kyk toe verby al daai dinge na my hande en sien hoeveel die Here in my hande gesit het, hoeveel seëninge, hoeveel materiële middele, hoeveel vermoëns, hoeveel moontlikhede. Ek kyk toe verby dit wat ek nié het nie nié kan doen nie en probeer liewer kyk na wat ek wel het en wat ek wel kan doen. (Hier moet ek in hakies sê: ek probeer! Ek kry dit nie die hele tyd reg nie!) Dit is waar dat ons eie omstandighede ons fokus kan wegrokkel van die Here af, dat ons soveel probeer oorleef in ons eie daaglikse gespartel dat ons diensbaarheid kwyn, dat ons dankbaarheid kwyn, dat ons lewenspassie en roeping kwyn. Die dagstukkie het verder gevra: Kyk na jou hande en dink en bid: “Hoe kan my hande vandag deur God gebruik word? Hoe kan my hande vandag God dien? Hoe kan my hande vandag ’n verskil maak?” Die Here wil nie net ons harte hê nie, Hy vra ook ons hande – net soos hulle is. ~ Wilna Botha, 15/08/2023
Hoe het die eerste mens, Adam, begin lewe? Hierdie teks in Genesis 2 gee vir my so effe van 'n prentjie.
"Die Here God het toe die mens gevorm uit stof van die aarde en lewensasem in sy neus geblaas, sodat die mens 'n lewende wese geword het." (Gen. 2:7)
Hierdie teks verduidelik die gedagte van stof tot stof, en dan God wat die lewensasem (gees) in die mens inblaas.
Maar hoe kom die mens tot sterwe? Wanneer verlaat die siel die liggaam? Die oomblik as die brein sterf? Begin die "... tot stof" onmiddellik in werking tree? Ek dink so.
Kyk hoe mooi verduidelik Prediker die laaste oomblikke van 'n mens se lewe:
"Dit is soos ’n silwer tou wat afbreek by ’n put, soos die goue skepemmer wat breek, soos die drinkbeker wat stukkend breek en soos die wiel wat by die put inval. Dan word die mens weer stof soos vroeër, en sy lewensasem gaan terug na God toe waar dit vandaan gekom het."(Pred. 12:6-7 DB)
Daar sien jy weer van stof en lewensasem wat lewe laat begin, en dan weer dieselfde proses waar die mens tot sterwe kom. Stof tot stof, lewensasem wat gegee en teruggeneem word. Dis eintlik so wonderlik om dit so raak te lees, mens wil eintlik sê dit gaan "full circle".
My buurman is twee weke gelede oorlede (hy was maar 40 jaar oud) nadat iets gebeur het waarvoor daar steeds nie klinkklare antwoorde is nie, en hoewel ons probeer het met noodhulp en hartmassering, is hy letterlik onder my hande dood. En weereens het die vraag gekom: wanneer verlaat die siel die liggaam? Waarheen? Hoe nou?
Met die roudiens het ek vir sy skoonpa gevra wat hulle binne hulle kultuur glo oor die siel wat die liggaam verlaat, en dis eintlik in breë trekke dieselfde as wat ons glo, hoewel ek nie heeltemal met alles saamstem nie. Dit daar gelaat. Hulle is ook Christene.
Ek het onder andere vir hom gevra of hulle enigsins in hulle geloof reïnkarnasie akkommodeer, en sy antwoord was onomwonde: "No, God does not hand out secondhand souls."
Weereens het ek tot die besef gekom dat lewe en dood 'n gegewe is, en absoluut natuurlik is.
Maar, natuurlik moet ons dan vir mekaar sê dat die Bybel ook onomwonde beskryf dat jou siel óf in die hemel, vir ewig by God is, óf in die verdoemenis sal eindig.
“Dit verseker Ek julle: Wie in My glo, het die ewige lewe." (Joh. 6:47)
Was my buurman gered? Ek weet nie, maar ek wil tog graag so glo. ~ Willem Botha, 14/08/2023
Steel; sonde gedoen..., moor; sonde gedoen..., lieg; sonde gedoen..., vraatsug; sonde gedoen...begeer; sonde gedoen..., wellus; sonde gedoen..., haat; sonde gedoen..., hoogmoed; sonde gedoen..., versuim; sonde gedoen...dronkenskap; sonde gedoen..., luiheid; sonde gedoen..., wraakgierigheid; sonde gedoen..., liefdeloosheid; sonde gedoen..., trots; sonde gedoen..., skinder; sonde gedoen..., gierigheid; sonde gedoen..., beloftes verbreek; sonde gedoen..., vloek; sonde gedoen...Godslastering; sonde gedoen....
Sonde sonde sonde!
Goeiste, dit klink of dit al is wat ek die hele dag doen, en sommer net in hierdie dag kan ek 'n klomp van hierdie goed aftiek op my sonde boekie.
Die Here is baie duidelik daaroor dat Hy sonde haat en Hy verwag van ons om dit te weerstaan.
Geen wonder dat ons as mense so moedeloos raak met onsself nie.
Geen wonder dat ons as mense dink God is 'n kwaai Wese wat ons die heel dag wil straf nie.
Geen wonder ons as mense gee sommer op met hierdie geveg en gooi sommer handdoek in nie.
Geen wonder ons as mense wil soms iets kom probeer offer voor sy voete nie.
Geen wonder dat ons as mense glo dat ons dan sommer klaar verdoem is nie.
Geen wonder dat ons as mense sukkel om te glo dat Hy wel alles kan vergewe nie.
Geen wonder dat ons as mense nie kan dink dat Jesus se bloed genoeg was, en dat Hy letterlik deur sy kruisdood ons kon red van die ewige verdoemenis.
Geen wonder dat ons as mense dink dat genade net te goed is om waar te wees nie.
Geen wonder dat ons as mense onsself vir so lank kan kasty oor skuldgevoelens nie.
"All that passing laws against sin did was produce more lawbreakers. But sin didn’t, and doesn’t, have a chance in competition with the aggressive forgiveness we call grace. When it’s sin versus grace, grace wins hands down. All sin can do is threaten us with death, and that’s the end of it. Grace, because God is putting everything together again through the Messiah, invites us into life—a life that goes on and on and on, world without end." (Rom. 5:20-21)
"When it’s sin versus grace, grace wins hands down." Kragtige woorde dié! ~ Willem Botha, 10/08/2023
“So sê die Here: Julle moet na My luister en my wil doen wat Ek aan julle bekend gemaak het.” (Jer. 26:4) So sê die Here, Here – luister! Ons wil almal graag die Here hoor praat. Ek dink dis een van die goed waaroor baie Christene wonder – wat sê die Here? Wat sê hy vir my persoonlik en wat sê hy oor sekere sake in my lewe? Ek besef daar is só baie wat die Here reeds gesê het, so baie wat reeds in die Bybel geopenbaar is, maar ons luister nie noodwendig daarna nie. Hoekom wil ons die Here se stem hoor as ons nie gaan dóén wat Hy sê nie? Dit laat my dink aan die staaltjie wat vertel word van die dominee wat Sondag na Sondag dieselfde preek gegee het. Na ’n paar keer het die kerkraad hom aangespreek en gesê hy moet nou bietjie sy werk doen en ’n vars preek voorberei. Sy antwoord was dat hy ’n nuwe preek sal lewer sodra die gemeente na die eerste een luister en gehoorsaam is daaraan. Ek dink partykeer die Here moet ook só voel. Ons wil hoor en heeltyd “nuwe” goed hoor, maar dit wat Hy alreeds gesê het, het ons nog nie aan aandag gegee nie. “Sal julle dan nooit leer om na my woord te luister nie? vra die Here.” (Jer. 35:13) Jesus het ook meermale gesê: “As iemand ore het en kan hoor, moet hy luister!” Hy het ook vir hulle gesê: “Gee aandag aan wat julle hoor!” (Mark 4:23-24) want die een wat die Here se woorde hoor en nié daarvolgens handel nie, kan vergelyk kan met ’n dwaas wat sy huis op sand gebou het en ons weet wat met daai huis (en lewe) gebeur as die storms hom tref. Maar die een wat hoor en daarvolgens handel, kan vergelyk word met ’n wyse man wat sy huis op ’n rots gebou het: “Die stortreën het geval, vloedwaters het afgekom, winde het teen daardie huis gewaai en daaraan geruk en tog het dit nie ingestort nie, want die fondament was op rots.” (Matt. 7:25) So sê die Here, Here ... kom ons gee aandag en luister en doen. ~ Wilna Botha, 08/08/2023

Ek plaas hierdie stukkie weer wat ek 'n paar jaar gelede gebruik het. Die gedagte vir dié boodskap is na aanleiding van 'n artikel wat ek vanoggend gelees het, wat handel oor huishulpe wat die enigste broodwinners is, want die pa loop net weg van sy verpligtinge af. Ek was geskok oor die statistieke, maar ek sien dat daar soveel pa's is wat steeds in die huis by sy gesin is, maar ook totaal afwesig is.

Pa
Is dit nie skokkend hoeveel enkelouers daar is nie, oftewel hoeveel kinders net deur een ouer grootgemaak word nie, gewoonlik 'n ma, en baie dikwels (natuurlik nie altyd nie) die pa wat totaal afwesig raak. Goeiste, kan ons ons jeug kwalik neem vir al die slegte dinge wat gebeur? Toe ons eie kinders in die laerskool was het hulle al vertel dat daar hordes kinders is wat net deur een ouer grootgemaak word. Sonder om hoegenaamd te veroordeel wil ek sê die wêreld het siek geword, terminaal siek! Hoekom op aarde trou mense nog met 'n huweliksbelofte voor God? Wie trou nog binne gemeenskap van goedere? Want die redenasie is eenvoudig, mense trou met die agterdeur oop, en begin met 'n gesin binne daardie raamwerk. Ek het baie begrip dat daar egskeidings plaasvind en wil geensins iemand probeer slegmaak wat daardeur gaan nie, maar ek pleit dat ouers nie hulle kinders vernietig nie. Die vet weet, dis 'n slagveld daarbuite!
Kan 'n pa nie maar ten minste 'n goeie pa wees as daar wel skeiding plaasgevind het nie? Kan bloed nie maar dikker as water wees nie? Kan die woorde "Ek is lief vir jou" nie maar bedoel word nie?
Ek is seker jy ken hierdie stukkie, maar ek deel dit graag weer.

1 Kor 13 vir pa's:
Al sou ek die mooiste huis in die buurt hê en met die duurste BMW ry, maar my vrou en kinders geniet nie die weelde van my teenwoordigheid nie, dan is ek so waardeloos soos 'n bankkrediet met 'n nulbalans.
Al het ek die gawe van woorde sodat ek 'n direksie met my argumente kan swaai, of skares na my preke kan laat stroom, en ek het nie die liefde om na my kinders te luister nie, doen ek meer kwaad as goed.
Al ken ek die geheimenisse van die Beurs en die Reserwebank, en al besit ek al die kennis van rugby- en krieketreëls, en al het ek al die geloof dat ons hierdie land met gebed kan verander, maar ek het nie die liefde om my kinders die gevare van baie geld te leer, langs die baan te staan as hulle speel of hulle te leer bid nie, dan het ek niks bereik nie.
Al gee ek 'n dubbele tiende vir die armes, en al beroem ek my dat ek in elke liefdadigheids raad op my dorp dien en vakansies my gesondheid opoffer om in malariagebiede sendingwerk te doen, en ek is te moeg om saans vir my kinders boeke te lees of naweke in die veld te gaan stap, baat dit my alles absoluut niks.
'n Pa wat liefhet, is geduldig met kinders wat sukkel met wiskunde,
'n Pa se liefde is vriendelik met 'n kind wat nie wil rugby speel nie,
Hy is nie afgunstig op pa's met slimmer en mooier kinders nie,
Hy is nie grootpraterig en verwaand oor sy kinders se prestasies nie,
'n Pa se liefde handel nie onwelvoeglik met die ma van sy kinders nie,
Soek nie sy eie belang sodat sy huismense laaste kom nie,
Is nie liggeraak en nukkerig as 'n kind bietjie ekstra aandag soek nie.
'n Pa wat sy kinders liefhet, hou nie boek van hulle foute en peper hulle nie met verwyte nie.
'n Pa verbly hom nie oor 'n kind se foute met:
"Ek het jou gewaarsku maar jy wou nie luister nie"
Hy is verheug as hy sy kinders die waarheid hoor praat - selfs tot hulle eie nadeel.
Daarom wil ek my kinders se skandes met liefde bedek,
In hulle glo,
Die beste vir hulle hoop,
En hulle kleredrag, klaery en kritiek verdra.
'n Opregte drukkie en 'n intieme gesprek van 'n ouer bly lank in 'n kinderhart. Maar die preek of toespraak wat ek liewer in die tyd wou skryf sal oormôre weer vergeet wees.
Vandag se noterings op die aandelemark is volgende week niks werd nie.
In die lig van die Volmaakte wat kom, word al my kennis en besittings gerelativeer.
Toe ek 'n jong man was, was ek gesteld op my voorkoms, my motor en my geleerdheid,
Maar noudat ek 'n pa geword het, wil ek graag my kinders met liefde, balans en geloof grootmaak.
Nou kyk ek nog vas teen rebelse tienergesigte,
Maar eendag as hulle groot is,
Sal hulle verstaan wat ons hulle wou leer,
En wat God ons almal leer.
En nou:
Geduld, aanmoediging en liefde bly,
Maar die waardevolste hiervan is onvoorwaardelike liefde! ~ Willem Botha, 07/08/2023

"Almal sal bymekaarkom en oor die Here se goeie dade met hulle kinders praat. Dit is net die Here wat mense red." (Ps. 22:32 DB)
Mense sal vir hulle kinders vertel hoe goed die Here is. Mense wat wonderwerke ervaar en dikwels dinge nie kan verklaar nie, weet dat dit uit die hand van die Here kom. Mense wat in nood is, roep gewoonlik uit na die Here toe. As mense glad nie meer weet watter kant toe nie, gaan soek hulle gewoonlik die Here se aangesig. Jy sal derduisende getuienisse hoor van mense wat sê dat die Here hulle opgelig het toe hulle in die diepste duisternis vasgevang was.
Wanneer mense wonderbaarlik genees word na erge siekte, sal jy hoor dat hulle deur die bank die Here prys.
Die Here se lof word elke dag besing, reg oor die wêreld, in bykans elke uithoek van die aarde. Mense beleef in baie opsigte dieselfde tipe dinge as die Here oor hulle pad kom en met hulle begin werk. Ek het voorts nog bitter selde (indien ooit) gesien dat hulle die Here opsy skuif as hulle gebede nie dadelik verhoor word, of presies verhoor word soos wat hulle vra nie.
Biljoene mense in die wêreld glo steeds dat God die hoogste gesag is, en dat sy Woord die enigste ware woord is.
As jy met hierdie dinge kan assosieer, bevind jy jouself in goeie geselskap. Moenie dat mense jou vertel dat Christene al hoe minder word en wegdraai van die Here af nie, want dis nie waar nie.
Ek kry hierdie op die internet:
"According to Guinness World Records as of 1995, the Bible is the best-selling book of all time with an estimated 5 billion copies sold and distributed."
Die Here leef, die Here is die OPPERGESAG van hierdie wêreld, en Jesus is steeds die mees invloedryke Wese wat ooit geleef het. Hou vas aan wat jy glo, jy is op die regte pad. ~ Willem Botha, 31/07/2023
“So sê die Here, Here” - ek is nou al ’n rukkie besig met dié tema en dis so lekker bemoedigend en vertroostend en inspirerend om al die verse in die Bybel te lees en oordink waar die Here sê: Ek is by jou, Ek is hartstogtelik begaan oor jou, Ek sal jou gebede verhoor, Ek slaan ag op die mens in nood, vir al jou swaarkry sal jy vergoed word, moenie bang wees nie, skep moed, niks is vir My onmoontlik nie ... Die Here sê egter óók goed wat dalk nie altyd so sag en lekker is om te hoor nie, goed wat ons oproep om ons lewe reg te maak, om selfondersoek in te stel, om berou te betoon, om keuses te maak al is dit nie gewilde, maklike keuses nie, om gehoorsaam te wees, om in beweging te kom en uit te reik na ons medemens. Kyk bv., Jer. 7:3 “So sê die Here die Almagtige, die God van Israel: Maak julle lewe en dade reg” en Jer. 22:3 “Handhaaf die reg en wees regverdig” en Jes. 56:1 “Laat reg geskied, doen reg” en Sag 1:3 “Bekeer julle tot My” en Jer. 22:29 “Land, land, land, luister na die Woord van die Here.” Vandag wil ek myself net daaraan herinner om nié net my gunsteling, goed-voel, paai-verse in die Bybel uit te soek en die reguit, moeilike verse wat my aanspreek en oproep tot verandering en aksie verby te blaai nie. Die Woord is ’n lamp en ’n lig, soeter as heuning, waardevol soos goud, ’n groot skat, maar dis óók ’n skerp swaard met twee snykante: “Want die woord van God is lewend en kragtig en skerper as enige tweesnydende swaard. Dit dring deur tot by die raakpunt tussen siel en gees, tussen gewrig en murg en beoordeel die hart se voornemens en gedagtes.” (Heb. 4:12, AFR20) ~ Wilna Botha, 27/07/2023
119 Biljoen mense. Sjoe dis baie. Volgens Google is dit min of meer hoeveel mense reeds op hierdie aarde geleef het, en dié wat op die oomblik leef, is daarby ingesluit. 119 Biljoen, sjoe! Dis 119 000 000 000 as ek reg is.
As jy 80 jaar geleef het was dit 2 524 608 000 sekondes.
Nou ja, die akkuraatheid hiervan is vir my totaal irrelevant want mense verskil oor die ouderdom van die aarde en van die "intelligente" mensdom, maar ek argumenteer nie daaroor nie. Ter wille van hierdie boodskap volstaan ek by hierdie syfer. Wie gee om of dit 50 Biljoen meer of minder is?
Die punt is, elke enkele een van hierdie mense was en is verskillend! Dit sluit jou vingerafdrukke en jou DNA in, wat uniek is aan elkeen. Nommer hoeveel is ek? Wie sal weet? Wie gee om? Wel, Iemand weet, Hy weet presies, en Hy het elkeen geken en aan elke liggaam 'n siel toegeken. 119 Biljoen! Dis te groot vir my!
Elkeen van daardie mense bestaan 99% uit: Koolstof, Suurstof, Stikstof, Waterstof, Kalsium en Fosfor. Dieselfde elemente, tog is álmal verskillend. Voorts bestaan jy uit atome wat al in biljoene mense voor jou "gebruik" is en later nog gebruik sal word. Stof tot Stof, so sê die Woord.
Maar as almal so verskillend, maar tog dieselfde is, wonder ek: Wie is ek? Wie is jy? Hoe het God met die vroeë geslagte omgegaan wat nie kon lees of skryf nie, en wat nie 'n Bybel gehad het nie? Adam en Eva kon nie, maar tog het God kom wandel in die tuin en met hulle gepraat. 'n Vreemde gedagte het by my opgekom. God praat tog met my in Afrikaans (dink ek), maar Hy praat met elke ander mens in sy unieke taal. Het jy geweet God kan Hurrian, Palaic, Akkadian, Sanskrit, Farsi en Tamil praat? Sien jy hoe onmoontlik dit is om te weet hoe Hy met verskillende mense werk? En gewerk het? Wie is ons? Ons is so uniek dat ons kan praat, redeneer, glo en liefhê op 'n besondere manier. Aangesien ek nie glo aan evolusie oor spesie grense heen nie, kan ek net aanvaar dat die mens in sy huidige "vorm" moes bestaan het van die "begin" af. Ek weet nie hoe nie en ek verstaan dit nie, dis te groot vir my. Maar tog is elke enkele een van hierdie 119 Biljoen na Sy beeld geskep, en Hy besoek elke enkele een op 'n unieke en verskillende manier.
Voorts gee Hy vir ons die onbeskryflike vermoë om te glo in Hom, en Hy openbaar Homself op 'n manier aan elkeen. Maar waarin lê geloof? Of ons bewussyn? Waarin lê liefde? Tog nie in hierdie ses elemente wat genoem is nie. Lê dit in ons gees, of ons siel? Waarvan is dít gemaak? Dis tog onsterflik, want dis juis dít wat oorbly nadat ons sterf? Hoeveel siele is dan nog in God se stoor? Seker nogal 'n vreemde vraag. Dis te groot vir my.
Dink jy God werk dieselfde met 119 Biljoen mense? Ek kan dit nie glo nie. Ek werk nie eers dieselfde met my twee kinders nie.
Maar die volgende is/was waar vir al die 119 Biljoen mense.
"Here, U het my tot in die fynste detail gemaak. In die baarmoeder het U my gevorm. Ek wil U prys omdat U my so volmaak geskep het. U doen wonderlike werk. Ek weet dat U groot dinge kan doen. Daar is nie ’n been in my wat uit sy plek is nie. U ken my totaal. Alles is soos U dit wil hê. U het my gemaak. Toe ek grootgeword het, het U vir my gesorg. U beheer ook my hele lewe. Nog voordat ek mens geword het, het U my al beplan. U het my lewe toe al in u hand gehou. En U het besluit wat met my sou gebeur. God, dit troos my om te weet dat U alles in u hand hou. Die gedagte daaraan is net te groot om te verstaan."(Ps. 139:13-17 DB)
Terloops, daar is ongeveer 200 biljoen triljoen sterre in die heelal, en volgens die Bybel het Hy vir elkeen 'n naam gegee. Die Here is groot, onbeskryflik groot. En Hy is lief vir jou! En Hy ken jou naam en skryf dit in sy handpalm.
Ek is nou skoon moeg gedink. ~ Willem Botha, 26/07/2023
Ons het die naweek die musiekblyspel genaamd Joseph and his amazing technicolour dream coat gesien, en dit was ongelooflik goed. Dit was goed om weer herinner te word aan die geskiedenis van die Israeliete se aankoms in Egipte tydens 'n groot hongersnood. Hulle het eventueel slawe geword van die Farao omdat hulle 'n bedreiging vir die Egiptenare geraak het, en uiteindelik het hulle weer terug getrek Kanaan toe, waarvandaan hulle baie jare tevore gekom het. Hulle was 430 jaar in 'n vreemde land.
Ongelukkig is daar vele mense in Suid-Afrika wat voel dat ons onsself in dieselfde situasie bevind as die Israeliete, en dat ons moet teruggaan na ons "eie" land toe.
Ek het egter net weer besef dat ons nie in slawerny leef nie, ons is nie op enige manier onder dwangarbeid nie, ons lewe in vryheid (al voel dit soms asof die heersers dit probeer wegneem), ons is vir seker nie in die woestyn nie, en ons land is steeds 'n land van melk en heuning. Ja natuurlik kry baie mense swaar, maar hier is steeds wonderlike geleenthede en voorspoed. Ons leef nie van kwartels en manna nie, maar steeds gee die Here vir ons die spreekwoordelike vuurkolom en wolkkolom om ons te beskerm.
Natuurlik is die Here hier, net soos in enige plek op aarde, en ons hoef nie hiervandaan weg te gaan om Hom te gaan soek nie. En voorts is Sy liefde presies dieselfde vir elke mens in ons land, hoewel vele mense steeds voel dat ons die "uitverkore volk" is. Nee, niemand is verhewe bo iemand anders nie.
Ek wil graag die volgende vra:
Is jy bereid om te ploeg en te plant met die hoop dat daar 'n goeie opbrengs sal wees? Is jy bereid om 'n boom te plant met die vooruitsig om eendag in sy skadu te sit? Is jy bereid om moue op te rol en te werk aan 'n goeie toekoms vir ons almal? Kan jy nog 'n groot klip op die grond neersit en daar skryf: Tot hier het die Here ons gehelp?
Hierdie volgende teks is vir my baie kosbaar.
"Die Here sal geskille tussen lande en volke oplos. Die gevolg hiervan sal wees dat hulle hulle swaarde sal smelt en eerder ploegskare daarvan sal maak. Van hulle spiese sal hulle snoeiskêre maak. Daar sal ’n einde kom aan oorlog en niemand sal meer opgelei word om te gaan veg nie. Kom, afstammelinge van Jakob, kom ons leef soos die Here van ons verwag om te leef."(Jes. 2:4-5 DB)
Nou ja, swaard of ploegskaar, spies of snoeiskêr, dis jou en my keuse. Veg of werk is vir my 'n eenvoudige besluit. Lees weer daardie laaste paar woorde van die teksgedeelte: Kom ons leef soos die Here van ons verwag om te leef... ~ Willem Botha, 24/07/2023

So sê die Here, Here: “Ek is hartstogtelik begaan oor Sion ...” (Sag. 8:2) As die Here sê hy is begaan oor ’n plek, ’n stad, ’n land, dan is Hy begaan oor die mense van die plek. Ek het gou-gou in die HAT gekyk wat beteken “begaan”: met medelye en kommer vervul, besorg wees. Lees dit weer: medelye, kommer, besorg. “Hartstogtelik” beteken: met vurige liefde, sterk gevoel, passievol. Die Here is hartstogtelik begaan oor sy mense, oor sy kinders, Hy is hartstogtelik begaan oor my en jou. Ons lê naby aan sy hart, ons is die appel van sy oog, die kroon van sy skepping. Hy is passievol oor ons. Hy gee om wat van ons word, Hy dra ons belange op sy hart, Hy is bekommerd oor ons wel en wee. Hy het ons lief en niks kan ons van sy liefde skei nie. Hy het ons só lief dat Hy sy Seun vir ons gegee het, sy lewe, sy bloed. Toe ek vandag dié paar woorde van die teksvers lees, het dit my só geliefd en veilig en spesiaal laat voel. Hy is naby, Hy weet, Hy verstaan. Hy dra, Hy troos, Hy genees. Hy versorg, Hy voorsien, Hy beskerm. Hy vergewe, Hy spreek vry, Hy gee vrede. Vandag sê die Here, Here vir jou: Ek is hartstogtelik begaan oor jou land, oor jou stad, oor jou huis en Ek is hartstogtelik begaan oor jóú. Ek hoop jy sal dit glo! ~ Wilna Botha, 20/07/2023

Rasputin vs Jesus
Tussen 1869 to 1916 leef Grigory Rasputin in Rusland. Rasputin was eerder berug as beroemd, en het die vermoë gehad om almal op hol te jaag. Rasputin was nie noodwendig bekend as ‘n misdadiger nie, maar eerder iemand wat vol streke was, wie jy nooit kon vertrou nie, en hy het die eienaardigste goed aangevang. Hy het selfs 'n verhouding met die koningin gehad, en later het die mense hom vermoor. Rasputin was ‘n gure karakter! Hy was veelbesproke, en Boney M het ‘n treffer gehad het met die liedjie “Rasputin”.
Die woord "karakter" word op twee maniere gebruik: In ou Rasputin se geval sê ons die ou is 'n gure karakter, maar iemand met 'n goeie reputasie staan bekend as 'n persoon van karakter.
Soos Jesus natuurlik, want Jesus se karakter was onbesproke, Hy het niemand benadeel nie, het vir ander geleef, en uiteindelik ook vir ander gesterf, en Hy het presies gedoen wat Hy gesê het.
Hy het gesê Hy gaan gekruisig word, en dit het gebeur, Hy het gesê Hy gaan opstaan uit die dood en Hy het, hy het gesê dat Hy gaan opvaar na die Hemel om vir ons plek te berei en Hy het. Hy sê ook dat Hy ons sondes vergewe en dat ons gered is as ons Hom aanneem en ek glo Hom. Hy het ook gesê Hy gaan weer kom en ek glo Hy gaan, want dit is Sy karakter. ~ Willem Botha, 19/07/2023
So sê die Here, Here: “Ek gaan in Sion ’n klip neersit, ’n uitgesoekte klip, ’n hoekklip wat fondament aan fondament sal sluit. Wie op My vertrou, hoef nie te vlug nie.” (Jes. 28:16) O, ons weet wie en wat daai klip is, daai rots, daai fondament, daai hoeksteen van graniet, daai beproefde, onwankelbare steen! Dis Jesus. Wie op Hom vertrou, wie by Hom skuiling vind, wie op Hom as hoeksteen bou, hoef nie te vlug nie, hoef nie bang te wees nie, hoef nie terug te deins nie. “Kom na Hom toe, die lewende steen, wat deur mense afgekeur is, maar deur God vir die ereplek uitverkies is ... wie in Hom glo, word nooit teleurgestel nie” (1 Pet. 2:4, 6) Dis ’n uitnodiging vir elkeen van ons! Wie op Hom vertrou, hoef nie te vlug van probleme nie, want Hy is hulle Helper. Wie op Hom vertrou, hoef nie te vlug van hulle verlede nie, want Hy het die foute vergewe. Wie op Hom vertrou, hoef nie te vlug van hulle vrese nie, want Hy is die Redder. Wie op Hom vertrou, hoef nie te vlug van hulle toekoms nie, want Hy is in beheer, Hy sê Hy beplan vir ons ’n toekoms waarin ons voorspoed en vrede kan verwag. Wie op Hom vertrou, hoef nie te vlug van hulle moedeloosheid nie, want Hy sê: Kom na My toe, almal wat moeg en oorlaai is en ek sal vir julle rus gee. Die enigste plek waarheen ons kan vlug, is na ons Rots, Jesus, die uitgesoekte klip, toe. “Wees vir my ’n rots en ’n toevlug, ’n plek waarheen ek altyd kan vlug. U het reeds my redding bepaal, want U is my rots en my vesting.” (Ps. 71:3, NLV) ~ Wilna Botha, 18/07/2023
Dis net mense wat niks in die lewe doen nie, wat nie foute maak nie. Ek is doodseker dat jy jouself kasty oor foute wat jy in die lewe gemaak het. Die kanse is baie goed dat elke mens loop met skuldgevoelens oor dinge van die verlede, en hoe ouer jy word, hoe meer spook daardie dinge by jou. Die meeste ouers blameer hulleself vir foute wat hulle kinders maak en dikwels sal sulke kinders hulle eie tekortkominge probeer goedpraat deur hulle ouers te blameer. Dit vernietig mense en dis tog in 'n mate te verstane dat dit gebeur. Jy weet mos, elke familie het "hulle boetie of sussie" wat die pad byster raak, en dan kasty die ouers hulleself tot in die graf in.
Dalk is dit ook die rede hoekom ons onsself so kan kasty as ons voel dat ons die Here diep bedroef met foute wat ons in die verlede gemaak het, of selfs steeds daagliks maak. Jy sien, die teks wat sê "Wees heilig want Ek is heilig", is een van daardie bykans onmoontlike tekste om na te volg. Dink so bietjie terug in jou lewe en kyk of jy nie ook sulke insidente kan onthou wat jy voel jou sonde was 'n onvergeetlike sonde nie. Of dat jy 'n fout in die lewe gemaak het, waarvoor jy jouself nie kan vergewe nie. Ek glo jy gaan so iets onthou. Dis uiters ongemaklik as daardie goed by mens kom spook.
Wel, miskien is jou geheue goed genoeg om dit te onthou, maar as die Here sê Hy het jou vergewe, het Hy dit seer sekerlik vergeet. As daardie spook- gedagtes by jou opkom, kom dit vir seker nie van die Here af nie, maar dis nét van die duiwel af, want al houvas wat hy op jou kan hê, is oor dinge in jou verlede. Jy ken seker die sêding: As die duiwel jou kom herinner aan jou verlede, herinner hom aan sy toekoms. Hy het immers die hel gekies en dis waar hy gaan bly. Vir altyd.
Maar ek en jy het te doen met 'n liefdevolle God wat ons telkens gerus stel dat Hy jou sondes nooit weer teen jou gaan hou nie.
“Dit is die verbond wat Ek met hulle na daardie dae sal sluit, sê die Here. Ek sal hulle my wette in die hart gee, in hulle verstand sal Ek dit skrywe.” Dan sê Hy verder: “Aan hulle sondes en hulle oortredings sal Ek nooit meer dink nie.” Waar die sondes vergewe is, is geen offer daarvoor meer nodig nie."(Heb. 10:16-18)
Kan jy sien hoe onnodig selfkastyding is? Elke keer wat jy toelaat dat hierdie ou koeie van die verlede by jou spook, wil jy opnuut op een of ander manier 'n offer bring om Hom gelukkig te maak. Die heel beste manier om die Here gelukkig te maak, is om onvoorwaardelik sy vergifnis te aanvaar. Stap weg van daardie gedagtes af, vir ewig.
En net so met aardse dinge waarmee jy so stoei, is dit tyd om weg te stap van dit af. As jy vir iemand vergifnis gevra het vir 'n fout wat jy gemaak het, en hulle aanvaar dit nié, het dit niks meer met jou te doen nie. Dis nie meer jou probleem nie. En as jy steeds voel om jammer te sê vir iemand wat reeds oorlede is, doen dit dan in jou gedagtes en beweeg aan. Die lewe is te kort om toe te laat dat die verlede so 'n houvas op jou toekoms het. Kom vry, en leef in daardie vryheid. En ja, die Here weet lankal nie meer van die droogmaak in jou verlede nie. ~ Willem Botha, 18/07/2023

Op grond van Bokkie Carstens se reaksie op my boodskap vroeër die week (op Facebook) oor vreemde dinge wat begin posvat in ons hedendaagse "godsdienstige" lewe, plaas ek weer 'n boodskap van 'n klompie jare gelede. Bokkie se gedagte is dat ons so wegbeweeg van die "tradisionele" beoefening van ons geloofslewe, dat die jonger geslagte al hoe meer van die Here en die kerk af begin weg beweeg.
Ons is grootgemaak met die "spaar nie die roede nie" manier van doen, en by die skool het ek ook gereeld vir daardie aaklige lat gebuk. Sommer baie dikwels. En ek was nog een van die soet manne gewees, maar dissipline is mooi aangehelp met 'n kweperlat, of sommer met die bordpasser (genade daai ding kon jou "mind change" soos niks anders nie). Ten spyte van wat baie mense vandag daarvan dink, was daar orde in die skole, baie meer as vandag. Toe word dit onwettig. En in my ouerhuis het daardie leerplak gesorg dat my ouers net een keer gepraat het. Vandag is dit kwansuis onwettig. En kyk hoe verval 'n samelewing waar sogenaamde menseregte maak dat mense nie meer tot verantwoording geroep word nie.
Nou ja, dit was by die skool.
By die kerk was ek ONGELOOFLIK bang vir die dominee, en ek glo die duiwel was nog banger vir hom! Maar daar was dissipline, en al het ek vele keer gevoel ek moes gedwonge kerk en Sondagskool bywoon, was dit die beste ding wat my ouers kon doen. As jy in vele van die Ou-Testamentiese boeke lees, sal jy sien dat daar bykans ondraaglike wette en reëls was, en dit was moeilik om na te kom. Maar dalk het die Here geweet dat die mens se lewe baie vinnig in chaos verval as daar nie reëls neergelê word nie. Ek was bitter jonk toe ek die eerste keer 'n diaken geword het en om te gaan "kollekteer" was nie altyd lekker nie. Een ou se Rottweiler het my teen 'n muur vasgedruk en ek het geglo dis nou alles verby, en ou oom Stoffel het my weggejaag omdat ek oor iets van hom verskil het. Maar in die Bybel lees ons dat ons huisbesoeke 'n Bybelse konsep is. Dit was nie altyd lekker nie, maar dit was goed. My punt is, as jy die mens aan sy eie heil oorlaat en hom nie lei nie, verval hy vinnig. Ek het niks anders as die tradisionele kerkopset geken nie, maar vir my was dit goed. En ek verlang soms na die orrel! Iemand het eendag gesê die kerk hou hom uit die kerk uit, maar nee, ek dink dis net 'n verskoning om onbetrokke te wees. Gelukkig is daar vir almal 'n heenkome waar hulle aanklank kan vind, en almal hoef nie op dieselfde manier hulle geestelike lewe uit te leef nie.
Hier volg die boodskap van 'n paar jaar gelede:
Solank as wat ek kan onthou was ons gesin kjêrkmense en was Christenskap deel van ons lewe. Ek het nie 'n spesifieke bekeringsdatum nie en is as kind gedoop, en nie weer nie. Ek het al baie gewonder hoekom ek aan die Here bly vashou, want ek weet nie of ek ryker is, gesonder is, vrygestel van trauma is, slimmer kinders het, of enige spesifieke voordeel het deur 'n Christen te wees nie. En voorts is ek ook nie immuun teen sondes of droogmaak nie.
Die mense wat glad nie in God glo nie vra ons maklik vas oor ons geloof en redeneer ons maklik uit die gesprek uit, want min van ons kan regtig verduidelik wat die "voordeel" is. Wel, die vraag is natuurlik of daar wel 'n voordeel is, of moet wees. Hoe sal jy dit verduidelik?
"Wees altyd gereed om 'n antwoord te gee aan elkeen wat van julle 'n verduideliking eis oor die hoop wat in julle lewe." (1 Pet 3 : 15b)
Die hoop wat in my lewe is nie vir aardse dinge nie, dis gerig op die ewigheid. Maar intussen, ten spyte van slegte dinge, weet ek verseker, God is aan my kant. Nie ten koste van ander nie, nie tot aardse voordeel van myself nie, maar ek weet God is aan my kant. Daarom kan ek in Sy arms in vlug in moeilike tye en Hy sal saam met my wees in goeie en slegte tye. Hy is die beste raadgewer, vriend en mentor. Waar Jesus loop kan ek ook maar loop.
En dan is daar hierdie teks wat alles verduidelik wat ek behoort te weet :
"As ons net vir hierdie lewe ons hoop op Christus vestig, is ons die bejammerenswaardigste van alle mense." (1Kor. 15:19) ~ Willem Botha, 13/07/2023
So sê die Here, Here: “My woord is soos vuur, soos ’n hamer waarmee klippe stukkend gebreek word.” (Jer. 23:29) My woord – dis wat die Here vir die profete gesê het en wat hulle vir God se volk moes oordra met die woorde: so sê die Here, Here. My woord – dis wat ons vandag in die bladsye van ons Bybels lees, woorde op skrif, deur God geïnspireer: so sê die Here, Here. My woord – dis wat ’n verskil in mense se lewens en optrede maak, wat hulle roeping en rigting beïnvloed. My woord – dis soos ’n hamer wat die hardste hart kan verander, wat ’n rots in stukke kan laat breek. My woord – dis soos ’n vuur wat brand in mense se harte, wat lig gee in donker. My woord – dis soos ’n veldbrand wat versprei en nie gekeer kan word nie. My woord – dit kan nie geboei word nie (2 Tim 2:9). My woord – sal nie onverrigter sake terugkeer nie. (Jes. 55:11) So sê die Here, Here. Daar is mos dié storie wat vir die waarheid vertel word van die gevangene wat ’n Bybel in die hande gekry het en die blaaie gebruik het om sy rookgoedjies in op te rol. Hy het later vir die pastoor bely: ek het die Bybel gerook, maar toe ek by Johannes kom, toe rook die Bybel my! Niemand sal kan keer dat die Bybel se inhoud mense verander nie, niemand sal kan verhinder dat dit verkondig word nie, niemand sal kan verhoed dat daar nog en nog kopieë gedruk word en dat dit in al hoe meer tale vertaal word nie. Die woord staan vir altyd vas, dit sal nie vernietig kan word of ooit ongeldig verklaar kan word nie, want dis soos ’n vuur, soos ’n hamer waarmee klippe stukkend gebreek word. ~ Wilna Botha, 11/07/2023
Dwase se woorde...
"Can I get an amen?"
"Kom ons kyk hoeveel mense sal hierdie boodskap deel, voordat Facebook dit verwyder."
"The most powerful prayer ever, don't break the chain."
"Click share and God will bless you within the next 24 hours."
"Hierdie en hierdie is nou wáárlik die merk van die dier."
Dis verstommend waaraan Christene so maklik deelneem, dinge wat regtig net geen Geestelike waarde het nie. Dit verstom my wat mense deesdae glo en deel op sosiale media, wat net eenvoudig totaal betekenisloos is. Hoeveel goed lees jy wat sê dat jy voorspoed en seën sal ontvang as jy die goed "like" en "share" en "amen". Dit gaan my verstand te bowe. Ons sien bykans daagliks sulke dinge waarop mense reageer, maar ek het nog nie een enkele keer die getuienis gelees dat mense toe wel hierdie reuse wonderwerk beleef het nie.
" 'n Doring in 'n dronk man se hand, so is 'n spreuk in die mond van 'n dwaas." (Spr. 26:9)
Kom ek deel net weer die woorde. " 'n Doring in 'n dronk man se hand, so is 'n spreuk in die mond van 'n dwaas."
Ons lees in Spreuke dat Salomo pertinent noem dat die spreuke wat opgeteken is, is woorde van wysheid wat vir ander betekenis moet hê , maar daar is vandag soveel van hierdie "dorings" waarvan Salomo praat, en mense besef dit nie.
Mense word so meegesleur deur hierdie selfaangestelde "profete" se woorde wat na bewering die Woord van die Here verkondig, maar dit moet baie goed oordink en ondersoek word. Dit gaan ook sonder uitsondering gepaard met materiële voorspoed vir die persoon wat hieraan deelneem. Voordat jy blindelings glo wat mense sê, vra eers die vraag: Sê wie? Miskien kan ons ook 'n spreuk met 'n aanhaling vergelyk, en daarvan kom daar daagliks vreeslik baie op sosiale media voor saam met een of ander prentjie, en dan loop dit soos 'n veldbrand, want dit klink so mooi, maar dit beteken gewoonlik nie veel nie. Kyk net hoe wyd word dinge versprei as so 'n aanhaling by die foto van 'n bekende persoon geplaas word, so asof hulle die wysheid van Salomo het, maar hulle het dit nooit gesê nie.
Nee, daar is 'n beter manier, deel eerder iets wat die Here direk vir jou gesê het uit die Bybel, of onder gebed, of op 'n tyd toe jy stilgeraak het, dit het báie waarde want dis 'n eerstehandse getuienis. Dis 'n waardevolle "spreuk".
Sosiale media is besig om van ons "puppets" te maak wat net agter ander kan saam piep en ons verloor eintlik 'n stukkie van ons eie kosbare getuienis. Ek is ten gunste van goeie mentors na wie ek nogal graag luister en wie se menings my Geestelik vorm. Hulle "spreuke" beteken baie, maar daardie "doring in 'n dronk man se hand" kan nogal gevaarlik wees. ~ Willem Botha, 10/07/2023
'n Goeie vriend het eendag gesê dat jy tyd gelyk kan stel aan lewe. Dus, lewe = tyd. Jy lewe 29200 dae as jy 80 word, en hopelik laat jy elke oomblik nuttig tel. En nee, rus is vir seker nie tydmors nie, en net so mag niemand op jou tyd aanspraak maak sonder dat jy daarvoor toestemming gee nie. As jou werkgewer jou betaal behoort jou tyd vir daardie ure aan hom, maar hy kan nie aanspraak maak op tyd waarvoor hy jou nie vergoed nie. Maar ongelukkig werk dit so dat jou werkgewer soms jou familie se tyd steel, sonder hulle toestemming. Dis diefstal! Jy ken seker die storietjie van die kind wat vir sy ma vra wat sy per uur verdien, want hy wil in sy spaarblikkie kyk of hy nie dalk so bietjie van haar tyd kan koop nie, want sy werk net die hele tyd. En as jy 'n afspraak het met mense wat jou laat wag (jy kry mos die alewige laatkommers), het hulle eintlik 'n stukkie van jou lewe gesteel.
Soos al genoem was my pa 'n treindrywer en dáár kon 'n paar minute se laat kom jou jou werk kos. Tyd was heilig vir hom! Ek is ook so bietjie so. En hier is sommer so stukkie wysheid vir mense (nee ek sal mos NOOIT sê dames nie) wat maak dat manlief ongeduldig toet in die motor as hulle 'n afspraak het: Die laaste 20 minute voor julle moet vertrek bestaan nie! Jy kan dus nie daarop staatmaak nie.
En nou sê ons graag ons moet wag op die Here.
" Ek stel my vertroue in die Here, ek vertrou op Hom, ek wag op die vervulling van sy woord. Ek wag op die Here meer as wat die wagte op die môre wag, wagte op die môre." (Ps. 130:5-6)
Wag op die Here? Kry jy dit reg? Het jy daardie geduld? Ek sukkel daarmee.
Gestel jy kry jou vriend waar hy op 'n bankie in die parkie sit en jy vra wat doen hy daar, en hy sê: Ek wag op die Here. Sal vreemd klink né. Jy sien, ons is te besig met hordes dinge om te wag op die Here, want sy reaksie moet inpas in jou besige skedule.
Daar word gepraat van Chronos tyd (horlosie tyd) en Kairos tyd (word ook genoem die Here se tyd).
Ons wil graag hê die Here moet op horlosie tyd op ons behoeftes reageer, terwyl Hy dit in Chronos tyd doen, want dit word ook beskryf as 'n belangrike oomblik, iets spesiaals, omtrent iets soos 'n heilige reaksie. Dink aan Moses se gesprek met die Here in die Braambos.
Sarah het 25 jaar gewag voordat God sy belofte tot vervulling gebring het en sy het eers op 90 swanger geraak. Dít, my vriend, is wat wag beteken. Wag vir daardie Kairos oomblik. Ons hou mos nie daarvan nie of hoe? Na so dag of twee laat vaar jy maar die gebed en sê graag dat God nie jou gebede verhoor op jou Chronos tyd nie.
Ja nee, mens sal mos maklik sê die lewe is te vinnig om vir die Here te wag.
Hoe lank wag jy al? Is jou geduld al op? Voel dit of jou gebede teen die plafon gaan nes skrop het? Of dat God jou vergeet het? Nee vriend, die Here se tyd is beter as ons tyd.
"So sê die Here: Op 'n tyd wat Ek goeddink, sal Ek jou gebede verhoor, op die dag wanneer Ek wil red, sal Ek jou help."(Jes. 49:8a) ~ Willem Botha, 04/07/2023
Here, dis ondraaglik warm! Here, ek kan nie meer nie, ek kan nie nog een minuut uithou met hierdie ondraaglike pyn nie! Here, Here, stuur iemand met 'n druppel water vir my tong! Ek kan nie Here. Een druppel water, net een druppel! Here dit maak nie sin nie, almal sê dan U is 'n God van liefde, kon U regtig toekyk hoe ek hier beland? Here Here, ek weet ek is oor hierdie plek gewaarsku, Here ek weet U het gesê: "Nie almal wat vir My sê Here Here nie...". Waar het ek U verloor? Here net Één druppel...!
Hoe kon ek myself so laat mislei deur die een wat gelyk het soos die engel van die lig? Hoe moes ek weet dat hy elkeen wat hy vir hierdie vlamme hel werf haat, met die mees intense haat denkbaar? Dit het so goed gelyk. Die slang, die slang wat alreeds verantwoordelikheid was vir die sondeval. En nou Here is ek hier. Die owerste van hierdie plek verwoes my Here! Hoe lank Here? Wanneer kom daar genade? Vir altyd? Here hoe bedoel U vir altyd? Altyd? Vir ewig? Gaan hierdie foltering regtig nooit ooit stop nie? Een druppel Here, net een druppel. Here kan ek nie net nog een kans kry nie? Regtig nie Here? Here stuur iemand om my broers wat nog lewe te gaan waarsku! Hulle is ook op pad, dis verskriklik! Absoluut verskriklik! Hulle weet nie wat wag op hulle nie! Here ek het altyd gedink die praatjies oor hierdie plek is maar net "gogga maak vir baba bang".
Elke knie sal buig en elke tong sal bely... Here ek wil dit nou so graag bely, maar waar is U Here? Kan ek nie net één kans kry om voor U voete neer te val nie? Dis só warm Here! Hoe baie het ek gehoor "Want so lief het God die wêreld gehad...". Here waar is die Seun? Hoe verlang ek terug na die tyd wat ek kinderlike geloof gehad het. Hoe spyt is ek dat ek eerder in die kring van die spotters gaan sit het. Net één druppel Here! Hoe verlang ek na U.
Elke knie sal buig en elke tong sal bely dat U die Here is. Dis só ontsettend warm! Net één druppel Here...
Ek is met die sleutel in my hand gebore om die lieflikheid vir ewig saam met U deur te bring, maar ek is so bitter spyt oor my verkeerde keuse Here, só bitter spit. Hierdie hitte, hierdie ondraaglike hitte...
“Daar was 'n ryk man wat duur en deftige klere gedra en elke dag feestelik en weelderig geleef het. En daar was 'n arm man met die naam Lasarus wat by die deur van die ryk man gelê het in die hoop dat hy van die oorskiet van die ryk man se tafel te ete sou kry. Hy was oortrek van die swere en selfs die honde het daaraan kom lek. “Toe die arm man te sterwe kom, is hy deur die engele weggedra na die ereplek langs Abraham. Die ryk man het ook gesterwe en is begrawe. Toe hy in die doderyk in pyn verkeer, kyk hy op en sien vir Abraham daar in die verte en vir Lasarus langs hom en hy roep: ‘Vader Abraham, ontferm u oor my. Stuur tog vir Lasarus dat hy net die punt van sy vinger in water steek en my tong afkoel, want ek ly verskriklik in hierdie vuur.’ Maar Abraham sê: ‘My kind, onthou dat jy in jou leeftyd altyd die goeie gekry het en Lasarus die slegte. Nou gaan dit hier goed met hom, maar jy word gepynig. En buitendien is daar 'n groot kloof tussen ons en julle, sodat dié wat hiervandaan wil oorgaan na julle toe, nie kan nie, en dié wat dáár is, ook nie na ons toe kan oorkom nie.’ Toe sê hy: ‘Ek smeek u dan, vader, stuur hom tog na my pa se huis toe. Ek het nog vyf broers. Laat hy hulle dringend gaan waarsku sodat hulle nie ook in hierdie plek van pyniging beland nie.’ Maar Abraham sê: ‘Hulle het die woorde van Moses en die profete. Laat hulle daarna luister.’ Hy antwoord egter: ‘Nee, vader Abraham, maar as iemand uit die dood na hulle toe gaan, sal hulle hulle bekeer.’ Maar hy sê vir hom: ‘As hulle na Moses en die profete nie luister nie, sal hulle nie oortuig word nie al sou iemand uit die dood opstaan.’ ”(Luk.16:19-31) ~ Willem Botha, 28/06/2023
My foon lui: Goeiemiddag, is dit Mnr. Botha? En sy gee my volle name en ID nommer. Baie vriendelike Afrikaanssprekende dame en sy sê sy is van my bank se bedrog en forensiese afdeling. Het meneer pas hierdie groot bedrag by 'n groot winkelgroep spandeer? En ook nog drie ander transaksies? Nee dame, ek het nie, en ek skrik my bykans uitasem. Wees rustig meneer, ons het die transaksies reeds geblok. Verifieer asseblief net of hierdie meneer se kaart nommer is, wat sy foutloos vir my gee. Sy vertel in detail hoe versigtig mens moet wees, klets land en sand oor die probleme wat die bank met bedrieërs het, vra of al my kaarte geteken is, en sê dat my tak my die volgende dag sal skakel om 'n nuwe kaart uit te reik. Ek is uiters beïndruk oor hoe professional hierdie saak hanteer word. Met al hierdie inligting kan ek sien die bank weet hoe om hierdie goed te verhoed. Maar toe sy terloops vra vir die "cvv" nommer agter op die kaart kom al die rooi ligte aan en ek weier, skakel self die bank, net om te hoor dat daar niks fout is op my kaart nie.
Jy sien: vriendelik, in my eie taal, met al my eie detail, baie kundig, kon ek baie geld verloor het. So word ons daagliks deur skelms gevang omdat alles so "reg" lyk, soos daardie tweedehandse motor by die handelaar wat vir jou vertel dat 'n ou dame die eerste en enigste eienaar was. Ja ja, dis mos net bejaarde dames wat motors ry. Of soos daardie goeie makelaar wat jou dubbeld die bank se opbrengs verseker. Selfs 'n kerkmens, daai ou. En so word ons bedrieg. Wat my laat dink aan hierdie volgende teks.
"Daar sal vals christusse en vals profete na vore kom, en hulle sal groot tekens en wonderwerke doen om, as dit moontlik was, selfs die uitverkorenes te mislei." (Mat. 24:24)
Ek is seker jy het ook al só baie van hierdie goed gesien. Soms is dit nie eers skelm bedoel in hierdie konteks nie, maar dalk moet mens maar versigtig wees. Soos 'n jong dame van wie ek al hier vertel het wat al na hóéveel lande op gebedsreise gegaan het, wat deur ander geborg is. Is dit goeie rentmeesterskap van die Here se geld?
En vals profete en vals profesieë? Dis volop en gebeur daagliks en ek het al mense ontmoet wat na elke beskikbare "profeet" toe gaan om te hoor wat die Here vir hulle sê. Dit raak soos 'n verslawing. So asof die Here net nooit direk met jou praat nie.
En ons ken ook die sogenaamde "genesings dienste" waar woeste wonderwerke plaasvind, maar wat later as onwaar en oneerlik bewys word. Dit gaan natuurlik met groot geldelike bydraes gepaard!
Maar kom ek sê net iets baie duidelik. As ek nie glo in profesie en Goddelike genesing nie, kan ek maar my Bybel weggooi! Maar ek toets eerder hierdie uitsprake deeglik, want mense praat so graag in die Naam van die Here. En wie is ek dan om dit in twyfel te trek? Die Here het dan duidelik met hulle gepraat! Wel, toets dit maar eerder.
Ons woon in 'n tyd waar mens maar eerder alles moet bevraagteken en toets.
Daar is baie maniere, luister self fyn wat die Here vir jou sê, toets uitsprake aan die Bybel, laat tyd verloop voor jy reageer op goed, want tyd laat dikwels die ware lig op dinge val en toets hierdie dinge ook by mentors wie jy regtig vertrou.
Nie alles wat jy vir die Here vra gaan nét 'n goeie uiteinde hê nie, maar die meeste valse profete verkondig nét voorspoed. Oppas daarvoor.
Laastens, as jy regtig 'n begeerte het om die Here se stem te hoor, sál Hy self met jou praat, deur jou gebed, of 'n sagte stem in jou binneste, maar gewoonlik deur die Bybel.
Oppas vir valse leraars en profete, hulle is volop. ~ Willem Botha, 26/06/2023
“So sê die Here wat jou gemaak het, Hy wat jou gevorm het in die moederskoot en jou nou nog help: Moenie bang wees nie.” (Jes. 44:2) Ek het so vinnig gekyk en dit lyk my net in die boek Jesaja alleen kom hierdie trooswoord vyftien keer voor: Moenie bang wees nie. Soms hoor ek mense sê dis ’n opdrag en dus eintlik ’n sonde as ons wel bang is. Maar as ek hier in Jesaja lees, dan is dit ’n God wat omgee, wat sagmoedig van hart is, wat ons wil help en troos en versterk wat sê: “Moenie bang wees nie, Ek is by jou, moenie bekommerd wees nie, ek is jou God. Ek versterk jou, Ek help jou, Ek hou jou vas, met my eie hand red Ek jou.” (Jes. 41:10) En dan sê Hy dit wéér in vers 13: “Ek is die Here jou God, Ek vat jou hand, Ek sê vir jou: Moenie bang wees nie, Ek help jou. Moenie bang wees nie.” So, wat maak jou bang? Waaroor lê jy en bekommer in die nag? Wat is dit wat jou keel toedruk en jou in koue sweet laat uitslaan? Wat is dit wat jou die gevoel gee dat alles buite beheer is, jy kan nie meer uithou nie en jou voete gly? Is jy bang vir die onbekende en dit waaroor jy geen beheer het nie? Is jy bang jy verloor jou werk of jou gesondheid of een van jou geliefdes? Is jy dalk bang om standpunt in te neem en stroomop te swem? Is jy bang vir ’n eksamen, werksonderhoud of ondervraging wat voor jou lê? Is daar iets wat jy nie kans sien om te doen nie? Is al jou hulpbronne uitgeput – geen krag, geen geld, geen raad en geen planne? Hoor vandag die rustige stem van jou Skepper wat sê: moenie bang en bekommerd wees nie. So sê die Here, Here: Ek maak jou sterk, Ek help jou, Ek hou jou vas, Ek vat jou hand, Ek red jou. Daar in jou stresvolle oomblik, probeer in jou geestesoog sien hoe die Here by jou is en jou aanmoedig om te doen wat jy moet doen. Die beste raad vir vrees en bekommernis is die wete dat jou God by jou is. Hy gee nie noodwendig die antwoorde nie, Hy gee Homself. Aanvaar dit in geloof.  ~ Wilna Botha, 22/06/2023
So sê die Here, Here: “Ek sal hulle ontrou genees. Ek sal hulle van harte liefhê ... Ek sal vir Israel wees soos die dou. Hy sal bloei soos ’n lelie en hy sal so vas staan soos die Libanon. Hy sal geil groei. Hy sal so sterk wees soos ’n olyfboom en hy sal ruik soos die plante van Libanon ... Hulle sal welig groei soos ’n wingerdstok.” (Hos. 14:5-8) Dit gryp my so aan die hart en “breek my brein” (soos die jonges sê) as ek hier, soos op tientalle ander plekke in die Bybel, sien hoe groot God se genade is, hoe Hy sy volk (én vir ons) weer en weer vergewe, weer en weer na ons uitreik, weer en weer ons terug nooi en terug verwelkom, weer en weer genees en weer en weer meer gee as wat ons verdien of wat ons kan bid of dink of droom. Dis amper té groot om te verstaan of te verduidelik. Dis amper té goed om waar te wees. As jy ’n paar verse in Hos. 14 terugkyk sal jy sien daar is wel ’n voorwaarde: “Bely julle sonde en kom terug na die Here toe.” (vers 3) Dit vra ’n keuse en besluit van ons kant af. Dit vra ’n besef dat jy verlore is, ’n erkenning dat jy die Here nodig het. Dan het jy die versekering dat die Here, soos vir Israel, vir jou soos dou sal wees. Gaan staan in Sý dou, draai jou gesig na die druppels, maak jou hart en jou hande oop vir die oorvloed van sy genade-dou. Hy sal nuwe lewe te voorskyn laat kom, Hy sal jou skoon was, Hy sal jou verfris, Hy sal jou herstel sodat jou lewe ’n aangename geur versprei. Hy sal jou laat groei en vrug dra. Hy sal jou sterk maak en jou laat vasstaan! “Daarom sal Israel in veiligheid woon ... waar dou van die hemel drup.” (Deut. 33:28) ~ Wilna Botha, 20/06/2023
Die Bybel...
'n Ongelooflike boek met 'n ongelooflike, eenvoudige, verstaanbare boodskap wat deur 'n kind begryp kan word. Só eenvoudig, so maklik om die sentrale boodskap te verstaan met sulke bykans bonatuurlike verduidelikings van hoe om hierdie lewe te leef.
Die Bybel...
Wat 'n ongelooflike komplekse boek, waar dinge op die mees vreemde maniere inmekaar weef, dinge wat eeue uitmekaar plaasgevind het en wat in drie verskillende tale, op drie kontinente geskryf is deur meer as 40 skrywers waarvan by verre die meeste mekaar nie geken het nie.
Aan die een kant kan jy alles gelate aanvaar met kinderlike geloof, en aan die ander kant kan jy jou vasdraai in argumente en stryery oor wat God regtig gesê het, wat nog vandag van toepassing is en wat nie, en of ons dit ooit reg verstaan het.
Voorts kom die moderne samelewing, met 'n moderne liberale uitkyk en met sogenaamde "nuwe" insigte, en probeer om die Bybel te laat inpas in dit wat vir ons gemaklik is.
Jy sien, die Bybel word 'n uiters ongemaklike boek as ons probeer om God se bedoeling te maak pas in ons samelewing. Ek en Wilna het oor die naweek onsself bykans moedeloos gepraat omdat ons nie regtig seker is of dít wat ons skryf, perfek binne God se wil is nie. Ons het vir onsself gevra of ons nie dalk ook op 'n tyd dinge geskryf het wat ons nou anders verstaan nie.
"My broers, julle moenie almal leermeesters wil wees nie, want julle moet weet dat ons wat leermeesters is, strenger as ander beoordeel sal word." (Jak. 3:1) Ek vrees hierdie teks!
Daar is hordes dinge wat goeie, opregte wedergebore Christene verskillend glo en interpreteer, waarvan ons eerder wegbly. Ek kan vir jou sommer gou-gou 'n klomp dinge noem wat Christene warm onder die kraag maak as jy met hulle verskil. Daarom bly ons liewer weg van strydvrae af.
Maar waar staan ek ten opsigte van dít wat God in sy woord opgeskryf het?
* Ek staan vas daarop dat God die heelal in sy totaliteit beplan en geskep het presies soos wat Hy dit wou hê. En dít deur net te spreek.
* Ek glo dat die groot gebeurtenisse wat opgeteken is werklik gebeur het, soos die sondvloed en Noag se ark en die tog deur die woestyn en vele meer.
* Ek glo dat God se volk vir Hom belangrik is, net soos wat ons vandag vir Hom belangrik is, maar sonder om ander groeperings uit te sluit.
* Jesus se maagdelike geboorte, sy kruisiging, opstanding uit die dood en hemelvaart is ononderhandelbaar en kan nié weggeredeneer word nie. Sonder dit is ons geloof leeg.
* Die weg na die Hemel maak vir geen ander model voorsiening as deur Jesus as ons Saligmaker nie. Al die paaie loop nié na Rome nie.
* Die Bybel is die enigste Boek wat gesag het en die Woord van God is.
* En dan 'n baie, baie ongemaklike ding. God noem 'n KLOMP dinge wat Hy haat, en dit sluit dinge in waaraan ek ook skuldig is. Google gerus die woorde "Dinge wat God haat". Daar is baie. Maar dít wat Hy haat, haat Hy, maar Hy haat nie vir my en jou nie, Hy haat wel vele dinge wat ons doen. Goddank, daar is vergifnis daarvoor. En daarom moet ek maar elke liewe dag weer voor Hom gaan staan en daardie vergifnis aanvaar.
Maar kom ek sê jou, ten spyte daarvan dat dít wat soms na 'n onbegonne taak lyk, dit steeds wonderlik is om eerder daardie soms moeilike pad te loop, want die beloning daarvoor is nie nét in die hiernamaals nie, dis ook nou uiters bevredigend. Christenskap is slegs 'n straf vir diegene wat dit nie beoefen nie, en daarteen baklei.
Sien jy nou? Die Bybel hoef nie jou kop te breek nie. Glo die Here, glo wat Hy sê, en leef daarvolgens. ~ Willem Botha, 19/06/2023
Vadersdag.
Vandag dink ek met diepe dankbaarheid terug aan my ouerhuis en my standvastige pa, wie ons nooit ooit teleurgestel het op enige manier nie. Met my heel laaste gesprek met my pa voor hy oorlede is ('n paar weke later) het ek vir hom gevra of hy bang is vir die dood. Sy antwoord was "ja, want ek weet nie hoe lyk dit aan die anderkant nie". Maar nou weet hy, want hy het sy geloof in Jesus as sy Saligmaker weereens tydens daardie gesprek herhaal en bely. Eers toe ek self 'n pa geword het, en nog meer, toe ek op my pa se geboortegrond kon gaan rondloop (wat ek met 'n reuse wonderwerk 4 jaar gelede ontdek het), het ek werklik my pa begin verstaan.
Op hierdie foto is my pa, Rudolph Johannes Botha (1924-2004). Hy sou hierdie jaar 99 jaar oud wees. Op die ander foto is die huis in Tonteldoos (ek twyfel of jy weet waar dit is) waar my pa grootgeword het, saam met nog 8 ander kinders. Brandarm, met die mees karige besittings en uiterste swaarkry, is hulle hier gevorm. Roelfie-toelfie, soos wat sy vriende hom liefderik genoem het, sou net St. 6 behaal en 'n treindrywer word. Toe ek 'n kind was het ons nie 'n motor gehad nie, en eers toe ek skooltoe is (ek was die "baby" en my susters al tieners) het my ma gaan werk sodat my pa sy eerste motor kon koop, 'n Opel Kapitan (nee jy weet ook nie van daardie motors nie).
Ek kan tot vandag toe opkyk na my pa en sy voorbeeld, en sy impak op ons lewens. En ek dink onwillekeurig aan Jesus wat gesê het Hy doen net wat Hy sy Vader sien doen het. Hoe geseënd was my ouers nie om te leef in 'n tyd wat vreemde godsdienstige praktyke (waaraan ons nou daagliks blootgestel word) hulle geloof by hulle kom steel het nie. Hierdie volgende teks het by my opgekom.
"Ek dink ook aan jou opregte geloof, dieselfde geloof wat al in jou ouma Loïs en in jou ma Eunice was, en wat, daarvan is ek oortuig, ook in jou is.” (2 Tim. 1:5)
So, het my ouers se geloof enduit gehou.
“Eer jou vader en jou moeder, soos die Here jou God jou beveel het, dan sal jy 'n lang lewe hê en sal dit goed gaan met jou in die land wat die Here jou God vir jou gee."(Deut. 5:16)
Iets om onsself vandag aan te herinner. Dit was maklik om my ouers te eer. Nie oor wat ek is nie, maar oor wie hulle was. En voorts, kan ek PRESIES dieselfde van my skoonouers getuig!
Dalk het jy nog die voorreg om jou vader in jou lewe te hê. Jy is geseënd. En as jy 'n man is, het jy dalk die ongelooflike voorreg om 'n pa te wees, soos wat ek 'n pa is van twee wonderlike kinders, 'n wonderlike skoonseun en 'n wonderlike (aanstaande) skoondogter. En hulle is naby ons, en ons is betrokke in mekaar se lewens, wat 'n blessing!
Miskien het jy nie die voorreg om aangename herinneringe te hê nie, maar jy kan opkyk na jou Vader wat in die hemel is, en wat deur sy Gees in jou hart woon. As jy agter Hom aanstap, kan jy geen fout maak nie. Dalk moet jy vandag vergewe, dalk kan jy jubel oor goeie herinneringe, maar weet dat Hy sy oë nie een oomblik van jou afvat nie.
Geniet hierdie Vadersdag as dit vir jou beskore is, maar ook hierdie Vadersdag omdat Hy jou Vader is. ~ Willem Botha, 18/06/2023
So sê die Here, Here: “Sal iemand val en nie opstaan nie, of wegdraai en nie terugdraai nie?” (Jer. 8:4) Die Here is verbaas oor sy volk wat van Hom af wegdraai en aanhou loop op die verkeerde pad. Niemand toon berou nie. Niemand is spyt oor hulle foute nie. Niemand staan op nie. Niemand draai terug nie. “Nee, hulle hou  net aan voortstorm op hierdie verkeerde koers wat hulle gekies het, soos ’n perd wat in ’n geveg instorm.” (Jer. 8:6) Tog sê die Here oor en oor: kom terug, draai terug, Ek is begaan oor my volk, Ek sal help, Ek sal genees, Ek sal wonde verbind, Ek sal weer vergewe, Ek is genadig en barmhartig, Ek wag met oop arms. Geen wonder Hy vra daai retoriese vraag nie: “Sal iemand val en nie opstaan nie, of wegdraai en nie terugdraai nie?” Ek het nou so gewonder: wie sal val en nie weer opstaan nie? Dalk iemand wat só beseer is van sy val dat hy nie kán opstaan nie? Dalk iemand wat in so diep gat geval het dat hy nie kán uitkom nie? Dalk iemand wat só skaam is omdat hy geval het dat hy sommer net daar bly lê? Vir hulle almal is daar goeie nuus: die Here se genade is genoeg, die Here se arm is nie te kort op te help nie, die Here se liefde hou nie op nie, die Here se genesing maak heel en skoon, die Here se hand tel op. “Die Here julle God is genadig en barmhartig. Hy sal nie afsydig staan as julle na Hom toe terugkom nie.” (2 Kron. 30:9) Ek het gewonder: wie sal wegdraai en nie terugdraai nie? Dalk iemand wat só erg verdwaal het dat die pad terug té donker en verlate lyk? Dalk iemand wat blind geword het en nie meer die terugdraai pad kan kry nie? Dalk iemand wat graag wil terugdraai maar bang is hy word nie weer aanvaar nie? Vir hulle almal is daar goeie nuus: “Kom terug, kinders wat afgedwaal het, sê die Here. Ek maak julle my eiendom.” (Jer. 3:14) “Kom terug, kinders wat afgedwaal het, Ek wil 'n einde maak aan julle afdwaling.” (Jer. 3:22) “Die Seun van die mens het immers gekom om te soek en te red wat verlore is.” (Luk. 19:10) Die Here se soektog en genade en redding kom in werking wanneer jy afgedwaal het. Ja, Hy sal nege-en-negentig skape los en agter die een aangaan wat weg is en hom soek totdat hy hom kry. Staan op, draai terug – so sê die Here, Here. ~ Wilna Botha, 14/06/2023
Oor 'n week van nou af, sal dit 44 jaar gelede wees wat ek by die weermag uitgeklaar het na twee jaar diensplig. 'n Paar dae gelede het 'n paar van ons manne wat saam daar was saamgekuier, soos wat ons nou gereeld doen. Na soveel jaar kom die gesprekke steeds op van die swaarkry wat daarmee gepaard gegaan het. Nee, nie die onuithoubare koue in Potch se winter in 'n tent nie, ook nie die yskoue water waaronder ons elke dag moes stort nie, of die toilette (longdrops) sonder deure nie, nie die lewensgevaarlike situasie op die grens nie, nie eers te praat van die uiters onsmaaklike kos nie. Nee, die grootste hiervan is die bykans onmenslike behandeling van diegene wat mag oor ons gehad het. Mag as gevolg van twee strepe op die skouer wat 'n gewone mens in 'n baie vreemde wese verander het. En voor jy nou dink ons was 'n klomp sissies wat nie die "punch" kon vat nie, wil ek noem dat dit ons sterker en beter gemaak het, en dit iets is waarop die meeste mense met trots kan terugkyk. En ek sou dit weer doen as ek moes. En VIR SEKER was daar vele (dalk die meeste) van daardie instrukteurs wat dit alles steeds met waardigheid hanteer het, en hoegenaamd nie almal was monsters nie. Inteendeel.
Nie almal kan mag hanteer nie, en nie almal wat mag het is 'n goeie leier nie, en nie almal wat mag het, het dit gekry omdat hulle dit verdien het nie. Ek dink onwillekeurig aan ons regering, wat dit regkry om daardie mag te verkry met 'n T-hemp en 'n pakkie wegneem hoender. Dit maak mens nogal siek.
"Jesus staan toe op en bind ’n handdoek om sy middel vas. Hy maak toe ’n bak vol water en begin sy volgelinge se voete een vir een was. Met die handdoek om sy lyf droog Hy hulle voete af." (Joh. 13:4-5 DB)
Jy ken hierdie hoofstuk baie goed.
"Die Woord, deur wie ons God leer ken, was reg aan die begin reeds daar. Die Woord was by God en die Woord was God. Voor enigiets nog gemaak was, was Jesus al by God. Hy het alles in die skepping gemaak. Niks het op ’n ander manier ontstaan nie. Hy het alles gemaak." (Joh. 1:1-3 DB)
Hy wat alles in die skepping gemaak het, het die dissipels se voete gewas, Hy het Hom verneder deur 'n skottel te vat en mense se vuil voete te skrop, Hy wat ALLE mag in Hemel en aarde in sy hand het, het mense se voete gewas. Hoe verstommend is dit nie om te besef dat iemand wat soveel mag het, dit nie misbruik het nie, maar daarmee gedien het. Nee vriend, ek is baie bly die korporaal het nie my voete gewas nie, en ek is baie bly dat niemand in die parlement my voete was nie! Maar Jesus het ons geleer (op 'n baie konkrete manier) hoe ons met mag moet omgaan. Dalk is iemand by jou werk besig om hulle mag op aaklige maniere te gebruik, maniere wat jou verneder en verkleineer, maniere wat jou menswaardigheid aantas en wat dalk daardie mag gebruik om jou te misbruik. Ek het nie 'n antwoord daarvoor nie, maar weet wel, die wiel draai. Die Here eis rekenskap van diegene wat oor mense aangestel word, en dis sekerlik nie vir Hom 'n ligtelike saak nie, maar ook só iemand sal eendag dit verloor en daarmee moet saamleef. Dit geld natuurlik vir my en jou ook wat dalk in 'n magsposisie is. Almal sal eendag op iemand, wat dalk destyds die minste was en vertrap was, moet staatmaak om by 'n trap opgehelp te word.
Kan jy jou net vir 'n oomblik dink hoe die wêreld sou wees as mense met soveel mag, eerstens dienaars sou wees en met integriteit hulle volgelinge (as leiers) sou dien. Dalk gaan jy deur 'n moeilike tyd as gevolg hiervan, maar hou jou oog eerder op Jesus as op mense.
"Moenie op mense staatmaak nie: hulle blaas so maklik die laaste asem uit. Hulle is min werd." (Jes. 2:22) ~ Willem Botha, 13/06/2023
“Die profete in die land pleister alles toe: hulle sien gesigte wat nie daar is nie, verkondig leuens as waarsêery en sê: ‘So sê die Here my God,’ terwyl Ek niks gesê het nie.” ( Eseg. 22:28) Ek het oor die afgelope paar maande ’n klompie stukkies geskryf oor die tema: “So sê die Here, Here”. As ek egter verse lees soos dié een in Eseg. 22:28 dan besef ek die een wat sê: “So sê die Here, Here” het ’n baie groot verantwoordelikheid om nie haar eie woorde in die Here se mond te lê nie, om nie sê: “So sê die Here my God” en dan sê die Here dalk: “Ek het niks gesê nie”! Spr. 30:6 waarsku my ook ernstig en ek neem dit biddend ter harte: “Moet niks byvoeg by wat Hy gesê het nie; Hy sal jou bestraf en jy sal daar staan as ’n leuenaar.” Toe ek ’n kind was, was die Bybel ons enigste bron van geestelike kennis en inligting en die dominee die enigste een wat dit vir ons verduidelik het. Dink maar net hóéveel inligting daar vandag is: honderde boeke in CUM, duisende webblaaie, tienduisende Facebook groepe en blaaie, vele TV-programme en hordes leke-predikers. Hoe meer mense daar is wat sê: “So sê die Here, Here”, hoe meer moet ons toets en ondersoek en bid en dink en vra of die Here iets gesê het. “Daarom sê die Here: Dit kan julle weet, Ek is teen hierdie profete wat hulle boodskappe by ander steel en maak of Ek dit gesê het. Ek is ’n opponent van hierdie gladdemondboodskappers wat stories vir die mense vertel en sê dit kom van My af. Hierdie profete se drome is niks anders as hulle verbeelding nie. Dit is ’n spul leuens wat my mense op die verkeerde pad lei. Ek het hulle nie gestuur nie en Ek het niks vir hulle gesê om vir julle te sê nie.” (Jer. 23:30-32, Die Boodskap). Hier is my gebed vir vandag: “Laat die woorde van my mond en die oordenking van my hart welbehaaglik wees voor U aangesig, o Here.” (Ps. 19:15, OAV) ~ Wilna Botha, 08/06/2023
Het jy al ooit vir die Here die volgende gesê: "Here, baie dankie vir al U bonatuurlike seëninge en dít wat U alles vir my gee. Maar Here, ek het nou heeltemal genoeg, moet asseblief nie verder vir my nog meer gee nie, gee eerder vir ander." Miskien het jy al, maar ek kan nie onthou dat ek al het nie. "Here, ek is nou heeltemal tevrede met my uiterlike". Nee, dit werk nie so nie. Of wat van: "Here, sus en so se huis en besittings is báie mooier as myne, en hulle hou wonderlike vakansies, gee hulle asseblief nog báie meer en hou dalk 'n bietjie van dít wat na my toe kom terug, en gee dit vir hulle."
As jy soos bykans elke mens op aarde (ryk ek arm) is, het jy ongeveer 10% te min. Terwyl my en jou 10% dalk meer is as 'n paar biljoen mense se totale besittings.
Ek en jy, kry NÓÓIT genoeg nie, en jy kan dit dalk selfs gaan meet aan dít wat jy graag vir die Here vra. Dis eintlik verskriklik hoe besittings ons verblind, en hoe ons die "seën" lat aanhoudend hoër stel. Nooit nooit genoeg nie.
Haai shame, en alles gaan agterbly as jy eendag uit hierdie lewe uit vertrek.
Hierdie volgende tekste het my vandag tussen die oë getref.
"As jy op heuning afkom, eet net tot jy genoeg het; as jy te veel eet, word jy naar." (Spr. 25:6)
"Die bloedsuier het twee dogters, hulle is “Gee!” en “Gee!” (Spr. 30:15)
"Die mens vir wie geld alles is, het nooit genoeg geld nie; die mens vir wie rykdom alles is, kry nooit genoeg in nie. Ook hier kom dit tot niks." (Pred. 5:9)
Mag ek werklik hierdie volgende gebed my eie maak.
"Net twee dinge vra ek van U; moet my dit tog nie weier nie; daarna kan ek sterf: moenie toelaat dat ek vals is en lieg nie; moet my nie arm maak of ryk nie, gee my net die kos wat ek nodig het, sodat ek nie te veel het en U verloën en sê: “Wie is die Here?” nie, en sodat ek nie arm word en steel en my God se Naam oneer aandoen nie."(Spr. 30:7-9)
Sjoe, dis lekker warm vanaand hier voor my verwarmer. En nou gaan ons braai... ~ Willem Botha, 07/06/2023
So sê die Here, Here: “Ek sal my woord op hulle harte skryf en dit in hulle gedagte vaslê.” (Jer. 31:33) Ons kyk op die oomblik ’n TV-reeks waarin daar ’n Joodse familie is. Al die rituele en gebruike wat hulle volg is opvallend – die klein ronde kadotjie op die kop, die gekrulde hare aan die kant van die kop, die Sabbat-viering, handewas-gebruike, raak aan die kosyn voor hulle ’n huis binnegaan, toutjies onder die klere, ens. Die gebruik om aan die deurkosyn te raak en dan die vingers te soen wat geraak het kom uit Deut. 6:9 wat sê dat die wet van die Here op deurkosyne en stadspoorte geskryf moet word. Dit moet wees waar dit opsigtelik is sodat dit ’n herinnering kan wees van die wet en wat God van hulle verwag. Dit kan ’n opgerolde papier wees wat in ’n hout houer is, of dit kan ’n gegraveerde, versierde paneeltjie wees. Daar is ook vele reëls hieroor, soos bv. dat dit nie gedruk mag wees nie, maar met die hand geskryf moet wees deur ’n betroubare “scribe”. Dit moet ook op ’n spesifieke hoogte aangebring word. ’n Ander gebruik is die tosseltjies wat onder die klere uithang wat ook dien as ’n herinnering aan God se gebooie en reëls en wat van hulle verwag word. Ai, dan is dit vir my só wonderlik om dié teks in Jer. 31:33 te lees. God sê dit sal sy nuwe verbond wees, die nuwe verbond wat vir ons ’n werklikheid geword het in Jesus: Sy woord en sy wet sal nou in ons harte en gedagtes wees. Wat God van ons verwag sal in ons gedagtes wees, in ons gewete; ons sal vanself in ons harte die aanvoeling hê van wat reg en verkeerd is, want ons het die Heilige Gees wat in ons woon. Natuurlik moet ons ook steeds die geskrewe woord lees en bestudeer en daardeur sal die Gees dit in ons harte skryf en in ons gedagtes openbaar en vir ons ’n lewende woord laat word. Natuurlik kan ons ook steeds Bybelverse ophang by die voordeur om ons te herinner aan ’n opdrag, of ’n teks oor God se liefde en versorging en nabyheid op jou foon se skerm vertoon om jou deur die dag te dra. En as jy dit lees, sal jy iets in jou binnekant voel roer, omdat God dit in jou hart skryf. Ons verhouding met God is innerlik van aard en nie uiterlike nakoming van reëls en rituele nie. “Lees” daai woord wat in jou hart en gedagtes is, slaan ag daarop, word versterk daardeur ! ~ Wilna Botha, 06/06/2023
Die kombuis horlosie tik rustig, dag en nag, teen presies dieselfde tempo. Tiek tok Tiek tok. As jy mooi luister kan jy hom hoor in die nag, en daardie tempo bring gewoonlik vir my 'n rustigheid in my gemoed. Tiek tok Tiek tok, sestig keer 'n minuut, en daardie wyser draai altyd regs om, want dis hoe hy gemaak is. Hy kan nie terug draai nie, want hy is so gemaak deur die horlosiemaker, want tyd kan nie terugdraai nie. Elke sekonde wat jy hom gehoor het, het nóg 'n sekonde van die lewe agter jou in die niet verdwyn, en daai wyser haas hom om by die volgende sekonde uit te kom. Half ongeduldig spook hy voort, al in die rondte. Tiek tok, nog 'n paar sekondes verby vandat jy hierdie sinnetjie begin lees het. Jy moet wikkel as jy lees, want die tyd wat oor is krimp genadeloos, en sleep jou vervaard saam na dáár waar jy nog nie wil wees nie. Tiek tok Tiek tok...
Die lewe is soos 'n toiletrolletjie, hoe nader aan die einde, hoe vinniger loop hy af.
Ek verjaar eersdaags en dit raak skrikwekkend as ek besef tot waar die jare aangestap het. Volgens die norme van vandag is ek al heel verby my middeljare en op pad na bejaard toe. BEJAARD? WAT? IS JY GEK? Ek? Wat beteken dit? Ver verby halfpad, baie baie ver verby. Hoeveel is oor? Ons leef 29200 dae as ons tagtig word, en daar is skrikwekkend min oor.
Dan kom die vrae:
Het ek bereik wat ek wou?
Het 'n genoeg, te veel of te min bymekaarmaak? Wat was die prys daarvoor? Wat gaan saam?
Het ek genoeg verskil gemaak? Wie het die meeste gebaat by my daaglikse geswoeg en al my arbeid?
Gaan ek met leë hande, soos ons as kinders gesing het? "Moet ek gaan met leë hande, moet ek so my Heer ontmoet, nie een dag aan Hom gewei nie, niks te offer aan Sy voet. Nie een siel gelei na Jesus..."
Is ek dankbaar genoeg? Hoeveel seëninge het net ongemerk gekom en gegaan?
Het ek dalk SO baie gekla, dat Hy dalk gewonder het of ek blind geword het vir Sy goedheid en guns?
Het ek die lewe genoeg geniet en het ek vreugde vir ander gebring?
Laastens, wanneer is mens reg vir die "finale ontmoeting"? Is ek reg daarvoor of moet ek eers nog 'n klomp goed met Hom regmaak? En dalk 'n klomp goed met ander mense?
Kan ek sê: dit was goed? Alles was goed?
Maar nou ja, dit klink vreeslik negatief en mistroostig, al is dit 'n realiteit!
Begin onmiddellik om elke dag voluit te leef, asof jy nog 'n hele lewe voor jou het! Stel alles reg wat jy kan, en hou om vadersnaam op om elke dag die laaste asem uit te blaas. Hou op om die probleme van die land as 'n verskoning te gebruik om mistroostig weg te kwyn.
"Solank jy onder die lewendes is, het jy hoop. 'n Hond wat lewe, is beter as 'n leeu wat dood is." (Pred. 9:4) ~ Willem Botha, 30/05/2023
So sê die Here Here: “Wanneer dit alles gebeur het, sal Ek my Gees laat kom op al die mense ... In daardie tyd sal Ek my Gees laat kom selfs op dié wat nie in aansien is nie.” (Joël 2:28-29) Dis weer Pinkstertyd, die tydperk wanneer ons baie dink en praat oor die uitstorting van die Heilige Gees, wanneer ons opnuut verwonderd raak oor ons eie Geesvervulling en weer diep bewus raak van die werking van die Gees in ons lewens. In hierdie teks in Joël 2 is daar twee dinge wat my hart warm laat voel. Die Here praat hier in Joël van ’n spesifieke tyd, ’n spesifieke oomblik wanneer Hy sy Gees op mense sal laat kom – en ek besef daar was vir ons almal ’n spesifieke oomblik toe die Gees van God by ons kom intrek het, ons kom vul het, “op” ons gekom het. Dit was daai oomblik toe jy Jesus in jou lewe aanvaar het, toe jy die boodskap van verlossing gehoor en geglo het: “Met die een wat in My glo, is dit soos die Skrif sê:  Strome lewende water sal uit sy binneste vloei. Hiermee het Hy na die Gees verwys, want die mense wat tot geloof in Hom kom, sou die Gees ontvang.” (Joh. 7:38-39) Miskien voel jy dat jy nog nie só ’n oomblik beleef het nie. Wel, daai oomblik kan nóú wees.  “Ek sê vir julle: Vra en vir julle sal gegee word. Soek en julle sal kry. Klop en vir julle sal oopgemaak word ... Hy sal die Heilige Gees gee vir dié wat vra.” (Luk. 11:9, 13) So sê die Here Here: Vra, soek, klop in geloof – Hy sal die Heilige Gees gee. Die tweede groot ding wat die Here in Joël 2 sê is dat Hy sy Gees op álle mense, selfs die wat nie in aansien is nie, sal laat kom! Dis ek en jy ook. Ons is nie té jonk, té oud, té sondig, té swak, té dom, té vêr afgedwaal, té diep in die duisternis om die Heilige Gees te ontvang nie. Moenie dit weerstaan nie. “Laat die Gees julle vervul.” (Ef. 5:18) So sê die Here Here: Ek sal my Gees laat kom op al die mense! ~ Wilna Botha, 25/05/2023
Na aanleiding van my vorige boodskap het ek hierdie boodskap (wat ek in 2019 geplaas het) gaan opdiep en ek plaas dit graag weer, omdat dit van toepassing is op die boodskap oor gebed.
Kleingeloof
Mat. 17:20 "Dit verseker Ek julle: As julle maar geloof gehad het so groot soos 'n mosterdsaadjie, sal julle vir hierdie berg sê: 'Gaan staan daar eenkant!' en hy sal gaan. Niks sal vir julle onmoontlik wees nie."
Ek het hierdie ding al probeer en uitgetoets, toe ek 'n klein seuntjie was. Ek onthou die dag so goed soos gister, ek onthou my smagting dat ek hierdie geloof mag hê en ek onthou ook die emosies wat daarmee saamgegaan het. Ek het van daardie plat vuurhoutjie boksies versamel wat jy soms in hotels en openbare plekke gekry het wat oop flap, en dan breek jy die vuurhoutjies een vir een af as jy dit gebruik. My versameling het daardie tyd gegroei tot 'n hele drie boksies en ek het so begeer om meer te hê! Toe besluit ek om te bid, want om een of ander rede het ek bogenoemde teks in gedagte gehad.
Ons het in Villieria in Pretoria gewoon langs die treinspoor (aan die verkeerde kant) en ek kon uitkyk op Pierneef-rif anderkant die spoor. Dit was vir my 'n reuse berg.
Ek onthou dat ek toe die boksies in 'n laaitjie gesit het en op my knieë gaan staan langs die bed, en toe bid ek kliphard. Ek het vir die Here gevra dat die laai vol bokkies moet wees, en op die koop toe dat die berg sou skuif. Ek wou sien hoe hy beweeg (om een of ander rede na die linkerkant toe, seker omdat die see die naaste aan daardie kant is) en dat daar net 'n reuse gelykte oorbly waar hy gestaan het. Na my amen het ek opgespring, en die laai oop gepluk (vol geloof soos 'n mosterdsaad) en daar groei my versameling aan na steeds slegs drie boksies. En die berg het nie 'n voet versit nie! Toe besluit ek dat ek meer moet glo en nog bid en aanhou probeer, maar na talle gebede gebeur daar toe niks! Ek onthou dat ek toe maar gelate berus het by die Here se besluit en dat Hy dalk besig is en anderdag meer vrygewig sou wees.
Ek het vandag steeds daardie kinderlike geloof, maar ek bid nie meer om goeters te kry nie. Ek bid ook nooit om geld te kry nie, maar wel dat die Here vir my sal help om die werk en krag te kry om my inkomste te verdien.
Daar is vir my baie lewenslesse in hierdie kinderlike geloof van daardie tyd. Jy sien, ek het nie toe gedink wat sou gebeur as daardie berg regtig geskuif het nie, want daar sou traumatiese gevolge gewees het vir die arme mense wat daar gebly het. Vandag besef ek dat my gebede ook ander kan beïnvloed (dinge waaraan ek nie eers kan dink nie), en dat my gebede soms selfsugtig en net vir my eie gewin is. Verder besef ek dat die Here nie materiële ding sommer so op aanvraag voorsien nie, want die mens weet nie waar om op te hou vra nie. As die Here daardie dag vir my daardie laai vol vuurhoutjies gemaak het, sou ek die volgende dag 'n Chopper fiets (daardie een met die hoë "handles" en die rathefboom) vereis het. En vandag 'n Ford Mustang.
Voorts het ek besef dat die Here nie opgehou het om vir my lief te wees as Hy nie vir my gee wat ek vra nie. Ek was as 'n klein seuntjie bewus gewees van die Here se liefde en ek is steeds bewus daarvan.
Laastens weet ek ook dat ek nie moet ophou vra nie, totdat ek 'n antwoord gekry het. Ek dink ek sal maar eendag hierdie lewe verlaat met daardie kinderlike geloof. Ek was so ruk gelede in Villieria en daardie berg staan steeds, en ek kan vandag bekostig om laaie vol van daardie vuurhoutjies te koop. Maar ek soek dit nie meer nie. ~ Willem Botha, 24/05/2023
Werk gebed?
Help dit om te bid, en het jy al klinkklare bewyse daarvan gesien dat dit "werk"? Sien jy daagliks die uitkomste van jou gebede? Of het jy ook al kliphard gebid vir 'n posisie waarvoor jy aansoek gedoen het, net om teleurgesteld te hoor dat jy onsuksesvol was? En vir siektes? Het jy al saam met hordes mense aan 'n gebedsketting deelgeneem vir iemand se genesing, toe sterf die persoon? Moet mens spesifieke woorde bid vir spesifieke siektes, anders het dit geen effek nie? Ek het dit al gehoor by mense. Hoekom bid ek drie keer per dag voor 'n ete en nie net sommer vanoggend vir al die etes nie? Hoekom bid ek gewoonlik nie voor ek 'n beskuitjie in my koffie doop nie? Moet ek op 'n gebedsreis na 'n spesifieke land toe gaan en daar gaan bid (teen enorme koste), of kan ek sommer tuis bid? Raak die gebed se krag minder met afstand? En wat van daai ou bederfie wat ek graag vir myself wil gun? Mag ek bid vir daardie nuwe vuurwa wat ek begeer? En wat van Jesus toe Hy in die tuin gaan bid het dat die Vader daardie bitter beker by Hom moes laat verbygaan? Hy is dan self God, en Hy het mos geweet hoe die raadsplan uiteengesit was. Is ons enigsins beter af in die lewe as die ongelowige wat lankal ophou bid het? Word ons meer gesond as hulle? En wat van hierdie klein goedjies waarvoor ons bid? Gryp die Here in op mikro-bestuurs vlak? Reageer Hy elke keer onmiddellik as ek "nitty-gritty" goed vra?
En so sal die ongelowige jou probeer vasvra, en my antwoord is eenvoudig: ek neem nie deel aan hierdie sinnelose is/is nie argumente nie. Ek hoef niks aan niemand te bewys nie en ek is sekerlik nie geïnteresseerd daarin om te kyk wie die meeste punte in 'n argument te behaal nie. Baie van my gebede is dalk net uit gewoonte, maar dis 'n wonderlike gewoonte. Baie gebede is nie verhoor soos ek gevra het nie (Goddank), want daar was ander beter uitkomste. As jy bid maak jy die Here deel van elke faset van jou lewe, en as jy dankie sê gee jy erkenning aan die hoogste gesag wat in die heelal bestaan. As Hy besluit om nie my gebede te verhoor soos ek graag sou wou nie, berus ek baie maklik daarby, want soms sê Hy ja, soms nee, en soms wag. Daar gebeur bonatuurlike goed in die geestesrealm as mens bid, en die ongelowiges kan die eenvoudig nie verstaan nie.
"Die mens wat nie die Gees van God het nie, aanvaar nie die dinge van die Gees van God nie. Vir hom is dit onsin." (1Kor.2:14)
Maar het ek al die bonatuurlike werking van gebed gesien? Natuurlik!!! Male sonder tal, soos jy ook.
"Bid gedurig." (1 Tes.5:17) ~ Willem Botha, 22/05/2023
So sê die Here Here: “Kyk op na die hemel, kyk na die aarde hier onder: die hemel sal soos rook verdwyn, die aarde sal word soos ou klere, en almal wat daarop woon, sal doodgaan soos muggies, maar die verlossing wat Ek bewerk, sal vir altyd wees, die redding wat Ek bring, sal altyd bly.” (Jes. 51:5) Kyk op na die hemel. Kyk in geloof op en wees verseker van die redding wat God vir ons gee, ewige verlossing wat vir ons uitloop op ’n plek in die hemel. Kyk op na die hemel en fokus op die grootheid, genade en liefde van God. Kyk op na die hemel en weg van jou probleme. Kyk verby die horison, kyk verby die hier en nou, kyk verby vandag se pyn en hartseer en wees sterk en vol moed en ontvang vrede wat alle verstand te bowe gaan. Ek lees hierdie sinnetjie êrens: “The spiral of life moves upward and heavenward, not downward.” Dis vandag Hemelvaartdag – ’n goeie dag om saam met die dissipels stip na die hemel te kyk en in jou hart die vrede te hê dat Jesus die prys betaal het vir ons ewige verlossing, dat Hy vooruitgegaan het om vir ons ook plek gereed te maak. Dis ’n goeie dag om saam met die dissipels stip na die hemel te kyk en God se seën te ontvang: “Daarna het Hy hulle uit die stad uitgelei tot by Betanië. Daar het Hy sy hande opgehef en hulle geseën. Terwyl Hy hulle seën, het Hy van hulle af weggegaan en is Hy in die hemel opgeneem.” (Luk. 24:50-51) ~ Wilna Botha, 18/05/2023
"Ek het nou gekom om hulle weg te vat uit die hande van die Egiptenaars. Ek gaan hulle uit daardie land laat wegtrek na ’n mooi en ’n groot land waar daar volop kos is. Dit is die plek waar die Kanaäniete, Hetiete, Amoriete, Feresiete, Hewiete en Jebusiete op die oomblik bly. Ek het tot in die hemel gehoor hoe die Israeliete roep dat iemand hulle moet help. Ek het ook gesien hoe die Egiptenaars hulle mishandel. Gaan terug Egipte toe. Ek wil hê jy moet na die farao toe gaan. Jy moet my volk uit Egipte gaan uitlei.” (Eks. 3:8-10)
So kry Moses die opdrag om die Israeliete te lei na die beloofde land.
Ek dink ook onwillekeurig hoe ons voorvaders byna 400 jaar gelede op soek was na 'n beter heenkome en hierheen gekom het. En nou wil ons weer vertrek na 'n beter lewe toe. Dit lyk my ons is nou maar eenmaal swerwers soos die Israelite van ouds, want dit voel of dit onhoudbaar raak hier. Waarheen? Verder suid? Is ons op pad woestyn toe? Is ons reeds in die woestyn? Maar wag, kom ons kry eers 'n moeilike vraag beantwoord. Wie is "ons"? Is "ons" diegene met die voorvaders wat saam met onse Jan aangekom het? Is dit net "ons" wat sukkel met die slegte dinge wat gebeur? Nee daar is miljoene wat baie baie swaarder as "ons" kry, en wie se lewens "ons" woestynpad soos 'n piekniek laat lyk. Ek het sommer net gewonder hoe dit sou wees as ons gesaghebbendes by die Here gaan hoor het wat Hý sou wou hê vir ons pragtige land. En dan kom daar 'n moedswillige vraag by my op. Hoe sou dit wees as "ons" by die Here gaan hoor hoe óns moet leef in ons pragtige land?
Maar hier is ons nou. En dan wonder ek: wat nou? Is ons heil elders?
Of moet ons die manna en kwartels opnuut raaksien? En wat van die Israeliete wie se klere en skoene nie verslyt het nie? Myne kry nie kans om te verslyt nie, want daar is sommer dikwels nuwes. En nee, manna en kwartels is nie ons stapelvoedsel nie, dis sommer braaivleis, bobotie en malvapoeding.
Hoe lank nog voor dit beter raak? Gáán dit beter raak? Wat is die definisie van "beter"?
Ons woestyn het baie goeie elemente.
* Die Here is hier, by ons.
* Jy kan baie meer hanteer as wat jy dink.
* Hy gee vir jou die wonderlike vermoë om aan te pas en jou eie lewe te verbeter.
* Hierdie woestyn louter jou en maak jou sterker.
* Hierdie is een van die mooiste "woestyne" op aarde.
* Daar is volop liefde tussen baie mense in hierdie woestyn.
En soos ek hier sit en skryf, besef ek dat ek nét hier wil bly. Daar is wonderlike eerstewêreld lande waar dit lyk of die Here net nie meer daar is nie, want voorspoed het gemaak dat die Here oorbodig raak. Dan eerder hier, waar Hy is. Ek bly nét hier. ~~ Willem Botha, 17/05/2023
“Ek is die Here die God van al die mense. Is iets vir My onmoontlik? So sê die Here ...” (Jer. 32:27) Daar is deesdae só baie goed waarvoor mens sê: dis onmoontlik, dit sal nooit gebeur nie, dit sal nooit regkom nie, dit sal nooit uitwerk nie, dit sal vir altyd ’n probleem wees, dis te moeilik, dis onoorbrugbaar, onuitvoerbaar, ongebonne, dis godsonmoontlik! Ja, daar is sowaar so ’n uitdrukking in Afrikaans: godsonmoontlik. ’n Saak wat vir ons so onmoontlik lyk dat ons sê nie eers God sal dit kan uitwerk nie. Het jy dalk ook, soos ek, êrens vandag gesê of gedink: dis onmoontlik! Dalk het jy dit gedink oor probleme in ons land en regering en Eskom en misdaad. Dalk het jy dit gedink oor ’n verhoudingsprobleem. Dalk het jy dit gedink oor ’n siekte of knaende pyn. Dalk het jy dit gedink oor jou geldsake. Dalk het jy dit gedink oor ’n verlore familielid wat sy rug op die Here gedraai het. Vir my is dit vandag iets om aan vas te gryp, iets om biddend voor die Here neer te sit, iets om my te troos en hoop te gee as die Here sê: is iets vir My onmoontlik? “Jesus het reguit na hulle gekyk en gesê: “Vir mense is dit onmoontlik, maar nie vir God nie, want vir God is alles moontlik.” (Mark 10:27) ~ Wilna Botha
Jy het seker ook al in die veld gestap en naderhand dors geword vir heerlike koel water. Dan het jy in die verte 'n stroompie hoor kabbel en dalk so bietjie deur bosse gestap agter die geluid aan. Jy het deur 'n toegegroeide paadjie gesukkel en die bosse het jou bene gekrap, maar dan skielik sien jy daardie stroompie bergwater voor jou. Soms weet jy nie eers waar die oorsprong van daardie stroompie is nie, maar daardie helder skoon water is uiters aanloklik. Dan sit jy jou stapsakkie neer, en hurk by die stroompie. Met jou twee hande vorm jy 'n bakkie en drink behaaglik van daardie heerlike water. Daar is min dinge so verfrissend soos dit.
So is die Here se liefde enige tyd beskikbaar vir enige een wat dit graag wil deel maak van hulle lewe. As jy daarna dors, sal jy daarop afkom en sal daardie Lewende Water jou verfris en jou dors les. Jy sal voel hoe Hy deel word van jou binneste, en jy sal voel hoe jou swaar gemoed lig en plek maak vir vreugde en vrede.
"Die Here se liefde is soos ’n borrelende fontein. Dit maak van jou ’n sprankelende mens. Dit beskerm jou teen angs en spanning." (Spr. 14:27 DB)
As Hy eers jou dors geles het, sal jy nooit weer na iets anders smag, of daarvoor dors word nie.
“Wel, elkeen wat van hierdie put se water drink, sal na ’n rukkie weer dors word, antwoord Jesus. Wie egter van die water drink wat Ek hom sal gee, sal nooit ooit weer dors word nie. Daar sal iets in daardie persoon gebeur. Die water wat Ek vir hom sal gee, sal in ’n fontein binne-in hom verander. Hierdie borrelende, lewende water sal maak dat hy vir ewig sal lewe.” (Joh. 4:13-14) ~ Willem Botha, 15/05/2023
Dankie dankie dankie
Vir wie sê jy dankie as uiterste dankbaarheid jou oorval? Natuurlik sê ons dankie vir mense, ons is mos reg grootgemaak, maar ek praat van daardie dinge wat bo ons menslike begrip is. Vir wie sê 'n ateïs dankie? Verwonder die ongelowige hom ook aan dinge wat met groot genade oor sy pad kom? Of maak die begrip van dankbaarheid en genade niks saak nie? Ek worstel om dit te verstaan.
"Net toe Hy 'n sekere dorpie wou binnegaan, kom tien melaatse mans Hom tegemoet, maar hulle bly op 'n afstand staan en roep hard: “Jesus, Here, ontferm U oor ons!” Toe Hy hulle sien, sê Hy: “Gaan wys julle vir die priesters.” Op pad daarheen het hulle gesond geword. En een van hulle het, toe hy sien dat hy genees is, omgedraai en God hardop geprys."(Luk. 17 : 12 - 15)
EEN!!! Net een! Net een sê dankie, nadat hy genees is van 'n verskriklike siekte! Hoe op aarde is dít moontlik? Nét één? Sjoe.
As ek in die aande aan die slaap raak oorspoel dankbaarheid my soms oor 'n veilige huis met 'n warm bed en 'n warm bad, genoeg inkomste om goed te leef en 'n yskas vol kos. En dan kom daar gewoonlik 'n reuse golf van dankbaarheid oor my as ek dink aan my gesin, maar wat van die dinge wat so vanselfsprekend kom?
In my hele lewe, het ek nog nooit te min suurstof gehad om asem te haal nie, en daar was altyd genoeg reën, sonskyn en ander natuurlike elemente wat lewe moontlik maak.
En wat van die feit dat ek elke jaar maar net oor verkoue en griep kom en dit selfs vryspring?
Raak jy ook uiters gefrustreerd met trokke op die pad as jy jou jaarlikse (welverdiende) wegbreek neem see toe? Maar was jy al dankbaar dat mense daardie gevaarlike en ondankbare werk doen, sodat jy volgende week die inhoud van daardie trok op die winkelrakke sien en opkoop? Ons braak mos lekker gal oor die polisie, maar was jy al dankbaar vir die duisende wat daardie gevaarlike, veeleisende werk na die beste van hulle vermoë doen? Ons spot lekker oor Eskom, maar was jy al dankbaar vir duisende mense wat regtig alles in hulle vermoë doen om die ligte aan te hou, ten spyte van moeilike uitdagings? Was jy al dankbaar vir die mense wat jou asblik kom leegmaak voor jou huis?
Ek kan SO lank hiermee aangaan, maar ek bely ek is een van daardie nege wat maar net wegstap sonder om om te kyk en selfs net vir die Here te knik uit erkenning.
Noodsituasies maak mens kortstondig bewus van die Here se genesende hand, maar dit hou nie lank nie.
Mag die Here my vergewe daarvoor dat ek alles maar net vanselfsprekend vat.
Dankie Here! So 'n klein woordjie. Dankie Here! ~ Willem Botha, 11/05/2023
Wie is U Here?
Ps 160 ('n Psalm van Willem)
1) Wie is U Here? U wat so oneindig misterieus te werk gaan, U wat onverstaanbaar is, U wat groter is as wat ons ons kan indink.
2) Wie is U Here, U wat soms onsigbaar is terwyl ons U so graag wil sien, maar wie soms onverwags verskyn en dan so groot is dat ons U nie kan miskyk nie.
3) Wie is U Here? U wat soms vir dae stil kan wees en nie reageer op ons vrae nie, maar dan deure oopmaak en al die kaarte in plek laat val.
4) Wie is U Here, wat soms oordonderend hard kan praat, maar soms deur 'n sagte oggend bries in ons oor fluister.
5) Wie is U Here, wat deur vele misgekyk word, maar miljoene sien en hoor U as ons smag na U teenwoordigheid.
6) Wie is U Here, U wat met ons moeite maak, terwyl ons so sondig is, en U konstant teleurstel.
7) Wie is U Here, wat soms genees en soms nie, U wat soms ons gebede verhoor en wonderwerke doen, maar tog soms lyk of U, U aangesig van ons af wegdraai.
8) Wie is U Here, wat dikwels die dood toelaat, en wat dikwels die ergste laat gebeur, maar dan onmiddellik daar is om te vertroos.
9) Wie is U Here, wat U Seun kon laat sterf, sodat ons nie ook hoef te sterf nie, U wat op hierdie vreemde manier U liefde bewys.
10) Wie is U Here, wat soms so moeilik is om te verstaan, dat geleerdes struikel en rondtrap, maar klein kindertjies kan U raaksien en bonatuurlik glo.
11) Wie is U Here, wat geloof in ons kan laat wortel skiet, geloof in Iemand wie ons nie kan sien nie.
12) Wie is U Here, wat my waardig genoeg ag om my naam in U handpalms te graveer, en my naam in die boek van die lewe neerskryf.
13) Wie is U Here, ek verstaan U nie altyd nie, ek is nie heilig soos ek moet wees nie, maar tog kry ek soms trane as ek aan U dink.
14) Wie is U Here? U sê "Ek is..."
Daarmee kan ek saamleef.
Sela ~ Willem Botha, 08/05/2023
So sê die Here Here: “Ek verander donker voor hulle in lig en Ek maak die ongelyk plekke gelyk. Dit is wat Ek gaan doen, Ek gaan daar nie van afsien nie.” (Jes. 42:16) Baie kere kyk ek só vas in vandag se moeilikheid en probleme dat ek dink dis nou hoe die hele toekoms gaan wees: donker en sonder hoop. Ek lees nou die dag dié interessante stukkie wat sê behalwe IQ (intelligence quotient) wat mens se intelligensie en vermoëns weerspieël, is daar ook ’n EQ (emotional quotient) wat ’n aanduiding is van jou vermoë om vrede te bewaar, mense ruimte te gee, verdraagsaam, bedagsaam, opreg te wees teenoor mense, om verantwoordelik op te tree, grense te respekteer, ens. Dis ’n weerspieëling van jou karakter. Wat daarby aansluit is ’n SQ (social quotient) wat verklap hoe goed jy verhoudings kan opbou en hoe jy vriendskap en verwantskap met mense oor ’n lang tydperk in stand kan hou. Daar word blykbaar deesdae van ’n vierde aspek gepraat, nl. ’n mens se AQ (adversity quotient). Dit verwys na ’n mens se vermoë om deur ‘n moeilike tyd te gaan en goed anderkant uit te kom, jou vermoë om deur verlies, swaarkry, siekte, trauma, ongeluk ens. te werk, om terug te bons ná terugslae en weer moed te hê om voort te gaan. Nou ja, ek dink as mens ’n goeie telling kry vir enige van hierdie Q’s is dit maar net die Here se genade, of hoe? Dié teks in Jes. 42:16 het my laat dink aan die AQ – die terugbons kwosiënt, die opstaan-en-weer-begin kwosiënt, die lig-in-die-donker-raaksien kwosiënt. En ook dít kom deur die Here se genade. Hoe kan mens glo dat die son wel weer sal skyn, hoe sal jy die lig in die donker tonnel sien, hoe sal jy kan fokus op die silwer randjie om die donker wolk as jy nie die Here in jou lewe het nie? Dis net Hý wat donker in lig verander, wat ongelyk, moeilike, rowwe paaie gelyk maak, slaggate opvul, struikelblokke wegrol, boeie laat stukkend breek. Kyk hoe mooi sê Job se vriend vir hom: “... kan jy jou swaarkry vergeet en daaraan dink asof dit water is wat weggeloop het. Jou lewe sal meer lig hê as die helder middag, jou donker sal lig word soos die môre. Jy sal gerus wees omdat daar vir jou vooruitsigte is.” (Job 11:16-18) Mag die Here vir ons ’n hoë AQ  gee! ~ Wilna Botha, 04/05/2023

Mense beskuldig Christene graag daarvan dat hulle so vol foute en sondes is, dat dit ander wegstoot van die Here af. Iemand het eendag gesê dat die kerk die rede is hoekom hy nie kerk toe gaan nie en mense vertel graag hoe Christene hulle seergemaak het.
Sommige van hierdie elemente is seker waar, maar dit maak dat ons dan maar eerder stilbly oor ons geloof en nie ander wil bedien nie.
Kyk net hoe raak vat Dawid dit in hierdie teks.
"U weet hoe sondig ek is, o God, my verkeerde dade kan ek tog nie vir U wegsteek nie. Here, almagtige God, moenie dat dié wat op U vertrou, deur my toedoen teleurgestel word nie. God van Israel, moenie dat dié wat by U hulp soek, deur my toedoen beskaam word nie." (Ps. 69:6-7)
Ons kan maar gerus ook hierdie woorde ons eie maak, maar ek wil tog 'n ander hoek ook op hierdie ding sit. Hier is 'n paar punte:
* Moenie dat mense jou as 'n verskoning gebruik omdat hulle nie die Here wil dien nie.
* Moenie dink jy moet volmaak wees om iets vir die Here te beteken nie.
* Ja, Christene maak mense seer, maar daardie selfde mense maak ander ook seer.
* Staan op as jy geval (of teruggegly het) en gaan weer aan met die goeie werk.
* Jou redding maak hoegenaamd nie van jou 'n volmaakte mens nie.
* Omring jou met mense wat jou opbou, eerder as met mense wat jou afbreek.
* Jy hoef nie in mense se goeie boekies te kom nie, jy is reeds in die Here se goeie "boekie".
* Versprei die goeie nuus. Dis al wat jou werk behels, dis die Here wat die saad laat groei.
* Daar is net twee situasies wanneer jy die Woord van God mag verkondig. Tydig en ontydig!
"... verkondig die woord; hou daarmee vol, tydig en ontydig; weerlê, bestraf, bemoedig deur met alle geduld onderrig te gee" (2Tim. 4:2) ~ Willem Botha, 03/05/2023
“Die Here sê: ’n Mens wat wysheid het, moet nie loop en spog met sy kennis nie. Net so moet iemand wat sterk is, nie grootpraat oor sy krag nie. Dieselfde geld vir mense wat ryk is; hulle moet nie dink hulle is beter as ander mense omdat hulle baie geld en goed het nie. As daar mense is wat tog wil spog, is daar net een goeie rede en dit is dat hulle insig het en My ken.” (Jer. 9:23-24, DB) So sê die Here Here. Ons het niks waarop onsself kan trots wees nie, ons het niks gedoen waaroor ons op onsself kan roem en vir onsself eer toe-eien nie. Al het jy ook hoe hard gewerk om iets te bereik of te bekom, bly dit nog steeds iets wat die Here jou vergun het, waarvoor Hy jou toegerus het, waarmee Hy jou gehelp het, waarvoor Hy jou genade, gesondheid en krag geskenk het. “Jy kan dalk dink: my krag en my sterk hande het vir my hierdie rykdom verwerf. Maar jy moet die Here jou God nie vergeet nie, want dit is Hy wat jou die krag gee om die rykdom te verwerf.” (Deut. 8:17) Ons ken almal iemand wat dink hulle is beter as jy omdat hulle kennis en kwalifikasies het – dalk is dit jy self! Ons ken almal iemand wat grootpraat oor hulle krag en vermoëns – dalk is dit jy self! Ons ken almal iemand wat grootkop het en verwaand is omdat hulle ryk is en wonderlike besittings het – dalk is dit jy self! Ai, ons weet tog dat enige van daai dinge in ’n oogwink kan verander. Die slimme kan homself êrens vasloop en ’n fout begaan. Die sterke kan enige oomblik swak word, sy krag kan hom in die steek laat (dink maar aan Goliat se vernedering toe hy teen die Dawid te staan gekom het), sy krag kan van hom weggeneem word deur siekte of ongeluk waaroor hy nie beheer het nie. Die ryke kan in ’n oogwink sy geld of besittings verloor, sy skatte kan waardeloos word, deur mot en roes verniel word  (dink maar aan die gelykenis van die ryk dwaas in Luk. 12. “Maar God het vir hom gesê: ‘Jou dwaas. Vannag nog sal jou lewe van jou opgeëis word, en wie kry dan alles wat jy bymekaargemaak het?’ So gaan dit met hom wat vir homself skatte vergader en nie ryk is by God nie.” (Luk. 12:20-21)) Pred. 9:11 vat dit mooi saam:  “Verder het ek in hierdie wêreld gesien: dit is nie die vinnigstes wat die reisies wen nie, nie die sterkstes wat die oorlog wen nie, nie dié met wysheid wat kos het nie, nie die verstandiges wat ryk word nie, nie dié met kennis met wie dit goed gaan nie.” Kom ons ondersoek maar weer ons harte en gesindheid en motiewe – wat is regtig belangrik? So sê die Here Here: As daar mense is wat tog wil spog, is daar net een goeie rede en dit is dat hulle insig het en My ken. “Maak vir julle skatte by Hom bymekaar. Dan wag daar ’n splinternuwe lewe op julle.” (Luk.12:21, DB) ~ Wilna Botha, 02/05/2023

Amazing grace how sweet the sound
That saved a wretch like me
I once was lost, but now I'm found
Was blind but now I see
'Twas grace that taught my heart to fear
And grace my fears relieved
How precious did that grace appear
The hour I first believed
Through many dangers, toils, and snares
I have already come
This grace that brought me safe thus far
And grace will lead me home
When we've been here ten thousand years
Bright, shining as the sun
We've no less days to sing God's praise
Than when we first begun
Amazing grace how sweet the sound
That saved a wretch like me
I once was lost, but now I'm found
Was blind but now I see

Hierdie lied is in 1772 geskryf. Ek glo derduisende mense is al hierdeur verander, en het vertroosting gevind in moeilike omstandighede as hulle hierdie kosbare woorde sing.
Sing dit as jy dalk verlore voel. Sing dit as jy twyfel of die Here vir jou lief is. Sing dit as dit lyk of daar geen lig in die tonnel is nie. Sing dit as jy net weereens dankbaar voel dat hierdie woorde vir jou waar is. Sing dit as jy besef dat daar steeds hoop is vir my en jou. Sing dit as jy sommer net in jou gedagtes alleen met die Here kuier en in stilte "nagmaal vier". Dis tog die wese van jou saligheid.
Ek hoop hierdie pragtige lied sal vir 'n rukkie in jou kop draai. ~ Willem Botha, 01/05/2023
Het jy al in benoudheid uitgeroep na die Here? Het jy al ook sy Naam aangeroep op 'n tyd wat jy besef dis die heel hoogste gesag waarna jy kan uitroep? Here, help my. Here, waar is U? Here, bring vir my troos. Here, dankie dankie dankie vir U guns wat U op my uitstort. Here, ek eer U vandag omdat ek U vandag opnuut raaksien in my lewe. Here bevestig asseblief weereens U beloftes aan my.
Van kleins af het ek grootgeword met die gedagte dat die Here net 'n uitroep ver was. Hoeveel keer was ek al doodsbenoud, en die Here was daar toe ek sy Naam aanroep. Of na Hom uitroep. So lees ek vandag hierdie kosbare teks in Genesis 4 raak.
"Adam het weer met sy vrou gemeenskap gehad, en sy het 'n seun in die wêreld gebring en hom Set genoem, “want,” het sy gesê, “God het vir my 'n ander kind gegee in die plek van Abel omdat Kain hom vermoor het.” Ook vir Set is daar 'n seun gebore, en Set het hom Enos genoem. In daardie tyd het die mense begin om die Naam van die Here aan te roep." (Gen. 4:25-26)
Hoe spesiaal is dít nie?
"In daardie tyd het die mense begin om die Naam van die Here aan te roep."
Besef jy hoe lank terug dit moes wees? Daar was nie kerke of tempels in daardie tyd nie. Die mense was waarskynlik nogal ongeletterd, maar hulle het geweet hulle kan net na Hom uitroep. Dit was in die begin van die begin van die mens se geskiedenis, en die mense het die Naam van die Here begin aanroep.
So kan ons Hom daagliks aanroep, daagliks vrylik tot Hom bid en vrylik met Hom gesels.
" Elkeen wat die Naam van die Here aanroep, sal gered word." (Rom. 10:13)
Kyk nou net, verlossing is net een uitroep ver, soos die misdadiger aan die kruis langs Jesus.
"LOOF die Here, roep sy Naam aan, maak onder die volke sy dade bekend."(Ps. 105:1)
Tussen hoeveel mense sal jy jou kind se uitroep herken? Tussen hoeveel geraas sal jy weet dat jou kind na jou uitroep? Jy ken daai antwoord baie goed.
Roep die Here aan, Hy sal hoor! ~ Willem Botha, 26/04/2023
“So sê die Here: Daar rus ’n vloek op die mens wat sy vertroue in mense stel, wat sy krag soek by sterflike mense en van My wegdraai.” (Jer. 17:5) Ons almal stel tóg wel die een of ander tyd ons vertroue in ’n mens – jou man of ouers, jou baas of kollega , jou dominee of geestelike vriend. Ons hét mense nodig om ons te lei en te help en self neem ons ook dikwels daai posisie in waar ander weer op óns vertrou, nie waar nie? Dit voel nie vir my of vandag se vers sê ons moet glad nie op mense vertrou nie, ek dink die waarskuwing wat die Here vir ons gee is dat ons moet besef dat mense feilbaar is, foute maak, nie betroubaar is nie; dat mense kan jok, van plan verander en dat hulle hul eie belange bo ons s’n gaan stel; dat ons nie seker kan wees van hulle motiewe en nie op hulle integriteit kan peil trek nie. Soos Jes. 2:22 sê: “Moenie op mense staatmaak nie: hulle blaas so maklik die laaste asem uit. Hulle is min werd.” Die groter probleem wanneer ons op mense vertrou, kom wanneer dit daartoe lei dat ons van die Here af wegdraai (soos die teks hier bo sê), dat ons vergeet dat Hý die ware Betroubare is, dat ons Hom nie as die eerste prioriteit in ons lewe plaas nie. “So gaan dit met hulle wat vir God vergeet... Hy vertrou op ’n dun draadjie, hy maak op ’n spinnerak staat.” (Job 8:13-14) Hier is my gunsteling “so sê die Here Here”-vers vir vandag: “Dit gaan goed met die mens wat sy vertroue in die Here stel, die mens vir wie die Here 'n veilige vesting is; so iemand is soos 'n boom wat by water geplant is en sy wortels na die stroom toe uitstoot, nie die hitte voel as dit kom nie en altyd groen blare het; 'n droë jaar raak hom nie en hy hou nie op om vrugte te dra nie.” (Jer. 17:7-8) Vertrou in die Here, julle God en julle sál vasstaan. ~ Wilna Botha, 25/04/2023
“So sê die Here die Almagtige: Skep moed!” (Sag 8:9) Waarvoor het jy vandag moed nodig? Waarvoor het jy groter uithouvermoë, nuwe krag en dieper hoop en gerusstelling nodig? Dalk is dit jou gesondheid waaroor jy bekommerd is. Dalk het jou finansies ’n laagtepunt bereik. Dalk het jy onlangs op die rooi tapyt voor die baas gestaan. Dalk het jou beskikbare opsies in ’n doodloopstraat geëindig. Dalk is alles om jou pikdonker omdat jy ’n geliefde aan die dood moes afstaan. Dalk werk niks meer uit nie en al jou planne val plat. Dalk het jou woorde opgeraak om ’n verhouding te probeer red. Dis nóú dat die Here Here vir ons sê: skep moed!  “Laat julle hande sterk wees,” sê die 1953 vertaling van Sag 8:9. Wees sterk. As die Here vir ons sê om moed te skep, dan weet ons Hy gaan ons ophelp. As die Here vir ons sê om moed te skep, dan weet ons Hy het ’n plan vorentoe. As die Here vir ons sê om sterk te wees, dan weet ons Hy gaan vir ons nuwe krag gee. Hier is my gunsteling “so sê die Here Here”-verse vir vandag : “My genade is vir jou genoeg. My krag kom juis tot volle werking wanneer jy swak is.” (2 Kor. 12:9) ; “Ek gee nuwe krag aan dié wat moeg is, Ek maak die moedelose weer vol moed.” (Jer. 31:25) ~ Wilna Botha, 20/04/2023
Aksies en reaksies
Newton se derde wet verklaar : "Vir elke aksie is daar 'n gelyke en teenoorgestelde reaksie."
Dis so waar in ons lewe, want elke ding wat gebeur, word deur die teenoorgestelde uitgedaag. En so is dit ook in ons Geestelike lewe. Probeer iets goed doen en die onaangename dinge probeer inmeng. Dis nou maar eenmaal so dat min dinge volmaak verloop in die lewe en soms noem ons dit sommer ou Murphy.
Maar dit lyk my waar die Here werk word so paar natuurwette verander.
1)Lig sal ALTYD donkerte oorwin, want ons kan nie donkerte skep nie, dis bloot donker weens 'n gebrek aan lig. So oorwin God se lig ook ALTYD die donker.
2) God se genade sal ALTYD ons sonde oorwin. Sonde het nie 'n kat se kans teen die "aggressiewe aanslag" van genade nie.
3) God se liefde sal ALTYD groter as Sy toorn wees, want Hy IS liefde.
4) Al lyk dit nie so in die wêreld nie, sal die kwaad altyd die goeie oorwin, as ons ons energie op die regte manier aanwend. In ons eie land is die lewe(vir die meeste van ons) steeds lekkerder as slegter, of hoe?
5) Daar is baie pyn in die wêreld, maar daar is steeds meer genesing.
6)Daar is baie trane, maar steeds meer lag.
7) Daar is baie oorloë, maar steeds meer vrede.
8) Daar is baie hartseer, maar tog meer vreugde.
Hoe sien jy die lewe se glas? Half-vol of half-leeg? Ek kies bewustelik om eerder die goeie as die slegte te sien. Dan kom hierdie opdrag vir ons uit Romeine:
Rom 12:21 "Moet jou nie deur die kwaad laat oorwin nie, maar oorwin die kwaad deur die goeie." ~ Willem Botha, 19/04/2023
Here, dat ek kan sien...
"Jesus het naby Jerigo gekom. Toe 'n blinde man wat daar langs die pad sit en bedel, die groot menigte mense hoor verbyloop, vra hy wat aan die gang is. Hulle vertel hom toe: “Jesus van Nasaret gaan hier verby.” Toe roep hy uit: “Jesus, Seun van Dawid, ontferm U oor my!” Die mense wat voor geloop het, het hom beveel om stil te bly, maar hy het al hoe harder uitgeroep: “Seun van Dawid, ontferm U oor my!” Jesus gaan toe staan en gee bevel dat hy na Hom toe gebring moet word. Toe hy naby kom, vra Jesus vir hom: “Wat wil jy hê moet Ek vir jou doen?” En hy antwoord: “Here, dat ek kan sien.” Jesus sê vir hom: “Goed, jy kan sien! Jou geloof het jou gered.” En onmiddellik kon hy sien, en hy het Jesus gevolg en God geprys. Ook al die mense wat dit gesien het, het aan God die eer gegee." (Luk. 18:35-43)
Dalk het jy ook vandag 'n eenvoudige gebed of versoek vir die Here.
Here, dat ek kan sien...
Here, maak my geeste oë oop dat ek U kan sien...
Here, dat ek genees kan word van hierdie kwaal...
Here, dat ek nie my werk sal verloor nie...
Here, dat my huwelik gered sal word....
Here, dat U my kinders sal bewaar teen slegte invloede...
Here, dat ek weer hoop kan kry vir ons land...
Here, dat ek weer kan glo in 'n blink toekoms...
Here, dat ek sal kan losbreek uit hierdie put van depressie...
Here, dat ek nie meer so baie dinge sal vrees nie...
Here, dat ek bruikbaar sal raak in U Koninkryk...
Here, dat ek 'n verskil kan maak in mense se lewens...
Here, dat U sal voorsien in my daaglikse behoeftes...
Here, dat U my sal heelmaak na hierdie reuse verlies in my lewe...
Here, dat U iemand op my pad sal sit wat hierdie geweldige eensaamheid kan verlig...
Here, dat ek onderskeidingsvermoë sal hê in moeilike besluite...
Here, dat ek weer nuttig kan voel...
Here, dat ek weer "purpose" in my lewe sal hê...
Here, dat ek sal kan vergewe en vry kom van bitterheid...
Here, dat ek vergewe sal word deur persone wat bitter voel teenoor my...
Here, dat ek myself sal vergewe...
Toe hy naby kom, vra Jesus vir hom: “Wat wil jy hê moet Ek vir jou doen?”
Moenie moed verloor nie. Die Here is gretig om te help. ~ Willem Botha, 17/04/2023
“So sê die Here: Die hemel is my troon en die aarde die rusplek vir my voete. Hoe moet die huis dan wees wat julle vir My bou, die plek waar Ek kan woon?” (Jes. 66:1)
Ek was op ‘n stadium so hartseer om te sien dat die “heilige” kerkgebou, waarin ek grootgeword het en meer as veertig jaar gelede in getroud is, verkoop is en nou ‘n koepel op het en ‘n moskee geword het! Dit was dan “die huis van die Here”! Toe ons grootgeword het het ons nie eens hard gepraat in die kerk nie want dit was ‘n heilige plek, ons het ons beste klere (en hoede) aangetrek as ons soontoe gegaan het, want dit was die huis van die Here. Dit was skoon en blink met mooi houtwerk, blink gevryfde vloere en rooi matte in die gangetjies, want die Here het daar gewoon. En nou dat dit ’n moskee geword het, waar woon die Here dan nou? Het God nou minder heilig geword, of is sy eer aangetas omdat dié spesiale gebou nou vir iets anders gebruik word? Nee, definitief nie. Na my mening is die kerk net ‘n gebou van bakstene en sement, dit is eers wanneer óns daar ingaan en God aanbid dat dit ‘n heilige plek word. Waar Christene bymekaar kom is die Here in hulle midde, en word dit ‘n heilige plek, of dit in ‘n sitkamer, onder ‘n boom, in ‘n sel in die gevangenis, of in die mooiste, sierlikste kerkgebou is. Wat help dit tog as die kerkgebou heilig is, maar ons wat daar ingaan bied nie ons lewens en liggame aan God as ‘n heilige, afgesonderde woonplek nie? Na my mening is laasgenoemde veel belangriker! “Hoe moet die huis dan wees wat julle vir My bou, die plek waar Ek kan woon?” – óns is die plek waar Hy wil woon. Hier is my gunsteling “so sê die Here Here”- vers vir vandag:  “Weet julle nie dat julle die tempel van God is en dat die Gees van God in julle woon nie? ... die tempel van God is heilig, en die tempel is julle.”  (1 Kor. 3:17) ~ Wilna Botha, 13/04/2023
Dis regtig baie maklik om my vas te vra oor geestelike sake. Dis selfs maklik om my by 'n punt te kry dat ek twyfel oor baie dinge in die Bybel. En as jy vir my vra om kwelvrae oor ons Christelike geloof te beantwoord, draai ek baie vinnig vas. Ek weet nie hoekom die Here swaarkry toelaat nie, ek weet nie of 'n ongelowige óf gelowige persoon se baba in die hemel is as die kind gesterf het nie. Ek weet nie hoekom mense bonatuurlik gesond word van ongeneeslike siektes, maar niemand se ledemate groei aan as dit geamputeer is nie. Ek weet nog minder hoekom ou mense swaar kry in hulle laaste dae. En o wee, laat ons nie begin praat oor die skepping en die twee skeppingsverhale in die Bybel nie. Van die Bybel gepraat, ek het nie antwoorde as dit lyk of sommige tekste mekaar weerspreek nie.
Maar ek hoor toe vandag 'n wonderlike vergelyking wat nie in 'n geestelike konteks gebruik was nie, en daar "drop die pennie" vir my oor 'n klompie goed.
Gestel daar is 'n legkaart met een miljoen stukke, maar daar word net drie stukke vir jou gegee, hoe op aarde kan jy 'n prentjie van die geheel vorm? Maar nou verloop daar tyd en met die tyd kry jy enkele stukkies by en daar word hier en daar al effe van 'n patroon gevorm. Gaan jy opgee met die hele legkaart, of gaan jy dalk meer en verder begin soek? Hierdie is die kruks van die saak, want die mens is 'n soekende wese. Met die tyd gaan jy baie foute maak oor dít wat jy as die geheel sien, en jy gaan dit besef en soms 'n nuwe rigting inslaan. Maar in jou hele lewe, sal jy nóóit weet wat die geheel is van die lewe nie.
Wat my by die soewereiniteit van die Here uitbring. Ek en jy het absoluut geen manier om die Here en sy weë in sy totaliteit te verstaan nie. En in hierdie lewe sal jy dit op geen manier kan regkry nie, en daarom is hierdie reis en stryd om te verstaan, deel van ons lewens.
Wat sou gebeur as ek die hele legkaart kon sien? Sou ek nog geloof nodig hê?
Ek het onwillekeurig aan hierdie volgende teks gedink (en nee ek verstaan ook nie hierdie teks nie).
Toe het die Here God gesê: “Die mens het nou soos een van Ons geword deurdat hy alles kan ken. As hy nou maar net nie sy hand uitsteek en die vrug van die boom van die lewe vat en daarvan eet en altyd bly lewe nie!” (Gen. 3:22)
Einstein het lank gelede gesê dat hy nie dink dat die Here dinge vir ons verborge wil hou nie, maar net dat ons verder moet soek. Hoeveel dinge het die mens nie sedert daardie uitspraak destyds ontdek nie, maar steeds weet ons nie presies wat in 'n atoom aangaan nie. As ons nie eers 'n atoom verstaan nie, hoe kan ons die God van die atoom ten volle verstaan? As ons soek na sogenaamde "dark matter" in die heelal en dit nie kry of verstaan nie, hoe sal ons die God van "dark matter" ten volle verstaan? As ons nie verstaan hoe elke sel in ons liggaam dood is, maar ons lewe nie, hoe sal ons die God wat lewe moontlik maak ten volle verstaan?
Al wat oorbly is geloof, want soms is daardie drie legkaart stukkies genoeg om ons te laat glo dat daar Iemand is wat die groot legkaart in Sy hande hou. Jy en ek is piepklein stukkies van daardie legkaart en dit laat ons nietig voel. Maar besef jy dat daardie legkaart nie volledig kan wees sonder jou nie? Ja vriend, ons verskil van mekaar oor baie dinge, want ons weet SO min, maar solank jy deel is van die Skepper se plan, is ons almal stukkies van hierdie grootse, volmaakte geheel waarmee Hy besig is.
Glo, soek en verdra mekaar, en vra Hom om Homself aan jou te openbaar, en net dalk wys Hy vir jou nog 'n paar stukkies van sy meesterstuk. ~ Willem Botha 12/04/2023
So sê die Here Here. “Dit is volbring.” (Joh. 19:30).
“’Nou het Ek alles gedoen wat Ek moes doen.’ Sy kop het vooroor geval en Hy het sy laaste asem uitgeblaas.” (Joh. 19:30 Die Boodskap)
Tetelestai. Goeie Vrydag en Jesus sê “Tetelestai”.
Vir my is dit die hoogtepunt van die kruisgebeure, want hiermee sê Jesus dat Hy dít waarvoor Hy gekom het, voltooi het, sy werk is afgehandel. Hy het met Sy liggaam en Sy bloed betaal vir die sonde van die mensdom, vir jóú, vir mý! Tetelestai is ’n rekenkundige term wat op ’n rekening aangebring word om aan te toon dat die rekening volledig vereffen is. Dit beteken dat die rekening van opgestapelde sonde wat ons teen God het, nou deur Jesus ten volle betaal is. Daar is geen skuld meer teen ons nie. “Hy het die skuldbewys met sy eise teen ons tot niet gemaak. Deur dit aan die kruis te spyker het Hy dit vir goed weggeneem.” (Kol 2:14). Ek glo dit!
Hier is my “so sê die Here Here”-vers vir Paasfees: “Kom tog, laat ons die saak met mekaar uitmaak, sê die Here: Al was julle skarlakenrooi van sonde, julle sal wit word soos sneeu. Al was julle purperrooi, julle sal wit word soos wol.” (Jes. 1:18) ~ Wilna Botha, 06/04/2023
Ek sit sommer hier en dink aan 'n ou ietsietjie waarmee ek sukkel, en ek skryf sommer net so 'n paar gedagtes vir myself neer. Jy kan dit maar lees as jy lus is, maar dalk het jy nie dieselfde probleem as ek nie. En dis oorreageer, 'n skerp tong, nie bietjie bedaar en net rustig weer dink oor 'n slegte situasie nie.
"’n Sagte antwoord laat die woede bedaar. Skerp woorde maak mense woedend." (Spr. 15:1)
Jip, jy weet waarvan ek praat, daai ongeduld, harde woorde en vererg raak oor strooi. Die afgelope paar dae was ek gekonfronteer met 'n paar situasies waar hierdie slegte streek in my bykans die oorhand gekry het.
Ek vererg my gister omdat dinge nie vlot verloop by 'n hospitaal nie (Wilna het vertel dat sy gaan vir 'n prosedure op haar hand), maar toe alles verby is en ek met 'n saalsuster praat wat toe al vir baie ure aan diens is, doodmoeg op haar voete is, en laat by die huis gaan kom by haar drie jong kinders, het my "woede", of eerder ongeduld plek gemaak vir diep dankbaarheid. Om by 'n privaat hospitaal baie goeie diens te kry is 'n voorreg wat vir min beskore is. As ek terugdink aan my ergernis vroeër die dag oorspoel 'n skaamte my.
Ek was onlangs vies vir iemand wat werk by my huis gedoen het, maar later het ek besef dat my ongeduld gemaak het dat ek die meesterlike werk wat die persoon gedoen het, misgekyk het. Ek het toe moeite gedoen om te wys dat ek dankbaar is, en nou voel ek baie goed daaroor.
So beland ek onlangs agter 'n klompie fietsryers wat die pad vol ry en was gereed om daai aggressiewe toeter op hulle los te laat, maar toe ek besef dat die pad so smal is dat ek eerder agter hulle moet bly, het ek regtig lekker gevoel toe hulle 'n baie mooi dankie gewys het omdat ek geduldig was. Soos jy sekerlik kan dink, sou ek kon sê dat dit regtig minder as 'n minuut van my tyd gemors het. Ek kon óf baie ergerlik gevoel het daarna, óf lekker dat ek iemand anders 'n plek in die son gegun het.
'n Vinnige tong en goor reaksie op iets, laat mens nét sleg voel, en dan sê jy 'n honderd keer jammer agterna oor jou opvlieëndheid. En hier is so bietjie goeie raad (vir myself natuurlik), moenie iets lelik vir iemand skryf as jy in 'n slegte situasie was nie, jy kan daardie woorde nooit weer terugtrek nie. 'n E-pos of WhatsApp bly vir ewig en altyd 'n herinnering van jou kwade gedrag. Dis so lekker om met 'n glimlag uit 'n stryd te tree deur met sagte woorde 'n situasie te hanteer, eerder as om nog vir jare 'n onaangename selfgesprek aan die gang te hou.
Daar het sekerlik ook 'n keer of wat 'n donkiekar voor Jesus se donkie ingery, en ek glo dat Hy met 'n vriendelike handgebaar die donkiekar-taxi se drywer sou seën. Hier is daardie teks weer.
"’n Sagte antwoord laat die woede bedaar. Skerp woorde maak mense woedend." (Spr. 15:1) ~ Willem Botha, 05/04/2023
Hierdie volgende paar dae is 'n baie belangrike tyd in ons geloofslewe. Die aanloop na Jesus se kruisiging, sy dood en dan sy opstanding. Sommer 'n lekker verhaaltjie wat ons vir die kinders kan vertel, of hoe? Of is dit dalk 'n tyd wat vir menige mense hoop gee, en iets om aan vas te hou, al het dit dalk nie regtig gebeur nie? So sê die ongelowiges mos graag. Iets tot die effek van: As julle fairy tale julle gelukkig maak is dit seker maar goed.
Nee, ek en jy weet van beter. Maar die vraag is, wie was hierdie Man regtig? Hoe kon een "mens" soveel invloed op die ganse wêreldbevolking hê, en daardie invloed neem steeds ná meer as twee duisend jaar nie af nie (al sê sommiges so).
Kom ons redeneer oor 'n paar goed. Hy het niks, maar niks oor Homself geskryf nie, inteendeel, ons lees letterlik net van een insident waar Hy in die sand geskryf het, terwyl ons nie eers weet wat Hy geskryf het nie. Kon Hy lees? Definitief, want ons lees in Luk. 4:17
"Toe Hy opstaan om uit die Bybel te lees, het hulle die boekrol van Jesaja vir Hom gegee. Jesus het dit oopgemaak en begin lees..."
Hy was vir seker nie ongeletterd nie, want Hy was waarskynlik ook as 'n seuntjie onderrig in die Joodse wet. Hy het 'n geweldige wye kennis gehad van die ou Testament en het dikwels uit dele daarvan aangehaal, wat Hy dus moes memoriseer.
Toe word die owerhede kwaad vir Hom, kruisig Hom en Hy word in 'n graf neergelê waar sy liggaam streng bewaak is. Kan jy dink hoeveel invloed het Hy op daardie tyd gehad? Soveel dat die owerhede vir Hom bang was! Ai, toe dink hulle hulle het hierdie Man se mag gebreek.
Wie was Hy? Hy wat op water kon loop, water in wyn verander, mense wonderbaarlik genees, dooies opwek, duisende mense kos gee met 'n paar brode en vissies.
Vra vir jouself hoe op aarde dit kon gebeur dat hierdie eenvoudige Man wat waarskynlik net Aramees kon praat, geen boeke geskryf het nie en sonder enige tegnologie die wêreld kon verander. Ons weet nie eers hoe Hy gelyk het nie. Hoe dink jy? Watter een van hierdie twee foto's sou 'n goeie refleksie wees van sy fisiese gelaatstrekke?
So kan ons redeneer tot in die ewigheid in, maar ons sal saamstem dat daar iéts moes wees wat anders was aan Hom. Iets wat so 'n geweldige invloed op mense het, wat maak dat mense met mekaar kan saampraat, asof Hy persoonlik aan elkeen van ons verskyn het.
En dis waar die kruks lê. Hy hét verskyn aan elke wedergebore Christen, deur die Gees wat ons kom aanraak. Wie of wat anders kon dít ooit regkry? Geen wêreldleier, geen akteur, geen invloedryke persoon kon dit regkry nie. Elke enkele een se ster verskiet.
Gaan vier hierdie Paasfees met dankbaarheid vir alles wat Hy gedoen het, en steeds doen, en wees dankbaar dat jy die voorreg van geloof het, al "sien" jy nie.
Waarheid of fiksie? Jý sal weet. ~ Willem Botha, 03/04/2023
“Besef dit tog: Ek, Ek is die Here! Naas My is daar geen ander God nie. Ek maak dood en Ek gee lewe. Ek maak siek en Ek maak gesond. Uit my mag word niemand bevry nie.” (Deut. 32:39) So sê die Here Here! Daai middelste stuk van die teks is soms vir my moeilik om te verstaan en vir ’n ongelowige te probeer verduidelik – die Here kan ook slegte goed laat gebeur. Daar is altyd die ander kant van die muntstuk ook. Hy gee die een en ook die ander. Hy laat sleg en goed toe. Job is een persoon wat dít persoonlike ervaar het. Hy het albei kante aan sy lyf gevoel en tog bely hy: “Die Here het gegee en die Here het geneem. Prys die Naam van die Here.” (Job 1:21) Prys die naam van die Here want bo-oor alles is Hy God, is Hy in beheer, is Hy groter as enige menslike verstaan van die situasie. Dis vir my mooi en gerusstellend hoe die Here daai “moeilike” gedeelte in Deut. 32 toevou met dié twee feite: 1-Ek is die Here, daar bestaan nie ’n ander God nie. 2-Niks en niemand kan jou uit my mag bevry nie; sy krag kan nie gebreek word nie, niks kan dit wat Hy vir jou wil doen stuit nie. “... no one can oppose what I do”, sê  ’n Engelse vertaling. As jy dan vandag die goeie óf die slegte ervaar, onthou jy is in die hand van die Here, onthou sy krag kan nie gestuit word nie, onthou Hy sal jou deurdra. Vanmiddag het Willem met iemand gepraat wat vir jare al genees is van kanker. Iemand wat openlik sê hy is nie ’n “kerkmens” nie. Willem sê toe hy wonder of die ou besef wie hom genees het. Dis natuurlik God. Hy maak siek en Hy maak gesond!
Nou ja, ek is op die oomblik daar in die middel van die teks ... ek moet ’n klein operasie aan ’n klein liggaamsdeel (my  vinger) ondergaan. Dis klein en ja, ek weet op dieselfde dag moet baie ander mense baie groter operasies ondergaan vir baie groter probleme en lewensbedreigende siektes, maar ék is bang en ek is nie lus daarvoor nie. Maar, dit maak my rustig en gee my moed om te weet Wie saam met my is, Wie gesond maak, Wie in beheer is. Hier is my teks vir vandag: “Whenever we’re sick and in bed, God becomes our nurse, nurses us back to health.” (Ps. 41:4, The Message) ~ Wilna Botha, 30/03/2023
Die wêreld gaan vir jou vertel dat dít wat jy glo, vals is en outyds is, maar moenie dit glo nie, die geloof in Christus het elke denkbare toets van die tye deurstaan.
Die wêreld gaan vir jou vertel dat jy as mens sommer per toeval gebeur het, maar moenie dit glo nie, jy is fyn deur God beplan, miljoene jare voor jou geboorte.
Die wêreld gaan vir jou vertel dat die hele skepping "per ongeluk" tot stand gekom het, maar moenie dit glo nie, alles is ontwerp deur 'n ongelooflike Ontwerper wat iets tot stand laat kom het wat op geen manier deur die mens verklaar kan word nie.
Die wêreld gaan vir jou vertel dat daar nie net een God is nie, en dat al die gelowe dieselfde god/God aanbid. Moenie dit glo nie, as Hy nie 'n Seun het met die naam van Jesus Christus nie, is hy 'n valse god.
Die wêreld gaan vir jou vertel dat Jesus nie uit 'n maagd gebore is nie, maar moenie dit glo nie, sonder die maagdelike geboorte was Hy net 'n gewone mens, en sou mense se geloof in Hom nie die wêreld verander het nie.
Die wêreld gaan vir jou vertel dat wetenskaplikes die Christendom die rug gedraai het, maar moenie dit glo nie, derduisende wetenskaplikes en medici getuig van wonderwerke wat nie verklaar kan word nie.
Die wêreld gaan vir jou vertel dat die Bybel 'n boek is wat deur mense geskryf is, sonder Goddelike inspraak en nie meer geld vandag nie, maar moenie dit glo nie, daar bestaan geen boek wat mense se lewens so verander het soos die Bybel nie, en dit gebeur steeds elke liewe dag, en sal dit vir ewig doen.
Die wêreld gaan vir jou vertel dat daar nie 'n hemel is nie en dit net 'n versinsel is van die mens se brein, maar moenie dit glo nie, daar is duisende gevalle waar mense 'n "hemelse" ervaring gehad het waar hulle kortstondig gesterf het en hulle lewens wel gered is, en die ooreenkomste van hierdie verhale is verstommend.
Die wêreld gaan vir jou vertel dat daar nie 'n hel is nie, maar moenie dit glo nie, die Bybel staan baie sterk hierop, moenie die kans vat nie.
Die wêreld gaan vir jou vertel dat Christen sakemanne almal skelm is en net hulle geloof voorhou om jou in te doen, maar moenie dit glo nie, daar is wonderlike mense vir wie jy met jou lewe kan vertrou. Daar is egter ook ongelowiges vir wie met jou lewe kan vertrou.
Die wêreld gaan vir jou vertel dat God van jou vergeet het, maar moenie dit glo nie, jy is elke oomblik in Sy gedagtes.
Aan die ander kant gaan sommige ander vir jou vertel dat Christene nie siek word of arm behoort te wees nie, maar moenie dit glo nie, voorspoedteologie is niks anders as 'n piramide skema nie. Slegte goed gebeur ook met goeie mense.
Van daardie mense gaan vir jou vertel dat hulle dinge oor jou kan "sien" wat God aan hulle openbaar, maar moenie dit alles glo nie, daar is iets soos vals profete, en hulle is baie gevaarlik. Daar is mense wat vir jou gaan vertel dat jy nie deurbrake beleef nie omdat daar slegte goed in jou huis is, of dat jou ouers dinge gedoen het wat maak dat dit sleg gaan, maar moenie dit glo nie, die Here se liefde vir jou kan nie deur sulke dinge oorheers word nie.
Ons leef in tye waar mense se opinies soos donderweer op jou neerstort, moenie alles glo nie. Gaan vra vir God wat waar is en wat nie. ~ Willem Botha, 29/03/2023
“So sê die Here: Op ’n tyd wat Ek goeddink, sal Ek jou gebede verhoor.” (Jes. 49:8) Dit voel vir my of die Here twee goed sê in hierdie vers: 1-Hy sal ons gebede verhoor; 2-Hy sal dit op die regte tyd doen, die tyd wat Hy weet die beste tyd is. Ai, dis mos nie maklik om te wag vir die Here se tyd nie nè. Ons is haastig dat Hy moet hoor, dat Hy moet antwoord, dat Hy moet opdaag met sy uitkoms. Vandag herinner ek myself daaraan dat daar ’n verskil is tussen “hoor” en “verhoor”. Die teks sê nié: op ’n tyd wat Ek goeddink, sal Ek jou gebede hoor nie. Nee! Hy hoor! Hy hoor altyd. Kyk wat sê Jes. 30:19 : “Hy sal jou gebed verhoor sodra Hy dit hoor.” Sien jy, die verhoring van jou gebed begin alreeds wanneer jy dit bid, wanneer die Here dit hoor en nie eers wanneer jy die Here se reaksie op jou gebed beleef nie. Só het baie voor ons dit al ervaar en vandag kan dit vir ons ook ’n realiteit wees. “Toe ek na U geroep het, het U my gebed verhoor en my nuwe krag gegee.” (Ps. 138:3) “In my nood het ek na die Here geroep en Hy het my gebed verhoor.” (Ps. 120:1) “Maar God hét geluister, Hy hét my gebed verhoor!” (Ps. 66:19) Bid sonder ophou, “volhard in gebed” is ons opdrag in Kol 4:2. Bid op jou knieë, bid terwyl jy wakker lê in die nag, bid terwyl jy ry, bid terwyl jy werk, bid met woorde, bid sonder woorde, sing ’n gebed, lees ’n gebed, bid alleen, bid saam met mense, bid hardop, bid fluisterend, bid lang gebede, bid een-woord-gebede – hoe ook al, die Here hóór. Vandag is my gunsteling “so sê die Here Here”-vers dié een in Ps. 91:15 : “Wanneer hy My aanroep, sal Ek sy gebed verhoor; in sy nood sal Ek by hom wees.” ~ Wilna Botha, 28/03/2023
In die weermag is jy uitgereik met 'n spieëltjie wat nie van glas was nie, dit was 'n blink blik plaatjie, en hy was dalk so 100 x 70mm groot. Jy kan dink dat die weerkaatsing van daardie stukkie metaal regtig nie veel werd was nie. Gelukkig het jy jouself meesal herken. Nou ja, 'n spieël wys vir jou presies wie jy is, maar nie altyd nie. Ons is vreeslik lief vir "maer spieëls", 'n spieël wat effens gebuig is en jou maerder laat lyk as wat jy is. Ek dink jy het dalk ook destyds in ons jong dae spieëls gesien wat jou kort, of lank, of maer of groot, of jou sommer net heeltemal verwronge laat lyk.
Dis niks lekker om jouself in 'n spieël te bekyk wat jou lelik of onvleiend laat lyk nie.
En tog doen ons dit bykans daagliks, en dan voel ons sleg oor onsself omdat dit ons afbreek of verneder. Jy sien, jy en ek weerkaats ander mense wat deur ons oë na hulleself kyk. Jy kry uiters nydige mense wat jou baie subtiel in die grond in sal afbreek, en dit deur woorde. Mense weerkaats 'n lelike beeld van jou terug na jouself toe, gewoonlik om hulleself beter te laat lyk. Maar nie net van jouself nie, soms weerkaats mense verwronge beelde van ander mense na jou toe. Hulle noem dit skinder. Jy en ek het al talle kere deurgeloop onder 'n skindertong, en jy en ek het was ook al vele kere skuldig gewees aan presies dieselfde gedrag.
Miskien het jy ook vriende en familie wat jou altyd laat goed voel oor jouself met mooi en opbouende woorde, woorde wat komplimenteer en jou beeld opbou. Hou vas aan daardie spieëlbeeld en glo dit, en verwerp ander se krom spieëls en moenie dit glo nie. Mense se woorde het al ander se lewens gekos want hulle het daardie verwronge spieëlbeeld geglo, en aan die ander kant het kinders (selfs met agterstande) baie groot hoogtes bereik omdat hulle ouers 'n goeie beeld van hulle na hulle teruggekaats het. Motivering, liefde, ondersteuning en aanmoediging, is wonderlike spieëls, maar jaloesie, nydigheid en 'n slegte selfbeeld maak dat mense 'n lelike beeld na jou toe terugkaats.
Ek het soveel kere gesien dat huweliksmaats die aakligste beelde van hulle wederhelftes terugkaats en 'n huwelik verwoes. Maar ook hoe huweliksmaats mekaar daagliks komplimenteer en die beste beeld vir die ander party skets. Meneer, hoor jou vrou gereeld dat sy vir jou mooi is, en mooi lyk? Of is dit lekkerder om haar af te breek?
Hier kom die ergste. Omdat mense ander se aaklige gedrag omhels glo hulle dat die Here hulle ook so sien.
Besluit jy nou vandag vir wie jy gaan glo. Goor mense, of vir die Here. Kyk wat sê hy vandag vir jou.
"Here, U het my tot in die fynste detail gemaak. In die baarmoeder het U my gevorm. Ek wil U prys omdat U my so volmaak geskep het. U doen wonderlike werk. Ek weet dat U groot dinge kan doen. Daar is nie ’n been in my wat uit sy plek is nie. U ken my totaal. Alles is soos U dit wil hê. U het my gemaak. Toe ek grootgeword het, het U vir my gesorg. U beheer ook my hele lewe. Nog voordat ek mens geword het, het U my al beplan. U het my lewe toe al in u hand gehou. En U het besluit wat met my sou gebeur." (Ps. 139:13-16 DB) ~ Willem Botha, 27/03/2023
“Ek het dit gesê en Ek sal dit doen,” sê die Here. (Es 37:14) So sê die Here, HERE! Wat Hy gesê het, is gesê. Dit bly vasstaan. Sy woorde, sy beloftes, sy troos, sy redding – Hý het dit gesê en Hy sál dit doen! Ons is maar té gewoond daaraan dat mense beloftes maak wat hulle nie nakom nie, mense wat sê dat hulle iets sal doen en dan gebeur dit nooit nie – ek is self ook skuldig daaraan om van my beloftes nie ernstig op te neem nie. Maar God is anders. Ek het dit gesê en Ek sal dit doen – dis sy belofte! “God is nie 'n mens nie, daarom lieg Hy nie. Hy gaan nooit terug op sy woord nie. Dink jy God belowe iets en doen dit nie? Het Hy al ooit iets gesê en nie sy woord gehou nie?” (Num. 23:19) Wat ’n blye versekering! Ek kan myself oorgee en toevertrou aan my Here wat betroubaar is, wat doen wat Hy sê. Hy besluit, Hy sê en dit gebeur. “Die Here die Almagtige het 'n eed afgelê: Soos Ek My voorgeneem het, so sal dit wees, wat Ek besluit het, sal gebeur.” (Jes. 14:24) Vandag is my “so sê die Here Here”-vers Ps. 89:35 : “Ek sal my verbond nie versaak nie, nie een van my beloftes terugtrek nie.” ~ Wilna Botha, 23/03/2023
Wat ek is, is net genade, wat ek het is net geleen... Jy ken hierdie woorde goed, dit kom uit "Gebed" van Koos du Plessis.
Wat "is" ek, en wat "het" ek? Vra gou vir jou dieselfde vraag af. Wat "is" jy, en wat "het" jy? En sien jy die genade raak? En is jy dankbaar vir daardie rentevry lening van die Here af?

Wat IS ek?
* Ek is baie baie gesond.
* Ek is gered deur Jesus se kruisiging.
* Ek is uiters gelukkig in 'n huwelik van meer as 41 jaar.
* Ek is baie gelukkig in my werk.
* Ek is van nature 'n positiewe mens.
* Ek is tevrede met ons lewe hier in Suid-Afrika.
* Ek is (oorwegend) lief vir die mensdom.

Wat HET ek?
* Ek het 'n wonderlike vrou en kinders.
* Ek het op enige gegewe dag meer as wat ek kan opgebruik.
* Ek het al die lewensmiddele wat ek nodig het om 'n aangename lewe te lei.
* Ek het hoop vir die toekoms.
* Ek het reeds my visum en paspoort vir 'n ewige lewe saam met die Here.
*Ek het vele talente (so glo ek), maar ek moet erken dat ek dit beter kan inspan.
* Ek het 'n uitmuntende vriendekring.
So kan ek aangaan met wat ek "is", en wat ek "het". Ek kan eintlik sê my beker loop oor. Kyk na die blikbeker op hierdie foto. Dis 'n geroeste blikbeker. Die persoon wat baie tevrede is met sy blikbeker wat oorloop, teenoor iemand wat net gelukkig is as sy Noritake beker oorloop, is in 'n wonderlike plek in sy lewe.
Ja vriend, wat jy is, is net genade, en wat jy het, is net geleen, en dis deur God aan jou geleen. En as jy hiervandaan verder reis in die hiernamaals in, bly daardie geleende goed agter. Hoekom soveel tyd en energie aan dinge spandeer wat so 'n kort raklewe het? En wat jou lewenskwaliteit vernietig, jou vrede en vreugde steel en wat jou "IS" miserabel maak. Kyk wat sê hierdie teks:
"Dit is baie beter om die Here lief te hê en eenvoudig te lewe as om baie geld te besit, maar tog bekommerd oor jou geld en diep ongelukkig te wees. Liewer ’n eenvoudige ete saam met mense wat mekaar liefhet as baie lekker kos waar mense mekaar haat." (Spr. 15:16-17 DB) ~ Willem Botha, 22/03/2023
“So sê die Here: Ek gee julle die keuse: wil julle lewe of wil julle sterwe?” (Jer. 21:8) 21 Maart en dis Menseregtedag. Ek het vandag gewonder oor menseregte. Die belangrikste reg waarop ’n mens aanspraak kan maak is seker vryheid. En vryheid lei daartoe om self ’n keuse te mag maak. Dink maar aan iemand wat in die tronk sit. Hy het nie ’n keuse oor wat hy eet of wat hy aantrek nie. Hy het nie ’n keuse met wie hy mag praat en wie hy mag sien nie. Hy het nie ’n keuse waar hy mag beweeg nie. Sy vryheid is weggevat en so ook sy keuse.  Vandag is my “so sê die Here Here”-vers dié een in Jer. 21:8 waar die Here vir ons die mensereg van keuse gee: “So sê die Here: Ek gee julle die keuse: wil julle lewe of wil julle sterwe?” Hier is jou keuse: “Wie die Seun het, het die lewe; wie nie die Seun van God het nie, het ook nie die lewe nie.” (1 Joh. 5:12) Kies jy Jesus, of nie? As jy Hom kies, kies jy lewe. Sonder Hom is daar nie vrede nie, is daar nie vryheid nie, is daar nie sekerheid nie. Sonder Hom is daar nie troos nie, is daar nie hulp nie, is daar nie ’n veilige vesting nie, is daar nie ’n raadsman nie. Sonder Hom het jy geen reg nie. “Maar aan almal wat Hom aangeneem het, dié wat in Hom glo, het Hy die reg gegee om kinders van God te word.” (Joh. 1:12) Kies lewe. Kies jou reg – jou reg om ’n kind van God te wees. ~ Wilna Botha, 21/03/2023
Ek is alweer by "hoekom". Soos 'n kind van 4 jaar, wat net onophoudelik vra: hoekom?
Hoekom het een van die mees nederige Christen-vriende wat ek ken nou kanker gekry wat wyd versprei is deur sy liggaam? 'n Man wat absoluut LEEF vir die Here. Hoekom het my ander vriend Saterdag 'n beroerte gekry? Hoekom is Jan vermoor (ek het onlangs van hom geskryf)? Hoekom kry mense so swaar? Hoekom hoekom hoekom?
Hierdie vrae is van toepassing op die hier en nou in my lewe. Maar daar is nog vele ander vrae. Hoekom sukkel mense so om die werk van die Here se hande raak te sien? Dis dan so duidelik. Hoekom is daar sulke snaakse dinge in die Bybel opgeteken? Ek dink aan Jona in die vis se maag, Lot se vrou wat 'n soutpilaar word, die sondvloed en die ark met die diere, Job se verhaal en vele ander goed.
Aan die ander kant, hoekom glo ek steeds ten spyte van 'n duisend "hoekoms"?
Gisteraand gaan ek weer half in 'n rebelse toestand en wonder hoekom moet ek hierdie boodskappe skryf terwyl ek alles behalwe heilig lewe en 'n "goeie" Christen is?
"My broers, julle moenie almal leermeesters wil wees nie, want julle moet weet dat ons wat leermeesters is, strenger as ander beoordeel sal word." (Jak. 3:1). Hoekom moet ek myself onder hierdie risiko van strenger oordeel sit? Die volgende gedagte het onmiddellik in my kop gekom. As jy dit nie doen nie, sal die klippe dit uitroep. (Aldus Luk. 19:40)
Ek kan die Here nie plot nie, ek weet gewoonlik nie hoe Hy dink nie, ek verstaan niks van sy planne nie, en ek sien Hom selfs dikwels nie eers raak nie.
Maar tog het ek hordes mense voor my oë tot bekering sien kom tydens uitreike, en tog sien ek hoe my vriende wat nou deur diep waters gaan, onwrikbaar aan Hom vashou, en tog sien ek hoe gestremdes wat bitter swaar kry vir die Here prys vir elke stukkie brood.
Maar, móét ek verstaan? Hóéf ek te verstaan? Wat sal gebeur as ek wel alles verstaan? Sal ek steeds nodig hê om te glo? Toe kom hierdie volgende teks by my op.
"Net so min as wat jy kan verstaan hoe gees en liggaam by mekaar uitkom in die skoot van 'n swanger vrou, net so min kan jy die werk van God verstaan. Hy doen dit alles." (Pred. 11:5)
Dan sê ek maar net soos die Engelsman: "I rest my case..." ~ Willem Botha, 20/03/2023
Ôk maar lekker stupid...
So sou Ouboet van Orkney Snorknie destyds gesê het. Ek het hierdie foto pas van 'n dooie kol op my eie grasperk afgeneem. Dis my eie grasperk waaraan ek so twee jaar gelede 'n klomp geld (my eie geld) spandeer het om nuwe gras in te sit, in my eie tuin. Maar die termiete kom baljaar te lekker, en dan spuit ek die regte gif en die probleem is opgelos tot hulle weer elders uitkruip. En so neem ek toe onlangs miergif (wat aan my behoort) en ek spuit my eie gif op my eie gras, op my eie tyd.
En toe vrek my eie gras wat ek met my eie gif (en my eie spuit) gespuit het. En nou het ek my eie dooie kol gras midde-in my eie mooi grasperk, want ek het (my eie) verkeerde gif gebruik. Bossie gif in plaas van miergif. Ôk maar lekker stupid, sou Ouboet sê.
En nét so vergiftig ons onsself met onvergewensgesindheid, bitterheid, woede, haat, jaloesie, nydigheid en vele meer dinge wat ons lewenskwaliteit beïnvloed. Só spuit ons ons eie lowergroen gras in ons eie lewens morsdood, en nét ons ly skade. En die ander party gaan lekker en gelukkig aan met sy lewe.  
Ja vriend, jy weet seker wat ou Ouboet van Orkney Snorknie hieroor sou sê... ~ Willem Botha, 16/03/2023
"Die Here het nog absoluut NIKS vir my gedoen nie..."
So sê iemand eendag in ons geselskap. Ek was geskok tot in my diepste wese, want ek het gewonder of hierdie persoon blind is vir alles wat hy elke dag uit die Here se hand ontvang. Ek het egter besef dat ons in 'n wêreld leef waar 'n verbruikersmentaliteit aan die orde van die dag is. Maak 'n pakkie goeters oop, verorber die inhoud en gooi die verpakking weg, en o wee, laat daardie produk nou nie 100% aan my verwagtinge voldoen nie, dan is die gort gaar.
En so, besef ek, maak ons met die Here, want Hy moet aan hordes voorskrifte voldoen voordat ek Hom in my lewe sal toelaat. Die Here het 'n kommoditeit geword wat ons net sal toelaat in ons lewens as Hy baie nuttig vir ons geword het. En laat Hy nou net nie in ons tydskaal inpas nie, dan kla ek dat my gebede teen die plafon vasslaan. Ek het aan so paar punte gedink:
* Die Here probeer nie jou guns koop deur jou met materiële dinge te bederf nie. Maar tog kry ons dikwels meer as wat ons verdien.
* Die Here waarborg nie volmaakte gesondheid nie, en daarom kan ons ook nie Sy bestaan net aan wonderwerke koppel nie. Maar Hy gee dikwels genesing aan sy kinders, maar selfs mense wat nié aan Hom glo nie.
* Die Here hoef ons nie te vermaak nie, maar baie mense wil dit graag sien, selfs in die kerk.
* Die Here reageer nie sommer op dinge wat ons as tekens wil sien nie. Inteendeel, Hy sê dat ongelowiges tekens wil sien.
* Ons hoef nie die Here te toets en te sien of Hy sy beloftes gaan nakom nie, maar op sy tyd kom Hy elke enkele belofte na. Ongelukkig sien ons dit dikwels nie raak nie, want dit pas nie by ons verwagtinge nie.
* Die Here werk nie deur 'n groot lawaai en met 'n vreeslike geskal nie, Hy werk sagkens, en op 'n manier dat ons soms eers moet stil word voor ons sy werke raaksien.
* Die probleem met hierdie wêreld is dat mense dinge van Hom verwag wat nét gerig is op ons eie voordeel.
* Laastens, mense wil Hom soms voor 'n ultimatum stel, deur te dreig om van Hom af weg te draai as Hy nie aan ons menslike begeertes voldoen nie.
Die mens is nie met 'n ketting aan Hom vasgebind nie, jy kan enige dag loop. Draai weg, gaan soek jou heil elders, gaan kyk of iets of selfs iemand anders meer geskik is as 'n god.
Maar God is 'n soewereine God, Hy gee meer as wat ons ooit kan droom, Hy het selfs sy Seun gegee en ons ontvang meer seëninge as wat ons ooit kan opgebruik, en meesal sonder dat ons daarvoor vra. Sy genade het nie 'n prys nie, en ook nie 'n waarde wat met enigiets op aarde vergelyk kan word nie. Ek wonder nogal of ek werklik enige enige aardse ding eerder as sy genade sou kies. Nee wat, mot en roes vernietig dit alles, en jy gaan dit alles agterlaat. Sy sagte stem, sy sagte hart, sy sagte oë en sy onbeskryflike liefde is genoeg. Dáármee kan ek in hierdie lewe voortleef. ~ Willem Botha, 15/03/2023

My gedagtes bly nog by daai spesiale kanselkleed wat ek in Clarens se kerk gesien het: “So sê die Here HERE”. Toe val hierdie teks my vandag op: “So sê die Here: Bly stil, moenie huil nie, moenie trane in jou oë kry nie! Vir al jou swaarkry sal jy vergoed word, sê die Here.” (Jer. 31:16) Prediker 3 sê daar is ’n tyd vir alles – ’n tyd om te huil en ’n tyd om te lag, ’n tyd om te treur en ’n tyd om van blydskap te dans. Dalk huil en treur jy vandag oor die een of ander verlies, oor die een of ander vernedering of skande, oor die een of ander diep bekommernis of vrees. Dalk huil en treur jy al lankal. Dalk voel dit of daar nooit ’n einde aan jou hartseer gaan kom nie. Weet vir seker dat jou trane nie ongemerk by die Here verbygaan nie. Hy weet daarvan. “My ellende het nie ongemerk by U verbygegaan nie, U het op my trane gelet. In u boek staan hulle opgeteken.” (Ps. 56:9) Weet ook vir seker dat die Here jou uitnooi om by Hom te kom skuil en by Hom te kom rus en dat daar ’n dag sal aanbreek dat Hy jou sal troos met hierdie woorde: bly stil, moenie huil nie, moenie trane in jou oë kry nie. Die tyd vir blydskap het nou aangebreek! Hier is my gunsteling “so sê die Here Here”-vers vir vandag: “Ek sal hulle droefheid in vreugde verander, Ek sal vir hulle uitkoms gee: Ek sal hulle bly maak, hulle sal geen kommer meer hê nie.” (Jer. 31:13) ~ Wilna Botha, 14/03/2023
Vriend, waarheen hol jy? Hardloop jy deur hierdie lewe sonder ‘n doel, sonder oefening, sonder ‘n wenstreep, sonder rigting? Is jy moeg gehol? Almal hardloop. Sommige is nét in ‘n rat race. Ander hardloop so vinnig in die rondte, dat hulle soms van agter af in hulleself vashardloop! Hulle word net al hoe moeër en kom nêrens nie. Hoe lyk die lewenswedloop waarin jy jouself tans bevind? Toe daai skoot vanoggend geklap het, en jy het begin hol. Het jy ‘n wenstreep waarheen jy op pad is? Of voel jy soos ‘n klomp muise in ‘n hok wat net heen en weer hol? Of spring jy soms in jou hamster-wieletjie en hardloop teen ‘n enorme spoed, net om nêrens te kom nie?
"Weet julle nie dat atlete wat aan 'n wedloop deelneem, wel almal hardloop, maar dat net een die prys ontvang nie? Hardloop dan só dat julle die prys kan wen. Almal wat aan 'n wedstryd deelneem, ontsê hulleself allerlei dinge. Hulle doen dit om 'n verganklike oorwinnaarskroon te verkry, maar ons 'n onverganklike. Ek hardloop dan ook soos een wat nie van sy doel onseker is nie; ek slaan soos 'n bokser wat nie in die lug slaan nie. Maar ek oefen my liggaam en bring dit onder beheer, sodat ek nie ander tot die stryd oproep en self nie kwalifiseer nie." (1 Kor. 9:24-27)
Het vandag 'n wenstreep gehad? Jy het waarskynlik teen hordes ander gehardloop. Het ENIGE een daai wenstreep behaal? Voel jy dat die resies die moeite werd was? Mooi medalje gekry? Op die podium gestaan in die nommer een posisie?
Ek dink jou antwoord is onomwonde nee! Soos wat my antwoord ook nee is.
Dalk het jy hard gehardloop vir 'n verhoging, maar jy was net weereens teleurgesteld gewees.
Die lewe het wreed geword, want jy hardloop nie meer om die resies te wen nie, jy hardloop net om nóg 'n dag in die resies te blý, om net weereens nêrens te kom nie. Die baas hoor "ja", die kinders hoor "nee"! Dalk voel jy ook dat jou insette nie raakgesien word nie, en nog meer, dat jy sommer soms verneder word omdat jy nie nóg harder gehardloop het nie.
Al wen jy die rotresies, jy bly steeds 'n rot! Het ek 'n antwoord en 'n oplossing hiervoor? Nee, gewis nie!
Ek het jare gelede by 'n maatskappy gewerk waar ek soms moes weggaan vir die werk en ek het dit gedoen, want my gesin moes eet, maar toe die maatskappy begin swaar trek moes ek maar ook stert tussen die bene die pad vat. Die ergste is dat hierdie gejaag ons op 'n manier weghou van die Here af, want daar is net nie meer tyd nie. Daar is nie eers tyd om te bid vir die dag se resies wat voorlê nie, en daarmee kom die ewige oorwinnaarskroon in die gedrang. En ons gesinne ly daaronder.
"Vertrou liewer op die Here en doen wat goed is, woon en werk rustig voort. Vind jou vreugde in die Here, en Hy sal jou gee wat jou hart begeer. Laat jou lewe aan die Here oor en vertrou op Hom; Hy sal sorg." (Ps. 37:3-5)
En hier is so stukkie waarheid wat vir sommige van ons waar is. Ons harte begeer soms dinge wat ons net kan kry as ons onsself verniel en vernietig om nog méér en méér te besit. Het jy ook al 'n ander motor gaan koop met jou verhoging, net om nóg armer te wees daarna? Met wat is ons tevrede? Ek het al vele kere gesien dat mense wat minder agter aardse goed aanhardloop, beter lewens lei. Natuurlik is dit nou nie in alle gevalle waar dat almal die aardse dinge najaag nie, maar dit gebeur baie dikwels. Té dikwels.
So bietjie minder oortyd, so bietjie meer kere "nee" vir die baas en "ja" vir die kinders. So bietjie minder jaloesie op ander se posisies, so bietjie minder kompetisie met kollegas, met so bietjie minder tevrede wees, en so bietjie beter gesindheid, is definitief goed vir die gesondheid. So bietjie meer op die Here vertrou, so bietjie meer in Sy arms terugsak as dinge rof raak. En ja, mens kán op die koop toe jou werk geniet ook. ~ Willem Botha, 13/03/2023
So sê die Here Here: staan by die kruispaaie en kyk ... (Jer. 6:16) Ja, dit is dikwels by kruispaaie in ons lewe wat ons begeer dat die Here met ons moet praat, nie waar nie? Dis wanneer ons moet kies: links of regs, ja of nee, dié een of dáái een dat ons graag wil sê: so sê die Here Here. Kom ons lees eers die res van Jer. 6:16, soos wat dit in Die Boodskap staan: “Die Here sê: As julle by ’n plek kom waar julle belangrike besluite moet neem, moenie oorhaastig wees nie. Wag ’n bietjie en kyk eers wat mense vroeër gedoen het. Doen dan wat die beste is. Julle sal dan weet dat julle die regte ding gedoen het.” Dan sal julle rus vind vir julle siel, sê ’n ander vertaling. By die kruispad moet ons stop, ons moet wag, ons moenie oorhaastig wees nie. By die kruispad moet ons stop en weer kyk na die padkaart van die Woord, die beproefde paaie wat baie voor ons al geloop het. By die kruispad moet ons terugkyk na die verlede en wat die Here tóé gesê het, wat die Here tóé vir ons gedoen het, wat ons tóé  geleer het, hoe dinge tóé uitgewerk het. By die kruispad moet ons “kyk” voordat ons probeer “hoor” en dan moet ons doen wat ons glo die beste is. Hoe sal ons dan weet dat ons die Here hoor praat het? Ons sal sielerus hê, ons sal lig en tevrede voel, daai vrede wat alle verstand te bowe gaan, sal in jou hart kom lê. Hier is my gunsteling “so sê die Here Here”-vers vir vandag: “Wanneer julle die pad byster raak, sal julle sy stem agter julle hoor sê: “Hier is die regte pad, loop hierlangs.” (Jes. 30:21, Die Boodskap) ~ Wilna Botha, 09/03/2023
SO vinnig...  
... is die mens se lewe op aarde verby.
Ps. 144:4 "n Mens, hoe verganklik is hy tog: sy dae gaan soos 'n skaduwee verby."
Sjoe, soos wat die jare aanstap besef mens net hoe waar hierdie woorde is. Dit voel of dit elke tweede dag Vrydag is, jy is verstom as jy besef dat jare in jou verlede net wegraak. Jy dink jy was verlede jaar iewers, net om te besef dis al 'n paar jaar gelede. En voorts is ek geskok oor die aantal mense in my ouderdomsgroep wat wegval.
As dit so is, hoekom bekommer ek my so oor die toekoms? Hoekom is soveel onbenullighede dan vir my so belangrik? Hoekom kan ek nie net oorgee en "God's water oor God's akker laat loop nie"? Waarom laat ek toe dat die gebeure in die land my so ontstel?
Nee, ek is nie nét so nie, ek sien steeds 'n ander kant. Maar hoekom verval ek nie net summier in "doom and gloom" nie?
Wel, dis seker omdat ek 'n mens is, 'n mens wat steeds hoop het, iemand wat steeds lief is vir mense en wat steeds my lewe geniet. Dalk omdat ek besef dat daar in hierdie moeras waarin ons leef steeds vreugde en voorspoed is. Miskien omdat ek steeds meer mense sien wat liefde en vrede najaag, as die wat dit nie doen nie. Dis vir seker ook omdat ek besef dat God nie opgegee het nie, dat Hy steeds daagliks wonderwerke doen en dat Hy vir elkeen van ons 'n taak het om ons mee besig te hou.
Laastens omdat ons tog nie net leef vir hier en nou nie.
1 Kor. 15:19 "As ons net vir hierdie lewe ons hoop op Christus vestig, is ons die bejammerenswaardigste van alle mense." ~ Willem Botha, 08/03/2023
Ek het laas vertel van die kanselkleed in die tagtig jaar oue Clarens-kerk met die woorde: “So sê die Here Here”. Ek het intussen gewonder waarom die dubbel naam: Here Here? Mens lees hierdie dubbel uitdrukking van die Here se naam nie in die 1983-vertaling van die Bybel nie. Ek sien dit wel in die 1933/1953-vertaling en dan staan dit so: “So sê die Here HERE”, met die tweede Here in hoofletters. Ek sien in 2020 direkte vertaling ook die dubbel Here HERE en dan is dit heel dikwels: “So sê my Heer, die HERE” – dis so mooi vir my. Dis verpersoonlik. Dis mý Heer wat praat en Hy ís dié Here! Ek lees ook op baie plekke dat die tweede Here vervang word met ’n uitgebreide beskrywing van wie die Here is – ’n beklemtoning van wie Hy is en wat Hy doen, ’n bevestiging van wie werklik aan die woord is. Byvoorbeeld: “So sê die Here, die Almagtige ... “ (Sag 1:3); “So sê die Here wat jou gemaak het ... (Jes. 44:2); “So sê die Here, die koning van Israel, sy Verlosser, die Here die Almagtige.” (Jes. 44:6); “So sê die Here, die Heilige van Israel ...” (Jes. 45:11); “So sê die Here, Hy wat ’n pad gemaak het deur die see ...” (Jes. 43:16); “So sê die Here, Hy wat die hemel geskep het ...” (Jes. 45:18); “So sê die Here, jou Here en jou God ...” (Jes. 51:22) Die Here HERE praat vandag ook met ons – hoor jy dit? Glo jy wat Hy sê? Hier is my gunsteling “so sê Here, Here”- vers vir vandag: “So sê God, die Here, Hy wat die hemelkoepel geskep en dit oopgespan het, Hy wat die aarde gevorm het en alles wat dit oplewer, Hy wat aan al die mense op aarde die asem gee, die lewe aan alles wat op die aarde beweeg: Ek is die Here ... Ek hou jou vas, Ek beskerm jou” (Jes. 42:5) ~ Wilna Botha, 07/03/2023
Die Here verskyn aan Moses toe Moses die opdrag kry om met die volk die woestyn aan te pak, op pad na die beloofde land toe. Onthou net, hulle lewe was baie baie sleg a.g.v. slawerny, en nou moet hulle nog die dorre, ongenaakbare woestyn aandurf. Min het hulle geweet dat daardie afstand wat hulle in enkele weke kon aflê, veertig jaar sou neem! Dan vra Moses vir die Here wie saam met hulle sou gaan, en die Here antwoord as volg.
“Moet Ek dan self saamgaan dat jou hart rus kan kry?” vra die Here toe vir Moses. “Asseblief,” sê Moses vir die Here, “as U nie self saamgaan nie, moet U ons glad nie hiervandaan af laat weggaan nie." (Eks. 33:14-15 DB)
Laat ons liewer hier bly as U nie saamgaan nie.
Dit voel soms of ons ook nou daardie geloof stap moet neem en die woestyn aandurf, en gaan kyk of die lewe nie beter gaan wees anderkant die woestyn nie. Slegter kan dit tog nie gaan as nou nie, of kan dit? Natuurlik kan dit, dit kan miljoen keer slegter gaan! Gaan dit in elk geval só sleg? Nee vriend, alles is definitief nie nét sleg nie. Ek kan definitief nie so ver tel as al die seëninge wat ek beleef nie. As hierdie lewe 'n woestyn is, is ons steeds by 'n oase.
"’n Mens kan altyd op U vertrou. Elke oggend is U maar weer daar." (Klaag. 3:23 DB)
Dit voel wel soms of ons elke dag in die woestyn wakker word, maar steeds is die Here daar. En elke oggend moet ek en jy besluit: Is dit vorentoe, agtertoe of bly ons steeds botstil met die tentpenne ekstra diep in die grond vasgeslaan?
Wel, vir my is daar nét één pad, en dis vorentoe! Altyd vorentoe, maar nie sonder die Here nie! Hoe op aarde mense die lewenspad sonder die Here probeer loop, slaan my dronk!
Ek weet nie wat anderkant hierdie woestyn van ons lewe lê nie, maar vorentoe moet ons vorentoe. En met die Here saam kan ons dit doen, en kan dit draaglik wees. Bly net aan die beweeg.
En dan dalk, net dalk, stap ons maar net in die rondte, net om te besef dat ons tog steeds in die beloofde land is.
Die Here maak elke more nuut, miskien moet ons net ons harte en gesindheid ook elke more nuut maak.
Bly by die Here, bly onder die wolkkolom, en geniet steeds die vettigheid van die land waarin ons woon. Hierdie woestyn is immers nie nét dor en sleg nie.
"U sorg vir die land en gee oorvloed, U maak dit baie vrugbaar. Die groot riviere is vol water, U laat die koring welig staan. Alles is u werk! U maak die ploegvore vol water en die kluite nat, U laat hulle sag word van die reëns, U laat alles welig groei. U kroon die jaar met u goeie gawes. Waar U ook gaan, is daar oorvloed! Daar is volop weiding in die woestyn; die bulte juig, die velde wemel van die kleinvee, die vlaktes staan vol koring; hulle juig en hulle sing."(Ps. 65:10-14 Afr. 83) ~ Willem Botha, 06/03/2023
Ons dogter is so twee weke gelede getroud in die pragtige tagtig jaar oue sandsteen kerk in Clarens. Die atmosfeer binne-in die kerk is só spesiaal: die donker houtbanke, die houtvloere wat kraak onder jou voete, die orrel daar eenkant op sy verhogie en dan dié mooi kanselkleed wat sê: “So sê die Here, Here.” Mens kry hoendervleis en ’n knop in jou keel en dan het die bruid nog nie eers aan haar pa se arm verskyn nie! Daai geborduurde woorde op die kanselkleed bly in my gedagtes: So sê die Here, Here. Hoe kragtig en mooi is dit nie! Die Here praat met sy mense. Hy praat in sy “tempel”. Hy praat deur sy “profeet”. Die Here sê trooswoorde, beloftes van genade en redding, versekering van sy liefde en verlossing. Die Here sê woorde wat ons uitnooi om na Hom te kom, by Hom te skuil, by Hom te rus. Hy sê egter ook woorde met opdragte vir ons, woorde met waarskuwings, woorde wat ons maan om terug te draai na Hom en gehoorsaam te wees. Hier is my gunsteling “so sê Here, Here”-vers vir vandag: “Luister, so sê die Here wat jou geskep het, Jakob, wat jou gevorm het, Israel: Moenie bang wees nie, Ek verlos jou, Ek het jou op jou naam geroep, jy is Myne.” (Jes. 43:1) ~ Wilna Botha, 02/03/2023
Wie is my naaste? Almal wat leef en beef? Letterlik elke lewende wese op aarde? Of dalk net medegelowiges, of mense wat "soos ek is", wat dit ook al mag insluit. Ek worstel jare met hierdie vraag, want hoe moet ek vir mense lief wees van wie ek nie eers hou nie? Of wat my te na gekom het? Wat is jou mening? Kry jy dit reg? En as ek dit nié regkry nie, wat dan? Wat van my verhouding met die Here?
Wel, gister was ek met hierdie gedagtes uitgedaag, soos wat ek slegs enkele kere in my lewe uitgedaag was. En hier sit ek met géén vordering na 'n antwoord toe nie. Kom ek vertel jou. Gister lees ek in die nuus van 'n man wat Maandag wreed vermoor is op sy kleinhoewe buite Centurion. Sy vrou is vir dood agtergelaat maar sy het oorleef. Vir wat? Vir twee selfone!!! NET TWEE SELFONE! Watse monsters doen dit? Ek het die man vir baie jare geken en ons het mekaar se oproepe gemis verlede Vrydag, ek is bitter spyt daaroor! Dis nie al nie. In 2012 is hulle dogter voor hulle oë op daardie selfde kleinhoewe vermoor! Wreed, onnodig. Was dit my naaste wat dit gedoen het?
Kom ek wees 100% eerlik en beskryf die gevoel waarmee ek worstel. Haat, wrewel, afsku, hartseer, bitterheid, woedend en bo alles sal ek graag wil wraak neem.
Ja, dis ek, Willem, die sogenaamde Christen, die een wie se boodskappe jy lees, die een wat probeer hoop gee en wat gewoonlik positief skryf en opbouend probeer wees.
En ek wonder: is hierdie wesens (skuus ek kan nie die woord mense skryf nie) my naaste? Moet ek hulle so liefhê soos myself? Of so lief wees soos vir Jesus? Ek kry géén teks wat my onomwonde oortuig dat ek vir hulle móét lief wees nie, maar meer nog, ek kry ook geen teks wat my toelaat om hulle te haat nie! Ek weet nie vriend, ek weet regtig nie! Wat is die antwoord? Ken jy die antwoord? Nee, nie 'n oppervlakkige "feel-good" antwoord nie, 'n sinvolle antwoord!
Kyk wat het Hy hieroor in Sy Woord geskryf:
"Weer het Jesus Hom nie laat vastrek nie.' Jy moet die Here jou God liefhê met alles wat jy is en het.’ Niks in jou lewe mag vir jou so belangrik soos God wees nie. Hierdie opdrag staan boaan die lys. Maar daar is ’n tweede opdrag wat langs die eerste een op die lys staan: ‘Jy moet ander mense so liefhê asof hulle jy is.’ (Matt. 22:37-39 DB)
En toe probeer ek die Here uitdaag in my half gebroke toestand:
Weet U hoe voel dit Here? Weet U hoe voel sy familie en ons as sy vriende? Here, wil U dalk hierop probeer reageer?
Toe reageer Hy, toe Hy my daaraan herinner dat Johannes die doper (ja daardie Johannes wat Hom gedoop het), wreed onthoof is in die tronk! Sinneloos, onnodig, absoluut onnodig! Sy baie, baie spesiale vriend.
Daai gedagte was egter vir my 'n skrale troos, maar toe gee Hy my nog 'n "curve ball".
Willem, onthou jy dat Ek self wreed en sinneloos vermoor is, sodat jý kan lewe??? En voor ek sterf het Ek daar aan die kruis gesê: "Vader vergeef hulle, want hulle weet nie wat hulle doen nie."
Vergeef hulle? Is dit wat U van my verwag Here? Moet ek hulle vergewe? Ai Here, ek is te swak! Kan ek dalk net 'n bietjie tyd kry om alles te verwerk? Dis bietjie vinnig op my.
Ek weet eerlik nie of ek dít kan regkry nie! Vergewe my Here! Dalk eendag! ~ Willem Botha, 01/03/2023
“Die woord van die Here het tot Jeremia gekom: Gaan af na die pottebakker se huis toe, Ek sal daar met jou praat.” (Jer. 18:1-2) Toe ek vandag hierdie vers raaklees, besef ek maar net weer dat die Here dikwels sommer net met ons praat deur alledaagse gebeurtenisse, deur gewone mense wat ons teëkom, ordinêre dinge wat ons sien en hoor in die gewone gang van sake. Te veel kere wil ek die Here met my hoor praat op bonatuurlike maniere, in groot geestelike byeenkomste en so meer dat ek dit nie raaksien as Hy sommer net deur die alledaagse aktiwiteite praat nie. Jeremia moet na die pottebakker se huis toe gaan sodat die Here met hom kan praat deur die beeld van die klei op die pottebakker se wiel. Dalk het die Here vandag vir jou gesê: gaan werk toe, ek gaan daar met jou praat. Of dalk: gaan winkel toe, ek gaan daar met jou praat. Of dalk: gaan stap in jou buurt, ek gaan daar met jou praat. Of dalk: gaan staan langs jou kind se sportveld, ek gaan daar met jou praat. Dalk het die Here vandag vir jou ’n gelykenis gewys waardeur Hy wou praat, ’n beeld gewys waardeur Hy sy krag of sy liefde of sy almag wou verduidelik, ’n opmerking of ’n emosie laat hoor waardeur Hy jou hart wou aanraak  – het jy dit raakgesien en het jy daarop gereageer? ~ Wilna Botha, 28/02/2023
Valentynsdag...
Met liefde, uit Hooglied
As ek die woord Hooglied noem, wat is die eerste gedagte wat in jou kop opkom? Wel, dit hang seker af wie dit vir wie sê, en in watter omstandighede en konteks. Verskillende mense sal verskillend reageer as hulle dit hoor.
Jong mannetjies sal waarskynlik begin giggel.
Jong meisies sal dalk bloos.
Jong getroude paartjies sal dalk hulle ogies vir mekaar begin fladder.
Mans wat 'n paar jaar getroud is sal dalk diep glimlag, die maag intrek en die bors uitstoot – en daai maagspiere soos 'n wafferse six-pack bymekaar trek. Dis nou as die six-pack nie plek gemaak het vir 'n vaatjie nie.
En hulle vrouens sal onmiddellik die nat jammerlappie in die wasbak doop, dit blitsig op die voorkop plak en kla van 'n allemintige migraine.
Sommige ouer dominees sal dalk dadelik vertel dat die boek slegs beeldspraak is van God se liefde vir Sy kerk.
Hooglied is 'n pragtige boek. Een hele boek wat die Here afgestaan het om op 'n pragtige manier die ware liefde tussen man en vrou te beskryf. Agt hoofstukke waar respek, agting, trots, verwondering, bewondering en liefde vir mekaar besing en uitgespreek word. Met baie detail wys die Here vir die mens dat hulle mekaar nie net emosioneel kan koester en geniet nie, maar ook fisies. In my persoonlike verwysingsraamwerk, pas van hierdie elemente net binne die huwelik, tussen man en vrou.
As jy so deur Hooglied lees, sal jy waarskynlik ook herinneringe en emosies ervaar wat jy kon oproep van die tye waar daar so flink hof gemaak is. Nou vra ek jou (as jy getroud is), bestaan dit nog vir jou na 'n klompie jare van getroude lewe, of het dit in die niet verdamp?
Hooglied 4:9-15 en 5:10 -16
Hy:- “Jy het my hart gesteel, my beminde bruid, jy het my hart gesteel met een kyk van jou oë, met een skakel in die ketting om jou hals. Ek hou van jou liefkosings, my beminde bruid, jou liefkosings is beter as wyn, jou parfuum ruik lekkerder as al die lekkerruik-kruie. Jou lippe proe soos heuningstroop, my bruid, jou tong soos heuning en dikmelk, en jou klere ruik soos die Libanon. “My beminde bruid is 'n tuin wat toegemaak is, 'n tuin met 'n muur om, 'n fontein wat afgekamp is. Jou liggaam is 'n lushof, granaatbome met keurige vrugte, hennastruike saam met nardus, nardus en saffraan, kalmoes en kaneel saam met elke soort lekkerruik-kruie, mirre en aalwyn saam met al die beste lekkerruik-kruie. Daar is 'n fontein in my tuin, 'n put met borrelende water, strome van die Libanon af.”
Sy: “Die man wat ek liefhet, is blakend gesond en blosend van kleur; jy kan hom uitken tussen tien duisend ander. Sy voorkop is soos suiwer goud, sy haarlokke soos dadeltrosse, so swart soos 'n kraai. Sy oë is soos die duiwe langs die spruite, duiwe wat lyk of hulle in melk gewas is waar hulle langs die water sit. Sy wange is soos die kruiebeddings waar lekkerruik-kruie groei. Sy lippe is soos lelies, hulle drup van mirre. Sy hande is soos stawe goud, met edelstene ingelê. Sy lyf is soos 'n blok ivoor, met saffiere ingelê. Sy bobene is soos marmerpilare wat op goue voetstukke rus. Sy voorkoms is soos dié van die Libanon, indrukwekkend soos die seders. Sy mond smaak soet, alles aan hom is begeerlik. So lyk die man wat ek liefhet, so lyk my lewensmaat, vroue van Jerusalem.”
Hoe klink dit vir jou? Verwondering, respek en liefde. Party dele in Hooglied is nogal eksplisiet, maar dis eenhonderd persent binne God se wil. Geskep vir die mens se vreugde en in die mooiste woorde beskryf.
Weet jy, ek dink Adam het nogal na sy asem gesnak toe die Here hom uit die narkose laat wakker word en hy sy oë op Eva lê. En andersom. Onthou jy toe jy vir vroulief by die kerk se deur sien instap het die dag toe julle getroud is? Hoe verruklik sy gelyk het? Vroulief, onthou jy hoe goed manlief gelyk het? So asof hy pas van sy wit perd afgewip het. O wee, moenie dat hy nou probeer afwip nie, hy sal dalk afvoeter! Arme perd...
Is daai gevoel nog aanwesig in die huwelik? Is daar nog enigsins romantiek, aanraking, liefkosing, intimiteit, respek, verwondering en bewondering? Of het dit plek gemaak vir irritasie, verwydering, afguns en jaloesie? Om nie eens van “name-calling” te praat nie. Ek glo met my hele hart dat die Here hierdie pragtige boek geskryf het sodat dit kan werk “till death do us part”. Ongeag van ouderdom of die verandering van die uiterlike. Meneer/mevrou, laat jou oë toe om saam met jou wederhelfte oud te word. Skoonheid lê nie in perfektheid nie.
In 1 Kor 13 kry ons wonderlike riglyne oor hoe om die liefde te laat hou. Hierdie klein jakkalsies wat die wingerd verwoes, word baie mooi beskryf. Hierdie klein goedjies wat stadig maar seker die huwelik infiltreer en verwoesting saai.
1Kor 13:4-7
Die liefde is geduldig... Die slim mense sê dat die dinge wat jou aanvanklik na mekaar toe aangetrek het, is dit wat jou later grensloos irriteer. Hierdie teks vra vir eindelose geduld met mekaar. Want ons verskil van mekaar.
Die liefde is vriendelik... Niks ge-dikbek lopery, stilstuipe, buierigheid nie. En mekaar met woorde afkraak nie.
Dis nie afgunstig nie... Praat hy dalk van jaloesie? Daai sieklike, groen jaloesie wat enige gesonde verhouding kan verwoes. Mense wat mekaar alewig wantrou en mekaar niks gun nie.
Handel nie onwelvoeglik nie... Bly 'n gentleman. Dis nogal aaklig as een party in die huwelik se gedrag maak dat die ander een in skaamte gedompel word. Veral as die voggies begin vloei... Hulle sê mos, na een drankie word jy 'n ander ou, en daai ou kan nogal 'n vark wees.
Hou nie boek van die kwaad nie... Los tog om hemelsnaam die ou koeie in die sloot! Ai, so 'n ontbinde koei wat so dikwels opgediep word, is darem maar 'n goor gedierte. Dit dien regtig geen doel nie.
Verbly hom nie oor die onreg nie, maar verheug hom oor die waarheid. Spreek nogal vanself, maar kom ons bring vergifnis hier in. Hierdie ding van “ek sal jou vergewe, maar ek sal dit nooit vergeet nie”, werk regtig nie. Dis eintlik maar 'n klug, sodat die ou koei maar weer gereeld herrys.
Hooglied 2:2 “Soos 'n lelie tussen die dorings, so is my liefling tussen die meisies”.
Sien jy dat hy in die derde persoon praat? Hierdie ou spog met sy geliefde. Is dit nie mooi nie? Weet jy waar Skinnerstraat is? Nee, nie die dubbelpad wat deur die middestad loop nie, dis die hoekie waar almal eenkeer per uur gaan vars lug vir die longe soek. Daar word lekker stories uitgeruil, en soms kliphard oor manlief / vroulief geskinder. Maar nie Salomo nie, hy verklaar openlik dat sy bruid sy hart se punt is.
Vers 16: “Die man wat ek liefhet, is myne en ek is syne.”
Juffrou staan nie en flikflooi met Adoons by die werk nie, sy verklaar openlik dat sy klaar “ge-dêps” is. “Hands-off” menere, ek is klaar gevat. En o ja, moenie praatjies met my maak wat jy nie voor jou vrou sou maak nie.
Hooglied 4:1 “Jy is mooi my liefling, jy is mooi, jou oe is duiwe agter jou sluier”.
Hoor hoe mooi komplimenteer hy haar. Hy sê sy is ten volle aanvaarbaar vir hom, net soos sy is, ongeag van die uiterlike. Jy weet mos, 'n man is soos 'n spieël waarin die vrou haarself sien. Dit wat hy reflekteer, is wat sy oor haarself glo. Manlief maak 'n aaklige opmerking, en vroulief glo dit vir die res van haar lewe. Maar dan kom Adoonsie by die werk en vertel vir haar die teendeel, en onmiddellik is daar “trouble in paradise”. Nee, as manlief haar gereeld komplimenteer, dink sy by haarself:- “Ek sien so paar “flaws” in die spieël, maar vir hom maak dit nie saak nie”.
Hooglied 4:10 “Ek hou van jou liefkosings, my beminde bruid...”
Liefkosing, baie baie belangrik. Dit staan nou nie hier geskryf nie, maar waarskynlik het meneer homself lekker vars ingeseep, sy harde baard afgekrap en homself aanvaarbaar gemaak. 'n Man wat sy vrou so mooi komplimenteer en haar goed behandel, hoef minder hoofpynpille te koop. Weet jy waarheen lei hierdie goeie gedrag dikwels? Heaven at eleven, starts at seven. 'n Lekker aangename aanloop...
Hooglied is mooi, dit vra vir mooi en dit beskryf mooi. Dit praat van innige liefde. ~ Willem Botha, 14/02/2023
Na aanleiding van gisteraand se boodskap het iemand vir my 'n vraag gevra wat ek nie weet wat om te antwoord nie. Lees dit gerus onder die kommentare. Maar toe het 'n klomp gedagtes vandag rondom dit by my opgekom, terwyl ek myself steeds in 'n tweestryd bevind oor die toestand waarin ons leef. Is daar uitkoms? Ek kan ook dít nie antwoord nie. Maar iemand het eendag 'n baie waar opmerking gemaak. Die persoon wat die beste op die langtermyn gaan oorleef, is die persoon wat die beste by die slegte dinge aanpas. Adapt or die. Maar, nie ten koste van jouself nie. Toe het ek 'n paar dinge bedink wat ek gaan probeer navolg, en moet nou asseblief nie goed hierin probeer lees wat ek nie hier sê nie.
* Proudly South African. Ten spyte van alles wat dalk uitdagings is, is ek trots Suid-Afrikaans. Ek is ook trots 'n Afrikaan en 'n Afrikaner. En ook trots Afrikaans! Niemand sal my dit ontneem nie.
* Hou op in die tonnel kruip, hou op hooploos agteroor sit en kyk hoe alles vergaan. Ek en jy kan tonne dinge doen in ons eie leefwêreld om dinge beter te maak, wat tog steeds beter is as om pateties te wees en maar net Gods water oor Gods akker te laat loop. Dis duur om voorsiening te maak vir dinge wat net nie meer werk nie, soos krag en water, maar elke ding wat jy kan bekostig om te doen, maak die lewe bietjie makliker.
* Hou op skuldig voel oor die verlede. Dis nou hoe dit was, maar ons hoef nie slawe te wees van dinge wat ons voorouers dalk verkeerd gedoen het nie. Hou op voel jy skuld almal iets, want jy doen nie!
* Wees trots op wat jy met harde werk versamel het, dis joune, jy skuld niemand iets daarvan nie. Moenie uit skuldgevoel fooitjies uitdeel nie, maar doen dit as jy voel dat dit 'n verskil maak. Daar is uiters professionele bedelaars op straathoeke, en jy neem dalk deel daaraan om daardie praktyk aan die gang te hou.
* Oorwin die slegte deur in jou leefwêreld 'n verskil te maak, maar jou gesin is eerste prioriteit.
* Jy kan nie die land se probleme oplos nie. Ek dink niemand kan nie, maar jy kan dalk die effek daarvan so effe verlig met kreatiewe denke.
* Hou op om 'n slaaf te wees van haat, ek is so goed daarmee. Weet jy hoe baie gebruik ek daardie woord? Jy sal geskok wees!
* Christene hoef nie slawe te wees van hulle Christelike herkoms nie. Mense sal jou wild en wakker beskuldig oor wat Christene al aangevang het. Wel, en is definitief nie trots op alles wat ek al gedoen het en kwytgeraak in die Naam van die Here nie. Maar dis agter ons, gaan steeds vorentoe met 'n nuwe uitkyk.
* Maak 'n verskil met goeie verhoudinge. Ons sien baie rassespanning, vernaam as jy nuus kyk en daai rooi hoedjie maak sy verskyning. Maar tog, op straat en in die winkels is daar bykans sonder uitsondering liefde en aanvaarding tussen mense.
* Hou jou geloof in stand, beoefen jou geestelike lewe soos wat die Bybel voorskryf en volgens goeie beginsels. Moenie dat die nuwe strominge van mense wat afvallig word jou pootjie en laat twyfel nie.
* As jy hier gebore is, en jou voorgeslagte ook, is hierdie JOU land, as jy belasting betaal, staan op vir wat joune is. As jy 'n boer is, wees trots boer. As jy 'n Engelsman is, wees trots Engelsman. As jy 'n Zoeloe is, wees trots Zoeloe.
* Jy kan aanpas en die beste van alles maak, of saam met die stroom swem wat moed opgee en net kla. Dit help niks!
* Laastens, wees trots JY! Want jy is na God se beeld geskep en jy is al voor geboorte 'n wenner.
Nou ja, daar gaat ons, kom ons LEEF! ~ Willem Botha, 09/02/2023

God - expat
God is landuit, moeg vir al die strooi, ons net so gelos, en kon nie Sy beloftes oor ons land nakom nie. Wie kan Hom kwalik neem? Hy het al soveel keer gewaarsku dat ons moes terugdraai maar ons wou nie, ons hou aan in ons afvalligheid en sondes en dryf dag vir dag verder weg. Nou het Hy groener weivelde gaan soek. Waarheen Hy is weet ek nie!
Dis natuurlik glad nie waar nie, maar ek gaan BAIE BAIE eerlik met jou wees, daar is dae wat ek presies so voel, en lank terug word ek gekonfronteer met hierdie vraag toe ek kyk na 'n insetsel op TV van Louie Giglio, toe hy gevra word of daar nog hoop is vir Suid-Afrika. Ek kom toe met 'n skok agter dat hy meer hoop het vir ons land as ek, want as buitestaander sien hy dinge wat ek miskyk en hy noem dinge wat my verstom laat staan. Jy sien, ek laat te veel toe dat die dag tot dag dinge in die land my negatief stem en ek wil wil hoop verloor. Maar God sien die prentjie totaal anders, en sy mening is vir seker heeltemal anders as myne, want Hy is in beheer, en al lyk of voel dit nie so, Hy kan die land herstel.
Ek dink egter steeds dat die sleutel hiertoe in ons eie hande lê:
"As My volk oor wie My naam uitgeroep is, berou toon en bid, en vra na My wil en terugdraai van hulle bose weë af, sal Ek luister uit die hemel en hulle sonde vergewe, en hulle land herstel." (2 Kron 7:14)
Dit vraag wat ek myself afvra, is wanneer gaan ek hiermee begin? ~ Willem Botha, 09/02/2023
"Bewaak jou hart meer as alles wat bewaar moet word, want daaruit is die oorspronge van die lewe." (Spr. 4:23) Ou vertaling.
Wat 'n ongelooflike kragtige teks! Bewaak jou hart meer as alles wat bewaar moet word. Kom ons dink net vir 'n oomblik terug aan 2000 - 3000 jaar gelede toe die Bybel geskryf is. Wat het die mense van daardie tyd van die anatomie van die mens geweet? Hoekom staan hier nie: "Bewaak jou verstand" nie? Met jou verstand kan jy tog dink en redeneer, maar nie met jou hart nie. Hoe bewaak mens jou hart? Wel, vir my is die hart jou gevoel sentrum. Dis waar jy emosies ervaar soos 'n gevoel van liefde, of woede. Is dit toevallig dat te veel woede uitbarstings kan lei tot 'n hartaanval?
Waarvan moet jy dan jou hart bewaak? Ek kan aan baie dinge dink. Moenie dat bitterheid in jou hart vashouplek kry nie. Oppas vir mense wat met negatiwiteit jou lewe versuur, want dit kry vastrapplek in jou hart. Moenie dat ander mense se probleme, wat hulle oor hulleself bring, jou vreugde steel nie. Moenie dat die probleme van die land jou onderkry nie. Dis dinge wat jou hart soms inmekaar laat trek.
Nee, maak jou hart oop vir liefde vir jou mense, en hier praat ek van mense in jou direkte binnekring. Terloops, hoor jou kinders en gade gereeld dat jy lief is vir hulle? Maak jou hart oop vir die daaglikse vreugdes van die lewe. Ja, jy sal moet kies om dit raak te sien. Maak jou hart oop vir die Here, want dis eers as jy Hom in jou hart toelaat, dat daar werklike intimiteit plaasvind.
Bewaak jou hart... want daaruit is die oorspronge van die lewe. ~ Willem Botha, 06/02/2023
Die sondes van die vaders...
"Ek reken kinders die sondes van hulle vaders toe, selfs tot in die derde en vierde geslag van dié wat My haat, maar Ek betoon my liefde tot aan die duisendste geslag van dié wat My liefhet en my gebooie gehoorsaam." (Deut. 5:9b-10)
Sjoe, hierdie teks herinner my aan 'n baie onaangename waarheid, en dis dat die sondes van vaders (en moeders) 'n vreeslike slegte las op kinders nalaat. Foute, gewoontes, verslawings, sondes ens. dra oor van geslag tot geslag. Dít wat kinders die meeste van hulle ouers haat, is dikwels juis dit wat hulle aan hulle kinders oordra. Ek het dit al só baie keer gesien. Maar daar is 'n ander kant ook. 'n Kind loop gewoonlik op hulle ouers se spore, goed of sleg, en laat dan spore vir hulle kinders om op te loop. Goed of sleg! 'n Kind wat uit 'n liefdevolle, standvastige gesin kom, sal gewoonlik mooi spore nalaat.
Ons almal laat spore agter ons in ons lewens. Party mense trap diep spore in die samelewing en sommiges ploeter net voort. Party mense se spore loop na al wat 'n verkeerde plek is toe en soms wil ons ons spore doodvee, want dit sê so baie van ons karakter en gewoontes.
So ietsie oor spore.
Veldkenners kry sommer 'n klomp inligting uit 'n bok se spoor: die ouderdom van die spoor, die rigting wat die bok beweeg, die tipe bok, die spoed waarmee hy beweeg het, en nog heelwat meer inligting. Die bok se spoor laat ook 'n reuk agter.
Nou ja, die harde realiteit is dat jou kinders in jou spore sal volg, ook as jy verkeerde paaie gevolg het, en dis bykans onmoontlik om dit altyd dood te vee. Dus moet jy maar mooi trap. Mense loop so graag agter ander mense aan deur vir hulle "idols" bymekaar te maak, maar dit hou nie lank nie.
So het mense al in die lewe diep spore getrap, maar nie een soos Jesus Christus nie. Sy spore het gehou en elke enkele toets en uitdaging van die tyd deurstaan. En hy vra vir my en jou om in Sy spore te volg.
Toe sê Jesus vir sy dissipels: “As iemand agter My aan wil kom, moet hy homself verloën, sy kruis opneem en My volg". (Matt. 16:24)
Nie een mens op aarde wat hierdie besluit geneem het, was ooit spyt nie. En jy en ek sal ook nie wees nie. ~ Willem Botha
 
“Ons wil met julle saamgaan, want ons het gehoor God is by julle” (Sag 8:23). Toe ek dié teks lees moes ek myself afvra of my lewe, my woorde én my dade, God se teenwoordigheid só uitstraal dat dit mense sal aantrek en aanspoor om Hom te volg. Wat het mense van my gehoor? Het hulle dalk gehoor dat ek ’n negatiewe mens is, wat kwaadpraat of skinder, iemand wie se ja nie ja is nie, iemand wat nie tyd het vir ander nie, iemand wat suinig is en net na my eie belange omsien, iemand wat hardkoppig haar eie pad volg. Of het hulle dalk gehoor dat die Here by my is, dat ek Geesvervuld is, dat my woorde sag en vriendelik is, dat ek selfbeheersing aan die dag lê, dat ek bid en doen, dat my geloof sterk is en my hoop op God is, dat ek tyd bestee aan bestudering van die Woord, dat daar altyd lof vir God op my lippe is? O, ek bid maar net weer dat my lewe mense sal aantrek en nie afstoot nie, dat my lewe ’n bewys sal wees dat God by my is. Ek bid maar net weer dat ek ’n aangename geur sal versprei; dat my lewe ’n brief sal wees wat Jesus se liefde, genade en aanvaarding sal verkondig. Ek bid dit vir jou ook! ~ Wilna Botha, 31/01/2023
Powered by FORD!
In my kinderdae was daar dikwels sulke groot plakkers aan die onderkant van die deure van hierdie raserige, blitsige karre geplak. Aan die agterkant op die "badge" het natuurlik ook Ford gestaan! Was altyd vreemd, ek het gewonder of jy dan 'n groot Ford met 'n Datsun enjin sou sien...
Nietemin, die goed was vinnig, want hulle het altyd afdraande geloop, want die voorwiele was kleiner as die agterwiele. Nou ja, die kragbron was belangrik, en dis ten toon gestel. Maar kom ons parkeer die kar nou eers 'n bietjie.
In die wetenskap leer ons dat energie en materie uitruilbaar is, en jy kan dit nooit vernietig nie, of nuwe materie skep nie. Dit kan altyd net van een vorm na 'n ander omgeskakel word. Jy, met AL jou atome, bestaan van die begin van die skepping af, en sal vir altyd bestaan, net in 'n ander vorm. Stof tot stof is 100% waar. Elke enkele atoom in jou liggaam kom uit grondstowwe uit, soos elke enkele ding wat die mens ooit gemaak het, en dit sal weer daarheen terugkeer. Bakstene, diamante, staal, jou sitkamerbank, jou eetgerei, jou motor, jou selfoon, alles kom uit grondstowwe uit, en kon NET deur 'n skepper, of nee wag, dié Skepper gemaak word. Selfs wetenskaplikes wat nié Christene is nie, stem meesal saam dat daar 'n skepper (van 'n aard) moes wees. Ons noem Hom God.
"In die begin het God die hemel en die aarde geskep..." (Gen. 1:1)
So het Hy elke atoom wat steeds bestaan, tóé reeds geskep. Vir jou en my ook. Hy het ook reën gemaak, water, wind en vir ons die moontlikheid laat ontdek om vuur te maak.
"God het die twee groot ligte gemaak, die grootste om bedags te heers en die kleiner lig om snags te heers, en ook die sterre." (Gen. 1:16) Toe maak Hy die son. Ons praat steeds oor 'n kragbron.
Wel, sensitiewe sakie deesdae né, ons wil liewer nie daaroor praat nie.
Dink saam met my: Ál die steenkool, wat oor duisende jare gevorm is, is deur Hom gemaak. Dit verskaf vir ons krag. Die wind is sy handwerk. Dit verskaf vir ons krag. Uraan word uit die grond gehaal. Dit verskaf vir ons krag. Water word met behulp van gravitasie aangewend om krag te verskaf. Sonpanele en batterye en omskakelaars (inverters) word vervaardig uit grondstowwe, waarvan die boustene van die begin van die skepping af bestaan. Wanneer die son en daardie toerusting bymekaar uitkom, word krag opgewek. God het die mens toegelaat en toegerus om hierdie tegnologie te ontwikkel.
Daarom kan jy 'n reuse plakker op jou kragkas, en op jou kragopwekker, en op 'n wind turbine, en op 'n sonpaneel, en op 'n kragstasie, en op 'n battery en op hordes ander goed gaan plak, wat sê:
POWERED BY GOD!!!! ~ Willem Botha, 31/01/2023
Ek het hierdie mooi akroniem vir HOPE gelees: Have Only Positive Expectations. Met Jesus in my lewe weet ek dat daar altyd hoop is. Ek moet die hoop  as’t ware met my geestesoog voor my “sien”, ek moet dit vasgryp en myself positief programmeer daarmee. Dié hoop wat die Here ons gee is ’n veilige en onbeweeglike anker, sê die Bybel in Heb 6:19. Dis nie iets van ek “hoop” dit reën vanaand nie, of ek “hoop” ek gaan die eksamen slaag nie. Die hoop-anker wat daar in Jesus is, sal keer dat jy sink of wegdryf, sal keer dat jy teen die rotse geslaan word as daar ’n storm opkom. Al is ’n boom afgekap, is daar hoop dat dit weer sal uitloop en dat sy lote sal aanhou groei. (Job 14;7). Solank daar lewe is, is daar hoop. ’n Hond wat lewe, is beter as ’n leeu wat dood is. (Pred. 9:4). Ek sal nie hooploos lewe nie.... ~ Wilna Botha, 25/01/2023

Kort van draad
Hoe ongelooflik vinnig verander mens se gemoed nie na die rustige Kerstyd en ontspan by die huis nie. Ek het probeer om 'n voorneme te maak om nie toe te laat dat die daaglikse "triggers" van die lewe my so gou opwerk nie. Maar o wee, "probeer" was 'n grap! Sommer onmiddellik toe die werk begin het en alles terugkeer na "normaal" toe, was ek maar my ou self. So, wie is hierdie ou self?
Kom ek steek gou 'n prekie vir myself af. Ongeduld bring jou nêrens nie. Ek is nie trots op my gedrag as ek alleen is en geïrriteerd raak met iets nie, en boonop so paar knope los.
“'n Geduldige mens is baie verstandig; een wat kort van draad is, stel sy dwaasheid ten toon.” (Spr. 14:29)
Ek weet dat vroulief onmiddellik vir my bid vir rustigheid as dit gebeur en dit lyk my daardie gebede werk nogal soms! Dis egter een ding as dit gebeur as jy by jouself is, maar as jy dit voor ander doen, of jou frustrasie op ander uithaal, wys dit eintlik maar net hoe dwaas jy is.
Was jy ook al in iemand se geselskap tydens 'n uiteet uitstappie en die persoon raak ongeskik met die kelner? Dit plaas mens in 'n ongelooflike ongemaklike situasie. Ek kan dit net nie hanteer nie, en sal eerder nooit weer saam met so iemand gaan uiteet nie.
En nie eers te praat van padwoede nie. Nou kyk, hierdie is 'n lelike ding! Gelukkig spandeer ek min tyd op die pad.
Ek dink Jesus het 'n geweldige sagte gees gehad en mens sien dit raak as jy lees in die Evangelies waar Hy aan die woord was. Ek glo hy het selfs die Fariseërs berispe op 'n kalm en bedaarde manier en dikwels met 'n glimlag. Ek glo ook dat Hy selfs tydens ons eie uitbarstings met deernis na ons kyk en sê: Rustig vriend, die lewe is te kort vir hierdie gedrag.
Daardie truuk wat sê jy moet tot 10 tel voor jy negatief reageer werk goed. Maar kyk, ek hou nie van somme nie. Miskien moet ek iets byvoeg by my eie tien tellings, nl. om net te bid: “Here, help my om net vir 'n oomblik kalm te raak". ~ Willem Botha, 24/01/2023
Welgeluksalig is die mens wat die Woord van God oordink en dit die riglyn vir sy lewe maak – dis min of meer wat Ps. 1:1-2 sê. Welgeluksalig beteken om in die hoogste mate gelukkig te wees. Wel-geluk-salig. As iemand “wel” is, is hy gesond en tevrede, dinge in sy lewe verloop glad en mooi. As iemand “geluk” beleef, dan is hy geseënd, vrolik en voorspoedig  As iemand “salig” is, stap hy ’n vreedsame, heerlike, heilige pad wat uitloop op die ewige lewe by God. Haal bietjie een van daai baie Bybels in jou kas uit - bestudeer en oordink dit en wees welgeluksalig! ~Wilna Botha, 19/01/2023

Paaaa, kan ek 'n nuwe PlayStation kry?
Nee!!!
Hoekom nie Paaaaa?
Sommer nie, want ek sê so!
Nee... is nie altyd 'n gewilde antwoord nie. Vernaam nie as ek doodseker is dat ek iets binne God se wil vra nie. Ek bid dan nadat ek dinge goed oordink het, al die konsekwensies goed oorweeg het en oortuig is dat hierdie die beste uitweg is. Voorts sê die Bybel dat ek moet vra. "Want elkeen wat vra, ontvang, en elkeen wat soek, kry, en vir elkeen wat klop, sal oopgemaak word. Watter mens onder julle sal vir sy seun ‘n klip gee as hy brood vra, of ‘n slang as hy vis vra?” (Matt 7:8-9)
Maar hier is die probleem. Ons besef nie dat ons 'n slang vra nie want soms lyk hy nes 'n vis.
Goddank, die Here weet wanneer Hy ons teen onsself moet beskerm. Soms gaan ons bietjie moet wag om te verstaan hoekom die Here nee gesê het en soms gaan ons nooit verstaan nie, en soms kan dit dalk voel of die Here selfs wreed is.
Die Here antwoord altyd op jou gebed.
Soms sê Hy: Ja.
Soms sê Hy: Nee.
Soms sê Hy: Wag.
Maar... dikwels gaan jy by die punt kom dat jy ongelooflik dankbaar teenoor die Here gaan wees vir daardie nee. Soos wat ek al menigmaal was. Dus, leer maar om geduldig te wees, God is altyd in beheer. Dankie tog! ~ Willem Botha, 18/01/2023
Wanneer jy die regte koers verlaat, sal jy agter jou 'n stem hoor sê: “Hier is die pad, loop hierlangs.” (Jes. 30:21) Dit klink mooi, maar wat van daardie dag wat jy by ‘n kruispad staan en jy wag, maar jy hoor nie daardie duidelike stem om vir jou te sê watter kant toe nie? Daardie dag wanneer jy voor ‘n keuse staan en vra: moet ek of moet ek nie, is dit reg of is dit nie, maar jy kry nie sekerheid nie?  Dis nogal iets wat ek so aan die begin van die jaar baie oordink – sal ek in elke situasie weet of ek die regte keuse doen, sal ek weet wanneer ek die regte koers verlaat? Mens dink mos maklik: ek mag enige iets doen, ek is volwasse, ek is vry, ek hoef vir niemand te verduidelik nie, alles is my geoorloof, ens. Ek sien in 1 Kor. 6:12 en 1 Kor. 10:23 drie vrae wat mens dalk kan help met keuses. Vra jouself af:
(1) is wat ek wil doen heilsaam? (m.a.w. is dit goed vir my, sal dit my gelukkig maak, is dit werklik nuttig?)
(2) kan dit lei tot verslawing?
(3) is dit werklik opbouend?
As jou antwoorde ja, nee, ja is, dink ek jy kan met ‘n geruste hart daardie pad vat en net dalkies sal jy die Here saggies hoor sê: Hier is die pad, loop hierlangs. ~ Wilna Botha, 17/01/2023
Godverlate....
Dis hoe ek dink baie mense tans voel. Dalk daardie gevoel dat die Here sy rug op jou gedraai het. Dalk voel dit of Hy jou vergeet het. Dalk tref jou gebede die plafon. Dalk voel dit of jy nie meer woorde het om te bid nie. Dalk voel dit selfs of dít wat jy in die Bybel lees, sy krag verloor het. Miskien voel jy alleen omdat niemand meer jou probleme wil aanhoor nie. Dalk is die lig in die tonnel afgeskakel. Dalk voel dit of die lewe net eenvoudig nie meer die moeite werd is nie. Dalk voel dit of die Here jou straf, maar jy weet nie eers hoekom nie. Dalk voel dit of Hy sommer verdamp het.
Wel, as jy só voel, is jy definitief nie alleen nie. Ek dink die lekker rustige gevoel van die Kerstyd het blitsig soos mis voor die son verdwyn, en alles is erger as verlede jaar.
Het ek vir jou raad? Dalk 'n paar gevleuelde woorde? Is daar dalk een of ander skakelaar wat ons kan aansit en alles is beter? Nee, ongelukkig nie.
Maar hierdie "gloom" is niks nuuts nie, want duisende jare gelede het baie mense so gevoel.
Toe laat die Here hierdie woorde in die Bybel opskryf:
"Maar dít sal ek ter harte neem en om dié rede bly ek hoop: deur die liefde van die Here het ons nie vergaan nie; daar is geen einde aan sy ontferming nie, dit is elke môre nuut. U trou is groot. Ek sê vir myself: Die Here is my lewe, daarom hoop ek op Hom. Die Here is goed vir wie op Hom bly hoop, vir die mens wat na sy wil vra; dit is goed om geduldig te wag op die hulp van die Here; dit is goed vir 'n mens om sy las in sy jeug te dra. Laat hy in sy eensaamheid geduldig bly as God hom die las opgelê het, laat hy hom diep verootmoedig - miskien is daar hoop - laat hy sy wang draai vir wie hom slaan, laat hy maar oorvloedig smaad ondervind. Die Here verstoot 'n mens nie vir altyd nie; as Hy beproewing oor 'n mens gebring het, ontferm Hy Hom weer, want sy liefde is groot: dit is teen sy sin dat Hy mense in ellende en beproewing bring." (Klaagl. 3 : 21 - 33)
Jy weet mos, die Bybel is vandag nog net so relevant soos toe dit geskryf is. ~ Willem Botha, 17/01/2023
“Met alles binne-in my wil ek aan U vashou. U dra my deur die lewe.” (Ps. 63:8, Die Boodskap). Dis so dubbel-uitdrukking: ek klou, Hy dra my. Dit laat my dink aan hoe ’n baba-apie verbete onder aan sy ma se pens vasklou, maar terselfdertyd tog ook so gemaklik en tevrede daar kan hang, omdat hy weet hy is veilig en sy sal hom nie laat val nie. Ek kan met vertroue aan die Here vasklou met dié wete dat Hy my dra. Selfs al sou my vasklou-greep verswak, sal ek nie val nie, want die ewige God se arms is onder my, Sy hand ondersteun my.... ALTYD! ONGEAG! ~ Wilna Botha, 12/01/2023
Ek het eendag gehoor dat iemand sê, dat as jy 'n geel motor koop (of enige spesifieke kleur of spesifieke fabrikaat), sal dit skielik lyk of daar hordes sulke motors is, want jy sal oorweldigend daarop fokus, en jy sal verbaas wees dat jy dit nooit opgelet het nie.
Kyk hoe pragtig stel hierdie teks dit oor die teenwoordigheid van die Here:
"Oral waar mense in die wêreld is, sal die gevoel hulle oorweldig om te weet dat die Here daar is." (Hab. 2:14 DB)
'n Kind van die Here kan Hom eenvoudig nie miskyk nie, dis of Hy orals is, en in alles is, en Hom om elke hoek en draai openbaar. Hoe hard ek ook al probeer, ek kan Hom nie miskyk nie, want ek sien sy werke, ek sien Hom in die skepping, ek sien Hom in ander mense en ek beleef Hom in my diepste wese.
Maar hoekom is daar so baie vir wie dit nie waar is nie? Ek het aan 'n paar punte gedink:
* Mense het toegelaat dat hulle só afgestomp geraak het, dat die wêreld se genietinge en plesier dit totaal oorheers. Voorts haat die mensdom dit om aan 'n hoër gesag verantwoording te doen.
* Mense het vir hulle leermeesters bymekaar gemaak wat harder praat as die stem van die Here.
* Mense gaan soek Hom in voorspoed en in persoonlike gewin, terwyl Hy dit hoegenaamd nie vir hulle belowe nie.
* Mense het die Gees begin teenstaan, en daarom is dit ONMOONTLIK om Hom raak te sien.
"Die mens wat nie die Gees van God het nie, aanvaar nie die dinge van die Gees van God nie. Vir hom is dit onsin." (1 Kor. 2:14)
* Mense wil nie glo nie omdat hulle nie "sien" nie. Wel, ek kan ook nie kern reaksies sien nie, ook nie giftige gasse nie, maar ek sien en ervaar die effek.
* Mense verval in eindelose redenasies en oorval jou met hulle dwaasheid, en dan begin jy twyfel. Moenie daarin trap nie, want jy kan hulle nie oortuig nie, want hulle tokkel gewoonlik op een snaar, maar bied geen alternatiewe aan nie.
Ek is dankbaar dat die geloof wat al jare in my voorouers vasgesteek het, oorgedra het na ons geslag en ek is seker ook, my nageslag.
"Ek dink ook aan jou opregte geloof, dieselfde geloof wat al in jou ouma Loïs en in jou ma Eunice was, en wat, daarvan is ek oortuig, ook in jou is." (2 Tim. 1:5) ~ Willem Botha, 11/01/2023
"Ek stel voor jy kry vir jou 'n god..."
Klink nogal vreemd op die oor of hoe? 'n Vriend vertel vir my dat hierdie woorde destyds deur 'n korporaal gebruik is toe hulle in die weermag kom. Nou ja, die woorde was waarskynlik nie ge-uiter deur iemand wat bekommerd was oor die troepe se siele nie, maar eerder dat hy daarmee te kenne gegee het dat hulle nooit deur hierdie weermag-hel gaan kom sonder hulp nie. Almal wat destyds weermag toe is, het geweet hulle is in vir 'n "rough ride", en dit was inderdaad so. Dit was egter net 'n miljoen keer rowwer as wat jy kon dink.
En hier staan ons aan die begin van 'n nuwe jaar, en ek vermoed ons is in vir 'n "rough ride". En ek stel voor jy kry vir jou die enigste God, indien jy Hom nie reeds in jou hoek het nie.
Daar is sprake van 'n wêreldwye resessie, Eskom se onvermoë gaan hordes maatskappye se ondergang beteken en daar gaan werkverliese wees, die regering het totaal die pap op die grond laat val en die silwer randjie om die wolk lyk maar yl.
Ek stel voor jy kry vir jou dié enigste God. Dié Een wat altyd daar is, en jou anderkant uit kan kry, want die vader weet, jy kan op geen ander hulp staatmaak nie. Definitief nie op mense nie. Maar wat help dit Hy is in jou hoek? Gaan alles dan net gelyk waters op 'n gladde oseaan wees? Nee, gewis nie!
Hou vas aan Hom, asof niks wat sleg is jou gaan tref nie.
Maar indien die slegte goed wat jy só vrees jou tref, hou vas aan Hom tot jy deur die storm is.
En as die storm net eenvoudig nie wil bedaar nie, hou vas aan Hom en klou verbete aan sy enkels vas, want dis baie beter as enige ander alternatief.
En as die heel ergste van die ergste jou tref en jou lewe voel of dit uitmekaar val, hou vas aan Hom totdat Hy die stukke weer opgetel het en jou weer heel gemaak het.
Kry betyds vir jou dié God, want al word jou lewe hierdie jaar gekenmerk deur nét ongekende voorspoed, het jy iemand nodig om te bedank. Wie is groter as Hy? En wie is tot meer in staat as Hy? En wie anders kan jy bedank? Definitief géén ander god nie! Kies reg, en kies betyds.
"Laat my elke môre u liefde ondervind, want in U stel ek my vertroue. Wys my die pad wat ek moet loop, want my hoop is op U gevestig." (Ps. 143:8)
Ek en Wilna wens vir jou en jou geliefdes 'n goeie jaar toe, uitdagings en al. Mag julle geseënd wees. Dankie ook dat jy deel is van Heuning. ~ Willem Botha, 09/01/2023

Klik hier vir nog meer heuningdruppels >
Duplisering en verspreiding word toegelaat sonder veranderinge en met verwysing na die outeur en webruimte (www.heuning.co.za)