... soeter as heuning, as druppels uit 'n heuningkoek (Ps 119:11)

Die daaglikse heuningdruppels is ook op ons Facebook-groep. Klik hier:

Duplisering en verspreiding word toegelaat sonder veranderinge en met verwysing na die outeur (Wilna / Willem Botha) en webruimte (www.heuning.co.za)

Veg!!!

Hemel ons leef in 'n veglustige,  magmal wêreld! Almal wil net veg. Een ou skiet 'n ander morsdood in padwoede insidente,  politieke teenstanders skiet mekaar dood net omdat hulle verskil van opinies. Ek sien vanaand op die nuus hoe die taxi ouens die wit waks uit mekaar skiet, hoekom op aarde weet ek nie! Nie eers te praat van bende geweld in die Kaap nie! Mense vermoor ander vir 'n selfoon of 'n beursie en in die Midde-ooste is die oorlog buite beheer.  Amerika het 'n enorme verdedigings begroting,  maar hulle veg ander mense se oorloë en verloor derduisende van hulle eie soldate,  en troos dan die ouers met hierdie belaglike woorde: "Hy het vir 'n goeie saak gesterf".  Watter saak Mnr Die president? Wie se saak?
Absolute magmalheid!
Maar kom ons kyk sommer net op  Facebook. Het jy al gesien hoe (oënskynlike) opgevoede mense mekaar kan slegsê dat die see hulle nie kan afwas nie? Sies! Ons het mal geword!

Ons kan maar net bid dat die volgende vir ons waar sal word:

Miga 4:1-4
"Daar kom 'n tyd dat die berg waarop die huis van die Here is, 'n blywende plek sal hê bokant die bergtoppe en sal uitstaan bo die heuwels. Die volke sal daarheen stroom, baie nasies sal daarnatoe gaan en sê: “Kom, laat ons optrek na die berg van die Here toe, na die huis van die God van Jakob sodat Hy ons sy wil kan leer en ons daarvolgens kan lewe, want uit Sion kom die openbaring, uit Jerusalem die woord van die Here.” Hy sal oordeel tussen baie volke, regspreek oor sterk nasies wat ver weg woon. Hulle sal van hulle swaarde ploegskare smee en van hulle spiese snoeiskêre. Die een nasie sal nie meer die swaard teen die ander opneem nie, en hulle sal nie meer leer om oorlog te maak nie. Elke man sal onder sy eie wingerd sit, ongesteurd onder sy vyeboom. Die Here die Almagtige het dit gesê."

Hulle sal van hulle swaarde ploegskare smee en van hulle spiese snoeiskêre.
Mag ons leef om dit te sien! Vergewe ons Here. ~ Willem Botha, 29/09/2015

Ek lees dié nou die dag op ’n vriend se Facebook-wall: “When God measures man, He places a measuring tape on his heart, not his head.” Wat in jou hart aangaan is vir die Here belangrik. Of jou hart aan Hom behoort, of jou klip hart vervang is met ’n hart van vleis, is wat tel op die Here se maatband. Vir die Here is jou hart belangriker as jou kennis. Partykeer wil mense té veel redeneer en té veel probeer om God en sy weë uit te pluis en te verduidelik, terwyl dit net nodig is om die deur van jou hart oop te maak en Hom in kinderlike geloof in te nooi. “Daar staan tog geskrywe: Die wysheid van die wyses sal Ek vernietig en die geleerdheid van die geleerdes sal Ek tot niet maak.” (1 Kor. 1:19). As die Here vandag jou hart meet en jou lewe weeg, sal Hy sê: “geweeg en te lig bevind” soos vir koning Belsasar in Daniël se tyd, omdat daar nie eerbied vir die Here in sy hart was nie, of sal die Here ’n hart vol liefde en deernis vind, ’n onverdeelde, opregte hart waar Hy alleen die Koning is?  ~Wilna Botha, 28/09/2015

Christen … is JY 'n Christen? As iemand jou sou vra oor jou geloofsoortuiging, sê jy sekerlik ook dat jy 'n Christen is. Dit beskryf tog sekerlik iets van dit waarin in jy glo, of wát jy glo.
Ek het al die vraag gehoor: "Was Jesus 'n Christen?" Ek dink dit is 'n sinnelose vraag. As jy vra: "Willem, is jy 'n stoeier?", dan kan ek sê: "Nee, want ek stoei nie". As ek vir 'n Mercedes vra: "Is jy 'n kar?", dan is die vraag mos sinneloos, want wat anders kan die Mercedes dan wees? So, was Jesus 'n Christen? Natuurlik, want Hy gee definisie aan die term. As ek en jy dan vra: "Is ek 'n Christen?", dan moet ek seker op die een of ander manier kwalifiseer om dié status te kan "verdien". Die antwoord sal natuurlik ook afhang van die definisie van wat 'n Christen is.
So, is ek dan of is ek nie? 
Vra my 'n paar vrae:
Willem, sukkel jy met sondes? Ja, baie 
Willem, het jy al die Here verloën? Ja, ongelukkig 
Willem, is jy baie getrou aan die dinge wat die Here verwag? Nee, ongelukkig nie 
Willem, het hy al aan die bestaan van God getwyfel? Ja, ongelukkig gebeur dit steeds 
Willem, bekommer jy jou terwyl die Here sê jy moet Hom vertrou? Ja, daagliks 
Willem, is jy skeinheilig? Ja, dit beskryf my perfek

“Ek weet, Here, ’n mens hou nie jou lewe in jou eie hande nie. Niemand het beheer oor wat in die lewe met hom gaan gebeur nie.” (Jer. 10:23, Die Boodskap) Ons maak planne, ons dink ons is in beheer, ons dink ons kan ons eie koers bepaal, maar tog weet ons glad nie wat die volgende oomblik vir ons inhou nie, ons weet nie watse struikelblokke of ompaaie op ons wag nie. Nie die sterkste, slimste, rykste, beste mens het beheer oor wat met hom gebeur nie Ek het dit die afgelope paar dae maar net weer van vooraf besef toe ’n paar dinge heel anders uitgedraai het as wat ek dit voorsien het. Dit is geensins ’n fatalistiese uitkyk nie, dis ’n waarheid waarmee ons moet saamleef. Net die Here weet wat wat met ons gaan gebeur en daarom moet ons vertrou dat wat ook al oor ons pad kom, nie buite sy beheer is nie. As ons planne maak,  moet dit altyd in potlood ingeskryf word en die uitveër naby wees vir ingeval die lewe ander draaie maak. As jy jou planne in permanente ink skryf en sê dis beslis wat en hoe ek dit gaan doen, kan jy dalk ’n verassing kry. Net die Here ken die toekoms en daarom kan ons oorgegee aan Hom lewe en in afhanklikheid Sy pad stap. Julle moet eerder sê: “As die Here wil, sal ons lewe en sal ons dit of dat doen.” (Jak. 4:15) ~ Wilna Botha, 15/09/2015

Uitkamp 
Op 6 Julie 1977 beland ek in Potchefstroom vir my diensplig en binne die eerste uur kom jy agter dat daai plek nie vir sissies is nie. Behalwe vir 'n klomp mal korporaals sien ek dat my huis waarin ek vir twee jaar gaan bly van seil gemaak is, geensins stofdig is nie en ook nie altyd waterdig is nie, en Potch se koue deur daai flappe sny soos 'n skerp mes. Boonop gaan ek daai klein vertrek met 5 ander mense deel, of ek van hulle hou of nie. 
Daar was regtig swaar tye in daai tent met baie blootstelling aan die elemente, maar dit was darem 'n dak oor die kop. Ek kon dit uithou, want ek het geweet ek gaan binne twee jaar terug na my heerlike ouerhuis toe. 
Net so vergelyk Paulus hierdie lewe met 'n tentlewe, wat in die hiernamaals vervang sal word met 'n vaste struktuur, en dan moedig hy ons aan om vas te byt, want die swaar van hierdie lewe sal plek maak vir die wonderlikste van wonderlike lewe.

Lente bring lewe 
Soos ek hier sit en skryf val die eerste lentereën daarbuite en dis HEERLIK! Die dor grond sien met verwagting uit na dit wat hierdie reën gaan voortbring. Die grasperk is betyds voorberei met 'n bolaag met voedsel en die reën is die laaste komponent wat moes by kom. Soos wat die reën op hierdie oomblik op die grond val jubel potensiële lewe onder die grond en binnekort sal die wêreld totaal anders lyk as 'n paar dae gelede. 
Maar hoe dit gebeur weet ons nie. Ons kan die proses beskryf, maar presies wat op mikroskopiese vlak gebeur is bo my verstand. Dit gebeur net. Maar een ding weet ek: dis nie vanself nie en dis nie toevallig nie, daar is 'n Skepper aan die werk.

In Matt. 22:1-14 lees ons die gelykenis van die bruilofsmaal. Die koning het vir sy seun ’n bruilofsfees voorberei. Toe alles gereed is, is die gaste laat roep, maar almal het die een of ander verskoning gehad. Daarna het die koning sy slawe die strate ingestuur om almal wat hulle sou teenkom uit te nooi, slegtes sowel as goeies. Sjoe, dankie tog, dis hier waar ek en jy ook die uitnodiging na die hemelse bruilof ontvang het. Dié wat dit aangeneem het, het by hulle aankoms ’n lieflike bruilofskleed ontvang, ’n fees-kleed, ’n uitrusting wat wys dat jy as gas aanvaar is, maak nie saak of jy van die straathoek af gekom het, of ’n “slegte” mens is nie. Daar was egter iemand wat gedink het dat hy kan inglip sonder dié kleed aan. Waarskynlik was hy genooi, maar wou nie openlik die uitnodiging aanvaar nie, hy wou nie erken dat hy ’n vriend van die koning is nie. Sy hande en voete is vasgebind en hy is uitgegooi in die diepste duisternis. God nooi ons uit na die hemelse bruilofsfees en Hy  vergun ons om “fyn, helder blink klere aan te trek” (sien Openb. 19:8), Hy gee vir ons ’n volmaakte en silwerskoon bruilofskleed, ’n genade-kleed gewas in Jesus se bloed, ’n gratis kleed wat al ons swakheid en sonde en skande verberg. Aanvaar Sy uitnodiging en vier saam fees. ~ Wilna Botha, 01/09/2015

Spore 
Ons almal laat spore agter ons in ons lewens. Party mense trap diep spore in die samelewing en sommiges ploeter net voort. Party mense se spore loop na al wat 'n verkeerde plek is toe en soms wil ons ons spore doodvee, want dit sê so baie van ons karakter en gewoontes. 
Die veldkenners kry sommer 'n klomp inligting uit 'n bok se spoor: die ouderdom van die spoor, die rigting wat die bok beweeg, die tipe bok, die spoed waarmee hy beweeg het, en nog heelwat meer inligting. Die bok se spoor laat ook 'n reuk agter. 
Nou ja, die harde realiteit is dat jou kinders jou spore sal volg, ook as jy verkeerde paaie gevolg het, en dis bykans onmoontlik om dit altyd dood te vee. Dus moet jy maar mooi loop. Mense loop so graag agter ander mense aan deur vir hulle "idols" bymekaar te maak., maar dit hou nie lank nie. 
So het mense in die lewe diep spore getrap, maar nie een soos Jesus Christus nie. Sy spore het gehou en elke enkele toets en uitdaging van die tyd deurstaan. En hy vra vir my en jou om in Sy spore te volg. 
MATTEUS 16:24
Toe sê Jesus vir sy dissipels: “As iemand agter My aan wil kom, moet hy homself verloën, sy kruis opneem en My volg". 
Nie een mens op aarde wat hierdie besluit geneem het, was ooit spyt nie. En jy en ek sal ook nie wees nie. ~ Willem Botha, 31/08/2015

Glory game 
Ons het gisteraand die fliek "Glory game" gaan kyk. Dis die dokumentêre film van Joost van der Westhuizen en sy siekte genaamd Motor Neuron siekte. 'n Skitterende fliek van hoop, veg, oorlewing en dan ook die hartseer kant van tyd wat uitloop. In 2011 het die dokters hom twee jaar gegee, maar hy veg steeds voort na vier jaar. 
Die kern van die film vir my was die harde realiteit dat mens soms deur 'n traumatiese gebeurtenis moet gaan om te besef hoe kosbaar LEWE is. LEWE, nie net bestaan nie. Asemhaal is maklik, LEWE is 'n kuns. 
Een van Joost se begeertes is om sy kinders te sien grootword, maar ons weet nie wat hom beskore sal wees nie. Maar ek, sover ek weet, is vir nou okay. Maar wat maak ek daarmee? Maak ek 'n verskil in ander se lewens? Is ek iets werd vir die Here in terme van Koninkrykswerk? Gee my lewe vir ander hoop? Vir wie beteken ek die meeste?
Wel, hier is 'n toets :
Wie "score" die meeste uit jou lewe? Jou gesin en familie? Die Here? Of dalk jou baas? 
Ek vrees oor die antwoord! 
En as jou Glory Game se einde dalk wink, wie sal dan voorkeur kry? Ek dink ek ken daai antwoord. Lewe vandag vir dit wat die belangrikste is, solank jy dit het. Ons lewe so 29000 dae as ons 80 jaar sou bereik, maak soveel moontlik van dit wat oor is. 
CARPE DIEM! ~ Willem Botha, 26/08/2015

Segen Vader segen sop...

Hoe gereeld bid jy die volgende: “Seën hierdie voedsel aan ons liggame Vader, en maak ons opreg dankbaar daarvoor. Amen.”
Lekker kort gebed,  werk elke keer,  chop chop afgerammel. Maar wat beteken dit regtig?  En dan daarby : seën die hande...  Net 'n gewoonte?  Moontlik ja,  maar ten minste 'n goeie gewoonte.

Maar kom ons probeer vandag,  al is dit net een dag,  om te dink wat dit beteken om daardie bord kos voor jou te hê en ons bid seën af op meer rolspelers.

Here,  seën asb:
Die mense in die supermark wat my bedien het. Die rakpakkers wat vir my bitter min geld werk en die tellers wat BAIE laat by die huis kom omdat ek tot 8 uur vanaand wil koop.
Die trokdrywers wat my so frustreer op die pad omdat ek vinniger wil ry, maar hulle ry die kos na die winkels toe aan.
Die werkers wat die kos in fabrieke verwerk,  nagte deur dat dit vars verkoop kan word,  dikwels onder haglike omstandighede.
Die plaaswerkers wat swoeg in die warm son en vir 'n karige minimum loon werk.
Die boer wat met geweldige risiko's worstel,  wat afhanklik is van die regte weer en wie se lewe minder werd is as sy bakkie  of selfoon. Hy wat wakker lê omdat dit bitter moeilik raak om winsgewend te boer,  en boonop is sy eiendom deesdae in gedrang.
Die maatskappye wat saad en kunsmis verskaf.
Die universiteite waar jong boere opgelei word.

Ja,  so kan ons aangaan,  die voedselketting is lank en BAIE meer mense werk aan jou bord kos as net jyself. Sê so bietjie vir die Here dankie vir al hierdie mense,  en sommer vir jou (dalk goor?),  baas ook.

Lekker smul! ~ Willem Botha, 24/08/2015

The truth, the whole truth, and nothing but the Facebook truth...

Facebook is amazing! Dit laat mense die snaaksste dinge sien en glo! Ek verstom my oor die nonsens wat mense so goedsmoeds vir soetkoek opeet, glo en met almal deel, sonder om vir 'n oomblik te dink of dit waar is en sonder om die "feite" te toets. Die share knoppie wys soms so ietsie van ons goedgelowigheid. 
Maar tog ook verstommend hoe mense sukkel om die Woord van God te glo. Die Bybel het tot vandag toe elke enkele aanslag deurstaan, en tussen al die duisende elemente en feite kon nog geen enkele iets verkeerd bewys word nie. 
Ek het lank gewonder hoekom dit so is, totdat ek besef het dat dit iets persoonlik vra om die Bybel se inhoud te glo. Dit vra dat ons 'n keuse maak, om iets agter te laat en iets nuuts aan te pak. Dit vra vir 'n verhouding, dit vra dat ons elke dag moet verander. Ons moet egter net vasstaan in ons geloof. 
2 Tim 3:14
"Maar jy, bly by wat jy geleer het en wat jy vas glo. " ~ Willem Botha, 20/08/2015

Ek is ook partykeer soos die Fariseërs wat dink dat daar sekere mense is wat nie die Here se genade werd is nie. Hulle was mos verontwaardig omdat Jesus saam met tollenaars en prostitute, sondaars en slegte mense gekuier en geëet het. Hulle kyk net na die uiterlike en besef nie hoe groot die Here se genade en liefde is nie ... dalk omdat hulle self nie sy genade en liefde ken nie. Ek kyk ook dikwels na mense en dink: nee wat, jy is té sleg, té vêr weg, té vuil, jy het té veel kere die Here gevloek, té veel sonde gedoen, daar kan nie meer genade vir jóú wees nie.  En tog glo ek as Jesus nou op aarde was, is dit die plekke waar ons Hom sou sien – tussen die wat deur ons afgeskryf word, tussen die wat Sy genade baie nodig het. Jesus sê in Luk. 15 dat Hy nege en negentig skape sal los om een verlore en verdwaalde skaap te gaan soek en dat daar groot blydskap in die hemel sal wees oor die een sondaar wat bekeer het. Hoe belangrik is dit vir jóú dat verlore skape gevind word? Breek dit jou hart as jy dink dat iemand dalk sonder die Here kan sterf? Maak dit jou bang om te dink dat daar van Sy skape is wat nog buite in die koue is, sonder die Herder se liefde, sonder sy redding, verlore vir ewig? Kom ons wees weer vrygewig met genade, kom ons deel weer die boodskap van Jesus se liefde en vergifnis met nuwe ywer. ~ Wilna Botha, 07/08/2015

Fed-up! 
Was / is jy dalk ook al op tyd in jou lewe dat jy net op gesukkel is? Niks wil werk nie, jy het alles probeer maar dit bly 'n gemors. Ek is seker die meeste mense kan daarvan getuig. Vernaam as die besigheid nie wil werk nie, of jou CV al na soveel plekke toe gestuur is en niks gebeur nie. 
Na Jesus se kruisiging gaan die dissipels terug na hulle visvang lewe, en hulle was dalk erg ontnugter omdat drie goue jare van hoop en verwagting skielik tot stilstand kom. Dan lees ons in Joh 21:1- 11 dat die dissipels gaan visvang en niks gebeur nie, nie een vis beland in die nette nie. Dan verskyn Jesus aan hulle, maar hulle herken Hom nie, wanneer Hy vra : Het julle al iets gevang? Nee, antwoord hulle. Dan maak Hy hierdie vreemde voorstel : Gooi die net aan die anderkant uit, en daar vang hulle so baie visse dat die nette wil skeur. 153 groot visse!

God's not dead...
Of is Hy / hy? 
Richard Dawkins, waarskynlik DIE aarts-ateis van alle tye, het in 2008 'n veldtog geloods teen Christenskap met die volgende slagspreuk op busse in Londen :
"There's probably no god. Now stop worrying and enjoy your life"

Goeiste, het jy al sulke twyfel by SO 'n invloedryke ateïs gesien? PROBABLY??? Is jy ernstig Mnr Dawkins? Kon hy rêrig nie sê:" Relax, there is no god" nie? Hy wat boeke soos "The god delusion" en vele ander, geskryf het. Ek sien 'n interessante ding gebeur by die nuwe, hedendaags bewegings wat hulleself so openlik teen Christenskap uitspreek: Hulle spandeer ONGELOOFLIK baie tyd aan iets waaraan hulle klaarblyklik nie glo nie! Ek verstaan dit hoegenaamd nie!
Ons het 'n skitterende fliek gaan kyk met die titel "God's not dead". 'n Uitstekende fliek oor Christenskap, wat nogal deur Ster Kinekor vertoon word in gewone teaters. Dit gaan oor 'n professor in Filosofie ('n ateïs) wat 'n jong Christen student uitdaag om te bewys dat daar 'n God is, en hoe die studente self moet besluit of God dood is of nie. Regtig die moeite werd om te sien! 
Wat sê jy? Is God regtig nog lewendig, vir jou? Twyfel jy soms, soos ek vele kere al het? Maar weet jy, net EEN uitroep na Hom en Hy sal Homself weereens aan jou openbaar. 
GOD'S NOT DEAD!!! ~ Willem Botha, 28/07/2015

Vergewe my 
".. en vergeef ons oortredings, soos ons die vergewe wat teen ons oortree"
Bekende woorde uit die Onse Vader gebed. Met hierdie woorde leer Jesus Sy dissipels om vergifnis te vra, maar ook om te vergewe. Maar hoekom moet ons vergewe, of vergewe word?

Kom ek vra 'n moeilike vraag : Kan iemand wat selfmoord pleeg in die hemel kom? Ongelukkig is daar mense wat uitsprake maak wat nie waar is en geweldige pyn veroorsaak na so 'n tragedie. Die gedagte is dan dat jynie tyd gehad het om vergifnis te vra nadat die "moord" gepleeg is nie. Nou vra ek jou, is jou vergifnis - vra op datum, of het jy dalk iets vergeet? Of is daar onbewustelike sondes? 
Jy sien, mense verwar vergifnis vra met bekering. Wanneer ons tot bekering kom is ons sondes wat was, is en wat kom vergewe. Ons LEEF in Jesus se vergifnis omdat Sy bloed ons skoongewas het. Ons sondes diskwalifiseer ons nie van die hemel nie en sondeloosheid gee nie vir ons toegang daartoe nie. Net so kom ons nie van vooraf tot bekering as ons vergifnis vra nie. 
Nou, hoekom dan vergifnis vra? Kom ons sê ek het my vrou kwaad gemaak of benadeel, beteken dit dan dat ons nou skielik nie getroud is nie? Is daardie lewenslange kontrak nou tot niet? Nee, verseker nie, ek is steeds getroud! Is my kindskap van God tot niet as ek sonde doen? Nee, verseker nie! 
Maar, as ek vir my vrou vir vergifnis vra is die verhouding herstel. Ek erken dat ek verkeerd was en alles is weer reg. So ook met die Here, ek erken my fout sodat ek more weer probeer en dit begin oorwin. 
LEEF in Jesus se vergifnis! ~ Willem Botha, 21/07/2015

Kry vir jou 'n label... 
Die blondine was beswaard omdat 'n bottel sjampoe haar net een was gehou het. Want die etiket het gesê: Was, spoel af, herhaal... of was dit dalk 'n blonde man? Die blondine (ou) het gedoen wat die etiket sê, maar toe gaan hy/sy in 'n “loop”. Was, spoel af, herhaal... Was, spoel af, herhaal... Was, spoel af, herhaal...

Kyk, dit maklikste manier om iemand sleg by te kom is om 'n "label" op hom/haar te plak, Soos wat ek pas op blondines geplak het. Oeps skuus! 
Die Bybel is baie uitgesproke daaroor :
Spr 18:8 "Skinderstories word gretig verslind, mense sluk dit so maklik" 
Ek is seker jy het ook al deurgeloop, of soos ek, kwistig labels op ander geplak. Elke maatskappy het so 'n uiters effektiewe etiketmasjien, daardie een wat daar buite staan waar mense gereeld gaan bene rek of 'n dampie vang. Kyk, daar word etikette vinnig vervaardig en op mense geplak wat nie daar by die "masjien" staan nie. Ongevraagd, onverdiend, ongeregverdig en gewoonlik onwaar. 
Weet jy hoekom? Spr 26:22 “'n Geskinder is soos lekker kos...” (dink ek nou aan 'n lekker hammie en chips) 
Maar hoe voel die Here daaroor? 
Spr 6:16-17 “Die Here haat ses dinge, nee, daar is sewe dinge waaraan Hy 'n afsku het. Oë wat straal van hoogmoed, 'n tong wat lieg, hande wat met bloed bevlek is...” ens. ~ Willem Botha, 17/07/2015

Elke knie sal buig 
Hoeveel ongelowige mense dink jy is in die hel? Wel, mens se reaksie is sekerlik maar gewoonlik : Almal. Maar dis inderdaad nie korrek nie, elke enkele mens wat dit tot daar gemaak het na afsterwe is gelowig, en meer as gelowig!
Luk 16: 22 - 28
“Toe die arm man te sterwe kom, is hy deur die engele weggedra na die ereplek langs Abraham. Die ryk man het ook gesterwe en is begrawe. Toe hy in die doderyk in pyn verkeer, kyk hy op en sien vir Abraham daar in die verte en vir Lasarus langs hom en hy roep: ‘Vader Abraham, ontferm u oor my. Stuur tog vir Lasarus dat hy net die punt van sy vinger in water steek en my tong afkoel, want ek ly verskriklik in hierdie vuur.’ Maar Abraham sê: ‘My kind, onthou dat jy in jou leeftyd altyd die goeie gekry het en Lasarus die slegte. Nou gaan dit hier goed met hom, maar jy word gepynig. En buitendien is daar 'n groot kloof tussen ons en julle, sodat dié wat hiervandaan wil oorgaan na julle toe, nie kan nie, en dié wat dáár is, ook nie na ons toe kan oorkom nie.’ Toe sê hy: ‘Ek smeek u dan, vader, stuur hom tog na my pa se huis toe. Ek het nog vyf broers. Laat hy hulle dringend gaan waarsku sodat hulle nie ook in hierdie plek van pyniging beland nie.'

Dit lyk my jou knie sal buig, of jy wil of nie. Geseënd is diegene wie se knieg buig in hierdie lewe, want hulle sal gered wees. 
Fil 2 : 9 - 11
"Daarom het God Hom ook tot die hoogste eer verhef en Hom die Naam gegee wat bo elke naam is, sodat in die Naam van Jesus elkeen wat in die hemel en op die aarde en onder die aarde is, die knie sou buig, en elke tong sou erken: “Jesus Christus is Here!” tot eer van God die Vader." ~ Willem Botha, 13/07/2015

Rasputin vs Jesus 
Tussen 1869 to 1916 leef Grigory Rasputin in Rusland. Rasputin was eerder berug as beroemd, en het die vermoë gehad om almal op hol te jaag. Rasputin was nie noodwendig bekend as ‘n misdadiger nie, maar eerder iemand wat vol streke was, wie jy nooit kon vertrou nie, en hy het die eienaardigste goed aangevang. Hy het selfs 'n verhouding met die koningin gehad, en later het die mense hom vermoor. Rasputin was ‘n gure kárakter! Hy was veelbesproke, en Boney M het ‘n treffer gehad het met die liedjie “Rasputin”.

Die woord "karakter" word op twee maniere gebruik: In ou Rasputin se geval sê ons die ou is 'n gure karakter, maar iemand met 'n goeie reputasie staan bekend as 'n persoon van karakter.

Soos Jesus natuurlik , want Jesus se karakter was onbesproke, Hy het niemand benadeel nie, het vir ander geleef, en uiteindelik ook vir ander gesterf, en Hy het presies gedoen wat Hy gesê het. 
Hy het gesê Hy gaan gekruisig word, en dit het gebeur, Hy het gesê Hy gaan opstaan uit die dood en Hy het, hy het gesê dat Hy gaan opvaar na die Hemel om vir ons plek te berei en Hy het. Hy sê ook dat Hy ons sondes vergewe en dat ons gered is as ons Hom aanneem en ek glo Hom. Hy het ook gesê Hy gaan weer kom en ek glo Hy gaan, want dit is Sy karakter. ~ Willem Botha, 09/07/2015

LOL! 
... wat natuurlik die afkorting is vir "Laughing Out Loud". Facebook taal. Iemand stuur vir my onlangs iets wat sê dat ons as Christene nie dit mag gebruik nie want dit beteken "Lucifer Our Lord". Elke keer wat ons dus LOL tik sê ons dat Satan ons god is. 
Wel, ek glo regtig dat daar goeie bedoeling agter dit is en dat ons die Here eerste in ons lewe moet stel, en nie die duiwel eer moet gee nie. Maar kry ons nie juis die teendeel reg nie? Hierdie afkorting bestaan nog nie 100 jaar nie en is nie deur Satan of sataniste uitgedink nie. Dit lyk of dit wat eintlik onskuldig is, gekaap word en dan teen ons gebruik word, en ek wonder wie doen dit. Die bose, of dalk sommer onsself? 
Weet jy, ek dink ons vervlak so maklik ons Geestelike lewens tot die dikte van 'n stukkie papier, waarop ons slagspreuke skryf en onsself toelaat om weer te verval in wettiese en godsdienstige reëls. Dan glo ons ons reinig daarmee ons lewens. Het Jesus nie aan die kruis gesterf met bitter duur bloed, juis om ons vry te maak van hierdie godsdienste goetertjies nie? Satan is verslaan my vriend, ons moet op geen manier vir hom enige eer gee nie!

Waarheid 
Kom jy agter hoe moeilik dit is om by die waarheid, die volle waarheid en niks anders as die waarheid nie, te bly? Dit voel vir my so asof dit makliker was in die "goeie ou dae". Of liewer, lieg raak so die norm, dat mens net mooi niemand se integriteit meer kan vertrou nie, selfs dalk nie eers jou eie nie. Professionele mense word selfs opgelei om die waarheid so te verdraai dat dit so reg klink, dat mens dag vir dag mislei word met leuens (of dalk net halwe waarhede) sonder dat die ander persoon 'n oog knip. En boeta, dit raak wild as jou geld gevat word in die proses. 
Die vraag is net, is ek self nie ook al daar nie? Ek weet egter een ding, die Here haat dit! 
Spr 6 : 12 - 13 "Dit is 'n nikswerd mens, 'n mens vol onreg, wat altyd reg is om te lieg, om te bedrieg deur met die oog te knik, met die voet te beduie, met die vingers tekens te gee."

Is ons dan alleen reg? 
Jy het sekerlik ook al baie die vraag gehoor(en gewonder) of ons Christelike geloof dan die enigste geloof is wat kan lei tot Saligheid, en dus vir ons die Ewige lewe kan bring. Wel, indien nie, kan ek nie verder op die Bybel as die Woord van God staatmaak nie, want die Bybel is baie duidelik daaroor dat Jesus die enigste weg tot Saligheid is.

Joh10 : 7 - 9 Toe het Jesus verder gesê: "Dít verseker Ek julle: Ek is die ingang vir die skape. Almal wat voor My gekom het, is diewe en rowers; maar die skape het nie na hulle geluister nie. Ek is die ingang; as iemand deur My ingaan, sal hy gered word. Hy sal in en uit gaan en weiding kry." 
Een God, met 'n Seun met die naam van Jesus Christus. Geloof in Hom deur Hom as saligmaker aan te neem, en niks anders nie. Volgens die Bybel is dit al wat "reg" is. Geen ander "geloof" aanvaar hierdie voorwaardes nie. Slegs diegene wat dit aanvaar pas in die voorskrifte van die Bybel. ~ Willem Botha, 08/06/2015

Die volmaakte moord 
Ek dink by verre die meeste mense wat al moord gepleeg het, het geglo hulle kon daarmee wegkom en baie het al planne beraam om die volmaakte moord te pleeg. Wel, die maklikste manier om hierdie volmaakte moord te pleeg is met woorde. Kwetsende woorde, slegsê, om mense te verneder en dan sommer net ons geliefde stokperdjie: Skinder.

Dis so maklik om mense se lewens te verwoes met woorde, jy verdraai hulle woorde sommer net bietjie, of jy vertel leuens wat hulle skade aandoen. Elke mens op aarde wat emosionele letsels het, het dit opgedoen deur woorde. En weet jy wat is die ergste? Jy kom weg met moord!

Spr 16 : 28 "Iemand wat die waarheid verdraai, veroorsaak twis, iemand wat skinder, bring verwydering tussen vriende."
Spr 20 : 19 "Iemand wat loop en skinder, lap geheime uit; bly weg van iemand wat baie praat."
Lev 19 : 16 "Jy mag nie loop en skinder nie, jy mag nie jou medemens se lewe in gevaar stel nie. Ek is die Here"

Ek glo Here haat dit! Nee, moenie dit doen nie. 
Doen liewer die volgende :
Spreuke 16 : 24 "Aangename woorde is heuning, soet en geneeskragtig vir die mens." ~ Willem Botha, 02/06/2015

Achilles Heel 
In die Griekse mitologie is daar ‘n verhaal van ‘n karakter genaamd Achillis. Achillis was ‘n Griekse held in die Trojaanse oorlog, en die ou was letterlik onaantasbaar – niemand kon niks aan hom doen nie. Daar was egter een plek op sy liggaam wat nie beskerm was nie, en dit was in sy hakskeen. Volgens die mite was die rede hiervoor dat sy ma hom as baba in die Styx rivier gedruk het. Sy het dit gedoen sodat hy onsterflik sou wees. Maar waar sy ma hom aan die hakskeen vagehou het met haar twee vingers, was daardie twee kolle op sy hakskeen nie beskerm nie, en dit het die swak plek in sy liggaam gebly. En toe kom iemand en skiet hom met ‘n giftige pyl, presies deur daardie twee plekke op sy skeenvel, en hy sterf…So gaan die mite.

Ek dink ons het elkeen so 'n swakheid wat ons so bietjie kwesbaar maak. Dalk 'n siekte, of iets uit jou verlede, dalk huweliksprobleme of probleme met ons kinders, selfbeeld probleme of slegte werkomstandighede. Dis normaal, die vraag is: hoe gaan jy daarmee om in jou lewe?

Paulus het ook 'n Achilles Heel gehad. 
2 Kor 12:7b - 9
"Daarom, sodat ek nie hoogmoedig sou wees nie, is daar vir my 'n doring in die vlees gegee, 'n boodskapper van Satan om my met vuiste te slaan. Drie maal het ek die Here gebid dat dit van my af weggeneem moet word. Sy antwoord was: "My genade is vir jou genoeg. My krag kom juis tot volle werking wanneer jy swak is."

Paulus sê hy het net 3 maal gebid, en toe die Here se wil aanvaar. Soms moet ons maar met iets saamleef en God se genade aanvaar, al is dit hoe moeilik. Mag die Here jou Achilles Heel draaglik maak. ~ Willem Botha, 28/05/2015

Vertrou jy nog? 
Maak mense jou nie ook moedeloos nie? Oeps ja ek is ook 'n mens en ek maak verseker ook ander mense moedeloos. Man, en as jy nou moedeloos in sy ergste vorm wil sien, vat jy aan 'n man se sak. Weet jy hoe om 'n ander ou se sak leeg te tap? Jy skep by hom vrees, of jy werk aan sy gierigheid, of jy speel hom en sy besittings af teen ander mense, of jy wys vir hom mooi dinge wat sy ego streel. En as jy weer kyk staan jou beursie lekker boepens. 
Nou vra ek jou: Wie kan jy nog vertrou? Amper bring ek nou nog politici ook hier in! Daar is so baie wanvoorstelling, leuens, gebrek aan inligting, uitbuiting, selfverryking en sommer openlike oneerlikheid. G'n wonder niemand vertrou niemand meer nie, lyk my dis normaal.

'n Een sin preek
Lank gelede het ons 'n dominee gehad wat vreeslik kort gepreek het. Ons het op 'n tyd ook 'n dominee gehad wat vreeslik in metafore gepreek het en ons kon niks verstaan nie. Sommige predikers preek vreeslik lank en ander preek vreeslik diep en met gevoel. 
So gee God vir Jona 'n opdrag om Nineve toe te gaan, maar sy pad loop eers ander draaie. Eventueel beland hy in Nineve en preek net een sin, woorde wat die Here vir hom gee. 
Jona3:4
Jona het die stad ingegaan en 'n dag lank daar rondgestap en toe roep hy: “Nog net veertig dae en Nineve word verwoes"

Net dit, en daar was resultate. Soms voel ons ook om vir iemand iets te sê of 'n boodskap oor te dra en soms is een sin genoeg. Wees ingestel op die Here, Hy gee dalk net die regte woorde, of 'n teksgedeelte, wat op daardie oomblik nommerpas is. Iets soos:
Daar is hoop in Jesus, glo dit.
Jou swaarkry gaan nie vir ewig aanhou nie
Die Here se genade is vir jou genoeg
Die Here sal selfs DAARDIE sonde vergewe
Die Here vergeet nooit Sy beloftes nie
Jesus sal jou aanneem, of jy dit glo of nie, as jy hom vra.

Dalk maak dit nie vir jou sin om hierdie een sin te "preek" nie, maar dalk is dit al wat nodig is. ~ Willem Botha, 13/05/2015

1 Kor 16:22(a) : "As iemand die Here nie liefhet nie – vervloek is hy..." 
Sjoe! Toe ek hierdie woorde nou die dag raaklees was ek geskok! Wat op aarde beteken dit? Wat beteken dit as God jou vervloek? Ek dink God is baie ernstig met hierdie teks en dis sekerlik vir Christene en nie-Christene ewe waar, en ek dink ons almal sukkel maar daarmee.

Wat beteken dit om waarlik lief te wees vir die Here? Seker om Sy wil te doen, Sy Woord te verkondig, in 'n verhouding met hom te staan en om met Hom besig te wees.

As jy iets (of iemand) vervloek beteken dit om jou te distansieer, uit jou mond te spuug, te verwerp en te laat staan. Dis verskriklike harde woorde as jy vir iemand sê "ek vervloek jou". Mens sal dit tog nie vir jou vriend of broer sê nie, of hoe? 
Maar tog sê die Here dit in hierdie teks. Dit laat my net weereens besef hoe ernstig die Here is oor 'n verhouding met Hom. Ek wil verseker nie hê die Here moet my vervloek nie. Ek wil my daarop toespits om Hom elke dag meer en meer lief te hê. ~ Willem Botha, 14/04/2015

Matt 27:38 "Saam met Hom het hulle ook twee rowers gekruisig, een regs en die ander een links van Hom."
Drie kruise.  'n Redder in die middel en twee rowers aan weerskante. Twee deur die regstelsel skuldig bevind,  maar Jesus na Sy dood gestuur omdat Pontius Pilatus bang was vir die mense. Een van die rowers spot Hom en vra smalend dat Jesus hulle van die kruis (en die dood) moet red,  die ander een berispe hom en vra iets heeltemal anders.
Luk 23 : 42 Verder sê hy: “Jesus, dink aan my wanneer U in u koninkryk kom.”
Hy het die ware Redding begeer en Jesus gee dit vir hom onmiddellik en onvoorwaardelik.
Is ons nie soms ook maar soos die een wat aan Jesus wil vasklou vir die voordele van die hier en nou nie? Jesus wil hê dat elke mens saam met Hom in die Koninkryk sal wees. Dis net een uitroep weg, en dieselfde belofte sal vir elkeen waar wees wat daarna vra.

 “Ek verseker jou: Vandag sal jy saam met My in die paradys wees.” ~ Willem Botha, 02/04/2015

Maartmaand is Kosmos tyd. Asof uit die niet verskyn pragtige lappe kosmos en ander veldblomme en hulle groei net. Nie hulle, of die mens het iets gedoen dat dit gebeur nie, dis net daar.

Dit laat my dink aan Jesus wat veldlelies gebruik om ons te leer om Hom onvoorwaardelik te vertrou en op te hou om ons te bekommer.

Matt 6:28-31
"En wat bekommer julle julle oor klere? Let op hoe groei die veldlelies: hulle swoeg nie en hulle maak nie klere nie. Maar Ek sê vir julle: Selfs Salomo in al sy prag was nie geklee soos een van hulle nie. As God dan die gras van die veld, wat vandag nog daar is en môre verbrand word, so versier, hoeveel te meer sal Hy dan nie vir julle sorg nie, julle kleingelowiges?“Julle moet julle dus nie bekommer en vra:‘Wat moet ons eet of wat moet ons drink of wat moet ons aantrek?’ nie."

Ek glo een van die moeilikste tekste in die Bybel is: "Moet jou nie bekommer nie..." Dis SO deel van ons menswees, dis bykans onmoontlik om dit nie te doen nie, maar steeds gee die Here vir ons die opdrag.

Kyk bietjie terug in tyd, het die kosmos blommetjies jaar na jaar teruggekom? Jip, verseker. Kyk ook terug in jou lewe, het die Here elke keer weer betyds gehelp? Waarskynlik. Nou hoekom bekommer ek my dan steeds? Ek weet nie, maar ek wil probeer om dit nie te doen nie. ~ Willem Botha, 31/03/2015

Wag op die Here. 
Weet jy hoe lank is 'n nanosekonde? Dis die tyd wat verloop vandat die robot vir jou groen slaan en die ou agter jou toet. 
Ons het nie tyd nie en niks kan vinnig genoeg gebeur nie. Ons is bereid om die slegste hamburger denkbaar te eet solank ek nie uit my motor hoef te klim nie. Vinnige internet, kitskos, kits poeding, kits kits kits. En kits reaksie van die Here. Kits gebede word "opgestuur", reguit in die plafon vas en dan twyfel ons of die Here ons hoor. 
Die Here se tyd is egter nie ons tyd nie. Abraham moes baie lank wag op die Here se beloftes en eers toe hy moedeloos gewag was het die Here Sy beloftes nagekom. Die Israeliete het 40 jaar deur die woestyn geswerf voordat hulle by die beloofde land aangekom het. Ou Job moes Job se geduld hê...
Maar die wag was die moeite werd vir almal wat gewag het. 
Gen 21:1-2 "Die Here het aan Sara gedink soos Hy beloof het. Hy het sy belofte aan haar nagekom. Sy het swanger geword en in Abraham se ouderdom vir hom 'n seun in die wêreld gebring. Dit het gebeur op die tyd wat God vir Abraham beloof het."

Ek glo dat die Here altyd ons gebede aanhoor, maar Sy antwoorde is soms anders as wat ons wil hoor. Soms sê Hy "ja", soms sê Hy "nee", en soms sê hy "wag". Wag is die moeilikste een want ons wil aan beweeg, en dan is ons sommer bereid om daai slegte "hamburger" te verorber.
Kan jy nog 'n nanosekonde wag? Of 'n dag, of week, of maand of jaar? Wat van nog 10 jaar? Sjoe dit klink ondenkbaar, of hoe? Goeie dinge vat tyd, maar dis dalk die moeite werd. ~Willem Botha, 24/03/2015

Word jou brood ook soms bonatuurlik vermeerder? 
Joh 6:9-11
“Hier is 'n seuntjie met vyf garsbrode en twee vissies; maar wat is dit vir so baie mense? Toe sê Jesus: “Laat die mense gaan sit.” Daar was baie gras op daardie plek en die mense het gaan sit. Die mans alleen was omtrent vyf duisend. Daarna het Jesus die brood geneem, God daarvoor gedank en dit uitgedeel aan die mense wat daar gesit het, en net so ook soveel van die vis as wat hulle wou hê."

Ons ken hierdie deel baie goed waar Jesus die brood vermeerder en mens wonder dalk soms of dit regtig gebeur het. Dink jy dis 'n wonderwerk wat beperk was tot daardie tyd of gebeur dit dalk vandag nog? Wel, ek gaan jou wys hoe dit al in jou eie lewe gebeur het. Was jy ook al met tye onder geweldige finansiële druk en jy het nie geweet waar die geld vandaan gaan kom nie? Ons almal het verseker al. Maar dink bietjie oor hierdie stelling : 'n Brood kos ongeveer R12. Maar het jy nie ook al gevoel dat R12 soms net 'n halwe brood koop en jou geld van jou weghol nie? Maar soms, op bonatuurlik wyse, is daar maar net elke keer tog genoeg en voel dit of R12 drie of vier brode koop. Daardie tye waar die somme net nie uitwerk nie, maar daar is maar net weer en weer genoeg. Wel, ek glo dis die tye wat die Here die brood vir jou vermeerder en dis dan net so bonatuurlik as toe Jesus destyds daardie wonderwerk gedoen het. Vertrou maar net op Hom, Hy gaan vir jou sorg. ~ Willem Botha, 10/03/2015

Spyt kom altyd te laat. 
Het jy ook al gewonder of Judas 'n slagoffer was? So asof die noodlot hom 'n streep getrek het. Die arme ou wat die een moes wees om Jesus te verraai en toe wreedaardig moes sterf. Hy was immers 'n dissipel en hy het vir drie jaar saam met Jesus geleef, en toe vaar die bose in hom in en hy veraai vir Jesus, en toe pleeg hy selfmoord. 
LUKAS 22:3 "Die Satan het in Judas, wat Iskariot genoem is en een van die twaalf was, ingevaar ." 

Ons lees egter ook van Petrus wat vir Jesus verloën het. En dit nogal nadat Jesus hom gewaarsku het daaroor. 
MATTEUS 26:75
En op daardie oomblik het daar 'n haan gekraai. Toe val dit Petrus by wat Jesus gesê het: “Voordat die haan kraai, sal jy My drie maal verloën.” En hy het buitentoe gegaan en bitterlik gehuil.
Twee dissipels wat beide hulle rug op Jesus gedraai het. 
En toe gaan pleeg Judas selfmoord en Petrus word die rots waarop Jesus die kerk sou bou. Wat op aarde was die verskil? 

Judas het SPYT gekry en Petrus het BEROU gehad, en dis dit! 

Judas se storie : MATTEUS 27:3
Toe Judas, die verraaier, sien dat Jesus tot die dood veroordeel is, het hy spyt gekry.

Petrus se storie : JOHANNES 21:15
Toe hulle klaar geëet het, vra Jesus vir Simon Petrus: “Simon seun van Johannes, het jy My baie lief, meer as hulle hier?” “Ja, Here,” antwoord hy Hom, “U weet dat ek U liefhet.”

Ps 37 : 1 - 3
1 Moet jou nie ontstel oor skelms en jou kwel oor skurke nie,
2 want soos gras vergaan hulle gou en soos groenigheid verdwyn hulle sommer.
3 Vertrou liewer op die Here en doen wat goed is, woon en werk rustig voort.

Op my verjaardag verlede week, het ek daaraan gedink dat indien ek die “mooi ouderdom” van 75 gaan haal, dit beteken dat ek nog net sowat 1000 weke oor het om te lewe... nét 1000 Maandae, nét 1000 naweke! Dit het my laat dink aan die storie wat ek eenmaal gelees het van die man wat ook 1000 weke oorgehad het en toe 1000 albasters in ’n groot bottel gegooi het. Hy het elke Saterdagoggend een albaster uitgehaal en dit weggegooi. Toe hy sien hoe die bottel al hoe leër word, het hy besef hoe vinnig tyd verbygaan en hoe kosbaar die beskikbare Saterdae is. Dit het hom gemotiveer om prioriteite in plek te kry en seker te maak dat hy die tyd uitkoop. Ek het dié week vir my ook ’n klomp albasters gaan koop en in ’n bottel gegooi! Ek wil hê dié bottel op my rak moet my herinner om te fokus op dinge wat regtig belangrik is: geloof, hoop en liefde; geduld, dankbaarheid, goedhartigheid en vergifnis; ek wil hê dié bottel op my rak moet my herinner om te droom en nuwe dinge te ontdek, om te sing, te lag, te speel, om geluk te vind in eenvoudige dinge en tevrede te wees met wat ek het; ek wil hê dié bottel op my rak moet my herinner om my geliefdes te koester, te troetel en te waardeer. Ek wil hê dié bottel op my rak moet my herinner dat 1000 albasters vrek min is en dat ek elke dag ten volle moet benut. “Die mens, sy lewensduur is soos dié van gras, soos dié van 'n veldblom wat oopgaan: as die woestynwind daaroor waai, is dit weg en sy plek vir altyd leeg.” (Ps. 103:15-16) ~Wilna Botha, 14/01/2015

“Life can only be understood backwards; but it must be lived forwards” – so lui ’n aanhaling wat ek nou die dag gelees het. Dis waar dat ’n mens baie meer perspektief en verstaan het van dinge wat gebeur het as dit eers verby is en mens kan rustig terugkyk daarop. Baie keer kan mens eers met die terugkyk slag sê: dit was moeilik, maar dit was goed en nodig. Soms is dit ook nodig om terug te kyk sodat jy kan sien hoe jy gevorder en gegroei het. Ek kyk ook bietjie terug in die verlede om te sien hoedat die Here voorsien, gesorg en my gedra het en met die sekuriteit wat dít my gee, het ek moed en vrymoedigheid om my uit te strek na wat voor my lê. Ek kyk met verwagting en vrede in my hart vooruit na vandag en die res van die jaar sonder om  terug te verlang en vas te klou aan gister en die ander “goeie ou dae”. Leer uit gister en lééf voluit vorentoe. ~ Wilna Botha, 09/01/2015

Josef se lewensstorie  is ’n voorbeeld van iemand wat in die put begin het en in die paleis geëindig het. Dit was egter nie net een sprong van put na paleis nie; die pad het gepaard gegaan met ’n reeks “goeie nuus” – en  “slegte nuus” – tye. Wat ek egter by Josef leer is om in put-tye positief te bly, te besluit teen bitterheid, om die Here te bly vertrou, om nie jouself te bejammer nie, om nie ander te verwyt vir die situasie waarin jy is nie (al is dit hulle skuld dat jy in die put beland het), om met selfvertroue te sê: ek kán  hier uitkom, om te wéét dat daar ’n hoër, Goddelik doel is met jou put-ervaring. Dit maak nooit saak of jy in die put begin nie, dit maak saak waar jy gaan eindig . “Die Here was by Josef en dit het baie goed gegaan met hom” (Gen. 39:2) ~ Wilna Botha, 22/10/2014

“Elke mens het ’n storie” is ’n uitdrukking wat mens deesdae nogal baie hoor, iemand sing dit ook in ’n bekende liedjie! Ons hét almal ’n storie wat êrens begin het, ’n storie wat verander soos wat die draaie van my lewe loop en soos wat ander mense probeer saamskryf aan die storie. Ek weet egter dat die Here die outeur is van my lewensstorie , Hy bepaal die intriges en dramas, die vreugdes en hoogtepunte, Hy  verweef die drade na ’n eenheid wat oploop na ’n “happy ending”, ’n volmaakte einde wat vir my voorlê. Intussen speel ek met oorgawe saam in vandag se episode van dié  vervolgverhaal!

Hierdie naweek hou ons ons 13e kamp vir gestremdes met die tema “Elke mens het ’n storie.” Ons gaan luister na mekaar se stories, leer uit mekaar se verhale en mekaar aanmoedig vir elke dag se episode! Daarmee saam gaan ons ’n groot porsie pret en speletjies hê, uitbundig lag en heerlik eet. Ons gaan beslis versterk word om ons lewensstorie weer met nuwe moed en groter hoop aan te pak. ~ Wilna Botha, 17/10/2014

“Welgeluksalig is die man wat nie wandel in die raad van die goddelose en nie staan op die weg van die sondaars en nie sit in die kring van die spotters nie” (Ps. 1:1, Ou Afr. Vertaling). Jy is welgeluksalig, gelukkig, geseënd as jy hierdie dinge NIE doen nie. Moenie die raad volg van mense wat God nie ken en dien nie – moenie dat hulle jou hart en gedagtes beïnvloed nie, dit sal jou op ’n sonde-pad bring – waar jy kort voor lank dalk saamsit, saamdoen en saampraat, en uiteindelik sal jy ook, net soos hulle, met God spot en Hom verloën. Moenie loop waar hulle loop nie, moenie staan waar hulle staan nie, moenie in hulle kring sit nie. Kies saam met wie jy wil wees, wees versigtig aan wie se invloed jy jou blootstel, dink mooi oor die gesprekke waaraan jy deelneem. “Want die Here waak oor die pad van die gelowiges; maar die paaie van die goddeloses lei tot ondergang.” (Ps. 1:6)

Voel jy miskien vuil en weggegooi? Is jy stukkend en misbruik? Voel jy nutteloos en verwerp? Is jy vasgevang in die donker maalkolke van die lewe? Die belofte van God vir Sy kinders is dat Hy ons van die ashoop kan optel, ons uit die stof kan laat opstaan, dat Hy ons weer nuut en mooi kan maak, dat Hy ons wonde kan verbind en ons trane kan afdroog.  “Maar vir dié van julle wat My liefhet en aan My gehoorsaam is, sal My verlossing soos die son wees. Wanneer dit opkom, jaag dit die donker weg en gee lig. Daar waar die son se strale op ’n seerplek skyn, word dit vinnig gesond. So sal Ek nuwe lewe oor julle laat kom.” (Mal 4:2, Die Boodskap) Mag God se son van redding vandag oor jou skyn.

Die verhaal van die genesing van die siek, gestremde man by die bad van Betesda (Joh. 5:1-17) het sommer vir my nuwe betekenis gekry toe ek lees dat Betesda “huis van genade” beteken. Die man van wie hier vertel word, was al vir 38 jaar siek. Niemand het hom voorheen gehelp nie en hy het seker ook nie veel hoop gehad dat enige iemand hom sou kon help nie. Tog het hy bly wag by die “huis van genade”. En toe kom Jesus genade betoon by Betesda. Hy wéét wat is die man se behoeftes, Hy sien hom raak tussen al die baie ander mense, Hy bied sy genade en Sy genesing vrywillig en verniet aan. Het jy vandag die Here se aanraking nodig?  Het jy genesing nodig? Het jy hulp nodig? Het jy vergifnis nodig? Jesus voel jammer vir jou, Hy weet van jou behoefte, Hy wil en sal genade aan jou betoon en jou aanraak met Sy hand van liefde. Ek bid dat jy dít sal ervaar.    

Ek sien vandag ’n groot bord langs die pad met ’n sjokolade advertensie. Dit sê: free the joy. Hulle reken seker dat as jy daai omhulsel van die sjokolade oopskeur gaan daar vreugde uitkom, as jy dit proe gaan dit sorg vir ’n glimlag. Ai, ek is só lief vir sjokolade en so ou blokkie sál  joy bring. Dit het my laat dink dat ons as Christene binne-in ons verpakking ook mos sulke blydskap en vreugde het, vreugde wat vrygelaat kan (en moet) word. Ons kan gerus meer glimlag, meer oorborrel van vreugde, meer uitbundig lag, meer pret veroorsaak waar ons kom. Ons hét vreugde binne-in ons wat die Here vir ons gee. “Die vrug van die  Gees, daarteenoor, is ... vreugde” (Gal 5:22) Ek het bietjie ge-google en sien toe dat die einste sjokolade mense ook “unwrap joy” en “share the joy” al as slagspreuke gebruik het. Nou ja, dis vandag my boodskap aan myself: unwrap, free en share dié joy wat van die Here af kom.

Toe ek 1 Kor. 6:12-20 lees, het ek maar net weer besef dat Christenskap nie dieselfde is as godsdienstigheid nie. Vir my gaan Christenskap nie oor speletjies, goetertjies en praatjies nie, nie oor wonderwerke en groot dinge wat gebeur nie, dit gaan nie oor wette en nimmereindigende reëls nie. Christenskap gaan oor ’n verhouding met Jesus, ’n eenvoudige, opregte liefdesverhouding met Hom. Dit gaan oor ’n totale oorgawe aan Hom. My verhouding met Jesus het begin toe Hy my gekoop en met Sy lewe betaal het en my silwerskoon gewas het. Die verhouding bestaan daarin dat ek nou aan Hom behoort en my liggaam as blyplek vir die Heilige Gees beskikbaar stel en dat ek Hóm al die reg in my lewe gee. Die verhouding groei en verdiep deurdat ek die Woord bestudeer, deurdat ek gehoorsaam is, deurdat ek tyd met die Here en saam met ander gelowiges spandeer. “Ons verhouding is nie soos die een tussen ’n werker en sy baas nie. Die werker ken mos normaalweg nie die baas persoonlik so goed dat hy alles weet wat die baas dink of beplan nie. Nee, ons verhouding is baie anders. Ons is soos vriende onder mekaar.” (Joh. 15:15, Die Boodskap)

“Ek is veral ook daarvan oortuig dat God, wat die goeie werk in julle begin het, dit end-uit sal voer en dit sal voleindig op die dag wanneer Christus Jesus kom.” (Fil. 1:6) Die Here weet waarvoor Hy elkeen van ons gemaak het en wat Hy vir ons beplan het. Hy ken die potensiaal wat daar in ons is, daarom is Hy elke dag besig om ons te vorm soos ’n pottebakker klei vorm om die beste en mooiste in ons na vore te bring. Daarom is Hy elke dag weer bereid om ons sonde te vergewe en Sy genade oor ons uit te giet. Daarom gee Hy elke dag weer vir ons Sy Gees om ons te lei en te leer en te help. God kyk nie na jou net soos jy nou is nie, maar sien jou soos wat jy kan word. Hy het die goeie werk in ons begin en sal dit klaarmaak. Ek sien vandag uit daarna om meer te word soos God my wil hê.

Voel jy dalk partykeer soos daardie spreekwoordelike swart skaap? Niemand hou van jou nie, jy voel onbelangrik, nutteloos, mense kyk op jou neer, spot jou, verafsku jou, misbruik jou. Jy word oor die hoof gesien, verag, misken en verwerp.  Dalk word jy sleg behandel, selfs geslaan of op gespoeg. Selfs jou familie en vriende draai die rug op jou en gee nie om wat van jou word nie. Die troos wat daar vir jou is, is dat Jesus weet hoe jy voel. Volgens Jes. 53  het Hy self ook elkeen van daardie emosies beleef op Sy lydingspad en die waarheid daarvan is dat Hy ook elkeen van daardie emosies in jou plek na die kruis toe geneem het. Hy het daarvoor gely en betaal en ín Hom kan jy ’n nuwe skepsel wees, vry van dít wat ander van jou sê of van jou dink. “He took on his own shoulders the sin of the many, He took up the cause of all the black sheep.” (Jes. 53:12, Message)

By die Paasfees-kruis is daar beslis weer vir ons elkeen:
·         afwassing van elke sonde van die verlede, hede en toekoms, met totale vergifnis uit God se hand
·         sekerheid van die ewige lewe saam met God
·         aanvaarding as kind van God, deel word van Sy familie en volk
·         volkome vryheid en volmaakte oorwinning
·         vernuwing van hart, gesindheid en lewensdoel
·         genesing
·         verligting van die laste wat ons moet dra

“Dit is volbring!” (Joh. 19:30)

“... be humble toward one another, always considering others better than yourselves.” (Fil. 2:3) Dis mos nou ’n moeilike opdrag, of hoe? Hier is ’n paar idees om dit reg te kry:
·         Dink bietjie minder van en aan jouself en meer van ander
·         Vergewe vinnig en gereeld
·         Moenie gou aanstoot neem nie
·         Wees vrygewig met genade en geduld
·         Help jou medemens
·         Erken en respekteer die reg van ander om van jou te verskil
·         Moenie dat eerste wees, voor staan, die beste wees, veroorsaak dat jy op ander trap nie
·         ... put on the apron of humility, to serve one another (1 Pet. 5:5)

“Buig laag voor die Here. Sê dat jy jou hele lewe net vir Hom wil leef. God sal jou optel, daar waar jy in oorgawe voor Hom buig en jou op ’n ereplek regop, kop omhoog, langs Hom laat staan.” (Jak 4:1, Die Boodskap) Moenie uitstel nie. Aanvaar Jesus as die middelpunt van jou lewe. Moenie net jou hart vir Hom gee nie, gee alles. Laat Hom toe om die bestuurder van jou lewenskarretjie te wees; skuif oor na die passasiersitplek en vertrou Hom om jou te neem na die lewe en geleenthede wat Hý vir jou bestem het.  Gee oor en gaan saam.

“Nader tot God en Hy sal tot jou nader.” (Jak 4:8) Hierdie teks bied vir my altyd soveel troos en bemoediging. Hoe wonderlik om te weet dat ek, nes ek is, enige tyd, enige plek, in enige situasie na God toe kan draai en Hy sál daar wees. As ek uitreik na Hom, is Sy hand alreeds daar vir my. As ek na Hom roep, is  Hy alreeds gereed om my te antwoord. As ek my eie pad geloop het en na Hom toe terug wil draai, wag Hy alreeds met oop arms vir my.  As ek wil sê ek is jammer, is Hy alreeds gereed om my te vergewe. Say a quiet yes to God, and He’ll be there in no time. (The Message).

As jy dalk in ’n bodemlose depressie put is, of dalk deur ’n ernstige siekte bedreig word, of dalk wag om deur jou baas ingeroep te word om daai gevreesde afdankingsgesprek te kry, of dalk ’n skeibrief verwag, bid ek dat die sekerheid van God se hulp wat betyds sal opdaag vir jou só werklik sal wees soos vir Miga: “Maar ek sal vertrou op die Here, ek sal wag vir die God wat my red. My God sal my gebed verhoor.” (Miga 7:7)

Ons sou die afgelope naweek ons kamp vir gestremdes hou. Toe dit onophoudelik reën en die weervoorspellers boonop ’n nat prentjie skilder vir die naweek, moes ons verlede week die besluit neem om die kamp uit te stel. Natuurlik het dit gepaardgegaan met groot teleurstelling, ekstra moeite en dubbel beplanning. Ek het bietjie opstandig gewonder: hoekom moet dit juis nóú reën? Na die lees van Job 37 moes ek maar net weer besef en erken dat God in beheer is van elke wind, elke wolk, elke storm, elke weerlig en ook elke reëndruppel en dat Hy ’n doel het met alles wat in die natuur gebeur. “Hy doen groot dade en ons begryp dit nie. Hy beveel die sneeu om op die aarde te val, die reëns val, die stortreën wat getuig van sy krag ... Hy laat die wolke swaar word van vog ...Hy laat die wolke in die rondte maal... Hy laat alle mensewerk tot stilstand kom sodat alle mense Sy werk kan ken ...” (Job 37:5-7) Hy het ons planne tot stilstand laat kom en ek wéét dat Hy ’n doel daarmee het, al sien ons dit nie en al verstaan ons dit nie. Nou kan ons maar net weer in afhanklikheid en met nuwe ywer beplan en uitsien na die kamp wat met ’n paar weke uitgestel is.   

Ek lees vanoggend dié kostelike aanhaling wat iemand gebruik: The best thing one can do when it’s raining, is to let it rain.

As jy dalk vandag minderwaardig voel, jouself onbelangrik ag, of dink jy is swak, dom, lelik, onbekwaam, eenvoudig of watter negatiewe beskrywing ook al, onthou asb. wat die Here van jou sê in Ps. 8:6. Hy behandel jou soos ’n koning en sit ’n kroon op jou kop. Die kroon is “aansien en eer” (glory and honour). Jy is kosbaar vir God, in Sy koninkryk het jy ’n hoë rang, en word jy belangrik geag. Moenie in jou alledaagse leef wêreld aan jou eiewaarde twyfel nie, die kroon van aansien en eer het hier ook sy volle waarde. Hou jou kop hoog vandag en dra jou kroon met trots.

“Hulle weet nie wat die regte godsdiens is nie, want hulle ken nie die Een om wie alle godsdiens draai nie.” (Kol 2:19, Die Boodskap) Die Een om wie die ware godsdiens draai is Jesus Christus. Sonder Hom is godsdiens dooie rituele, ’n stel reëls en gebruike, vals lippetaal, iets wat jou dalk goed en belangrik kan laat lyk maar wat vir die Here niks beteken nie. Ware godsdiens volg uit ’n verhouding met Jesus waar ek lief is vir Hom, waar ek myself is en Hy my hart ken. Dit is ’n verhouding waar ek my bes doen, waar ek my foute en tekortkominge erken en bely en Hy my onvoorwaardelik vergewe en aanvaar. Hou op met lippetaal en soek weer na daardie intieme, persoonlike konneksie met Jesus.

“Die Here sorg vir almal wat seerkry. Hy tel elkeen op wat swaarkry. Almal vestig hulle hoop op U. U versorg elkeen op die regte tyd.” (Ps. 145:14-15, Die Boodskap) Glo hierdie waarheid en skryf dit op jou hart. Ons dien ’n God van liefde wat medelye en innige meelewing het met ons. “U weet deur hoeveel pyn en hartseer ek al is. My trane sal ’n dam volmaak. U het daarvan boek gehou, U weet.” (Ps. 56:9)

“Ons moet ... aanhou om te kyk na Jesus.” (Heb 12:2, Bybel vir almal) Om te volhard in geloof, om moed te behou ten spyte van omstandighede, om hoopvol te bly wanneer alles eintlik hooploos lyk, om deur te druk met die wedloop van die lewe, móét al ons aandag en afhanklikheid net op Jesus gefokus wees. Konsentreer altyd net op Hom, fokus op wie Hy is, verheug jou in wat Hy vir jou doen. Kyk na Jesus en die silwer rand om die donker wolk sal verskyn. Kyk na Jesus en jou krag sal meer word. Kyk na Jesus en jou las sal ligter word. Kyk na Jesus en jou swakheid sal met selfvertroue vervang word. Kyk na Jesus en vind jou vreugde in Hom. Kyk na Jesus en kry moed vir die dag.

“Nou moet julle julle sondes laat staan. Kom terug na God toe.” (Hand. 3:19, Die Boodskap) “Bekeer julle en kom tot inkeer,” sê die ander vertaling. Ons moet maar altyd weer ons harte, gedagtes en lewens ondersoek en keuses maak téén sondes, verkeerde gewoontes, korrupte gedagtes, ens. Ons moet die sonde in ons lewe haat, intense berou hê oor die verkeerde dinge en spyt wees oor versuim om die regte te doen. Dit moet nie net ’n voorneme bly, of ’n oppervlakkige “jammer, Here” wees nie. Dit vra as’t ware ’n 180° wegdraai, ’n totale omdraai. Dit behels ’n  verandering van hart, gedagtes en wil. Ek het êrens gelees: “No man can get right with God unless he is converted, no man is truly converted if he has not repented, and no man has truly repented unless he is willing to part with sin.”

“Maar ek is bang dat julle gedagtes weggelei sal word van die onverdeelde en suiwere toewyding aan Christus.” (2 Kor. 11:3) Hier is ’n waarskuwing dat ons nie verlei en weggerokkel moet word van die Here nie, dat ons nie in ons toewyding moet verslap nie. Dit lyk my ons gedagtes is die “probleemarea”. Dis waar die bederf en verleiding kan intree. Dis waar ons moet waghou. Ons moet kies waarmee ons gedagtes gevul word. Ons moenie toelaat dat die sorge van die lewe, die gejaag na wind, die soeke na plesier, die begeerte na meer en groter ons gedagtes besoedel en wegtrek van die Here af nie. “Rig julle gedagtes op die dinge wat daarbo is ...” (Kol 3:2). Onverdeelde, suiwer, toegewyde gedagtes.

“Soos ’n wildsbok smag na waterstrome, so smag ek na U, o God. Ek dors na God, na die lewende God.” (Ps. 42:2-3) As mens honger is na iets, as jy iets baie graag wil hê, as jy ’n “craving” het na iets, dan oorheers dit jou gedagtes en maak jy allerlei planne om daai begeerte te bevredig. Op dieselfde manier behoort ons ’n hunkering en smagting na die Here te hê. Soos wat ’n dorstige persoon in die woestyn net begaan is daaroor om water in die hande te kry, behoort ons alles in die stryd te werp om die Here “in die hande te kry”, om meer van Hom te weet, om ’n dieper belewenis van Sy teenwoordigheid te hê. Wees honger daarvoor om Hóm die eerste en belangrikste plek in jou gedagtes, begeertes, planne en keuses te maak.

E-kerk se Kernkrag vandag:

My ma het graag gesê: “Dis nie aldag Kersfees nie.” Sy was reg. Nou lê daar weer ’n volle 365 dae voor onderweg na die volgende een. Inderdaad, maar ons het nie regtig 25 Desember nodig om die boodskap van Kersfees te vier nie. Jesus is die ware inhoud van hierdie dag... en van elke ander dag wat God ons hier op aarde gun. Ons is nie van amptelike godsdienstige feesdae afhanklik om God se reddingsdade in herinnering te bring nie. Anders gestel, Kersfees gebeur ook op 26 Desember, en op elke ander dag. Jesus is die Kind uit die hemel wat die Here is van elke fees wat ons aanlê. Ook is Hy aanwesig by elke doodgewone dag in ons lewe. Ons mag Jesus nie wegpak saam met al die Kersversierings en Kersmusiek tot en met volgende feesgety nie. Jesus laat Hom in elk geval nie wegpak nie. Hy laat Homself nie tem of makmaak tot ’n Kersfees-Jesus nie. Hy is die Here. Daarom is Hy aanwesig by elke dag wat die naam vandag dra.

“Jesus kind, lank verwag ... word uit liefde aan mense gelyk” – mooi woorde uit die ou bekende Kersfeeslied, Stille Nag. Jesus het mens geword! Hy het sy troon en sy kroon in die hemel prysgegee en Homself verneder, die gestalte van ’n slaaf aangeneem, onder ons kom woon, gelyk geword aan ons (vergelyk Fil. 2:6-8). Hy het dit gedoen, sodat Hy in óns plek die straf vir die sonde kon dra, sodat ons verlos, vrygespreek en vergewe kan wees. Sodat ons die lewe in oorvloed kan hê, nou en vir ewig. Juig die Redder is dáár!

“... na waters waar rus is” (Ps. 23:2) Ons moet seker maak dat ons dikwels na die rustige waters van die Here se teenwoordigheid gaan. Ons moet dit as ’n stil rusplek opsoek, sodat ons die Here daar kan ontmoet, sodat ons daar ál ons aandag net aan Hom kan gee. Sorg vir stilword-oomblikke deur die dag waarin jy jou gedagtes op die Here kan rig. Lees miskien ’n Bybelgedeelte of inspirerende stukkie, bid, sing ’n loflied, luister na ’n mooi aanbiddingslied of sit net in stilte. Só sal jou siel verkwik word, sal vrede oor jou daal, sal jy wysheid en krag vind vir die volgende tree van die dag. Iemand het gesê: “Silence can teach us more in a moment than all the noise in the world ever could.”

“Omdat ek in God glo, praat ek oor Hom. Ons glo in Jesus; daarom is ons ook bereid om oor Hom te praat.” (2 Kor. 4:13, Die Boodskap) Wanneer ons Jesus leer ken het, wanneer ons sy genade beleef en sy voorsiening en versorging geproe het, kan ons nie daaroor stilbly nie. Dan sal lof aan Hom oor ons lippe borrel. Dan sal ons skaamteloos van sy liefde getuig, tydig en ontydig. Dan sal ons Sy getuies wees, Sy woord verkondig, Sy storie vertel. Dan sal die Heilige Gees vir ons vrymoedigheid en die regte woorde gee. Dan is stilbly nie ’n opsie nie ...

“You can’t calm the storm ... so stop trying. What you can do is calm yourself. The storm will pass.” So lui ’n aanhaling wat ek nou die dag êrens gelees het. Om kalm te bly in moeilike tye vra dat jy die Here ten volle moet vertrou, dat jy met alles in jou sal bly glo dat Hy alles weet en in beheer is, dat jy rustig sal raak ten spyte van die golwe wat om jou slaan, dat jy jou oë op die Here sal hou en nie op die storm nie. “Jou krag lê in stilwees en vertroue hê” (Jes. 30:15)

“He foreordained us (destined us, planned in love for us) to be adopted as His own children through Jesus Christ” (Ef. 1:5) “Hy het dit besluit om geen ander rede as dat Hy dit graag vir ons wou doen nie” (so lees hierdie teks in Die Boodskap). Die Here neem ons aan as Sy kinders, Hy ontvang ons as lede van Sy familie en Sy huisgesin. Dit is Sý keuse van altyd af, Hy doen dit omdat Hy wil, Hy doen dit omdat Sy liefde vir ons oneindig groot is. Jy hoef nooit weer eensaam, alleen of verwerp te voel nie – jy het ’n ewige plek as een van God se kinders.

Uit 1 Joh. 5:18-20 lees ek hierdie drie goeie nuus feite: Jesus het gekom, ons behoort aan God, die duiwel kry nie ’n houvas op ons nie. Ek kies maar net weer vandag om my gedagtes op hierdie goeie nuus te fokus en nie afgetrek te word deur die wêreld se slegte nuus nie. Ek kies om myself te programmeer op grond van hierdie goeie nuus en nie op grond van dit waaroor die koerante skryf en die mense praat nie. Hierdie is die beste nuus – ek hoop jy vat dit ook vir jou dag, jou week en jou lewe!

Ek lees nou die dag dié aanhaling: “What you think of yourself is much more important than what others think of you.” Ek dink die meeste van ons steur ons heeltemal te veel aan ander so opinie van ons. Ek wil sommer hierdie uitdrukking oorskryf en sê: wat die Here van jou dink is belangriker as wat jy van jouself dink. Glo eerder wat Hý oor jou sê en hoe Hý oor jou voel as wat jy ander mense se mening glo of op jou eie gevoel oor jouself staatmaak. Hier is wat Hy van jou dink: “Hy is vol vreugde oor jou, Hy is stil-tevrede in sy liefde. Hy jubel en juig oor jou.” (Sef 3:17).

“He chose us (actually picked us out for Himself as His own) in Christ before the foundation of the word.” (Ef. 1:4, Amplified Bible). Ons is elkeen individueel deur God uitgekies om aan Hom te behoort. Dit was sy plan reg van die begin af. Nog voor die skepping het Hy my redding in gedagte gehad, toe al het Hy my gekies om aan Hom te behoort. Hoe wonderlik is dit nie? Dis alles eintlik net te groot vir my om te verstaan of te probeer beredeneer. Ek vat dit maar net as ’n waarheid en laat dié sekerheid in my hart en gedagtes kom lê dat ek spesiaal en belangrik is vir Hom. As Hy my lankal uitgekies het as sy eiendom, sal Hy my nooit ooit weer los nie!

Ek lees in 1 Pet. 2:17 van vier dinge wat ons kan doen om die Here bly te maak: (1) behandel almal beleefd en gemanierd (2) wees liefdevol en lojaal teenoor mede-Christene (3) erken God as die groot en magtige Heerser (4) respekteer die leier van ons aardse regering. Dis redelik reguit gesê en vir my is dit nie vier dinge wat sommer net natuurlik kom nie. Kom ons streef daarna, kom ons vra die Heilige Gees om ons gedagtes en woorde en optrede te beheer sodat ons elke dag meer en meer van hierdie vrug sal dra.

“Die Here het ’n plan daarmee as julle elke dag so positief leef” (1 Pet. 2:15, Die Boodskap) Om positief te leef beteken nie net dat jy altyd opgeruimd en tevrede is nie. Dit beteken nie net dat jy die glas as halfvol en nie halfleeg sien nie. Dit beteken ook nie dat jy jou probleme net ontken en maak of alles net goed is nie. Om positief te lewe beteken dat jy kies om die regte dinge te doen, al doen niemand anders dit nie. Om positief te lewe beteken dat jy sal uitstyg bo jou moeilike omstandighede. Om positief te lewe beteken dat jy die Here se hand in alles sal raaksien. Om positief te lewe beteken dat jy na die goeie in elke mens en in elke situasie sal soek. So ’n positiewe lewe sal die Here se Naam eer en ’n invloed op die mense om jou hê. Ek hoop jou “-“ kan vandag ’n “+” word!

Gretha Wiid skryf nou die dag die volgende, wat ek graag hier wil deel, want ek stem heelhartig daarmee saam: God se tyd is altyd perfek, al verstaan ons nie altyd waarom als nie gebeur soos wat ons dit vra nie. Wat ek wel weet ... ons gebed bring ons harte nader aan God, gee vir ons berusting en maak ons geestelike ore ook oop vir dit wat die Heilige Gees aan ons wil sê en openbaar. Bid daarom sonder ophou ... op Sy tyd sal Hy Sy planne tot uiting laat kom, maar tot dan sal Hy jou hart verander, beskerm en versag.

“In die wêreld sal julle dit moeilik hê, maar hou moed: Ek het die wêreld klaar oorwin.” (Joh. 16:33) Ongelukkig is alles in die lewe nie net maanskyn en rose nie. Alles verloop nie altyd net perfek, foutloos en glad nie. Rampspoed, bekommernisse, beproewing, frustrasies, nood, ellende, droefheid, gevaar, ens. is ongelukkig ook dikwels deel van die gelowige se lewe. Is jy in enige van hierdie situasies? Wel, die beste wat jy kan doen, is om met alle mag vas te klou aan dié een wat reeds die oorwinning oor alles behaal het – Jesus Christus. In Hóm is ons ook oorwinnaars en kan ons rustig raak oor al die moeilikhede wat oor ons pad mag kom. Bly kalm en vind jou rus en vrede in Hom!

“May Christ, through your faith, dwell (settle down, abide, make His permanent home) in your hearts.” (Ef. 3:17) Die intieme binnekant van jou hart, gedagtes, emosies, gemoedstoestand en ingesteldheid is waar die Here sy intrek in jou lewe wil neem. Hy wil ons binnekant sy permanente adres kom maak. Hy wil tuis kom by ons. Raak net weer vandag ’n  slag rustig en oordink hierdie groot waarheid. Ek nooi Hom weer vandag opnuut om Sy intrek by my te kom neem en my binnekant Sy tuiste te maak – ek hoop jy sal dieselfde doen.

Wil jy ook soos Moses, Abraham en Dawid, ’n vriend van God genoem word? Wel, hier is die “resep” : “Abraham believed in (adhere to, trusted in, and relied on) God, and this was accounted to him as righteousness and he was called God’s friend.” (James 2:23, Amplified Bible). Gee jouself oor aan die Here, nooi Hom in jou lewe, jou hart en jou kop in. Klou vas aan Hom, bly in Hom, vertrou op Hom, maak staat op Hom, glo Hom, glo ín Hom – dit is wat jou ’n vriend van God sal maak. Kyk wat sê Jesus vir jou: “As my vriende kan julle maar rustig wees oor alles” (Joh. 16:33, Die Boodskap)

Ek het volgende raakgelees wat Max Lucado geskryf het: Reddende genade red ons van ons sonde. Onderhoudende genade ontmoet ons by ons behoefte en rus ons toe met moed, wysheid en sterkte. Dit verras ons ... met oorvloedige geloofshulpbronne. Onderhoudende genade beloof nie die afwesigheid van worsteling nie, maar die teenwoordigheid van God.

“Wees verstandig wanneer dit by goeie dade kom. Maar wees dom wanneer dit by sonde kom. Moenie vir die sonde ’n vastrapplek in julle lewe gee nie”. (Rom 16:19, Die Boodskap). Ons moet ons aandag en energie fokus op die goeie, die regte, die mooi dinge waarmee ons onsself kan besig hou. Vind uit wat God se wil is en dóén dit. Aan die ander kant moet ons ons rug draai op die slegte en die verkeerde dinge wat ons om elke hoek en draai wil intrek en verlei. Daardie dinge is nie vir God aanvaarbaar nie en ons moet as’t ware daarvan weghardloop. Staan sterk, sê nee vir sonde. Wees slim, doen goed.

“Maar hier by My is ’n plek waar jy op die rots kan staan” (Eks 33:21). Sjoe, wat ’n uitnodiging bied die Here nie vir ons nie. Hy steek sy hand uit om ons op te lig en ons voete op ’n stewige plek, naby Hom te laat staan. Miskien is jy vandag in ’n situasie of ’n plek in jou lewe waar dit voel of jou knieë knak, waar jy raad-op voel, waar jy onseker en onvas op jou voete voel. Kom staan op die Rots. By Hom is daar sekuriteit, vastigheid en skuiling. Daar is geen rots soos ons God nie! “U het my ’n ruim vastrapplek gegee, my enkels het nie geswik nie” (Ps. 18:37)

Ten spyte daarvan dat Samuel van die Here afgesmeek is en sy ouers toewy was aan die Here en hom op ’n jong ouderdom gevat het om ’n dienaar in die tempel te wees; ten spyte daarvan dat hy opgegroei het by die profeet Eli, lees ons in 1 Sam 3:7: “Maar Samuel het nog nie die Here geken nie.” En ek wonder: “Hoe is dít moontlik?” Is dit moontlik dat iemand Godsdienstig grootword, een of meer Bybels het, weekliks kerk toe gaan, die dominee persoonlik ken, werk op die kerkbasaar, kerk-seminare en kursusse bywoon en nog nie die Here ken nie? Dit is moontlik, want ek was self lank gelede so iemand, totdat ek ook, soos Samuel, gehoor het dat die Here my naam roep en ek kon antwoord: “Praat, Here, U dienaar luister”. Ek het ’n persoonlike ontmoeting met Hom gehad en ek kon die beheer van my lewe aan Jesus oorgee, hom in my hart innooi as my Here en as my Verlosser en ek kon vervul word met die Heilige Gees.  “Samuel het grootgeword. Die Here was by hom...” (1 Sam 3:19). Wat van jou?

Op ’n paar plekke in die Evangelies lees ek dat Jesus mense “innig jammer” gekry het. (He was moved with compassion, sê die Engelse vertalings). Elke keer wanneer Hy mense só jammer gekry het, het Jesus iets gedoen om hulle nood te verlig. Hy het siekes gesond gemaak (Matt. 14:14), Hy het skares gevoed (Matt. 15:32), Hy het blindes laat sien (Matt. 20:34), Hy het hulle onderrig (Mark 6:34), Hy het getroos (Luk. 7:13), Hy het gereinig (Mark 1:40). Hy het nooit weggekyk nie, Hy het nie omgegee of dit Sabbat was en Hy reëls sou oortree nie, Hy het nie omgegee of Hy self moeg was nie, Hy was nie bang dat Hy sou “aansteek” of vuil word nie – nee, elke keer reik Hy uit en raak Hy aan en maak Hy ’n verskil. Vandag wil en sal Hy nog steeds dieselfde doen vir jou en vir my!  

“As draer van daardie naam (Christen) moet hy God verheerlik.” (1 Pet. 4:16 ) Wanneer ons in die huisgesin van Jesus inkom, word ons die draer van die familienaam “Christen”. Om ’n familienaam te dra bring verantwoordelikheid mee. Ek dink daar is té veel mense wat hulleself Christen noem, maar nie waardige draers van die Naam is nie. Wat ons doen, dink en sê moet pas by ons naam en moet God eer. Om die naam “Christen” te hê  is ’n voorreg wat ons nooit mag vergeet nie en nooit mag misbruik nie.

“Dit is ’n betroubare woord en kan sonder voorbehoud aanvaar word: Christus Jesus het na die wêreld gekom om sondaars te verlos” (1 Tim 1:15). Hierdie is die heel beste nuus wat daar is. Dit is seker ook hoekom die  Bybel die “goeie nuus” of die “blye boodskap” genoem word! Ons is vry en vergewe, gewas en geheilig, skoon en nuut gemaak deur Jesus. Ons moet nie daaraan te twyfel nie, ons hoef nie daaroor te redeneer of te wonder of te stry nie. Dis nie nodig dat ander boeke of profete dit te bevestig nie. Dié boodskap is vas en waar en seker. Glo en aanvaar jý dit sonder voorbehoud?

As mens die verhaal van Manasse lees in 2 Kron. 33, sien jy ’n prentjie van ’n goddelose man, ’n rebelse koning wat God se volk verlei het met afgode, wat die tempel ontheilig het met Baäl-altare en ’n naakte Asjera-beeld. Verder hou Manasse hom op met goëlery, toordery, waarsêery en die oproep van geeste. Hy het boonop sy eie seuns as offers aan afgode verbrand. Die Bybel sê: “Hy het gruwelik verkeerd gedoen in die oë van die Here en Hom uitgetart”. Hy is seker loshande die ou in die Bybel met die langste lys gruwelike sondes teen hom. Maar wat só wonderlik is, is toe Hy berou betoon en terugdraai na die Here en tot Hom uitroep en bid vir vergifnis, het God hom gehoor en aan hom genade bewys. (2 Kron. 33:12-13). Sjoe, hoe genadig is ons God nie. Geen sonde is te erg of te groot nie, geen sondaar te sondig vir Sy genade nie. “But sin didn't, and doesn't, have a chance in competition with the aggressive forgiveness we call grace. When it's sin versus grace, grace wins hands down”. (Rom 5:20)

“Hy maak julle altyd in alles ryk genoeg om by elke geleentheid vrygewig te kan wees” (2 Kor. 9:11). Ek glo dat die Here ons seën met besittings, gawes en vermoëns sodat ons weer vir ander ’n seën kan wees. Hy maak jou “ryk” sodat jy vrygewig met jou rykdom kan wees. Wat het jy vandag waarmee jy iemand anders kan seën? Miskien brood of ’n kombers vir ’n arme? Dalk bietjie tyd om ’n sieke te besoek en ’n blommetjie of pot sop saam te neem? Dalk het jy woorde van aanmoediging vir ’n ryke of bemoediging vir ’n moeë geestelike werker of dominee? Het jy dalk trooswoorde vir iemand wat in sak en as is oor die een of ander verlies? Onthou: jy het áltyd iets wat iemand anders nodig het. Wees vandag op die uitkyk vir geleenthede om die Here te dien met jou vrygewigheid.

“Die Here julle God gaan voor julle uit ...” (Deut. 1: 30). Hy is ons Voorloper, ons Leidsman, ons Gids. Hy lei en ons kan met vertroue volg. Jy hoef niks te vrees vandag nie, jy hoef nie bekommerd te wees vir dit wat dalk vir jou wag nie, vir die probleme, siekte of swaarkry wat jou dalk kan oorval nie. Die Here ken die toekoms, Hy is reeds dáár, Sy lig skyn reeds om daai donker kronkel in die pad. Hy gaan voor jou uit, Hy maak dit pad gelyk, Hy veg vír jou en Hy sê nou vir jou dat jy vol moed kan wees en met vertroue vorentoe kan gaan. Kyk op na jou Gids en volg Hom.  

Ek het weer die gedeelte in die Bybel gelees oor die reiniging van die tempel. Ek sien dat Jesus erg ontsteld was omdat sy huis ’n “rowersnes” en ’n “besigheidsplek” gemaak is, terwyl Hy dit as ’n huis van gebed bedoel het. My liggaam is mos nou Sy tempel waar Hy deur sy Gees woon, daarom moet ek sorg dat hierdie tempel ook ’n skoon en heilige plek is. Ek moet my liggaam, my hart, my gedagtes skoonmaak van geldgierigheid, van drome wat nie in lyn is met God se wil nie, van gewoontes wat nie pas by ’n kind van God nie, van woorde wat nie opbouend is nie. Mag Jesus vandag tuis voel in my as sy tempel en mag hierdie tempel ook vandag eerder ’n huis van gebed wees.

The best care for anger is delay – ’n aanhaling wat ek lees onderaan my dagboek se bladsy. Dis seker nie verniet dat ons vir ons self sê: tel liewer tot 10, nie! Wanneer mens kwaad of vies is, verneder is of te nagekom voel, dan is mens geneig om ’n vinnige, snerpende, woedende antwoord te gee. Jy gryp gou daai selfoon om ’n SMS te tik, of reageer impulsief met ’n epos wat presies sê hoe jy voel en wat jy van die ander persoon dink – net om dalk later spyt te wees daaroor, en te voel jy wil daardie woorde terugtrek. Die slegte nuus is: jy kán nie. Wat gesê is, is gesê, wat geskryf is, is geskryf. Ek wil myself net weer vandag herinner om maar my woorde te tel, om die Here te vra om ’n wag voor my mond te plaas, om te dink voor ek sê, om bietjie te wag voor ek reageer. “Here, help my om nie onnodig te praat nie. Leer my om versigtig te wees met wat ek sê” (Ps. 141:3, Die Boodskap)

Wat doen jý wanneer jy in vertwyfeling is, wanneer jy wanhopig voel, wanneer jy swak is, wanneer jy in nood verkeer of in ellende gedompel is en voel of jy vergaan, wanneer jy vasgedruk en magteloos voel? Gee jy dalk op, verloor jy dalk jou geloof of draai jy dalk jou rug op die Here? Óf roep jy na die Here, dink jy aan Hom in sulke tye? Kom ek gee vir jou ’n paar tekste van mense wat uit hulle vertwyfeling, in hulle wanhoop, onder hulle ellende na die Here geroep het:

Ps. 42:7 Uit my vertwyfeling roep ek na U ...
Ps. 61:3 ... in wanhoop roep ek na U ...
Jona 2:1 In my nood het ek na die Here geroep ...
Jona 2:7 Toe ek wou vergaan het ek aan die Here gedink ...
Ps. 88:10 My oë is al dof van ellende, die hele dag deur roep ek na U, Here ...

Roep na Hom, want Hy sál luister, Hy sál jou gebed verhoor, Hy sál antwoord. “Toe ek so magteloos en bang was, het ek ernstig tot die Here gebid. Ek het Hom gevra om my asseblief te help ... en my God het my gehoor!” (Ps. 18:6-7, Die Boodskap) 

Spiritual maturity isn’t measured by how high you jump in praise, but how straight you walk in obedience. Ek het hierdie op iemand se Facebook gesien en toe ek die oorsprong daarvan probeer navolg, het ek agtergekom dis nogal ’n gunsteling sêding op Twitter en as Facebook-status – dit word oor en oor ge-“share” en ge-“retweet”. Ek het gewonder hoekom so baie mense van dié uitdrukking hou. Miskien is dit omdat hulle ook moeg is daarvan dat hulle geestelikheid en verhouding met die Here deur mense beoordeel word op grond van rituele en goetertjies, van geestelike praatjies en aksies. Al daardie dinge is niks werd as mens se lewe nie die vrugte dra wat wys dat jy ’n kind van God is nie, as die liefde, vriendelikheid, goedhartigheid, getrouheid, selfbeheersing en al daai Gal 5:22-goed nie bewys dat die Heilige Gees in jou woon nie ... anders is jy tog maar net ’n stuk klinkende metaal.  

Ps. 139 is een van my gunsteling gedeeltes in die Bybel. Dit is my troos, my hoop, my vrede om daaruit te weet dat die Here alles sien, alles weet, alles verstaan en alles beheer. Hy is alomteenwoordig, alwetend en almagtig. Ek is altyd onder sy oog en onder sy hand – Hy is naby, Hy hou my vas, Hy sorg vir elke aspek van my lewe. Alles wat ek dink en doen, is bekend aan Hom. “U ken my deur en deur. U beskerm my hele lewe. Ek kan dit glad nie verstaan nie, al probeer ek. Dit is te oorweldigend.” (Ps. 139:4-5, Die Boodskap)

Don’t confuse your path with your destination, just because it’s stormy now, doesn’t mean you aren’t headed for sunshine. Ai, mense kan so vaskyk in vandag se moeilikheid en probleme en dan dink hulle die hele toekoms is donker en sonder hoop. Probeer verder kyk, vriend,  en glo dat die donker wolke sal opklaar en dat die son weer sal skyn. Die Here sal vir jou uitkoms gee, jou trane sal afgedroog word, jy sal weer blydskap ervaar. Hy gee vir jou: “... flowers instead of sorrow, olive oil in place of tears, joyous praise in place of broken hearts” (Jes. 61:3). Ons swaarkry in hierdie lewe is maar gering en gaan verby (2 Kor. 4:17)  - ek hoop jy kan dit glo?

Fault finding is like window washing. All the dirt seems to be on the other side. Toe ek dié aanhaling lees, het ek gedink dis mos presies wat Jesus vir ons geleer het oor die splinter in my broer se oog. Ons is tog so gou om mense te oordeel en veroordeel, selfs medegelowiges. Dit lyk partykeer vir my of mense nie kan wag dat die ander een ’n ou foutjie maak sodat hy uitgevang kan word nie. Ons kyk met ’n vergrootglas en snuffel deur ander se lewens en optrede om te kyk of ons ’n sondetjie kan kry. En die hele tyd sit die die vuil kolle eintlik aan óns  kant van die venster! Jesus sê : “Jou skynheilige! Haal eers die houtstomp uit jou eie oog uit, dan sal jy goed genoeg kan sien om daardie klein splintertjie uit jou vriend se oog te haal” (Matt. 7:15, Die Boodskap). Ek wil minder oordeel, meer aanvaar, meer toegee en groter liefde betoon. Ek sal liewer konsentreer om mý kant van die venster skoon te hou.

As jy moeg en moedeloos is, net mooi genoeg gehad het van al die nonsens om jou, raadop is of hand-in-die-hare sit oor jou situasie is hierdie boodskap vir jou: “Weet jy dan nie, het jy nog nie gehoor nie ... Hy gee vermoeides krag, Hy versterk dié wat nie meer kan nie ... dié wat op die Here vertrou, kry nuwe krag. Hulle vlieg met arendsvlerke, hulle hardloop en word nie moeg nie, hulle loop en raak nie afgemat nie” (Jes. 40:28-31). Kom uit die vinnige baan uit, stop ’n bietjie by Sy krag-stasie. Hy belowe om jou te verkwik en te verfris, om jou krag en deursettingsvermoë te gee vir daai moeilike situasie waarin jy is. Vertrou en wag op die Here en vlieg met arendsvlerke!

“Maar julle moet nou nie sleg voel of bang wees omdat julle my verkoop het nie, want God het my voor julle uitgestuur om lewens te red ... Dis nie julle wat my hierheen gestuur het nie, maar God” (Gen. 45:5-8). Dit is hoe die verhaal van Josef eindig. Inplaas daarvan dat hy kwaad is vir wat sy broers aan hom gedoen het en hulle verwyt of verwerp, sien hy God se plan met sy lewe, hy erken dat die Here sy slegte omstandighede ten goede gebruik het, vir Sý doel. Dit klink ook soos die verhaal van Ester: “Wie weet, miskien is dit juis met die oog op ’n tyd soos hierdie dat jy koningin geword het” (Ester 4:14). Daar is altyd ’n groter prentjie as die realiteit waarin jy jou bevind. Die lewe is soos ’n legkaart wat stukkie vir stukkie gebou word en dit is net God wat die hele prentjie sien. Vertrou dat Hy in beheer is en dat alles ten goede sál meewerk, al lyk dit glad nie op die oomblik so nie.

“Laat ons dan onophoudelik deur Jesus aan God ’n offer van lof bring, dié lof wat aan Hom gebring word deur die lippe wat sy Naam bely”. (Heb. 13:15). Lofprysing is om respek en dankbaarheid te uiter (te sê of te sing) teenoor die Here. Dit is om Hom te bewonder vir wie Hy is en om sy eienskappe en sy werke te verkondig; om ons waardering uit te spreek vir wie Hy is, vir wat Hy gedoen het en wie Hy ons gemaak het. “Ek wil die Here loof, met alles wat in my is, wil ek Sy heilige Naam loof....” (Ps. 103:1).  Is daar vandag lof vir Hom op jou lippe?

Ek lees hierdie in ’n boek van Joyce Meyer: "Many people love things and use people to get them. But God intends for you to love people and use things to bless them". Ek dink die Here verwag van ons om dié liefde wat Hy in ons harte sit onvoorwaardelik uit te deel, om dié vermoëns wat Hy ons gegee het aan te wend om te help, om nie net van ons goed nie, maar ook van ons tyd en onsself aan ander te gee. Dit hoef nie groot, georganiseerde bedienings te wees nie, dit kan ook net daardie beker koue water wees waarvan Jesus praat. Hy sê: “Sê nou ’n vriend van My is dors. Ek praat nou van ’n vriend van My aan wie niemand hulle eintlik steur nie, omdat hy arm is en geen aansien het nie. Iemand sien hy is dors en stap nader met ’n beker houe water in sy hand. Hy gee dit vir My vriend. Saam met die beker water gee hy ook sy vriendskap vir hierdie onbelangrike man. As die dors man vra: “Waarom doen jy dit?” antwoord die ander man: “Omdat jy Jesus se vriend is.” Wel, vir so iemand sal God ook sorg”. (Matt. 10:42, Die Boodskap)

Joh. 6:47 (Die Boodskap) - “Die ewige lewe behoort aan daardie persoon wat ’n persoonlike volgeling en vriend van My is”. Hoe word ek Jesus se vriend? Deurdat ek die deur van my hart vir Hom oopmaak en Hom innooi in my lewe. Deurdat Hy deel is van my daaglikse bestaan en ek Hóm vertrou met elke aspek van my lewe. Ek blý  ’n vriend van Jesus deur Hom beter en beter te leer ken, deur na Sy woorde te luister, deur met Hom ’n opregte verhouding te hê. Hoe word ek ’n volgeling van Jesus? Ek stap in sy voetspore, ek gaan waar Hy gaan, ek doen wat Hy doen. Jesus sê: “Ek ken hulle en hulle volg My. Vir hulle gee Ek die lewe wat nooit sal ophou nie” (Joh. 10:28, Die Boodskap)

“My genade is vir jou genoeg” (2 Kor. 12:9). Die Here se genade is genoeg. Genoeg waarvoor? Dis genoeg om my sonde heeltemal toe te maak. Dis genoeg om my te beskerm teen gevaar. Dis genoeg om my te help om te onderskei tussen reg en verkeerd. Dis genoeg om my moed te gee om voort te beur. Dis genoeg om my in staat te stel om aan Hom vas te hou, al het ek pyn en probleme. Dis genoeg om vrees en bekommernis teen te werk. Dis genoeg om my hoop te gee vir môre. Dis genoeg om my naaste mee te bedien. Mag die Here se genade genoeg wees vir jou.

“Take steps of faith even though you have feelings of fear”. Woorde wat ek êrens gelees het. Ons moet partykeer loop waar daar nie genoeg lig is nie, waar daar onsekerheid is oor die volgende tree wat jy moet gee. Dis soos as mens deur digte mis ry en jy probeer jou oë groter ooprek, of jy trek dit op skrefies, net om te probeer uitmaak waar die pad is. Dan ry jy mos stadiger, wring jou hande op die stuurwiel en kyk net hier reg voor jou. Dis ook soos om met ’n flitslig in die donker te loop. As jy doer voor in die paadjie lig, gaan jy struikel, want dan is daar nie lig by jou voete vir die volgende tree nie. Jy kyk dan mos maar net hier voor jou op die grond, sonder om die res van die pad te sien en loop treetjie vir treetjie met die bietjie lig wat jy het. Dit vergelyk vir my met die “steps of faith” van die lewe. Al weet jy nie waarheen die pad lei nie, kan jy in geloof vandag se treetjie gee met vandag se lig wat die Here vir jou gee, met vandag se beskerming en voorsiening wat Hy vir jou gee. Êrens sal die miswolke weer oplig en sal alles weer helder en lig word en sal alles weer sin maak. Glo dit.

Ek sien partykeer mense wie se hande so swak en slap hang. Dit teken ’n prentjie van wanhoop, van terneergedruktheid, van opgee, van ek-kan-nie-meer-nie. Wat maak daai hande so slap? Ek dink dis miskien bekommernis of swaarkry of vrees of eensaamheid. Die woord sê vir ons in Sef. 3:17: “Moenie jou hande moedeloos laat hang nie! Die Here jou God is by jou”. Moenie jou hande moedeloos laat hang nie, lig hulle op na die Here in gebed – Hy is langs jou. Hy is lief vir jou. Gló dit. Ek het hierdie êrens gelees: fear makes the hands slack, but faith and hope make them vigorous. Mag jy vandag “vigorous” hande hê!

Het jy ook al in moeilike tye gekom waar jy die Here bestook met jou vrae. Vrae soos bv. “Gaan die Here my altyd van Hom af wegstoot? Sal Hy ooit weer vir my goed wees? Gaan Hy sy troue liefde altyd van my af wegvat? Het sy belofte om sy kinders in hulle swaarkry te help, nou eens en vir altyd tot ’n einde gekom? Het die Here so kwaad geword dat Hy sy kinders nooit weer met sy liefde gaan toevou nie?” Jy is nie alleen nie! Baie voor jou het ook al hierdie vrae gevra – lees maar Ps. 77:8-10! Miskien kan hierdie teks jou help om rustig te word in daardie vrae-tye: “When life is heavy and hard to take, go off by yourself. Enter the silence. Bow in prayer, Don’t ask questions. Wait for hope to appear.” (Lam 3:28-29, The Message)

“God is liefde”, is die woorde wat ek as kind herhaaldelik op die kanselkleed in die kerk gelees het. Sulke mooi, goud geborduurde letters. Ek dink nie ek het toe eintlik verstaan wat dit beteken nie, ek weet nie of ek dit nou eers regtig kan begryp nie. Die Bybel sê: “Sy liefde kan ons nie met woorde beskryf nie; dit is te groot en wonderlik. G’n mens kan dit met sy verstand uitredeneer nie, want dit is baie groter as wat ons as mense is” (Ef. 3:18, Die Boodskap). Wat ek wel weet is dat liefde God se karakter is, dit is nie iets wat Hy het nie, dis iets wat Hy IS. Hy kan nie anders as om ons lief te hê nie, onvoorwaardelik! Ons hoef nie eers te presteer of sondeloos te wees voordat Hy ons liefhet nie. Sy liefde is op Hom gebaseer, nie op jou nie. Daar is geen twyfel nie: niks kan Sy liefde keer nie. “Letterlik niks in hierdie skepping kan ons ooit van God se liefde skei nie” (Rom 8:39)

“As jy ontsteld raak, moenie sondig nie; dink in stilte daaroor na as jy gaan lê en laat dit daarby” (Ps. 4:5). Is dit nou nie goeie raad nie? Wanneer mens jou ontstel, of as jy kwaad word vir iemand, is die natuurlike volgende stap om ’n oorvloed onvleiende woord te laat stroom, om die persoon sleg te maak, jouself te verontskuldig, om te skree, haatgedagtes te koester, jy sal miskien selfs vloek. Die raad in Ps. 4 is om bietjie eenkant toe te gaan, rustig te word (ja, gaan lê bietjie op die bed!), oordink die situasie en laat dit daarby. “Keep calm and carry on”!  
~ Wilna

Voel jy dalk verstoot, verag, verwerp? Stap jy ’n pad van lyding en swaarkry? Ervaar jy pyn? Vermy mense jou en draai hulle rug op jou? Is jy dalk mishandel? Miskien voel dit asof mense niks van jou dink of jou nie ernstig opneem nie. Volgens Jes. 53:3-5  ken Jesus elkeen van daardie emosies; Hy het dit immers sélf ook ervaar op sy kruispad. Aan die kruis het Hy nie net in ons plek gesterf vir ons sondes nie, Hy het ook in ons plek gesterf vir elkeen van hierdie emosies. Hy het die prys betaal wat herstel, heling, vrede en vryheid in elke aspek van ons lewens kan bring.  “Hy is doodgemaak omdat ons sonde gedoen het. Hy moes die prys betaal wat ons lewe kon herstel. Hy is stukkend geslaan sodat ons weer gesond kan word.” (Jes. 53:5, Die Boodskap)
~ Wilna

Ek dink steeds oor die woord “veracity” (liefde vir die waarheid). Dis tóg beter om altyd net die waarheid te praat; die waarheid het ’n manier om uit te kom en partykeer word mens se leuens op die mees ongeleë tye uitgevang. As jy jok oor iets, moet jy aanhou jok en jy moet onthou vir wie jy watter storie vertel het. Wanneer iemand eers eenmaal vir jou gejok het, dan bevraagteken jy daarna alles wat hy sê. Ons almal haat dit as iemand vir ons jok, of ’n halwe waarheid vertel – laat ons dan nie dié een wees wat die leuens vertel nie. Leuens laat verhoudings verbrokkel, leuens breek mense, leuens is onregverdig en wreed, dit mislei en bedrieg mense.  Weerhou altyd jou tong van kwaadpraat en jou lippe van leuens (1 Pet. 3:10)
~ Wilna

Die dominee het nou die dag by ons Bybelstudiegroep vir ons ’n nuwe woord geleer: veracity. Volgens die woordeboek beteken dit “adherence to the truth, truthfulness, accuracy, precision, something that is true”. Dit beteken om ’n liefde vir die waarheid te hê, dit beteken jou “ja” is “ja” en jou “nee” is “nee”. Ek moes toe maar vir myself vra: hoe lief het ek die waarheid? Praat ek altyd die waarheid, of is daar partykeer so ’n sousie om die storie bietjie beter te laat klink? Oordryf ek, of las dalk ’n stertjie by as ek iets sê? Dalk vertel ek so nou en dan ’n ou witleuentjie? Miskien word die waarheid partykeer verswyg sodat ek nie moeilikheid kom nie? Ek besef die Here verwag 100% veracity van my; Hy sê:  “... let false lips be far from you” (Spr. 4:24)
~ Wilna

Ek probeer so dikwels om die Here en sy dade te verstaan en te verklaar en te verdedig. Tog sê die Bybel dat wat Hy dink en hoe Hy optree baie vêr is van hoe ons dink en optree. “Kan jy begryp wie God werklik is? Kan jy die Almagtige ten volle verstaan?” (Job 11:7). Die antwoord is natuurlik nee. So sê Rom 11:33 ook dat ons nie sy planne kan ken of verstaan nie, ons kan nie sy oordeel bevraagteken nie, ons kan Hom nie raadgee nie. Dat ek min van God se weë kan verstaan laat my nie uitgelewer of moedeloos voel nie, inteendeel, dit vervul my met ontsag en verwondering en ek wil ook uitjubel: “Hoe wonderlik is U gedagtes vir my, o God, hoe magtig hulle almal. As ek hulle sou wou opnoem, hulle is meer as wat daar sand is en as ek daarmee klaar is, sou ek nog steeds met U te doen hê”(Ps. 139:17-18)
~ Wilna

As ek in die Bybel lees dat die Here sê: “Wees heilig, want Ek is heilig”, dan wil ek alles in my vermoë doen om gehoorsaam te wees. Ek wil hard werk en daarna streef, ek wil my inspan om meer heilig te wees, om God te behaag, om volgens Sy voorskrifte te lewe, om onberispelik te wees.  Dis egter maar ’n opdraande paadjie! Gelukkig lees ek toe hierdie gebed met ’n belofte daarby in 1 Tess 5:23 - 24: “Mag God julle volkome aan Hom toegewyd maak en julle geheel en al, na gees, siel en liggaam so bewaar dat julle onberispelik sal wees wanneer ons Here Jesus Christus weer kom.” En hier kom die belofte: “Hy sal dit ook doen....”. Hý sal my heilig maak, Hý sal my aan Hom toewy, Hý maak my onberispelik, Hý maak my skoon, Hý maak my nuut – ek vertrou Hom om my oomblik vir oomblik meer heilig te maak.
~ Wilna

“Ek sal hulle ’n ander hart gee en ’n nuwe gees onder hulle laat posvat, Ek sal die kliphart uit hulle liggaam verwyder en hulle ’n hart van vleis gee. Dan sal hulle volgens my voorskrifte leef en my bepalings nakom en daarvolgens optree” (Es 11:19-20). ’n Kliphart is afgestomp en hard en geslote. God se stem kan nie deurdring na so ’n hart nie. ’n Kliphart luister nie na die Here nie, hy volg sy eie verharde weë. ’n Vleishart is sag, sensitief en ontvanklik vir die aanraking van die Here. ’n Vleishart voel die Here se hartklop en luister na sy sagte, teer stem. Kom, doop vandag jou hart in die stroom van lewende water by die Here, sodat dit weer sag kan word.
~ Wilna

“Jy moet die Here jou God liefhê met jou hele hart en met jou hele siel en met jou hele verstand en met al jou krag”. (Mark 12:30). Met jou héle siel. Die siel van die mens word baie keer beskryf as die samevatting van gedagtes, wil en emosies. Om die Here met my hele siel te dien en lief te hê, vra daaglikse bekering in al drie hierdie areas van my lewe. Die Bybel sê: “Julle gees en gedagtes moet nuut word” (Ef. 4:23). Kry nuwe gedagtes wat op God se dinge gefokus is. My wil moet buig, my eie ek moet uitskuif, sodat ek wil wat God wil. Ek moet die beheer van my emosies oorgee aan die Heilige Gees, sodat selfbeheersing, geduld, vreugde, vrede, vriendelikheid, liefde, ens. sal seëvier oor woede, haat, naywer, jaloesie en alle ander negatiewe emosies. Ek gee my hele siel.....
~ Wilna

Wat beteken dit om geestelik volwasse te wees? Dit beteken om alles oor jouself en oor God te weet wat jy behoort te weet; dit beteken dat jy jou Goddelike doel bereik het (dis die afleiding wat ek maak wanneer ek Kol 1 :28 in Die Boodskap lees). Is enige een van ons al daar? Ek glo nie. Die lewe word immers in die Bybel met ’n wedloop vergelyk – die wenstreep lê nog voor. Ek moet my egter inspan in my deelname aan dié resies. Dit kan net plaasvind as my wegspringblokke ’n intieme, persoonlike verhouding met Jesus is. Ek kan net vorder op die pad as ek die Woord as my basis het, as ek die kennis wat ek daaruit kry in my lewe toepas, as ek my lewe daarby aanpas en as ek gehoorsaam is aan God se opdragte. Ek kan net vorder op die pad as die Heilige Gees my lewe só  beheer dat Sy teenwoordigheid sigbaar is in liefde, vrede, vreugde ... ens. Ek sal net by die wenstreep van geestelike volwassenheid kom as ek volhard. Aanhouer wen!
~ Wilna

... ek kom niks kort nie, sê Ps. 23:1. Nou wonder ek soms: wat moet ek alles hê om niks kort te kom nie? Kol 2:11 (Die Boodskap) vra dieselfde vraag: “Maar wat kry julle alles by Hom? Wat gee Hy aan julle sodat julle niks kortkom nie?” Dis nie ’n lekker nuwe kar nie, nie ’n pragtige huis nie, nie ’n stewige bankbalans nie, nie ’n meelewende gemeente nie, nie ’n kragtige bediening nie, nie ’n belangrike posisie nie, nie ’n eksotiese bord kos nie. Lees ek vêrder in Kol 2:11-17 kry ek hierdie lysie goed wat ons by Jesus kry en dit is wat maak dat ons waarlik niks kortkom nie:
Christus neem om sondige natuur weg, Hy gee ons ’n nuwe begin, ons was geestelik dood, maar nou léwe ons saam met Jesus, Jesus het al ons skuld weggeneem (ons rekening hang nou aan die kruis), Christus het die geestelike magte verslaan, ons mag maar vergeet van alle onnodige reëls. Ons het lewe in oorvloed!
~ Wilna

“Believe in the Lord Jesus Christ (give yourself up to Him, take yourself out of your own keeping and entrust yourself into His keeping) and you will be saved.” (Hand 16:31, Amplified Bible). Ek kies sommer net weer vandag om myself uit my eie sorg uit te haal en my aan die Here se sorg toe te vertrou. Ek vertrou dat Hy alles ten goede sal laat meewerk vir my. Ek wéét Sy plan vir elke oomblik van my lewe is beter as my eie planne. Ek laat my lewe aan Hom oor, Hy sal sorg.
~ Wilna

Jesus groot bo almal... so begin ’n liedjie wat ons graag sing en vandag is dít ook my lofsang en eerbetoon aan Hom. Hier is ’n klompie tekste wat daardie waarheid bevestig en wat my met absolute verwondering laat oor Jesus se grootheid:
Hy is verhewe bo alles (Rom 9:5),  Hy het die eerste plek in die heelal (Kol 1:18), sy Naam is bo elke naam (Fil. 2:9), Hy is die Eerste, verhewe bo die skepping (Kol 1:15), voor alles was Hy al daar (Kol 1:17), alles is deur Hom en vir Hom geskep (Kol 1:16), Hy is die Koning van die konings en die Here van die heersers (Op 19:16). “Die grootheid, Here, die krag, die glans, die roem en die majesteit behoort aan U, ja, alles in die hemel en op aarde. Aan U, Here, behoort die heerskappy; U is bo almal verhewe”. (1 Kron. 29:11).
~ Wilna

“Hy laat sy lig in die donker uitstraal vir die opregtes” (Ps. 112:4). As mens in die donker loop, dan rek jy mos sommer jou oë groter in die hoop om ietsie te kan uitmaak. Ek wil vandag vir jou sê dat daar nie ’n plek so donker is dat die Here se lig nie daar kan inskyn nie. Kyk en soek, vriend, daar ís ’n ligstraal om vir jou die pad aan te wys – miskien verlig dit die pad net vir jou een volgende tree, maar gee daardie tree in geloof en glo die Here wanneer Hy sê: “Ek verander die donker paaie voor hulle in lig en Ek maak die ongelyk plekke gelyk” (Jes. 42:16)
~ Wilna

Dit is nie verniet dat die woord “vrede” deel is van die woord “tevrede” nie. As ek ware vrede in my hart het, sal ek vrede hê oor my omstandighede, dan sal ek tevrede kan wees met wat ek het, en nie meer en meer begeer, of onvergenoegd wees oor my lewensomstandighede nie. Ek sou graag ’n getuienis soos Paulus wou hê hieroor: “Ek is en bly altyd tevrede, wat my ook al tref. Dit maak nie saak of ek sonder ’n krieseltjie kos gaan slaap of soveel kos het dat ek dit nie alles kan opeet nie. Of ek net die klere aan my lyf het en of ek ’n huis vol goed op my naam het, vir my is dit eintlik maar om’t ewe. Vir alles in die lewe, die goeie of die slegte, sien ek kans, omdat Jesus my bron van krag is” (Fil. 4:12-13, Die Boodskap)
~ Wilna

Ek dink ons almal begeer die een of ander tyd meer wysheid. Ons wil mos graag weet wat die regte manier is om op te tree en hoe om die beste besluite te maak; ons wil die lewe verstaan, ons wil mense verstaan, ons wil die kuns om te lewe bemeester.  Spreuke 2 sê dat ons ons moet inspan om wysheid te bekom. Ek lees dat Einstein gesê het: “Wisdom is not a product of schooling, but a lifelong attempt to acquire it”. Hy was reg, want ons kan nie wysheid in ’n boek of universiteitskwalifikasie kry nie. Ons kan wysheid net by die Here kry – so sê Jak 1:5 “As een van julle wysheid kortkom moet hy dit van God bid”. Wanneer Goddelike wysheid sy plek in jou lewe ingeneem het, sal oordeelkundigheid jou vergesel en verstandigheid sal oor jou wag hou (volgens Spreuke 2:10-11). Dit gaan goed met die mens wat wysheid gevind het!
~ Wilna

Om sonder die Here te lewe is soos om op ’n dun draadjie te vertrou, of op ’n spinnerak staat te maak (aldus Job 8:14) – daar is geen sekuriteit of vastigheid, geen hoop of vooruitgang, geen verwagting of toekoms. Sonder die Here kan jy nie regop bly nie, sal jy verskroei in die hitte van die stryd, of verdrink in die lewenstorms. Moenie van die Here vergeet nie! Dien Hom, volg Hom, loof Hom ....
~ Wilna

Ek is maar net weer vandag diep bewus daarvan dat niks wat ek besit of kan doen aan myself te danke is nie. Dit is genade en geskenke van God. Ek kan nie op my eie krag, eie vermoëns, dit wat ek bereik het, of selfs op my gesondheid roem nie. “Jy kan dalk dink: my krag en my sterk hande het vir my hierdie rykdom verwerf. Maar jy moet die Here jou God nie vergeet nie, want dit is Hy wat jou die krag gee om die rykdom te verwerf.” (Deut. 8:17-18), of soos die liedjie se woorde sê : “wat ek is, is net genade, wat ek het, is net geleen ....”
~ Wilna

Selfs al gaan ek deur donker dieptes .... so sê Ps. 23:4. Ek wil so graag glo dat ons as kinders van die Here nooit deur donker dieptes hoef te gaan nie, maar die realiteit is tog dat baie van ons wel een of ander tyd daardie donker dal sien, daardie diep put beleef, daardie stormwaters teen ons voel slaan. Wat vandag vir my uitstaan in hierdie vers is dat die donker dieptes slegs ’n deurgang is – miskien iets soos ’n tonnel, en aan die ander kant is daar beslis lig. Die Here laat NIE sy kinders alleen deur die donker dieptes gaan nie – weet verseker dat Hy jou daardeur dra, dat Hy sáám met jou daarin is én dat die moeilike pad weer sal verbygaan, daar sal ’n einde kom aan die donker tonnel. Hoe sê die spreekwoord? This too shall pass.
~ Wilna

“Faithful is He who is calling you and utterly trustworthy” (1 Tess 5:24, Amplified Bible). Wat ’n mooi byvoeglike naamwoord om te beskryf hoe betroubaar en vertroubaar en vertrouenswaardig ons Here is: “utterly”. Dit sê Hy is volkome, heeltemal, totaal, absoluut, voluit, eenhonderd persent, sonder voorbehoud, geheel en al, ten volle, in oortreffende mate betroubaar. As jy vandag hoor dat Hy jou roep, dan kan jy heeltemal, eenhonderd persent, sonder voorbehoud jou vertroue in Hom stel en jouself aan Hom oorgee – Hy sál jou nie teleurstel nie.
~ Wilna

“Worry often gives a small thing a big shadow” – ek het dit êrens gelees. Om jou te veel te bekommer oor iets is soos om ’n eierwit te klits. Dit wat min en kleurloos is, word dik, skuimerig en wit. Nou ja, van opgeklitste eierwit kan jy darem lekker skuimpies bak, maar as jy opgeklits is van bekommernis raak jy knorrig en depressief, kry jy hoofpyn of dalk ’n maagseer, dan lyk die skaduwee oor jou probleem groot en donker, dan raak dit vir jou onmoontlik om enige silwer randjie raak te sien en jy weier om sê: môre sal die son weer skyn. “... wie van julle kan deur hom te bekommer sy lewe met een enkele uur  verleng?” (Matt. 6:27) Moenie jou bekommer nie, want jou Vader in die hemel weet wat jy nodig het, Hy sal sorg. “Laat jou sorge aan die Here oor, Hy sal vir jou sorg” (Ps. 55:23). So eggo 1 Pet. 5:7 en Fil. 4:6 ook. Mag die rus en vrede van die Here vandag oor jou bekommernis kom lê.  
~ Wilna

Ek lees in Ps. 31:10-16 van Dawid se swaarkry. Miskien voel jy dalk ook soos hy: jou oë is moeg van al die huil, jy is totaal uitgeput, jy word al hoe maerder van bekommernis, jou krag neem af, jy voel oud van al die swaarkry wat jy al beleef het, mense spot met jou, mense vermy jou. Probeer Dawid se raad: stel jou vertroue in die Here, erken dat Hy jou God is wat in beheer is van alles en bely: My tye is in U hand, U beheer my lewe van kop tot tone. “Wees dus sterk en hou goeie moed, julle almal wat julle vertroue in die Here stel” (Ps. 31:25)
~ Wilna

Ek dink nie daar is iemand wat kan sê dat hy nog nooit ’n fout gemaak het nie. Dis nou maar die realiteit van die lewe. Onthou egter dat jou foute nie bepaal wie jy is nie; wat jy leer uit jou foute, sal baie meer oor jou karakter sê as die feit dat jy ’n fout gemaak het. Moenie in sak en as gaan sit en depressief raak oor jou foute nie, erken dit, bely dit voor die Here. Geen fout is vir die Here ’n verassing of ’n skok nie, Hy weet reeds daarvan. Dit troos my ook om te weet dat Hy begrip het vir my foute. “Die Here weet hoe swak en vol foute ons is. Hy weet dat ons maar net klein en swak mensies is” (Ps. 103:14, Die Boodskap). Staan maar weer op as jy geval het, draai maar weer terug as jy verdwaal het, Sy genade sal vir jou genoeg wees. Jy is ’n wenner as jy een keer meer opstaan as wat jy geval het.
~ Wilna

“Gisteraand was daar nog trane en vanmôre lag ek al weer” (Ps. 30:6). Het jy dit ook al ervaar dat dinge saans net te donker lyk en wanneer jy gaan slaap voel jy bedruk en depressief, maar die volgende oggend lyk dinge sommer net beter en sien jy weer kans vir die lewe? Dis asof die Here deur die nag alles kom nuut maak het, asof Hy met opstaantyd net weer ’n groter porsie genade en liefde op jou kom uitstort het. So sê Klaagliedere 3:22-23 ook: “Daar is geen einde aan Sy ontferming nie, dit is elke môre nuut”. Mag jy elke dag saam met die nuwe sonsopkoms ervaar dat sy teenwoordigheid vars en nuut en seker is in jou lewe.
~ Wilna

“In U hande gee ek my lewe oor”, so bely Dawid in Ps. 31:6. So bely ek ook opnuut vandag. Ek kan net my lewe aan die Here oorgee as ek ten volle op Hom vertrou. Ek kan Hom net vertrou as ek Hom regtig ken. Ek ken Hom as my rots, my bergvesting, my toevlug; ek ken Hom as ’n getroue God wat hoor as ek roep, wat my nooit sal teleurstel nie (soos wat Ps. 31:1-6 sê). Ek kan altyd op Hom reken, Sy hand dra my veilig deur ’n krisis, Sy hand hou my styf vas, Sy hand lei my op die regte pad. Ek kén sy Vaderhand, daarom gee ek my lewe oor in Sy hande.
~ Wilna

Iemand skryf nou die dag dié drie woorde oor die kinders van die Here: geken, gekies, geweef. Hoe waar is dit nie! Die Here sê mos dat Hy elkeen van ons se naam ken, Hy roep ons op ons naam, Hy graveer ons naam op sy handpalms en dan sê Hy dat Hy ons nooit sal kan vergeet nie. Hy het ons voor ons geboorte al geken, elke stukkie detail, want dit is Hý wat ons met ’n plan aanmekaar geweef het daar in die baarmoeder. Dáár het Hy ons al gekies as die kroon van sy skepping, as die mense oor wie Hy sy liefde en genade wil uitstort, vir wie Hy sy Seun sou gee, in wie Hy sy Gees sou uitstort. Ai man, glo tog nou dat jý die appel van Sy oog is!
~ Wilna

Ek het lank gewonder wat dit beteken as Ps. 23:3 sê dat die Here ons op die regte paaie lei “tot die eer van sy Naam” (for His Name sake, om Sy Naam ontwil). Ek weet steeds nie, maar ek dink dat ’n lewenswyse wat volgens die Woord is en wat die vrug van die Gees openbaar, vir die mense om ons wys wie die Here is. Dit gaan daaroor dat Sy roem en Sy reputasie (dit wat mense van Hom dink) groter word, wanneer ons die regte paaie loop. Dat ons die regte pad loop gaan nie oor ons nie, maar oor Hóm. Daarom wys Hy die pad, Hy leer ons die regte pad, Hy leer ons om die regte pad te kies.... om Sy Naam ontwil.
~ Wilna

Daar is ’n geheime plek, ’n wegkruipplek, ’n plek waarvan net God se kinders weet. ’n Plek waar ons veilig is, waar ons krag ontvang, waar ons gevoed en opgebou word, waar ons die lewe in oorvloed kan ervaar. ’n Plek waar ons kan tuisgaan en tuis wees. Daardie plek is by die Here, naby Hom, in Sy teenwoordigheid. Ken jy dié geheime plek? Maak dit jou permanente blyplek, vriend, want “He who dwells in the secret place of the Most High, shall remain stable and fixed under the shadow of the Almighty” (Ps. 91:1).
 ~ Wilna

“Die Here kyk nie na dieselfde dinge as die mens nie. Die mens kyk na die uiterlike, maar die Here na die innerlike”. (1 Sam 16:7). Wie jy uiterlik is en wat jy uiterlik doen, bepaal jou goeie naam by mense, maar jou innerlike lewe bepaal jou aansien by die Here. Mense kyk buite, die Here kyk binne. Wat gaan aan in my binne-lewe? Is daar afguns en hoogmoed of sagtheid en liefde? Woede en haat of selfbeheersing en vriendelikheid? Vyandskap en verdeeldheid of geduld en goedhartigheid? Wat die hart van vol is, sal wel oorloop na die buitekant.
Skep vir my ’n rein hart, o God ....
~ Wilna

Kyk, Ek gaan iets nuuts doen .... (Jes. 43:19). Glo jy dat die Here iets nuuts in jou lewe kan doen? Dat Hy droë bene weer lewe kan laat kry? Dat Hy uit skerwe weer iets mooi kan maak? Dat Hy ’n rivier kan laat ontspring, affodille kan laat groei in die woestyn van jou lewe? Glo dit asseblief, want dit ís die waarheid. Kom na Jesus, vertrou Hom; Hy spesialiseer daarin om nuut te maak, om te vergewe, om skoon te was, om ons te “reset” en te “restart”. Hy kyk nie terug na jou slegte verlede nie, jy hoef ook nie! “Die oue is verby, die nuwe het gekom. Dit alles is die werk van God” (2 Kor. 5:17)
~ Wilna

“Always keep our words soft and sweet, just in case we have to eat them”. Dis ’n aanhaling wat ek êrens gelees het en toe maar net weer besef het hoeveel ons regtig moet let op wat ons sê. Ons woorde kan soos dolksteke wees, dit kan mense afbreek, haat aanwakker, verderf saai. Of ons woorde kan  ’n bruisende stroom wees, ’n bron van wysheid, dit kan soos heuning wees, soet en geneeskragtig, dit kan lewe en geluk bring, dit kan soveel werd wees soos die fynste silwer.  (Volgens verskillende tekste in Spreuke). Laat ons maar vandag weer ons woorde tel ....
~ Wilna

My broer se 6-jarige kleindogter sê nou die dag vir hom: Sjoe, Oupa, jy het al baie blaaie omgeblaai. Dié kostelike wysheid het my verstom. Dit het vir my so ’n mooi prentjie laat sien van ons lewensboek waarvan ons elke dag ’n nuwe bladsy kan omblaai, elke jaar ’n nuwe hoofstuk kan begin. Vandag het ons vandag se bladsy. Wat skryf jý op vandag se bladsy? Daar is net vandag om vandag se bladsy te skryf. Ons kan nie nou al omblaai na môre of volgende jaar nie, ons kan nie die storie se einde vooruit lees nie. Daarom sê ek vir myself: “Maak die beste gebruik van elke geleentheid” (Ef. 5:16), skryf vandag wat jy moet skryf, tipex vandag uit wat dalk jou lewensboek sal ontsier. Dis ’n nuwe jaar, dis ’n nuwe dag, ’n geleentheid om die volgende hoofstuk mooi te skryf!
~ Wilna

Kindness is the language which the deaf can hear and the blind can see – ’n aanhaling wat ek êrens gelees het. Kindness is mos barmhartigheid en goedhartigheid, om ’n hand na iemand uit te steek om hom te help, om met empatie en simpatie te luister na iemand se probleme, om ’n stukkie brood of ’n glas water te gee, om ’n sieke te besoek, om jou goed en jou tyd te deel.  Jesus sê vir ons in Matt. 9:13: Gaan leer wat dit beteken: “Ek verwag barmhartigheid en nie offers nie” en in Luk. 6:36: “Wees barmhartig soos julle Vader barmhartig is”. Hoeveel “kindness” wil jý ontvang? Dit is hoeveel jy moet gaan uitdeel.
~ Wilna

Dit is nou maar eenmaal ’n feit dat ons as kinders van God ook in lewenstorms kan beland. Ons het egter die versekering dat ons nie sal ondergaan in die storm nie, ons skip sal nié sink nie. Ons kan val, struikel of verdwaal, maar ons het die versekering dat die Here ons altyd weer sal optel en terugbring. Hier is drie beloftes vir ons:
Ps. 34: 20: “ Al word die regverdige deur hoeveel rampe getref, die Here red hom uit almal.”
Spr. 10: 25: “ As die stormwind kom, is die goddelose daarmee heen, maar die regverdige bly altyd staan.”
Spr. 24:16: “Al val die regverdige hoeveel keer, hy staan weer op, maar die goddelose word deur rampe getref.”
~Wilna

Ek het vandag my verjaardag gevier. Ek was só bevoorreg om hordes SMS’e, telefoonoproepe en facebook-boodskappe te kry met gebede en goeie wense. Dit sluit in wense vir strome seëninge, liefde, genade, vrede, vreugde, gesondheid, geluk, voorspoed en bederf. Dan was daar gebede vir wysheid, goeie besluitneming, vermeerdering van kennis, geestelike verdieping, groter diensbaarheid en impak in die lewens van ander. Met soveel opbouende seënwoorde wat oor my uitgespreek is, gaan ek hierdie nuwe lewensjaar in met groot vrymoedigheid, baie hoop en ’n buitengewone verwagting. Vir myself is my verjaardaggebed dat ek die innerlike skoonheid van blywende beskeidenheid en kalmte van gees sal hê. “Hoe mooi is dit nie as ’n vrou sag en vriendelik optree nie! Of ’n vrou nou oud of jonk is, hierdie soort mooiheid kan jy nie van haar af wegvat nie. In God se oë is dit die kosbaarste juwele wat ’n vrou kan dra” (1 Pet. 3:4, Die Boodskap) .... ek soek van daardie juwele vir my verjaardag!
~ Wilna

“U kroon die jaar met U goeie gawes. Waar U ook gaan, is daar oorvloed!” (Ps. 65:12) Ek is oortuig daarvan dat die Here ons elkeen se jaar ook só sal kroon en dat sy goeie gawes in oorvloed op ons as sy kinders sal neerreën in hierdie nuwe jaar. Mag jy dit druppel vir druppel raaksien en op jou vel voel.
~ Wilna

Mens lees op ’n hele paar plekke in die Bybel dat daar een van twee paaie is wat ons kan kies, bv. die breë en die smal weg, die pad van die regverdige of die pad van die goddelose, die pad van die vlees of dié van die Gees, die pad van gehoorsaamheid aan God of die pad waar ek maak wat ek wil, die pad van wysheid of van dwaasheid, God se pad of Mammon se pad, ens. Kies dan vandag wie julle wil dien, sê Jos 24:15, kies aan watter kant jy staan, kies na wie jy luister. As jy God se pad kies, val jy onder die kategorie “regverdige”. Ps. 37 is een van die Bybelgedeeltes wat so mooi uitspel wat die pad en uiteinde van die regverdige is, teenoor dié van die goddelose. Dit sê o.a. dat die Here altyd sorg vir die regverdiges, Hy bepaal hulle koers, Hy ondersteun hulle, as hulle val sal die Here hulle ophelp, in tye van nood en gebrek sal hulle genoeg hê, hulle sal altyd behoue bly, God se openbaring is in hulle hart, hulle het wysheid, hulle het ’n toekoms.... dis die pad wat ek kies!
~ Wilna

Maak met elke Kersgeskenk wat jy oopmaak, ook jou hart oop vir Jesus – laat Hom toe om volle beheer te neem van jou hele hart, liggaam en verstand. Hy het die eerste plek in die heelal, Hy is tot die hoogste eer verhef, Hy sit aan die regterhand van God, Sy Naam is bo elke naam (lees Fil. 2:9-11) – buig jou knie voor Hom en gee Hom daardie eervolle plek in jou hart.
~ Wilna

Spr 18:22 "Wie 'n vrou kry, vind geluk en geniet die goedheid van die Here." 

Is dit nie wonderlike woorde nie! En is dit nie so ongelooflik waar nie?  Maar ek wens ek kon iets byvoeg by daardie woorde.  Iets soos: "...solank hy daardie kosbare geskenk met sy lewe oppas". Jy sien, ons as mense is snaakse goed. Ons sal vra vir die Here vir Sy guns, óf vir finansies, óf werk óf gesondheid, maar sodra ons dit het, vergeet ons dat dit die Here se geskenk was. Sê nou die Here neem alles weg wat ons roekeloos hanteer, wat sal jy oorhê na die einde van vandag? 

My keuse is om my vrou lief te hê en te koester, te versorg en te beskerm, want ek weet sy is 'n geskenk van God.
~ Willem

“Here, na wie toe sal ons gaan? U het die woorde wat ewige lewe gee. En ons glo vas en ons weet dat U die Heilige van God is”. (Joh 6:68). Dit was Petrus se vraag en belydenis. Dit is vandag myne ook. Ek weet daar is niemand en niks anders wat ware lewe, lewe in oorvloed, éwige  lewe kan gee nie. Niemand anders wat elke honger kan stil, elke dors kan les, elke vraag kan antwoord nie. Jesus is die brood, die deur, die weg na die Vader, die Middelaar – wie in Hom glo, hét die lewe.
~ Wilna

Moenie te gou kwaad word nie. ’n Mens wat kwaad word, doen nie wat voor God reg is nie. (Jak 1:19-20). Nou wonder ek of dit dan ’n sonde is om kwaad te word? Daar is darem ’n ander teks in die Bybel wat vir ons so ’n agterdeurtjie oop los, want dit sê AS julle kwaad word, moenie sondig nie en moenie ’n dag kwaad afsluit nie (Ef. 4:26). Lyk darem of kwaad word deel van die lewe is en gelukkig lees ons van ’n hele paar Bybel-ouens wat ook kwaad geword het, hoewel daar vir baie van hulle ’n slegte nadraai was oor hulle kwaad-geit! Ek dink die probleem van kwaad word is dat dit tot sonde aanleiding kan gee, want as mens kwaad is kan jy baie keer nie jouself beheer nie. Dan word daar dinge gesê wat vir ander soos dolksteke is, of jy doen skade aan ’n verhouding, of in die ergste gee jy dalk iemand ’n klap. Ons weet ook dat woede al moord gepleeg het. Spr. 29:11 sê dan ook terg: "’n dwaas gee vrye teuels aan sy woede”. Om kwaad te word is ’n versoeking, wat ons daarná doen, kan óf sonde óf oorwinning wees. Ek gaan maar probeer om nie kwaad te word nie.....
~ Wilna

Het jy ook al gehoor van lagterapie? Jy dwing jouself om te lag sodat jy gelukkiger kan voel! Ek sien die fliekmense se slagspreuk is “your happy place”. As mens om jou kyk dan lyk dit of geluk te vind is in dinge soos ’n goeie werk, ’n mooi huwelik, slim kinders, gawe vriende, ’n groot huis, mooi meubels, skoonheid, ontwerpersklere en juwele, sport, kwalifikasies, roem, bekendheid, oorsese reise, eksotiese vakansies ens. Dit is sekerlik dinge wat kan bydra dat jy gelukkig voel, maar sal dit jou áltyd laat lekker voel? Geluk wat van buiteaf aangeplak word, gaan nie lank hou nie. Ware geluk is dit wat jou hart en gedagtes vul as jy die Here dien. Gelukkig is almal wie se lewe van binne af nuut geword het (Matt. 5:8, Die Boodskap). Vind jou vreugde in die Here! (Ps. 37:4). Vind jou “happy place” by die Here.
~ Wilna

SPREUKE 17:28: “As 'n dwaas nie praat nie, kan selfs hy aangesien word vir 'n wyse, en as hy sy mond toehou, vir 'n verstandige mens.”
‘n Dwaas word uitgeken aan woorde, meer as aan dade. In Spreuke is daar baie tekste wat handel oor dwaasheid en Salomo het ‘n kleintjie dood daaraan. Ek dink nie dwaasheid is noodwendig die teenpool van wysheid nie, want ek dink selfs wyse mense raak soms ‘n klomp dwaasheid kwyt.
Dalk moet ons maar altyd handel in ooreenstemming met hoe ons geskape is. Twee ore en een mond – luister twee maal meer as praat.
Boeta, ek kon al menigmaal my tong sluk!
~ Willem

Onthou jy die Lappop lied?
 … dis ‘n vrot pampoen en ‘n stukkende skoen
 ‘n grammofoon plaat en ‘n kous sonder maat… 

Ek dink ons almal sukkel om te verstaan waar op aarde die “ander” kous altyd beland. Sommer net weg, soms om nooit weer sy verskyning te maak nie. Dit laat my dink aan egskeiding, wanneer twee huweliksmaats soms net uitmekaar uit spat en versoening vind net nie plaas nie.

MALEAGI 2:16  “Die Here die God van Israel sê Hy haat egskeiding. Egskeiding is niks anders as geweld nie, sê die Here die Almagtige. Beheers julle, moenie ontrou wees nie.”

Pas jou kous mooi op, werk elke dag daaraan om seker te maak dat een nie wegraak nie en koester mekaar. Ek sal verseker totaal verlore sonder my “kous” wees, sy is my beste maat, my kollega, my “buddie” en my inspirasie. Ek bid dat die Here nie my kous sal wegvat nie. Ek sal dit nie maak nie!
~ Willem

Lank gelede het Jesus aan die kruis gesterf en betaal vir elke sonde wat ek al gedoen het en nog gaan doen. Maar nóú, vandag, op hierdie oomblik sit Hy aan die regterhand van God en pleit vir my; op hierdie oomblik staan Hy tussen my en God en as ek sondig, dan herinner Hy die Vader daaraan dat die betaling reeds gedoen is en pleit Hy dat ek weer vergewe word. Hy is as’t ware elke oomblik my “aktiewe Verlosser”!  Heb 9:24: Hy het in die hemel self ingegaan om nou ter wille van ons  voor God te verskyn; Rom 8:34: Hy sit aan die regterhand van God, Hy pleit vir ons.
~ Wilna

Ek het hierdie mooi akroniem vir HOPE gelees: Have Only Positive Expectations. Met Jesus in my lewe weet ek dat daar altyd hoop is. Ek moet die hoop  as’t ware met my geestesoog voor my “sien”, ek moet dit vasgryp en myself positief programmeer daarmee. Dié hoop wat die Here ons gee is ’n veilige en onbeweeglike anker, sê die Bybel in Heb 6:19. Dis nie iets van ek “hoop” dit reën vanaand nie, of ek “hoop” ek gaan die eksamen slaag nie. Die hoop-anker wat daar in Jesus is, sal keer dat jy sink of wegdryf, sal keer dat jy teen die rotse geslaan word as daar ’n storm opkom. Al is ’n boom afgekap, is daar hoop dat dit weer sal uitloop en dat sy lote sal aanhou groei. (Job 14;7). Solank daar lewe is, is daar hoop. ’n Hond wat lewe, is beter as ’n leeu wat dood is. (Pred. 9:4). Ek sal nie hooploos lewe nie....
~ Wilna

Ons leef in ‘n wêreld waar eerlikheid al so afgewater is, dat dit eenvoudig deel van ons lewe geword het. Ons almal is skuldig daaraan dat ons graag vinger wys na bedrog in die regering en misdaad oor die algemeen. En “menseregte” maak dat die sisteem selfs growwe oneerlikheid oorsien en die persoon beskerm. Jy word maklik onskuldig bevind op ‘n tegniese punt, bloot omdat daar nie “bo alle redelike twyfel” bewys kan word dat jy verkeerd was nie. Indien elke mens op aarde net een honderd persent eerlik is, was ‘n regstelsel onnodig.
SPREUKE 21:8 “'n Slegte mens loop krom paaie; 'n eerbare mens tree eerlik op.”
Ek en jy val in een van hierdie twee groepe waarvan Salomo hier praat ... as ek myself “eerlik” moet ondersoek, dink ek nie ek vaar te goed nie.
~ Willem

Wanneer jy die regte koers verlaat, sal jy agter jou 'n stem hoor sê: “Hier is die pad, loop hierlangs.” (Jes 30:21) Dit klink mooi, maar wat van daardie dag wat jy by ‘n kruispad staan en jy wag, maar jy hoor nie daardie duidelike stem om vir jou te sê watter kant toe nie, wanneer jy voor ‘n keuse staan en vra: moet ek of moet ek nie? Jy mag dalk sê: ek mag enige iets doen, ek is volwasse, ek is vry, alles is my geoorloof. In 1 Kor 6:12 en 1 Kor 10:23 is daar drie vrae wat mens kan help in keuses:
(1) is wat ek wil doen heilsaam (m.a.w. is dit goed vir my, sal dit my gelukkig maak, is dit werklik nuttig?)
(2) kan dit lei tot verslawing?
(3) is dit werklik opbouend?
As jou antwoorde ja, nee, ja is, kan jy met ‘n geruste hart daardie pad vat en die Here sal jou seën!
~ Wilna

Ai-oh, ai-oh, and off to work I go…
Jip, soos elke dag is dit maar ons almal se lot. Is dit regtig ‘n “lot”? Wel, dit hang seker af met watter gesindheid jy hierdie dag aangepak het. Gaan jy werk toe omdat jy voel jy is iemand se slaaf, of omdat jy glo jy voeg waarde toe tot Suid Afrika, die ekonomie en ook jou eie menswees? En dit my liewe vriend, is jou keuse. Werk is nie ‘n uitvloeisel van die sondeval (soos sommiges dink) nie, want die opdrag om die aarde te bewoon en te bewerk was vir Adam gegee toe God hom geskep het.
Jy kan jou half dood werk omdat jou werk dit vereis, of jy kan dit ook doen uit gierigheid. Die Here het net die antwoord vir ons vandag in Ps 37:3 “Vertrou liewer op die Here en doen wat goed is, woon en werk rustig voort”.
~ Willem

ERFENIS DAG
MATTEUS 19:29 En elkeen wat ter wille van my Naam afgesien het van huise of broers of susters of vader of moeder of kinders of grond, sal honderd maal soveel ontvang en die ewige lewe as erfenis kry.

 EFESIËRS 1:18 Ek bid dat Hy julle geestesoë so verhelder dat julle kan weet watter hoop sy roeping inhou, en watter rykdom daar is in die heerlike erfenis wat Hy vir die gelowiges bestem het.

 HEBREËRS 9:15 Daarom is Hy ook die Middelaar van 'n nuwe verbond. Sy dood het plaasgevind om mense te verlos van die oortredinge wat onder die eerste verbond begaan is, sodat dié wat geroep is, die beloofde ewige erfenis kan ontvang.

 1 PETRUS 1:4 op die onverganklike, onbesmette en onverwelklike erfenis wat in die hemel ook vir julle in bewaring gehou word.

'n Erfenis word nie verdien nie. Dis 'n uitvloeisel van dit wat iemand vir 'n nageslag agterlaat omdat die afgestorwene niks meer met die goedere kan doen nie. So het Jesus gesterf, nie vir homself nie maar vir jou en my wat die VOLLE erfenis onverdiend ontvang. Jesus kan absoluut niks met die Saligheid doen wat Hy bewerkstellig het nie. Dit behoort aan my en jou en elkeen wie se naam in die Boek van die lewe (testament) opgeteken staan.
~ Willem

Die Here laat U-draaie toe. Altyd! As jy uitvind jy is op die verkeerde pad kan en móét jy omdraai. Die Here spesialiseer in tweede kanse, Hy gee nooit op met ons nie. As jy val is Sy hand daar om jou op te help, as jy in ’n donker gat is, kom Hy soontoe om jou daar te kom haal, as jy in die varkhok rondploeter, staan Hy met genadige, oop arms en wag vir jou om terug te kom. “Sal iemand val en nie opstaan nie, of wegdraai en nie terugdraai nie?” (Jer. 8:4) Kom terug na die Here julle God toe: Hy is genadig en barmhartig; Hy is lankmoedig en vol liefde. (Joël  2:13), Hy sál jou weer laat opstaan (Ps 37:34) .
~ Wilna

Miga 6:6 vra: “Wat sal ek saamvat as ek na die Here toe gaan, as ek voor die hoë God gaan kniel?” Ek het toe ook gewonder wat ek Hom kan aanbied. Ek weet die Here sê hy soek nie my goeters as ’n offer nie. Die offer wat Hy vra is lof (Ps. 50:4), gehoorsaamheid (Ps. 40:7), verootmoediging (Ps. 51:19), barmhartigheid (Matt. 9:13), regverdigheid, liefde, trou en bedagsaamheid (Miga 6:8). Ek glo die offer wat Hy eintlik van my wil hê is myself, my lewe, my hele ek – en dis wat ek vandag opnuut weer op Sy altaar kom aanbied. “Gee julleself as lewende en heilige offers wat vir Hom aanneemlik is” (Rom 12:1)
~Wilna

Ek wil nie op myself, my eie insig en my eie krag staatmaak nie. Ek wil nie meer sê: “Ek SAL self” nie. Ek KAN nie self nie. Ek HOEF nie self nie. Ek MOET nie self nie. Ek MAG nie self nie.  Ek sê nou: All my life and all my needs, all my ways and all my deeds …  I surrender all.

Vertrou volkome op die Here en moenie op jou eie insigte staatmaak nie (Spr 3:5)
~ Wilna

Dit was die bedoeling van God in sy wysheid dat die wêreld nie deur geleerdheid tot kennis van God sou kom nie. Daarom het God in sy goedheid besluit om deur die prediking wat vir die wêreld onsin is, dié te red wat glo. 1 Kor. 1:21
 Ons wonder soms hoekom van die slimste mense – wetenskaplikes, professore, selfs ex-predikante – dan nie glo wat in die Bybel staan nie, en niks van God wil weet nie. Hierdie teks vertel egter vir ons dat dit presies is wat ons moet verwag. Sonder dat hierdie ongelowiges dit besef, bewys hulle dus die Bybel se inhoud korrek.
 Maar nou praat Paulus van “onsin”. Wel, dit klink absoluut onsinnig dat een Persoon vir die hele wêreld kan sterf, maar dis waar die geloof inkom en daarna bevestig die Gees dit in jou hart. Mens kan egter nou vra of hierdie nie ‘n “hoender eier” situasie is nie. Miskien wel, maar mense wat die Here as Saligmaker aanneem, is nooit teleurgesteld nie! Worth a try, of hoe?
~ Willem

Say a quiet yes to God and He'll be there in no time (Jak 4:8, Message). Hoe maklik is dit nie om die Here aan te roep nie! Geen lang sinne, geen perfekte teologiese samestelling nie, geen pragtige poëtiese taal nie, geen stortvloed van woorde nie, net ’n sagte uitroep daar in jou binnekamer, en Hy sal hoor. Hier is ’n paar voorbeelde uit die Bybel van sulke kort gebede wat lank genoeg was:
Here red my (Petrus in Matt. 14:30)
Wees my sondaar genadig (Die tollenaar in Luk. 18:13)
Dink aan my wanneer U in u koninkryk kom (Misdadiger langs Jesus aan die kruis in Luk. 23:42)
Here, as U wil, kan U my gesond maak (Die melaatse in Luk. 5:13)
Jesus seun van Dawid, ontferm U oor my (Die blinde man by Jerigo in Luk. 18:38) 
~ Wilna

"Figure out what will please Christ, and then do it" (Eph 5:10) Toe ek hierdie vers in die Message Bybel lees, het ek besef dat dit seker dié doel en roeping van my lewe moet wees om die Here te plesier en te behaag, om Hom te laat glimlag. Uit die Purpose Driven Life – boek onthou ek dat daar 5 goed genoem is wat die Here oor my sal laat glimlag: as ek Hom boweal liefhet, as ek Hom met my lewe vertrou, as ek Hom voluit gehoorsaam, as ek Hom dank en prys met my hele hart en as ek my vermoëns ten volle benut.  Mag ons vandag só leef dat die Here sal glimlag!
~ Wilna

Here, U kyk of ek eerlik is en vertrou kan word.
U weet wat gaan hier binne-in my aan.
Ek kan niks wat ek doen vir U wegsteek nie.
Nog voordat ek iets doen, weet U wat dit gaan wees.
Of ek by die huis bly en of ek rondloop, daar is niks wat ek vir U kan wegsteek nie.
U weet alles wat ek doen.
Al het ek nog nie eens begin praat nie, U weet wat ek gaan sê. U ken my deur en deur.
U beskerm hy hele lewe.
Ek kan dit glad nie verstaan nie, al probeer ek. Dit is te oorweldigend.
(Ps 139:1-6 Die Boodskap)
~ Willem

1 Kor. 14:1 sê julle moet die liefde nastreef. Ek “toets” myself partykeer hieraan deur die woord “liefde” in 1 Kor. 13:4-6 te vervang met my eie naam. Dit klink dan min of meer só: Wilna is geduldig, Wilna is vriendelik; Wilna is nie afgunstig nie, Wilna is nie grootpraterig nie, Wilna is nie verwaand nie. Wilna handel nie onwelvoeglik nie, sy soek nie haar eie belang nie. Wilna is nie liggeraak nie, Wilna hou nie boek van die kwaad nie; Wilna verbly haar nie oor onreg nie, maar verheug haar oor die waarheid..... kry ek dit alles reg? Nee, ongelukkig nie, maar ek besluit nou maar net weer van vooraf om aan te hou probeer, om my in te span en daarna te streef.
~ Wilna

1 Sam 25:29: You are safe in the care of the Lord your God, secure in His treasure pouch. Hierdie woorde was vir Koning Dawid gesê, maar as kind van God vat ek dit ook vir my persoonlik. Ek weet Hy sorg vir my, Hy hou my veilig en ek het die waarborg dat ek vasgemaak is aan Hom, dat ek kosbaar en belangrik is vir Hom. Daar in sy treasure pouch is ook alles wat ek nodig mag hê om vandag te oorleef: al my lewensmiddele, wysheid en kennis, lewenskrag en moed, gesondheid en toekomsvisie. Daar word my moedeloosheid opgelig, kry ek raad, gaan die lig weer aan en maak alles weer sin. Daar kan ek onbekommerd, veilig, gerus en tevrede wees.
~Wilna

Ek het vandag, aangesien dit vrouedag is, gewonder wie my gunsteling vrou in die Bybel is. Dalk Abigail, van wie daar in 1 Sam 25:3 gesê word dat sy mooi was en ’n goeie verstand gehad het? Dalk die ou vrou Anna wat God dag en nag in die tempel aanbid het? Dalk Jesus se ma Maria, wie sê: Ek is tot beskikking van die Here? Miskien Debora, want sy was ’n sterk leier, ’n profeet, ’n raadgewer, instrument in God  se hand? Wat van Dorkas wie altyd besig was om goed te doen en die armes te help? Of Elisabet wat saam met haar man onberispelik al die Here se gebooie en voorskrifte nagekom het? Of Febe, ’n ware vriendin en steunpilaar. Wat van Hanna wat so opreg gebid het of Esther wat alles gedoen het om die koning te behaag? Dalk die Maria wat nie omgegee het wat die mense van haar dink toe sy haar hare losgemaak en kosbare olie op Jesus uitgegiet het, of dié Maria wat net by Jesus se voete gesit en luister het na sy leringe? Ek hou ook van Miriam wat op haar tamboeryn geslaan het en die vroue in lofprysing gelei het. Vergeet ook nie van Ragab wat ten spyte van haar agtergrond ’n rol gespeel het in die verloop van die geskiedenis nie. Of is my gunsteling vrou dié een by die put wat die lewende water wat Jesus gratis aanbied vat en drink en lewe? Ek weet nie watter een nie.... maar ek bid dat ek ’n vrou na God se hart sal wees.
~Wilna