Hierdie goed het saakgemaak, mense se toekoms verander. Daar is daaroor geskryf, films gemaak, daaroor gefilosofeer, dis ontleed, daar is daaruit geleer. Wat voor ons tyd gebeur het, sal steeds na ons tyd ‘n invloed hê. Sommige hiervan herdenk ons en vier ons, van ander wil ons liewers vergeet. Soweto-dag word deur duisende gevier, terwyl duisende ander daarvan wegdeins; nogtans kan ons dit nie wegwens nie. Dit is soos ‘n stempel met onuitwisbare ink wat op ons afgedruk is.  

Ek het hierbo ‘n paar groot gebeurtenisse genoem, en almal weet waarvan ek praat, al het ek nie een van hierdie gebeurtenisse se datum onthou of genoem nie. Die datum maak nie saak nie; dit is die gebeurtenis wat saak maak. 

Matt 1:18-25

Hier volg nou die geskiedenis van die geboorte van Jesus Christus. Toe sy moeder Maria nog aan Josef verloof was, het dit geblyk dat sy swanger is sonder dat hulle gemeenskap gehad het. Die swangerskap het van die Heilige Gees gekom. Haar verloofde, Josef, wat aan die wet van Moses getrou was maar haar tog nie in die openbaar tot skande wou maak nie, het hom voorgeneem om die verlowing stilweg te verbreek. Terwyl hy dit in gedagte gehad het, het daar 'n engel van die Here in 'n droom aan hom verskyn en gesê: “Josef seun van Dawid, moenie bang wees om met Maria te trou nie, want wat in haar verwek is, kom van die Heilige Gees. Sy sal 'n Seun in die wêreld bring, en jy moet Hom Jesus noem, want dit is Hy wat sy volk van hulle sondes sal verlos.” Dit het alles gebeur sodat die woord wat die Here deur sy profeet gesê het, vervul sou word: “Die maagd sal swanger word en 'n Seun in die wêreld bring, en hulle sal Hom Immanuel noem.” Die naam beteken God by ons. Toe Josef uit die slaap wakker word, het hy gemaak soos die engel van die Here hom beveel het en met haar getrou. Hy het egter nie met haar omgang gehad voordat sy haar Seun in die wêreld gebring het nie. En Josef het Hom Jesus genoem.

Hier lees ons van die heel belangrikste gebeurtenis ooit. Die presiese datum is egter onbekend. ‘n Gebeurtenis wat aan bykans elke mens op aarde bekend is, aan biljoene bekend was, en aan biljoene bekend gemaak sal word in die toekoms. ‘n Gebeurtenis wat so ‘n groot impak gemaak het in die mens se geskiedenis dat miljoene se lewens nie net verander is nie, maar steeds verander word. Jesus wat mens kom word op aarde. Gebore uit ‘n maagd – dit klink onmoontlik. Hy leef en woon vir 33 jaar op aarde, en word toe gekruisig – dié gebeurtenis wat nie net die mense se toekoms op aarde verander nie, maar sy toekoms in die ewige, tydlose hiernamaals. Hierdie gebeurtenis bring mense saam, dit word in flieks weergegee, en is dié onderwerp waaroor meer geskryf is alle ander onderwerpe op aarde. Dis gróót! Dis onbeskryflik groot!

Ons weet nie wat die presiese datum van hierdie gebeurtenis is nie, maar op die 25ste Desember word dit gevier deur sommiges. En ja, die ongelowige wêreld maak ook iets daarvan – dalk iets verkeerd; vir gelowiges egter is dit ‘n baie belangrike dag. Nie almal kies om dit te vier nie, en dis hulle reg.  Ek kies egter om dit te vier; ek het so grootgeword. Dit feit dat die Heidende dit gekaap het en iets verkeerd daarvan gemaak het, laat my absoluut koud. Party mense gaan nie kerk toe nie, want die plek is kwansuis vol huigelaars, maar ek gaan steeds (ek moet gaan, want ek is ook ‘n huigelaar). Nou wil ek vir jou vra, as jy Kersfees vier, moet asb nie ander veroordeel wat besluit om dit nie te vier nie. Sommige besluit so uit diep gewortelde geloofsoortuiging. ‘n Goeie vriend sê hulle vier in hierdie tyd die fees van die ligte, wat ‘n gebruik was in Jesus se tyd, en hulle vind wonderlike vervulling daarin. Ander mense voel die wêreldse geharwar maak hulle moeg en daarom vier hulle nie Kersfees nie – en dit is ook reg. Maar moenie mense veroordeel wat dit wel vier nie. Hulle doen dit uit diep gewortelde geloofsoortuiging.

Ten spyte van die “verkeerde” datum is dit vir baie ‘n tyd om op ‘n besondere manier Jesus se geboorte te herdenk. En ja, die geskenke storie dryf my ook teen die mure uit en ek probeer om die gewoonte af te skaf buite my gesin, want ons koop goed wat hierdie jaar in die laai beland, en volgende jaar in die bediende se huis. Ek haat dit! Maar ai, as iemand vir my ‘n ou boxie sjokolade gee, is ek maar al te dankbaar. Kom ons respekteer mekaar se standpunte hieroor, asseblief?

Kom ek vertel jou hoekom ek Kersfees vier: