As
ek vir jou sê "olie", waaraan dink jy? Daar is baie tipes olie wat
daagliks deel van ons lewe uitmaak: motorolie, badolie, sonbrandolie,
kookolie, ens. Nogal 'n belangrike vloeistof met belangrike funksies.
Een wat nogal baie belangrik is, is motorolie. En daarom moet ons
gereeld die olie vlak in die motor toets, anders kry ons baie skade.
Jesus gebruik olie in 'n baie belangrike gelykenis:-
Matt 25 : 1 - 13 " Dan sal
dit met die koninkryk van die hemel gaan soos met tien meisies wat
hulle lampe gevat het om die bruidegom te gaan inwag. 2 Vyf van
hulle was onverstandig en vyf verstandig. 3 Die onverstandiges het
hulle lampe gevat maar nie ekstra olie met hulle saamgevat nie, 4
terwyl die verstandiges saam met hulle lampe ook nog olie in houers
gevat het. 5 Toe die bruidegom lank wegbly, het hulle almal vaak
geword en aan die slaap geraak. 6 In die middel van die nag was daar
'n geroep: "Hier kom die bruidegom! Gaan hom tegemoet!" 7 Toe staan
al die meisies op en maak hulle lampe reg. 8 Die onverstandiges sê
toe vir die verstandiges: "Gee vir ons van julle olie, want ons
lampe gaan dood." 9 Maar die verstandiges antwoord: "Nee, daar is
nie genoeg vir ons en vir julle nie. Gaan liewer winkel toe en koop
vir julle olie." 10 Terwyl die onverstandiges olie gaan koop het,
het die bruidegom gekom. Dié wat gereed was, het saam met hom
ingegaan na die bruilof toe, en die deur is gesluit. 11 Later kom
die ander meisies ook daar aan en roep: "Meneer, Meneer, maak vir
ons oop!" 12 Maar die bruidegom antwoord: "Ek sê vir julle: Ek ken
julle nie!" 13 Waak dan, omdat julle nie weet op watter dag en uur
dit sal gebeur nie."
Tien meisies - vyf verstandig en vyf onverstandig.
Vyf wat gesorg het dat hulle genoeg olie gehad het en vyf wat
roekeloos daarmee omgegaan het. Die vyf verstandiges het hulle olie
vlak dopgehou en het selfs ekstra saamgeneem en vyf wat nie die
gevaar besef het van 'n tekort aan olie nie. Soos die goedige gespot
tussen die 4x4 manne. As die motor olie lek, beteken dit ten minste
dat daar nog olie in is.
Twee groepe meisies, wat twee groepe mense in die
samelewing verteenwoordig. Een groep met genoeg voorraad en een
groep wat roekeloos deur die lewe gaan, en net glo dat voorraad nie
nodig is nie. Vyf meisies wat gereed wag, en vyf wat onvoorbereid
is.
Die gelykenis van die tien meisies is absoluut
tekenend van die tye van vandag. Wat was die betekenis van hierdie
gelykenis? Eenvoudig:- 'n Verwagting dat Jesus weer gaan verskyn.
Kom ons staan stil by die vyf onverstandiges. Dit verteenwoordig
mense wat roekeloos in hulle verhouding met God is. Mense wat lewe
asof daar nie 'n wederkoms, of 'n hiernamaals is nie. Wat
interessant is, is dat hierdie vyf onverstandige meisies ook vir die
bruidegom gaan wag het. Dit is dus nie mense wat God totaal wegstoot
nie. Hierdie meisies het ook gewag, saam met die verstandiges. Hulle
is nie die wat per definisie heeltemal verlore is nie. Hulle was
daar waar die bruidegom sou verskyn. Maar toe loop dinge skeef. Vers
5 sê "Toe die bruidegom lank wegbly, het hulle almal (al tien) aan
die slaap geraak". Toe kom die bruidegom. In die middel van die nag
kom die bruidegom, toe almal slaap. Onverwags. Sonder waarskuwing.
En toe kom die GROOT verrassing! Dit was toe al die tyd nie net 'n
storie nie. En toe is dit te laat. Al die gespartel om olie te kry
maak toe dat hulle die hele einddoel van hulle bestaan mis.
Matt 7 : 21 - 23 " Nie
elkeen wat vir My sê: "Here, Here," sal in die koninkryk van die
hemel ingaan nie, maar net hy wat die wil doen van my Vader wat in
die hemel is. 22 Baie sal daardie dag vir My sê: "Here, Here, het
ons dan nie in u Naam gepreek nie, deur u Naam bose geeste uitgedryf
en deur u Naam baie wonders gedoen nie?" 23 Dan sal Ek openlik vir
hulle sê: Ek het julle nooit geken nie. Gaan weg van My af, julle
wat die wet van God oortree."
Klink nogal bekend, of hoe?
Dan was daar die verstandige meisies. Hulle was
ernstig oor hulle verwagting van die bruidegom. Hulle het gewag,
maar met die regte voorraad. Want hulle het geweet Hy kom. Hulle het
'n verwagting gehad, want hulle het geglo Hy gaan kom. En hoewel
hulle aan die slaap geraak het, was hulle heeltemal voorbereid op Sy
koms. Hoekom het hulle nie hulle olie gedeel nie? Want olie in ons
geloofslewe is 'n verhouding tussen ons en God. Hulle olie was die
paspoort tot die bruilofsmaal. En kon nie gedeel word nie.
So is mense wat vandag met 'n verwagting uitsien na
die bruilofsmaal. Onthou jy hoe 'n troue was toe jy klein was? Die
opgewondenheid, rondhardloop met jou pak klere of pienk
frilletjiesrok tussen die mense wat dans. O, en die kos, lekker!
Mense wat uitsien na Jesus se wederkoms, is mense wat besef dat dit
'n GROOT gebeurtenis is. Iets wat hulle net nie wil mis nie! So
belangrik, dat die olie in kanne saamgedra word. Elke dag orals. Wel
wetende dat dit nog lank kan vat, of more kan wees. Mense wat nie
staat maak op ander se olie nie, maar slaggereed is vir die
onvoorsiene. Mense wat nie moedeloos gewag is nie.
2 Petr 3 : 3 - 11 " Veral
moet julle weet dat daar in die laaste dae mense op die toneel sal
verskyn wat die spot dryf en wie se lewe net deur hulle eie
begeertes beheers word. Hulle sal spot 4 en sê: En wat het nou
geword van die belofte van sy wederkoms? Ons vaders is al dood, en
tog bly alles nog net soos dit was van die begin van die skepping af.
5 Hiermee vergeet hulle moedswillig dat daar lank gelede 'n hemel en
'n aarde was wat deur die woord van God uit water en deur water
ontstaan het. 6 En dit is ook deur water dat die wêreld van daardie
tyd oorstroom is en vergaan het. 7 Maar die hemel en die aarde van
vandag is bestem en word bewaar vir die vuur, ook deur die woord van
God, en word in stand gehou tot op die dag waarop die goddelose
mense veroordeel en verdelg sal word. 8 Een ding moet julle egter
nie vergeet nie, geliefdes: vir die Here is een dag soos duisend
jaar en duisend jaar soos een dag. 9 Die Here stel nie die
vervulling van sy belofte uit nie, al dink party mense so. Nee, Hy
is geduldig met julle, omdat Hy nie wil hê dat iemand verlore gaan
nie: Hy wil hê dat almal hulle moet bekeer. 10 Maar die dag van die
Here sal so onverwags soos 'n dief kom. En op dié dag sal die hemel
met 'n groot gedruis verdwyn, die hemelliggame brand en tot niet
gaan, en die aarde met alles wat daarop is, vergaan. 11 Aangesien al
hierdie dinge so aan hulle einde gaan kom, moet julle des te meer
vroom en aan God toegewy lewe."
'n Paar punte rondom hierdie gelykenis:-
1. Verstandiges - Die wat skoon, toegewyd en in
afhanklikheid van God leef.
2. 'n Klomp mense in die kerk is dwaas, en gee nie om nie.
3. Die bruidegom is Jesus Christus, en Hy kom weer, verseker.
4. Die verstandiges is die kinders van die lig.
5. Die onverstandiges se lampe het net vir die skyn gebrand, om te
be-indruk, maar hulle was vals.
6. Ons harte is die oliehouers. Die olie is genade, 'n verhouding
met God, intimiteit met God, 'n diepe kennis. Om waaragtig vir Jesus
aan te neem as Saligmaker.
7. Mense raak moedeloos gewag, en raak aan die slaap. Gebrek aan
geloof!
8. Net een geroep! "Die Bruidegom kom". Toe is dit te laat! Kan ek
en jy sê ons het nie geweet nie? Nee! Want ons het die Bybel. Hang
net af of ons dit glo.
9. Mense glo daar is dalk nog tyd op nommer 99. Maar daar is nie!
Hoekom Russian roulette speel?
10. Mense glo dat ander hulle saligheid kan bewerkstellig, maar dit
werk nie so nie.
11. Om olie te koop, en jou kannetjie vol te hou, neem tyd. Tyd saam
met God, en medegelowiges.
12. Jy het net een kans om in die hemel te kom. NET EEN!!
13. Jesus het die weg gebaan. Reeds, dis gedoen, volbring,
Tetelestai. Maar ek en jy moet die olie vol hou.
Om af te sluit: Daar is 'n hemel, of jy dit glo of
nie. Daar is 'n hel, of jy dit glo of nie. Daar is 'n God, of jy dit
glo of nie. Daar is 'n Satan, of jy dit glo of nie. Daar is 'n weg
tot Saligheid, of jy dit glo of nie. Daar is 'n weg tot die verderf,
of jy dit glo of nie. Daar is een metode, of jy dit glo of nie. En
daardie metode is Jesus, of jy dit glo of nie.
Wees gereed, hou die oliekan vol. Leer ander om hulle
kanne vol te hou. Sien met 'n verwagting uit, want die beloning is
HEMELS!!
|