Die
Here verander nooit. Hy is gister, vandag en môre dieselfde, daarom
glo ek Hy is elke dag nog besig om nuwe mense op te soek, konstant
besig om aan harte te klop, om mense te red, en so sy kudde uit te
brei. Hy soek daagliks verlore skape - dié wat weggedwaal het, of
dié wat nog nooit deel van die kudde was nie. Hy soek en roep mense
uit elke volk, taal, stam en nasie.
Joh 4:1-9 Die Fariseërs het gehoor dat Jesus meer
dissipels maak en doop as Johannes. - Eintlik was dit nie Jesus wat
gedoop het nie, maar sy dissipels. - Toe Jesus dit verneem, het Hy
Judea verlaat en weer na Galilea toe gegaan. Hy moes deur Samaria
gaan. Hy kom toe by 'n dorp in Samaria met die naam Sigar, naby die
stuk grond wat Jakob aan sy seun Josef gegee het. Die fontein van
Jakob was daar, en Jesus het toe, omdat Hy moeg was van die reis,
sommer by die fontein gaan sit. Dit was omtrent twaalfuur die middag.
Daar kom toe 'n Samaritaanse vrou water haal, en Jesus vra vir haar:
"Gee My 'n bietjie water om te drink." Sy dissipels was intussen weg
dorp toe om te gaan kos koop. Die Samaritaanse vrou sê toe vir Hom:
"Hoe vra jy, wat 'n Jood is, vir my, 'n Samaritaanse vrou, water om
te drink?" Die Jode en die Samaritane gaan immers nie met mekaar om
nie.
Wat ons hier sien, is Jesus wat besig is om te
evangeliseer. Hy gebruik 'n alledaagse gebeurtenis om iemand tot
redding te bring.
Dit is nogal 'n interessante toneel wat hier afspeel.
Jesus, 'n Joodse man, begin 'n gesprek met 'n alleenloper vrou, maar
méér nog, 'n Samaritaanse vrou en .. "die Jode en Samaritane gaan
immers nie met mekaar om nie". Dit klink nogal bekend: die rykes
gaan immers nie met die armes om nie, die mense van die Ooste nie
met die van die Weste nie, Afrikaanse mense nie met Engelse mense
nie, Blankes nie met Swartes nie, die prokureurs nie met die
stoormanne nie, ens. Nee, nie Jesus nie, Hy SOEK 'n aanknopingspunt:
"Gee My 'n bietjie water om te drink". Jesus soek dikwels 'n
aanknopingspunt met ons om ons aandag te kry. Soms is dit nie op 'n
manier wat ons verstaan nie, soms is dit deur seer- of swaarkry. Hy
soek ons aandag sodat Hy vir ons van Sy lewende water kan aanbied.
Joh 4:10-15 Jesus het haar geantwoord: "As jy
geweet het wat God gee, en wie dit is wat vir jou sê: 'Gee My 'n
bietjie water om te drink,' sou jy Hom gevra het, en Hy sou vir jou
lewende water gegee het." Jesus het haar geantwoord: "As jy geweet
het wat God gee, en wie dit is wat vir jou sê: 'Gee My 'n bietjie
water om te drink,' sou jy Hom gevra het, en Hy sou vir jou lewende
water gegee het." Die vrou sê toe vir Hom: "Meneer, jy het nie eens
'n skepding nie, en die put is diep. Waar gaan jy die lewende water
vandaan kry? Jy is tog nie tot meer in staat as ons voorvader Jakob
wat hierdie put vir ons gegee het en self saam met sy seuns en sy
diere daaruit gedrink het nie?" Maar Jesus antwoord haar: "Elkeen
wat van hierdie water drink, sal weer dors kry; maar wie van die
water gedrink het wat Ek hom sal gee, sal in alle ewigheid nooit
dors kry nie. Nee, die water wat Ek hom sal gee, sal in hom'n
fontein wees met water wat opborrel en vir hom die ewige lewe gee."
Die vrou het vir Hom gesê: "Meneer, gee vir my van daardie water,
sodat ek nie weer dors sal kry en hier hoef te kom water haal nie."
Dit is vir my interessant dat Jesus eers die
waarheid aan haar verduidelik voordat Hy Homself openbaar.
Ons as mense is voortdurend soekend … ons soek op
verskillende maniere, op verskillende plekke, en ons raak so verward
tussen alles wat ons hoor en sien, dat ons sukkel om God se stem uit
te ken tussen al die geraas. Of dalk het ons dieselfde probleem as
die Samaritaanse vrou, nl. dat ons God nie KEN nie … "As jy geweet
het wie dit vir jou sê .."
Ek lees tans die gewraakte boek "The God Delusion"
van die aards ateïs, Richard Dawkins, en besef dat hierdie man in sy
verlorenheid alles doen om God weg te wens en weg te redeneer. Hy
skryf boeke, maak TV-reekse, maar weier om te vra vir die lewende
water. Hierdie man is só dors, en probeer om die hele wêreld saam
met hom van die dors te laat omkom, maar hy weier die lewende water.
In die proses maak hy soveel geraas dat mense sukkel om God se stem
te hoor. Jesus se belofte en uitnodiging, ja, ook vir die ateïs:
"Elkeen wat van hierdie water drink, sal weer dors kry; maar wie van
die water gedrink het wat Ek hom sal gee, sal in alle ewigheid nooit
dors kry nie." (vers 13 & 14)
Joh 4:16-24 Hy sê toe vir haar: "Gaan roep jou
man en kom terug hierheen." Die vrou het Hom geantwoord: "Ek het nie
'n man nie." En Jesus sê vir haar: "Dis reg wat jy nou gesê het: 'Ek
het nie 'n man nie. Jy het reeds vyf gehad, en die een wat jy nou
het, is nie jou man nie. Jy het die waarheid gepraat." Die vrou het
vir Hom gesê: "Meneer, ek sien dat u 'n profeet is. Ons voorouers
het God op hierdie berg aanbid, en tog sê julle die plek waar 'n
mens God moet aanbid, is in Jerusalem." Jesus sê toe vir haar: "Glo
My, Mevrou, daar kom 'n tyd wanneer julle die Vader nie op hierdie
berg en ook nie in Jerusalem sal aanbid nie. Julle aanbid sonder om
te weet wat julle aanbid; ons weet wat ons aanbid, want die
verlossing kom uit die Jode. Maar daar kom 'n tyd, en dit is nou,
wanneer die ware aanbidders die Vader deur die Gees en in waarheid
sal aanbid, want die Vader wil juis hê dat die mense wat Hom aanbid,
dit so moet doen. God is Gees, en dié wat Hom aanbid, moet Hom deur
die Gees en in waarheid aanbid."
Dit lyk asof Jesus die Samaritaanse vrou toets met "Gaan
roep jou man". Sy erken sy het nie 'n man nie. Sy het reeds vyf
gehad en die een wat sy nou het, is nie haar man nie. Sy het 'n man
in haar lewe, maar dis nie HAAR man nie. Sy is seker besig om op een
of ander sondige manier met hierdie man om te gaan. Jesus sê dan vir
haar dat sy die waarheid gepraat het, en dat die tyd gekom het dat
God in gees en in waarheid aanbid moet word. Dalk het God vandag vir
ons ook hierdie vraag: "Aanbid jy My in waarheid?" Jesus wou dalk hê
dat die vrou eers die verkeerde dinge in haar lewe raaksien en erken
… ek glo dit is beslis wat Jesus vir my en vir jou wil hê, sodat ons
Hom in Gees en in waarheid kan aanbid. Kom ons ondersoek ons harte
en ruim ons lewens op en kom om versadig te word deur die lewende
water.
Jesus sê: "Dit is Ek, Ek wat met jou praat". Wat
bied die wêreld vandag vir ons aan? Materialisme? Twyfel? Wanhoop?
Verkeerde genot? 'n Tydelike, leë, nuttelose lewe sonder enige
kwaliteit? 'n Rotresies, gejaag na wind? Jesus bied iets anders:
water, lewende water. Water wat ons Geestelike dors TOTAAL les.
Water wat ewige lewe gee … meer as wat enige wêreldse stelsel of
persoon kan aanbied. Wat is die voorwaarde? … dat ons Hom in Gees en
waarheid sal aanbid.
Joh 4:25 "Ek weet dat die Messias kom, Hy wat ook
die Christus genoem word. Wanneer Hy kom, sal Hy alles aan ons
bekend maak." Hierdie vrou het 'n verwagting gehad en sy het die
profete van die tyd geglo, al was sy 'n Samaritaan. EN sy het Jesus
geglo toe Hy sê: "Dit is Ek, Ek wat met jou praat" … glo JY Hom?
|