Ons
het al dikwels vir mekaar gesê dat daar op geestelike vlak twee
uiterstes is. Aan die een kant sien ons hoe honger mense is vir
geestelike opbou, belewenisse en geestelike diepte. Aan die ander
kant is daar mense wat openlik 'n bespotting van God maak, wat dié
wat deelneem aan geestelike aktiwiteite en geestelike herlewing
verkleineer en bespot. Een groep geestelik warm, die ander groep
yskoud, verlore, geestelik afgestomp. Dié in groep een is geensins
volmaak nie, maar tog is hulle mense wat die Here aanroep, en deel
word van Sy Koninkryk. Die ander groep het totaal téén God gekies,
en is op pad hel toe … tensy hulle êrens stop en omdraai. Almal het
'n kans, maar die gedagte van die sonde teen die Heilige Gees kom by
my op. Tussen die warm en die koue groep is daar nog 'n groep
waarteen die Here ernstig waarsku, en dit is geestelike louheid of
blindheid.
Openb 3:14-22 (Die Boodskap)
Skryf die volgende brief aan die leier van die gemeente in
Laodisea: Die Een wat waarborg dat dinge sal wees soos dit moet wees,
het vir julle 'n boodskap. Wat Hy sê, kan julle maar glo, en alles
wat Hy sê of doen, is waar. Dit is soos God dit wil hê. Jesus is die
Een wat die skepping van God aan die gang gesit het. Dit is Hy wat
nou met julle praat. Julle kan niks vir my wegsteek nie. Ek weet wat
julle doen en Ek is glad nie tevrede nie. Julle is nie koud nie,
maat ook nie warm nie. Was julle tog maar een van die twee! Nou is
julle tussenin, so louerig. Ek hou niks daarvan nie. Om die waarheid
te sê, as julle so aanhou, sal Ek later niks meer met julle te doen
wil hê nie. Julle is nogal die mense wat dit waag om te spog. "Kyk
hoe ryk is ons," sê julle. "Kyk hoe gaan ons vooruit. Ons het niks
van niemand nodig nie, want kyk net wat het ons alles!"
Ai. Al hierdie gespog maak dat julle heeltemal blind is vir hoe
pateties dit regtig met julle gaan. 'n Mens wil eintlik sommer oor
julle aan die huil gaan. Kyk net hoe lyk julle: julle is geestelik
brandarm en bankrot. Boonop besef julle dit nie eens nie, want julle
is soos blindes. Laat Ek julle goeie raad gee: kom koop geestelike
goud by My en kom vind uit hoe dit voel om iets te hê wat regtig die
moeite werd is. Kom kry by My behoorlike geestelike klere en trek
dit aan. Dan hoef julle nie meer uit verleentheid te probeer
wegsteek dat julle eintlik geestelik kaal is nie. Ek het ook net die
regte medisyne om op julle oë te sit sodat julle geestelik weer kan
sien wat julle behoort te sien. Mense vir wie Ek regtig omgee, help
Ek reg. Ek wys vir hulle wat Ek van hulle verwag.
Soms moet Ek hulle op die regte pad hou op maniere wat nie vir hulle
lekker is nie. Maar Ek doen dit uit liefde sodat hulle goeie
Christene kan bly.
Nou toe, Ek praat ook met julle. Sit skouer aan die wiel. Los al die
afdraai-paadjies en stap net agter God aan.
Kyk mooi na My. Ek staan by die deur en Ek klop. As iemand dit hoor
en die deur oopmaak, sal Ek instap na hom toe. Ons sal saameet soos
baie goeie vriende behoort te doen.
Dis Christen wat hom nie van stryk laat bring nie, maar enduit
aanhou, sal voor God 'n ware wenner wees. Ek sal sorg dat hy langs
My op die troon sal sit. Ek het alles presies gedoen soos my Vader
van My verwag het. Daarom is Ek 'n wenner wat nou langs my Vader op
sy troon sit.
Wie kan hoor, moet goed luister na wat die Heilige Gees vir al die
Christene te sê het.
"Julle is nie koud of warm nie, maar iets tussenin.
So louerig". Ongelukkig moet ek bely dat dit vir my persoonlik
bietjie té bekend klink … ek is ook maar so effe louerig. Die bek is
seepglad as dit by geestelike praatjies kom, maar dit gaan maar soms
met 'n louheid in die hart gepaard.
Volgens hierdie gedeelte gaan die geestelike louheid
ook gepaard met geestelike blindheid en kaalheid. Vers 17 gee die
eintlike rede: . "Kyk hoe ryk is ons. Kyk hoe gaan ons vooruit. Ons
het niks van niemand nodig nie, want kyk net wat het ons alles!"
Weet jy, as ek hierdie goed lees verstaan ek hoekom Jesus so baie
teen te veel geld en materiële goed gewaarsku het. Onthou jy die ryk
jongman? "Gaan verkoop alles en volg My" - dis wat Jesus vir hom
gesê het. Voorspoed kan baie, baie gevaarlik wees. In hierdie dae
van hierdie skielike finansieële krisisse word die Here opnuut
aangegryp. En die wonderlike is, Hy is daar! Na wie toe sal ek en jy
draai, as God nie daar was nie? Daarom sê hierdie gedeelte in Openb
3: Julle sê ons is ryk, maar geestelik is julle bankrot. Ek
weet dat moeilike tye goed is vir my, want ek besef dan my
afhanklikheid van God.
Nou sê die Here 'n vreemde ding - Hy sê nie: "Kom,
ek sal julle baie geld en goeters gee nie". Nee, Hy sê: "Kom,
koop geestelike goud by My en kom vind uit hoe dit voel om iets te
hê wat regtig die moeite werd is. Kom, kry by My behoorlike
geestelike klere en trek dit aan."
Kom ons wees eerlik met mekaar: As die Here vir jou
een van die volgende twee opsies gee, wat sal jy regtig, regtig kies?
1) Genoeg geld, in oorvloed, geen finansiële bekommernis, alles net
voorspoedig, of
2) 'n Geestelike lewe in al sy volheid. 'n Wonderlike verhouding met
God. Geestelike vrede, wat alle verstand te bowe gaan. Maar … met
materiële gebrek. Wat sal jy kies? Regtig, regtig kies? Kan jy sien
dat Openbaring 3 eintlik vir ons met hierdie vraag konfronteer? Wat
sal jy kies?
In vers 18 het ons gelees dat die Here sê dat Hy nét
die medisyne het vir geestelike blindheid. Sy eie unieke oogsalf wat
maak dat ons oë weer kan sien wat dit moet sien. Weet jy, daar is só
baie geestelike invloede. Mense wil só graag buitengewone ervarings
beleef, en "nuwe" geestelike goed probeer. En nee, ek glo nie daar
is iets verkeerd daarmee nie, maar onthou dat baie van hierdie dinge
nie van die Here af kom nie. Daarom wil Hy ons oë oopmaak om te kan
onderskei; Hy wil ons terugbring op Sy pad as ons weggedwaal het.
Wanneer ons lewe só afgestomp raak dat alles maar net reg lyk, wil
Hy vir ons sê: "Mens, maak oop jou oë". Soms raak ons oë só verblind
deur die wêreldse dinge dat ons God net nie meer raaksien nie. Maar
weer jy, die Here gee om vir ons . In vers 19 sê Hy: "Mense vir
wie Ek regtig omgee help Ek reg. Ek wys vir hulle wat Ek van hulle
verwag. Soms moet Ek hulle op die regte pad hou op maniere wat nie
vir hulle lekker is nie. Maar ek doen dit uit liefde sodat hulle
goeie Christene kan bly"
En verder: "Nou toe, Ek praat ook met julle. Sit
skouer aan die wiel. Los al die afdraaipaadjies en stap net agter
God aan". Mooi gestel, né? Daar is net een pad. Net een
temperatuur. Koud, of warm. Koud het klaar gekies. Koud sê: "Ag, dis
sommer alles 'n klomp snert. Ek glo niks". Ek lees gister van 'n ou
wat sê: "Julle sê daar is één God. En Hy is almal se God. As hy dan
myne is kan ek met my god maak wat ek wil. Dan sal ek hom beledig as
ek wil, want hy is mos myne". Dis Koud wat praat. Morsdood. Warm
praat anders. Warm sê: "Ek is afhanklik van my God. Ek is lief vir
Hom, ek dien Hom, al is ek 'n sondaar. In moeilike tye gaan soek ek
skuiling by Hom. Wanneer dit swaar gaan plaas ek my vertroue in Hom.
Hy is my God". Lou is so tussen die boom en die bas. Koud is verlore.
Warm is gered. Albei het klaar gekies.
Vir Lou is daar egter uitkoms. Openbaring 3:20:
Kyk mooi na My. Ek staan by die deur en Ek klop. As iemand dit hoor
en die deur oopmaak, sal Ek instap na hom toe. Ons sal saameet soos
baie goeie vriende behoort te doen. Kom ons "vertaal" dit 'n
bietjie: "Ek, God die Vader, wil graag jou hart hê, jou hele hart,
siel en verstand. Ek wil deel word van jou. Ek maak Myself aan jou
bekend, en smag na 'n vriendskap met jou. As jy jou harde hart
sagmaak en My toelaat in jou lewe, sal Ek verseker (dit is 'n
belofte), van jou lewe besit neem en een word met jou. Ons sal in
volmaakte harmonie kom, jy sal My ken soos Ek jou ken, en Ek sal jou
red. Omdat jy een word met My, sal jy nooit ooit verlore gaan nie"
As ek en jy dít doen, is ons eensklaps vuurwarm. Kyk
wat is die prys: Dis Christen wat hom nie van stryk laat bring
nie, maar enduit aanhou, sal voor God 'n ware wenner wees. Ek sal
sorg dat hy langs My op die troon sal sit. (Openb 3:21)
|