Sien hierdie prentjie saam met my: Jou voordeurklokkie lui, jy maak die deur oop, maar daar is niemand nie. Dan stap jy uit by die deur, en daar, in jou oprit, staan ‘n bloedrooi, helder blink, splinternuwe Ferrari 599GTO, met ‘n reuse lint om die motor en ‘n reuse strik op die dak. Daar is ‘n koevertjie op die lint. En jy dink ... wat op aarde? Uit nuuskierigheid maak jy die koevert oop en daar is ‘n klein briefie in met die woorde: “Hierdie is ‘n geskenk aan Willem. Geniet hom!” Die sleutels is binne-in, tesame met die registrasie papiere – reeds op jou naam. Wat sal jy dink? 

Matt 13:34 Al hierdie dinge het Jesus vir die mense in gelykenisse geleer, en sonder 'n gelykenis het Hy hulle niks geleer nie.  

Vandag wil ek ook ‘n gelykenis vertel.... dié een van die rooi Ferrari: ‘n vergelyking met ons saligheid. Gratis, free en verniet. 

Rom 6:23 Die loon wat die sonde gee, is die dood; die genadegawe wat God gee, is die ewige lewe in Christus Jesus ons Here.  

Matt 13:44 Met die koninkryk van die hemel gaan dit soos met 'n skat wat in 'n saailand onder die grond lê. Wanneer iemand dit kry, maak hy dit weer toe; en omdat hy baie in sy skik is, gaan verkoop hy alles wat hy het, en hy koop daardie land.  

Sal jy kan glo daardie Ferrari behoort aan jou? Of sal jy ook dink dis te goed om waar te wees? Soos wat ons dink oor ons Saligheid, wat gratis is... te goed om waar te wees? Dalk glo jy dat ‘n gratis Ferrari meer waarskynlik is as dat Jesus jou hemelse prys klaar betaal het? Wie sal tog vir Willempie ‘n Ferrari gee? Ek verdien dit tog nie. Hoekom sou Jesus vir my sterf? Ek verdien dit tog nie. 

As kind het ek elke jaar met my verjaardag én vir Kersfees ‘n geskenk gekry. Ek het nooit vir my ma-hulle gevra hoeveel ek daarvoor moet betaal nie; ek het hulle integriteit genoeg vertrou om te weet dat hulle nie later van plan sou verander nie. 

Joh 6:46 Dit verseker Ek julle, wie in My glo, het die ewige lewe. 

PUNT. Die briefie op die rooi Ferrari: hierdie Italiaanse monster behoort nou aan my. Punt.  

Baie belangrik is egter om te besef dat saam met die rooi Ferrari kom ‘n geweldige groot stuk verantwoordelikheid. Dis nie sommer vir: dé, kry vir jou nie. Om so 'n motor, wat so geweldig kosbaar is, te besit en te onderhou vra baie. Bekering is die begin van ‘n ongelooflike journey, maar dit vra ook ‘n prys. 

1. Voordat jy die pad met jou rooi skip aandurf, haal jy eers daardie handleiding uit, wat vir jou presies vertel hoe alles werk. Al die moets en moenies, voorwaardes, verduidelikings, alles wat jy nodig het om die beste daarvan te kan geniet. So gee die Here vir ons die Bybel, sodat ons kan weet presies wat dit behels om die weg na Saligheid te bewandel.

2. ‘n R4 miljoen Ferrari is baie gevaarlik in die hande van ‘n 18-jarige laaitie. Of liewer, dit kan wees. Jy weet mos hoe gevaarlik ‘n nuwe bekeerling kan wees, of hoe? Was jy ook daar? Raak dinge kwyt, wil die wêreld omkeer, wil net bestraf, uitdryf, bebid, bepreek.... maar weet self nog maar min. 1 Kor 3:2 Ek het julle met melk gevoed, nie met vaste kos nie, want julle kon dit nog nie verteer nie. Spring maar eerder stadig weg met daardie rooi Ferrari. ‘n Nuwe bekeerling weet nie skielik alles nie, inteendeel! Wees maar eers versigtig.

3. Jy kry dalk ‘n lewenslange onderhoudsplan saam met jou Ferrari, maar as jy hom nie diens nie, gaan daai plan jou niks help nie. Die inisiatief lê by my en jou om ons Christen-lewenspad in stand te hou. Heb 10:25 Ons moenie van die samekomste van die gemeente af wegbly soos party se gewoonte is nie, maar mekaar eerder aanmoedig om daarheen te gaan, en dit des te meer namate julle die oordeelsdag sien nader kom. Dit behels meer as net kerk toe gaan. As ek en jy ons Ferrari afskeep, gaan jy hom nie lank ry nie. Hang van jou af...

4. As jy die Ferrari se waarde besef, en dit nie sommer net so weer wil verloor nie, moet jy hom verseker. Jy sien, as iemand hom vir jou skenk, het iemand  daarvoor betaal. Met ‘n R4 miljoen pryskaartjie, het jy ‘n baie waardevolle item! Wat het jou Saligheid gekos? R4 miljoen is grondboontjies! Dit het ‘n léwe gekos. Bloed, duur, kosbare bloed. My en jou versekering is die inwoning van die Heilige Gees. 1 Kor 4:14 Die mens wat nie die Gees van God het nie, aanvaar nie die dinge van die Gees van God nie. Vir hom is dit onsin. Hy kan dit ook nie verstaan nie, omdat dit geestelik beoordeel moet word. Baie mense klink baie geestelik, maar dis soms leë doppe. Soos ‘n bloedrooi Ferrari sonder ‘n enjin. Mooi van buite, maar leeg binne.

5. Daai rooi Ferrari gaan jy wraggies moet oppas, want ander gaan hom wil steel. Joh 10:10 'n Dief kom net steel en slag en uitroei; Ek het gekom sodat hulle die lewe kan hê, en dit in oorvloed. Boeta, stop met daai rooi vuurwa op die verkeerde plek, los sommer roekeloos die deur oop, en sommer so traak-my-nie-agtig die sleutel in hom, en hy is weg sodra jy jou rug draai. Die Here sê vir jou vandag: moenie ‘n opening in jou lewe los vir daardie dief nie, hy sal inkom en steel en verwoes. Staan die duiwel teë en hy sal van jou af wegvlug. (Jak 4:7)

6. Die rooi kar het baie vermoëns. Hy is vinnig, en hy het pad hou vermoë, maar moenie hom op die verkeerde plek gebruik nie. ‘n Klein Toyota RAV 4X4 kan op plekke ry waar die Ferrari nie kan nie. Moenie in die gemors gaan ploeter nie. Luister maar vir sy ingeboude GPS. Ons GPS sê: Jes 30:21 Wanneer jy die regte koers verlaat, sal jy agter jou ‘n stem hoor sê: Hier is die pad, loop hierlangs.

7. As jy die Ferrari op die regte plek gebruik, is hy tot baie in staat. Hy is veilig, is luuks, is kwaliteit. Fil 4:13 Ek is tot alles in staat deur Hom wat my krag gee.
    

As bevrydes, wedergeborenes kan ons baie meer vermag as ander mense. Ons het krag wat skrik vir niks. Geniet jou geskenk, maar weet dat dit groot verantwoordelikheid vra.