Vandag
is Hemelvaartdag. 'n Besondere dag in die geskiedenis van die
Christendom. 'n Dag van hoop vir dié wat onwrikbaar glo. 'n Aanstoot
vir die ongelowige. 'n Dag wat vra dat ons God op Sy Woord moet neem.
Glo jy werklik dat die Hemelvaart plaasgevind het? Kan jy
onvoorwaardelik aanvaar dat dit werklik gebeur het?
Luk 24:44-53
Daarna sê Hy vir hulle: "Dit is die
betekenis van die woorde wat Ek vir julle gesê het toe Ek nog by
julle was, naamlik dat alles vervul moet word wat in die wet van
Moses en in die profete en psalms oor My geskrywe is."
Toe open Hy hulle verstand om die Skrif te verstaan.
Verder sê Hy vir hulle: "So staan daar geskrywe: 'Die Christus moet
ly en op die derde dag uit die dood opstaan,
en in sy Naam moet bekering en vergewing van sondes aan al die
nasies verkondig word, van Jerusalem af en verder.'
Julle is getuies van hierdie dinge.
En Ek sal die gawe wat my Vader beloof het, vir julle stuur. Maar
julle moet in die stad bly totdat julle met krag van bo toegerus
is."
Daarna het Hy hulle uit die stad uitgelei tot by Betanië. Daar het
Hy sy hande opgehef en hulle geseën.
Terwyl Hy hulle seën, het Hy van hulle af weggegaan en is Hy in die
hemel opgeneem.
Hulle het Hom aanbid en met groot blydskap na Jerusalem toe
teruggegaan.
Daar het hulle die hele tyd by die tempel gebly en God geprys.
Met 'n wonderwerk het Jesus Sy verskyning op aarde
gemaak (deur die maagdelike geboorte), en met 'n wonderwerk het Hy
die aarde verlaat. Ek dink dit is juis DIT wat vir die ongelowiges
so moeilik maak om dit te glo. Dis nogal snaaks hoe die mens se kop
werk, en wat mense bereid is om te glo, solank hulle net nie die
knie voor Jesus hoef te buig nie. Mense sal glo dat die hele
skepping met sy miljoene wonderwerke sommer toevallig ontstaan het;
dat lewe wat só kompleks is, 'n ongeluk is. Daar is selfs mense wat
sal glo dat hulle voorouers 'n aap was, solank hulle net nie hoef te
glo dat dit God is wat hulle uniek geskep het nie.
In 1 Kor 2:14 gee die Bybel 'n verduideliking: "Die
mens wat nie die Gees van God het nie, aanvaar nie die dinge van die
Gees van God nie, vir hom is dit onsin. Hy kan dit ook nie verstaan
nie, omdat dit geestelik beoordeel moet word" . Dinge in die
Geestelike realm is nie sigbaar nie, en moet dus met geloof
beoordeel word. Dus, óf jy glo dit, óf jy glo dit nie. Nogal
interessant dat die ongelowige sóveel tyd en energie spandeer om sy
ongeloof te verklaar en verduidelik … iets wat hy in elk geval nie
glo nie.
Wat beteken Jesus se hemelvaart vir JOU? Wat is die
waarde daarvan in jou lewe?
Veertig dae na Sy opstanding… Met die sondvloed reën
dit 40 dae, dan word Noag en sy gesin in 'n nuwe lewe "vrygelaat".
Die Israeliete swerf 40 jaar in die woestyn rond, waarna hulle die
land Kanaän in besit neem. 40 dae na Jesus se opstanding vaar hy op
na Vader toe, om te gaan heers aan Sy regterhand. Dit is die finale
slag vir Satan, en die hele verlossing siklus word met hierdie aksie
voltooi. Vóór Hy aarde toe gekom het, was Hy in die hemel by God die
Vader. Hy verlaat Sy hemelse tuiste ter wille van ons verlossing, en
nou gaan Hy terug om aan die regterhand van die Vader te gaan sit,
waar Hy nou namens ons intree. Laat dit jou nie ook belangrik en
spesiaal voel nie? Voel jy nie ook dat jy persoonlik daarby gebaat
het dat daar 'n hemelvaart was nie? As Jesus nie op 'n bo-natuurlike
manier hierdie aarde verlaat het nie, sou ons waarskynlik in sy
menslikheid bly vaskyk het. Goddank dit was nie so nie - dis juis Sy
talle en talle wonderwerke wat ons bewys is dat Hy die Seun van God
die Vader is, en ook sélf God. Joh 1:18 "Niemand
het God ooit gesien nie. Sy enigste Seun, self God, wat die naaste
aan die Vader is, dié het Hom bekend gemaak"
Wat is die voordeel van die hemelvaart vir jou en my?
Joh 16:7 "Tog sê Ek vir julle die waarheid: Dit is tot julle
voordeel dat Ek weggaan, want as Ek nie weggaan nie, sal die
Voorspraak, die Heilige Gees, nie na julle toe kom nie; maar as Ek
gaan, sal Ek Hom na julle toe stuur".
Ek het al gewonder, hoekom het Jesus nie gekom om te bly nie, net
so, in Sy aardse liggaam? Dalk omdat Sy menslike gestalte beperk was
tot die plek waar Hy op 'n gegewe tyd was. Toe die Heilige Gees
uitgestort word, was die hele wêreld met Sy teenwoordigheid bedek.
Weereens het ons nodig om in iets te glo wat ons nie fisies kan sien
nie. Gelukkig kan ons dit ervaar, en kan ons die werk van die
Heilige Gees waarneem - ons sien hoe mense se lewens dramaties
verander, daarom kan ek glo in die waarheid daarvan.
Die dissipels moes dit ook geglo het, want hulle het
só sterk by hulle punt gestaan, dat hulle waarskynlik almal vir
hulle geloof gesterf het. Dit sê vir my nogal iets. Die hemelvaart
hét gebeur, of ek dit glo of nie. Maar, ómdat ek dit glo, pleit
Jesus op hierdie oomblik vir my by die Vader.
Die hemelvaart gee vir ons hoop:
Hand 1:9-11
Nadat Hy dit gesê het, is Hy opgeneem terwyl hulle dit sien, en
'n wolk het Hom weggeneem, sodat hulle Hom nie langer kon sien nie.
Terwyl Hy weggaan en hulle nog stip na die hemel kyk, het daar
skielik twee mans in wit klere by hulle gestaan. Dié sê toe vir
hulle: "Galileërs, waarom staan julle so na die hemel en kyk?
Hierdie Jesus wat van julle af na die hemel toe opgeneem is, sal net
so terugkom soos julle Hom na die hemel toe sien opgaan het"
Wat 'n wonderlik belofte om in te glo - Hy kom terug, soos Hy
weggegaan het, om vir my en jou te kom haal. Dit voel vir ons
miskien aardig om te sê ons sal sommer alles net so los om in die
hemel te kom, want ons hou tog maar vas aan wat ons hier het. Die
punt is, omdat ons kan glo dat daar iets beter vir ons is aan die
anderkant van hierdie lewe, maak dat ons nou alles kan verdra.
Hoe wonderlik om te weet dat ons eendag dalk mag
toekyk hoe Jesus neerdaal aarde toe. Vir dié wat nie glo nie, sal
dit 'n helse verskrikking wees. Vir dié wat glo, sal dit die stempel
wees op alles wat jy ooit geglo het.
Wil jy nie ook vashou aan hierdie belofte nie?
Joh 14:2-3
In die huis van my Vader is daar baie
woonplek. As dit nie so was nie, sou Ek nie vir julle gesê het dat
Ek gaan om vir julle plek gereed te maak nie. En as Ek gegaan het,
en vir julle plek gereed gemaak het, kom Ek terug en sal julle na My
toe neem, sodat julle ook kan wees waar Ek is.
My vriend, gee die Hemelvaart nie vir jou ook hoop
nie? As dit nie gebeur het nie, sou die hele verlossings boodskap
dalk daarmee heen wees. Glo dit, want dit IS so.
|