Openbaring 3:14-21 ¹⁴Skrywe aan die leraar van die gemeente in Laodisea: So sê die Amen, die geloofwaardige en ware getuie, Hy deur wie God alles geskep het: ¹⁵Ek weet alles wat julle doen. Ek weet dat julle nie koud is nie, en ook nie warm nie. As julle tog maar koud of warm was! ¹⁶Maar nou, omdat julle lou is, nie warm nie en ook nie koud nie, gaan Ek julle uit my mond uitspoeg. ¹⁷Julle sê: “Ons is ryk, skatryk, en ons het niks meer nodig nie,” en julle weet nie dat julle ellendig en beklaenswaardig is nie, arm, blind en kaal. ¹⁸Daarom raai Ek julle aan om by My goud te koop wat deur vuur gelouter is, sodat julle ryk kan word; en koop wit klere, sodat julle julle kan aantrek en julle skande, julle naaktheid, nie gesien word nie; en koop oogsalf om aan julle oë te smeer, sodat julle kan sien. ¹⁹Ek bestraf en tug elkeen wat Ek liefhet. Laat dit dan vir julle erns wees en bekeer julle. ²⁰Kyk, Ek staan by die deur en Ek klop. As iemand my stem hoor en die deur oopmaak, sal Ek by hom ingaan en saam met hom die feesmaal ^a hou, en hy saam met My. ²¹Elkeen wat die oorwinning behaal, sal Ek saam met My op my troon laat sit, net soos Ek ook die oorwinning behaal het en saam met my Vader op sy troon gaan sit het. 

Hierdie teks verwys na saligheid, na skeiding tussen ou en nuwe lewe, na met of sonder God, na ‘n voor en na lewe, na hunkering van ‘n persoon om toegang te kry tot ‘n Ander; dit gaan oor ‘n pertinente keuse: maak oop vs los toe. 

Dit is Jesus wat sê: kyk Ek staan by die deur .... kan jy sien dat die deur of skeiding outomaties tussen ons en God bestaan? Wat so wonderlik is hier, is dat dit nie sê dat ons deur die deur moet gaan na God toe nie, maar dat Hy deur die deur wil kom na ons toe. Ons hoef net oop te maak – dis al! 

Dit is so dat ons as mense só dwalend en soekend is, só tastend in die donker. Was jy al in ‘n stikdonker vertrek en jy weet nie waar die deur is nie? Eers soek jy na ‘n muur, want ‘n  muur bring skeiding en in die muur sal daar ‘n deur wees. Jy skuifel met jou hande voor jou uit in die donker totdat jy jou teen die muur vasloop, en dan loop jy met jou hande teen die muur af totdat jy die deur voel. Jou pupille rek so groot dat dit voel of jou oë uit hulle kaste wil bars. So is daar duisende mense wat soekend is na God, tastend in die donker, soos skape sonder ‘n herder. Mense wat geen lig voor hulle sien nie, voel-voel, vol vrees, geen toekoms, tastend en bang in die donker.  Die probleem is net, hulle soek die deur op die verkeerde plek! Die deur is nie daar ver nie, die deur is nie in die kerk of in rituele nie, ook nie by self-aangestelde profete nie of ideologieë nie, die deur is binne in jou, in jou hart. As jy mooi luister sal jy die klop, klop, klop hoor – weet dat dit God is. 

Die deur van Openbaring 3:20 is in jou hart, en jy het die sleutel, en jy het die keuse of jy oopmaak of nie. Hoekom maak mense dan nie die deur oop nie? Hier is ‘n paar moontlike redes:

- Hulle glo nie die belofte van die feesmaal nie. Het jy al van ‘n wedergebore Christen gehoor wat spyt is dat hy tot bekering gekom het?
- Hulle luister na ander wat self nog met ‘n toe deur sit. Doem profete en ongelowiges.
- Hulle is bang hulle verloor hulle vriende; wel dit kan waar wees, want vriendskap met die wêreld is vyandskap met God.
- Vrees. Die Bybel hou die volmaakte ewigheid vir ons voor, die perfekte plan van God – saam met Hom. Daar word niks deur due wêreld voorgehou as alternatief nie... maar tog vrees ons.
- Ongeloof. Miskien wil mense God nie vertrou nie en Hom op sy Woord neem nie. Glo liewer niks as in God.
- Sondes. Ons glo dat ons kan leef soos ons wil. Ons kan nie. Maar daar is ook ‘n ander kant. Mense glo dat hulle eers volmaak en sondeloos moet wees voor hulle die deur oopmaak. As dit só sou wees, sou dit nie nodig wees om die deur oop te maak nie, want dan sou ons nie vir Jesus nodig gehad het nie.

Joh 15:5 Ek is die weg, die waarheid en die lewe. Niemand kom na die Vader behalwe deur My nie.

Wanneer ons die deur van Openbaring 3:20 oop maak word die weg na die Vader oopgemaak, dan kom Jesus in en hou saam met ons ‘n feesmaal. Wat is hierdie feesmaal? Dit is om tot bekering te kom, en om die ewige lewe as geskenk van God te ontvang; maar dit is ook ‘n feesmaal vir hier en nou – Jesus wil elke dag ‘n feesmaal saam met jou geniet. Daar is nog meer: Jesus is die oplossing vir jou probleme, die antwoorde op jou vrae, die trooster in moeilike tye, jou helper en vriend in nood, die Een wat die vrees kan verdryf.