Luister
na die volgende - onthou jy dit?
Nooit hoef jou kinders wat trou is te vra: Wat
beteken jou vlag dan Suid-Afrika? Ons weet hy's die seël van ons
vryheid en reg Vir naaste en vreemde, vir oorman en kneg; Die pand
van ons erf'nis, geslag op geslag, Om te hou vir ons kinders se
kinders wat wag; Ons nasie se grondbrief van eiendomsland, Uitgegee
op gesag van die Hoogste se hand. Oor ons hoof sal ons hys, in ons
hart sal ons dra, Die vlag van ons eie Suid-Afrika.
Voor jy
ooropgewonde raak, hierdie is nie ‘n politieke gesprek
nie. Hierdie is die vlaglied van Suid-Afrika. Dit kom
vars uit my kinderdae. Ons het dit uit volle bors
gesing in die skool en ons moes die woorde kén. Ek raak
eintlik nostalgies!
Hierdie lied het
gegaan oor die vlag van ons land. Het jy onlangs ‘n
vlag gesien? Enige tipe vlag? Wel verseker, met
rugbytyd sien jy dit om elke hoek en draai. En
natuurlik hier in Bloubul-land sien jy net blou vlae,
met so nou en dan ‘n swarte of ‘n rooie of wat ook al.
Die vraag is, het jy
enige twyfel waarvoor meneer met sy blou vlag staan?
Wie en wat hy ondersteun? Hoekom hy dit vertoon? Waarin
hy glo? Natuurlik nie! As jy die blou vlag sien, dan
wéét jy vir wie hy skree. Ek sien eendag ‘n motorfiets
wat by my verbyry met ‘n reuse Shark-vlag wat saam
wapper. Jou vlag wys waarvoor jy staan. “Nooit hoef jou
kinders wat trou is te vra, wat beteken jou vlag dan
Suid-Afrika.”
Jou vlag is jou
trots! So moet ek en jy ook ons vlag van ons
Christelike geloof swaai en vertoon. Doen ons dit met
dieselfde ywer en passie as wanneer ons ’n vlag swaai om
ons gunsteling rugbyspan te ondersteun?
‘n Land kry ‘n nuwe
vlag na onafhanklikheid. Dan mag hy sy eie vlag ontwerp
en vertoon. Net so, kry ons na bekering ‘n nuwe vlag.
Iets wat ons met trots vertoon. Dan kom ek en jy as
Christene uit die boks uit en ons vertoon iets wat wys
waarvoor ons staan. ‘n Nuwe vlag, ‘n nuwe getuienis.
Ons kan dan nie meer ‘n kompromie aangaan met die wêreld
nie, of met ons ou lewe nie. Dink jy enige Bloubul
ondersteuner sal ooit ‘n swart vlag gaan swaai die
Sharktenk? Nooit! Jy versuip liewer, jy laat liewer ‘n
krokodil jou byt. Jy soen liewer vir skoonma 10 maal
per uur! ‘n Bul dra ‘n blou vlag. ‘n Christen swaai geen
ander geloof se vlag nie. Nee, na jou onafhanklikheid en
jou nuwe vryheid, vertoon jy net één vlag. Jy wys
waarvoor jy staan. Jy laat dit wat moet agterbly, agter
jou.
2 Kor 5 : 17
“Iemand wat aan Christus behoort, is ‘n nuwe mens. Die
oue is verby, die nuwe het gekom.”
Wanneer jy Chritus
aangeneem het, is jy nuut gemaak, ontvang jy volmaakte
vryheid en onafhanklikheid. Dan het jy ‘n nuwe vlag wat
met trots gewaai moet word.
Hoe lyk jou
Christus-vlag? Is hy sigbaar? Wel, ‘n vlag word altyd
bokant jou kop gehys. Hoog op ‘n paal. In die weermag
was vlagparade amper ‘n heilige geleentheid. Die
Amerikaners het selfs hulle vlag op die maan gaan
plant. As een land ‘n ander inneem, is die eerste ding
wat gebeur die vlagplanting seremonie. So moet ons as
Christene ons getuienisvlag hoog plant. Van ver af moet
mense weet dat jy vir Christus staan. Waar ek en jy
gaan moet ons ons vlag plant en ons merk maak. Orals!
So paar jaar gelede
was daar ‘n insident toe die Bulle die Curriebeker gewen
het. Jaco van der Westhuizen het direk na die wedstryd
‘n T-hemp aangetrek wat sê “Jesus is King”, en agterop
“Bulls for Jesus”. Vir baie mense was dit ‘n aanstoot
om baie redes, en ek wil nie nou sê hoe mense daaroor
móés voel nie, maar Jaco het gewys waarvoor hy staan.
So wat beteken dit? Iemand het besluit ek gaan my vlag
van my getuienis prominent vertoon. Dit vra iets om jou
Christus-vlag te vertoon. Dit sal dikwels teenstand
uitlok, maar 1 Kor. 2:13-14 sê dat vir dié wie nie die
Gees het nie onsin is.
In die oorloë van die
ou dae, toe manne mekaar trompop geloop het, was dit die
dapperste ouens wat die vlag gedra het. Die een wat die
vlag moes dra, het een hand minder gehad om mee te
veg. Ja wat, lyk my dit vra nogal iets om jou
Christus-vlag te swaai.
Vertoon ek my
Christus-vlag? Hoe doen ek dit?
-
As ek droogmaak, kan ek nie my vlag vertoon nie. Dit
wys dat ek die saak versaak.
-
My vlag laat geen ander ideologie toe nie. As
Christen staan ek nét op Christelike waardes. Dus
kan ek nét op Bybelse beginsels werk. Niks anders
word toegelaat nie.
-
‘n Vlag wys jou liefde vir jou saak. ‘n Christen se
liefde vir die Here, sy naaste en homself moet
duidelik en sigbaar wees.
-
‘n Mens of soldaat skaam hom nie vir sy vlag nie. So
skaam ons ons nie vir die Here, of vir ons
geloofsoortuiging nie.
-
As ons ons vlag vertoon, en ons eerbied daarvoor
het, kan ons nie só lewe dat dit waarvoor die vlag
staan, in oneer kom nie.
-
‘n Vlag maak bekend wie jy is, daarom moet almal
weet waarvoor jy staan. As iemand bv. onsmaaklike
goed kwytraak, of God se Naam ydellik gebruik, moet
ons bekend maak waarvoor ons staan en iets daaroor
sê.
-
Ons kan nét die een dien wie se vlag ons vertoon.
Niks anders nie. “Jy kan nie God èn Mammon dien
nie”
Wat is my en jou
vlag?
-
My geregtigheid in Christus. My sonde gaan oor op
Jesus, en Sy volmaaktheid kom oor op my. Dis my
vryspraak.
-
My getuienis is my vlag. Dit is hoe ek hom hoog hys.
Deur te sê, getuig en deur te dóén.
-
My dade is my vlag. My dade wys tog immers waarin
ek glo.
-
My heiligheid is my vlag. “Wees heilig, want ek
is Heilig”, sê die Here. Ek moet streef na
heiligheid en volmaaktheid.
-
My liefde vir ander is my vlag. Die mate waarin ek
ander liefhet, weerspieël hoeveel ek vir God liefhet.
-
My geestelike groei is my vlag. Ek moet besig wees
met die Here, stiltetyd hou, ek moet meer en meer
leer van God.
-
My bedieninge is my vlag. Dit wat ek doen ter wille
van ander, ten koste van myself, wys waarvoor ek
staan.
-
My omgee is my vlag. As ander kan sien dat ek nie
net vir myself omgee of sorg nie.
Hys jou vlag hoog
vandag - dat almal kan sien aan wie se kant jy is.
|