Manwees.
Hierdie stukkie is vir die man van die huis, of jy nou geskei is of
nie, getroud of nie. Dis vir manne – ware, egte, regte manne.
Elke mens is gebore as een van twee geslagte, man of
vrou. In Genesis lees ons dat God vir Adam uit stof gemaak het (soos
‘n pop, glo ek), en die lewensasem in hom ingeblaas het. Later stel
God vir Adam aan as die hoof van Eva, en so ook vir my en jou as
hoof van die huis. Hy gee ons ‘n rol – Hy stel ons aan as versorger,
as die sterke in die huis, en ook as koning, priester en profeet van
ons huis. Nou vra ek vandag vir jou as man: is jy mans genoeg vir
manwees? Hulle sê mos: manwees is nie vir sissies nie! ‘n Man het óf
murg in sy pype, óf hy is ‘n papbroek. In die ou dae sou ons sê:
“women is the weaker sex”, vandag kry jy slae as jy so sê. Mnr. Man,
jy het ‘n groot taak in hierdie lewe – is jy mans genoeg daarvoor?
Spr 4:1-9
Kinders, neem die opvoeding wat 'n vader julle gee, ter harte; slaan
daarop ag, sodat julle kan leer wat insig is, want wat ek julle
leer, is goed; moenie die onderrig wat ek gee, versmaai nie. Ek was
ook eenkeer 'n kind, my moeder se oogappel, haar enigste. My vader
het my toe ook geleer en vir my gesê: "Wat ek jou sê, moet jy
vashou, my voorskrifte moet jy uitvoer, sodat jy werklik kan lewe.
Sorg dat jy wysheid bekom, en insig! Moenie my woorde vergeet en
daarvan afwyk nie; maak die wysheid jou metgesel, dit sal jou
beskerm; as jy dit liefhet, sal dit jou veilig bewaar. Die wysheid
kom eerste. Sorg dat jy wysheid bekom, gee alles wat jy het, om
insig te kry! Slaan dit hoog aan, dan sal dit aan jou aansien gee.
Dit sal jou 'n man van betekenis maak as jy dit vasgryp. Dit sal jou
lewe versier, dit sal vir jou 'n sierlike kroon wees."
Hier lees ons van ‘n pa wat opvoeding gee, sy kinders
leer; ‘n pa wat met sy kind praat! Van ‘n man van betekenis, een
met murg in sy pype, een wat sy pligte nakom. ‘n Man wat mans genoeg
is vir manwees.
Jare gelede het ek saam met ‘n ou gewerk wat vir my
gesê het sy vrou moet al die briewe oopmaak, want hy is bang dis
dalk ‘n briefbom. Kan jy dit nou glo? Klink dit vir jou soos ‘n man
wat murg in sy pype het? Nee wat, klink vir my soos cream soda in
daardie are! Hy het ook gesukkel met sy kinders wat geen respek vir
hom gehad het nie.
Wanneer is ‘n man ‘n MAN?
Kom ons begin sommer by die huwelik (vir die
getroudes onder ons). In Genesis skep die Here vir Adam en gee hom
die opdrag om nie te eet van die boom in die middel van die tuin
nie. Dit is nog vóór Hy vir Eva geskep het. In Gen 2:16 gee God die
opdrag, en daarna kom Eva op die toneel, en toe die slang, en almal
val voor sy listigheid. Adam is so ‘n papbroek dat hy vir Eva die
skuld gee. Hy verstaan nie dat hy, as hoof van die vrou, standpunt
moes inneem nie. Net so is daar vandag te veel mans wat nie mans
genoeg is om hulle rol in die huis na wense te vertolk nie. Dis
hoekom baie vroue sukkel om hulle mans te respekteer. Die man is die
figuur in die huis wat die orde moet laat geld, wat primêr moet sorg
dat dissipline gehandhaaf word. Ongelukkig is ons so afwesig dat
vroulief die rol vat, óf dat die pap op die grond val. Manwees in
die huis is moeilik want ons is maar gereeld “die vark in die
verhaal”. Maar dis okay, want ongelukkig probeer te veel mans die
gewildheidskompetisie in die huis wen. Partykeer is dit nodig dat
jou gesag moet geld; dan moet jou “ja” “ja” wees, en jou “nee” “nee”
– punt!
Spreuke 4 begin met: “kinders, neem die opvoeding wat
‘n vader julle gee ter harte”. Lyk my die Bybel verskil ‘n bietjie
met ons leefwêreld van vandag. Baie mans is nie meer mans genoeg om
deel te neem aan die kinders se opvoeding nie. O ja, nou onthou
ek.... jy moet gaan werk ... vroulief ook, of het jy vergeet? Baie,
ja baie vroue móét vandag werk, maar baie, ja baie, hoef nie. Mnr.
Man, as jou vrou vir jou vandag sal vra of julle kan probeer om haar
te laat ophou werk, sodat sy voltyds by die kinders kan wees – sou
jy mans genoeg wees om te probeer? Of lê die definisie van jou
manwees te veel in die peperduur wiele wat jy ry? Min mans is
mansgenoeg om sonder weelde klaar te kom. Moenie my kruisig nie,
maar luister net objektief na hierdie vraag: as ons ‘n weegskaal vat
en die kinders aan een kant neersit en weelde aan die ander kant, na
watter kant toe sal jou skaal tip?
Min mans het die moed om meer kere vir Mnr. Baas
“nee” te sê, maar het genoeg moed om vir die kinders “nee” te sê.
Gelukkig het die meeste ouens op hulle sterfbed die “guts” om te
erken dit was ‘n fout. Maar dis te laat!
Is jy mans genoeg vir die rol van Geestelike leier in
jou huis? Ag, vroulief doen dit so goed, sy is so sag soos Jesus, jy
weet? Sy het meer tyd om vir die kinders uit die Bybel te lees, jy
weet? ... dis wat ouens dalk sê.
‘n Ware man...
-
help sy vrou met
alles in die huis
-
neem aktief en
konstant deel aan sy kinders se opvoeding
-
stel sy gesin
altyd bo homself
-
respekteer sy
kinders se ma, selfs al is hy geskei van haar.
-
wys sy emosies
voor sy kinders, en wys hulle sy sagte kant
-
leer sy kinders
dat geen probleem te groot is om op te los nie, en help hulle
daarmee
-
dissiplineer sy
kinders, en spaar nie die roede nie
-
kies sy kinders en
vrou bo die bottel
-
sê vir “poppie by
die werk” sy moet haar eie man se poppie wees
-
spandeer genoeg
tyd by die huis dat sy gesin hom beter ken as sy werksmense
-
weet dat
versorging van sy gesin nie ‘n oorvloed geld vereis nie, maar
wel ‘n oorvloed tyd
-
sê jammer as hy
verkeerd was, ook aan sy kinders
-
eer sy vader en sy
moeder, en sorg dat daar gesonde verhoudinge in plek bly
-
doen iets in die
gemeenskap, kerk, omgewing – sonder om iets terug te verwag
-
dien die Here, en
besef sy afhanklikheid van God
Wees mans genoeg!
|