Openbaring
21:9-27
Toe het een van die sewe engele wat die
sewe bakke het waarin die sewe laaste plae was, gekom en met my
gepraat. "Kom," het hy gesê, "ek sal jou die bruid wys, die vrou van
die Lam." Ek is toe deur die Gees meegevoer en die engel het my na
'n groot hoë berg toe geneem en die heilige stad Jerusalem vir my
gewys, wat van God af uit die hemel uit afkom. Die stad het die
heerlikheid van God: sy glans is soos dié van die kosbaarste
edelsteen, soos 'n kristalhelder opaal. Die stad het 'n groot hoë
muur met twaalf poorte. By die poorte is daar twaalf engele, en op
die poorte is daar name geskrywe, dié van die twaalf stamme van die
volk Israel. Aan die oostekant is daar drie poorte, aan die
noordekant drie, aan die suidekant drie en aan die westekant drie.
Die stad se muur het twaalf fondamente, en daarop is daar ook twaalf
name, dié van die twaalf apostels van die Lam. Die engel wat met my
gepraat het, het 'n goue meetstok gehad om daarmee die stad self, sy
poorte en sy muur te meet. Die stad is vierkantig, net so lank as
wat hy breed is. Hy het die stad toe met die meetstok gemeet. Die
lengte, die breedte en die hoogte daarvan is dieselfde, twaalf
duisend kilometer. Hy het ook die muur om die stad gemeet. Dit is
honderd vier en veertig meter hoog. Die engel het die mate van mense
gebruik. Die muur is met opaal gebou en die stad self met suiwer
goud wat soos 'n skoon spieël lyk. Die fondamente van die stadsmuur
is met allerhande edelstene versier: die eerste fondament met opaal,
die tweede met saffier, die derde met agaat, die vierde met smarag,
die vyfde met sardoniks, die sesde met karneool, die sewende met
chrisoliet, die agste met beril, die negende met topaas, die tiende
met chrisopraas, die elfde met hiasint en die twaalfde met ametis.
Die twaalf poorte is twaalf pêrels. Elkeen van die poorte is uit een
pêrel gemaak. Die strate van die stad is van suiwer goud, blink soos
'n spieël. 'n Tempel het ek nie in die stad gesien nie, want sy
tempel is die Here God, die Almagtige, en die Lam. Die stad het nie
die son en die maan nodig om hom te verlig nie, want die heerlikheid
van God het hom verlig, en die Lam is sy lamp. Die nasies sal in die
stad se lig lewe, en die konings van die aarde verleen luister
daaraan. Die poorte daarvan word gedurende die hele dag nooit
toegesluit nie: daar sal nie meer nag wees nie. Die mense sal die
luister en die rykdom van die nasies daarheen bring. Niks onreins en
niemand wat iets losbandigs
en vals doen, sal ooit daarin kom nie, maar net dié wie se name in
die boek van die lewe, die boek van die Lam geskrywe staan.
WOW! Die kasteel op die koppie. Die paleis in die
dorp. Die grootste plek op skuldbult. Dit alles is sommer niks! Hoe
klink HIERDIE plek vir jou? Die beste van die beste boumateriaal,
die duurste konstruksie denkbaar, die mooiste, grootste, mees
indrukwekkende, weelderigste, mees asemrowende... Man, geen mens op
die hele aarde kan hierdie plek bekostig nie. Geen Gates, Jackson,
olie-sheik, filmster, niemand, maar niemand kan hierdie plek
bekostig nie. Daar bestaan op die hele aarde nie 'n struktuur wat
hierdie plek kan ewenaar nie. Neverland, Graceland, Disneyland is
maar 'n vulletjie teen hierdie plek. Kan jy dink hoe 'n
eiendomsagent dit sou bemark? Duisende slaapkamers, duisende
woonkamers, die mees weelderige boumateriaal denkbaar, ja... selfs
strate van goud! En dan op die koop toe 100% veilig. Wat sou dit kos
om DAAR te woon?
Nou ja, wil jy daar woon? Vir ewig en ewig? Jip, jy
kan, en boonop verniet. Heeltemal verniet. Glo jy dit?
Kom ek vra jou: Sê nou maar iemand vra jou of jy
soontoe wil trek, gratis, om vir altyd daar te bly. Daar is net een
voorwaarde, jy moet sê jy wil. Dis al. Jou trek word gery, al die
hervestigingskostes word gedek, jy moet NET WIL. Jy deel in al die
voordele, jy het onbeperkte toegang tot alles en jy hoef NIKS te
doen nie, behalwe om dit te geniet. Boonop kom die uitnodiging van
die hoogste vlak denkbaar, met die nodige dokumentasie wat bewys dat
hierdie Amptenaar volmag het om jou te nooi. Nou sê jy: Ag nee, jong,
nie nou nie, ek het 'n nuwe fiets gekoop en ek wil eerder bietjie
met hom gaan ry. Die Amptenaar vra: hemel mens, weet jy wat jy gaan
mis? Weet jy dat jy net een kans het? Besef jy hoe bevoorreg jy is?
Dan sê jy: ja, maar wat van my nuwe fiets, ek wil so graag eerder
met hom gaan ry. En jy moet sien, hy is rooi met 'n klokkie, en 'n
“carrier” vir my boeksak.
Sjoe, sou jy saamstem dat dit stapelgek moet wees?
Luk 14:15-24
Een van dié wat saam aan tafel was, het dit
gehoor en vir Hom gesê: "Gelukkig is die man wat aan die maaltyd in
die koninkryk van God kan deelneem." Toe sê Jesus vir hom: "Daar was
'n man wat 'n groot maaltyd gegee en baie mense uitgenooi het. Toe
die maaltyd gereed was, stuur hy sy slaaf om vir die genooides te
sê: 'Kom, die maaltyd staan klaar.' Maar hulle begin almal, die een
na die ander, verskoning maak. Die eerste sê vir hom: 'Ek het 'n
stuk grond gekoop en dit is noodsaaklik dat ek uitgaan om daarna te
kyk. Ek vra u, verskoon my asseblief.' 'n Ander een sê: 'Ek het vyf
paar osse gekoop en gaan hulle probeer. Ek vra u verskoon my
asseblief.' Nog 'n ander een sê: 'Ek is pas getroud, daarom kan ek
nie kom nie.' "Die slaaf kom toe terug en vertel dit alles aan sy
eienaar. Toe word die man kwaad en sê vir sy slaaf: 'Gaan uit na die
strate en gangetjies van die stad en bring die armes en kreupeles en
blindes en verlamdes hierheen.' Later kom die slaaf sê: 'Meneer, u
opdrag is uitgevoer, en daar is nog plek.' Toe sê die man vir die
slaaf: 'Gaan uit na die paaie en lanings en dring by hulle daarop
aan om in te kom, sodat my huis vol kan word. Dit verseker ek julle:
Nie een van die mense wat genooi is, sal sy mond aan my kos sit
nie.' "
Is dit nie presies wat hierdie mense doen nie? Bid
jou dit aan, 'n os vir 'n paleis. 'n Stukkie grond vir 'n
Koningswoning. Uitgenooi, deur die Hoofamptenaar Homself, uitgekies,
uitverkies, afgesonder, die witbroodjie wat alles aangebied word.
Die hoof erfgenaam. Dan sê hy, nee, ek wil liewer bietjie met my
nuwe osse gaan ploeg. Verskriklik wat die mens vir sy saligheid sal
verruil.
“Gaan uit na die paaie en lanings en dring by hulle
daarop aan om in te kom, sodat MY HUIS KAN VOL WORD”. Sien jy dat
God elke vierkante millimeter van Sy huis gevul wil hê met sy
kinders? Gaan dring by hulle aan om te kom... verniet! Daar staan
nêrens in die gelykenis dat die mense iets moet betaal nie. Free
lodging, forever. En toe dié by wie die Here aangedring het om te
kom, nie wou nie, sê Hy toe: “Los dit”. Los hulle. Openbaring 3:20
sê:- “Kyk, ek staan by die deur en ek klop…”- 'n Sagte, kalm,
“gentle” stem wat smeek en uitnooi. KOM!
Onthou jy hoe ons as kinders gesê het as ons iemand
iets smeek en die persoon wil nie? Dan het ons gesê: “Stick dit”.
Toe se die Here: “Gaan haal dan die kreupeles, armes en blindes om
My huis vol te maak”. Ek sal vir die kreupeles weer 'n huppel in die
stap gee, die blindes weer oprig om te sien, en die armes weelde wat
hulle nie sal glo nie. En die wat dit nie wil hê nie, kies
outomaties die krot van die hel.
Gaan dring by die mense aan om in te kom, My huis
moet vol word. Jy sien, daar is baie plek, genoeg vir almal. Dis net
verstommend hoe roekeloos mense omgaan met die plek waar hulle hulle
Saligheid gaan deurbring. Almal, maar almal, gaan die ewige lewe he,
maar nie op dieselfde plek nie. Party sê, nee man, onthou ek het
osse gekoop, 'n ander ou het die grondjie en nog een 'n nuwe vrou.
Maar, dan mis mens die beste Bruidegom denkbaar, Jesus Christus.
Matt 7:14: “Maar die poort wat na die lewe lei, is
nou en die pad daarheen smal, en dié wat dit kry, is min."
Volgens hierdie teks gaan die minderheid mense in die
hemel eindig, en eindig mense teen 'n enorme tempo in die verderf.
Die vraag is: Maak dit vir jou saak? En nog meer, maak dit vir jou
genoeg saak om iets daaraan te doen? Vandag sê die Here vir jou en
my, gaan sleep die mense nader, dring by hulle aan, moenie nee vir
'n antwoord vat nie, hou aan, smeek, sleep, want my huis moet vol
word. Nog, nog, meer, jou broer, jou swaer, buurman, jou pa, jou
kind, kollega, almal.
Wat is dit wat mense weghou uit God se huis? Wat is
die osse, stukkies grond, vrou-vat wat vir mense belangriker is? Is
dit dalk poppie by die werk, of liefde vir die bottel, dalk Mammon?
Of dalk onvergewensgesindheid? Jesus het mos gesê dat jy nie vergewe
word as jy nie kan vergewe nie.
Maak reg, kies, die trek lorrie is dalk al op pad.
Gaan jy of bly jy? Os of paleis? Kies man, kies. Gaan smeek daai
ander, klop die kollega op die skouer en sleep hom saam. Kom jy of
bly jy?
Die Koning se huis moet vol word!
|