Christenskap
word nogal partykeer ‘n komplekse storie. Daar word gesê dat die
internet ons met so baie inligting bombardeer, dat ons ongekende
onderskeidingsvermoë aan die dag moet lê om te sif tussen feit en
fiksie. Dit geld ook vir Christelike idees, konsepte, ideologieë, en
allerlei gelofies en gebruike. Hoe meer mense, hoe meer opinies. So
word ons as Christene dan ook soms belas met ander se gelowe en
gebruike, tot op ‘n punt waar Christenskap net eenvoudig nie meer
lekker is nie. Die laste word te swaar, ons voel ontoereikend, kan
net nie goed presteer nie en meer en meer gebruike word deur ander
op ons afgedwing.
Lukas 11:37-39, 46
Net toe Jesus klaar gepraat het, het 'n Fariseër Hom uitgenooi om by
hom te kom eet. Hy het toe in sy huis ingegaan en aan tafel plek
ingeneem. Die Fariseër was verwonderd toe hy sien dat Jesus nie die
gebruik nagekom het om voor die ete eers hande te was nie. Maar die
Here sê vir hom: “Ja, julle Fariseërs! Julle maak die buitekant van
bekers en borde skoon, maar binnekant is julle self vol inhaligheid
en gemeenheid. Daarop antwoord Hy: “Julle wetgeleerdes! Ellende wag
vir julle ook, want julle laai ondraaglike laste op die mense, en
self verroer julle geen vinger om die laste te dra nie"
Jesus aan die woord oor ondraaglike laste. Die
Fariseërs was goed hiermee, want hulle het nie net die wet onderhou
nie, maar was ook besonderlik ingestel op wettiese reëls en
voorskrifte. Die Jode het gevolglik baie swaar gekry met al hierdie
reëls en hulle godsdiensbeoefening het vir hulle meer ‘n las as iets
anders geword. Wat sleg was hiervan, is dat dit slegs “godsdiens”
was en daar geen sprake was van ‘n verhouding met God nie. Die
lekker het ontbreek, die Fariseërs het regte pretbederwers geword.
En net so, is Christenskap vandag vir baie mense moeilik, want ons
kan nie alles byhou wat ander glo nie. Wat maak ons met ander se
opinies, en veral as dit ‘n las is wat iemand anders op ons plaas?
1 Kor 8:8-13
Wat ons eet, bring ons egter nie nader aan God nie. As ons nie eet
nie, verloor ons niks nie; en as ons eet, wen ons niks nie. Maar pas
op dat hierdie vryheid van julle nie vir dié wat swak is, 'n
aanleiding tot sonde word nie. As jy wat hierdie kennis het, in 'n
afgodstempel gaan eet en iemand met 'n swak gewete sien jou, sal dit
hom dan nie aanmoedig om die vleis as afgodsoffer te eet nie? Dan
gaan die swakke verlore deur hierdie kennis van jou, en dit 'n broer
vir wie Christus gesterf het. Deur so teen die broers te sondig en
'n las op hulle swak gewetens te lê, sondig julle teen Christus.
Daarom, as ek deur wat ek eet, my broer laat struikel, sal ek nooit
weer vleis eet nie: ek wil nie my broer se val veroorsaak nie.
Paulus het ‘n wonderlike oplossing. Baie eenvoudig:
hy vra net vir wedersydse respek. As die gewoontes vir iemand
belangrik is, dan sal hy net sorg dat hy nie die ander een laat
struikel nie. Sien jy dat Paulus dus by omstandighede aanpas, en
daarop reageer, sodat die ander nie tot ‘n val kom nie? Hy gebruik
nogal ‘n kontroversiële situasie want vleis wat aan ‘n afgod geoffer
was mag beslis nie geëet word nie. Vers 8 sê: wat ons eet bring ons
egter nie nader aan God nie. As ons nie eet nie, verloor ons niks
nie, en as ons eet wen ons niks nie.
Gal 5:1-12
Christus het ons vry gemaak om werklik vry te wees. Staan dan vas in
hierdie vryheid en moet julle nie weer onder 'n slawejuk laat
indwing nie. Kyk, ek, Paulus, sê vir julle: As julle julle laat
besny, sal Christus vir julle geen betekenis hê nie. Ek sê dit weer
nadruklik vir elkeen wat hom laat besny: Hy is verplig om die hele
wet van Moses te onderhou. Julle wat van julle sonde vrygespreek wil
word deur die wet te onderhou, julle het julle band met Christus
verbreek, julle het die genade van God verbeur. Wat ons betref, deur
die werking van die Gees is dit ons hoop en verwagting dat ons deur
te glo, vrygespreek sal word. In Christus Jesus is dit nie van
belang of jy besny is of nie. Al wat van belang is, is geloof wat
deur die liefde tot dade oorgaan. Julle was so goed op pad. Wie het
julle verhinder om die waarheid te bly gehoorsaam? Wie het julle
omgepraat? Nie God nie; Hy roep julle tot gehoorsaamheid. 'n Bietjie
suurdeeg deurtrek die hele deeg. Ons band met die Here gee my die
vertroue dat julle net so sal dink soos ek. Maar die man wat vir
julle in verwarring bring, wie hy ook al mag wees, God sal hom
straf. Wat my betref, broers, as ek nog verkondig dat 'n mens besny
moet word, waarom word ek dan nog vervolg? Dan is die kruis as
struikelblok mos uit die weg geruim. Ek wens die mense wat dié
verwarring onder julle stig, wou hulleself dan maar heeltemal
ontman!
Sjoe, Paulus gee hier darem maar ‘n reguit en harde
woord. Sien jy hoe erg die Bybel is oor mense wat ander so in
verwarring bring met hulle gewoontes en gebruike? Miskien sou Paulus
vandag oor dinge soos Kersfeesvieringe, eet gewoontes, gebruike, die
doop, ens. op dieselfde wyse gereageer het. Miskien is die vraag
vandag: Is jy geestelik volwasse genoeg sodat jy self die Bybel kan
lees en self kan besluit oor wat God verwag? Of laat jy toe dat
ander jou so belas dat net ‘n stel reëls oorbly van jou
Christenskap, en dit die vreugde en vrede van ‘n liefdesverhouding
met die Here blus?
Dis amper Kersfees. Wanneer ons van
Kersfees praat, is daar twee groeperinge. Die een groep wat daarna
uitsien, en wat daarvan ‘n spesiale gebeurtenis gaan maak. Dan is
daar dié groep Christene wat nie Kersfees gaan vier nie. Hulle sê
dis ‘n heidense gebruik, dit is die verkeerde datum, die Bybel sê
nie ons moet dit doen nie, ens. Albei groepe is wedergebore
Christene. Ek respekteer albei groepe.
Verder word daar gesê die Kersfeesboom is heeltemal
uit. Mense wat só se gebruik gewoonlik hierdie teks om hulle siening
te staaf:
Jer 10:1-6
Luister wat die Here vir julle sê, Israeliete! So sê die Here:
Moenie die gewoontes van die heidennasies aanleer nie. Moenie bang
wees vir die tekens aan die hemel nie, want dit is die heidennasies
wat daarvoor bang is. Hulle voorskrif om 'n god te kry, is sinloos:
hulle kap 'n boom in die bos af, 'n ambagsman kerf dit uit met 'n
beitel, hy versier dit met silwer en goud, met hamer en spyker slaan
hy dit vas dat dit nie omkantel nie. Sulke gode kan net so min praat
as 'n voëlverskrikker in 'n komkommerland; hulle moet gedra word,
want hulle kan nie loop nie. Moenie vir hulle bang wees nie, want
hulle het geen mag om goed of kwaad te doen nie. Waar is iemand
soos U, Here? U is groot, die mag van u Naam is groot.
Sommige mense glo Jer 10 verwys na ‘n Kersboom. Hulle
sê jy kap die boom af en versier hom en hy word nou ’n afgod. Ander
sê ek aanbid nie die boom nie, ek soek nie ‘n ander god nie,
inteendeel, ek vier juis Kersfees om my Koning se geboorte te
herdenk. Die boompie is sommer net ‘n simbool van Kerstyd. Die
probleem is wanneer die een groep nie die ander groep se mening
respekteer nie. Wat is my mening? Dis eenvoudig, doen soos jy glo.
Ek aanvaar nie meer ondraaglike laste wat mense op my plaas nie. Ek
is mooi groot, ek is ‘n wedergebore Christen, en ek kan self besluit.
Ek wil my Christenskap ten volle geniet. Ek stel belang in God se
opinie, maar leer wel graag by ander oor hulle menings.
Dieselfde geld vir die eet van Halaal-kos. Sommige
mense kom ernstig in opstand daaroor en wil nie eet waar daar kos
voorberei is vir ander gelowe nie en is onrustig oor kos met die
Halaal teken daarop. Is dit nie juis ook waaroor 1 Kor 8 gaan nie?
Jy gaan mos nie jou geloof in Christus verloor nie, of hoe?
Rom 14:6
Die een wat 'n bepaalde dag op 'n besondere wyse hou, doen dit
tot eer van die Here. Die een wat alles eet, doen dit tot eer van
die Here, want hy dank God. En die een wat nie alles eet nie, doen
dit tot eer van die Here, en ook hy dank God.
Heb 13:7-9
Dink aan julle voorgangers wat die woord van God aan julle verkondig
het. Let op hulle lewenswandel tot die einde toe, en volg die
voorbeeld van geloof wat hulle gestel het. Jesus Christus is gister
en vandag dieselfde en tot in ewigheid. Moet julle nie laat meevoer
deur allerhande vreemde leringe nie. Die goeie is daarin geleë dat
die hart deur genade versterk word, nie deur eetgebruike nie. Dié
wat hulle aan hierdie gebruike gehou het, het niks daarby gebaat nie.
Moet jou nie laat meevoer deur allerhande vreemde
leringe nie. Die hart word deur genade versterk, nie deur gebruike
nie. Jou liefde vir Christus moet jou gebruike en gewoontes bepaal.
Iemand het eendag ‘n baie waar ding gesê: enige gemeente, of
Christelike groep, sal noodwendig leemtes hê, jy sal waarskynlik nie
met alles saamstem nie, want mense is mense. Moet egter nie toelaat
dat mense se gebruike jou van die Here af weghou nie.
As jy vir God wil wys hoe lief jy vir Hom is, gaan jy
dit wys in jou liefde vir mense - nie gebruike of rituele nie. Of
wettiese reëltjies nie. Ek sien ‘n foto van ‘n ortodokse Jood wat by
die klaagmuur in Jerusalem staan en ‘n selfoon teen die muur druk
sodat die een aan die anderkant ook by die muur kan bid. Dink jy dit
het iets met sy liefde vir die Here te doen? Dis net godsdiens. Baie
fieterjasietjies is nét godsdiens.
Lééf vir die Here, ontdek Hom, kom al hoe nader aan
Hom, wees lief vir Sy skepsels, en geniet jou Christenskap.
|