"Shalom!
Baruch Be Ha Bi'Shem, Adonai". Geseënd is hy wat in die Naam van die
Here kom … of so iets. Of dalk kan ek sommer net sê: "Hallo jong,
ons gaan lekker saam met Jesus kuier vanoggend!" of "Jitte, dis pret
om die Here saam met jou te aanbid". Of moet ek dalk eerder sê: "Kom
ons onderwerp onsself vanoggend in nederigheid voor Yeshua, seun van
Yahweh"? Al hierdie moontlikhede is reg - so dink ek.
Matt 11:25-30
25 Daardie tyd het Jesus gesê: "Ek prys U, Vader, Here van hemel
en aarde, dat U hierdie dinge vir slim en geleerde mense verberg het
en dit aan eenvoudiges bekend gemaak het.
26 Ja, Vader, so was dit u genadige bedoeling.
27 "My Vader het alles aan My toevertrou, en niemand ken die Seun
nie, behalwe die Vader; en ook ken niemand die Vader nie, behalwe
die Seun en elkeen aan wie die Seun Hom wil bekend maak.
28 "Kom na My toe, almal wat uitgeput en oorlaai is, en Ek sal julle
rus gee.
29 Neem my juk op julle en leer van My, want Ek is sagmoedig en
nederig van hart, en julle sal rus kry vir julle gemoed.
30 My juk is sag en my las is lig."
'n Eenvoudige boodskap. Klink dit
nie vir jou ongelooflik ongekunsteld en gemaklik nie? So sonder
aansit, groot woorde en voorwaardes. Jesus se uitnodiging vir jou en
my: "Kom, Ek is sagmoedig en nederig van hart". Jesus met 'n
"marshmallow"-hart (met respek gesê!). Hy is ongekompliseerd, sonder
fieterjasies. Dink jou in, jy loop daar in Jerusalem en Jesus loop
verby jou. Wanneer Hy jou sien verhelder Sy gesig, Sy stappie raak
so bietjie dringend en haastig. Met 'n breë glimlag op Sy gesig gooi
Hy sy arms oop en druk jou met mening teen Sy bors was. Gee jou
sommer so 'n piksoentjie op jou voorkop en sê: "Kom, Ek wil saam met
jou kuier!" Lekker né? Dís Jesus, jou Redder en Verlosser aan die
werk. Ongekompliseerd, ongekunsteld, liefdevol.
Voel jy nie ook deesdae so bietjie
geïntimideer deur ideologieë en dogma en sogenaamde nuwe openbarings
nie? Ek kry die anderdag 'n e-pos met 'n amper militaristiese
strekking oor 'n sogenaamde nuwe openbaring - God wat iets aan
iemand in die Midde-Ooste openbaar, wat uitwys dat ons as Christene
skuldig is aan sekere goed, sonder dat iemand dit ooit geweet het!
Verskriklik om te dink: hier sit ons voorouers jare gelede rondom
die vuur en langs die ossewa, en mis die punt hééltemal, want hulle
het te vroeg vir hierdie "nuwe openbaring" geleef… en pleeg onwetend
die een of ander groot sonde! Intussen sit hulle net in
afhanklikheid en nederigheid en bid vir krag vir nog 'n swaar dag
wat voorlê. So ook probeer die arme verhongerde vrou in Zimbabwe
miskien uitroep: "Nkosi, stuur vir my kind wat sterf bietjie kos".
Sy weet niks van die dreigende eindtye nie, of dat sy dalk bevryding
moet kry sodat dit manna kan reën nie. Of meer nog, is sy "reg"
gedoop, en waaruit sal sy haar nagmaalwyn drink? Ek wonder …
oorkompliseer ons nie dinge soms te veel nie? Ja, miskien moet
hierdie vrou ook nog die boodskap wat sy so pas gekry het vir sewe
ander in die sand gaan skribbel, en natuurlik ook weer voor die een
wat dit pas vir haar gegee het - net om te wys sy's nie skaam nie,
weet jy? (Ons stuur mos deesdae sulke e-posse vir mekaar …) NEE,
haar geloof in haar Skepper is ongekompliseerd, net sy en God.
Jy weet, Jesus het ongekompliseerd
te werk gegaan. Geen moeilike wette, geen gekompliseerde
openbarings. Hy het nie eens gekom as 'n Fariseër of 'n
Skrifgeleerde nie. Nee, sommer net as 'n skrynwerker.
Luk 2:46-47
46 Na drie dae het hulle Hom by die tempel gekry waar Hy tussen
die geleerdes sit en na hulle luister en hulle uitvra.
47 Almal wat Hom gehoor het, was verbaas oor sy insig en sy
antwoorde.
Klink nogal of die geleerdes nie so geleerd was nie, of hoe? Jy
sien, die geleerdes het in daardie tyd met moeilike konsepte, en
wettiese godsdienstige reëls gekom. Sóveel dat Jesus vir die
Fariseërs berispe het oor die ondraaglike laste wat hulle op die
mense gesit het.
1 Kor 1:19
Die wysheid van die wyses sal Ek vernietig en die geleerdheid van
die geleerdes sal Ek tot niet maak.
Matt 11:25
Daardie tyd het Jesus gesê: "Ek prys U, Vader, Here van hemel en
aarde, dat U hierdie dinge vir slim en geleerde mense verberg het en
dit aan eenvoudiges bekend gemaak het.
…. Laat my nogal dink aan 'n sekere plaasboer daar van Natal …
Vir wie moet ons luister? Ek dink
ons moet maar soms vra: "Sê wie?", want net té veel mense wil "sê
jou sê"! Ek dink ons moet vir Jesus luister.
Hoe lyk ongekompliseerde
Christenskap?
- Moet daar geleerdes wees? Ek dink beslis so - ek het al só baie by
die Stefan Joubert's van hierdie wêreld geleer.
- Moet profesieë gebruik word? Natuurlik, maar verseker nie
waarsêery nie. Vir my is daar 'n eenvoudige toets: As 'n profesie
iets van 'n toekomsvoorspelling bevat, is ek versigtig daarvoor.
- Openbaar God Homself nog op 'n besonder manier aan mense, met 'n
boodskap vir ander? Jip, ek dink so. Maar .. daar is deesdae BAIE
"cheap, spiritual talk" in omloop. Hopeloos te veel! Ek glo in elk
geval net 10% daarvan.
Hoe is dit by Jesus? Kom ons gaan
weer terug na die stofstraat in Jerusalem. Nadat Jesus jou 'n vet
druk gegee het, vra Hy hoe dit met jou gaan, en dan praat jy met Hom
soos met 'n vriend. Ja, Hy is heilig, maar nie 'n onverbiddelike MD
nie. Hy het regtig 'n "oop-deur-beleid". Ja, Hy is Koning, maar nie
'n diktator nie. Redder, maar nie veroordelend nie. En nee, as jy
Hom aanspreek as Pappa, dan gryp Hy nie Sy swart boekie en skryf jou
naam op omdat jy Hom "verkeerd" aangespreek het nie. En as jy op sy
skoot wip, dan is daar nét deernis en sagtheid in Sy oë, want jy, sy
kosbare besitting is by Hom.
Ongekompliseerd, ongekunsteld. Hy
"laaik" jou nes jy is, man!
Ef 4:14
Dan sal ons nie meer kinders wees nie; ons
sal nie meer soos golwe op en af en heen en weer geslinger word deur
elke wind van dwaalleer as vals leraars ons met hulle slinksheid en
listigheid op dwaalweë wil wegvoer nie.
|