Ek
wonder al lankal oor hierdie vraag: Ken ek die Here? Ken ek Hom
regtig? As ek daarop aanspraak maak, moet ek vra: Wat ken ek van Hom?
Wat weet ek werklik van Hom? Weet ek hoe Hy dink? Weet ek wat Hy
beplan vir my lewe? Weet ek wat Sy plan was toe iets spesifiek
gebeur het? Mag ek Hom aanhaal? Mag ek namens Hom praat? As ek sê:
Ek ken my vrou deur en deur na 29 jaar getroude lewe, is dit werklik
waar? Of my kinders? Weet ek regtig wat in die diepste van die
diepte van hulle harte aangaan? Of kan ek net dit weet wat hulle
direk met my kommunikeer? Terug na Vroulief toe: het ek die kennis
wat sy het? Dan sê ek: nee, ek weet absoluut niks van die vakgebiede
waarin sy gestudeer het nie, ek kan dus sê dat ek van daardie
gedeelte van haar lewe nie veel ken nie. So ook met my kinders. Dan
moet ek die vraag eintlik weer bekyk en sê: as ek nie alles weet wat
hierdie persoon weet nie, kan ek hom/haar nie regtig deur en deur
ken nie. Dalk ken jy ook nie jou lewensmaat so goed as wat jy dink
nie.
1 Kor 13:8-12
Die liefde vergaan nooit nie, maar die gawe van profesie sal verdwyn,
die gawe om ongewone tale en klanke te gebruik, sal ophou, en dié
van kennis sal uitgedien raak. Want ons ken maar gedeeltelik, en ons
profeteer maar gedeeltelik, maar wanneer die volledige kom, sal wat
gedeeltelik is, uitgedien wees. Toe ek 'n kind was, het ek gepraat
soos 'n kind, gedink soos 'n kind, geredeneer soos 'n kind. Maar
noudat ek 'n man is, is ek klaar met die dinge van 'n kind. Nou kyk
ons nog in 'n dowwe spieël en sien 'n raaiselagtige beeld, maar
eendag sal ons alles sien soos dit werklik is. Nou ken ek net
gedeeltelik, maar eendag sal ek ten volle ken soos God my ten volle
ken.
Eendag sal ons alles sien soos dit werklik is. Ons
weet maar min van God. Net die noodsaaklike dele wat ons in die
Bybel lees, en dan dit wat Hy direk aan ons openbaar. Wat weet ons
werklik van Hom? Hoeveel weet ons werklik wat Hy weet? Hy wat alles
weet van wat was, is en kom.
Ek sit verlede week op die strand en kyk na die sand,
en ek wonder, hoeveel sandkorrels is in my hand? Miskien sal ek dit
getel kan kry as ek laaaaank daarmee besig bly. En hoeveel korrels
is in ‘n kind se strand emmertjie? Daar is ‘n getal en dit kan dalk
akkuraat getel word. Maar, hoeveel sandkorrels is in ‘n kruiwa, of
op ‘n 1 ton bakkie? Nou begin hierdie syfer enorm groot word. Maar
daar ís ‘n akkurate syfer. Daar moet net nie ‘n paar afwaai nie...
Soos ek oor die strand kyk besef ek, hier is ‘n syfer wat “mind
boggling” groot raak. Toe dink ek: die sand op al die strande op
aarde, al die duine, onder die see, tussen jou paveiselstene, alles,
alles bymekaargetel, HET ‘n getal. ‘n Baie akkurate getal. En God
ken daardie getal. Hy weet presies hoeveel Hy gemaak het, tot op die
laaste syfer. Daar is ‘n “eindige” getal. Wiskundiges van die
Universiteit van Hawai reken die sand op die strande van die wêreld
kan omtrent 75 X 1017 (dit is 75 met 17 nulle agter!)
wees. Dit is ‘n verskriklike getal! Sewe quintillion vyf quadrillion
sandkorrels – en dit net op die strande. Ons weet nie hoeveel
nie.... maar God wéét!
Jy kan bereken hoeveel keer jy al gaan slaap het in die aand,
omtrent hoe ver jy al met ‘n motor gery het, hoeveel koekies seep jy
al opgebruik het, hoeveel happe kos jy al geneem het, hoeveel keer
jou hart al geklop het, ens. ens. Ons kan dit min of meer, op ‘n
gemiddeld probeer uitwerk, maar God weet die presiese getal!
Hy weet alles. Hoeveel hare is op jou kop? Dis nou as
jy nog so gelukkig is om hare te hê! ‘n Gemiddelde mens het ongeveer
100 000 hare, maar dit kan soveel as 200 000 wees. Rooikoppe het die
minste hare – so 90 000, en blondines soveel as 140 000. Die
hoeveelheid hare wat egter op hierdie oomblik op jou kop is, is ‘n
vaste getal, en God ken daardie getal! “Van julle is selfs die
hare op julle kop almal getel” (Matt 10:36) Hoe hou jy daarvan?
Daar is nou op hierdie oomblik ‘n syfer, en God ken daardie syfer,
en die oomblik as een uitval, en die syfer verander, dan weet God
dit.
Weet jy dalk hoeveel sterre is daar? ‘n Galaksie het
‘n biljoen sterre. En daar kan soveel as 290 biljoen galaksies wees.
Ons weet nie, maar God weet presies hoeveel. Wetenskaplikes reken
daar is so om en by 9 X 1021 sterre! Dit is 9 biljoen
triljoen, of te wel 9 sextillion. “Hy besluit oor die getal van
die sterre en gee elkeen ‘n naam” (Ps 147:4). Sjoe, kan jy 9
biljoen triljoen name uitdink?
En atome? 6.022 x1023 in ‘n mol atome. So
7 X 10 27 atome in jou liggaam, waarvan God van elke
enkele een bewus is. Dit is 7 oktillion. In die hele heelal is daar
so 1068 atome. Moenie hierdie getal geringskat nie. God
besit baie atome, en Hy weet waar elkeen van hulle is.
Hoeveel mense is daar? 20 April 2010 was it 6, 815,
999, 687, volgens statistiek. Maar dit sê nie hoe laat dit op
daardie dag was nie, want daar word heeltyd babas gebore, en die
heeltyd sterf daar mense. Ons weet die syfer kan met honderde
duisende uit wees. Ons weet nie wat daardie syfer is nie, maar God
weet. Hy ken die oomblik toe daar presies 6, 815, 999, 687 mense
was. En weet jy wat? Hy is lief vir elke enkele ene! Vir jou ook,
jong!
God weet alles. Hy ken ons deur en deur. Maar kan ons
Hóm werklik ken? Ek dink: net ten dele. Daarom moet ons versigtig
wees as ons Hom aanhaal, as ons uitgesproke raak teenoor ander mense
oor God se plan vir hulle lewens. Ons moet regtig versigtig wees oor
wat ons oor ander mense se lewens uitspreek “in die Naam van die
Here”. Ons moet onsself nie met God probeer gelykstel nie, ons weet
niks! Maar, die voorhangsel is oop. Gaan sélf na God toe, Hy sal
Homself aan jou openbaar. Hy openbaar baie van Homself in Sy Woord,
en in Sy openbaring aan jou in persoon. Maar dis maar net ‘n klein
bietjie. Ek ken vir vroulief baaaaie beter as 29 jaar gelede. Ek ken
glad nie vir
Barack Obama
nie, want ek het nog nie een
enkele oomblik in sy geselskap deurgebring nie. Ek kan net die
bietjie weet van wat ander van hom vertel. En so leer ons die Here
ken as ons besig is met Hom. Hy weet alles van jou af, selfs
miljoene goed wat jy nie eers van jouself weet nie.
Bly in Hom, en Hy bly in jou.
|