... en daar het Desember toe nou uiteindelik aangebreek! Hoe voel jy daaroor? Sê jy dalk: Uiteindelik! Dankie tog, ek het dit gemaak! Net 15 dae van werk, dan kan ek rus! Nadat ons deur ‘n mynveld ge-leopard crawl het met tonne bagasie op die rug, oor en onder deur die moeilikste hindernisse, dikwels ongelukkig, dikwels vermoeid, is ons nou amper aan die einde van die jaar. Dankie tog 2010 is verby.... ons kan nou amper begin lewe. Ons kan mos nou begin lewe? Gaan ons? En dan .... o koek, 2011, hier kom ons! 

Jare gelede het Fanus Rautenbach ‘n boek geskryf met die titel: “Vandag is môre se gister”. 2010 is op pad uit, verlof lê vir jou voor. My vraag vandag aan jou is eenvoudig: Hoeveel het jy in hierdie jaar geléwe? Hét jy gelewe? Vir hoeveel dae het jy by lewe stilgestaan? Hoeveel keer het jy gesê: VANDAG gaan ek iets van hierdie lewe maak? VANDAG gaan ek myself bederf met lewe! Nie net bestaan nie, regtig léwe. Was daar vir jou hierdie jaar enigsins ‘n “vandag”? Vandag is môre se gister. Of het jy konstant jou paspoort laat “stamp” na môre of gister toe? Dalk wil jy nie by vandag stilstaan nie, want gister was sleg en môre is al op pad. Iemand het eendag gesê: “A slower day comes ... not!”  

Spreuke 27:1
Moenie roem oor wat jy môre verwag nie, jy weet nie wat die dag sal oplewer nie. 

Hierdie jaar het baie môres gehad. Elke dag het ‘n gister gehad. Maar hoeveel van daardie gisters was vir jou ‘n vandag? My punt vandag is eenvoudig – min mense wil vir vandag leef, want vandag het nie tyd vir leef nie. Vandag is te vol, vandag is propvol dinge. Vandag se besluite is gister al geneem en die planne het niks vir gister ingesluit nie. Dis dalk hoekom die Here nie veel met ons regkry vandag nie. Ons wil hê die Here moes betyds ‘n plekkie vooruit boek en as Hy nie ons dagboek kon haal nie, is Hy en Sy werk vandag neusie verby. Intussen werk die Here eintlik vandag. 

Spreuke 27:1 sê jy weet nie eens of daar ‘n môre is nie, en dan het ons hom alreeds volgeprop. Is jou lewe ook vasgevang in hierdie tydlose tydmasjien? Jy hoor die getik van die klok, maar hy het nie wysers nie.  

Vandag is môre se gister, maar vandag is soek – ons kry hom nie. Die toebroodjie se dik snytjies weerskante van vandag verswelg hierdie dun smeerseltjie wat ons vandag noem. 

Pred 3:1-9
Elke ding het sy vaste tyd, elke ding in hierdie wêreld het sy tyd: daar is 'n tyd om gebore te word, 'n tyd om te sterwe, 'n tyd om te plant, 'n tyd om plante uit te trek, 'n tyd om 'n lewe te neem, 'n tyd om 'n lewe te red, 'n tyd om af te breek, 'n tyd om te bou,  'n tyd om te huil, 'n tyd om te lag, 'n tyd om te treur, 'n tyd om van blydskap te dans, 'n tyd om klippe weg te gooi, 'n tyd om hulle bymekaar te maak, 'n tyd om te omhels, 'n tyd om weg te bly van omhelsing af, 'n tyd om aan te skaf, 'n tyd om te laat wegraak, 'n tyd om te spaar, 'n tyd om weg te gooi, 'n tyd om te skeur, 'n tyd om toe te werk, 'n tyd om stil te bly, 'n tyd om te praat, 'n tyd om lief te hê, 'n tyd om te haat, 'n tyd vir oorlog, 'n tyd vir vrede. Wat kry die mens vir die werk waarmee hy hom vermoei?  

Sien jy hoe mnr. Prediker eintlik tydloos oor tyd praat, sonder ure- en minute- kompartemente? Maar mnr. Prediker, waar sal die tyd vandaan kom om elke ding ‘n vaste tyd te gee? 

Die Here wil vandag vir jou die oorvloedige lewe gee. Die Here kan nie gister met jou praat nie, want dis verby. En wat van môre? Nee, dit moet vandag gebeur. Wanneer het die Here planne vir jou? Vandag. Oor watter deel het jy die beste beheer? Oor vandag. Wil jy nie dalk so bietjie jaloers vasklou aan vandag nie? Dis tog al waarvan jy min of meer seker is. Wat gaan jy met vandag maak? Gaan jy net vandag om “bestaan”? Of is vandag net gister se môre? Kom ons kyk of ons nie dalk vandag ‘n paar besluite kan maak wat vandag die moeite werd gaan maak nie. Dalk is vandag die ideale tyd om more op sy plek te sit. Dink bietjie hoe kan vandag vir jou 24 sinvolle ure hê.   

Josua 24:15
Of, as julle dit nie goedvind om die Here te dien nie, kies dan vandag wie julle wil dien: die gode wat julle voorvaders gedien het anderkant die Eufraat, of die gode van die Amoriete in wie se land julle woon. Wat my en my familie betref, ons sal die Here dien. 

Kies vandag. Hoe hou jy daarvan? Gaan dit tyd van jou dag neem om vandag te kies om die Here te dien? Of wil jy dit  liewer môre eers kies? Dis vandag ‘n goeie tyd om as hoof van jou huis jou voet neer te sit en te sê: gesin, dis wat ons gaan doen.  

En wat van daardie knaende sorge en bekommernis?

Matt 6:34
“Moet julle dus nie oor môre bekommer nie, want môre bring sy eie bekommernis. Elke dag bring genoeg moeilikheid van sy eie.”

Sorteer liewer vandag so paar dinge uit en los môre vir môre. Hou tog op om jou oor môre te bekommer. Besluit vandag om die gister-sleepwaentjie af te hak en ry weg van die vervlakste ding af, want hoe meer jy hom sleep hoe meer begin hy om jou in môre in te stoot. Dan verloor jy in elk geval beheer oor alles. 

Hoe lyk dit, is dit nie dalk tyd om te kyk hoe vandag se seëninge lyk nie? Het jy ‘n hond op jou werf? Kom ek belowe jou, jou hond leef beter as miljoene mense op aarde – glo dit maar. Die Bybel sê kos en klere behoort genoeg te wees.

1 Tim 6:8
As ons dan kos en klere het, moet ons daarmee tevrede wees.

Spreuke 17:22
‘n Vrolike mense is ‘n gesonde mens, ‘n neerslagtige mens raak uitgeput. 

Hoef ek meer hieroor te sê? Moenie vandag met ‘n fatalistiese houding leef omdat môre donker lyk nie. Gee die Here VANDAG ‘n kans om jou te verkwik, te restoureer, en nuut te maak. Die Here werk die beste in “vandag”.