Die ander dag sê my dogter vir my: Pa, wat is dit met julle ou mans? As julle bymekaar kom, praat julle altyd oor die oorlog. Sy verwys natuurlik na ons lekker, sorgvrye, vakansie lewe, rondlê tyd, wat ons “diensplig” genoem het. Daardie tyd van twee jaar se “paid holiday” van oom PW en seuns. Laat slaap, heerlike kos wat deur die korporaal aangedra word.... sjoe! verstik so ‘n paar manne nou amper aan hulle koffie, want só was dit toe nou nié in die weermag nie! As ons bleskop ouens, wat ons six pack van daardie tyd verruil het vir ‘n vaatjie, só praat oor die weermag, probeer ons altyd kyk wie nou eintlik die swaarste gekry het.  Dan kom die woord “vasbyt” in jou kop. Ons moes vasbyt, en byt het ons gebyt. 

Die Bybel praat van vasbyt (volharding): 

Rom 5:1-5
God het ons dan nou vrygespreek deurdat ons glo. Daarom is daar nou vrede tussen ons en God deur ons Here Jesus Christus. Deur Hom het ons in die geloof ook die vrye toegang verkry tot hierdie genade waarin ons nou vasstaan. En ons verheug ons ook in die hoop om deel te hê aan die heerlikheid van God. Dit is egter nie al nie. Ons verheug ons ook in die swaarkry, want ons weet: swaarkry kweek volharding, en volharding kweek egtheid van geloof, en egtheid van geloof kweek hoop; en dié hoop beskaam nie, want God het sy liefde in ons harte uitgestort deur die Heilige Gees wat Hy aan ons gegee het.     

Swaarkry kweek vasbyt, vasbyt kweek egtheid van geloof.

Die woord vasbyt sê eintlik só baie. Onthou jy in die ou cowboy foto boekies: die geneesheer, “Ruiter in Swart”, sny ‘n koeël uit met ‘n stomp Okapi-mes, en mnr. Cowboy brul van die pyn, terwyl hy vasbyt op ‘n 45 Magnum patroon tussen sy tande..... dis nou vasbyt! So moet ons as Christene ook vasbyt. Ons swaarkry leer ons om vas te byt, en as ons vasbyt groei ons geloof, en dit gee ons hoop.  

Jy sien, die hele ding wat Paulus hier in Rom 5 aanraak, loop uit op ‘n groot einddoel. As jy net die einddoel in die oog kan hou, kan jy deur die swaarkry kom. Dit vra dissipline. Swaarkry leer jou dissipline. Het jy ook al gesê: as die jeug van vandag net so bietjie army toe kon gaan.... 

Kyk hoe gaan dit met party mense wat nét lekker in hulle lewe gehad het, geen teenstand, geen gesukkel gehad, dan kan mens sien dat sulke mense minder vasbyt in hulle het. In die boek “Finishing Strong” sê Steve Farrar dat min mense wat goed begin goed eindig. En hy praat hoofsaaklik van die Geestelike wêreld, dus mense wat in hulle geloofslewe uitmekaarval in hulle latere lewe. Jy sien, as jy nie kan vasbyt in jou werksomstandighede nie – veral waar daar teenstand van watter aard ook al kom – soek jy ander werk. Soms gaan dit swaar in die huwelik, dan wil jy daar uit. Party vriendskappe raak krapperig, dan beëindig ons dit, want ons kan nie uithou en aanhou nie.  

En wat van jou verhouding met die Here? As jy nie kan volhard in jou verhouding met God nie, beland jy dalk in die hel. Moed opgee met die Here is nie ‘n opsie nie. Kan jy vasbyt in die geloof?

Matt 10:21-22 "Die een broer sal die ander uitlewer om doodgemaak te word, en selfs 'n pa sy kind; kinders sal teen hulle ouers in opstand kom en hulle doodmaak. Julle sal ter wille van my Naam deur almal gehaat word. Maar wie tot die einde toe volhard, sal gered word.   

Wie tot die einde toe vasbyt... Kom ons praat gou weer oor die weermag-tyd. Die woord “kontak” was ‘n vreeslike woord. Dis uitgeskreeu as Jerry die Terry op jou begin skiet. H K G M – hier kom groot moeilikheid! Dis vasbyt wat maak dat jy daardie geveg deurveg, want as jy weghardloop word jy in die rug geskiet. Mense vlug te maklik weg van die lewe se probleme af. Dan hol hulle. Intussen hol hulle ook weg van die oplossings af, en hol hulle dalk net in nuwe probleme in. Het jy al ‘n Rottweiler op sy agterpote voor jou gehad wat jou letterlik teen die muur vasdruk, sy tande ooptrek en onaards grom? Ek het al. Ek kon nie hol nie, daar was ‘n muur wat ongeskik naby aan my rug was. Vasbyt is om partykeer terug te grom. Maar ek kon nie! Ek het gerattle soos ons huis in Villieria as die stoomtrein verbykom. Gelukkig het so ‘n maer tantetjie my kom red. Soms wys die lewe sy tande aggressief vir ons en dis dán wat Paulus sê: swaarkry kweek vasbyt.  

Het jy ‘n einddoel in sig? Of is jou verhouding met die Here gedryf deur aardse gewin? Here, ek sal U kind wees as alles altyd net goed gaan. Jammer, dis nie Bybels korrek nie.

Openb 2:1-5
Skrywe aan die leraar van die gemeente in Efese: So sê Hy wat die sewe sterre in sy regterhand vashou en wat tussen die sewe goue lampe rondgaan: Ek weet alles wat julle doen. Ek ken julle onvermoeide arbeid en julle volharding. Julle kan nie slegte mense verdra nie. Julle het ondersoek ingestel na die mense wat voorgee dat hulle apostels is, en dit nie is nie, en gevind dat hulle leuenaars is. Verder volhard julle ook; julle het baie vir my Naam verduur, en julle het nie moeg geword nie. Maar Ek het dít teen julle: julle het My nie meer so lief soos in die begin nie. Dink daaraan hoe ver julle al agteruitgegaan het. Bekeer julle en doen weer wat julle in die begin gedoen het. Anders, as julle julle nie bekeer nie, kom Ek na julle toe en sal Ek julle lamp van sy plek af wegvat!  

Sjoe, is dit nie ‘n wake-up call nie? Miskien volhard ons, maar ons het nie die Here so lief soos vroeër nie. Ons moet ook volhard in ons liefde vir die Here. Kom ons wees eerlik met mekaar: deurdruk en vasbyt is nie altyd maklik nie, volhard in geloof is nie altyd maklik nie, om roekeloos te glo is nie maklik nie, dissipline is nie maklik nie... maar, die beloning vir hierdie goed is altyd onbeskryflik.  

Ek kry toe ook daar in die weermag ‘n streep. Hulle noem dit ‘n “bly gemaakte troep”. Maar boeta, ek was trots, en kry op die koop toe R20 per maand ekstra salaris. Bly gemaak of te not, ‘n rang is ‘n rang. En die rang wat ek en jy gaan kry is ook ‘n streep. Net een streep is genoeg, en dis die streep wat Jesus deur jou sonde trek... sodat dit nie meer tot die dood lei nie. Kan jy vasbyt tot die einde toe? Sien jy die einddoel? Kan jy opstaan as jy geval het? 

Byt vas. Beur vorentoe.