Mens kry nogal
interessante grafskrifte. Ons spot mos altyd met dié een: “Hier lê Meraai,
links gewys en regs gedraai”. Een wat ek al gesien het van ‘n motorboot
renjaer is: “Hy het gesterf soos hy geleef het”
Wat maak jy met
jou strepie? Dit is nou daardie strepie tussen die twee datums op jou
grafsteen. Wat staan alles geskryf in daardie enkele ou strepie?
Spr 14:12 & Spr 16:25
Daar is 'n lewenswyse wat vir 'n mens reg kan lyk, maar die uiteinde
daarvan is die dood.
Die lewenswyse van party mense is
duister. Mense leef roekeloos, het geen agting vir die dood, gee nie om
wat hulle doen nie, tart selfs die dood.
Ja dit is inderdaad so dat die mens
geskep is met die wete dat die dood kom.
Gen 2 : 19b “Stof is jy, en jy sal
weer stof word”.
God het die mens met ‘n bepaalde
lewensverwagting geskep. Daar staan geskrywe dat jy 70 jaar oud sal
word, en as jy sterk is 80. Almal wat gebore is, sal weer ‘n aardse dood
sterf. Maar wat verwag die Here van ons in hierdie relatiewe kort tyd van
70 , 80 jaar? Hoeveel keuse behoort ons in hierdie tyd uit te
oefen ten opsigte van ons lewensstyl? En kan ons maar net maak wat ons
wil? En aan wie behoort ons in hierdie tyd? Dit lyk vir my daar is mense
wat nie besef dat ons aan God verantwoording moet doen en verantwoordelik
is aan ander mense nie - familie, vriende, gesin, ens. mense wat vir jou
lief is.
Spr 15 : 9 Die Here het 'n afsku van die lewenswyse
van goddeloses; maar Hy het dié lief wat volgens sy wil lewe.
Maar tog lyk dit of dit nie net die
goddelose is wat hierdie verkeerde lewensstyl aankweek nie. Kyk maar hoe
maklik ons almal die regte dinge net so bietjie buig. Dalk gaan jy my
haat vir wat ek nou gaan sê, maar dink net bietjie: boetes word nie betaal
nie, neem deel aan omkopery, ry te vinnig, selfoon op die oor. ‘n Klomp
dinge (ek is self ook skuldig aan party hiervan). En dan bid ons vir die
Here dat Hy ons asseblief moet seën. Ek wonder wat dink Hy?
“Daar is ‘n lewenswyse wat vir ‘n mens
reg kan lyk, maar die uiteinde is die dood”.
Ek luister na ‘n gesprek waar ‘n persoon
spog met roekeloosheid: 250 km per uur op ‘n motorfiets is alledaags.
Haal ook sommer die nommerplaat af – vir ingeval hy gevang word. Teen
daai spoed ry jy ‘n hele gesin in ‘n motor morsdood. Daar word met smaak
vertel hoe lisensies en boetes verneuk word. So asof die Here nie hierdie
gesprek hoor nie. Ek ken twee persone wat so in ‘n ongeluk was en met
millimeters die dood gemis het. Sjoe, ons kan so maklik twee lewens lei,
daardie een Sondag waar ons die Here se Naam aanroep en Sy seën oor ons
afbid, en Maandag is dit ‘n “Jeckyll and Hyde” storie.
So ‘n lewe is nie wat die Here vir ons
bedoel het nie. Nogal snaaks dat as ons die wet van die Here lees, dan wil
ons so graag dit agter ons sit en sê:- “Jesus het in die plek van die wet
gekom”. Maar hierdie wet beskerm ons ook soms teen onsself.
God se bedoeling vir ons is goed, maar
Hy het ook vir ons ‘n verantwoordelikheid gegee om na te kom. En dis
maklik, hou net by die reëls. Eendag op “sê jou sê” was die gesprek oor
ouers wat hulle kinders los laat staan op die sitplek. Sê nou so ‘n kind
sterf in ‘n ongeluk as gevolg van sy ouers se nalatigheid, wat sal hulle
sê? Dalk sal hulle vra:- “waar was die Here?” “Hoekom het Hy dit
toegelaat?” Die Here het vir ons ‘n wonderlike verstand gegee, ook liefde
vir onsself, en vir die lewe. Maar besef ons aldag wat ons
verantwoordelikheid is?
Roekeloosheid met ons lewe. Natuurlik
hou dit nie op by snaakse dinge wat ons aanvang nie. Sommer ook hoe ons
ons gesondheid kan opmors. Hier praat ek natuurlik vreeslik met myself.
Die Here sê jou liggaam is ‘n tempel van God. Iemand wat bietjie oorgewig
is, sê eendag: “Ja my liggaam is ‘n tempel van God, nie ‘n kapelletjie
nie, maar ‘n katedraal!! “ Ek is self bietjie katedralerig!
Daar is siektes wat ons oor onsself
bring – jy weet waarskynlik van ‘n hele paar waarna ek nou verwys. Ek
wonder net wat die Here van ons verwag in hierdie verband. Die probleem
is, mens kan maklik sê dat dit mý liggaam is, en mý lewe, maar wat van diè
om ons wat daardeur geraak word? Het jy al daaraan gedink? Sê nou iemand
sterf onnodig as gevolg van hierdie roekeloosheid, hoeveel geslagte nà
jou word uitgewis? Nee, dis nie reg nie. Ek dink nie ons lewens behoort
net aan onsself nie. Ons het ‘n verantwoordelikheid teenoor onsself, ons
familie, ja, selfs vriende, die gemeenskap en dan meeste van alles teenoor
die Here. Ons kan nie maak wat ons wil nie. Die lewens-strepie behoort
nie net aan jou nie!
Daar is ‘n hemel, en ‘n hel, ‘n God en
die bose, of jy dit glo of nie. ‘n Regte- en ‘n verkeerde lewenswyse.
Ons hoef nie baie slim te wees om dit te weet nie. Reg deur die Bybel
word ouderdom (hoë ouderdom) as seën van God voorgehou. Maar hoeveel
waarde heg ons aan hierdie lewe? Wat verwag die Here van ons in hierdie
70, 80 jaar, wat verwag Hy van ons strepie? Ons moet Hom dien, natuurlik,
maar meer nog. Hy verwag dat ons sinvol sal lewe. Nie net
tot ons eie vermaak en genot nie. Ons moet verantwoordelikheid vat.
Ironies, hierdie mense wat so roekeloos leef, is juis dié wat in die tyd
wat die mat onder hulle voete uitgeruk word, vra: “waar was God dan?”. En
in hierdie selfde tye sal die wat reg leef, sê, “met die Here sal ek
anderkant uitkom”. Die lewe gaan ook oor die hiernamaals.
Pred 12:1-7
Dink aan jou Skepper in jou jong dae
voor die swaar dae kom, die jare aanbreek waarvan jy sal sê:
Ek het daar niks aan nie. Dit is die tyd
wanneer die son donker sal word en ook die daglig, die maan en die sterre,
die tyd wanneer dit weer bewolk word ná die reën. Dit is die tyd wanneer
die wagters van die huis sal bewe, die sterk manne waggel en die malers
ophou maal omdat hulle min geword het, die tyd wanneer dit donker word vir
dié wat deur die vensters kyk, wanneer die deure na die straat toe
toegemaak word, die geluid van die meul dof word, die tyd wanneer 'n mens
opstaan as die voëls begin sing al hoor hy geen lied meer nie. Dit is die
tyd wanneer hy bang is vir 'n hoogte en vir alles op die pad skrik, die
tyd wanneer die amandelboom in bloei staan, die sprinkaan homself moeisaam
voortsleep en die kapperkruid nutteloos word, die tyd wanneer die mens na
sy ewige woning gaan en dié wat treur, op die straat rondgaan, die tyd
wanneer die silwerdraad afgebreek word en die goue kruik breek, die kruik
by die fontein stukkend breek en die wiel by die put stukkend val, die tyd
wanneer die stof na die aarde toe terugkeer soos dit was, en die gees na
God terugkeer wat dit gegee het.
Dink aan jou Skepper in jou jong dae.
Leef ‘n sinvolle, aangename lewe. Doen ‘n risiko-analise voor jy iets
snaaks aanvang. En as jy besluit om die hoë risiko pad van roekeloosheid
te loop, moenie dit vreemd vind as mense nie vir jou veiligheid wil bid
nie. Nee jong, dit mors goeie gebedstyd.