Die naweek van 10 – 11 Maart was dit weereens kamp vir persone met verskillende gestremdhede, of liewer uitdagings, soos ons kies om dit te noem. Aangesien dit ‘n opvolg kamp was van die groep wat verlede jaar gekamp het, was dit sommer lekker en prettig met die intrapslag, want almal het mekaar mos nou geken. Daar was egter enkele nuwelinge saam. 

Bykans die hele groep wat verlede keer daar was het dit bygewoon. Natuurlik sou hulle, hulle het dan steen en been gekla omdat hulle nie die kamp van Maartmaand kon bywoon nie! 

Hoewel die konsep keer op keer herhaal, is die program met elke nuwe groep splinternuut. Hierdie keer was die tema “onder konstruksie”, uit Fil 1:6,  wat verduidelik dat ons onder konstruksie bly totdat die Here die werk in ons afgehandel het, en ons gereed is vir ons hemelse tuiste. Dieselfde span wat die vorige twee kampe aangebied het, was weer aan die roer van sake, en Francois en Claudia du Toit het weer die Saterdag ingekom om die groep met tonne pret en speletjies te vermaak. Dit is nie net ‘n speel kamp nie, daar is ook ‘n hele klomp Geestelike sessies aangebied, en die Sondagoggend is daar natuurlik ook Nagmaal gehou. 

En ja, daar was ook weer konsert gehou, deur die kampers vir die kampers. Oom Dawie – ‘n inwoner van Deo Volente – het ‘n opvoering gedoen van Robbie Robbish, ‘n dronkie wat die Here ontmoet op een van sy nagtelike straat wandelings. Diep stukkie, wat oorgegaan het in ‘n tyd van aanbidding en sang. 

Deo Volente Bush Adventures het weereens gesorg dat alles seepglad verloop, en ons magies het behoorlik gebult van die lekkerste kos. Wally, Tina, Lofty en Ella se harte is inderdaad in hierdie tipe kampe, want die terrein is ook aan die Here en Sy werk opgedra. Omdat hulle ons ook so goedgesind is, is hulle konstant besig om die fasiliteite te verbeter om dit makliker en meer toeganklik te maak. 

Sondagaand was daar ‘n lewendige terugvoersessie op Rippel, sodat Rippel se gawe luisteraars wat geld skenk, kan hoor hoe die fondse aangewend word. Omdat hierdie mense met sulke oop harte bygedra het, kon ons heelwat bederfies in die kamp inbou. Nogmaals dankie aan almal daarvoor. 

Ek is seker jy wonder wat volgende? Wel, na die winter hou ons weereens kamp, en weereens vir ‘n nuwe groep. Hou maar jou oor op jou FM-pie vir inligting. Kort op sy hakke sal ‘n opvolg vir “groep 2” gehou word, dit is die mense wat Maartmaand gekamp het. 

Prys die Here vir Sy groot genade. Ons glo dat Hy besig is om mense heel te maak wat dalk glo dat hulle liggaamlik stukkend is. En so raak Hy ook vir ons aan deur vir ons te wys dat Hy tot alles in staat is, en ook kliphard werk in mense met spesiale behoeftes.

Willem

10-11 April se kamp vir persone met verskillende uitdagings was  vir my twee intense dae. 14 gestremdes, vergesel van hulle 13 helpers en die aanbiedingspan van 8 het saam gekuier by Deo Volente Bush Adventures. Ons het saam gespeel, gelag en geskree van die pret, maar ook saam gehuil en saam gebid, en saam voor die Here gebuig sodat Hy sy konstruksie werk in ons kan doen; ons het saam die Here se naam groot gemaak met ons lofliedere, saam kerse aangesteek by die kruis as simbool van ons toewyding aan die Here, en saam feesgevier by die nagmaalstafel.

Ek het soveel oop harte en oop arms gesien, ek het soveel liefde ervaar, ek het so baie drukkies gekry, dat ek na hierdie naweek nie weer dieselfde kan wees nie!

Prys die Here vir Sy groot genade. Ons voel só geseënd en bevoorreg om hierby betrokke te wees!

Wilna

... Omtrent die kamp, ons wil net baie, baie dankie sê vir die heerlike naweek.  Alles was voortreflik.  Wat die (onder konstruksie) betref - Retha en ek is waarlik op hierdie oomblik onder groot konstruksie.  Met die geld saam gaan dit baie moeilik, maar ek vertel dit nie om te kla nie, maar om te getuig dat ons dit alles vir die HERE gegee en vertrou absoluut op Hom (JESUS) OM ONS DEUR TE VAT EN UITKOMS TE GEE.  Die kamp het waarlik gehelp om weer moed te skep en die saamwees met ons ou kampmaats was opbouend.  Die kamplied en al die ander liedere was heerlik om te sing en die HERE was waarlik teenwoordig. 

Natuurlik moet ons praat van die lekker speel die Saterdagmiddag en alles wat daar gebeur het, het 'n mens net laat ontspan en vergeet van alle stres. 

Laastens maar verseker nie die minste nie.  Die heerlike kos en drinkgoed.  Honger kon niemand gewees het nie. 

Retha en Paulie. 

Baie dankie vir nog ‘n AWESOME kamp!  Dit was heerlik, ontspanne, gees-voedend, voelgoedhormone-afskeidend, dankbaar-makend, lofaandieHere-uitterend, sommer net AWESOME in een woord! 

Op Radio Rippel het ons Sondagaand gehoor dat Louis lekker ge-eet het; JP se ouers het ‘n goeie vibe in hom opgetel, al die mense met wie ek by die kamp gepraat het, was dit eens dat die maskers geval het; onpretensieus, dienend, regtig Jesus wat die gestremdes kom bedien het. 

Ek dink die helpers het die kersie op die koek gekoek gekry sonder dat dit iets van die gestremdes weggeneem het: tonne pitkos in die deurlopende tema want ek dink ons is baie meer onder konstruksie as “hulle”.  Dankie dat julle die Heilige gees toegelaat het om deur julle te praat/verduidelik/getuig.  Die persoon wat ongeraak van die kamp af weg is, is ‘n houtpop/dood/deur satan vermoor. 

Ek wens net ek kon meer doen.  Span my seblief volgende keer in vir enigiets – van aartappels skil/skottelgoed was/vetkoek bak/springmielies spring/enigiets. 

Nogmaals Dankie  -  dit was GREAT!! 

Al die eer aan die Here Jesus

Retha