|
 Ons het
vroeër gepraat oor besig wees (klik
hier om te lees >>)! Miskien kon jy met party goed
identifiseer, dalk het dit jou so bietjie ongemaklik, of skuldig
laat voel, maar dis nie my bedoeling nie. Die punt is, daar is
veronderstel om tyd te wees vir alles, maar dis maar eintlik moeilik.
Vraag is, hoeveel
lekker dinge is nog oor in jou en my lewe? Sien jy uit na vandag?
Wees eerlik. Was gister lekker? Dink gou aan 'n paar hoogtepunte die
afgelope week of twee. Dink jy volgende week gaan aangenaam wees?
Het jy 'n rustige naweek voor jou?
Pred 2 : 17 - 26 "Ek
het die lewe gehaat, want alles wat in hierdie wêreld gebeur het,
het vir my sleg afgeloop. Alles kom tot niks, dit is 'n gejaag na
wind. 18 Ek het alles gehaat waarmee ek my in hierdie wêreld met
soveel sorg besig gehou het, want ek moet dit nalaat aan dié een wat
ná my kom, 19 en wie weet of hy 'n wyse of 'n dwase mens sal wees?
Dit kom dus ook tot niks. 20 Ek het in vertwyfeling geraak oor alles
waarmee ek my met soveel sorg in hierdie wêreld besig gehou het. 21
'n Mens wat met wysheid en kennis gewerk en sukses behaal het, laat
sy besittings na aan een wat glad nie daarvoor gewerk het nie. Dit
is nie reg nie. Ook dit kom dus tot niks. 22 Wat het die mens nou
eintlik aan alles waarmee hy hom met soveel sorg en ywer in hierdie
wêreld besig hou? 23 Elke dag bring vir hom pyn en elke onderneming
ergernis; selfs snags kom hy nie tot rus nie. Ook dit kom tot niks.
24 Dit is nie aan die mens self te danke dat hy kan eet en drink en
onder al sy arbeid nog die goeie kan geniet nie. Ek het ingesien dat
dit 'n gawe uit die hand van God is. 25 Wie kan eet, wie kan geniet
as Hy dit nie moontlik maak nie? 26 Vir die mens met wie se lewe God
tevrede is, gee Hy wysheid, kennis en blydskap. Maar die een met wie
Hy nie tevrede is nie, kry die taak om op te gaar en bymekaar te
maak en dit dan te gee aan een met wie God tevrede is. Ook hier kom
dit dus tot niks. Dit is 'n gejaag na wind."
Alles 'n gejaag na
wind. Net té besig! Nou ja, ek het nie antwoorde nie! Ek kan maar
net vir jou sê wat jy mis as hierdie rotresies die oorhand van jou
kry!
Ons het almal maar te
min tyd, maar wat waar is, is dat "Ek is sooooo besig", 'n
statussimbool geword het. Ons het almal 24 ure per dag, sewe dae per
week, 52 weke in 'n jaar. Gebruik van daardie tyd om bietjie by
iemand stil te staan.
Matt 25 : 34b - 40
" Die koninkryk is van die skepping van die wêreld af vir julle
voorberei. Neem dit as erfenis in besit, 35 want Ek was honger, en
julle het My iets gegee om te eet; Ek was dors, en julle het My iets
gegee om te drink; Ek was 'n vreemdeling, en julle het My gehuisves;
36 Ek was sonder klere, en julle het vir My klere gegee; siek, en
julle het My verpleeg; in die tronk, en julle het My besoek." 37 Dan
sal dié wat die wil van God gedoen het, Hom vra: "Here, wanneer het
ons U honger gesien en U gevoed, of dors en U iets gegee om te
drink? 38 En wanneer het ons U 'n vreemdeling gesien en U gehuisves,
of sonder klere, en vir U klere gegee? 39 Wanneer het ons U siek
gesien of in die tronk en U besoek?" 40 En die Koning sal hulle
antwoord: "Dit verseker Ek julle: Vir sover julle dit aan een van
die geringste van hierdie broers van My gedoen het, het julle dit
aan My gedoen."
Dit lyk tog of dit
Jesus se bedoeling was dat ons 'n verantwoordelikheid teenoor ander
(die geringstes - die armes - siekes - hongeres) het, en dit neem
tyd. Besig wees, so met my eie goed, is selfsugtig. Hoe gereeld maak
ons nie beloftes teenoor ander nie, net om dit nie na te kom nie.
Is daar iemand wat jy
weet jy 'n kuier, of 'n welwillendheidsbesoek skuld? Dalk jou eie
ouers, of jou kinders? Miskien was jy ook al in die situasie waar jy
hoor iemand is oorlede, en dan voel jy soos 'n hond, want jy wou nog
…… En dan spog ons so half op troues en begrafnisse, dat dit al tyd
is wanneer ons bymekaar kom.
Ek en jy kan niemand
bedien as ons nie tyd daaraan spandeer nie.
Dikwels koop ons
verantwoordelikhede teenoor ons kinders af met geld, maar dit werk
nie met ander nie. En so, stadig maar seker, sterf vriendskappe, en
verhoudinge. Ook teenoor ons kinders en ons huweliksmaats. Ek en
vroulief, werk saam. Jare al. Iemand vra eendag: "Hoe kry julle dit
reg? Ek en my vroulief sal mekaar vermoor" Ek antwoord toe: "Dis
snaaks! Hoe kan jy saam met 'n ander man se vrou werk, maar nie jou
eie nie?" Ons het nie meer tyd vir mekaar nie, want ons maak nie
meer tyd nie. Hoe kan ons tyd maak? Deur ons prioriteite reg te
stel.
Ons oordrewe besig wees bring mee dat ons verhouding met God
skipbreuk ly. Is daar nog tyd om net te gaan stil raak? Hoe sal ons
God se stem hoor as ons nooit stilraak nie? Ons sê so maklik ons vra
God se wil vir alles in ons lewens, maar dis nie waar nie! Eintlik
stuur ons sulke sarsies gebede op om vir God in te lig oor wat Sy
wil vir ons moet wees. Dan kry die Heilige Gees nie tyd om met ons
te praat nie. Of ons hoor wat ons wil. Of ons hoor niks.
Luk 10 : 38 - 42 "
Op hulle reis het Jesus in 'n dorp gekom waar 'n vrou, Marta, Hom as
gas ontvang het. 39 Sy het 'n suster gehad, Maria, wat aan die voete
van die Here gaan sit en na sy woorde geluister het. 40 Maar Marta
was baie bedrywig om alles klaar te maak. Sy kom toe daar staan en
sê: Here, hinder dit U nie dat my suster my alleen laat bedien nie?
Sê sy moet my kom help!"
Tipiese voorbeeld.
Jesus kom kuier by Marta en Maria. Dalk wil Jesus vroegoggend by jou
kom kuier. Daar in jou binnekamer. Dalk het Hy iets op die hart.
Dalk het Hy so bietjie goeie nuus vir jou, of 'n nuwe rigting vir
jou lewe. Miskien wil Hy jou kom help om 'n besluit te neem. Hy wil
dit dalk self vir jou sê. Dan sê ons nee, God praat nie met my nie,
en ons gaan soek 'n profeet wat vir ons kan sê wat God sê.
God se ritme is nie
net werk nie. Daar moet tyd wees vir Hom, jou gesin, jou kinders
een-een, lewensmaat - alleen soms. Vir vriende, ontspanning, genoeg
slaap, kwantiteit tyd. Glo jy aan kwaliteit tyd? Shame. Hoe sal dit
vir jou wees om na ’n restaurant te gaan en ’n stukkie steak so
groot soos ’n vuurhoutjie box te kry. As jy kla dat dit darem maar
min is, sê hulle vir jou maar dis uitstekende kwaliteit vleis, daar
is nêrens anders vleis van sulke gehalte nie. Hoe sal jy versadig
kom? Sal die gehalte jou versadig maak, of eerder ’n groter stukkie
vleis? Jou kinders en
geliefdes sal nooit versadig kom aan 'n stukkie afskeep tyd nie.
Om weer sinvol te
bestaan in vandag se tye, gaan beteken dat jy die beheer oor jou tyd
moet terugvat. Hou op om "ek is besig" as 'n verskoning te gebruik!
Of as 'n statussimbool, dit beïndruk in elk geval niemand nie. Spog
liewer oor dit wat jy bereik het in 24 uur per dag, wat tot voordeel
van ander ook is.
Raak weer bekend aan
jou kinders. Kinders noem jou dalk naderhand "oom Pa"! Los die werk
bietjie by die werk. Jy word in elk geval nie betaal vir die oortyd
nie. Pak minder goed aan. Neem weer bietjie voorraad, besluit om 'n
paar goed uit te sif. Spreekwoord sê mos "ek sukkel om al die balle
in die lug te hou". Wel, laat val van die goed en kry weer jou lewe
terug.
|
