|
|
|
KAMP 10:6-8 Februarie 2015
Al wat lekkerder is
as 'n mannekamp, is nog 'n mannekamp. En net soos mens dink dat dit nou
uitgedien raak, verstom die Here jou met getalle wat jy dink nie moontlik is
nie. Die sukses van hierdie afgelope kamp is toe te skryf aan Pierre van
Ryneveld Gemeenskapskerk se manne, asook Ds Henk en Ds Jan se bydrae tot die
kamp. Wie sou kon dink dat bykans 50 manne sou inskryf vir die kamp?
Ons het besluit om nie 'n
spesifieke tema vir die kamp te gebruik nie en die Here vertrou vir leiding,
en toe kom die gedagte van vergifnis nogal gereeld op die tafel.
2 Kor 5:17 was 'n teks wat met ons
as manne gepraat het. "Wie aan Christus behoort is 'n nuwe mens, die oue is
verby, die nuwe het gekom... "
Behalwe vir die Geestelike inhoud
was daar natuurlik baie pret. Foefie slide in die dam was 'n hoogtepunt, en
voorts was daar 'n klomp fietsryers wat die hitte trotseer het. Die swembad
was 'n lafenis wat bitter nodig was en was gereeld volgepak. Christo en
Elmar, twee gestremde persone, het ons almal se uitkyk op die lewe so effe
verander. Elmar is gesig gestremd, maar hy het geen bang haar op sy kop nie.
Spring sommer soos 'n wafferse McGyver van die spring platform af en ry
boonop die foefie slide in die water in. Christo, 'n hemipleeg met 'n
spraakgebrek, het ons verstom met sy gevleuelde woorde en pragtige gedig wat
die kamp perfek opgesom het.
Saterdagaand se veldstap was baie
spesiaal en Sondag se nagmaal geleentheid, wat Ds Henk aangebeid het, het
die kamp op 'n besondere manier afgesluit. Ek glo die Here het elkeen van
ons op 'n besondere manier aangeraak.
Nou ja, wat volgende? Nog 'n kamp
natuurlik! Hou hierdie spasie dop vir inligting oor 'n volgende kamp ...
Klik hier om van die
manne se terugvoer te lees en foto's te kyk >> |
|
KAMP 9: 21-23
Februarie 2014
Daar is omtrent ge-re-load, re-lax, re-flect en re-fresh op dié
kamp. Die kamp is bygewoon deur 29 ouens en was weereens baie
inspirerend. Dit het meegewerk dat ons in diepte by die Here kon
stilstaan en luister. Pret, speletjies, saamsing en heerlike
Kwaggasrus-kos het die prentjie mooi afgerond.
Klik hier om van die manne se terugvoer te lees en foto's te kyk >> |
|
KAMP 8: 16-18 Augustus 2013
Mannekampe “werk” nou maar eenmaal, en niemand wat dit bywoon sal
nie saamstem nie. Wat werk? En wat beteken “werk”? Ek glo 29 ouens
sal 29 verskillende menings hieroor hê, en ek dink dit kom ook
duidelik uit as jy die terugvoer van ouens lees.
Die naweek van 16
– 18 Augustus was die eerste mannekamp onder die vaandel van Heuning
bedieninge, maar steeds aangebied deur die wenspan van die
historiese Rippel 90.5 se Geestelike aanbieders, aangevul deur ‘n
paar veterane van die destydse Moreleta mannebediening. Die tema van
die kamp was “Die moed van ‘n leeu”.
Daar is nie
afgewyk van die suksesresep van ouds nie en die inhoud was steeds
gekenmerk deur diep Geestelike sessies en baie speel. Ons het egter
ruim tyd gemaak vir saampraat en die kampers het entoesiasties
deelgeneem aan gesprekke soos “Wat verstaan jy nie van God nie” en
“Wat is die definisie van konflik en hoe hanteer jy dit” en “Gee die
stokkie oor”. Daar is besin oor die grootheid van die skepping en
ons het ook gepraat oor manne met “guts”. Saterdagmiddag het lekker
dinge gebeur. Party ouens het gaan foefieslide ry, ander het gaan 4
x 4 en party het sommer net lekker gerus en saamgeklets.
Kwaggasrus se
mense het ons weereens bederf met heerlike kos wat in oorvloed
beskikbaar was. Die terrein verbeter jaar by jaar teen ‘n tempo wat
mens verstom en word elke keer net mooier. Dit is werklik ‘n lushof
en die fasiliteite is van die beste wat beskikbaar is.
Mens word met
elke kamp verstom as jy sien wat die Here met manne doen. Die
gesprekke het regtig ‘n verandering in ons almal se lewens gebring
en mens moet net eenvoudig nuut dink na so ‘n naweek. Ek glo dat ons
as manne elke keer opnuut die Here in ons lewens ontdek en weereens
die Geestelike batterye laai. Ek glo dis hoekom soveel ouens weer en
weer terugkom en daarom glo ek die kampe moet net eenvoudig
voortgaan.
Niemand sal weet
wat gebeur ‘n huishoudings na so ‘n naweek nie, maar die getuienisse
van die verlede bevestig dat baie vrouens nuwe mans terugkry, en dan
manne se verhouding met die Here opnuut herstel en hervat word.
Die volgende kamp
sal plaasvind teen die einde van Februarie 2014.
Klik hier om van
die manne se getuienisse te lees en kyk foto's >> |
|
KAMP 7: 7-9 September 2012
Klik hier om van
die manne se getuienisse te lees en kyk foto's >> |
|
KAMP 6: 19-21 Aug 2011
Manne wil nou maar eenmaal
kamp.... en saam met Rippel het ons dit nou vir die 6de keer gedoen.
Dit klink half ge-yk om weereens te sê dit was wonderlik,
skitterend, en geseënd. Maar dit WAS! Hierdie keer was dit 'n kamp met 'n
verskil - geen ge-saalsittery nie, dit was 'n avontuurkamp in die
ware sin van die woord. Al ons sessies was buite in die veld gehou
en het gepaard gegaan met pret en aktiwiteite. Was dit 'n geestelike kamp?
Verseker! Dit was egter gekombineer met hope pret. Ons was verstom oor die
aantal inskrywings en met 86 persone was dit een van die grootste Rippel
kampe nog. Kwaggasrus het weereens alles moontlik gedoen om dit 'n
verrykende ervaring te maak en die fasiliteite verbeter elke jaar. Die kos
was nogmaals beter as 5-ster en die weer was wonderlik. Elke man is deur
die Here aangeraak en daar is ongetwyfeld groot lewensbesluite gemaak.
Heelwat "bagasie" is op Kwaggasrus agtergelaat en manne het teruggekom met
nuwe hoop en 'n vars uitkyk op die lewe. Hiermee 'n groot rippel
vir Rippel, asook borge wat dit moontlik gemaak het! Ons sien met 'n
verwagting uit na die volgende kamp.
(kyk foto's en
lees een van die manne se getuienis >>) |
|
KAMP 5: 15-17 Oktober 2010
... nog 'n heerlike Rippel
kamp met baie pret (kyk foto's >>) en mooi getuienisse (
lees meer >>) |
|
KAMP
4: 16-18 Oktober 2009
As iets lekker
is, gaan die tyd nou maar eenmaal vinnig om. Dis nou vir 'n gebeurtenis om
aan te breek en dan weer net so vinnig verby te gaan. Dit voel soos nou
die dag dat talle manne aangedui het dat hulle die vierde kamp gaan
bywoon, toe is hy weer op ons.
Meneer my
meneer, hier gaan ons alweer. En alweer. Vir die vierde keer. Natuurlik is
Kwaggasrus en Rippel mannekampe nou al sinoniem. Mooiste natuurskoon,
wonderlikste mense op die kamp, gasvryheid duisend en dan natuurlik die
pad.... deur 'n man se maag!!! Mmm, wat sal ons met daardie ekstra
kilo'tjies maak?
Dalk was dit
die ekonomie wat die getalle bietjie afgedruk het, maar steeds 'n skaflike
groep van sestig het opgeruk Kwaggasrus toe. Waarvan bykans die helfte
reeds vorige kampe bygewoon het! Tienie en Johan (span uitgesluit), hou
die rekord om tot nou toe al die kampe te kon bywoon. Soos belowe, het van
die vorige kampers mense saamgebring om in die pret en Geestelike
aktiwiteite te kom deelneem. Jy sien, die motto is hoeka:- “Jy hoef
niks”, en daarom kon manne ander mense met vrymoedigheid saambring,
omdat Rippel se mannekampe bekend is daarvoor dat ALMAL gemaklik en welkom
voel.
Lekker diep
Geestelike gesprekke, stiltetyd in die natuur, lofprysing tot laataand en
manne wat eenkant gaan saambid het, is algemeen op so 'n naweek. Selfs
twee jong bulletjies in matriek het gevoel dat hulle sommer van die eerste
oomblik welkom was. Raymond se kwinkslae was natuurlik weereens treffers
tydens sy sessies en almal is huistoe met sakke vol pitkos.
As gevolg van
'n gebrek aan reën was die kleilatgat droog. Gelukkig het die manne nie
besluit om mekaar met kluite toe te takel nie!!! Die nat foefieslide het
egter getrou “sy ding gedoen” en gesorg vir pret so reg uit die
kinderdae. Die manne met die vierwielspeelgoed het die ego's op die proef
gaan stel op die 4 x 4 baan, terwyl sommiges gaan afkoel het in die
swembad.
En toe... die
groot rugby. Vasgenael voor die TV (grootskerm), het een en elkeen verras
gesien hoe die Cheeta's vir hulle 'n plekkie in die Curriebeker eindstryd
teen die Bulle losveg. Wie het dit nou verwag? Inderdaad groot pret. Alles
deel van 'n Rippel mannekamp karakter.
Saterdagaand
was almal deur die Here gekonfronteer om te besluit waar hulle gaan wees
as hulle “flatline”, en die einde van hierdie bedeling aanbreek. Baie
het opnuut besluit dat hulle nie sonder Jesus hierdie lewe (en die een
hierna), wil aanpak nie. Wat is dan tog beter as om 'n kind van Jesus te
wees?
Die naweke van
22 Mei en 16 Oktober 2010 is reeds in die dagboek vasgepen om die Rippel
tradisie voort te sit. Maak jou aantekeninge en sit elke maand so ietsie
weg vir die volgende kamp. Maak sommer nou al daardie broer of vriende
bymekaar en gan bederf hulle met 'n lekker naweek.
Die volgende
kamp gaan 'n totaal ander karakter hê. Wag en sien ....
Lees gerus 'n
paar manne se getuienis
oor die kamp, en kyk na die
foto's. |
|
KAMP
3: 29-31 Mei 2009
...
en so, met die tyd, raak “Rippel Mannekamp” toe ‘n huishoudelike
term! Die naweek van 29 – 31 Mei het die derde in ‘n reeks van
vele Mannekampe plaasgevind, hierdie keer weereens by Kwaggasrus anderkant
Brits. Talle manne wat een, of albei, van die vorige kampe bygewoon het,
was weereens daar, omdat hulle teen dié tyd weet wat die woord “pret”
en “Geestelike verdieping” beteken.
Die
kamp was bygewoon deur 78 manne van oral oor Pretoria, tot so ver as
Ellisras en manne wat vorige kampe bygewoon het, het vriende saamgebring
wat van ver kom. Lekker om so ‘n verskeidenheid ouens bymekaar te kry
wat met een doel voor oë kom, en dit is om ‘n ontmoeting met die Here
te beleef.
Hoewel die program nie oorvol in terme van tyd was nie, was daar baie tyd
spandeer aan diep geestelike gesprekke, lofprysing, saambid en saampraat.
Nogal verbasend hoe vinnig ‘n man sy hart oopmaak as hy besef dat ander
mense met dieselfde uitdagings worstel. Dis ook dan wat manne by mekaar
raad en troos soek, en so het die naweek dan sy doel ten volle bereik.
Franna, Raymond, Kobus en Willem het weereens as fasiliteerders opgetree
en die lofprysingspan was die keer 4 man sterk!!!
Speeltyd
het egter ook gebeur, en die ouens het foefieslide gery in elke denkbare
posisie en styl. Vet pret!!! Om alles te kroon het die befaamde Super 14
eindstryd plaasgevind en die Bulls-koors het behoorlik hoog geloop tussen
die kampers. Wat kan mens meer vra as so ‘n weghol oorwinning? Na die
wedstryd is daar behoorlik gekuier om die kospotte.
En
so van kospotte gepraat, Michelle en haar span het weereens net die beste
voorgesit, in OORVLOED. Die pad na ‘n man se hart loop mos hoeka deur sy
maag!!! Soos die bekende advertensie tereg sê;- “Jou ma se kos”.
Eddy
en Michelle se gasvryheid en ywer het gesorg dat almal welkom en goed
versorg gevoel het. Vir meer oor Kwaggasrus kan jy gerus gaan loer op
www.kwaggasrus.co.za
Elke
man op die kamp het geleentheid gehad om diep in sy eie hart te kyk en die
Here die kans te gee om beheer te neem van sy lewe. Saterdagaand was baie,
baie diep, en talle manne het besluit om radikaal om te draai van sy ou weë
en ‘n nuwe koers in te slaan saam met Koning Jesus.
Lees getuienisse
van die kampers, en kyk na
foto's.
Natuurlik
gaan ons weer so maak, en sommer gou ook. Die naweek van 16 – 18 Oktober
is die volgende kamp, weereens by Kwaggasrus. Selfde plek, selfde styl,
maar nuwe inhoud. En natuurlik ook die nat foefieslide…
Hou
jou oor styf teen jou draadlosie op 90.5 FM vir inligting, en sit solank
ietsie ekstra in die spaarvarkie. Dis goedkoop, weet jy? Teen ongeveer
R390 per persoon kan geen mens bekostig om tuis te bly nie.
Sien
jou daar.
|
|
KAMP 2: 14-16
November 2008
Wat maak 'n kamp
besonders? Hoekom gaan mense weer en weer op mannekampe? Ons weet tog
almal dat die geestelike 'high" weer verbygaan en dat die daaglikse
gestoei van die lewe maar weer die oorhand kry. Dis seker waar, maar een
en almal het 'n ervaring gehad wat nie in woorde beskryf kan word nie. Op
hierdie kamp het die Here manne diep aangeraak en baie harte van klip
uitgeruk en vervang met harte van vlees.
Baie, maar
baie manne het met groot hartseer en groot probleme by die kamp aangekom.
Miskien was die meeste nie eintlik lus daarvoor nie, want probleme maak
mense depressief. Wie is dan nou lus vir 'n klomp "hoogheilige"
manne as jou lewe vol moeilikheid is? Wel, almal het baie gou besef dat
niemand se lewens volmaak is nie, en dat ons almal maar in dieselfde
bootjie sit. Miskien was dit juis dit wat die kamp besonders gemaak het, want
manne het gou met mekaar begin gesels en probleme bespreek.
Die grootste
deurbrake het egter op diep Geestelike vlak gebeur, waar die Here een en
almal aangeraak het. Die temas was gemik op die hart van die man, die
stiltetyd het almal aangeraak, en die vergifnis gedeelte het ouens groot
besluite laat neem. Wie sou wegry by Kwaggasrus sonder nuwe besluite? Wie
sou onaangeraak vir vroulief (en kinders) vasdruk by die huis?
Soveel vir
die ernstige sy.... Miskien was die kleilatgooi en "foefieslide"
net wat die manne nodig gehad het om weer kind te wees. Jy sien, niemand
kan kleilatgooi én bekommerd wees nie. As jy nie konsentreer nie, kan dit
seer wees!!! Nuwe vriendskappe is gesmee rondom speeltyd en die ontspanne
atmosfeer was net wat die dokter bestel het.
Almal wil
weer gaan kamp, en almal was dit eens dat die plek weer Kwaggasrus sal
wees. Wie sal Eddie en Michelle se gasvryheid vergeet? Om nie eers te
praat van die oorvloed kos nie!!!
Lees
getuienisse
van die kampers, en kyk na
foto's.
|
|
KAMP 1: 30 Mei
- 1 Junie 2008
Die tema was
"Manne van die Woord", en aktuele onderwerpe is bespreek, nl:-
lofprysing, stiltetyd, manne se emosionele pyn, pa-kind verhoudinge, die
huwelik, en die man in die huis. Hoewel die program redelik besig was, was
daar genoeg tyd om vriendskappe te bou, en manne hulle probleme, maar ook
genietinge, met mekaar kon bespreek.
Hoe kan 'n mens die
sukses van so 'n kamp beoordeel? Wel, as manne hulle harte vir die Here
gegee het, is daar 'n siele-oes. Dit het gebeur. As manne nuwe besluite
geneem het, is daar verandering in hulle lewens. Dit het gebeur. As manne
besluit het om dinge by die huis te gaan regmaak, en manne van die Woord
te word, is daar gesinnne wat 'n nuwe pa en man terugkry. Dit het ook
gebeur.
Hierdie kamp was
gekenmerk deur 'n soek na God, na 'n hunkering om in 'n nuwe verhouding
met Jesus Christus te staan, en om te weet dat Jesus dié een is waar ons
oplossings vir ons probleme kan gaan soek. Almal het versterk huistoe
gegaan, en almal het net weereens besef dat Christenskap 'n integrale deel
van ons lewensmondering moet wees. Wie sal weet wat in elke huis gebeur
het na die naweek? En wie sal weet hoe manne se denke oor God verander, as
die Heilige Gees sy intrek geneem het? Ons gebed is dat die Here iets
blywend in elkeen van ons kom doen het.
Lees
getuienisse
van die kampers, en kyk na foto's.
|
|
~Willem |
|